OHUDHERA 26

Wikalele ddi obure ni goyi?

Oopidiwa

Yapadduwa ngovi, athu enowikoha yegi: “Mwahaya bwaddi dhigapadduwa dhithu ninga dhendha.” Sapama onona wihina Bibliya anowaakula makoho ala!

1. Obure obanjhe avi mwilaboni?

Saddana Ddiyabo, ohumurugunuwela Yehova. Oliye afuna othonga vamburoni va Mulugu. Bumwahaya adhe amutujelege Adawu ni Eva okala epaddi yaye. Saddana andile avi? Wodhela omuleketha Eva. (Génesis 3:1-5) Oliye omuthukulela Eva wubuwelaga wihina Yehova kaafunana dhithu dhapama. Saddana omoonelihamo wihina athu yerege ohagalala naarive yahimwiwelelaga Mulugu. Bumwahaya omuleketha Eva, muwari mwa dhowoota dhatedhene ela sobajha. Oliye owoga ni Eva wihina kaakwe. Bumwahaya Bibliya agamwithana Saddana ninga ‘muliba woota ni babi owoota.’ — João 8:44.

2. Adawu ni Eva, yaathomile werana ddi?

Yehova ahinvaha dhithu dhowinjhiva Adawu ni Eva. Ahavaha muthanko dhatedhene dha mundda wo Ideni wihina ejhege, mbwenye aakoddinhe mmodha baahi. (Génesis 2:15-17) Naari dhigarive ndo aliwa osakula ojha muthanko yole wakoddihiwe. Eva ‘othukula yowima ya muthanko ole obajha ojha.’ Nuuvira mudhidhi ni Adawuya ‘ojha.’ (Génesis 3:6) Abilene ohiya omwiwelela Mulugu. Adawu ni Eva yaali athu ologomana, bumwahaya yaali yokweya werana dhithu dhapama, mbwenye aliwa othoma ohimwiwelela Yehova. Mwaha wa yeyo othega, ni osukuma onamathonga wa Mulugu. Yothoma ela yahadhelana makathamiho mwigumini mwewa. — Génesis 3:16-19.

3. Yothoma ya Adawu ni Eva enapatha avi egumi yehu?

Adawu ni Eva nuuthega okala athu ohulogomana, bumwahaya aliwa wavaliha aniwa atene ohulogomana. Bibliya anowoga wodhela Adawu egi: ‘Mwaha wa yothega ya muthu mmodha, yothega ehivolowa mwilaboni ni okwa ohuvolowa mwaha wa yothega. Nimukalelo mmodhave okwa ohafwanya athu atene mwaha wi atene ehithega.’ — Romanos 5:12.

Ohulogomana winodhana makathamiho ohiyana-iyana. Malabo mamodha nnowona goyi mwaha othoma dhithu dhabure. Teto nnotabuwa mwaha dhithu dhabure enathoma athu amodha. Malabo mamodhaya nnowona goyi mwaha okala mburo ni mudhidhi wohifwanelela. — Omwileri Eclesiastes 9:11.

OHUDHERE DHITHU DHIMODHA

Woone wihina Mulugu kananitotela makathamiho ni goyi eri mwilaboni peeno. Ni makalelo oliye anakaliye anonaga nitabuwaga.

4. Muthu ananitotela makathamiho

Athu owaadda enarumedha wi Mulugu dinathonga elabwela. Eyo ebaribari? Musugwe VIDIYU.

VIDIYU: Anasugwera elabo ela baani? (1:24)

Mmwileri Tiago 1:13 ni 1 João 5:19, mwamala muthapanyedhe nikoho nnaharela:

Mulugu dinanitotela makathamiho ni goyi?

5. Woone dhithu dhinereya mwaha wa onamathonga wa Saddana

Musugwe VIDIYU.

VIDIYU: Ekalelewo ddi goyi? — Epaddi (3:07)

Mmwileri Génesis 3:1-6, mwamala muthapanyedhe makoho enaharela:

Yowoota baani Saddana awogiliye? — Osugwe versu 4 ni 5.
Saddana onihe avi wihina Yehova kanafunana dhithu dhapama athu?
Mowiwanana ni Saddana, athu enohowela onamathonga wa Yehova wihina ehagalale?

Mmwileri Eclesiastes 8:9, mwamala muthapanyedhe nikoho nnaharela:

Nihoona wihina anathonga elabwela kahiyo Mulugu. Ki dhithu baani dhinapadduwa?

Futu: Fotu dhonihaga makalelo eri elabo okuma labo epaddusiwiwa ofiyedha labo elabo enasadduwiwa wi ekale parayizu. A. Parayizu mwilaboni yavati. B. Muwari mwa yaka dhowinjhivadhene onamathonga wa athu odhalihaga elabo ni gereja dhowoota, ohiwanana, koddo ni otakaliha elabo. Anamathonga amodha a mwilaboni: Ejitu, Xina, Geresiya, Roma, Alemanya, Gara-Bretanya ni Estados Unidos. C. Athu ekalaga mparayizu osogolo.

Adawu ni Eva yaari ologomana ni yakala mparayizu. Mbwenye aliwa onvuruwana Saddana ni omusukuma Yehova
Mwaha ohiwelela mwilaboni odhalamo yothega, okwa ni goyi
Yehova anere omariha yothega, okwa vamodha ni goyi. Athu anere ohogolowela okala ologomana ni enerege okalawo malabo amatene

6. Yehova anowukuwa noonaga goyi

Yehova anowukuwa noonaga goyi enanifwanya? Kabe noone dhithu alebile mwene Davidi ni murumiwi Peduru. Mmwileri Salmos 31:7 ni 1 Pedro 5:7. mwamala muthapanyedhe nikoho nnaharela:

Dholebela ndha dhinowoniha wihina Yehova anowoona goyi enanifwanya ni anofuna onikavihera. Wiwaga ndo onakala avi?

7. Mulugu anere wamariha makathamiho amatene

Mmwileri Isaías 65:17 ni Apocalipse 21:3, 4, mwamala muthapanyedhe nikoho nnaharela:

Mwahaya bwaddi ekala yapama onona wi Yehova ommamariha makathamiho amatene enanifwanya?

Wahinona?

Saddana nuwoga yowoota yobajha, ohutakaliha ndina na Yehova. Atakalihe mwaha woniha wi Yehova kahi namathonga apama ni odhivela. Mohulegela Yehova anere omariha goyi yatene eri mwilaboni. Aamariha makathamiho ala, anere weeliha ndina naaye ni anere wooniha wihina makalelo aye othonga bapama. Weeliha ndina na Yehova ethu yunlubale enereye mwilaboni yatene. — Mateus 6:9, 10.

ATHU AMODHA ENAWOGA YEGI: “Mulugu analabihedha goyi wihina aneehe.”