Ezekɩyɛll sebre

45 “‘Yãmb sã n wa na n pʋɩ soolmã n kõ ned kam fãa tɩ yɩ a rogem-pʋɩɩre,+ yãmb segd n yãka zĩig soolmã pʋgẽ n kõ a Zeova tɩ yɩ pʋɩɩr sẽn yaa sõngo.+ A woglmã segd n yɩɩ kãntɩɩg* tus-pisi la a nu, t’a yalmã yɩ kãntɩɩg tus-piiga.+ Zĩigã tõr na n yɩɩ pʋɩɩr sẽn yaa sõngo. 2 B na n yãka zĩig be t’a woglmã ne a yalmã zem taaba, zĩ-sõngã yĩnga. A woglmã segd n yɩɩ kãntɩɩg kobs-nu, t’a yalmã me yɩ kãntɩɩg kobs-nu.*+ Sẽn paase, a na n talla rũms wãbneg zĩig yalem sẽn yaa kãntɩɩg pis-nu a kɩreng fãa.+ 3 Zĩ-kãng pʋgẽ, yãmb segd n maka zĩig woglem sẽn yaa kãntɩɩg tus-pisi la a nu, t’a yalmã yaa kãntɩɩg tus-piiga. Wẽnd-doogã sẽn yaa bũmb sẽn yaa sõng wʋsgã na n zĩnda a pʋgẽ. 4 A na n yɩɩ soolmã pʋɩɩr sẽn yaa sõng maan-kʋʋdbã yĩnga.+ Bãmb n yaa wẽnd-doogã tʋm-tʋmdba, n kolgd n tʋmd a Zeova tʋʋmã.+ Zĩ-kãng na n yɩɩ b zagsã zĩiga, la zĩig sẽn welg toor wẽnd-doogã yĩnga.

5 “‘Levi buudã neb sẽn yaa wẽnd-doogã tʋm-tʋmdbã na n paama pʋɩɩr woglem sẽn yaa kãntɩɩg tus-pisi la a nu, t’a yalmã yaa kãntɩɩg tus-piiga.+ B na n paama rɩɩb rot pisi*+ me tɩ yɩ b rẽnda.

6 “‘Yãmb segd n yãka zĩig galʋ-tẽngã yĩnga, t’a woglmã yaa kãntɩɩg tus-pisi la a nu (wa sẽn zems kũun sẽn yaa sõngã woglem,) t’a yalmã yaa kãntɩɩg tus a nu.+ Zĩ-kãng na n yɩɩ Israyɛll buudã neb fãa rẽnda.

7 “‘Naabã na n paama zĩig kũun sẽn yaa sõngã kɩrems a yiibẽ wã, la zĩig ning b sẽn yãk galʋ-tẽngã yĩngã kɩrems a yiibẽ wã. A zĩigã na n zĩnda kũun sẽn yaa sõngã ne zĩig ning b sẽn yãk galʋ-tẽngã yĩngã sɛɛga. A na n zĩnda nin-taoor la yaanga. Sẽn sɩng ne a nin-taoor toadgã n tãag a yaang toadgã, a woglmã zemsa buud a ye pʋɩɩr woglem.+ 8 Zĩ-kãng na n yɩɩ yẽ rẽnd Israyɛll soolmã pʋgẽ. Mam nanambsã pa na n le nams mam nin-buiidã ye.+ B na n pʋɩɩ soolmã n kõ Israyɛll buudã neba, tɩ buud fãa paam a pʋɩɩre.’+

9 “Ad a Zeova sẽn yaa Zu-soab sẽn ka to wã sẽn yeele: ‘Yãmb a Israyɛll nanambse, y yaa n maaname tɩ loog noore!’

“‘Bas-y y nen-kɛglmã la y weoogrã, n maan sẽn zems la sẽn yaa tɩrga.+ Bas-y m nin-buiidã zĩisã reesgo.’+ Yaa a Zeova sẽn yaa Zu-soab sẽn ka to wã n yeele. 10 ‘Yãmb segd n magda ne balãns sẽn zemse, efa* sẽn zemse, la bat* sẽn zemse.+ 11 Efa wã ne batã bedrem wall b yalem pa segd n toeemdẽ ye. Bat a yembr segd n zemsa homɛɛr* pʋɩɩr a ye pʋɩ piig zugu, tɩ efa a ye me zems homɛɛr pʋɩɩr a ye pʋɩ piig zugu. Yaa homɛɛr la b segd n tikd n magda. 12 Sɩkl*+ segd n yɩɩ geera* pisi. Yãmb mane* a ye na n yɩɩ sɩkl pis-yoobe.’

13 “‘Ad kũun ning yãmb sẽn segd n kõtẽ: Bɩle homɛɛr a ye fãa zugu, yãmb segd n kõo efa pʋɩɩr a ye pʋɩ a yoob zugu. Orz* homɛɛr a ye fãa zugu, yãmb segd n kõo efa pʋɩɩr a ye pʋɩ a yoob zugu. 14 Kaamã y sẽn segd n kõtẽ wã segd n magda ne bate. Bat yaa koor* pʋɩɩr a yembr pʋɩ piig zugu, tɩ bat piig yaa homɛɛr a ye, bala bat piig zema homɛɛre. 15 Israyɛll nebã rũm-bõonegã sʋka, b segd n kõo pe-yɛng piis kobs-yi fãa zugu. Bõn-kãens na n yɩɩ kood biis kũunã yĩnga,+ maoong sẽn yõogd bugmã,+ la zems-n-taar maandã+ yĩnga. Yaa sẽn na yɩl tɩ b maan paasg* nin-buiidã yĩnga.’+ Yaa a Zeova sẽn yaa Zu-soab sẽn ka to wã n yeele.

16 “‘Soolmã nin-buiidã fãa na n kõta Israyɛll naabã bõn-kãense.+ 17 La tigã sasa,+ ki-paalã, Vʋʋsg rayã+ la tig nins fãa b sẽn yãk b ray takɩ tɩ Israyɛll buudã neb segd n maandẽ wã sasa,+ maoong sẽn yõogd bugmã,+ kood biis kũunã,+ la divẽ kũunã roga naabã zugu. Yẽ n na n kõ yel-wẽnd maoongã, kood biis kũunã, maoong sẽn yõogd bugmã, la zems-n-taar maandã, sẽn na yɩl tɩ b maan paasg Israyɛll buudã neb yĩnga.’

18 “Ad a Zeova sẽn yaa Zu-soab sẽn ka to wã sẽn yeele: ‘Pipi kiuugã pipi daarã, yãmb segd n yãka lol-poll sẽn pa tar zang rũm-bɛdã sʋka, n yɩlg wẽnd-doogã ne yel-wẽndã.+ 19 Maan-kʋʋdã na n yãka yel-wẽnd maoongã zɩɩmã n ning wẽnd-doogã lugã zutu,+ kogrã kɩrems a naasã zutu, rat n yeel tɩ kogr ning sẽn gilg tẽn-kugrã zugu, la a ning saman-bilã rignoorã lugã zutu. 20 Yaa woto la yãmb na n maan kiuugã rasem a yopoe wã daare, ned ning fãa sẽn maan yel-wẽnd ne yĩdgu, wall ne zɩɩlem yĩnga.+ Yãmb segd n maana paasg wẽnd-doogã yĩnga.+

21 “‘Pipi kiuugã rasem piig la a naasã daare, yãmb segd n maana Paka tigrã.+ Yãmb segd n wãba bur sẽn pa ning rabɩll rasem a yopoe.+ 22 Daar-n-kãnga, naabã na n kõo lol-poll tɩ yɩ yel-wẽnd maoong yẽ mengã yĩnga, la soolmã nin-buiidã fãa yĩnga.+ 23 Tigrã rasem a yopoe wã pʋgẽ, daar fãa, a na n kõo a Zeova maoong sẽn yõogd bugum. Na n yɩɩ lol-poal a yopoe sẽn pa tar zanga, la pe-raad a yopoe sẽn pa tar zanga.+ A na n kõo boɛɛg daar fãa me tɩ yɩ yel-wẽnd maoongo. 24 Sẽn paase, a segd n kõo kood biis kũun efa a yembr loalg fãa yĩnga, la efa a ye pe-raoog fãa yĩnga, n paas kaam hĩn* a ye efa fãa yĩnga.

25 “‘Kiuug a yopoe-n-soabã rasem piig la a nu wã daar tɛka, tigrã rasem a yopoe wã pʋgẽ,+ a segd n kõo yel-wẽnd maoongo, maoong sẽn yõogd bugum, kood biis kũun la kaam tɩ yɩ wa a sẽn maan pĩndã.’”