Zeremi sebre

44 Ad goam nins Wẽnnaam sẽn yeel a Zeremi t’a taas Zʋɩf-rãmb nins fãa sẽn be Ezɩpt soolmẽ wã,+ sẽn be-b Migdoll+ ne Tapanɛɛs+ la Noof*+ n paas Patroos soolmẽ wã:+ 2 “Ad Israyɛll Wẽnnaam a Zeova sẽn yaa tãb-biis naabã sẽn yeele: ‘Yãmb yãa yel-beed nins fãa mam sẽn kɩt tɩ wa Zerizalɛm+ la Zida tẽnsã fãa zutu, tɩ b yaa rabood rũndã-rũndã, tɩ ned pa le be b pʋsẽ wã.+ 3 Yaa bõn-wẽns nins yãmb sẽn maan n yik mam sũurã yĩnga. Yãmb da kẽnd n maanda maand+ n kõt wẽnnaam-dãmb a taab yãmb ne y yaab-rãmbã sẽn da pa mi, la y waoogd-ba.+ 4 Mam da tʋmda no-rɛɛsdbã sẽn yaa m tʋm-tʋmdbã fãa yãmb nengẽ. M tʋm-b-la naoor wʋsgo,* n yeel yaa: “M bõos tɩ y ra maan bõn-wẽn-kãngã mam sẽn kisã ye.”+ 5 La y pa kelg ye. Yãmb pa kɩll y tʋb n kelg maam n bas y wẽnemã, n pa le kõt wẽnnaam-dãmb a taab maand ye.+ 6 Rẽ n so tɩ mam kiig m sũ-yikrã ne m sũ-puugrã tɩ b rɩ Zida tẽnsã pʋsẽ la Zerizalɛm soayã zut wa bugum, tɩ b lebg rabood la zĩ-vɩɩd wa sẽn yaa to-to rũndã-rũndã wã.’+

7 “Masã, ad Israyɛll Wẽnnaam a Zeova sẽn yaa tãb-biis Wẽnnaamã sẽn yeele: ‘Bõe yĩng tɩ y na n kɩt tɩ yel-be-kãseng wa y mens* zutu, tɩ Zida rapã, pagbã, kambã, la kom-peelsã fãa sãame, tɩ y ned baa a ye pa kelle? 8 Bõe yĩng tɩ yãmb yikd mam sũurã ne y nusã tʋʋma, n kõt wẽnnaam-dãmb a taab maand Ezɩpt soolmẽ wã, yãmb sẽn tɩ beẽ wã? Yãmb na n sãamame, n lebg bũmb nebã sẽn na n tar n kãabd wẽnga. B na n paoogda yãmb tẽngã buud toɛy-toɛyã fãa sʋka.+ 9 Rẽ yĩnga, yãmb yĩma y yaab-rãmbã tʋʋm-wẽnsã, Zida rĩm-dãmbã+ ne b pagbã tʋʋm-wẽnsã,+ n paas yãmb mensã ne y pagbã tʋʋm-wẽnsã,+ tʋʋm-wẽns nins sẽn maan Zida soolmẽ wã la Zerizalɛm soayã zutã bɩ? 10 Hal n tãag rũndã, yãmb pa sik y mense,* y pa zoe maam,+ wall y tũ mam tõogã ne noy nins mam sẽn kõ yãmb ne y yaab-rãmbã ye.’+

11 “Woto wã, ad Israyɛll Wẽnnaam a Zeova sẽn yaa tãb-biis naabã sẽn yeele: ‘Ade! Mam yãka yam n na n kɩt tɩ yel-beed wa yãmb zutu, n sãam Zida nebã fãa. 12 Mam na n kɩtame tɩ Zida neb nins sẽn kellã sẽn yãk yam n na n tɩ zĩnd Ezɩpt soolmẽ wã ki be. B fãa na n sãama Ezɩpt soolmẽ wã.+ B na n kii zabr pʋgẽ. Kom n na n kʋ-ba. Zabr ne kom n na n kʋ-ba, sẽn sɩng ne sẽn yaa-a bilf n yɩɩdã n tãag sẽn yaa-a kãseng n yɩɩdã. B na n lebga bũmb nebã sẽn na n tar n kãabd wẽnga, bũmb sẽn kẽesd rabeem, la kãab-wẽnga. Nebã na n paoogd-b lame.+ 13 Yaa ne zabre, kom la bã-loangdg* la mam na n sɩbg neb nins sẽn be Ezɩpt soolmẽ wã, wa mam sẽn sɩbg Zerizalɛm nebã to-to wã.+ 14 Zida neb nins sẽn kellã sẽn tɩ be Ezɩpt soolmẽ wã pa na n tõog n zoe n yi be, wall b põs n lebg n wa Zida soolmẽ wã ye. B na n tʋlga ne b sũy fãa n lebg n wa zĩnd be, la b pa na n lebg n wa ye. Yaa neb bilf bal n na n tõog n lebg n wa.’”

15 Rap nins fãa sẽn da mi tɩ b pagbã maanda maand n kõt wẽnnaam-dãmb a taabã, la pagb nins fãa sẽn da yas be wã sẽn naag taab n yaa kʋʋngã, ne neb nins fãa sẽn da be Patroose,+ Ezɩpt soolmẽ wã+ leoka a Zeremi yaa: 16 “Tõnd pa na n kelg goam nins fo sẽn togs tõnd a Zeova yʋʋr yĩngã ye. 17 Hakɩɩka, tõnd na n maana bũmb nins fãa d sẽn yiis d noyẽ wã. D na n maanda maand n kõt Saasẽ na-poakã,* la d pʋdgd divẽ kũun n kõt-a,+ wa tõnd ne d yaab-rãmbã, d rĩm-dãmbã, la d nanambsã sẽn maan Zida tẽnsã pʋsẽ la Zerizalɛm soayã zutu, d sẽn wa n dɩt rɩɩb* tɩ sekd tõndo, la d tar arzɛk wʋsgo, tɩ yel-beed pa tol n paamd tõndã. 18 Tõnd sẽn bas n pa le kõt Saasẽ na-poakã* maandã, la d pa le pʋdgd divẽ kũun n kõt-a wã tɛka, tõnd pa le tar baa fʋɩ ye. Zabr la kom n kʋ tõndo.”

19 Pagbã paasame yaa: “Tõnd sẽn wa n kõt Saasẽ na-poakã* maandã, la d pʋdgd divẽ kũun n kõt-a wã, rẽ yĩnga, pa d sɩdbã n sak tɩ d maand bur sẽn yaa a naand n kõt-a, la d pʋdgd divẽ kũun n kõt-a sɩda?”

20 Dẽ, a Zeremi yeela nin-buiidã fãa, rapã ne b pagbã la neb nins fãa sẽn da gomd ne-a wã yaa: 21 “A Zeova tẽega maand nins yãmb ne y yaab-rãmbã, y rĩm-dãmbã, y nanambsã la soolmã nebã sẽn maan Zida tẽnsẽ wã, la Zerizalɛm soayã zutã yelle.+ Rẽ waa a yamẽ!* 22 A Zeova wa n pa le tõe n sĩnd n get y tʋʋm-wẽnsã ne bõn-wẽns nins y sẽn maandã ye. Rẽ n so tɩ y soolmã lebg raboogo, bũmb sẽn kẽesd rabeem la bũmb nebã sẽn na n tar n kãabd wẽnga, tɩ ned pa le be a pʋgẽ wa sẽn yaa to-to rũndã-rũndã wã.+ 23 Yaa yãmb sẽn maan maan-kãensa wã, la yãmb sẽn maan yel-wẽn n beeg a Zeova, n pa sak a Zeova koɛɛgã, la y pa tũ a tõogã, a noyã la a saglsã yĩng la yel-be-kãngã sẽn wa yãmb zutu, wa sẽn yaa to-to rũndã-rũndã wã.”+

24 A Zeremi le yeela nin-buiidã ne pagbã fãa yaa: “Yãmb a Zida neb nins fãa sẽn be Ezɩpt soolmẽ wã, kelg-y-yã a Zeova goamã. 25 Ad Israyɛll Wẽnnaam a Zeova sẽn yaa tãb-biis naabã sẽn yeele: ‘Bũmb ning yãmb ne y pagbã sẽn yiis y noyẽ wã, yãmb pidsa bõn-kãens ne y nusi, bala yãmb yeelame: “Hakɩɩka, tõnd na n pidsa d pʋlemsã, n kõt Saasẽ na-poakã* maand la d pʋdgd divẽ kũun n kõt-a.”+ Sãmbg sẽn kae, yãmb a pagbã na n pidsa y pʋlemsã. Y na n maana wa y sẽn pʋlmã.’

26 “Woto yĩnga, yãmb a Zida neb nins fãa sẽn be Ezɩpt soolmẽ wã, kelg-y-yã a Zeova goamã. A yeelame: ‘A Zeova yeelame yaa: “M wẽenda ne m yʋʋrã sẽn yaa kãsengã tɩ Zida ned baa a ye pa na n le wẽen ne mam yʋʋrã+ Ezɩpt soolmã fãa pʋgẽ, n yeele: ‘M wẽenda ne Zu-soab sẽn ka to a Zeova sẽn vɩ wã!’+ 27 Masã, mam get-b lame, la pa b neer yĩng ye. Yaa sẽn na n kɩt tɩ yel-beed wa b zutu.+ Zabr la kom n na n kʋ Zida neb nins fãa sẽn be Ezɩpt soolmẽ wã, hal tɩ b wa menem zãnga.+ 28 Yaa neb bilf bal n na n põs zabrã n yi Ezɩpt soolmẽ wã, n leb Zida soolmẽ wã.+ Dẽ, Zida neb nins fãa sẽn kellã sẽn wa n na n zĩnd Ezɩpt soolmẽ wã na n bãnga sã n yaa mam goamã n pidsi, bɩ yaa bãmb goamã!”’”

29 “A Zeova yeelame: ‘Ad bãnd sẽn wilgd tɩ m na n sɩbga yãmb zĩ-kãngã, sẽn na yɩl tɩ y bãng tɩ mam sẽn yeel tɩ m na n kɩtame tɩ yel-beed wa yãmb zutã na n sɩd pidsame. 30 Ad a Zeova sẽn yeele: “Mam na n dɩka Ezɩpt rĩm a Farawõ Hofra n ning a bɛɛbã nusẽ, la neb nins sẽn baood n yãk a yõorã* nusẽ, wa mam sẽn dɩk Zida rĩm a Sedesiyaas n ning Babilon rĩm a Nebukadnezaar* sẽn da yaa a bɛ la sẽn da baood n yãk a yõorã* nugẽ wã.”’”+