A ƐSTƐƐR SEBRE

1 Ad bũmb sẽn maan a Asuerus* wakatẽ wã, Asuerus ning sẽn da rɩt naam soolem toor-toor koabg la pisi la a yopoe+ zug sẽn sɩng ne Ẽnd n tãag Etiyopi wã:* 2 Wakat kãnga, rĩm a Asuerus sẽn wa n zĩ a naamã geer zug Suuz+ na-yirã,* 3 a naamã yʋʋm a tãab-n-soabã, a maana tigr a nanambsã ne a tʋm-tʋmdbã fãa yĩnga. Pɛrs+ ne Medi+ tãb-biisã, nin-kãsemsã, la soolem toor-toorã nanambs ra bee a taoore. 4 Rasem koabg la pis-nii pʋgẽ, a wilg-b-la a soolmã sẽn tar ziirã arzɛgse, la a pãn-kãsengã ne a ziirã. 5 Ra-kãens sẽn wa n pidã, rĩmã maana tigr rasem a yopoe, neb nins sẽn da be Suuz sẽn yaa na-yirã* fãa yĩnga, sẽn sɩng ne sẽn yaa-a kãseng n tãag sẽn yaa-a bilfã. Yɩɩ na-yirã, rĩmã zẽed zĩigẽ. 6 B ra nagsa zĩigã ne lẽ gĩs pɛɛla, lamd gĩs-bãanes pɛɛla, la pɛɛl sẽn yaa kẽeg haoo.* B sẽba pɛɛlã ne wĩy sẽn maan ne gĩs-bãanes la rũms kõbd sẽn yaa miid-miid b sẽn tuy bõn-gils sẽn maan ne wanzuri. Marbr* ra-lugs me n da be be, ne sãnem la wanzuri zaoose. B sẽn da rɩg zĩig ningã ra gãnega ne porfɩɩr kuga, marbre, kĩndi, la marbr-sabla.

7 B ra kõta nebã divẽ wã ne sãnem la-bõonese, tɩ laag fãa yaa toor ne a to. B waa ne rĩmã divẽ wã wʋsgo, wa sẽn zems rĩmã tarem. 8 Rãamã yũub wɛɛngẽ, b ra pa modgd* ned baa a yembr ye. Bala rĩmã ra yeela na-yirã tʋm-tʋmdbã tɩ ned kam fãa tõe n maana a sẽn date.

9 Rĩm-poak a Vasti+ me maana tigr pagbã yĩng rĩm a Asuerus zakẽ wã.*

10 Rasem a yopoe-n-soabã, rĩmã sẽn wa n yũ divẽ wã t’a sũurã noomẽ wã, a yeela a Mehumanne, a Biizta, a Harbona,+ a Bigta, a Abagta, a Zetaar la a Karkaas sẽn yaa a na-yirã tʋm-tʋmdb a yopoe wã sẽn da get rĩm a Asuerus mengã yellã, 11 tɩ b tɩ tall rĩm-poak a Vasti n wa, la t’a segd n pila naam zug-fuugã,* n wilg nin-buiidã la nanambsã a neermã, bala a ra yaa pʋg-neer tɛkẽ. 12 La rĩm-poak a Vasti zãgsa fasɩ t’a kõn wa, n pa tũ noor ning rĩmã sẽn kɩt t’a na-yirã tʋm-tʋmdbã taas-a wã ye. Rẽ n so tɩ rĩmã sũur puug wʋsg ne-a.

13 Dẽ, rĩmã goma ne neb nins sẽn mi pĩnd yɛlã,* (bala yaa woto la b ra talld rĩmã yɛlã n wat neb nins sẽn mi tõogã la bʋ-kaoor yɛlã taoore. 14 B sʋkã, neb nins sẽn da pẽ rĩmã ra yaa a Karsena, a Setaare, a Admata, a Tarsiise, a Merɛse, a Marsena la a Memukan sẽn yaa Pɛrs la Medi nanambs a yopoe+ sẽn da wae n kẽngd rĩmã taoore, la sẽn tar naam n yɩɩd nanambs a taabã soolmã pʋgẽ wã.) 15 Rĩmã sokame: “Sã n yaa ne tõogã, bõe la b segd n maan rĩm-poak a Vasti, a sẽn kɩɩs rĩm a Asuerus noorã a sẽn kɩt tɩ na-yirã tʋm-tʋmdbã taas-a wã?”

16 Rẽ la a Memukan yeel rĩmã ne nanambsã taoor yaa: “Pa rĩmã a ye bal la rĩm-poak a Vasti sẽn beegã ye.+ Yaa nanambsã fãa, la rĩm a Asuerus soolem toor-toorã neb fãa. 17 Bala pagbã fãa na n bãnga bũmb ning rĩm-poakã sẽn maanã, n paoog b sɩdbã n yeele: ‘Rĩm a Asuerus tʋmame tɩ b tɩ tall rĩm-poak a Vasti n wa a nengẽ, la a zãgsame t’a kõn kẽng ye.’ 18 Rũndã menga, Pɛrs ne Medi nanambsã pagb sẽn mi bũmb ning rĩm-poakã sẽn maanã na n goma ne rĩmã nanambsã fãa, tɩ wa ne paoogr la sũ-yikr wʋsgo. 19 Sã n taa rĩmã yam, bɩ rĩmã yiis noore, n kɩt tɩ b gʋls no-kãng n naag Pɛrs ne Medi noyã sẽn pa tõe n toeemã.+ Noorã na n wilgame t’a Vasti pa tol n tõe n le wa rĩm a Asuerus taoor ye. La bɩ rĩmã reeg a Vasti naamã n kõ pag sẽn são-a. 20 Rĩmã noorã sã n wa ta a soolmã sẽn yaa yalengã fãa pʋgẽ, pagbã fãa na n waooga b sɩdbã, sẽn sɩng ne sẽn yaa-a kãseng n tãag sẽn yaa-a bilfã.”

21 Gom-kãensã yɩɩ rĩmã ne nanambsã noogo, tɩ rĩmã maan a Memukan sẽn yeelã. 22 Dẽ, rĩmã kɩtame tɩ b gʋls sɛb n tool a soolem toor-toorã,+ soolem fãa wa sẽn zems a gʋlsem sẽn yaa to-to,* la buud fãa wa sẽn zems a buud-gomde, n yeel tɩ rao fãa segd n yɩɩ zu-soab* a meng zakẽ, la t’a segd n goma a meng buud-gomde.

2 Bõn-kãens poore, rĩm a Asuerus+ sũurã sẽn wa n sigã, a tẽega bũmb ning a Vasti sẽn maanã,+ la noor ning b sẽn yiis a Vasti wɛɛngẽ wã.+ 2 Rẽ la rĩmã sõgen-dãmbã yeel yaa: “B segd n gẽesa pʋg-sadb sẽn yaa neeb la sẽn pa mi rao rĩmã yĩnga. 3 Bɩ rĩmã yãk neb a soolem toor-toorã fãa pʋgẽ,+ tɩ b tigim pʋg-sadb nins fãa sẽn yaa neeb la sẽn pa mi raoã n wa Suuz sẽn yaa na-yirã,* pagbã zakẽ. Bɩ b kɩt t’a Hegayi+ sẽn yaa pagbã zakã taoor soaba,* la pagbã gũudã ges b yelle, la b kõ-b ka-zɛɛdem buud toor-toor tɩ b maneg b mense. 4 Pʋg-sad ning sẽn na n ta rĩmã yam n yɩɩdã na n lebga rĩm-poak n deeg a Vasti zĩiga.”+ Gomdã yɩɩ rĩmã noogo, t’a maan woto.

5 Rao a ye sẽn yaa Zʋɩf n da be Suuz+ sẽn yaa na-yirã,* t’a yʋʋr boondẽ t’a Mardose.+ A yaa a Zayɩɩr biiga, t’a Zayɩɩr yaa a Simeyi biiga, t’a Simeyi yaa a Kis biiga. Yẽ ra yaa Bẽnzame buudã neda.+ 6 A ra naaga neb nins Babilon rĩm a Nebukadnezaar sẽn yõg Zerizalɛm n paas Zida rĩm a Zekoniya*+ n kẽng yembdã. 7 A ra geta a Adasa* yelle, rat n yeel t’a Ɛstɛɛre. Bala a ba wã ne a ma wã fãa ra kiime. A ra yaa a Mardose ba wã ba-biig bi-pugla.+ Pʋg-sadã ra yaa neer wʋsgo. A ba wã ne a ma wã kũum poore, a Mardose reeg-a lame n wub wa a meng biiga. 8 B sẽn wa n moon rĩmã koɛɛgã la a noorã, tɩ b tall pʋg-sadb wʋsg n wa Suuz sẽn yaa na-yirã* sẽn na yɩl t’a Hegayi+ ges b yellã, b talla a Ɛstɛɛr me n wa rĩmã zakẽ,* t’a Hegayi sẽn yaa pagbã gũudã na n ges a yelle.

9 Pʋg-sadã taa a Hegayi yam t’a ra nand-a wʋsgo. Dẽ, a Hegayi yɩɩ tao-tao n kɩt tɩ b na n kõt-a ka-zɛɛdem toor-toorã+ a sẽn na n tall n maneg a mengã, la b kõt-a rɩɩbo. A tũusa pʋg-sadb a yopoe rĩmã zakẽ tɩ b na n sõngd-a. Sẽn paase, a talla yẽ ne pʋg-sadb nins sẽn yaa a tʋm-tʋmdbã n kẽng pagbã zakã zĩig ning sẽn yaa sõma n yɩɩdã. 10 A Ɛstɛɛr pa gom a buudã neb+ wall a roagdbã yell ye. Bala a Mardose+ ra sagl-a lame t’a ra gom rẽ yell ne ned ye.+ 11 Beoog sẽn vẽeg fãa, a Mardose ra gilgda pagbã zakã samand noore, n dat n bãng a Ɛstɛɛr keelem, la b sẽn zãad-a to-to.

12 Wakat ning pʋg-sad fãa sẽn da segd n kẽng rĩm a Asuerus nengẽ wã sã n ta, a kẽngdame. Yaa a sẽn wat n zɛ ka-rãmbã n maneg a meng kiuug piig la a yiibã poore, wa sẽn zems noor ning b sẽn kõ pagbã wɛɛngẽ wã. Ad b sẽn da segd n zɛ ka-rãmbã n maneg b mensã to-to: B ra zɛɛda miir* kaam+ kiuug a yoobe, la b zɛ bomiye kaam*+ ne ka-zɛɛdem a taab kiuug a yoobe. 13 Yaa rẽ poor la pʋg-sadã tõe n kẽng rĩmã nengẽ. A sã n wa na n yi pagbã zakẽ n kẽng rĩmã zakẽ, a sẽn kos bũmb ning fãa b kõt-a lame. 14 A ra kẽngda zaabre, tɩ yibeoog bɩ a yi n kẽ pagbã zak a yiib-n-soabã pʋgẽ. Yaa zak ning a Saasgaaz sẽn yaa pagbã zakã taoor soaba,+ la rĩmã pʋg-rɩkdsã* gũudã sẽn get a yellã. Pʋg-sadã ra pa tõe n leb rĩmã nengẽ, sã n pa mikame tɩ rĩmã sũur yɩɩ noog wʋsg ne-a, t’a pʋd a yʋʋrã n yeel tɩ b tall-a n wa ye.+

15 Wakat sẽn wa n ta t’a Mardose baaba wã ba-biig a Abihayɩll biig a Ɛstɛɛr na n kẽng rĩmã nengẽ wã, a pa kos baa fʋɩ n zʋʋg a Hegayi sẽn yaa pagbã zakã taoor soaba, la rĩmã pagbã gũudã sẽn sagl-a t’a reeg bũmb ninsã ye. Yaa Ɛstɛɛr ning a Mardose sẽn da reeg n wubd wa a meng biigã.+ (Wakat kãng fãa, neb nins fãa sẽn da yãt a Ɛstɛɛrã sũur nooma ne-a.) 16 B talla a Ɛstɛɛr n kẽng rĩm a Asuerus na-yirã, a naamã yʋʋm a yopoe-n-soabã+ kiuug piig soabã, rat n yeel tɩ Tebɛt* kiuugã. 17 Yaa a Ɛstɛɛr la rĩmã wa n tɩ nong n yɩɩd pagb a taabã fãa. Rĩmã sũur yɩɩ noog wʋsg ne a Ɛstɛɛre, t’a nong-a n yɩɩd pʋg-sadb a taabã fãa sẽn da pa mi raoã. Rẽ n so t’a rɩk naam zug-fuugã* n pil a zugã n kɩt t’a lebg rĩm-poak+ n deeg a Vasti zĩiga.+ 18 Rĩmã maana tig-kãseng a nanambsã la a tʋm-tʋmdbã fãa yĩnga: A Ɛstɛɛr tigrã. Rẽ poore, a kɩtame tɩ b moon lohorem soolem toor-toorã pʋsẽ, la a kõ kũun wa sẽn zems a tarem.

19 B sẽn wa n tigim pʋg-sadb sẽn pa mi raoã+ naoor a yiib-n-soabã, rẽ t’a Mardose zĩi rĩmã rignoorẽ. 20 A Ɛstɛɛr pa yeel baa fʋɩ a roagdbã la a buudã wɛɛngẽ,+ wa a Mardose sẽn da sagl-a wã. A Ɛstɛɛr ra ket n maanda bũmb ning fãa a Mardose sẽn yeele, wa sẽn da yaa to-to a sẽn wa n wubd-a wã.+

21 Wakat kãnga, a Mardose sẽn wa n zĩ rĩmã rignoorẽ wã, a Bigtan ne a Terɛs sẽn yaa na-yirã tʋm-tʋmdbã a yiibu, n yaa rigno-gũudbã sũy yikame, tɩ b sed taab n na n kʋ rĩm a Asuerusi. 22 La a Mardose bãnga rẽ, n yɩ tao-tao n togs rĩm-poak a Ɛstɛɛre, t’a Ɛstɛɛr tɩ gom ne rĩmã a Mardose yʋʋr yĩnga.* 23 Woto, b vaeesame n mik tɩ yellã yaa sɩda. Rẽ n so tɩ b luul rap a yiibã ra-lugs zutu. La b gʋls bõn-kãensã fãa kibayã sebr pʋgẽ rĩmã taoore.+

3 Bõn-kãensã poore, rĩm a Asuerus zẽka Agaag buudã rao+ a Hamedata biig a Hamanne,+ n kõ-a naam sẽn yɩɩd nanambs a taabã sẽn da be ne-a wã.+ 2 Rĩmã tʋm-tʋmdb nins fãa sẽn da be a rignoorẽ wã ra sulgdame n wõgemded a Haman taoore, bala yaa woto la rĩmã ra yeel yẽ wɛɛngẽ. La a Mardose zãgsame t’a kõn sulg n wõgemd a Haman taoor ye. 3 Dẽ, rĩmã tʋm-tʋmdbã sẽn da be a rignoorẽ wã soka a Mardose yaa: “Bõe yĩng tɩ fo kɩɩsd rĩmã noorã?” 4 Beoog sẽn vẽeg fãa, b ra sokd-a-la woto, la a ra pa kelgd-b ye. A Mardose sẽn yeel-b t’a yaa Zʋɩfã yĩnga,+ b tɩ togsa a Haman n na n ges a sã n na n basa a Mardose t’a ket n maand woto.+

5 A Haman sẽn yã t’a Mardose zãgsame t’a kõn sulg n wõgemd yẽ taoorã, a sũurã puuga wʋsgo.+ 6 La a ra getame tɩ yẽ sã n kʋ a Mardose a yembre, pa sek ye. Bala b ra togs-a-la a Mardose sẽn yaa buud ninga. Rẽ n so t’a Haman ra baood a sẽn na n maan to-to n menes Zʋɩf-rãmbã fãa sẽn be a Asuerus soolmẽ wã, rat n yeel t’a Mardose buudã fãa.

7 Rĩm a Asuerus naamã yʋʋm piig la a yiib-n-soabã+ pipi kiuugã pʋgẽ, rat n yeel tɩ Nizã* kiuugã, b maana bãnd*+ a Haman taoore, n na n bãng kiuugã la daarã, tɩ bãndã lʋɩ kiuug piig la a yiib-n-soabã zugu, rat n yeel tɩ Adaar* kiuugã.+ 8 Rẽ poore, a Haman yeela rĩm a Asuerus yaa: “Buud n be, t’a nebã sãeeg n be buud toor-toorã sʋka,+ yãmb soolmã fãa pʋgẽ.+ B tõodã yaa toor ne buud a taabã tõodo. Sẽn paase, b pa sakd rĩmã tõodã ye. B sã n bas-b tɩ b ket n beẽ, pa na n yɩ rĩmã nafr ye. 9 Sã n taa rĩmã yam, bɩ a yiis noore, n gʋls n wilg tɩ b sãam-ba. Mam na n kõo rĩmã tʋm-tʋmdb wanzuri talã* tus-piiga, tɩ b ning rĩmã laogã bĩngr zĩigẽ.”*

10 Dẽ, rĩmã yãka a nugbĩng sẽn tar n ningd bãndã+ a mengã nugẽ, n kõ Agaag buudã rao+ a Hamedata biig a Haman+ sẽn da yaa Zʋɩf-rãmbã bɛ wã. 11 Rĩmã yeela a Haman yaa: “Wanzuri wã ne bu-kãng bee fo nugẽ, tɩ f tõe n maan-b f sẽn date.” 12 Dẽ, b boola rĩmã seb-gʋlsdbã+ pipi kiuugã rasem piig la a tãab-n-soabã. B gʋlsa+ noy nins a Haman sẽn kõ wã fãa n tool rĩmã guvɛrneer-dãmbã taoor dãmba, la soolem toor-toorã guvɛrneer-dãmba, ne buud toor-toorã nanambse, soolem fãa wa sẽn zems a gʋlsem sẽn yaa to-to,* la buud fãa wa sẽn zems a buud-gomde. B gʋlsa rĩm a Asuerus yʋʋr yĩnga, la b ning sɛbã bãnd ne rĩmã nugbĩng sẽn tar n ningd bãndã.+

13 B rɩka sɛbã n ning sɛb-kɩtb nusẽ tɩ b tɩ kõ rĩmã soolem toor-toorã fãa, n kõ-b noor tɩ b kʋ Zʋɩf-rãmbã fãa, n sãam-b zãng n menes-ba, b kom-bɩɩsã la b kãsembã, n paas b pagbã la b kambã daar-n-yɛnga, la b wʋk b paoongã.+ Yaa kiuug piig la a yiib-n-soabã sẽn yaa Adaar kiuugã+ rasem piig la a tãab-n-soabã. 14 B sẽn gʋls bũmb ning sɛbã pʋsẽ wã segd n lebga noor soolem fãa pʋgẽ. B segd n moona noorã me buud toor-toorã fãa neba, tɩ b segl b mens daar-n-kãng yĩnga. 15 Rĩmã kõo noor tɩ sɛb-kɩtbã yi tao-tao n looge.+ B moona noorã Suuz+ sẽn yaa na-yirã* pʋgẽ. Rẽ poore, rĩmã ne a Haman zĩndame n yũ rãam. La Suuz tẽngã neb sũy ra sãama wʋsgo.

4 A Mardose+ sẽn wa n bãng bũmb nins fãa sẽn maanã,+ a pãrsa a futã,* n yeelg bot la a yug a zugã tompɛglem. Rẽ poore, a yiime n kẽng tẽngã sʋka, n zẽk a koɛɛg n yãbd ne sũ-toogo. 2 A kẽngame n tɩ ta rĩmã rignoorẽ wã, la ned sẽn yer bot ra pa tar sor n na n kẽ rĩmã zakẽ ye. 3 Soolmã zĩis nins fãa+ rĩmã koɛɛgã la a noorã sẽn ta wã, sũ-sãan-kãseng n zĩnd Zʋɩf-rãmbã sʋka, tɩ b ra loet noore,+ n yãbd la b wiisdẽ. Wʋsg ra yera boto, la b gãe tompɛglmẽ.+ 4 Rĩm-poak a Ɛstɛɛr yem-pogsã la a yem-daadã* sẽn wa n togs-a wã, a sũur sãama wʋsgo. Dẽ, a baoo fut n tʋm tɩ b tɩ kõ a Mardose sẽn na yɩl t’a yeeg botã la a yeelg rẽ, la a Mardose zãgsame. 5 Rẽ n so t’a Ɛstɛɛr bool a Hatak sẽn yaa rĩmã yem-daoog a sẽn yãk t’a get a yellã, n yeel-a t’a tɩ sok a Mardose n bãng sẽn yaa bũmb ning n maane.

6 Dẽ, a Hatak yiime n bʋʋg a Mardose zãma wã zĩig ning sẽn be rĩmã zak rignoorẽ wã. 7 A Mardose togs-a-la bũmb ning fãa sẽn paam-a wã, la ligd ning takɩ+ a Haman sẽn pʋlem t’a na n kõome tɩ b ning rĩmã ligd bĩngr zĩigẽ, sẽn na yɩl tɩ b sãam Zʋɩf-rãmbã.+ 8 Sẽn paase, a kõ-a-la sebr b sẽn gʋls rĩmã noor ning b sẽn moon Suuzi,+ Zʋɩf-rãmbã sãoong yĩngã. A Hatak ra segd n tɩ kõo a Ɛstɛɛr sebrã, la a wilg-a yɛlã sẽn yaa to-to,+ la a yeel-a t’a kẽng rĩmã nengẽ n tɩ yõk a sɛɛg t’a zoe a buudã neb nimbãanega.

9 A Hatak lebgame n wa togs a Ɛstɛɛr a Mardose sẽn yeelã. 10 Rẽ la a Ɛstɛɛr yeel a Hatak t’a tɩ togs a Mardose+ yaa: 11 “Rĩmã tʋm-tʋmdbã fãa la a soolem toor-toorã nebã miime tɩ rao wall pag sã n kẽ rĩmã saman-bilẽ wã+ tɩ pa yẽ n bool-a, no-yɛng bal la b segd n tũ: B segd n kʋ-a lame. Yaa rĩmã sã n tees a soabã a naam dasaarã sẽn maan ne sãnemã+ bal la a na n põse. Yaool n yaa rasem pis-tã la woto rĩmã sẽn pa bool maam.”

12 B sẽn togs a Mardose bũmb ning a Ɛstɛɛr sẽn yeelã, 13 a leoka a Ɛstɛɛr yaa: “Ra tags tɩ Zʋɩf-rãmbã sʋka, yaa foom f yembr n na n põse, fo sẽn yaa rĩmã zak nedã yĩng ye. 14 Bala fo sã n kell n sĩnd wakat kãngã, Zʋɩf-rãmbã yolsg la b fãagr na n yii zĩig a to,+ la foo ne f ba wã zak rãmb na n sãamame. Ãnd n mi? Tõe tɩ yaa wakat a woto buud yĩng la fo sẽn paam naamã.”+

15 Dẽ, a Ɛstɛɛr leoka a Mardose yaa: 16 “Kẽng-y n tɩ tigs-y Zʋɩf-rãmb nins fãa sẽn be Suuzã, tɩ y loe noor+ mam yĩnga. Rasem a tãab pʋgẽ, wĩndg la yʋngo, yãmb pa segd n dɩ rɩɩb wall y yũ bũmb ye.+ Maam ne m tʋm-tʋmd-pogsã me na n loee noore. Mam na n kẽnga rĩmã nengẽ, baa rẽ sẽn kɩɩsd tõogã. La mam sã n na n kiime, bɩ m ki.” 17 A Mardose loogame, n tɩ maan bũmb ning fãa a Ɛstɛɛr sẽn yeel-a wã.

5 Rasem a tãab-n-soabã,+ a Ɛstɛɛr yeelga a naam futã, n tɩ kẽ rĩmã zakã* saman-bilã sẽn tees rĩmã roogã n yaase. Rẽ tɩ rĩmã zĩi naamã roogẽ, a naam geerã zug n tees rignoorã. 2 Rĩmã sẽn yã rĩm-poak a Ɛstɛɛr sẽn yas samandẽ wã bala, a sũur yɩɩ noog ne-a, t’a tees-a naam dasaarã sẽn maan ne sãnemã+ sẽn da be a nugẽ wã. Dẽ, a Ɛstɛɛr kolgame n sɩɩs naam dasaarã zugu.

3 Rĩmã sok-a lame yaa: “Rĩm-poak a Ɛstɛɛre, bõe n tar foo? Bõe la fo rata? Baa yaa mam soolmã pʋɩ-sʋk la f kos-yã, m na n kõ-f lame!” 4 T’a Ɛstɛɛr yeele: “Sã n taa rĩmã yam, bɩ rĩmã ne a Haman+ wa tigr ning mam sẽn segl rĩmã yĩng rũndã wã.” 5 Dẽ, rĩmã yeela a tʋm-tʋmdbã yaa: “Yeel-y-yã a Haman t’a wa tao-tao wa a Ɛstɛɛr sẽn kosã.” Woto, rĩmã ne a Haman kẽnga tigr ning a Ɛstɛɛr sẽn seglã.

6 Sẽn yɩ bilfu, b sẽn wa n yũud divẽ wã, rĩmã yeela a Ɛstɛɛr yaa: “Bõe la fo kota? Togs-m tɩ m na n kõ-f lame! Yaa bõe la fo rata? Baa yaa mam soolmã pʋɩ-sʋk la f kos-yã, m na n kõ-f lame!”+ 7 A Ɛstɛɛr leokame yaa: “Ad mam kosgã, la m sẽn date: 8 Rĩmã sã n sɩd nonga maam, la sã n taa rĩmã yam t’a na n deeg mam kosgã la a maan mam sẽn datã, bɩ rĩmã ne a Haman wa tigrã mam sẽn na n maan beoog yãmb yĩngã. Beoogo, mam na n wilga rĩmã m sẽn datã.”

9 Baraare, a Haman yiime n loog ne sũ-noogo. La a sẽn yã a Mardose rĩmã rignoorẽ, n mik t’a pa yik n yaas yẽ taoore, la t’a pa zoet yẽ wã, a sũurã puuga wʋsg ne a Mardose.+ 10 La a Haman tõoga a sũuri, n kuil a yiri. Rẽ poore, a tʋmame tɩ b bool a zo-rãmbã ne a pag a Zerɛse.+ 11 A Haman gomame n pẽg a meng a arzɛkã sẽn yaa wʋsgã yĩnga, a kambã sẽn yaa wʋsgã,+ la rĩmã sẽn zẽk yẽ to-to, la a sẽn kõ-a naam n yɩɩd a nanambsã la a tʋm-tʋmdbã yĩnga.+

12 A Haman le yeelame: “Sẽn paase, rĩm-poak a Ɛstɛɛr pa bool ned a to t’a na n yãag rĩmã n kẽng tigr ning a sẽn seglã,+ n zʋʋg maam ye. A le boola maam beoog yɛsa, tɩ m wa naag yẽ ne rĩmã n dɩ.+ 13 La bõn-kãensã fãa pa tõe n kõ maam sũ-noogo, mam sã n ket n ne a Mardose sẽn yaa Zʋɩfã t’a zĩ rĩmã rignoorẽ ye.” 14 Dẽ, a pag a Zerɛs ne a zo-rãmbã fãa yeel-a lame yaa: “Kɩt tɩ b lugl ra-luk woglem sẽn yaa kãntɩɩg pis-nu.* Beoog yibeoogo, bɩ f yeel rĩmã tɩ b segd n luula a Mardose ra-lukã zugu.+ Rẽ poore, bɩ f tũ rĩmã n kẽng tigrã n tɩ noog f yõore.” Sagl-kãng yɩɩ a Haman noogo, t’a kɩt tɩ b lugl ra-lukã.

6 Baraar yʋngo, rĩmã pa tõog n gũs ye.* Rẽ n so t’a yeel tɩ b tall kibayã sebr+ n wa. B karma sebrã rĩmã taoore. 2 Be, b yãa b sẽn gʋls t’a Mardose puka a Bigtan ne a Terɛs bãongo, b sẽn wa n sed taab n na n kʋ rĩm a Asuerusã.+ B ra yaa rĩmã na-yirã tʋm-tʋmdb a yiib sẽn yaa rigno-gũudba. 3 Rĩmã sokame yaa: “Bõe la b maan n waoog a Mardose, la b rol-a bõn-kãng yĩnga?” Tɩ rĩmã sõgen-dãmbã yeele: “B pa maan baa fʋɩ a yĩng ye.”

4 Sẽn yɩ bilfu, rĩmã sokame yaa: “Ãnda la sẽn be samandẽ wã?” Rẽ t’a Haman wa n bee rĩmã zakã* saman-kãsengẽ wã,+ n dat n kos rĩmã t’a kɩt tɩ b luul a Mardose ra-luk ning yẽ sẽn lugl a yĩngã zugu.+ 5 Tɩ rĩmã sõgen-dãmbã yeel-a: “Yaa a Haman+ n yas samandẽ wã.” Dẽ, rĩmã yeelame: “Kɩt-y t’a kẽ.”

6 A Haman sẽn kẽ wã, rĩmã sok-a lame: “Rĩmã sã n dat n waoog neda, bõe la b segd n maan n kõ a soaba?” A Haman tagsa a sũurẽ yaa: “Ãnda la rĩmã na n dat n waoog n zʋʋg maam?”+ 7 Rẽ n so t’a Haman yeel rĩmã yaa: “Ned ning rĩmã sẽn dat n waoogã yĩnga, 8 b segd n waa ne naam fuug+ rĩmã sẽn yeelgde, la wed-moaag rĩmã sẽn zombde, n dɩk naam zug-fuug n pil wed-moaagã zugu. 9 Rẽ poore, b segd n ninga fuugã ne wed-moaagã nanambs nins b sẽn waoogd n yɩɩdã nin-yend nugẽ. B segd n dɩka fuugã n yeelg ned ning rĩmã sẽn dat n waoogã, la b zombg-a wed-moaagã zug n tall-a n gilg zãma wã zĩigẽ. B segd n bee a taoor n moond n yetẽ: ‘Yaa woto la b maand ned ning rĩmã sẽn dat n waoogã!’”+ 10 Zĩig pʋgẽ, rĩmã yeela a Haman yaa: “Maan tao-tao! Rɩk fuugã la f yõk wed-moaagã, n tɩ maan a Mardose sẽn yaa Zʋɩf n zĩ rĩmã rignoorẽ wã wa fo sẽn yeelã bal kɛpɩ. Ra bas baa fʋɩ bũmb ning fo sẽn yeelã pʋgẽ n pa maan ye.”

11 Dẽ, a Haman rɩka fuugã la a yõk wed-moaagã, n tɩ yeelg a Mardose+ fuugã la a zombg-a wed-moaagã n tall-a n gilg zãma wã zĩigẽ, n be a taoor n yetẽ: “Yaa woto la b maand ned ning rĩmã sẽn dat n waoogã!” 12 Rẽ poore, a Mardose lebg n leba rĩmã rignoorẽ. La a Haman yɩɩ tao-tao n dɩk a yir sore, n pil a zug n kuiis ne sũ-sãan-kãsenga. 13 A Haman sẽn togs a pag a Zerɛs+ ne a zo-rãmbã bũmb ning fãa sẽn paam-a wã, a sagendbã* ne a pag a Zerɛs yeel-a lame: “Fo zoe n sɩnga lʋɩɩs a Mardose taoore. Sã n mik t’a yaa Zʋɩfe, fo pa na n tõog-a ye. Sãmbg sẽn kae, fo na n lʋɩɩ a taoore.”

14 B sẽn wa n ket n gomd ne a Hamannã, rĩmã na-yirã tʋm-tʋmdbã wa n tall-a-la tao-tao n kẽng tigrã a Ɛstɛɛr sẽn seglã.+

7 Woto, rĩmã ne a Haman+ waa rĩm-poak a Ɛstɛɛr tigrẽ wã. 2 Rasem a yiib-n-soabã, b sẽn wa n yũud divẽ wã, rĩmã le yeela a Ɛstɛɛr yaa: “Rĩm-poak a Ɛstɛɛre, bõe la fo kota? M na n kõ-f lame! Yaa bõe la fo rata? Baa yaa mam soolmã pʋɩ-sʋk la f kos-yã, m na n kõ-f lame!”+ 3 Rĩm-poak a Ɛstɛɛr leokame yaa: “N-na! Yãmb sã n sɩd nonga maam, sã n taa rĩmã yam, ad mam kosgã: Bɩ y fãag mam vɩɩmã.* Ad mam sẽn date: Bɩ y fãag m buudã neba.+ 4 Bala b koosa maam ne m buudã neba,+ tɩ b na n kʋ tõndo, n sãam-d zãng n menes-do.+ Sã n da mik tɩ b koosa tõnd tɩ d na n yɩ yembse, m da na n sĩndame. La y pa segd n bas tɩ yel-be-kãngã paam tõnd ye. Bala rĩmã me na n paama bõne.”

5 Rĩm a Asuerus soka rĩm-poak a Ɛstɛɛr yaa: “Yaa ãnda soab la rẽ? Ned ning sẽn saag n maan bũmb a woto wã bee yɛ?” 6 T’a Ɛstɛɛr yeele: “Tõnd zabd-n-taagã la d bɛyã yaa nin-wẽn-kãngã: A Hamanne.”

Rabeem-kãseng yõka a Hamanne, rĩmã ne rĩm-poakã yĩnga. 7 Rĩmã yika ne sũ-puugr divẽ wã yũub zĩigẽ, n kẽng na-yirã zẽedã zĩigẽ. La a Haman yikame n na n yõk rĩm-poak a Ɛstɛɛr sɛɛga, sẽn na yɩl tɩ b bas-a t’a kell n vɩɩmde, bala a bãngame tɩ rĩmã yãka yam n na n sɩbg-a. 8 Rĩmã yii na-yirã zẽedã zĩigẽ n lebg n wa zĩig ning b sẽn da yũud divẽ wã, n mik t’a Haman basa a meng n lʋɩ gãag ning zug a Ɛstɛɛr sẽn da be wã. Rĩmã zẽka a koɛɛg n yeel yaa: “A ratame me n yõg rĩm-poakã mam mengã zakẽ la?” Gom-kãensã sẽn yi rĩmã noorẽ wã bala, b pila a Haman nengã. 9 Dẽ, a Harbona+ sẽn yaa rĩmã na-yirã tʋm-tʋmd a ye wã yeelame: “A Haman kɩtame me tɩ b lugl ra-luk a Mardose yĩnga,+ rao ning goam sẽn fãag rĩmã.+ Ra-lukã bee a Haman zakẽ wã, t’a woglmã yaa kãntɩɩg pis-nu.”* Rẽ la rĩmã yeel yaa: “Luul-y-yã-a ra-lukã zugu.” 10 Woto, b tɩ luula a Haman ra-luk ning a sẽn da lugl a Mardose yĩngã zugu, tɩ rĩmã sũurã sigi.

8 Daar-n-kãnga, rĩm a Asuerus rɩka a Haman sẽn da yaa Zʋɩf-rãmbã bɛyã+ zakã*+ n kõ rĩm-poak a Ɛstɛɛre. Sẽn paase, a Mardose kẽ n yalsa rĩmã taoore, bala a Ɛstɛɛr vẽnegame n togs t’a yaa yẽ roagda.+ 2 Dẽ, rĩmã yãka a nugbĩng sẽn tar n ningd bãndã+ a sẽn da reeg a Haman nengẽ wã n kõ a Mardose. A Ɛstɛɛr me kɩtame t’a Mardose na n get a Haman zakã yelle.+

3 Sẽn paase, a Ɛstɛɛr le goma ne rĩmã yɛsa. A wõgemda a taoore, n yãbe. A yõka rĩmã sɛɛg sẽn na yɩl t’a maneg wẽng ning Agaag buudã rao a Haman sẽn maanã, la a gɩdg a sẽn da magd n na n maan Zʋɩf-rãmbã bũmb ningã.+ 4 Rĩmã teesa a Ɛstɛɛr naam dasaarã sẽn maan ne sãnemã,+ t’a Ɛstɛɛr yik n yaas rĩmã taoore. 5 A yeelame: “Sã n taa rĩmã yam, rĩmã sã n sɩd nonga maam, sã n yaa tɩrg rĩmã nifẽ, la rĩmã sũur sã n noom ne maam, bɩ a yiis noore, n wilg tɩ sɛb nins Agaag buudã rao+ a Hamedata biig a Haman sẽn yaa sɩlem soabã sẽn da gʋlsã lebga zaalem.+ Yaa sɛb nins a sẽn da gʋls n na n sãam Zʋɩf-rãmbã, rĩmã soolem toor-toorã fãa pʋsẽ wã. 6 Bala mam na n yɩɩ wãn n tõog n ges yel-beed ning sẽn na n paam mam buudã nebã? Mam na n yɩɩ wãn n tõog n ges m doagdbã sãoongo?”

7 Dẽ, rĩm a Asuerus yeela rĩm-poak a Ɛstɛɛr ne a Mardose sẽn yaa Zʋɩfã yaa: “Ade! Mam dɩka a Haman zakã n kõ a Ɛstɛɛre,+ la m kɩt tɩ b luul a Haman ra-lukã zugu,+ a sẽn da magd n na n sãam Zʋɩf-rãmbã yĩnga. 8 La b sã n gʋls noor rĩmã yʋʋr yĩnga, n ning-a bãnd ne rĩmã nugbĩng sẽn tar n ningd bãndã, ned pa tõe n toeem noorã ye.+ Masã, rĩmã yʋʋr yĩnga, y tõe n gʋlsa bũmb ning fãa y sẽn tagsd tɩ yaa sõma Zʋɩf-rãmbã sõngr yĩnga, la y tall rĩmã nugbĩng sẽn tar n ningd bãndã n ning bãnd a zugu.”

9 Rẽ n so tɩ b bool rĩmã seb-gʋlsdbã wakat kãnga, kiuug a tãab-n-soabã sẽn yaa Sivan* kiuugã rasem pisi la a tãabã. B gʋlsa noy nins fãa a Mardose sẽn kõ Zʋɩf-rãmbã, n paas guvɛrneer-dãmbã taoor dãmbã,+ guvɛrneer-dãmbã, la soolem toor-toorã nanambsã+ sẽn sɩng ne Ẽnd n tɩ tãag Etiyopi wã, rat n yeel tɩ soolem toor-toor koabg la pisi la yopoe wã. B gʋlsa soolem fãa wa sẽn zems a gʋlsem sẽn yaa to-to,* la buud fãa wa sẽn zems a buud-gomde, la Zʋɩf-rãmbã wa sẽn zems b gʋlsem sẽn yaa to-to* la b buud-gomde.

10 A Mardose gʋlsa noorã rĩm a Asuerus yʋʋr yĩnga, la a ning-a bãnd ne rĩmã nugbĩng sẽn tar n ningd bãndã.+ A ninga sɛbã a sẽn gʋlsã seb-kɩtb sẽn zao wed-moos nusẽ. B zomba wed-moos sẽn zoet ne tʋʋlem, b sẽn gʋʋnd rĩmã tʋʋm yĩnga, tɩ b tar n kẽnd n kɩt sɛba. 11 Seb-kãens pʋsẽ, rĩmã kõo sore, tɩ Zʋɩf-rãmbã sẽn be tẽnsã fãa pʋsẽ wã tõe n tigim taab n zab n kogl b mense, la b kʋ tãb-biis nins fãa sẽn na n wa zab ne-bã, la b wʋk b paoongã.+ B tara sor n na n sãam tãb-bi-kãens la b menes-ba, baa sẽn yaa buud ning fãa pʋgẽ wall soolmã zĩig ning fãa la b yi-yã, bãmb ne b pagbã la b kambã. 12 Bõn-kãens segd n maana daar-n-yɛng rĩm a Asuerus soolem toor-toorã fãa pʋsẽ, rat n yeel tɩ kiuug piig la a yiib-n-soabã sẽn yaa Adaar* kiuugã+ rasem piig la a tãabã. 13 B segd n gʋlsa sebrã tɩ lebg noor soolem toor-toorã fãa pʋsẽ. B segd n moona noorã me buud toor-toorã fãa neba, tɩ Zʋɩf-rãmbã segl b mens daar-n-kãng yĩnga, n dok b sũur ne b bɛɛbã.+ 14 Seb-kɩtbã sẽn zao wed-moos b sẽn gʋʋnd rĩmã tʋʋm yĩnga, tɩ b tar n kẽnd n kɩt sɛbã tũu rĩmã noorã, n loog tao-tao ne tʋʋlem. B moona noorã Suuz+ sẽn yaa na-yirã* me pʋgẽ.

15 A Mardose yii rĩmã taoor ne naam fuug sẽn yaa kẽeg haoo* la pɛɛlga, la a fõg sãnem maanf sẽn yaa bedre. A ra yera kobr b sẽn wʋg ne rũms kõbd gĩs-bãanes sẽn yaa miid-miid+ me, tɩ Suuz tẽngã neb kaasd ne sũ-noogo. 16 Ne Zʋɩf-rãmbã, yɩɩ yolsg* daare, sũ-noogo, kɩdeng la zu-zẽkr daare. 17 Soolem toor-toorã fãa pʋsẽ, la tẽnsã fãa pʋsẽ, rat n yeel tɩ zĩig ning fãa rĩmã noorã la a tõogã sẽn ta, Zʋɩf-rãmb nins sẽn be be wã ra maanda sũ-noog la b kɩdemdẽ, n maand tig la b noogd b yõore. Soolmã neb wʋsg ra yetame tɩ b yaa Zʋɩf-rãmba,+ b sẽn da zoet Zʋɩf-rãmbã yĩnga.

9 Kiuug piig la a yiib-n-soabã sẽn yaa Adaar* kiuugã+ rasem piig la a tãabã, raar ning b sẽn da segd n maan wa rĩmã koɛɛgã la a noorã sẽn wilgã,+ Zʋɩf-rãmbã bɛɛbã sẽn da magd tɩ b na n tõog-b lame wã, pa yɩ woto ye. Yɩɩ Zʋɩf-rãmbã n tõog neb nins sẽn da kis-bã.+ 2 Zʋɩf-rãmbã tigma taab b tẽnsã pʋsẽ, rĩm a Asuerus soolem toor-toorã fãa pʋsẽ,+ n na n zab ne neb nins sẽn dat n maan-b wẽngã. Ned baa a ye ra pa tõe n yaas b taoor ye. Bala rabeem n yõk buud toor-toorã fãa neb Zʋɩf-rãmbã yĩnga.+ 3 Soolem toor-toorã nanambs fãa, guvɛrneer-dãmbã taoor dãmbã,+ guvɛrneer-dãmbã ne neb nins sẽn da get rĩmã tʋʋmã yellã ra teenda Zʋɩf-rãmbã, b sẽn zoet a Mardose wã yĩnga. 4 A Mardose ra lebga nin-kãseng+ rĩmã zakẽ.* A yʋʋrã ra yita soolem toor-toorã fãa pʋsẽ, a pãngã sẽn da tar paasgã yĩnga.

5 Zʋɩf-rãmbã tõoga b bɛɛbã fãa, n kʋ-b ne sʋʋs la b sãam-ba. B maana b sẽn dat ne neb nins sẽn kis-bã.+ 6 Suuz+ sẽn yaa na-yirã* pʋgẽ, Zʋɩf-rãmbã kʋʋ neb kobs-nu n sãam-ba. 7 Sẽn paase, b kʋʋ a Parsandata, a Dalfonne, a Aspata, 8 a Porata, a Adaliya, a Aridata, 9 a Parmasta, a Arizayi, a Aridayi ne a Vayizata 10 sẽn yaa Zʋɩf-rãmbã bɛ+ a Haman kom-dibli piigã. A Haman yaa a Hamedata biiga. La b sẽn kʋ b bɛɛbã poore, b pa wʋk b paoongã ye.+

11 Baraare, b tɩ togsa rĩmã neb nins b sẽn kʋ Suuz sẽn yaa na-yirã* pʋgẽ wã sõore.

12 Rĩmã yeela rĩm-poak a Ɛstɛɛr yaa: “Suuz sẽn yaa na-yirã* pʋgẽ, Zʋɩf-rãmbã kʋʋ rap kobs-nu n sãam-ba, n paas a Haman kom-dibli piigã. La bõe la b maan rĩmã soolmã zĩis a taabã pʋsẽ?+ Bõe la fo kota? Togs tɩ m na kõ-fo. Bõe la fo le rata? Togs tɩ m na n maaname.” 13 A Ɛstɛɛr leokame yaa: “Sã n taa rĩmã yam,+ bɩ a kõ Zʋɩf-rãmb nins sẽn be Suuzã sore, tɩ beoog me bɩ b maan wa sẽn zems rũndã noorã,+ la bɩ rĩmã kɩt tɩ b luul a Haman kom-dibli piigã kũ-rãmbã ra-lugs zutu.”+ 14 Dẽ, rĩmã kõo noor tɩ b maan woto. B yiisã noor Suuz pʋgẽ, tɩ b luul a Haman kom-dibli piigã kũ-rãmb me.

15 Zʋɩf-rãmb nins sẽn be Suuzã le tigma taab Adaar kiuugã+ rasem piig la a naasã n kʋ rap kobs-tã Suuz pʋgẽ, la b pa wʋk b paoongã ye.

16 Zʋɩf-rãmb a taabã sẽn be rĩmã soolem toor-toorã pʋsẽ wã me tigma taab n na n zab n kogl b mense.+ B kʋʋ neb tus-pis-yopoe la a nu sẽn kis-b bãmbã sʋka, n paam b mens ne b bɛɛbã.+ La b pa wʋk b paoongã ye. 17 Rẽ yɩɩ Adaar kiuugã rasem piig la a tãabã. Kiuugã rasem piig la a naasã, b vʋʋsame, la b maan daar-n-kãng tɩ yɩ tigr la kɩdeng daare.

18 Zʋɩf-rãmb nins sẽn be Suuzã tigmã taab kiuugã rasem piig la a tãabã+ ne a rasem piig la a naasã,+ n vʋʋs a rasem piig la a nu wã, la b maan daar-n-kãng tɩ yɩ tigr la kɩdeng daare. 19 Yaa rẽ la Zʋɩf-rãmb nins sẽn be tẽns a taabã pʋsẽ wã sẽn maan tɩ Adaar kiuugã rasem piig la a naasã yaa tigr la kɩdeng daare,+ daar b sẽn noogd b yõore, la b yãkd rɩɩb n kõt taabã.+

20 A Mardose+ gʋlsa bõn-kãensã sebr pʋgẽ, la a gʋls sɛb n tool Zʋɩf-rãmb nins sẽn be rĩm a Asuerus soolem toor-toorã fãa pʋsẽ, sẽn pẽ-bã la sẽn zãr-bã. 21 A yeel-b lame tɩ b segd n tẽegda Adaar kiuugã rasem piig la a naasã ne a rasem piig la a nu wã yell yʋʋmd fãa, 22 bala yaa ra-kãens la Zʋɩf-rãmbã paam b mens ne b bɛɛbã. Sẽn paase, yaa ki-kãng pʋgẽ la b sũ-sãangã+ toeem n lebg kɩdengo, tɩ b yɩɩrã daar toeem n lebg yõ-noogr daare. B segd n tẽegda ra-kãens yelle, n maandẽ tɩ yaa kɩdeng la sũ-noog raya, ray b sẽn segd n yãkd rɩɩb n kõt taaba, la b kõt naong rãmbã kũuni.

23 Zʋɩf-rãmbã sakame tɩ tigr ning b sẽn sɩngã na n lebg minung wa a Mardose sẽn gʋls n yeel-bã. 24 Bala Agaag buudã rao+ a Hamedata biig a Haman+ sẽn da yaa Zʋɩf-rãmbã fãa bɛyã ra magd n na n sãama Zʋɩf-rãmbã.+ A ra maana bãnde,*+ sẽn na yɩl n kẽes-b rabeem la a sãam-ba. 25 La a Ɛstɛɛr sẽn wa n kẽng rĩmã taoorã, rĩmã yiisa noy n kɩt tɩ b gʋls n yeele:+ “Bɩ mag-wẽng ning a sẽn da magd Zʋɩf-rãmbã yĩngã+ leb a mengã zugu.” Sẽn paase, b luula yẽ ne a kom-dibli wã ra-lugs zutu.+ 26 Yaa rẽ yĩng la b sẽn bool tig-kãng tɩ Purim* tigrã.+ Rẽ n so tɩ bũmb nins fãa sẽn gʋls seb-kãng pʋgẽ wã yĩnga, la Zʋɩf-rãmbã sẽn yã bũmb ning yel-kãngã wɛɛngẽ wã, n paas bũmb ning sẽn paam-bã yĩnga, 27 Zʋɩf-rãmbã yãk yam n na n tẽegd ra-kãens a yiibã yell n pa basdẽ, la b maand wa b sẽn gʋls tigrã wɛɛngẽ wã yʋʋmd fãa, wakat ning b sẽn yãkã. Yaa bãmb ne b kambã la b yagensã, n paas neb nins sẽn na n wa naag-bã fãa.+ 28 B segd n tẽegda ra-kãens yell n maand tigr zãmaan fãa pʋgẽ. Yaa buud roog fãa, soolem fãa la tẽng fãa. B pa segd n bas Purim tigrã maaneg Zʋɩf-rãmbã sʋk ye. B kambã la b yagensã me pa segd n bas ra-kãensã yell tẽegr ye.

29 Rẽ poore, rĩm-poak a Ɛstɛɛr sẽn yaa a Abihayɩll biigã, ne a Mardose sẽn yaa Zʋɩfã tika naam ning b sẽn tarã n gʋls sebr a to, n wilg tɩ sebr ning sẽn gomd Purimmã yellã goam yaa sɩda. 30 B toola sɛbã Zʋɩf-rãmb nins fãa sẽn be soolem toor-toor koabg la pisi la a yopoe wã pʋsẽ,+ rat n yeel t’a Asuerus soolmã fãa pʋgẽ.+ Sɛbã ra gomda laafɩ la sɩd goama, 31 n wilgdẽ tɩ b segd n tẽegda Purim tigrã yell a rayã wakate, wa noy nins a Mardose sẽn yaa Zʋɩfã ne rĩm-poak a Ɛstɛɛr sẽn kõ-bã,+ la wa bãmb mens sẽn yãk yam tɩ bãmb ne b kambã la b yagensã na n maandẽ wã,+ n naag ne no-loeer+ la se-yõkre.+ 32 Noor ning a Ɛstɛɛr sẽn kõ wã me wilgame tɩ b sɩd segd n maanda Purimmã+ woto. B gʋlsa bõn-kãens sebr pʋgẽ.

10 Rĩm a Asuerus yiisa noor n modg soolmã neba, la mogrã sʋk tẽnsã neb tɩ b tʋm tʋʋm-wɛgla.

2 B gʋlsa bũmb nins fãa rĩmã sẽn maan ne a pãngã la a tõogã Medi la Pɛrs rĩm-dãmbã+ kibay sebrã pʋgẽ,+ n paas a sẽn zẽk a Mardose+ to-to wã+ ball-balle. 3 Bala a Mardose sẽn yaa Zʋɩfã ra yaa rĩm a Asuerus na-pʋgdga. A ra yaa nin-kãseng* Zʋɩf-rãmbã sẽn yaa a saam-biisã sʋka, tɩ b wʋsgã waoogd-a. A ra tʋmda a buudã neb neer yĩnga, la a ra baood a saam-biisã kamb la b yagensã fãa neere.