Okanne monelo mmodhave ninga wa Mulugu wodhela dhong’wa dholezeliha

MWEBARIBAREENE we onomutamalela vanlubale Yehova mwaha nvaho dhatedhene uvahiliye, vamodha ni ofuru onniwena wosakula makalelo oolabihedha nvaho ndha. Mowiwanana ni Bibiliya, dhong’wa nvaho wa Yehova. Bibiliya anowoga egi: ‘Yoojha enoohagalasa ni vinyu anohagalasa egumi.’ (Ecl. 10:19; Sal. 104:15) Mbwenye podi wera uhonelamo wihina athu owinjhiva kinalabihedha pama dhong’wa, teto athu a elabo yaatene ehikanna monelo wohiyanahiyana wodhela muselu wong’wa. Ki vano, ethu baani enaamukavihere mukiristawu werana yothoma yapama wodhela muselu ola wong’wa?

Kannapwatha mburo nnakalihu obe makalelo nleliwihu, iyo nnohowela ororomela dholaga dha Mulugu. Nerana ndo, nnere okanna egumi yohagalasa.

Ninga ononiwe athu owinjhiva wapela elabo yaatene, enong’wa bure teto amodha enoog’wa malabo aamatene. Amodha enang’wa mwaha enodhiveliwa makalelo enakaliwa yalezela, amodha enang’wa mwaha wihina yang’wa enowadduwala makathamiho ewa. Dhilabo dhimodha, ale enathabwa oong’wa enoniwa ninga athu akopolo ni oowoma. Teto dhilabo dhimodha muthu anathabwa oong’wa anoniwa ninga mulobwaba eebaribari ni muthu anna musolo wapama.

Mbwenye makiristawu ehikanna dhoholela dhapama dhinadhela wa Yehova ali mpaddusi ehu. Motajhiha, Yehova anowoga makathamiho enadha mwaha wa olezela. Va Provérbios 23:29-35 nnowafwanyavo makathamiho enanfwanya muthu anadhiveliwa olezela. Namaholela mulogo dhaala anakala wEwuropa anithaniwa Daniela, anowubuwela makalelo yaali egumaye ahinathi ohudhera ebaribari ni oparihedha mabasa dholaga dha Yehova. Oliye anowoga egi: “Miyo golezela vanlubale mwaha wa yeyo gaherana dhothoma dhabure. Teto mwaha wa dhothoma dhendha gahifwanyiwa makathamiho ohikala amasika. Ofiyedha peeno gubuwela dhithu dhagipadduwela mudhidhi yole, ginowukuwa vanlubale.”

Nnande aavi werana dhothoma dhapama wodhela muselu woong’wa ni warabela makathamiho? Nnohowela wenya wihina mubuwelo wa Mulugu oniholelege.

Kabeni noone ethu baani Bibiliya anawogiye wodhela dhong’wa, ki mwahaya bwaddi athu owinjhiva egadhiveliwa olezela.

ETHU BAANI BIBILIYA ANOWOGIYE WODHELA DHOOG’WA?

Bibiliya kanakooddiha ong’wa nuupimelela. Mwebaribarene Bibiliya anowoga wihina omung’wa vinyu winohagalasa murima. Eclesiastes 9:7 enihina: ‘Waajhe yoojha yawo nuuhagalala ni omung’we vinyu awo ni murima wohagalala.’ Yesu oomung’wa vinyu malabo mamodha, teto adhaari amodha oororomeleya a Yehova yong’wesa. — Mat. 26:27-29; Luc. 7:34; 1 Tim. 5:23.

Bibiliya anowoniha wihina ong’wa nuupimeleleya wihiyana ni olezela. Bibiliya anowoga mowoneleyamo egi: ‘Kamulezele mwaha omung’wa vinyu.’ (Efé. 5:18) Teto anowoga wihina ‘anamang’wa . . . kanaakele Omwene wa Mulugu.’ (1 Cor. 6:10) Enowoneya pamadhene wi Yehova onowidda oong’wa bure ni olezela. Ohiya watajhiha athu enaapeele ni dhithu eneriwana wodhela muselu ola woong’wa, iyo nnowerana yothoma eniwanana ni ele enamuhagalasa Mulugu.

Amodha enubuwela wihina aliwa podi ong’wa bure, mbwenye yahilezele. Mbwenye eyo yowopiha vanlubale. Bibiliya anowoniha pamadhene wihina ‘kanilezelege mwaha omung’wa vinyu,’ mwaha podi omuthukulela muthu werana dhoviriganiha dhowopiha ni omuthegela Yehova. (Tito 2:3; Pro. 20:1) Yesu ohuwoga wihina ‘othabwa othuwathuwela . . . ong’wa’ podi omuthukulela muthu ohanda ovolowa mumweneni mwa Mulugu. (Luc. 21:34-36) Ki vano ethu baani enamukavihere mukiristawu warabela makathamiho enadha mwaha dhong’wa?

WE ONANG’WELA DDI?

Yaakale ethu yowopiha ohiya wihina makalelo nleliwihu, evolowele monelo wehu wodhela dhong’wa. Ninga makiristawu nnafuna nerena ele enamuhagalasa Yehova naarive akala muselu onovolowelavo ojha ni ong’wa. Nerana eyo, nnere woniha wihina nili athu athotho. Bibiliya anonubusedha egi: ‘Akala munoojha, akala munong’wa, obe akala munerana ethu sithu, mweregena dhatedhene wi mmuthithimihe Mulugu.’ (1 Cor. 10:31) Kawubuwele makoho ala eniwanana ni malagano a mBibiliyani:

Ginang’wela wihina girumedhiwege ni athu amodha? Êxodo 23:2 anihina: ‘Onaatajhihe anamwinjhi.’ Vala Yehova awaddela amwaana Ezarayeli wihina ekale pasope watajhiha athu yaherana efunelo yaye. Yolaga ela, enonipatha ni iyoya peeno. Nahiya wihina athu amodhaya evolowele mubuwelo wehu ni dhothoma dhehu wodhela dhong’wa, iyo podi ofiyedha omusukuma Yehova ni malagano aye. — Rom. 12:2.

Ginang’wela wihina gawonihe athu amodha wi gili mulobwana ebaribari ni gihikanna musolo wapama? Dhilabo dhimodha athu owinjhiva enolezela ni enoniwa ninga olezela kahi ethu yabure. (1 Ped. 4:3) Mbwenye kasugwa yolaga enafwanyeya va 1 Coríntios 16:13: ‘Mukale mento, mwiimele txithi munroromeloni, mulibe murima, mukale akopolo.’ Mbwenye mwebaribarene dhong’wa podi omukavihera muthu okala akopolo? Newene! Mwaha dhong’wa podi omweriha muthu ohubuwelaga ni makalelo apama ni ohanda werana dhothoma dhapama. Bumwahaya, ong’wa bure kinatapulela wihina muthuya dakopolo, mbwenye enatapulela wi dolodhowa. Isaías 28:7 anowoga wihina muthu analezela anere witotela makathamiho.

Kopolo dhebaribari dhinadhela wa Yehova ni enovolowelavo okala mento ni okala txithi munroromeloni. (Sal. 18:32) Iyo podi werana eyo, wodhela okala pasope malabo aamatene ni werana dhotoma dhinabarele wandana wehu ni Yehova. Yesu uhoniha kopolo ndho mudhidhi agaali velaboni yavati, teto athu owinjhiva yomuriha mwaha wihina oliye aali muthu ooliba murima ni aali owikomene wihina erena ele eli yapama.

Ginang’wela wihina gaathawe makathamiho aaga? Namaleba Salmo dhaala ahivetheliwa wihina alebe madhu ala enihina: ‘Makathamiho nugipinyaminya, Nyu [Yehova] muhigitodola ni muhugimaaliha.’ (Sal. 94:19) Bumwahaya wakala oosimwelene mwaha wa makathamiho enuufwanya, omuroromelege Yehova ohiya dhong’wa. Makalelo apama owerana eyo, fuudhela olobela wa Yehova ni murima wawo waatene. Athu owinjhiva ehisayela nikavihero na addibila owithelavo epaddi yomuzimuni mmulogoni, eyo yahakavihera vanlubale. Mwebaribarene ong’wa wihina naamarihe makathamiho ehu, podi omuthukulela muthu ohikanna kopolo yowerana ele eli yapama. (Ose. 4:11) Ddibila Daniel asorihiwe mundduli anowoga egi: “Miyo gothuwathuwa ni goowona goyi mwaha wubuwela dhothoma gerilimina kale, mwaha wa yeyo, gong’wa wihina gande owanana mubuwelo ole, mbwenye makathamiho agaya yere wenjhedhedheya baahi, ofiyedha wayelela akwaaga ni kagidhivela.” Mbwenye ethu baani emukavihere Daniel? Oliye anowogave egi: “Miyo wonelamo wihina gomuhowela Yehova ninga mukwaaga ohiya dhong’wa. Nuuwerana eyo, gahanda wawanana makathamiho aaga ni wagonjhiha.” Ebaribariya sowihina Yehova anoofuna onikavihera, naarive ekalaga ninga makathamihoya kinadha emala. — Fil. 4:6, 7; 1 Ped. 5:7.

Akala we onodhiveliwa oog’wa, podi wawerana masadduwo wodhela opendda magarafwa mangasi onafuniwe waang’waga ni dila ngaasi onafuniwe ong’waga. We podi wikoha ai: ‘Ohukalawo mmudhaga obe mukwaaga oonihile wi onogithuwathuwela mwaha wa makalelo aaga oong’wa?’ Akala oni hee! Podi weera onna witotela makathamiho obe onna okanna emanya wahinandiwe woona. Makalelo Ginang’wimi malabo yaala ehihiyana ni makalelo gang’wimi kale? Muthu anoona wihina dhithu dhendha dhinompadduwela, podi wera kanathi okanna emanya ela yong’wa. Mbwenye, oliye ahikala pasope, podi okanna emanya ela. ‘Ginowanda ovireliwa mwana malabwene obe sumana, mweri ni yaka gahing’wile?’ Akala onona wi kunanda ovireliwa malabwene wahig’wile, onone wihina ohukanna emanya yong’wa. Akala siyeyo, podi wera enohoweleya osayela nikavihero na mediku, wihina yukavihere ohiya emanya yolezela.

Mwaha wa makathamiho enakumelelavo mwaha wa ong’wa, amodhaya enothoma ohung’wa. Podi wera amodhaya kinang’wa mwaha wihina dhong’wadha dhinothabwa owawa. Yere okala yapama oriha yothoma ya kadda muthu wodhela ohimuwaddihedha ddibilihu ong’wa.

Podi wera yere okala yapama okanna manddile wodhela dhong’wa. Obe we podi othoma dila ngasi onafunegiwe ong’wa. Motajhiha, va sumanani dila modha obe wajhaga ong’wege vang’ono. Amodhaya enosakula yong’wa enafunigiwa ong’wa. Motajhiha, omug’wa vinyu obe serveja mowipimelela, ni ohung’wa dhong’wa dhothabwa owawa. Wakanna manddile ala, enere okala yokweya wahara mudhidhi wafunaga ong’wa. Mukiristawu owithwelavo epaddi yomuzimuni, anakanna manddile yaala kanahowela okanna manyazo mwaha wa dhithu athu amodha enubuweligiwa mwaha wa dhothoma dhaye.

Sathima othuwathuwela dhithu enubuwelege athu amodha. Romanos 14:21 anawoga egi: ‘Sapama ohijha nyama, ne ohimug’wa vinyu, newene weranna ethu enaamuthukule omukwakwathusa ddibilo.’ Onande aavi oparihedha mabasa yolaga ela? We podi oparihedha mabasa yolaga ela wodhela woniha odhivela. Wonelamo wihina ohukalawo ddibila anatakaleliwe mwaha wuwoona ong’waga, kiyere okala yapama ohung’wawene wihina ddibilo anakwakwathuwe? Werana ndala, onere wooniha wihina onothuwathuwela ni onoriha mubuwelo wa athu amodha ni kunasayela dhofuna dhawo baahi. — 1 Cor. 10:24.

Ohiya eyo, podi wera anamathonga, ehapandda malamulo wodhela muselu wong’wa. Mwebaribarene nihinona wihina mukiristawu anere ofuna wawiwela malamulo ayo. Motajhiha, malamulo ayo podi ovolowelavo yaka enahoweleya wihina muthu ambele ong’wa, obe podi wera ehikalawo malamulo enakoddiha weddiha karo obe ethu-sithu oga’wile. — Rom. 13:1-5.

Yehova ohunivaha mukono dhohiyanahiyana dhoriya, teto nvaho mmodha, bu ofuru ninnihuna wosakula makalelo nnafunihu alabihedha mukono anivahiliye. Eyo enovolowelavo osakula ethu nnafunihu oojha ni ong’wa. Mohanganyedha nnotamalela vanlubale ofuru ola wosakula anivahile Yehova. Teto nnofuna wooniha wihina nnotamalela nvaho ola wodhela werana dhothoma dhinamuhagalasa Yehova.