Zeremi sebre
24 A Zeova wilga maam kankam pet a yiib sẽn dɩg a Zeova roogã noore. Yɩɩ Babilon rĩm a Nebukadnezaar* sẽn tall a Zowakim+ biig a Zekoniya*+ sẽn yaa Zida rĩmã, n paas Zida nanambsã, nug-tʋʋm dãmbã ne sãabã n kẽng yembdã poore. A tall-b lame n yi Zerizalɛm n kẽng Babilonne.+ 2 Peoog a yembr da tara kankam sẽn yaa sõma wʋsgo, n yaa wa dẽenem kankama, tɩ peoog a to wã tar kankam sẽn põog wʋsgo. B põoga wʋsg hal tɩ ned pa tõe n dɩ-b ye.
3 Dẽ, a Zeova soka maam yaa: “Zeremi, bõe la fo ne-yã?” Tɩ mam leok yaa: “M nee kankama. Sẽn yaa-b sõma wã yaa sõma wʋsgo, la sẽn yaa-b põaasã yaa põaas wʋsgo. B põoga wʋsg hal tɩ ned pa tõe n dɩ-b ye.”+
4 Dẽ, a Zeova goma ne maam n yeele: 5 “Ad Israyɛll Wẽnnaam a Zeova sẽn yeele: ‘Mam na n maana Zida neb nins b sẽn tall n kẽng yembdã sẽn yaa sõma, wa kankam-kãensã sẽn yaa sõma wã. Yaa neb nins mam sẽn kɩt tɩ b yi zĩ-kãngã n kẽng Kalde nebã soolmẽ wã. 6 Mam ninã na n get-b-la b neer yĩnga. Mam na n kɩtame tɩ b lebg n wa soolem-kãngã pʋgẽ.+ Mam na n me-b lame, m pa na n tus-b n lub ye. Mam na n sel-b lame, m pa na n võ-b ye.+ 7 Mam na n kõ-b-la sũur sẽn na n kɩt tɩ b bãng maam, tɩ b bãng tɩ mam yaa a Zeova.+ B na n lebga mam nin-buiidu, tɩ mam lebg b Wẽnnaam,+ bala b na n lebg n waa mam nengẽ ne b sũy fãa.+
8 “‘La sã n yaa ne kankam nins sẽn põoge, n yaa põaas hal tɩ ned pa tõe n dɩ-bã+ wɛɛngẽ, ad a Zeova sẽn yeele: “Yaa woto la mam na n ges Zida rĩm a Sedesiyaase,+ a nanambsã, Zerizalɛm neb nins sẽn ket n be soolmẽ wã, la sẽn be-b Ezɩpt soolmẽ wã.+ 9 Mam na n kɩtame tɩ yel-beed paam-ba, hal tɩ b lebg bũmb sẽn kẽesd rabeem tẽngã soolem toɛy-toɛyã fãa nifẽ.+ Zĩis nins fãa mam sẽn na n sãeeg-bã+ pʋsẽ, nebã na n tʋʋd-b lame, n paoogd-ba,* n yaand-b la b kãabd-b wẽnga.+ 10 Mam na n kɩtame tɩ zabre, kom la bã-loangdg* kʋ-ba,+ hal tɩ b wa menem soolem ning mam sẽn kõ bãmb ne b yaab-rãmbã pʋgẽ.”’”