Amwana Ezarayeli yowanihesa koddo — Ki iyo mwahaya bwaddi nahiwanaga?

“MMODHA wa nyu akoodda owana ni Faransa obe Inglatera, aatene munere okwa!” Siyeyo awogile mutoropa dhaala oonazista awogelaga anamoona a Yehova muwari mwa yaka biili. Atoropa oonazista yahiwegeredha wihina ewane, mbwenye kaavo ddibila ahile okala oororomeleya. Wula waali oliba murima! Yotajhihela enowoniha pamadhene monelo wehu wodhela okala namoona a Yehova: Iyo nnokodda wivolosihedha mukoddoni ya elabo yeela. Naarive efunaga onipa iyo kannahiya okala ororomeleya.

1. NLOGO NATENENE NA MULUGU NAKOSA EPADDI NA NIHIMO NIMODHA BAAHI

Kale, Yehova ahitugumana nlogo naaye ninga nihimo nimodha baahi nithaniwa  — Ezarayeli. Oliye wawithana amwaana Ezarayeli “athu aaga oosakuliwa vaari va malogo aatene.” (Êxo. 19:5) Mulugu wavaha mburo wofwanelela. Vano Mulugu wawogana amwaana Ezarayeli wihina edhowe okoddoni yawane ni malogo mamodha, Aliwa kiyawana naddibiliwa newene kiyawana naale yamwebedha Yehova.a

Peno, athu enamwebedha Yehova ‘Elabo yatene, malogo matene, mahimo atene ni dhiwogelo dhatedhene.’ (Apo. 7:9) Nlogo na Mulugu nahere niwanaga koddo, Aliwa yerege — owana obe waapa — addibiliwa oomuzimuni.

2. YEHOVA AHATHOMA WIHINA AMWAANA EZARAYELI EDHOWEGE OKODDONI

Kale, Yehova da thoma alini ni mudhidhi baani amwaana Ezarayeli yahoweliwa odhowa okoddoni. Motajhiha, Yehova ahawerela amwaana Ezarayeli wihina yaape akananewu. Nlogo nno nahinoniwa wodhela wawebedha ademoniyo, wawerana mararuwo ni wakutha aniwa niga mukuto. Ohiya eyo Akananewu yakala murudda Yehova apaganyiliye wavaha amwaana Ezarayeli. Bumwahaya Yehova wathoma amwaana Ezarayeli wihina egujhule nlgonne wihina dhithu dhatedhene dherana nlogonne dhahavolowele. (Lev. 18:24, 25) Naarive amwaana Ezarayeli egafiile elabo yothomeliwa, Malabo mamodha Yehova owenya wihina amwaana Ezarayeli yawane naamwiddani. (2 Sam. 5:17-25) Mbwenye, kaavo mudhidhi Yehova enyiliye wihina amwaana Ezarayeli ethome yekiwa owana koddo. Aliwa yerana ndo dhewa kadhaweddela pama. — Núm. 14:41-45; 2 Cró. 35:20-24.

Peno, Yehova kanenya wihina athu edhowege okoddoni. Malabo apeeno malogo enowana wihina ebarele dhorela dhiwa ohiya werana efunelo ya Mulugo. Aliwa enowana koddo wihina yejhedhedhe elabwiwa dhorela dhiwa obe ebarele museludhiwa dha politika. Vano ki ale enihina enawanela wodhela ndina na Mulugu wihina ebarele egerejiwa obe wapa amwiddani a Mulugu? Yehova anere wabarela adharaye ebaribari ni wagujhula amwiddani aye osongolo va koddo ya Arumajedo. (Apo. 16:14, 16) Koddo yeyo anyakoddo a Mulugo enaatugumaniwe wihina ewane, enakale angero ohiya athu amwilaboni.  — Apo. 19:11-15.

3. AMWAANA EZARAYELI YOWAWEDDELA THAGARAGA ALE YONIHA WIHINA BOROROMELEYA

Kale, anyakoddo amwaana Ezarayeli Malabo owinjhivene kiyaapa ale yoniha wihina bororomeleya wa Mulugo. Mbwenye aliwa yowaapa ale Mulugu athomiye wihina yohowela oopiwa. Kasuga dhotajhiha biili. Yehova wawaddela amwaana Ezarayeli wihina jeriko ohowela ogujhuliwa, Mbwenye amwaana Ezarayeli yahimweddela thagaraga Rahabi ni emudhi yaye mwaha wa nroromelo onihiliye. (Jos. 2:9-16; 6:16, 17) Vasongolova, luwani yo Jideyawu kiyaagujhuliwe mwaha aJideyonita yahoniha wihina yomuriha Mulugu.  — Jos. 9:3-9, 17-19.

Peeno, Malogo enawana koddo kinaweddela thagaraga ale enamuroromela Mulugu. Malabo mamodha, athu yahina muladdo enopiwa mukoddoni.

4. AMWAANA EZARAYELI YOHOWELA WAHARA MALAMULO A MULUGU YEGI EDHOWE OKODDONI

Kale, Yehova afunesa wihina anyakoddo eharege dhoholela dhaaye yafunaga owaniha koddo. Motajhiha, Malabo mamodha Mulugu owawaddela wihina ‘‘amwaana Ezarayeli yohowela wandana ni oteyihana naamwiddani. (Deut. 20:10) Yehova oojheha wihina anyakoddo amwaana Ezarayeli ekanne mubuwelo wowela teto aliwa ni mburo wakaliwa wohowela okala wowela. (Deut. 23:9-14) Anyakoddo amalogo mamodha dila dhowinjhivene yowagoniha ahiyana adhilabo yawaniwa, Mbwenye Yehova owawadeliha amwaana Ezarayeli werana ndo. Mwebaribarene yohowela omutela mwihiyana yamudhiiliwana okoddoni wavira mweri mmodha. — Deut. 21:10-13.

Peeno, dhilabo dhowinjhiva eherana nipangano nidhilabo dhimodha dhinavaha malamulo amukoddoni. Mapangano ala enovolowela wabarela ale yahina muladdu. Yowukulaya sowihina malabo owinjhiva, kinarihiwa malamulo yaala.

5. MULUGU OHUWANIHA KODDO AKAVIHERAGA NLOGO NAAYE

Kale, Yehova ahiwana akaviheraga amwaana Ezarayeli. Dila dhowingivadhene ahakavihera wangonjhiha amwiddani alabihedhaga matikiniho manlubale. Motajhiha, nimakalelo baani Yehova andiliye wakavihera amwaana Ezarayeli ogonjhiha luwani yo jeriko? Eharaga dhoholela dha Yehova, amwaana Ezarayeli ‘okuwa vanlubale ofiyedha txingaya obwanyuwa,’ yonihaga wihina yeere ogonjhiha luwani ele. (Jos. 6:20) Ki yandile addi wagonjhiha aamorewo? ‘Yehova wamoriha odhulu mararala manlubale wa aliwa, mwaha wa yeyo athu owinjhiva yahikwa mwaha wa mararala opitha ni supadda.’ — Jos. 10:6-11.

MAKIRISTAWU EBARIBARI BOFWASEYA

Ninga nonilihu, dhithu dhinapadduwa peeno dhiihiyana ni ndhe dhaapadduwela amwaana Ezarayeli. Mbwenye ohiyana wula, kahiyo ethu enanthukulela ohidhowa okoddoni, motajhiha, Mulugu ohupaganya wihina malabo okuthula, ale yahudhihiwe nuliye kiyahudhere wodhela koddo, teto kiyawanihege koddo. (Isa. 2:2-4) Ohiya eyo, Yesu ohuwoga wihina adhaaraye ‘kiyakosege epaddi ya elabo’; Obe neere aliwa kiyivolosihege ni dhithu dha mwilaboni.  — João 15:19.

Mbwenye Yesu ohakongomedha adharaye odhowave vasongolo, Oliye wahudhiha ohikanna dhikalelo dhaatukulele okoya ntxiga, okala oowali ni odhoowa okoddoni. (Mat. 5:21, 22) Ohiya eyo, oliye ahahudhiha anamaharaye wihina yohowela okala oofaseya, Obe ‘wawaja makalelo’ okanna murendele naathu amodha ni wadhivela amwiddaniwa.—Mat. 5:9, 44.

Ki iyo? Podi wera kaninna efunelo yodhowa okoddoni, mbwenhe mmurimani mwehu dhihikalamo dhithu dhanthukulele okanna nrima yaatotele makathamiho addibilihu ni okanna nsakulo mmulogoni? Nnohowela wilibihera wihina nahikanne dhikalelo ndha.  — Tia. 4:1, 11.

Iyo kannivolosihedha mukoddoni, ohiya eyo nnowilibihera wihina nikane murendele mmodha ni mukwaye. (João 13:34, 35) Nihitoma ohikosa epaddi ya elabo njhehaga nlabo Yehova anamarihiye koddo nimukalakala.—Sal. 46:9.