Kʼuʼ u Gobʼierno a Dʼioso?

1. Kʼuʼ u Gobʼierno a Dʼioso?

U Gobʼierno a Dʼioso a kaʼanil gobʼierno. Bʼel u kaʼa u chʼaʼ u kuuchil tulakal a gobʼierno y bʼel u kaʼa u tales kʼuʼ u kʼati a Dʼios ti kaʼan y tuwich yokʼolkabʼ. Kichʼpan u pektzil u Gobʼierno a Dʼios. Seebʼaʼan u Gobʼierno a Dʼioso bʼel u kaʼa u noʼjkinte u yool a winik etel a gobʼierno a kiʼi. Bʼel u kaʼa u tales ich komonil tulakal a mak a yan tuwich yokʼolkabʼ. Xoko Marcos 13:10; Mateo 6:9, 10; 24:14.

A gobʼierno tzaj yan u reyil. Jehovah u käxtaj u Mejen, leʼek a Jesucristo ti Reyil tiʼi u Gobʼierno. Xoko Apocalipsis 11:15.

Cha’ante a vid’eo’ K’u’ U Gob’ierno a D’ioso?

2. Kʼuʼkaʼa mas kiʼ a Jesus ti Reyil?

Leʼek u Mejen a Dʼios maʼloʼ ti Reyil chumen walak u chʼaʼ otzilil y walak u waʼtal tiʼi a bʼaʼal a tojo. (Mateo 11:28-30) U laakʼa, yan tiʼi a mukʼ kaʼ u yaantooʼ a kristiyaano u men ti kaʼan keʼenak tiʼi kaʼ uchuk u meyaj tuwich yokʼolkabʼ. Tupach ti likʼsabʼij, bʼini ti kaʼan y tinlaji tuyajseebʼ kʼäʼ a Jehovah ti paakʼ. (Hebreos 10:12, 13) Pachili, a Dʼioso u tzʼaj tiʼi a mukʼ ti kaʼ kaak ti meyaj. Xoko Lucas 1:32, 33.

3. Mak a bʼel u kaʼa ti gobʼiernar tutzeel a Jesusu?

A junmuuchʼooʼ adʼaʼa «toj u naʼat» bʼelooʼ u kaʼa ti gobʼiernar tutzeel Jesus ti kaʼan. (Daniel 7:27) Leʼek a tojooʼ u naʼat a yaax käxtabʼooʼ, leʼekooʼ u yaj täkʼän a Jesusu. A Jehovah tan ti tanto u käxtikooʼ a tojooʼ u naʼat winik etel ixchʼup ʼaasto tak leebʼ. Walakooʼ u likʼsabʼäl jabʼixlik ti likʼsabʼi a Jesusu, espiritu. Xoko Juan 14:1-3; 1 Corintios 15:42-44.

Bʼoon tuul mak a bʼel u kaʼa ti kaʼan? Jesus u yadʼaj incheʼex a «jun muuchʼeʼex a maʼ yaabeʼex ta bajil» (Lucas 12:32) Ich tulakalil 144,000 tuul. Bʼelooʼ u kaʼa ti gobʼiernar yokʼol a yokʼolkabʼ tutzeel a Jesus. Xoko Apocalipsis 14:1.

4. Kʼuʼ a uchi ti kaji ti gobʼiernar a Jesusu?

U Gobʼierno a Dʼioso kaji ti gobʼiernar ichil a jaabʼ 1914.a Leʼek ti Reyaji a Jesusu u pula a Kisin etel u yaj kʼakʼas ʼaanjel waʼyeʼ tuwich yokʼolkabʼ. Tzʼiikaji a Kisin kaji ti tzʼaj probʼlema ichil a junpeet ti yokʼolkabʼ. (Apocalipsis 12:7-10, 12) U men abʼeʼe tulakal ti probʼlema mas u yaabʼtal. Pʼisbʼaj, wiʼijil, kʼojaʼanil y yukʼlaj tulakal adʼaaʼ u «pʼis» ti seebʼaʼan u talel u Gobʼierno a Dʼioso ti meyaj ichil tulakal a yokʼolkabʼ. Xoko Lucas 21:7, 10, 11, 31.

5. Kʼuʼ a tan u bʼetik u Gobʼierno a Dʼioso?

U men tan a predʼikar ichil a junpeet ti yokʼolkabʼ, u Gobʼierno a Dʼioso tan u muchʼkintik a kristiyaano a yaabʼooʼ tubʼajil ichil tulakal a yokʼolkabʼ. Ti milliones a walakooʼ u kabʼalkuntik u bʼajil tanooʼ u bʼel yalam u gobʼierno a Jesusu. Leʼek u Gobʼierno a Dʼioso bʼel u kaʼa u känäntooʼ leʼek ti jobʼsabʼäk a kʼakʼas yokʼolkabʼ adʼaʼa. Leʼek mak u kʼati u yilaʼ u kiʼil u Gobʼierno a Dʼioso tzaj u känik u tzʼoksik a Jesusu. Xoko Apocalipsis 7:9, 14, 16, 17.

Ichil a 1,000 jaabʼ, leʼek u Gobʼierno a Dʼioso bʼel u kaʼa u utzkinte kʼuʼ u kʼatiintaj tiʼi a kristiyaano. Bʼel u kaʼa ti kichʼpan kuuchiltal a junpeet ti yokʼolkabʼ. Pachil, a Jesusu bʼel u kaʼa u kʼubʼuʼ a Gobʼierno a keʼen tukʼäʼ tiʼi u Tat. (1 Corintios 15:24-26) A weel wa mak a tiʼi a kʼati a wadʼä u pektzil u Gobʼierno a Dʼioso? Xoko 2 Pedro 3:13.