Kʼuʼ u Kiʼil u Ley a Dʼios Tiʼi Toʼon?

1. Kʼuʼkaʼa kʼabʼeet kaʼ chʼaʼbʼäk ti bʼejnil?

Ti wa Bʼetajil mas yaabʼ u tukul tiki wich. Jabʼix juntuul a Tattzil a yan u yakunaj, walak u känäntikoʼon. Maʼlik u kʼati wa maʼ ti nojʼooltik. (Jeremias 10:23) Jabʼix a neneʼ tzʼubʼ ti kʼabʼeet tiʼi kaʼ chʼaʼbʼäk u bʼejnil u men u yaj chʼisajil, bʼoobʼeʼlik ti kʼabʼeet toʼon kaʼ u chʼaʼ ti bʼejnil a Dʼios. (Isaias 48:17, 18) A ley yan ichil a Bʼibʼle walak u chʼaʼik ti bʼejnil leʼek a sijʼool talaʼan etel Dʼios. Xoko 2 Timoteo 3:16.

U ley a Jehovah tan u kaʼansik toʼon u tojil u bʼejnil a kuxtal aleebʼe y bʼikiʼ ti jedʼeʼek ti kʼämik a sijʼool a wataktoj ti bʼebʼeel. Dʼios u bʼetajoʼon, mentäkä yan u tojil ti kʼochaʼanak tiki wich a chʼaʼbʼej a tan u tzʼeek toʼon. Xoko Romanos 15:4; Apocalipsis 4:11.

2. Bʼikiʼ ti walak u chʼaʼik ti bʼejnil u Tʼan a Dʼioso?

U Tʼan a Dʼioso walak u yaantikoʼon kaʼ ti wilaʼ kʼuʼ a kaʼ ti bʼeteʼ ichil a yaabʼ bʼaʼal a walak u tal ich kuxtal. (Deuteronomio 22:8) Tzaj ti usartik ti tukul tiʼi kaʼ ti chʼajtojte bʼikiʼ ti jedʼeʼek ti usartik a jaj a yan ichil u Tʼan Dʼios ichil a bʼaʼal a tan u kʼämbʼaanäl. (Proverbios 2:10-12) Por ejemploj, a Bʼibʼle tan u kaʼansik ti leʼek a kuxtala sijʼool u men Dʼios. Leʼek a ley adʼaʼa jedʼeʼek u chʼaʼik ti bʼejnil ichil ti meyaj, ichil ti wotoch y tanil ti manäl. A Bʼibʼle jedʼeʼek u yaantikoʼon kaʼ ti känänte ti bʼajil. Xoko Hechos 17:28.

3. Bʼikiʼil kaʼpʼeel a ley a top kʼabʼeet?

A Jesus u tzikbʼalta kaʼpʼeel a ley a top kʼabʼeet. A Bʼibʼle u yadʼaj kʼuʼkaʼa bʼetajbʼooʼ a kristiyaano—tiʼi kaʼ u yeeltooʼ a Dʼioso, tiʼ kaʼ ti yakunte, kaʼ ti tzʼaaʼ u yanil ich jajil. A primero ley tzaj ti tuklik u pach ichil tulakal a walak ti bʼetik. (Proverbios 3:6) Leʼek mak walak u chʼajtojtik a ley adʼaʼa ichil u päsäkʼal yantal u kaʼ a ʼamiigojil tiʼi etel a Dʼioso, chukul kiʼolal, y kuxtal ti bʼebʼeel. Xoko Mateo 22:36-38.

U kaʼpʼeel a ley jedʼeʼek u chʼaʼik ti bʼejnil ti yanak a sisʼolal etelooʼ u laakʼ mak. (1 Corintios 13:4-7) Tanil ti tzʼeek ti meyaj a kaʼpʼeel a ley adʼaʼa tan ti täkʼäntik u modʼo a Dʼioso bʼikiʼ ti walak u tratartikooʼ a kristiyaano. Xoko Mateo 7:12; 22:39, 40.

4. Kʼuʼ u kiʼil u ley a Dʼios tiʼi toʼon?

U ley a Dʼios yan ich Bʼibʼle walak u kaʼansik bʼikiʼ kaʼ kunlakooʼ a familia ich yakunajil. (Colosenses 3:12-14) U Tʼan a Dʼioso walak u känäntik a familia tanil u kaʼansik kaʼ kunlak —a tzʼoʼkolbʼeel ti bʼebʼeel. Xoko Genesis 2:24.

Tanil ti tzʼoksik a kaʼansaj a yan ichil a Bʼibʼle jedʼeʼek ti känäntik a bʼaʼal a yan toʼon y u kiʼil ti wool. Por ejemploj, aj tzʼaj meyaj walak u käxtikooʼ aj meyaj a walak u kuxtal etel kʼuʼ a yan ichil a Bʼibʼle ti maʼ u tus y a sakʼool. (Proverbios 10:4, 26; Hebreos 13:18) U Tʼan a Dʼioso walaklik u kaʼansikoʼon bʼikiʼ ti chukulakoʼon tiʼi a tzʼeek bʼaʼal a kʼabʼeet toʼon y ti ʼamiigojil etel a Dʼios a mas kʼabʼeet tuwich u laakʼ bʼaʼal. Xoko Mateo 6:24, 25, 33; 1 Timoteo 6:8-10.

Tanil ti usartik a ley a yan ich Bʼibʼle jedʼeʼek u protektartikoʼon ti kaʼ yanak a tojʼoolal. (Proverbios 14:30; 22:24, 25) Por ejemploj, wa kaʼ ti täkʼänte u ley a Dʼios ti maʼ ti kälaʼanil jedʼeʼek u protektartikoʼon ti maʼ ti mächik a kʼas kʼojaʼanil y kaʼ ti käxte ti yajil. (Proverbios 23:20) A Jehovah walak u chaʼik ti ukʼul pero tzʼeeklik maʼ manal tupach. (Salmo 104:15; 1 Corintios 6:10) U ley a Dʼioso kiʼ ti toʼon walak u tojkintik ti modʼo y ti tukul. (Salmo 119:97-100) U jajil aj tzʼoksajooʼ maʼ chen tan u tzikik u tʼan a Dʼios chen u men yaabʼ u kiʼil tiʼijooʼ. Tanooʼ u bʼetik tiʼi kaʼ u nakʼsooʼ u yanil a Jehovah. Xoko Mateo 5:14-16.