Kʼuʼ Bʼel u Kaʼa u Yaanteech a Pulʼooltik a Kambʼal Ichil a Bʼibʼle?

Yan u kiʼil u kambʼalbʼäl kʼuʼ a yan ich Bʼibʼle pero maʼ kʼuʼun u bʼoch bʼetabʼäl. Uchak a tuklik, paatal wa in kaʼa in bʼoch bʼeteʼ in kambʼal ichil a Bʼibʼle. Kʼuʼkaʼa kaʼ a tzʼaaʼ a wool a pulʼoolte a kambʼal? Kʼuʼ jedʼeʼek u yaantikech ti maʼ a pʼätik a kambʼal ich Bʼibʼle kaʼax maʼ kʼuʼun u bʼetabʼäl?

1. Kʼuʼkaʼa mil kʼabʼeet kaʼ uchuk a kambʼal ich Bʼibʼle?

«Leʼec u tʼan a Dioso, cuxaʼan. Yan u mucʼ.» (Hebreos 4:12) A Bʼibʼle walak u yadʼik bʼiki u yool a Dʼios tiʼitoʼon y walak u tzʼeek ti weelte kʼuʼ u tukul. Mentäktunu mil kʼabʼeet a Bʼibʼle. Maʼ chen bʼel u kaʼa u tzʼaaʼ a weelte a bʼaʼal tupektzil a Dʼioso, pero bʼelilik u kaʼa u tzʼaaʼ kaʼ yanak a tukul, a naʼat a tojo y kaʼ a woolte kʼuʼ a kiʼ a bʼel toj u kaʼa ti uchul. A Bʼibʼle jedʼeʼekilik u yaantikech tiʼi kaʼ ʼamiingojakech etel a Jehovah. Tanil a kambʼal ichil a Bʼibʼle tan a chaʼik tiʼi u mukʼ a tʼan a yan ichil kaʼ u jeleʼ a kuxtal.

2. Kʼuʼkaʼa kʼabʼeet kaʼ a weelte bʼoon u kiʼil kaʼ a naʼte a kaʼansaj a jaj a yan ich Bʼibʼle?

Leʼek a jaj a yan ichil a Bʼibʼle jabʼixooʼ ʼoorojo. Mentäkä tan u yadʼik toʼon Bʼibʼle «kʼexe a jaja y maʼ yan kʼin a konik.» (Proverbios 23:23) Tanil ti kulesik ichil ti tukul kʼuʼ u kiʼil a jaja, bʼel u kaʼa u yaantoʼon ti tzʼaaʼ ti wool ti mas pulʼoolte ti kambʼal kaʼax bʼoon uchak tan ti kʼämik a yajaj.—Xoko a Proverbios 2:4, 5.

3. Bʼiki ti jedʼeʼek u yaantikech Jehovah kaʼ a pulʼoolte a kambʼal?

A Jehovah, leʼek a waj Bʼetajil y a ʼAmiingoj, u kʼati u yaanteech kaʼ a weelte maki. Jedʼeʼek u yaantikech kaʼ «[paatakech] a beteʼ a quichʼpan a cʼuʼ u cʼati caʼ a beteʼ [...]. [Jedʼeʼek] ilic u tzʼeec ichil [...] a tucul caʼ a cʼatiinteʼ [...] a beteʼ abeʼe.» (Xoko a Filipenses 2:13.) Wa kʼati a aantabʼäl tiʼi kaʼ a tzʼaaʼ ti meyaj kʼuʼ a tan a käniki waxan kaʼ yanak ichil a wool a bʼeteʼ a kambʼal, jedʼeʼek u yaantikech Jehovah. Jedʼeʼekilik u tzʼeek tech a mukʼ a kʼati tiʼi kaʼ a manes a chich a tan a jentaantiki. Bʼoch kʼaate tiʼi Jehovah ich payajchiʼ kaʼ u yaanteech a pulʼoolte a kambʼal ich Bʼibʼle.—1 Tesalonicenses 5:17.

MAS KAMBʼALTETO

4. Tzʼa ichil a wool u kʼabʼeetil a kambʼal ichil a Bʼibʼle

Yan ti kʼini yaabʼ kʼuʼ a yan ti bʼetabʼäl ich kuxtala. Uchak ti tuklik, maʼ yan a tiempo tiʼi kaʼ ti xoko a Bʼibʼle. Kʼuʼ jedʼeʼek u yaantikoʼon? Xokeʼex a Filipenses 1:10, kaʼtun tzikbʼalteʼex a kʼaatchiʼooʼ adʼaʼa:

• Kʼuʼ tatuklik «a mas kʼabʼeet» ich kuxtala?

• Bʼiki ti jedʼeʼek a tzʼeek a kambʼal ich Bʼibʼle primero ichil a kuxtal?

1. Wa kaʼ a tzʼaaʼ a chʼiʼchʼ ich plastiki kaʼtun a tzʼaaʼ a tunich pachili, maʼ laj bʼel u kaʼa ti okol a tunichi

2. Wa kaʼ a tzʼaaʼ primero a tunichi kaʼtun a tzʼaaʼ a chʼiʼchʼ pachili, yanaktoj tun u kuuchil a chʼiʼchʼi. Bʼoobʼeʼlik tun wa kaʼ a bʼeteʼ «a mas kʼabʼeet» primero ichil a kuxtala, yanaktojlik tun tech a oraj kaʼa bʼeteʼ ulaakʼ a bʼaʼala.

Kʼabʼeet toʼon a Dʼioso. Leʼek ti walak ti kambʼal ich Bʼibʼle walak u kiʼkuntik ti wool leʼek ti walak ti talel ti naʼte maki a Dʼioso y ti tzʼaaʼ u yanil. Xokeʼex a Lucas 11:28, kaʼtun tzikbʼalteʼex a kʼaatchiʼ adʼaʼa:

• Kʼuʼak u kiʼil wa kaʼ ti tzʼaaʼ primero ti kambʼal ich Bʼibʼle?

5. Pulʼoolte a kambʼal kaʼax tan a yaaltabʼäl wetʼbʼel

VIDʼEO: Kiʼkiʼtʼanbʼi ti maʼ u Pʼätaj (5:22)

• Ichil a vidʼeo, bʼikijooʼ u yool u familia y u ʼamiingoj aj Francesco leʼek kaʼ u yadʼaj kʼuʼ a tan u kambʼaltiki?

• Bʼiki ti kiʼkiʼtʼanbʼi ti maʼ u pʼätaj a kambʼala?

Xokeʼex a 2 Timoteo 2:24, 25, kaʼtun tzikbʼalteʼex a kʼaatchiʼooʼ adʼaʼa:

• Bʼikijooʼ u yool a ʼamiingoj y a familia ti walak a adʼikooʼ tiʼi kʼuʼ a tan a kambʼaltiki?

• Jabʼix u yadʼaj a versicolo adʼaʼa, kʼuʼ a kaʼ a bʼeteʼ wa yan mak maʼ kiʼ tuwich ti tan a kambʼal ich Bʼibʼle? Kʼuʼkaʼa?

6. Nojʼoolte a Jehovah kaʼ u yaanteech

VIDʼEO: Jehovah Walak u Yaantikoʼon ti Jeleʼ u Modʼojil ti Kuxtal (3:56)

• Ichil a vidʼeo ti chaʼantaja, kʼuʼtak ti modʼojil u jela aj Jim tiʼi kaʼ u bʼeteʼ kʼuʼ u kʼati a Jehovah?

• Kʼuʼ a kiʼ tawich etel u ejemploj?

Xokeʼex a Hebreos 11:6, kaʼtun tzikbʼalteʼex a kʼaatchiʼooʼ adʼaʼa:

• Kʼuʼ a bʼel u ku bʼeteʼ a Jehovah tiʼijooʼ adʼooʼ «a walacooʼ u cüxtic a Dioso»—leʼekooʼ abʼeeʼ a tanooʼ u yaaltik u wich u yeelte a Jehovah y u bʼeteʼ kʼuʼ u kʼatiji?

• Kʼuʼ a tan u yadʼik a scripturaj adʼaʼa etel bʼiki u yool a Jehovah ti tan a yaaltik a wich ti kambʼal ich Bʼibʼle?

KʼUʼ A KÄNAJA

Leʼek ti kaakech a pulʼoolte a kambʼal ich Bʼibʼle yaabʼ kʼuʼ a bʼel a ka jentaante, pero wa kaʼ a tzʼaaʼ ichil a wool a känäʼ kʼuʼ a yan ich Bʼibʼle jedʼeʼek a wilik u kiʼil a kuxtal ti bʼebʼeel. Tanak ti tanak a nojʼooltik a Jehovah y bʼel u ku kiʼkiʼtʼanteech.

Tzikbʼalbʼäl kʼuʼ ti känaja

• Kʼuʼkaʼa mil kʼochaʼantawich a jaj a yan ich Bʼibʼle?

• Bʼiki «kaʼ a mas tzʼaaʼ ti kuenta kʼuʼ a mas kʼabʼeet»?

• Kʼuʼkaʼa kaʼ a kʼaate tiʼi Jehovah kaʼ u yaanteech a pulʼoolte a kambʼal ich Bʼibʼle?

MAS ILATOJ

Ila cuatro pʼeel a bʼaʼal u aantajooʼ a mak kaʼ u usaartooʼ u tiempo ichil u tojil.

«Bʼiki kaʼ a Usaarte a Tiempo Ichil u Tojil» (Awake!, February 2014)

Juntuul ix chʼupʼ maʼ walak u chʼaʼtojbʼol umen u yächam ti tan u tzʼeek u yool u bʼeteʼ kʼuʼ u kʼati a Dʼioso, ila bʼiki ti aantabʼi umen Jehovah.

A Jehovah Walak u Mukʼaʼankuntikoʼon Tiʼi kaʼ ti Mukʼyajte kʼuʼ a Tan ti Kʼämiki (5:05)

Ila kʼuʼ u jokʼolil tiʼi juntuul winik ti maʼ u pʼätaj a kambʼal u yätana.

In tzʼaj Ichil in Wool kaʼ in Wilaʼ wa Top Jaj a Yan Ichil a Bʼibʼle (6:30)

Leʼek a Testigojooʼ Tiʼi Jehovah walak u yadʼabäl ti walakooʼ u jäpʼ familia. Pero jaj wa abʼeeʼ?

«Walak wa u Jäpʼ Familia a Testigojooʼ Tiʼi Jehovah, Jabʼix Walak u Talesikooʼ Ich Komonil?» (Web article)