KAMBʼAL 21
Bʼiki ti Tan u Mansabʼäl a Mensaaje a kiʼ u Yubʼajbʼäl?
A Jehovah seebʼaʼan u usaartik u Gobʼeerno, tiʼi kaʼ u laj jobʼes ti probʼlema. Top kiʼ u yubʼajbʼäl abʼeeʼ tiʼi kaʼ ti chen kules tiʼi ti bʼajil. A Jesusu u kʼati kaʼ xikooʼ u yaj täkʼään u jätzäʼ a mensaaje adʼaaʼ tiʼi tulakal mak! (Mateo 28:19, 20) Bʼiki ti tanooʼ u bʼetik Testigo Tiʼi Jehovah kʼuʼ u yadʼaj a Jesusu?
1. Bʼiki ti tan u jajtal kʼuʼ u yadʼaj a Mateo 24:14 aleebʼe?
A Jesusu u yadʼaj: «Leʼec u pectzil [u gobʼeerno] a [Dʼioso], yan u yaalbül tulacal tubajac yocʼolcab.» (Mateo 24:14) A Testigojooʼ Tiʼi Jehovah kiʼooʼ u yool ti tanooʼ u bʼetik a meyaj adʼaaʼ a kʼabʼeete. Manal 1,000 tʼan tan ti predʼikaartik a mensaaje a kiʼ u yubʼajbʼäl tuwich a junpeet ti yokʼolkabʼ! Tiempo, mukʼ y kiʼ utzkinbʼil u kʼati a noxiʼ meyaj adʼaji. Maʼ jedʼeʼek ti bʼetik wa maʼ yan u aantaj a Jehovah.
2. Bʼikitak ti walak ti jätzik u pektzil a Dʼios tiʼijooʼ a kristiyaano?
Walak ti predʼikaar leʼek a tubʼaj jedʼeʼek ti käxtikooʼ a kristiyaano. Jabʼixooʼ aj tzʼokʼsaj uchiji, walak ti manäl ti predʼikaar «ichilooʼ u yotoch a cristianojo.» (Hechos 5:42) Leʼek adʼaʼ walak u aantikoʼon ti käxte ti mil a kristiyaano kadʼa jaabʼ. Umen maʼ bʼoch walak ti käxtikooʼ ichilooʼ u yotoch, walakilik ti bʼel tubʼaj yaabʼooʼ a kristiyaano. Walak ti käxtik bʼiki kaʼ ti wadʼäʼ u pektzil a Jehovah y u pektzil u promesaj tiʼijooʼ ulaakʼ mak.
3. Mak a meyaj kaʼ u yadʼäʼ u pektzil a mensaaje a kiʼ u yubʼajbʼäl?
Tulakal a mak a chukul tan u tzʼokʼsaja, kʼabʼeet kaʼ u jätzäʼ a mensaaje a kiʼ u yubʼajbʼäl tiʼijooʼ ulaakʼ a maka. Walak ti predʼikaar leʼek a bʼoon ti jedʼeʼek, umen ti weel ti jedʼeʼek u saʼalbʼälooʼ u kuxtal a kristiyaano. (Xoko 1 Timoteo 4:16.) A Bʼibʼle u yadʼaj: «Maʼax boon u tool [kaʼ a kʼämajeʼex.] Maʼax boon u tool [kaʼ a tzʼaʼeʼex.]» (Mateo 10:7, 8) Maʼ walak ti bʼoʼtabʼäl etel a meyaj adʼaʼa. Kaʼax maʼ tulakal mak walak u yubʼikoʼon, tan ti tan ti predʼikaar umen paarte tiʼi ti tzʼokʼsaj kaʼ ti bʼeteʼ y tan ti kiʼkuntik u yool a Jehovah.
MAS KAMBʼALTETO
Mas naʼtej u pektzil bʼiki ti walakooʼ u predʼikaar a Testigojooʼ Tiʼi Jehovah tupeteebʼ a yokʼolkabʼa. Ila bʼiki ti walak u yaantikoʼon Jehovah.
Predʼikaar tupeteebʼ a yokʼolkabʼ: (A) Tak Costa Rica, (B) Tak Estado, (C) Tak Benin, (D) Tak Thailand, (E) Tak Yap, (F) Tak Sweden
4. Walak ti yaaltik ti wich ti käxtooʼ tulakal a kristiyaanojo
A Testigojooʼ Tiʼi Jehovah walakooʼ u yaaltik u wich u predʼikaarte a mensaaje a kiʼ u yubʼajbʼäl, leʼek a tubʼaj kaʼ u käxtooʼ a kristiyaano. Chaʼanteʼex a VIDʼEO, kaʼtun tzikbʼalteʼex a kʼaatchiʼ adʼaʼa.
Kʼuʼ a kiʼ tawich etel bʼiki ti tanooʼ u bʼetik u predʼikaar a Testigojooʼ Tiʼi Jehovah?
Xokeʼex a Mateo 22:39 etel a Romanos 10:13-15–NWT, kaʼtun tzikbʼalteʼex a kʼaatchiʼooʼ adʼaʼa:
Leʼek ti tan ti predʼikaara, bʼiki ti tan ti yeʼik ti yakunaj tiʼijooʼ a kristiyaanojo?
Bʼiki u yool a Jehovah tiʼijooʼ a tanooʼ u predʼikaara? —Ileʼex a versicolo 15.
5. Tan ti komon meyaj etel a Dʼioso
Leʼek kʼuʼ a walak u uchul ichil a predʼikaara, tan u yeʼik ti Jehovah tan u chʼaʼik u bʼenil ti meyaj. Por ejemploj, ichil a kaj New Zealand juntuul ti sukuʼun aj Pablo u kʼabʼaʼ, u kʼämaj ix chʼup tanil u manäl ti predʼikaar najil naj junpʼeel pach chuunkʼin. Tiʼi a jatzʼkaʼ abʼeeʼ leʼek ix chʼupu uchi u payajchiʼ tiʼi Dʼios. U usaartaj u kʼabʼaʼ a Dʼios Jehovah, y u kʼaataj kaʼ talak sutinbʼäl umen yan mak. «Oxpʼe oraj tupach abʼeeʼ, kʼocheen chiʼ u yotoch» ku tʼan aj Pablo.
Xokeʼex a 1 Corintios 3:9–NWT, kaʼtun tzikbʼalteʼex a kʼaatchiʼ adʼaʼa:
Leʼek kʼuʼ a uchi ichil a kaj New Zealand, bʼiki ti tan u yeʼik ti tan ti komon meyaj etel a Jehovah ti tan ti predʼikaar?
Xokeʼex a Hechos 1:8–NWT, kaʼtun tzikbʼalteʼex a kʼaatchiʼ adʼaʼa:
Kʼuʼkaʼa kʼabʼeet toʼon u yaantaj a Jehovah kaʼ paatakoʼon ti bʼeteʼ a predʼikaara?
A weel wa?
Kadʼa chumuk a semaana ichil ti muchʼtala, walak ti kaʼansabʼäl bʼiki kaʼ uchukoʼon ti predʼikaar. Wa talaʼanech junsutak tiʼi a muchʼtal abʼeeʼ, bʼiki a wool etel a kaʼansaj a walak u tzʼabʼälä?
6. Tan ti tzʼokʼsik u tʼan a Jehovah tiʼi kaʼ uchukoʼon ti predʼikaar
Uchi kaak wetʼbʼelooʼ u yaj täkʼään a Jesus ti predʼikaar. Leʼekooʼ aj tzʼokʼsaj uchiji u yaaltajooʼ u wich u pʼisbʼajte ti maʼ u wetʼbʼelooʼ ti predʼikaar. «[Tanilooʼ u] yeʼic ti maʼ tusil u tʼan a Dioso. [Tanooʼ u] yeʼic ti jaj.» (Filipenses 1:7) Bʼaaloʼilik a walak u bʼetikooʼ a Testigo Tiʼi Jehovah aleebʼe.a
Xokeʼex a Hechos 5:27-42–NWT, kaʼtun tzikbʼalteʼex a kʼaatchiʼ adʼaʼa:
Kʼuʼkaʼa maʼ bʼel ti kaʼa ti pʼätäʼ a predʼikaar?—Ileʼex a versicolo 29, 38, etel 39.
UCHAK U KʼAATIK MAK: «Kʼuʼkaʼa walakooʼ u manäl a Testigojooʼ Tiʼi Jehovah najil naja?»
Bʼiki ti bʼel a kaʼa a nuukte?
KʼUʼ A KÄNAJA
A Jesusu u yadʼaj tiʼijooʼ u yaj täkʼään kaʼ u predʼikaartooʼ a mensaaje a kiʼ u yubʼajbʼäl ichil tulakal a naciono. A Jehovah tan u yaantik u jente tiʼi kaʼ u bʼetooʼ a meyaj adʼaaʼ.
Tzikbʼalbʼäl kʼuʼ ti känaja
Bʼiki ti tan u predʼikaarbʼäl a mensaaje a kiʼ u yubʼajbʼäl tupeteebʼal a yokʼolkabʼa?
Leʼek ti tan ti predʼikaara, bʼiki ti tan u yeʼik ti yakunaj tiʼijooʼ a kristiyaano?
Jedʼeʼek wa u kiʼkuntik ti wool a predʼikaara? Kʼuʼkaʼa?
MAS ILATOJ
Ila bʼiki ti walakooʼ u predʼikaar a Testigo Tiʼi Jehovah tiʼijooʼ a kristiyaano kumaʼanooʼ ichil a nukuch kaj.
Predʼikaar Leʼek Tubʼaj Tanooʼ u Manäl a Kristiyaano Ichil a Kaj Paris (5:11)
Bʼiki ti walak u aantabʼälooʼ umen Testigo Tiʼi Jehovah a mak a tanooʼ u puutzʼul ichil u kaal umen yajil?
Tan u Kaʼansabʼäl u Pektzil a Dʼios Tiʼijooʼ a Tanooʼ u Puutzʼul (5:59)
Uyi kʼuʼkaʼa kiʼ u yool juntuul a mak ti tan u yusaartik u kuxtal ti predʼikaar.
Ila bʼiki ti mas bʼini a predʼikaar taanil umen uchooʼ u ganaar ti koorte a Testigojooʼ.
«Aj Tzʼokʼsajooʼ Bʼinooʼ ti Tʼanil» (Godʼs Kingdom Rules!, chapter 13)
a Dʼios u yadʼaj toʼon kaʼ uchukoʼon ti predʼikaar. Maʼ kʼabʼeet tiʼijooʼ Testigo Tiʼi Jehovah kaʼ u kʼaatooʼ u permiisa tiʼi kaʼ uchukooʼ u predʼikaar.