Kʼuʼ a Kichʼpan u Pektzil?

1. Kʼuʼ a pektzil a talaʼan etel a Dʼioso?

A Dʼioso u kʼati kaʼ u yilooʼ u kiʼil a kuxtal a kristiyaano yokʼolkabʼ. U bʼetaj a yokʼolkabʼ y tulakal a yan tuwichi u men yaj u yubʼi a kristiyaano. Seebʼaʼan u talesik a kuxtal a mas kiʼ ti tulakal mak tuwich a junpeet ti yokʼolkabʼ. Bʼel u kaʼa u jobʼes kʼuʼ tan u kajsik a yajilal. Xoko Jeremias 29:11.

Maʼax junpʼeel gobʼierno paatak u jobʼes a kʼasil, kʼojaʼanil, wa xan kimil. Pero yan kʼuʼ a kichʼpan u pektzil. Seebʼaʼan, u talel u gobʼierno a Dʼioso u chʼaʼ u kuuchil tulakal u gobʼiernojil a yokʼolkabʼ. Leʼek mak a keʼenakooʼ yalama bʼel u kaʼa u yilooʼ a sisʼolal etel kiʼil kuxtal. Xoko Apocalipisis 21:3, 4; Apocalipisis 11:15.

2. Kʼuʼkaʼa kʼabʼeet a kichʼpan pektzil?

Bʼel u kaʼa ti jobʼol a yajilal, leʼek ti kaʼ jobʼsabʼäk a kʼakʼas kristiyaano u men a Dʼios. (2 Tesalonicenses 1:8) Bʼikʼin u yantal abʼeʼe? U Tʼan a Dʼioso u yadʼaj u pektzil a yajilal a tan u kʼämbʼaanäl aleebʼe. Leʼek a kʼasil a tan aleebʼe tan u yeʼik ti seebʼaʼan u talel u kʼin a Dʼioso. Xoko 2 Timoteo 3:1-5.

3. Kʼuʼ a kaʼ ti bʼeteʼ?

Kaʼ ti kambʼalte u pektzil a Dʼios ichil u Tʼan, leʼek a Bʼibʼle. Jabʼix junpʼeel juʼum a talaʼan etel a tattzil a yan u yakunaj. Tan u yadʼik toʼon bʼikiʼ kaʼ ti wilaʼ u kiʼil a kuxtal aleebʼe y u kiʼil a kuxtal ti bʼebʼeel a wataktoj tuwich a yokʼolkabʼ. U jajili, uchak yan mak maʼ kiʼ tuwich ti tan a aantabʼäl kaʼ a chʼajtojte a Bʼibʼle. Top kiʼ u pektzil a kuxtal a wataktoj ti kaʼ a chaʼ a choʼbʼol ti kaʼ a pʼätä a kambʼal. Xoko 2 Timoteo 3:12; Apocalipsis 14:6, 7.