Ezekɩyɛll sebre

39 “Foom a ninsaal biiga, togs bãngr-gomd n ning a Goog taale,+ n yeel-a yaa: ‘Ad a Zeova sẽn yaa Zu-soab sẽn ka to wã sẽn yeele: “Goog sẽn yaa Mesɛk la Tuball na-kãsengã, mam na n zaba ne foo.+ 2 Mam na n kɩtame tɩ fo lebg n leb poorẽ. Mam na n talla foo tɩ f yi rɩtg zĩis nins sẽn zãr n yɩɩdã,+ n wa Israyɛll tãensã zutu. 3 Mam na n wẽe fo tãpã t’a yi f goabg nugẽ wã n lʋɩ, la m kɩt tɩ f pɛɛmã yi f rɩtg nugẽ wã n dʋʋge. 4 Fo na n kii Israyɛll tãensã zutu,+ foo ne f tãb-biisã fãa la buud toɛy-toɛy nins sẽn na n zĩnd ne foomã. Mam na n dɩka foo n kõ bõn-yɩgdɩ buud fãa la we-rũmsã sẽn be weoogẽ wã tɩ yɩ b rɩɩbo.”’+

5 “‘Fo na n kii weoogẽ wã,+ bala yaa mam meng n gome.’ Yaa a Zeova sẽn yaa Zu-soab sẽn ka to wã n yeele.

6 “‘Mam na n kɩtame tɩ bugum tɩ rɩ Magoog ne neb nins sẽn zĩ ko-sʋk tẽnsẽ wã ne bãanã.+ Woto, b na n bãngame tɩ mam yaa a Zeova. 7 Mam na n kɩtame tɩ b bãng mam yʋʋrã sẽn yaa sõngã Israyɛll nebã sẽn yaa mam nin-buiidã sʋka. M pa na n bas tɩ b le sãam mam yʋʋrã sẽn yaa sõngã ye. Woto, buud toɛy-toɛyã na n bãngame tɩ mam yaa a Zeova,+ Sõng soabã sẽn be Israyɛllã.’+

8 “‘Hakɩɩka, bõn-kãngã watame. A na n pidsame.’ Yaa a Zeova sẽn yaa Zu-soab sẽn ka to wã n yeele. ‘Yaa ra-kãng yell la mam sẽn da gomã. 9 Israyɛll tẽnsã neb na n yiime n wʋk zab-teedã n tar n yõgend bugum. Yaa gãn-bõonegã,* gãndã, tãbdã, pɛɛmã, guudã* la kãnã. B na n tall-b lame n yõgen bugum+ yʋʋm a yopoe. 10 Pa na n yɩ tɩlɛ tɩ b kẽ weoogã n bao raado, wall b kẽ kãgã n wɩɩs raad sẽn na n tall n yõgen bugum ye. Bala b na n tara zab-teedã n yõgend bugum.’

“‘B na n zɛɛ sẽn da zɛɛd-b bãmbã, la b fã sẽn da fãad-b bãmbã.’ Yaa a Zeova sẽn yaa Zu-soab sẽn ka to wã n yeele.

11 “‘Baraare, mam na n yãka yaad zĩig Israyɛll long a ye pʋgẽ n kõ a Googe.+ Yaa long ning sẽn be mogrã yaangã, so-toagdbã sẽn tũudẽ wã. Yaadã na n gɩdga neb nins sẽn tũud be wã sore. Yaa be la b na n mum a Goog ne a tãb-biisã fãa. B na n boola zĩ-kãng tɩ Hamon-goog longo.*+ 12 Israyɛll buudã neb na n mum-b-la kiuug a yopoe pʋgẽ, sẽn na yɩl tɩ soolmã lebg yɩlemde.+ 13 Soolmã nebã fãa na n sõng n mum-b lame. Rẽ na n kɩtame tɩ b paam ziir daar ning mam sẽn na n waoog m yʋʋrã.’+ Yaa a Zeova sẽn yaa Zu-soab sẽn ka to wã n yeele.

14 “‘B na n yãka rap tɩ b saagd soolmẽ wã wakat fãa, n mumd kũ-rãmbã sẽn kell tẽn-gãongã zugã, sẽn na yɩl n yɩlg-a. B na n kell n gẽesa kũ-rãmbã kiuug a yopoe. 15 Sẽn saagd-b soolmẽ wã sã n yã ninsaal kõbre, b na n ninga bãnd a sɛɛgẽ. Woto, neb nins b sẽn yãk tɩ b mumd kũ-rãmbã na n dɩk-a lame n tɩ bus Hamon-goog longẽ wã.+ 16 Sẽn paase, tẽng n na n zĩnd be tɩ b boondẽ tɩ Hamona.* B na n yɩlga soolmã.’+

17 “Sã n yaa ne foom a ninsaal biiga, ad a Zeova sẽn yaa Zu-soab sẽn ka to wã sẽn yeele: ‘Yeel bõn-yɩgdɩ wã buud fãa la we-rũmsã fãa sẽn be weoogẽ wã yaa: “Tigm-y taab n wa. Wa n gũbg-y maoong ning mam sẽn segend yãmb yĩngã. Yaa maoong sẽn yaa kãseng la mam maand Israyɛll tãensã zutu.+ Yãmb na n wãba nemd la y yũ zɩɩm.+ 18 Yãmb na n wãba pãens rãmb nemdo, la y yũ dũniyã nanambs zɩɩm. B yaa wa pe-raado, pe-bi, bʋʋs la lolse. B fãa yaa wa Basan rũm-nobdsã. 19 Yãmb na n dɩɩ maoongã mam sẽn segend yãmb yĩngã kaam tɩ loog-yã, la y yũ a zɩɩmã hal tɩ y nensã yilmi.”’

20 “‘Mam rɩɩbã zĩigẽ, yãmb na n wãba wed-moose, sẽn zao-b saar-dãmba,* pãens rãmb la zabr gãndaad buud fãa nemd n tɩge.’+ Yaa a Zeova sẽn yaa Zu-soab sẽn ka to wã n yeele.

21 “‘Mam na n wilga m ziirã buud toɛy-toɛyã sʋka. Buud toɛy-toɛyã fãa na n yãa mam sẽn sɩbgd to-to, la pãng* ning mam sẽn wilg b sʋkã.+ 22 Daar-n-kãng tɛka, Israyɛll buudã neb na n bãngame tɩ mam yaa bãmb Wẽnnaam a Zeova. 23 Buud toɛy-toɛyã na n bãngame tɩ Israyɛll buudã neb kẽnga yembd b mensã kongr yĩnga, b sẽn da pa maand sɩd ne maamã yĩnga.+ Rẽ n so tɩ mam solg m neng ne-ba,+ n dɩk-b n ning b bɛɛbã nusẽ, tɩ b kʋ-b ne sʋʋse.+ 24 Mam maan-b-la wa sẽn zems b rẽgdã la b beegrã, la m solg m neng ne-ba.’

25 “Ad a Zeova sẽn yaa Zu-soab sẽn ka to wã sẽn yeele: ‘Mam na n talla a Zakoob yagens nins sẽn kẽng yembdã n lebg n wa.+ M na n zoee Israyɛll buudã tõr nimbãanega.+ Mam na n wilga ne yẽesem tɩ m yʋʋrã yaa sõngo.+ 26 B sẽn paam paoogr b sẽn pa maan sɩd ne maam n maan bũmb ninsã fãa poore,+ b na n zĩnda soolmẽ wã ne bãane, tɩ ned kae n kẽesd-b rabeem ye.+ 27 Mam sã n wa yiis-b buud toɛy-toɛyã sʋka, la m tigm-b n yiis b bɛɛbã tẽnsẽ n tall-b n lebg n wa,+ mam na n wilgame me tɩ m yaa sõng b sʋka, buud wʋsg nifẽ.’+

28 “‘Mam sã n wa kẽes-b yembd buud toɛy-toɛyã sʋka, la m le wa tigm-ba, n tall-b n wa b soolmẽ wã n pa bas b ned baa a ye, b na n bãngame tɩ mam yaa b Wẽnnaam a Zeova.+ 29 Mam pa na n le solg m neng ne-b ye.+ Bala mam na n pʋdga m vʋʋsmã Israyɛll buudã neb zutu.’+ Yaa a Zeova sẽn yaa Zu-soab sẽn ka to wã n yeele.”