Kibayã pipi sebre

17 A Davɩɩd sẽn kẽ a na-yirã bala, a yeela no-rɛɛs a Natã+ yaa: “Mam gãee roog sẽn me ne sɛɛdr tɩɩs raad pʋgẽ,+ t’a Zeova kaoolã koglg yaool n be fu-roogẽ.”+ 2 A Natã leoka a Davɩɩd yaa: “Maan-y bũmb ning fãa y sẽn date, bala Wẽnnaam bee ne yãmba.”

3 La baraar yʋng bala, Wẽnnaam goma ne a Natã n yeele: 4 “Kẽng n tɩ yeel m tʋm-tʋmd a Davɩɩd yaa: ‘Ad a Zeova sẽn yeele: “Pa foo n na n me roogã n kõ maam tɩ m zĩnd a pʋgẽ ye.+ 5 Bala mam sẽn yiis Israyɛll nebã Ezɩptã tɛk n tãag rũndã, mam pa zĩnd roog pʋgẽ ye. La mam da yita fu-roog a ye n kẽ a to pʋgẽ, la sɛk-roog a ye n kẽ a to pʋgẽ.+ 6 Rẽ yĩnga, wakat ning fãa mam sẽn zĩnd ne Israyɛll nebã, m tol n goma ne Israyɛll bʋ-kaood baa a ye m sẽn yãk t’a ges m nin-buiidã yelle, n sok-a tɩ bõe yĩng tɩ y pa me sɛɛdr tɩɩs raad roog n kõ-ma?”’

7 Rẽ wã, tɩ yeel mam tʋm-tʋmd a Davɩɩd t’a Zeova sẽn yaa tãb-biis naabã yeelame yaa: “Fo ra bee weoogẽ n gũud rũmsi, tɩ mam wa yiis foo be n kɩt tɩ f lebg Israyɛll nebã sẽn yaa mam nin-buiidã taoor soaba.+ 8 Mam na n zĩnda ne foo zĩig ning fãa fo sẽn na n kẽnge,+ la m na n menesa fo bɛɛbã fãa f taoore,+ la m kɩt tɩ f yʋʋrã lebg kãsenga, wa dũniyã nin-kãsemsã yʋya.+ 9 Mam na n yãka zĩig n kõ Israyɛll nebã sẽn yaa mam nin-buiidã tɩ b tilg be. Bãmb na n zĩnda be, la ned baa a ye kõn tiis-b ye. Nin-wẽns pa na n le nams-b wa b sẽn da nams-b to-to pĩndã,+ 10 wakat ning mam sẽn da yãkd bʋ-kaoodb tɩ b get Israyɛll nebã sẽn yaa mam nin-buiidã yellã ye.+ Mam na n kɩtame tɩ f paam f meng ne f bɛɛbã fãa.+ Sẽn paase, mam yeta foo: ‘A Zeova na n kɩtame tɩ fo buudã lebg na-roogo.’

11 “‘“Fo sã n wa maan kaalem wa f yaab-rãmbã, mam na n kɩtame tɩ ned sẽn na n yi fo pendẽ wã, rat n yeel tɩ fo biig a yembr lebg rĩma,+ la mam na n vigla a rĩungã kãn-kãe.+ 12 Yaa yẽ n na n me roog mam yĩnga,+ la m na n vigla a naamã geer wakat fãa yĩnga.+ 13 Mam na n yɩɩ yẽ ba, la yẽ na n lebga mam biiga.+ Mam na n nong-a-la ne nonglem sẽn pa na n tol n sa ye.+ Mam pa na n bas-a wa m sẽn bas ned ning sẽn deng foomã ye.+ 14 Mam na n kɩtame tɩ yẽ yals mam roogẽ wã ne m rĩungã pʋgẽ wakat fãa,+ la yẽ naamã geer na n vigla wakat sẽn kõn sa.”’”+

15 A Natã togsa a Davɩɩd gom-kãensã fãa, n paas Wẽnnaam sẽn vẽneg-a wã fãa.

16 Rĩm a Davɩɩd sẽn wʋm dẽ wã, a tɩ zĩnda a Zeova taoor n yeele: “Mam Wẽnnaam a Zeova, mam yaa ãnda, la m doogã rãmb yaa ãnd rãmb tɩ yãmb maan woto fãa n kõ maam?+ 17 Wẽnnaam, woto fãa ket n pa sek yãmba, tɩ y yeel tɩ y tʋm-tʋmdã roog rãmb na n kaoosa hal wʋsgo.+ Wẽnnaam a Zeova, yãmb gesa maam wa m yaa ned b sẽn segd n zẽk n paase.* 18 Bõe la maam a Davɩɩd sẽn yaa yãmb tʋm-tʋmdã tõe n le yeel n paase? Bala yãmb mii maam sõma.+ 19 Zeova, yãmb tʋm-tʋmdã yĩnga, yãmb maana bõn-kãensã fãa sẽn yaa kãsemsã, la wa sẽn zems y raabo, n wilg tɩ yãmb yaa kãsenga.+ 20 Zeova, yãmb to kae,+ la Wẽnnaam a to kae n zʋʋg yãmb ye.+ Bũmb nins fãa tõnd sẽn wʋmã wilgda rẽ. 21 Rẽ yĩnga, buud a to bee tẽngã zug n yaa wa Israyɛll nebã sẽn yaa yãmb nin-buiidã sɩda?+ Wẽnnaam kẽngame n tɩ fãag bãmba, n kɩt tɩ b lebg a nin-buiidu.+ Yãmb tʋma tʋʋm-kãsemse, la y maan bõn-yɛɛsds bãmb yĩng sẽn na yɩl tɩ nebã bãng y yʋʋrã.+ Yãmb meng n fãag y nin-buiidã Ezɩpti, n dig bu-zẽmsã y nin-buiidã taoore.+ 22 Yãmb kɩtame tɩ Israyɛll nebã lebg yãmb nin-buiid wakat fãa yĩnga,+ la yãmb a Zeova lebga bãmb Wẽnnaam.+ 23 Masã, Zeova, bɩ y kɩt tɩ bũmb ning y sẽn pʋlem y tʋm-tʋmdã ne a roogã rãmbã pids wakat fãa yĩnga, la y maan wa y sẽn pʋlmã.+ 24 Bɩ y yʋʋrã paam waoogr+ la a kaoos wakat fãa, sẽn na yɩl tɩ nebã tõog n yeel tɩ tãb-biis naab a Zeova, Israyɛll Wẽnnaamã n sɩd yaa Israyɛll nebã Wẽnnaam. La bɩ yãmb tʋm-tʋmd a Davɩɩd na-roogã vigl kãn-kãe yãmb taoore.+ 25 Bala mam Wẽnnaam, yãmb n vẽneg y tʋm-tʋmdã n yeel-a tɩ y na n yẽbga na-roog n kõ-a. Rẽ n so tɩ yãmb tʋm-tʋmdã paam daood n pʋʋsd yãmb n gomd woto. 26 Zeova, yãmb la Wẽnnaam sɩd-sɩdã, la yãmb pʋlma y tʋm-tʋmdã bõn-kãensã sẽn yaa sõma wã. 27 Rẽ wã, m kotame tɩ y ning y tʋm-tʋmdã na-roogã barka, la bɩ a kaoos wakat sẽn kõn sa yãmb taoore. Bala Zeova, yãmb ninga barka, la barkã na n yɩɩ wakat fãa.”