Tõod sebre
5 Rẽ poore, a Moyiiz tigma Israyɛll nebã fãa n yeel-b yaa: “Israyɛll neba, kelg-y noy la tõod nins mam sẽn taasd yãmb rũndã wã. Yãmb segd n zãms-b lame, la y tũ-b neere. 2 Tõnd Wẽnnaam a Zeova maana kaool ne tõnd Horɛɛbe.+ 3 Pa yɩ ne tõnd yaab-rãmbã la a Zeova maan kaoolã ye. Yɩɩ ne tõndo, tõnd fãa sẽn ket n vɩ n be ka rũndã wã. 4 A Zeova goma ne yãmb neng ne neng tãngẽ wã, bugmã pʋgẽ.+ 5 Mam da yasa yãmb ne a Zeova sʋk wakat kãnga,+ n deesd a Zeova goamã n taasd yãmba, bala yãmb da zoeta rabeem bugmã yĩnga, n pa rʋ tãngã zug ye.+ A yeelame:
6 “‘Mam yaa yãmb Wẽnnaam a Zeova, soab ning sẽn yiis yãmb Ezɩpt soolmẽ wã, tẽng ning pʋgẽ y sẽn da yaa yembsã.+ 7 Yãmb pa segd n tall wẽnnaam-dãmb a taab n zʋʋg maam a bada.+
8 “‘Yãmb pa segd n pees bõn-naandg y mens yĩnga,+ wall y maan bũmb sẽn be saasẽ, sẽn be tẽngã zugu, bɩ sẽn be koomã pʋgẽ wõneg ye. 9 Yãmb pa segd n wõgemd b taoore, bɩ n sak tɩ b kɩt tɩ y waoog-b ye.+ Bala maam a Zeova sẽn yaa yãmb Wẽnnaamã yaa Wẽnnaam sẽn dat tɩ b waoog yẽ a ye tãa,+ la sẽn sɩbgd neb nins sẽn kis maamã kamb la b yagense, hal n tãag b zãmaan a tãab-n-soab ne a naas-n-soaba, b ba-rãmbã beegr yĩnga.+ 10 La mam maanda neb nins sẽn nong maam la b tũud mam noyã neere, hal n tãag b zãmaan tusr soabã.
11 “‘Yãmb pa segd n pʋt yãmb Wẽnnaam a Zeova yʋʋrã ne paoogr* ye.+ Bala a Zeova pa na n bas ned ning sẽn pʋt a yʋʋrã ne paoogr* n pa sɩbg ye.+
12 “‘Tũ-y Vʋʋsg daarã noorã, n kɩt t’a kell n yɩ sõng wa yãmb Wẽnnaam a Zeova sẽn yeel yãmbã.+ 13 Yãmb segd n tʋma rasem a yoobe, la y maan bũmb nins fãa y sẽn na n maane,+ 14 la rasem a yopoe-n-soabã yaa vʋʋsg daar yãmb Wẽnnaam a Zeova yĩnga.+ Yãmb pa segd n tʋm tʋʋmd ye.+ Yãmb ne y kom-dibli wã, y kom-pugli wã, y yem-daadã, y yem-pogsã, y lolsã, y bõensã, y yir dũmsã fãa, la sãamb nins sẽn be yãmb tẽnsẽ wã,*+ sẽn na yɩl tɩ y yem-daadã ne y yem-pogsã me vʋʋs wa yãmba.+ 15 Tẽeg-y tɩ yãmb me ra yaa yembs Ezɩpt soolmẽ wã, tɩ yãmb Wẽnnaam a Zeova yiis yãmb be ne nug sẽn tar pãng la ne kang sẽn tar pãnga.+ Yaa rẽ yĩng la yãmb Wẽnnaam a Zeova sẽn yeel yãmb tɩ y tũ Vʋʋsg daarã noorã.
16 “‘Waoog f ba la f ma+ wa fo Wẽnnaam a Zeova sẽn yeelã, sẽn na yɩl n vɩɩmd n kaoose, la tɩ bũmb fãa yɩ sõma ne-fo, tẽng ning fo Wẽnnaam a Zeova sẽn na n kõ yãmbã pʋgẽ.+
17 “‘Fo pa segd n kʋ ye.+
18 “‘Fo pa segd n yo ye.+
19 “‘Fo pa segd n zu ye.+
20 “‘Fo pa segd n kõ kaset sẽn pa sɩd n dõd f to ye.+
21 “‘Fo pa segd n tʋlg f to pag ye.+ Fo pa segd n tʋlg f to roogo, wall a pʋʋgo, a yem-daoogo, a yem-poaka, a loalga, a bõanga, la bũmb nins fãa a sẽn so wã ne sũ-kiir ye.’+
22 “Yɩɩ ne koe-kãseng sẽn yi bugum pʋgẽ, sawadg pʋgẽ, la lik bida pʋgẽ+ la a Zeova togs yãmb fãa no-kãensã* tãngã zugu, la a pa paas bũmb ye. Rẽ poore, a gʋls-b-la kug-wals a yiib zut n kõ maam.+
23 “La tãngã sẽn wa n dɩt bugum,+ tɩ yãmb wʋm koɛɛgã sẽn yi likã pʋgẽ wã balã, yãmb buud toɛy-toɛyã taoor dãmb ne kãsem-dãmbã waa mam nengẽ. 24 Yãmb yeelame yaa: ‘Tõnd Wẽnnaam a Zeova wilga tõnd a ziirã la a pãngã. Tõnd wʋma a koɛɛg sẽn yi bugmã pʋgẽ.+ Rũndã, tõnd yãame tɩ Wẽnnaam tõe n goma ne ninsaala, t’a soab kell n vɩɩmde.+ 25 La tõnd pa rat n ki ye. Bala bug-kãsengã tõe n dɩɩ tõndo. D sã n ket n wʋmd tõnd Wẽnnaam a Zeova koɛɛgã, hakɩɩka, d na n kiime. 26 Bala ãnda n zoe n wʋm Wẽnnaam ning sẽn vɩ wã koɛɛg sẽn yit bugum pʋgẽ wa tõnd sẽn wʋmã, n ket n vɩ? 27 Yãmb mengã segd n kolgame n kelg bũmb ning fãa tõnd Wẽnnaam a Zeova sẽn na n yeelã. Yaa yãmb n na n togs tõnd bũmb nins fãa tõnd Wẽnnaam a Zeova sẽn yeel yãmbã, tɩ tõnd kelg la d tũ.’+
28 “La a Zeova wʋma bũmb ning yãmb sẽn togs maamã. A Zeova yeela maam yaa: ‘Mam wʋma goam nins fãa nin-buiidã sẽn togs foomã. B sẽn yeelã fãa yaa sõma.+ 29 B sã n na n kell n zoee maam,+ la b sak mam noyã fãa,+ na n yɩɩ sõma ne bãmb la ne b kambã wakat fãa yĩnga!+ 30 Kẽng n tɩ yeel-b yaa: “Leb-y y fu-rotẽ wã.” 31 La fo tog n paa ka ne maam, tɩ m togs-f goama, noy la tõod nins fãa fo sẽn segd n zãms-bã, la b sẽn segd n tũ soolem ning mam sẽn na n kõ-b tɩ b soogã pʋgẽ wã.’ 32 La yãmb a nin-buiidã segd n gũusame n tũ yãmb Wẽnnaam a Zeova sẽn yeel yãmbã.+ Yãmb pa segd n bʋdg rɩtg bɩ goabg ye.+ 33 Yãmb segd n tũu bũmb ning fãa yãmb Wẽnnaam a Zeova sẽn wilg yãmbã,+ sẽn na yɩl n vɩɩmde, tɩ bũmb fãa yɩ sõma ne-yã, la y vɩɩmd n kaoos soolem ning y sẽn na n soogã pʋgẽ.+