Mudhari ororomeleya ni athotho baani?

Ahalaga vang’ono wi apiwe Yesu ahithapanya ni anamahudhera aye: Peduru, Tiyago, Juwawu ni Andire. Awogaga dhintelelo dha obajha othonga waye malabo okuthula, oliye ahithapanyedha nikoho noofuneya nna egi: ‘Baani ali mudhari ororomeleya ni athotho, Nabwiya anamuthomiye wi akabelege nikuru ning’ono ni avahege yojha mudhidhi wofwanelela?’ (Mateus 24:3, 45; Marcos 13:3, 4) Mwaha Yesu okala ‘namasogolela’ aanamahara aye, era wapaganya wi eere omuthoma mudhari avahege yojha yomuzimuni yaddamelaga malabo ookuthula. Mudhari oyo baani?

Nikuru ning’ono na anamahara a Yesu esakuliwe ni muzimu wotxena. “Mudhari” oyo peeno anoniwe ninga Nikuru Nolamulela na Anamona a Yehova. Oliye anowavaha yojha adhari amodha a Yehova mudhidhi wofwanelela. Wi naakele ‘yojha yehu mudhidhi wofwanelela’ nnamuroromela oliyeene. — Lucas 12:42.

Nnosamalela emudhi ya Mulugu. (1 Timóteo 3:15) Yesu ohunvaha mutholo munlubale mudhari ola, weddiha mabasa a nikuru na Yehova enapariwa elabo yavati: onosamalela dhithu dhinaguliwa, wasogolela mabasa a olaleya ni onihudhiha alabihedhaga mulogo wehu. Wi anivahe yojha yomuzimuni nnafunihu mudhidhi wofwanelela, “mudhari ororomeleya ni athotho” anogawa dhoojha dhomuzimuni wodhela malivuru nnalabihedhihu mmalaleyelo, nihawogaga aporogarama a mutugumano ni a vamusonkanoni.

Mudhari oyo anoniha okala ororomeleya mwaha weddela ebaribari ya mBibliyani ni olaleya muthenga dhapama; oliye da thotho mwaha wa makalelo anasamaleliye mabasa a Yesu elabo ela yavati. (Atos 10:42) Yehova anna oreeliha vanlubale mabasa ayo ni dhoojha dhomuzimuni. — Isaías 60:22; 65:13.

• Avahiwe mutholo wowavaha yojha anamahara a Yesu baani?

• Makalelo baani mudhari oyo ariye ororomeleya ni athotho?