Odhivela winonikavihera ogonjhiha woova

1. Kadda muthu wa iyo podi ofwanyiwa makathamiho baani enaamuthukulele woova?

KADDA muthu wa iyo podi ofwanyiwa makathamiho mwigumini enaamuthukulele woova. Kabeni noone yopadduwa ya ddibila Nestor vamodha ni mwariye María, yafuna otamela mburo onahoweleya anamalaleya.b Wihina yande werana yeyo, yohowela ojajaliha egumi yewa. Mbwenye aliwa yowoova oyelela ohagalala mwaha okalawo ni korowa eg’onove baahi. Biniam nukala Namona a Yehova elabo mabasihu yakoddihiwiwawo, oliye ahinona wihina eerege oharahariwa. Bumwahaya obajha woova. Mbwenye oliye ahithabwa woona nuwubuwela makalelo amudhaye yamuharaharigiwa mwaha okala Namona a Yehova. Valérie waddeliwa wihina ohukanna Kanser owopiha vanlubale, teto yahirusa onfwanya mediku aamoperari ahinvahile nikame. Mwaha wa yeyo, oliye woovaga okwa.

2. Mwahaya bwaddi kanihiye woova onigonjhiha?

² Onofwanyiwaga makathamiho yutotele woova? Owinjhiva wa iyo nnofwanyiwa. Nahiya woova onigonjhiha iyo podi werana dhothoma dhabure, dhakwerebeyihe wandana wehu ni Yehova. Siyeyo Saddana anafuniye. Saddana anolabihera woova wehu wihina naahiye mabasa oolaleya ni malamulo mamodha a Yehova, malamulo yayo podi okala olaleya muthenga wapama. (Apo. 12:17) Saddana dabure, kanna thagaraga ni dakopolo. Mbwenye akala dhiri ndo, nnibarele addi?

3. Nnande addi ogonjhiha woova?

³ Nahanganyedhaga wihina Yehova ari ni iyo ni anondhivela, Saddana kanantotele woova. (Sal. 118:6) Motajhiha, namaleba a Salmos 118 ahifwanyiwa makathamiho oorusa. Ahikanna amwiddani owinjhiva ni akopolo (versu 9, 10). Malabo mamodha, otujiwa (versu 13). Teto ahisinyusiwa ni Yehova (versu 18). Naarive dhigaari ndo, oliye wiiba egi: ‘Kaginoove.’ Yamuthukulele namaleba Salmo ola wiiba ddi? Oliye ahinona wi naarive agasinyusiwe ni Yehova, Baabe Yehova oomudhivela vanlubale. Teto ahikanna ebaribari wihina Yehova eere omukavihera ogonjhiha makathamiho bi makathamiho. — Sal. 118:29.

4. Nahanganyedhaga wihina Yehova anondhivela woova baani nnagonjhihihu?

⁴ Sapama orumedha ni murima wehu wamutene wihina Yehova anomudhivela kadda muthu wa iyo. Okanna ebaribari yela winere onikavihera, (1) woova ohanda osapela murala wehu; (2) wawoova athu, ni (3) woova okwa. Addibila ni arogola esorihiwe ddima yobajha, yahanda ogonjhiha woova wewa mwaha kiyanganyedha wihina Yehova anowadhivela.

WOOVA OHANDA OSAPELA MURALA WEHU

5. Mulobwana ari musolo wemudhi dhithu baani dhinamuthukulela woova? (Osugwe fotu yavakapani.)

⁵ Mulobwana ari musolo wemudhi kanapwaza mutholo waye wosapela muralaye. (1 Tim. 5:8) Akala ori musolo wemudhi podi wera mwaha wa koronaviru ohayelela mabasawo. Podi wera wahithuwathuwa vanlubale mwaha ohanda osapela murala wawo ni ohanda oliva nyumba mwalugarinyu. Akala ohayelela mabasa podi wera onowoova ohafwanya mabasa mamodha. Obe ninga empadduwele Nestor ni María, onowoova ojajaliha egumawo ni okalawo ni korowa vag’onove. Saddana anolabihera woova wula ni ohanda wathukulela amodhaya ohiya omulabela Yehova.

6. Saddana anafuna ddi ni iyo?

⁶ Saddana anafuna nrumedhege wi Yehova kanandhivela ni kanaanikavihere okabelela murala wehu epaddi yomwiilini. Mwaha wa yeyo, iyo podi wubuwela ayi, gaahikoma ginowayelela mabasaga, eyo podi onthukulela waviriganiha malamulo a Mulugu.

7. Yesu awonge ddi wodhela Yehova?

⁷ Yesu ohumunona pamadhene Yehova onipitha iyo, bumwahaya va Mateus 6:8 agawoga agihina: ‘Baabinyu oodhulu ohunona dhithu munahowelinyu, naarive mwahinathi omuloba.’ Yesu ohunona wi Yehova anonthuwathuwela epaddi yomwilini ni anere onivaha dhithu nnahowelihu. Ninga makiristawu, kadda muthu wa iyo anokusa epaddi ya emudhi ya Yehova. Yehova di musolo wemudhihu. Iyo nihikanna ebaribari wihina oliye anere wakwaneliha madhu avetheliye eri va 1 Timóteo 5:8.

8. a) Enaanikavihere ddi oohova osapela murala wehu? (Mateus 6:31-33) b) Mowiwanaan ni fotu ela, nnaatajhihe addi anamatelana ala enaavaha yojha akwiwa?

⁸ Nakanna ebaribari wihina Yehova anondhivela ni anodhivela emudhi yehu, kannanganyedhege wihina oliye anere onivaha ethu-sithu nnahoweliye epaddi yomwilini. (Omwileri Mateus 6:31-33.) Kavo anafuna onikabelela epaddi yomwilini ahiri Yehova! Nupaddusa elabo yavati, ohekamo dhithu dhohiyana Iyana wihina njhege. Teto dhithu ndho, dhinonihagalasa. (Gén. 2:9) Iyo nakanna yojha ya nlabo nimodha, kanere, ki mangwana nnajhe ddi. Mwaha akala nihikanna yojha ya peeno nivahiwe ni Yehova. (Mat. 6:11) Teto kaniddiwale wihina podive nlabe okunamo wihina niisapele epaddi yomwilini, mareeliho anafuna onivaha Yehova ovanene ni osongolo kinaligana ni mabasa nnaaparihu wihina niisapele. Siyeyo yonenlemo Nestor ni María. — Isa. 65:21, 22.

9. Nnahudhera ddi ni yopadduwa ya Nestor ni María?

⁹ Nestor ni María mudhidhi ekalaga oColombia yahikanna dhoreela. Aliwa wera: “Nofuna ojajaliha egumihu wihina nawenjhedhedhe mabasihu oolaleya, mbwenye nowoova oyelella ohagalala mwaha wohikanna korowa.” Yakavihere ddi anamatelana ala ogonjhiha woova? Ethu yakavihere waari wubuwela makalelo Yehova awonihiliye odhivela waye. Vano aliwa kuhanganyedhaga wihina Yehova ere wavaha dhithu dhaahalela. Aliwa wahiya mabasa yakeliwa korowa dhowinjhiva, oguliha nyumbiwa ni otamela mburo wahoweleya anamalaleya. Ki aliwa nutama ewonge ddi? Nestor anihina: “Nihona mwigumini mwehu madhu enafwanyeya va Mateus 6:33 yakwanelaga. Kannajhombeliwege ethu-sithu omwiilini. Vano iyo niri oohagalala opitha malabo amundduli.”

WAWOOVA ATHU

10. Dhithu baani dhinoniha wihina athu ehopiha peeno?

¹⁰ Athu enowonihana goyi mmodha ni mukwaye. (Ecl. 8:9) Motajhiha, athu enowarugunuwela anamathonga, opanana, buling oskola, ni ohiwanana vamuralani. Peeno muthu ni poddogoma, oopinhe ddi muthu! Saddana ananthusa ni makalelo baani?

11-12. Saddana anaalabihera addi athu wihina anthuse?

¹¹ Saddana anolabihera woona wihina nihiye olaleya ni wawiwelela malamulo a Yehova. Mwaha wa Saddana, anamathonga enowakoddiha mabasihu oolaleya ni enoniharahara. (Luc. 21:12; Apo. 2:10) Elabo yela enathongiwa ni Saddana, athu owinjhiva enowawinkedha adhaari a Yehova. Mwaha wa yeyo, athu enonnyemula, enonaaba, enonuukutha ni kinafuna onoona. (Mat. 10:36) Dhithu ndha dhanipadduwelaga nnohowela otikina? Naari. — Atos 5:27, 28, 40.

¹² Saddana kanalabihera woova nu oharahariwave baahi. Athu amodha, ohiya woova oharahariwa obe wukuthiwa aliwa enathabwa wawoova amudhiwa. Aliwa enowadhivela vanlubale amudhiwa ni enofuna wi naliwaya emunone ni emudhivelege Yehova. Bumwahaya aliwa yawonaga amudhiwa emuwogaga obure ddibila obe Yehova enowapiha mbani. Mbwenye yotikinihaya sowi amudhihu yiddesa ebaribari vasongolova ehirumedha okala Anamona a Yehova. Ki akala amudhawo ehunyanyala mwaha okala Namona a Yehova onere ddi?

13. Enaanikavihere ddi amudhihu yaninyanyala? (Sal. 27:10)

¹³ Va Salmos 17:10, ehikalavo madhu enantoddola vanlubale. (Omwileri.) Naarive akala amudhihu ehinnyanyala, wubuwela makalelo Yehova anandhiveliye winere onivaha kopolo wogonjhiha oharahariwa. Ni kannanganyedhege wihina Yehova anere onreeliha mwaha wa ovilela wehu. Kawo muthu ananda onikabelela epaddi yomwilini, yomubuweloni ni yomuzimuni ompitha Yehova! Siyeyo Biniam, awogiwe mundduli ooniliye.

14. Nnahudhera ddi ni yopadduwa ya Biniam?

¹⁴ Biniam, ahudhere ebaribari mudhidhi anamathonga a elabo yaye yaharaharaga Anamona a Yehova. Yamukavihere waari onona makalelo Yehova anamudhiveliye. Oliye wera: “Iyo kanajhehera wihina oharahariwa wule werege othabwa. Mbwenye ethu gathabwesimi woova kuwari oharahariwave ni anamathonga, mbwenye waari oharahariwa ni amudhaga. Miyo gaanova wawukula ababa yahari Anamona a Yehova ni goova enadha egikubanyedhege.” Mbwenye Biniam, kanganyedha wihina Yehova anomusamalela muthu anamudhivela. Biniam wera: “Miyo ewubuwela makalelo Yehova akaviheriye addibila yafwanyiwe makathamiho oorusa ninga ohikanna korowa, ntalano ni wukuthiwa. Miyo gahinona wihina gaahiya ebaribari Yehova ere ogireeliha. Mudhidhi ngamagiwe ni ngukuthiwe dila dhowinjhivadhene, gahoona pamadhene makalelo Yehova ananikaviheriye nakala oororomeleya.” Biniam amoona Yehova ninga Ababe, ni addibila ninga amudhaye.

WOOVA OKWA

15. Mwahaya bwaddi kahiyo yabure woova okwa?

¹⁵ Bibliya anihina okwa mwiddani ehu. (1 Cor. 15:25, 26) Bumwahaya iyo nnothabwa woova okwa nanona wihina iyo obe mmudhihu ohukanna oredda ohunamala. Mwahaya bwaddi novaga okwa? Mwaha wi Yehova anipadduse wihina nikalegewo malabo amatene. (Ecl. 3:11) Malabo mamodha woova okwa winonibarela. Motajhiha, eyo enonthukulela pamadhene osakula ethu nnafunihu ojha, werana exersisiyu, egumana ni mediku, obe okabeleliwa yahoweleyaga, ohiya eyo kanneka egumihu vangovini.

16. Saddana analabihera addi woova okwa?

¹⁶ Saddana ohunona wihina iyo nnovaha thima egumi. Mbwenye oliye ohuwoga wi iyo podi oleva dhithu dhatedhene ni wandana wehu ninnihuna ni Yehova wihina nikalegewove. (Jó 2:4, 5) Mbwenye eyo kahiyo ebaribari! Woona wi Saddana ohukanna owedha wompa muthu, oliye anolabihera woona ninnihuna wihina nihiye omulabela Yehova. (Heb. 2:14, 15) Malabo mamodha, Saddana anowalabihera athu wihina yathusena okwa adhaari a Yehova yadidelave okala oororomeleya. Malabo mamodha oliye anolabihera oredda ohunamala, wihina naviriganihe malagano a Yehova. Motajhiha, mediku obe amudhihu podi oniwaddihedha ovahiwa nikame eri ethu Yehova anakoddihiye. Obe aliwa podi oniwaddihedha orumedha ojha murombwe ohuniwanana ni malagano amBibliyani.

17. Mowiwanana ni Romanos 8:37-39, mwahaya bwaddi nihovaga okwa?

¹⁷ Kaawo muthu wa iyo anafuna okwa, mbwenye nikanne ebaribari wihina naarive nikwe, Yehova kanadha aniddiwala ni kanahiye ondhivela. (Omwileri Romanos 8:37-39.) Yehova amuyelela mukwaye muukwani, kanamudduwala, anomulogolela mmubuweloni mwaye, ninga mudhidhi aariye mento. (Luc. 20:37, 38) Yehova anokanna munukwela ni muthu yola akwile. (Jó 14:15) Yehova ohuleva ‘muthengo munlubale’ wihina nikanne ‘egumi yohimala.’ (João 3:16) Nihinona winina Yehova anondhivela ni anonikabelela. Bumwahaya, nafwanyiwaga oredda ohunamala ni makathamiho mamodhaya, nnomuloba Yehova nikavihero, thotho ni kopolo. Siyeyo Valérie ni mamune yenriwana. — Sal. 41:3.

18. Nnahudhera ddi ni yopadduwa ya murogola Valérie?

¹⁸ Valérie aganna yaka 35, okanna kanser owopiha vanlubale ni ahanoniwe. Mbwenye odhivela anniyena omukavihera oliye ogonjhiha woova okwa. Oliye wera: “Oredda ola ohusaddula egumihu. Wihina gopepariwe yohoweleya olabiheriwa nikame. Gagumana ni mameddiku owinjhiva, mbwenye newene kagafwannye mmodha arumedha ogopepari ahilabihere nikame. Mwaha wa yeyo gowoova vanlubale, mbwenye kagafuna omukuula Yehova! Yehova owoniha odhivela ni egumaga yatene. Ola waari mudhidhi womutonyihedha wihina ginomudhivela. Gaakela muthenga wowuukuliha, yoluba yaaga waari ohagalasa murima wa Yehova, ohiya omwihiya Saddana ogigonjhiha. Nuvira mudhidhi, miyo woperariwa gihivahiwe nikame. Naarive gihivulumuwe ginowona nlada na Yehova mwigumini mwehu. Motajhiha, gihinathi woperariwa, ginowubuwela nlabo dhaala wihina omutugumanoni iyo nahihudhera musolo dhala wawoga wegi, ‘wagonjhihe makathamiho nuliba murima.’c Yohudhera ele yahigikavihera vanlubale miyo vamodha ni mamunaga. Naahudhera dila dhowinjhivadhene. Ohudhera wula, ohunikavihera okanna murenddele, ohuthabwa wikubanyedha ni werana yothoma yapama.

OGONJHIHA WOOVA WEHU

19. Enaapadduwe ddi mohilegela?

¹⁹ Nnikavihero na Yehova, addibilihu wapela elabo yatene enowanda wagomjhiha makathamiho oorusa ni enowanda omukaka Ddiyabo. (1 Ped. 5:8, 9) Nihiyoya podi werana emodhave. Mohilegela Yehova anere omuruma Yesu ni a 144 000 wihina ‘yaagujhule mabasa a Ddiyabo.’ (1 João 3:8) Eyo yapadduwa, nlogo na Yehova kannadha noovaga. (Isa. 54:14; Miq. 4:4) Mbwenye nlabo nno nihinafiye, ndidele ogonjhiha woova wehu.

20. Enaanikavihere ddi ogonjhiha woova?

²⁰ Iyo nimuroromelege Yehova anna odhivela nihiyo ni anabarela adhaaraye. Wi nande ohanganyedha odhivela wa Yehova, sapama ohudhera makalelo Yehova anaakaviheriye adharaye a malabo amundduli ni a peeno. Teto kanidduwale makalelo Yehova ananikaviheriye mwigumini mwehu. Nerana ndo, nnikavihero na Yehova nnere wanda ogonjhiha woova! — Sal. 34:4.