Mulugu Ompaddusa Mulobwana Oobajha ni Muhiyanaya

Yehova ahimwegeredha jardi mburo dhaala withaniwa Edeni. Mu jardi mmo mwahikala muthanko, folori ni anenyama. Numala, Mulugu othukula thaya, omusasanyana mulobwana oobajha. Nuwindo oliye onvudhela mpunani. Ohunona epadduwe? Mulobwana ole obajha ovuma! Yehova onvaha ndina na Adawu teto onvaha mutholo dhithu dhaatedhene. Adawu ahivahiwa mutholo womusamalela jardi ni wavaha mandina anenyama aatene.

Teto Yehova onvaha nlamulo nna Adawu: ‘We podi ojha dhowima dhaatedhene dha muthanko dhinafwanyeya mmunddani muna. Mbwenye ohukalawo muthanko ola mmodha, kujhe dhowimadha. Wajha onere okwa.’

Nuuvira mwana mudhidhi, Yehova owoga egi: ‘Ginere ompaddusa muhiyana wihina akale namakavihera a Adawu.’ Voharela, Mulugu weeriha wihina Adawu agonelevo. Vano oliye othukula bararu ya Adawu, omusasanyana muhiyana wi akale mwariye. Muhiyana oyo ithaniwa Eva. Adawu ni Eva okala murala woobajha. Nerege Adawu numoona mwariye ahihagalala? Hee! Bumwahaya adhe awogege egi: ‘Asaa, moone ethwila yoriya Yehova asasanyiye ni bararwaga! Mbwenye vano, ohukalawo muthu analigana ni miyo.’

Yehova owoga ni Adawu ni Eva wi ekanne ahima owinjhiva ni edhaale mwilaboni. Oliye afuna wihina aliwa elabege vamodha oohagalalene wihina esaddule elabo yaatene wi ekale parayizu. We ohumunona parayizu? Parayizu mburo woowoma ninga jardi oEdeni. Mbwenye peeno elabo kahi parayizu. Epaddunwe ddi? Kabe noone.