Zeremi sebre
52 A Sedesiyaas+ sẽn deeg naamã t’a tara yʋʋm pisi la a yembre, la a rɩɩ naam yʋʋm piig la a ye Zerizalɛm. A ma yʋʋr la a Hamutalle,+ n da yaa Libna rao a Zeremi bi-pugla. 2 A ra maanda sẽn yaa wẽng a Zeova nifẽ. Yẽ maana bũmb nins fãa a Zowakim sẽn maanã.+ 3 Yɩɩ a Zeova sũ-puugrã yĩng la bõn-kãensã sẽn maan Zerizalɛm la Zida pʋgẽ wã, hal t’a wa menes-b a nifẽ.+ Sẽn paase, a Sedesiyaas tõdgame t’a kõn sak Babilon rĩmã ye.+ 4 A Sedesiyaas naamã yʋʋm a wɛ soabã, kiuug piigã rasem piig soabã daare, Babilon rĩm a Nebukadnezaar* waa ne a tãb-biisã fãa n na n zab ne Zerizalɛm. B tilga b sik-zĩigã, n me lalg n gũbg tẽngã.+ 5 Bãmb gũbga tẽngã n tãag rĩm a Sedesiyaas naamã yʋʋm piig la a ye soabã.
6 Kiuug a naas-n-soabã rasem a wɛ soabã daare,+ komã wɩnga tẽngã pʋgẽ hal tɩ rɩɩb ra kae nin-buiidã sẽn na n dɩ ye.+ 7 B wa n pooga tẽngã lalg tɩ sodaasã fãa tũ rignoor ning sẽn be lals a yiibã sʋka, rĩmã zẽedã zĩig sɛɛgã n zoe ne yʋngo. Rẽ tɩ Kalde nebã gũbga tẽngã. B kell n dɩka Araba wã sor n zoetẽ.+ 8 La Kalde nebã sodaasã pʋgla rĩm a Sedesiyaas+ n tɩ paam-a Zeriko we-rasempʋɩɩgã sẽn yaa tẽn-nabrẽ wã, t’a sodaasã fãa sãeeg n bas-a. 9 Dẽ, bãmb yõka rĩmã n tall-a n kẽng Babilon rĩmã nengẽ Ribla sẽn be Hamat soolmẽ wã, t’a kao a bʋʋdo. 10 Babilon rĩmã kʋʋ a Sedesiyaas kom-dibli wã a nifẽ, la a kʋ Zida nanambsã fãa Ribla. 11 Rẽ poore, a leoa a Sedesiyaas ninã,+ la a balg-a ne zũud bãens n tall-a n kẽng Babilonne, n tɩ pag-a bãens roog n tãag a kũumã daare.
12 Babilon rĩm a Nebukadnezaar* naamã yʋʋm piig la a wɛ soabã, kiuug a nu wã rasem piig soabã daare, a Nebuzaradan sẽn yaa gũudbã naaba, n leb n yaa Babilon rĩmã tʋm-tʋmdã waa Zerizalɛm.+ 13 Yẽ yõoga a Zeova roogã,+ rĩmã zakã,* la Zerizalɛm zagsã fãa. Sẽn paase, a yõoga ro-bɛdã fãa. 14 Kalde tãb-biisã fãa sẽn da be ne gũudbã naabã tusa lals nins fãa sẽn da gũbg Zerizalɛmmã n lubi.+
15 Gũudbã naab a Nebuzaradan talla naong rãmb kẽere, ne neb nins sẽn da ket tẽngã pʋgẽ wã n kẽng yembdo. A talla neb nins sẽn da zoe n tɩ sak Babilon rĩmã, ne nus-tʋʋm dãmb nins sẽn mi b tʋʋmd sõma wã sẽn ketã me n kẽng yembdo.+ 16 La gũudbã naab a Nebuzaradan basa tẽngã neb nins sẽn yaa naong rãmb n yɩɩdã kẽere. Yẽ modg-b lame tɩ b na n yõd n kood viyn pʋtã la pʋt a taabã.+
17 Kalde nebã wãa a Zeova roogã zũud ra-lugsã,+ n paas bilim-bilim-dãmbã+ ne zũud Mogrã+ sẽn da be a Zeova roogẽ wã, la b wʋk zũudã fãa n kẽng Babilon.+ 18 Bãmb wʋka tompɛglem laasã, pell-dãmbã, teed nins b sẽn tar n kiisd fɩtl-dãmbã bugmã, la-bõonegã,+ wũmbli wã,+ la teed nins fãa sẽn maan ne zũudã b sẽn da tar n tʋmd wẽnd-doogẽ wã. 19 Gũudbã naab wʋka la-pogdã,+ bugum laasã, la-bõonegã, tompɛglem laasã, fɩtl-dogendsã,+ wũmbli wã, la la-bõoneg nins sẽn maan ne sãnem halaal la ne wanzuri halaalã.+ 20 La sã n yaa ne ra-lugs a yiibã, Mogrã, zũud lols piig la a yiibã+ sẽn da be Mogrã tẽngrã, la bilim-bilim-dãmbã rĩm a Salomo sẽn da maan a Zeova roogã yĩngã, b ra pa tõe n mak te-kãensã fãa zũudã zɩslem n bãng ye.
21 Sã n yaa ne ra-lugsã, ra-luk fãa zãntlem ra yaa kãntɩɩg* piig la a nii. B ra tõe n talla wĩir woglem sẽn yaa kãntɩɩg piig la a yiib n vilimd-a n soge.+ A taglmã ra yaa nug-bil* naoor a naase. A pʋgẽ wã ra yaa vɩʋʋgo. 22 Pugli wã sẽn da be b zutẽ wã ra yaa ne zũudu. Pugl fãa zãntlem ra yaa kãntɩɩg a nu.+ Gãmbrã ne gernaad tɩɩg biisã fãa b sẽn maan n gilg puglã ra yaa ne zũudu. Ra-luk a to wã ne gernaad tɩɩg biisã me ra yaa woto. 23 Gernaad tɩɩg biis pis-wɛ la a yoob n da gilg gãmbrã tɩ b neẽ, la fãa sã n naag taaba, ra yaa gernaad tɩɩg biis koabga.+
24 Gũudbã naab yõka maan-kʋʋdbã taoor soab a Seraya,+ n paas maan-kʋʋd a Sofoni+ sẽn yaa a pʋgdgã, ne rigno-gũudb a tãabã.+ 25 Yẽ leb n yõka tẽngã na-yirã tʋm-tʋmd a ye sẽn da get sodaasã yelle, n paas rĩmã sagendb a yopoe, ne sodaasã naab seb-gʋlsdã sẽn da yãkd sodaas nin-buiidã sʋkã, la rap pis-yoob nin-buiidã sẽn da ket tẽngã pʋgẽ wã sʋka. 26 Gũudbã naab a Nebuzaradan talla bãmb n kẽng Babilon rĩmã nengẽ Ribla. 27 Babilon rĩmã kʋʋ bãmb Ribla,+ Hamat soolmẽ wã. Yɩɩ woto la b yiis Zida nebã b soolmẽ wã, n tall-b n kẽng yembdo.+
28 Ad neb nins a Nebukadnezaar* sẽn tall n kẽng yembdã sõore: Yʋʋm a yopoe-n-soabã, yɩɩ Zʋɩf-rãmb tus a tãab la pisi la a tãabo.+
29 A Nebukadnezaar*+ naamã yʋʋm piig la a nii-n-soabã, b talla neb* kobs-nii la pis-tã la a yiib n yi Zerizalɛm.
30 A Nebukadnezaar* naamã yʋʋm pisi la a tãab-n-soabã, gũudbã naab a Nebuzaradan talla Zʋɩf-rãmb n kẽng yembdo. Yɩɩ neb* kobs-yopoe la pis-naas la a nu.+
Fãa sã n naag taaba, yaa neb* tus a naas la kobs yoob la b tall n kẽng yembdo.
31 B sẽn tall Zida rĩm a Zowakin+ n kẽng yembdã yʋʋm pis-tã la a yopoe-n-soabã, kiuug piig la a yiib-n-soabã rasem pisi la a nu wã daare, Babilon rĩm a Evɩll-merodak yiis-a lame.* Yɩɩ yʋʋmd ning a Evɩll-merodak sẽn deeg naamã la a yiis-a bãensã roogẽ.+ 32 A goma ne a Zowakin noog-noogo, la a kõ-a naam n yɩɩg rĩm-dãmb a taabã sẽn da be ne-a Babilonnã. 33 Woto, a Zowakin yeesa a bãens roog futã. Hal a yõor tɛka, yẽ ra rɩta rĩmã taoor daar fãa. 34 Babilon rĩmã ra kɩtame tɩ b kõt-a rɩɩb daar fãa n tãag a kũumã daare, rat n yeel t’a yõor tɛka.