YIIB-N-SOAB SEBR B SẼN TOOL KORẼNT RÃMBÃ

1 Maam a Poll sẽn yaa Kirist Zeezi tẽn-tʋmd Wẽnnaam daabã maasem yĩngã, n paas d saam-biig a Tɩmote+ n gʋls seb-kãngã n tool Wẽnnaam tiging ning sẽn be Korẽntã, ne nin-sõamyã wã fãa sẽn be Akayi+ soolmẽ wã.

2 Bɩ bark* la laafɩ sẽn yit Wẽnnaam sẽn yaa tõnd Ba wã nengẽ, la Zu-soab a Zeezi Kirist nengẽ zĩnd ne yãmba.

3 Bɩ tõnd Zu-soab a Zeezi Kirist Wẽnnaamã sẽn yaa a Ba me wã+ paam pẽgre. A yaa Ba sẽn tar nimbãan-zoeer wʋsgo,+ la belsg fãa Wẽnnaam,+ 4 sẽn belsd tõnd* d zu-loeesã* fãa pʋgẽ+ sẽn na yɩl tɩ tõnd me tõog n tall belsg ning tõnd sẽn paamd Wẽnnaam nengẽ wã,+ n bels neb a taab+ zu-loees* buud fãa pʋgẽ. 5 Bala wa tõnd sẽn namsd wʋsg Kiristã yĩngã,+ belsg ning d sẽn paamd Kiristã maasem yĩngã me yaa wʋsgo. 6 La tõnd sã n paamd zu-loeese,* yaa yãmb belsg la y fãagr yĩnga. Tõnd sã n paamd belsgo, yaa sẽn na yɩl tɩ yãmb me paam belsgo. Yaa bels-kãng n sõngd yãmb tɩ y tõogd toog zu-loees nins tõnd me sẽn segdã pʋgẽ. 7 Tõnd kɩsa sɩd zãng ne yãmb n miẽ tɩ yãmb sẽn naagd tõnd n namsdẽ wã, y na n naaga tõnd n paam belsg me.+

8 M saam-biisi, tõnd pa rat tɩ yãmb zɩ namsg ning d sẽn paam Aazi soolmẽ wã ye.+ Tõnd da paamda weoogr wʋsg sẽn yɩɩd tõnd mens pãnga, hal n da yɛɛsd tɩ na n tũu ne d yõore.+ 9 Sɩd-sɩda, tõnd da tagsdame tɩ d na n kiime. La bõn-kãngã kɩtame tɩ d bãng tɩ d pa segd n teeg d mense, la tɩ d segd n teega Wẽnnaam+ sẽn vʋʋgd kũumã. 10 Yel-kãngã sẽn da tõe n tũ ne d yõorã pʋgẽ, a sɩd fãaga d vɩɩmã. La tõnd kɩsa sɩd t’a na n ket n fãagda tõndo.+ 11 Yãmb me tõe n sõnga tõnd ne y sẽn na n yõk Wẽnnaam sɛɛg tõnd yĩnga,+ sẽn na yɩl tɩ neb wʋsg pʋʋs Wẽnnaam bark tõnd yĩnga, a sẽn leok neb wʋsg pʋʋsg+ n maan tõnd lohormã yĩnga.

12 Ad bũmb ning poorẽ tõnd sẽn zẽkd d zutã: Tõnd sũur-kasetã* kõta kaset tɩ dũniyã pʋgẽ, la sẽn yɩɩd fãa ne yãmba, tõnd zãa d mens ne sõmblem la ne pʋ-peelem sẽn yit Wẽnnaam nengẽ. La pa yɩ ne ninsaal yam ye.+ Yɩɩ ne Wẽnnaam barkã.* 13 Bala tõnd pa gʋlsd yãmb bũmb n zʋʋg y sẽn tõe n karem* la y wʋm a võorã ye. La mam saagdame tɩ y na n ket n wʋmda bõn-kãensã võor sõma,* 14 wa yãmb neb kẽer sẽn bãng tɩ yaa tõnd maasem yĩng la yãmb sẽn zẽkd y zutã, tɩ tõnd me na zẽk d zut yãmb maasem yĩnga, tõnd Zu-soab a Zeezi daarã daare.

15 Mam sẽn kɩs sɩd ne bõn-kãnga wã yĩnga, mam da magd n na n deng n waa yãmb nengẽ, sẽn na yɩl tɩ y le paam segb n maan sũ-noogo.* 16 Mam da ratame tɩ m sã n wa rabd Masedoan bɩ m tũ yãmb nengẽ, tɩ m sã n wa yi Masedoan n lebg n watẽ me bɩ m tũ yãmb nengẽ, n paam tɩ y yãag-m bilf tɩ m kẽng Zide.+ 17 Mam sẽn wa n magd dẽ wã, mam dɩka yɛlã faag-faag sɩda? Bɩ mam magda yɛlã wa sẽn zems ninsaal tagsgo, n yetẽ tɩ “n-ye, n-ye,” n wẽneg n yeel tɩ “ayo, ayo”? 18 Y tõe n kɩsa Wẽnnaam sɩd tɩ bũmb ning tõnd sẽn yet yãmbã yaa sɩda. Tõnd pa reng n yeel tɩ “n-ye” n le wa yeel tɩ “ayo” ye. 19 Bala Wẽnnaam Biig a Zeezi Kirist sẽn yaa soab ning tõnd sẽn moon yãmb sʋkã, rat n yeel tɩ maam ne a Sɩlvẽ* la a Tɩmote+ sẽn moonã pa lebg “n-ye” n wẽneg n lebg “ayo” ye. La sã n yaa ne yẽ nengẽ, “n-ye” lebga “n-ye.” 20 Baa Wẽnnaam pʋlemsã sẽn yaa wʋsg to-to, b lebga “n-ye” yẽ maasem yĩnga.+ Leb n yaa a Zeezi maasem yĩng la b yet Wẽnnaam tɩ “Ãmiina,”+ tɩ kõt Wẽnnaam waoogr tõnd maasem yĩnga. 21 La soab ning sẽn kɩt tɩ d bas d yam tɩ yãmb ne tõnd yaa Kiristã rẽndã, la sẽn zae-a tõnd ne vʋʋsem sõngã yaa Wẽnnaam.+ 22 Sẽn paase, a ninga a bãndã tõnd zut+ la a kõ tõnd bũmb ning sẽn watã kaseto, sẽn yaa vʋʋsem sõngã+ a sẽn ning tõnd sũyã pʋsẽ wã.

23 La Wẽnnaam yaa mam* kaset soab tɩ mam sẽn nan pa wa Korẽntã, yaa mam sẽn pa rat tɩ yãmb sũy sãam n paasã yĩng bala. 24 Pa tɩ tõnd soo yãmb tẽebã ye.+ La tõnd yaa tʋmd-n-taas yãmb sũ-noog yĩnga. Bala yaa yãmb tẽebã maasem yĩng la yãmb yasa.

2 Mam yãka yam n pa rat n le wa yãmb nengẽ n sãam y sũy ye. 2 Mam sã n sãam yãmb sũyã, ãnda n na n noog mam sũur n zʋʋg a soab ning mam sẽn sãam a sũurã? 3 Mam sẽn gʋls bũmb ningã yaa sẽn na yɩl tɩ m sã n wa wa, bɩ neb nins sẽn tog n kõ maam sũ-noogã ra sãam mam sũur ye. Bala mam kɩsa sɩd tɩ bũmb ning sẽn noogd mam sũurã noogda yãmb fãa sũy me. 4 Yɩɩ ne toog la sũ-sãan-kãsenga, la ne nintãm wʋsg la mam gʋls yãmba. Pa sẽn na n sãam yãmb sũy ye.+ La yaa sẽn na yɩl tɩ y bãng tɩ m nonga yãmb ne nonglem-kãsenga.

5 Ned sã n yɩ sabab tɩ sũ-sãang wa,+ pa mam sũur la a sãam ye. Yaa yãmb fãa sũy la a sãam-yã. La mam pa rat n gom yel-kãngã yell tɩ loog noor ye. 6 Nin-kãng sẽn paam neb wʋsg sɩbgrã sek-a lame. 7 Masã, yãmb segd n kõ-a-la sugr ne yamleoogo, la y bels-a+ sẽn na yɩl t’a sũurã ra sãam wʋsg t’a koms raood ye.+ 8 Woto wã, mam sagenda yãmb tɩ y kɩt t’a bãng tɩ y nong-a lame.+ 9 Ad bũmb a to sẽn kɩt tɩ mam gʋlsd yãmba: Yaa sẽn na n bãng y sã n na n wilgame tɩ y yaa sakdb bũmb fãa pʋgẽ. 10 Sẽn yaa beegr ning fãa yĩng la yãmb kõ ned sugri, ma-me kõ-a-la sugri. Sɩd me, bũmb ning fãa mam sẽn kõ sugri, mam maana rẽ Kiristã nifẽ yãmb yĩnga, (sã n mik tɩ bũmb sã n bee m sẽn segd n kõ sugri) 11 sẽn na yɩl t’a Sʋɩtãan ra belg-d ye.*+ Bala tõnd pa zɩ a sɩlmã* ye.+

12 Mam sẽn wa n ta Torwaas+ n na n moon Kiristã koe-noogã, kʋɩleng paka mam yĩng Zu-soabã pʋgẽ. 13 La mam da maanda yɩɩr wʋsgo, m sẽn pa yã m saam-biig a Tɩtã+ yĩnga. Dẽ, mam pʋʋs-b lame la m dɩk Masedoan+ sore.

14 La bark Wẽnnaam sẽn yaa soab ning sẽn wilgd tõnd sor wakat fãa tɩ d naag Kiristã n kẽnd wa sodaas sẽn tõog zabr n lebgdẽ wã. A kɩtdame tɩ ne tõnd maasem, a bãngrã yũug saagd* zĩig fãa! 15 Bala sã n yaa ne Wẽnnaam, tõnd yaa Kiristã yũ-noog neb nins sẽn paamd fãagrã sʋka, la neb nins sẽn na n sãamã me sʋka. 16 Sã n yaa ne neb nins sẽn na n sãamã, tõnd yaa kũum yũug sẽn wat ne kũum,+ la ne neb nins sẽn na n paam fãagrã, d yaa vɩɩm yũug sẽn wat ne vɩɩm. La ãnda n zems ne bõn-kãensã? 17 Yaa tõnd n zems ne bõn-kãense. Bala tõnd pa neb sẽn tar Wẽnnaam gomdã n leebd n baood yõod+ wa neb wʋsg sẽn maandã ye. Tõnd yaa Kirist karen-biis Wẽnnaam sẽn tʋme, la sẽn gomd ne pʋ-peelem Wẽnnaam taoore.

3 Yaa tɩlɛ tɩ tõnd le wilg yãmb d sẽn yaa neb ninsã bɩ? Tõnd segd n kõo yãmb sɛb sẽn pẽgd tõnd wa neb kẽer sẽn maandã bɩ, bɩ yaa yãmb n segd n kõ tõnd seb-kãense? 2 Yaa yãmb mensã la tõnd sebr+ b sẽn gʋls tõnd sũyã pʋsẽ, tɩ ninsaalbã fãa miẽ la b karemdẽ. 3 Bala yaa vẽeneg tɩ yãmb yaa Kiristã sebr tõnd sẽn yaa Wẽnnaam tʋm-tʋmdbã sẽn gʋlse,+ la pa ne gʋls-koom ye. Yaa ne Wẽnnaam ning sẽn vɩ wã vʋʋsem sõngã. Sẽn paase, d pa gʋls-a kug-wals zut ye.+ D gʋls-a-la sũy pʋsẽ.+

4 Yaa Kiristã maasem yĩng la tõnd kɩs Wẽnnaam sɩd woto. 5 Tõnd pa yet tɩ d tõe n tʋma tʋʋmdã d toor ye. Yaa Wẽnnaam n sõngd tõnd tɩ d tʋmd tʋʋm-kãnga.+ 6 Yaa yẽ n sɩd kɩt tɩ d tõog n lebg kaool-paalgã tʋm-tʋmdba.+ Tõnd pa tõogã tʋm-tʋmdb ye.+ D yaa vʋʋsem sõngã tʋm-tʋmdba. Bala tõogã wata ne kũum,+ la vʋʋsem sõngã wata ne vɩɩm.+

7 Tõog ning sẽn wat ne kũum tɩ b gʋls-a kug-wals zutã+ waa ne ziiri, hal tɩ Israyɛll nebã ra pa tõe n ges a Moyiiz nengã, a nengã sẽn da pɩndã yĩnga.+ La yaool n da yaa ziir sẽn tog n wa sa. 8 Woto wã, b sẽn kõt vʋʋsem sõngã+ pa tog n yɩ ne ziir sẽn yaa kãseng n yɩɩd sɩda?+ 9 Tõog ning sẽn wat ne kãab-wẽngã+ sã n da tara ziiri,+ dẽnd tʋʋmd ning sẽn wat ne tɩrlmã tara ziir sẽn yaa kãseng n yɩɩda.+ 10 Sɩd-sɩda, bũmb ning sẽn da tar ziir pĩndã ziir saame, ziir ning sẽn yɩɩd-a wã yĩnga. 11 Bũmb ning b sẽn da tog n kɩt tɩ sa wã sã n waa ne ziiri,+ bũmb ning sẽn paadã ziir n tog n yɩɩge.+

12 Sẽn mik tɩ tõnd tara saag-kãnga wã,+ tõnd gomda ne bas-m-yam wʋsgo, 13 n pa maand bũmb ning a Moyiiz sẽn maane, a sẽn da pind a nengã ne peend+ sẽn na yɩl tɩ Israyɛll nebã ra tõog n ges bũmb ning sẽn da na n sa wã baasg kuii wã ye. 14 La b yamã ludame.+ Hal n tãag rũndã, b sã n wa karemd kaool-kʋdgã sebrã, peen-kãng ket n pilame.+ Bala yaa Kiristã maasem yĩng bal la b tõe n pilg peendã.+ 15 Sɩd-sɩda, hal n tãag rũndã, b sã n wa karemd a Moyiiz sɛbã,+ peend n lud b sũyã.+ 16 La ned sã n lebg n wa a Zeova* nengẽ, peendã pilgdame.+ 17 A Zeova* yaa Vʋʋsem,*+ la a Zeova* vʋʋsem sõngã sẽn be zĩig ning fãa, lohorem me bee be.+ 18 Tõnd fãa sẽn pilg d nensã pɛɛlã, d yaa wa nen-gets t’a Zeova* ziirã pukd be. Tõnd paamda tekr n lebgd wa Wẽnnaam, la d kɩtdẽ tɩ Wẽnnaam ziirã pukd n paasdẽ, wa a Zeova* sẽn yaa Vʋʋsmã* sẽn datã bal kɛpɩ.*+

4 Woto wã, tõnd sẽn tar tʋʋm-kãngã b sẽn zoe tõnd nimbãanegã yĩnga, d pa komsd raood n bas ye. 2 La tõnd basa bũmb nins sẽn yaa yãnd la sẽn soos n maanã. D pa kẽnd ne sɩlem, wall d pund Wẽnnaam gomdã ye.+ La d sẽn kɩtd tɩ sɩdã lebgd vẽenegã, Wẽnnaam taoore d lebga mak-sõng ned buud fãa sũur-kaset* yĩnga.+ 3 Sɩd-sɩda, koe-noogã tõnd sẽn moondã sã n ludame, yaa neb nins sẽn na n sãamã sʋk la a lud-yã. 4 Yaa bãmb sʋk la dũni-kãngã* wẽnnaamã+ lud sẽn ka tẽed-bã yam,+ sẽn na yɩl tɩ b ra tõog n yã koe-noogã sẽn tar ziirã vẽenem+ ye. Koe-no-kãng gomda Kirist sẽn yaa Wẽnnaam wõnegã+ yelle. 5 Bala tõnd pa moond n gomd d mens yell ye. D gomda a Zeezi Kirist yell n yetẽ t’a yaa Zu-soaba, la d yetẽ tɩ d yaa yãmb yembs a Zeezi yĩnga. 6 Bala Wẽnnaam la soab ning sẽn yeele: “Bɩ vẽenem yãg likẽ.”+ A kɩtame tɩ vẽenem yãg tõnd sũyã pʋsẽ n vẽneg-b+ ne Wẽnnaam bãngrã sẽn tar ziirã, Kirist nengã maasem yĩnga.

7 Baa ne rẽ, tõnd tara bõn-sõn-kãngã+ tãnd laas* pʋsẽ,+ sẽn na yɩl tɩ pãng ning sẽn yɩɩd ninsaal rẽndã yɩ Wẽnnaam rẽnda, la pa sẽn yit tõnd nengẽ ye.+ 8 B rɩdgda tõnd ne manesem buud fãa, la b pa rɩdgd tõnd hal tɩ d pa tõe n maan bũmb ye. D pa mi d sẽn maandga, la pa rat n yeel tɩ sẽn maand kae baa bilf ye.*+ 9 B namsda tõndo, la Wẽnnaam pa bas tõnd ye.+ B lubda tõnd tẽnga, la b pa sãam tõnd ye.+ 10 Wakat fãa, tõnd paamda nams-toaag ning b sẽn nams a Zeezi wã buud+ d yĩngã pʋgẽ, sẽn na yɩl t’a Zeezi vɩɩmã me yɩ vẽeneg tõnd yĩnsã pʋsẽ. 11 Bala tõnd sẽn vɩ wã, b ningda tõnd kũum taoor wakat fãa+ a Zeezi yĩnga, sẽn na yɩl t’a Zeezi vɩɩmã me yɩ vẽeneg tõnd yĩn-kiidsã pʋsẽ. 12 Rẽnd kũum tʋmda tõnd pʋsẽ, la vɩɩm bee yãmb pʋsẽ.

13 Bala tõnd tara tẽeb ning buud b sẽn gʋls n yeele: “Mam tẽeme, yaa rẽ yĩng la m sẽn gomã.”+ Tõnd me tẽedame, yaa rẽ yĩng la d sẽn gomdã, 14 n miẽ tɩ Soab ning sẽn vʋʋg a Zeezi wã na n vʋʋga tõnd me wa a Zeezi, la t’a na n talla tõnd n kẽng a Zeezi taoore.+ 15 Bõn-kãensã fãa yaa yãmb yĩnga, sẽn na yɩl tɩ Wẽnnaam barkã* sẽn paasdã maneg n yɩ wʋsg tɩ kõ Wẽnnaam ziiri,+ neb wʋsg sẽn pʋʋsd Wẽnnaam bark yĩnga.

16 Yaa woto yĩng la tõnd sẽn pa komsd raood n basã. La baa tõnd yĩnsã pãng sã n boogdẽ, tõnd sũyã ne d yamã lebgda paals beoog sẽn vẽeg fãa. 17 Baa namsgã* sã n yaa wakat bilf yĩnga, n leb n yaa faasga, a kɩtdame tɩ d paam ziir-kãseng sẽn pa tar mak-n-taag la sẽn paad wakat sẽn ka sɛta.+ 18 Tõnd ninã pa get bũmb nins nin sẽn ne wã ye. B geta bũmb nins nin sẽn pa ne wã.+ Bala bũmb nins nin sẽn ne wã kaoosda wakat bilfu, la bũmb nins nin sẽn ka ne wã paada wakat sẽn ka sɛta.

5 Bala tõnd miime tɩ tõnd tẽng zug roogã sẽn yaa fu-ro-kãnga wã sã n sãame,*+ tõnd segd n paama roog sẽn yit Wẽnnaam nengẽ saasẽ, la sẽn paad wakat sẽn ka sɛta, n pa roog ninsaalb nus sẽn me ye.+ 2 Bala tõnd sɩd wõosda do-kãngã* pʋgẽ, n dat ne d sũur fãa n yeelg roog ning sẽn yit saasẽ n yaa tõnd dẽndã,*+ 3 tɩ d sã n sɩd wa yeelg-a, bɩ b ra mik tɩ tõnd yaa bɛɛl ye. 4 Sɩd-sɩda, tõnd sẽn be fu-ro-kãngã pʋgẽ wã, d wõosdame hal tɩ d sũy sãamd wʋsgo. Pa d sẽn dat n yeeg ro-kãnga wã yĩnga, la yaa d sẽn dat n yeelg a to wã,+ tɩ vɩɩmã vel bõn-kiidgã+ yĩnga. 5 La soab ning sẽn segl tõnd bõn-kãng yĩngã yaa Wẽnnaam.+ Yẽ n kõ tõnd vʋʋsem sõngã tɩ yaa bũmb ning sẽn watã kaseto.+

6 Rẽ n so tɩ tõnd tar daood wʋsg wakat fãa, la d miẽ tɩ d sẽn be yĩngã pʋgẽ wã sasa, d zãra ne Zu-soabã.+ 7 Bala tõnd kẽnda ne tẽebo, la d pa get bũmb nins nin sẽn ne wã n kẽnd ye. 8 La tõnd tara raood wʋsgo, n da nongẽ d sẽn na n zãr ne yĩngã la d be ne Zu-soabã.+ 9 Woto wã, tõnd bee ne yẽ wall d zãra ne-a me, d sẽn dat yaa d tat a yam. 10 Bala tõnd fãa segd n yaasa Kiristã bʋ-kaoorã geer taoore, tɩ ned kam fãa reeg a keoor wa sẽn zems bũmb nins a sẽn maan a sẽn wa n be yĩngã pʋgẽ wã, sã n yaa sõma wall wẽnga.+

11 Woto yĩngã, tõnd sẽn mi Zu-soabã zoeesã, d modgdame n dat tɩ nebã tẽ d goamã. La Wẽnnaam mii tõnd sõma. Baa ne rẽ, mam tẽedame tɩ yãmb ned kam fãa sũur-kaset me mii tõnd sõma. 12 Pa tɩ tõnd rat n le pẽga d mens yãmb taoor ye. D kõta yãmb bũmb y sẽn tõe n tik n pẽg y mens tõnd yĩnga, tɩ y tõe n leok neb nins sẽn pẽgd b mens ne bũmb nins nin sẽn ne wã,+ la pa ne bũmb nins sẽn be sũurẽ wã. 13 Bala tõnd zutã sã n da lebgame,+ ra yaa Wẽnnaam yĩnga. Tõnd yamã sã n vẽename, yaa yãmb yĩnga. 14 Bala Kirist nonglmã n so tõndo. Ad bũmb ning tõnd sẽn bãngã: Rao a yembr n ki nebã fãa yĩnga.+ Rẽnd nebã fãa ra yaa kũum. 15 A kii nebã fãa yĩnga, sẽn na yɩl tɩ neb nins sẽn vɩ wã ra le vɩ b mens yĩnga,+ la b vɩ a soab ning sẽn ki bãmb yĩng n lebg n vʋʋgã yĩnga.

16 La masã tɛka, tõnd pa mi ned baa a ye wa sẽn zems ninsaal tagsg ye.+ Baa tõnd sã n da mii Kiristã wa sẽn zems ninsaal tagsgo, yaa vẽeneg tɩ tõnd pa le mi-a wa sẽn zems rẽ ye.+ 17 Woto wã, ned sã n be Kirist pʋgẽ, a yaa nin-paall Wẽnnaam sẽn naane.+ Ade! Bõn-kʋdã loogame tɩ bõn-paal ledge. 18 La bũmb fãa yita Wẽnnaam nengẽ. Yẽ n yaa soab ning sẽn maneg yell ning sẽn da be tõnd ne yẽ sʋkã, Kiristã maasem yĩnga.+ La Wẽnnaam mengã n kõ tõnd tʋʋmd sẽn na yɩl tɩ d sõng neb a taabã tɩ b maneg b yell ne yẽnda,+ 19 rat n yeel tɩ Kiristã maasem yĩnga, Wẽnnaam ra manegda yell ning sẽn be yẽ ne dũniyã sʋkã,+ n basd b beegrã taale.+ La a kõo tõnd koɛɛg sẽn yaa togs nebã tɩ b maneg b yell ne-a.+

20 Rẽnd tõnd yaa koe-taasdba,+ n deegd Kiristã zĩig+ n gomd tɩ yaa wa Wẽnnaam tũnugda ne tõnd n bõosd nebã. Tõnd sẽn deegd Kiristã zĩig n gomdã, d kota nebã n yetẽ: “Maneg-y y yellã ne Wẽnnaam.” 21 Wẽnnaam kɩtame tɩ soab ning sẽn da pa mi yel-wẽndã+ lebg yel-wẽnd* tõnd yĩnga, tɩ tõnd tõe n lebg tɩrs Wẽnnaam nifẽ nin-kãng maasem yĩnga.+

6 Tõnd sẽn yaa Wẽnnaam tʋmd-n-taasã yĩnga,+ d le sagenda yãmb tɩ y ra reeg Wẽnnaam barkã* zaalem yĩng ye.+ 2 Bala Wẽnnaam yetame: “Bark wakate, mam kelga foom. Mam sõnga foom fãagr daare.”+ Ade! Masã yaa bark wakat n yɩɩda. Ade! Masã yaa fãagr daare.

3 Tõnd pa maand baa fʋɩ sẽn tõe n wa ne ned lʋɩɩse, sẽn na yɩl tɩ ned ra wa paam bũmb n tik n sãbs tõnd tʋʋmdã ye.+ 4 La bũmb fãa pʋgẽ tõnd wilgdame tɩ d yaa Wẽnnaam tʋm-tʋmdba,+ ne d sẽn tõogd toog wʋsgã, ne toodo, ne yel-pakre, ne zu-loeese,+ 5 ne pãbre, ne bãens roog kõom,+ ne tẽn-dãmbgo, ne tʋʋm wʋsgo, ne yʋnd d sẽn pa n pa gũsi, ne rɩɩb kaalem,+ 6 ne pʋ-peelem, ne bãngre, ne sũ-mare,+ ne maan-neere,+ ne vʋʋsem sõngo, ne nonglem sẽn pa naag ne pʋ-lika,+ 7 ne goam sẽn yaa sɩda, ne Wẽnnaam pãnga,+ ne tɩrlem zab-teed+ sẽn be d nug-rɩtg* la d nug-goabg* maasem, 8 ne ziir la paoogr maasem, la ne wɩdg la pẽgr maasem. Nebã geta tõnd wa bɛlgdba, tɩ tõnd yaool n yaa sɩd rãmba. 9 B geta tõnd wa neb b sẽn pa mi, la Wẽnnaam mii tõndo. B geta tõnd wa neb sẽn ki la bala,* la tõnd yaa vɩɩse.+ B geta tõnd wa neb sẽn paam sɩbgre,* la b pa kʋ tõnd ye.+ 10 B geta tõnd wa neb sũy sẽn sãame, la tõnd kɩdemda sũ-noog wakat fãa. B geta tõnd wa naong rãmba, la tõnd kɩtdame tɩ neb wʋsg lebgd arzɛk rãmba. B geta tõnd wa neb sẽn pa tar baa fʋɩ, la tõnd tara bũmb fãa.+

11 Korẽnt neba, tõnd yaaga d noor n gom* ne yãmba. D paka d sũy yalenga. 12 Weer bee tõnd sũyã pʋsẽ yãmb nonglem yĩnga,+ la yãmb pa bas weer yãmb sũyã pʋsẽ tõnd nonglem yĩng ye. 13 Dẽ wã, mam gomda ne yãmb wa m sẽn gomd ne m kamba: Bɩ yãmb me pak y sũyã yalenga.+

14 Da bao-y lagem-n-taar* sẽn pa zems ne sẽn pa-b tẽedbã ye.+ Bala bõe zems-n-taar n be tɩrlem ne tʋʋm-wẽns sʋka?+ Wall bõe lageng n be vẽenem ne lik sʋka?+ 15 Sẽn paase, bõe zems-n-taar n be Kirist ne Belyall* sʋka?+ Wall bõe pʋɩɩr n be tẽed* ne ned sẽn pa tẽed sʋka?+ 16 La bõe zems-n-taar n be Wẽnnaam doogã ne bõn-naands sʋka?+ Bala tõnd yaa Wẽnnaam sẽn vɩ roogo,+ wa Wẽnnaam sẽn yeelã: “Mam na n zĩnda bãmb sʋka,+ la m kẽn b sʋka. Mam na n yɩɩ bãmb Wẽnnaam, tɩ bãmb me yɩ mam neba.”+ 17 “A Zeova* yetame: ‘Woto yĩnga, bɩ y yi bãmb sʋk la y lak y mense, la y ra le sɩɩs bõn-dẽgdã,’”+ “‘la mam na reeg yãmba.’”+ 18 “A Zeova* sẽn yaa Sẽn-tõe-a-fãa wã yetame: ‘La mam na n lebga yãmb ba,+ tɩ yãmb me lebg mam kom-dibli la m kom-pugli.’”+

7 Woto wã, m nin-nongdse, sẽn mik tɩ tõnd tara pʋlen-kãensa wã,+ bɩ d yɩlg d mens n yiis rẽgd buud fãa sẽn yaa yĩngã rẽnd la sɩɩgã rẽnda,+ n lebgd sõamyã n paasd Wẽnnaam zoeesã pʋgẽ.

2 Bao-y weer y sũyã pʋsẽ tõnd yĩnga.+ Tõnd pa beeg ned baa a ye, d pa sãam ned baa a ye, d pa wẽg ned baa a ye me ye.+ 3 Mam pa yet woto n na n ning yãmb taal ye. Bala mam zoe n yeelame tɩ yãmb bee tõnd sũyã pʋsẽ n na n naag tõnd n ki, la y naag tõnd n vɩɩmde. 4 Mam tõe n goma ne bas-m-yam wʋsg yãmb taoore. Mam tõe n zẽka m zug wʋsg yãmb yĩnga. Mam paama belsg wʋsgo. Mam sũur pida ne sũ-noog tõnd namsgã fãa pʋgẽ.+

5 Sɩd me, tõnd sẽn wa n ta Masedoannã,+ tõnd yĩnsã* pa paam yolsg baa bilf ye. La tõnd da ket n paamda namsg ne manesem buud fãa: Yɩng ra yaa zaba, tɩ pʋgẽ yaa rabeem. 6 La Wẽnnaam sẽn belsd sũ-sãang rãmbã+ belsa tõnd ne a Tɩt waoongã maasem. 7 La pa ne a waoongã bal ye. Yɩɩ ne belsg ning a sẽn paam yãmb yĩngã me. A lebg n wa togsa tõnd tɩ yãmb rat n yãa maam ne y sũy fãa, tɩ y sũy sãama wʋsgo, la tɩ yãmb tagsda mam yell wʋsgo,* tɩ rẽ maneg n paas m sũ-noogã.

8 Baa mam sã n sãama yãmb sũur ne m sebrã,+ mam pa maand m bãngẽ ye. Baa mam sã n da maand m bãngẽ sɩngrẽ wã, (mam sẽn yã tɩ sebrã sãamã yãmb sũyã, baa sẽn yɩ wakat bilf pʋgẽ wã) 9 mam maanda sũ-noog masã, la pa yãmb sũur sẽn sãamã yĩng ye. Yaa yãmb sũur sẽn sãam hal n kɩt tɩ y tek yam n kos sugrã yĩnga. Bala yãmb sũur sãama ne sũ-sãang sẽn zems ne Wẽnnaam daabã, sẽn na yɩl tɩ bũmb da paam yãmb tõnd yĩng ye. 10 Sũ-sãang ning sẽn zems ne Wẽnnaam daabã wata ne tek yam n kos sugri, tɩ rẽ wat ne fãagre, n pa kɩtdẽ tɩ ned maan a bãngẽ ye.+ La dũniyã sũ-sãangã wata ne kũum. 11 Ges-y yãmb sũ-sãangã sẽn zems ne Wẽnnaam daabã sẽn kɩt tɩ y modgã sẽn wa ne bũmb ninsi: A kɩtame tɩ yãmb yɩlg y mense, tɩ y sãam y sũuri, tɩ y zoe rabeem, tɩ y paam ratem-kãsenga, tɩ y paam yẽesem, la y rems yellã!+ Bũmb fãa pʋgẽ, yãmb wilgame tɩ y yaa yɩlem yel-kãngã pʋgẽ.* 12 Baa ne mam sẽn gʋls yãmbã, mam pa gʋls ned ning sẽn beegã yĩnga,+ wall ned ning a sẽn beegã yĩng ye. La yaa sẽn na yɩl tɩ yãmb sẽn modgd n na n kelg tõndã lebg vẽeneg yãmb sʋk Wẽnnaam taoore. 13 Yaa rẽ yĩng la tõnd sẽn paam belsgã.

La tõnd belsgã sẽn yãk a toogo, d maneg n kɩdma sũ-noog a Tɩt sũ-noogã yĩnga, bala yãmb fãa kenga a raoodo. 14 Mam sẽn pẽg yãmb yẽ taoorã, mam pa paam yãnd ye. La wa bũmb nins fãa tõnd sẽn yeel yãmbã sẽn yɩ sɩdã, tõnd sẽn pẽg yãmb a Tɩt taoorã me yɩɩ sɩda. 15 Sẽn paase, a sẽn tẽegd yãmb fãa sakrã,+ la yãmb sẽn deeg-a ne rabeem la rigbã kɩtame t’a sẽn nong yãmb to-to wã maneg n paam pãnga. 16 Mam kɩdemda sũ-noogo, mam sẽn tõe n kɩs yãmb sɩd* bũmb fãa pʋgẽ wã yĩnga.

8 Masã, m saam-biisi, tõnd datame tɩ y bãng Wẽnnaam barkã* a sẽn kõ Masedoan+ tigimsã. 2 Baa b sẽn paam toog nams-toaag sasa wã, b wilgame tɩ b tara sũ-noogo, la tɩ b yaa kõatb wʋsgo, baa b sẽn yaa naong rãmb wʋsgã. 3 Bala b kõome tɩ zems b paoongo.+ Mam mengã kõta kaset tɩ b pʋd n kõome tɩ yɩɩg b paoongã.+ 4 Bãmb mens n yãk yam n da bõosd tõnd ne b sũur fãa n dat n paam sor n kõ kũun ne yamleoogo, n naag n sõng nin-sõamyã wã.+ 5 La b maaname tɩ zʋʋg tõnd sẽn da tẽedã. Bala b reng n kõo b mens zãng n na n tʋm Zu-soabã tʋʋmdã la b sõng tõndo, wa sẽn zems Wẽnnaam daabã. 6 Rẽ n so tɩ tõnd keng a Tɩt+ raoodo, n yeel-a t’a sẽn sɩng tʋʋm-kãng yãmb sʋkã yĩnga, a segd n tigsa ligdã yãmb sẽn kõt ne yamleoogã n baase. 7 Baasgo, yãmb sẽn tar bũmb fãa wʋsgã, wala makre, tẽebo, gom-minim, bãngre, yẽesem, la y nong nebã wʋsg wa tõnd sẽn nong yãmbã, bɩ y wɩng ne kũunã y sẽn kõt ne yamleoogã.+

8 Mam pa yet woto n na n kõ yãmb noor ye. Yaa sẽn na n kɩt tɩ y bãng tɩ neb a taabã tara yẽesem, la sẽn na n mak yãmb nonglmã n ges a sã n yaa nonglem hakɩɩka. 9 Bala yãmb mii tõnd Zu-soab a Zeezi Kirist barkã.* Baa a sẽn da yaa arzɛk soabã, a lebga naong soab yãmb yĩnga,+ sẽn na yɩl tɩ yãmb tõe n lebg arzɛk rãmb a naongã maasem yĩnga.

10 La ad mam tagsg yel-kãng wɛɛngẽ:+ Rẽ yaa yãmb nafr yĩnga, bala yʋʋmd la woto yãmb sẽn sɩng ligdã tigsgu, la pa rẽ bal ye. Y wilgame me tɩ y tʋll n maana bõn-kãnga. 11 Dẽ wã, bɩ y baas bũmb ning yãmb sẽn sɩngã me, tɩ yãmb sẽn dat n tʋm ne y sũur fãa wã, bɩ y tõog n baas-a wa sẽn zems y paoongã. 12 Bala ned sã n dat n kõ kũun ne yamleoogo, kũunã tata Wẽnnaam yam, sẽn yɩɩd fãa a sã n kõ wa sẽn zems a sẽn tare,+ la pa wa sẽn zems a sẽn pa tar ye. 13 Bala mam pa rat n kɩt tɩ yɩ nana ne neb a taabã, tɩ yaool n yaa toog ne yãmb ye. 14 La yaa sẽn na yɩl tɩ yãmb sẽn paam tɩ sek n kell masã wã lek bãmb sãoogã, tɩ bãmb sẽn paam tɩ sek n kellã me wa lek yãmb sãoogã, tɩ zeng-taab zĩndi. 15 Yaa wa sẽn gʋlsã: “Ned ning sẽn da tar wʋsgã pa tar tɩ looge, la ned ning sẽn da tar bilfã, bũmb pa paoog-a ye.”+

16 Bark Wẽnnaam, a sẽn kɩt t’a Tɩt rat n sõng yãmb ne a sũur fãa wa tõndã yĩnga.+ 17 Bala a sɩd saka saglgã, la a sẽn dat n sõng yãmb ne a sũur fãa wã, yẽ meng n yãk yam n wat yãmb nengẽ. 18 La tõnd kɩtame tɩ saam-biig ning b sẽn pẽgd tigimsã fãa pʋsẽ koe-noogã wɛɛngẽ wã na n yãag-a. 19 La pa rẽ bal ye. Tigimsã yãk-a lame me t’a tũud tõnd n gilgdẽ, tɩ d get kũunã b sẽn kõt ne yamleoogã yelle. Tõnd geta kũunã yell Zu-soabã waoogr yĩnga, tɩ wilgdẽ me tɩ d rat n sõnga nebã ne d sũur fãa. 20 Dẽ, d pa kõt ned baa a ye bũmb a sẽn tõe n tik n ning-d taale, kũunã b sẽn kõ wʋsg tɩ d get a yellã+ wɛɛngẽ ye. 21 Bala tõnd ‘geta bũmb fãa yell ne pʋ-peelem, la pa a Zeova* nifẽ bal ye. Yaa nebã nifẽ me.’+

22 Sẽn paase, tõnd kɩtame tɩ d saam-biig ning d sẽn mak naoor wʋsg n mik t’a tʋmda sõma bũmb wʋsg pʋgẽ wã na n yãag-ba. La masã a tʋmda sõma n yɩɩd pĩndã, a sẽn kɩs yãmb sɩd wʋsgã yĩnga. 23 La yãmb sã n tar sogsg a Tɩt zugu, bɩ y bãng t’a yaa mam tũud-n-taaga,* la m tʋmd-n-taag yãmb sõngr yĩnga. Pa rẽ bɩ y sã n tar sogsg saam-biis nins sẽn be ne-a wã zugu, bɩ y bãng tɩ b yaa tigimsã tẽn-tʋmdba, la Kiristã ziiri. 24 Woto wã, bɩ y wilg saam-bi-kãensã tɩ y nong-b lame,+ la y wilg tigimsã bũmb ning sẽn kɩt tɩ tõnd zẽkd d zut yãmb yĩngã.

9 La sã n yaa ne tʋʋmd ning sẽn yaa nin-sõamyã wã sõngrã wɛɛngẽ,+ sɩd-sɩda, pa tɩlɛ tɩ mam gʋls n gom rẽ yell ne yãmb ye. 2 Bala mam miime tɩ yãmb dat n sõnga ne y sũy fãa, n zẽkd m zug rẽ yĩng Masedoan nebã taoore, n yetẽ tɩ Akayi nebã segl n saa na maan yʋʋmd masã. Yãmb yẽesmã kenga bãmb fãa la bal raoodo. 3 La mam tʋmda saam-biisã sẽn na yɩl tɩ tõnd sẽn zẽkd d zut yãmb yĩngã ra yɩ zaalem bõn-kãng wɛɛngẽ, la sẽn na yɩl tɩ yãmb sɩd segl n sa, wa mam sẽn yeel tɩ y na n seglame n sa wã. 4 Sã n pa rẽ, Masedoan nebã sã n tũ maam n wa, n mik tɩ yãmb pa segl n sa, yãnd na n yõka tõnd d sẽn kɩs yãmb sɩdã yĩnga. La yãmb me na n paama yãnde. 5 Rẽ n so tɩ mam tags tɩ yaa tɩlɛ tɩ m yeel saam-biisã tɩ b reng taoor n wa yãmb nengẽ, n segl kũunã yãmb sẽn pʋlmã n sa tɩ d nan pa wa ye. Dẽ, tõnd sã n wa wa, d na n mikame tɩ y segla kũunã n sa, tɩ wilg tɩ y kõo ne yamleoogo, la pa b sẽn modg-y tɩ y kõ yĩng ye.

6 La zĩ-kãng wɛɛngẽ, ned ning fãa sẽn bʋt bilf na n kẽeba bilfu, la ned ning fãa sẽn bʋt wʋsg na n kẽeba wʋsgo.+ 7 Bɩ ned kam fãa maan wa a sẽn tags a sũurẽ, la pa ne nen-gãneng* wall ne modgr ye.+ Bala Wẽnnaam nonga ned ning sẽn kõt ne sũ-noogo.+

8 Sẽn paase, Wẽnnaam tõe n kɩtame t’a barkã* fãa sig yãmb zut wʋsgo, tɩ bũmb fãa pʋgẽ bɩ y paamd tɩ sekd sõma wakat fãa, la y paamd bũmb wʋsg n tõog n tʋm tʋʋm-sõma buud fãa.+ 9 (Yaa wa sẽn gʋlsã: “A ra pʋɩta wʋsgo. A ra kõta naong rãmbã. A tɩrlmã paada wakat fãa.”+ 10 La Wẽnnaam sẽn kõt bʋt bõn-buud wʋsgo, la a kõt rɩɩb* rɩɩb yĩngã na n kõo yãmb bõn-buud tɩ y bʋde, la a kɩt tɩ bõn-buudã lebg wʋsgo. A na n sõnga yãmb tɩ y kẽeb y tɩrlem tʋʋmã bi-sõma wã wʋsgo.) 11 Bũmb fãa pʋgẽ, a kɩtdame tɩ yãmb lebg arzɛk rãmba, n tõe n kõt ne manesem buud fãa, tɩ rẽ wat ne Wẽnnaam bark pʋʋsg tõnd maasem yĩnga. 12 Bala tʋʋm-kãngã* pa sẽn na n sõng nin-sõamyã wã tɩ b paam bũmb nins sẽn yaa tɩlɛ ne-bã bal ye.+ La yaa sẽn na n kɩt tɩ neb wʋsg pʋʋs Wẽnnaam bark wʋsgo. 13 Kaset ning tʋʋm-kãngã* sẽn wat ne wã maasem yĩnga, b pẽgda Wẽnnaam, yãmb sẽn sakd Kirist koe-noogã wa yãmb sẽn moond nebã taoorã yĩnga, la yãmb sẽn kõ y kũunã ne yamleoog n na n sõng bãmb la nebã fãa wã yĩng me.+ 14 La b na n yõka Wẽnnaam sɛɛg yãmb yĩnga, n wilg tɩ b nonga yãmb wʋsgo, Wẽnnaam bark* sẽn ka to wã sẽn be yãmb zutã yĩnga.

15 Bark Wẽnnaam, a kũunã sẽn pa tõe n bãng n bilgã yĩnga.

10 La mam meng a Poll n kot yãmb ne Kiristã bʋgsmã la a sõmblmã,+ maam a ned ning yãmb neb kẽer sẽn yet t’a yaa nin-bʋgsg a sẽn wat n be ne yãmbã,+ n yaool n yaa dem-dem a sẽn wat n pa be ne yãmbã.+ 2 Mam kot-y lame tɩ y modg tɩ mam sã n wa wa, bɩ ra yɩ tɩlɛ tɩ m tall raood la m moog m nif wa m sẽn tagsdã ne neb kẽer sẽn get tõnd wa neb sẽn kẽnd wa sẽn zems yĩngã ratmã ye. 3 Baa tõnd sẽn kẽnd yĩngã pʋgẽ wã, d pa zabd zabr wa sẽn zems tõnd sẽn yaa bũmb ning yĩngã pʋgẽ wã ye. 4 Bala tõnd zabrã zab-teed pa yĩngã rẽnd ye.+ La b tara pãng Wẽnnaam maasem yĩnga,+ sẽn na yɩl n lub bũmb nins sẽn vigl kãn-kãe wã. 5 Tõnd lubda tagsa la bũmb ning fãa sẽn gɩdgd nebã tɩ b ra bãng Wẽnnaamã,+ la d tõogdẽ tɩ tagsa buud fãa sakd Kiristã. 6 Sẽn paase, tõnd seglame n sa n na n sɩbg ned ning fãa sẽn ket n kɩɩsdẽ,+ yãmb sakrã sã n wa pid bala.

7 Yãmb geta bũmb fãa wa sẽn zems nif gesgo. Ned sã n kɩs a meng sɩd n tẽed t’a yaa Kiristã rẽnda, bɩ a le tags bõn-kãngã zugu: Yẽ sẽn yaa Kiristã rẽnd to-to wã, tõnd me yaa woto. 8 Baa mam sã n pẽg m meng tɩ loog bilf ne tõog ning Zu-soabã sẽn kõ tõnd n na n keng yãmb raoodo, la pa sẽn na n koms y raoodã,+ yãnd pa na n yõk-m ye. 9 Mam pa rat tɩ yɩ wa mam dat n kẽesa yãmb rabeem ne m sɛbã ye. 10 Bala b yetame: “A sɛbã goam zɩsame n tar pãnga, la a mengã sã n wa be ne tõndo, a pa wõnd taoor soaba, a goamã me pa tar yõod ye.” 11 Bɩ nin-kãens buudã ning b yamẽ tɩ tõnd sẽn yet bũmb nins* d sɛbã pʋsẽ d sẽn wat n pa be ne yãmbã, d sã n wa be ne yãmb me, yaa rẽ la d na n maane.*+ 12 Bala d pa na n saag n dɩk d mens n tɩ naag ne neb kẽer sẽn pẽgd b mense,+ wall d mak d mens ne-b ye. La b sẽn tikd b mens noy zut n kaood b mens bʋʋdo, la b makd b mens ne b mensã, b yamã pa waoog ye.+

13 La tõnd pa na n yõsg tʋʋmd ning b sẽn kõ tõndã todsã n pẽg d mens ye. Yaa tõnd koe-moonegã zĩig Wẽnnaam sẽn mak n kõ tõndã* toadg pʋgẽ la d na n pẽg d mense. Wẽnnaam kɩtame tɩ zĩ-kãng ta hal yãmb nengẽ.+ 14 Sɩd-sɩda, tõnd sẽn wa yãmb nengẽ wã, d pa yõsg tõnd koe-moonegã zĩig b sẽn kõ tõndã todse, tɩ yaa wa tod-kãens pa ta yãmb ye. Bala tõnd n yɩ pipi n ta hal yãmb nengẽ n moon Kiristã koe-noogã.+ 15 Tõnd pa yõsgd tʋʋmd ning b sẽn kõ tõndã todsã n pẽgd d mens ne ned a to tʋʋmd ye. La tõnd saagdame tɩ yãmb tẽebã pãng sẽn paasdã, tʋʋmd ning tõnd sẽn tʋmã me na n paamda pãng tõnd koe-moonegã zĩigẽ. Woto, tõnd na n paama tʋʋm wʋsg n paase, 16 n yõsg yãmb tẽngã n tɩ moon koe-noogã tẽns a taab pʋsẽ, n da wa pẽg d mens ne bũmb b sẽn zoe n maan ned a to koe-mooneg zĩigẽ ye. 17 “La bɩ ned ning sẽn pẽgd a meng pẽg a meng a Zeova* yĩnga.”*+ 18 Bala pa ned ning sẽn pẽgd a mengã n tat a Zeova* yam ye.+ Yaa ned ning yẽ mengã sẽn pẽgdã.+

11 Mam nongẽ-la yãmb sẽn na n maan sũ-mar ne maam, baa sã n wõnd m yaa yalma. La sɩd-sɩda, yãmb maanda sũ-mar ne maam! 2 Bala mam maanda sũ-kiir yãmb yĩnga, sũ-kiir sẽn yit Wẽnnaam nengẽ,* mam sẽn dɩk yãmb n kõ rao a ye t’a na n wa kẽ kãadem ne yãmbã yĩnga, sẽn na yɩl tɩ m wa tõog n wilg yãmb Kiristã wa pa-kuil sẽn yaa yɩlemde.+ 3 La mam yɛɛsdame tɩ ne manesem ninga, b na n wa sãam yãmb yamã n kɩt tɩ y zãag ne pʋ-peelem la yɩlemd ning Kiristã sẽn segd ne wã,+ wa waafã sẽn belg a Awa ne a sɩlmã.+ 4 Bala ned sã n wa yãmb nengẽ n moond Zeezi a to sẽn pa soab ning tõnd sẽn moonã, wall y sã n deeg vʋʋsem sõng a to tɩ pa y sẽn zoe n deeg a soabã, pa rẽ bɩ koe-noog a to tɩ pa y sẽn sak a soabã,+ yãmb sakda nin-kãng nana-nana. 5 Bala mam tagsdame tɩ bũmb pa be n wilgdẽ tɩ mam pa ta yãmb tẽn-tʋmd-kãsemsã ye.+ 6 La baa mam sã n pa tar gom-minim,+ yaa vẽeneg tɩ m pa ned sẽn pa tar bãngr ye. Sɩd me, tõnd tũnuga ne manesem buud fãa la ne bũmb fãa n kɩt tɩ rẽ yɩ vẽeneg ne yãmba.

7 Bɩ mam maana yel-wẽnde, mam sẽn sik m meng sẽn na yɩl tɩ yãmb tõe n paam waoogre, m sẽn moon yãmb Wẽnnaam koe-noogã ne sũ-noog n pa reeg yaoodã yĩnga?+ 8 Mam pɩɩsa* tigims a taaba, mam sẽn deeg sõngr b nengẽ sẽn na yɩl n sõng yãmbã yĩnga.+ 9 La mam sẽn da be ne yãmb n wa rat sõngrã, mam pa lebg zɩɩb ne ned baa a yembr ye. Bala saam-biis nins sẽn yi Masedoan n wa wã kõo maam bũmb wʋsg tɩ seke.+ Sɩda, mam modga ne manesem buud fãa n pa lebg zɩɩb ne yãmba, la mam na n kell n maana woto.+ 10 Mam sã n ket n yaa Kirist karen-biig fãa, mam pa na n bas n pa pẽg m meng ne bõn-kãngã+ Akayi soolmã tõr pʋgẽ ye. 11 Bõe yĩnga? Yaa mam sẽn pa nong yãmb yĩng bɩ? Wẽnnaam miime tɩ mam nonga yãmba.

12 La m na n kell n maana bũmb ning m sẽn maandã,+ sẽn na yɩl tɩ neb nins sẽn baood bũmb n na n tik n wilg tɩ b zema tõnd bũmb nins* poorẽ b sẽn wukd b mensã ra paam bʋʋm ye. 13 Nin-kãens buudã yaa zirẽ-be-tẽn-tʋmdba. B zãmbda neb a taabã, la b maand wa b yaa Kirist tẽn-tʋmdba.+ 14 La rẽ pa lingr ye. Bala a Sʋɩtãan mengã maanda wa a yaa vẽenem malɛka.+ 15 Dẽnd a tʋm-tʋmdbã me sẽn maand wa b yaa tɩrlem tʋm-tʋmdbã pa lingr ye. La b baasgã na n yɩɩ wa sẽn zems b tʋʋmã.+

16 Mam le yetame: Bɩ ned baa a ye ra tags tɩ mam yaa yalem ye. La baa yãmb sã n tagsd woto, bɩ y sak maam wa ned sẽn yaa yalma, sẽn na yɩl tɩ ma-me tõog n pẽg m meng bilfu. 17 Mam sẽn yet bũmb ning masã wã, pa Zu-soabã togs-n-taar la m dɩkd ye. La mam gomda wa ned sẽn yaa yalem sẽn teeg a meng n pẽgd a menga. 18 Sẽn mik tɩ neb wʋsg pẽgda b mens wa sẽn zems yĩngã yellã,* ma-me na n pẽga m menga. 19 Sẽn mik tɩ yãmb “tara yam” wʋsgã, yãmb maanda sũ-mar ne yalembã ne sũ-noogo. 20 Sɩd-sɩda, yãmb maanda sũ-mar ne ned ning fãa sẽn kẽesd yãmb yembd pʋgẽ, ned ning fãa sẽn dɩt yãmb paoongo, ned ning fãa sẽn fãad bũmb nins y sẽn tare, ned ning fãa sẽn zẽkd a meng la a paoogd yãmba, la ned ning fãa sẽn pãbd yãmb pɛgse.

21 Mam yeta woto tõnd paoogr yĩnga, bala wõnda tõnd tʋma pãn-komsem pʋgẽ.

La neb a taab sã n tʋmda ne raoodo, (mam gomda wa yalma) ma-me tʋmda ne raoodo. 22 B yaa Ebre-rãmb bɩ? Ma-me yaa Ebre.+ B yaa Israyɛll neb bɩ? Ma-me yaa Israyɛll neda. B yaa a Abrahaam yagens bɩ? Ma-me yaa a Abrahaam yagenga.+ 23 B yaa Kirist tʋm-tʋmdb bɩ? Mam leokda wa gãeenga. Mam wilga ne manesem-kãsems tɩ m yaa Kirist tʋm-tʋmd n yɩɩd bãmba: Mam tʋmame n yɩɩg bãmba.+ B paga maam bãens roog naoor wʋsg n yɩɩg bãmba.+ B pãba maam naoor ka tɛka. Mam kolga kũum naoor wʋsgo.+ 24 Naoor a nu, Zʋɩf-rãmbã pãba maam ne kalwaas a ye ka pis-naase.*+ 25 Naoor a tãab la b pãb maam ne rasaba.+ Vugri, b loba maam kuga.+ Naoor a tãab la koom-kogend sãam tɩ mam be b pʋsẽ.+ Mam paa mogrẽ wĩndg la yʋng tõre. 26 Mam toga sor naoor wʋsgo. Mam paama zu-loees kʋɩls zutu. Mam paama zu-loees fãadb nusẽ. Mam paama zu-loees mam meng buudã neb nusẽ.+ Mam paama zu-loees bu-zẽmsã neb nusẽ.+ Mam paama zu-loees galʋ-tẽngã pʋgẽ.+ Mam paama zu-loees we-raoogẽ wã. Mam paama zu-loees mogrã zugu. Mam paama zu-loees zirẽ-be-saam-biisã sʋka. 27 Mam tʋma wʋsg n kaag m neng tʋʋlgo. Yʋnd wʋsgo, mam pa gũs ye.+ Kom la ko-yũud yõka maam.+ Rɩɩb paooga maam naoor wʋsgo.+ Waood yõka maam, la fut paooga maam.*

28 Bõn-kãensã toor sẽn ka be, bũmb n be n namsd maam daar fãa: Yaa mam sẽn maand yɩɩr tigimsã fãa yĩngã.+ 29 Ãnda pãng n boog tɩ mam pãng pa booge? Ãnda n lak n lʋɩ tɩ m sũur pa yiki?

30 Mam sã n segd n pẽg m menga, m na n pẽga m meng ne bũmb nins sẽn wilgd mam pãn-komsmã. 31 Zu-soab a Zeezi Wẽnnaamã sẽn yaa a Ba me wã, Soab ning sẽn segd ne pẽgr wakat fãa wã miime tɩ mam pa yagd ziri ye. 32 Damaase, guvɛrneerã sẽn da rɩt naam rĩm a Areta yʋʋr yĩngã kɩtame tɩ gũudb gũ tẽngã rignoy sẽn na yɩl n yõk maam. 33 La saam-biisã sagla maam peoog pʋgẽ, n tũnug tẽngã lalgã võor a ye n siki,+ tɩ mam põs a nusẽ.

12 Mam segd n pẽga m menga. Baa sẽn pa tar yõodã, m na n togsa yãmb vẽnegr toor-toor Zu-soabã sẽn vẽneg maam,+ la koees sẽn yit a nengẽ. 2 Mam mii rao sẽn be Kirist pʋgẽ. Yʋʋm piig la a naas sẽn looge, b tall-a lame n ta hal saas a tãab-n-soabã. A sã n da bee yĩngã pʋgẽ wall a sã n da pa be yĩngã pʋgẽ me, mam pa mi ye. La Wẽnnaam miime. 3 N-ye, mam mii ned a woto buudu. A sã n da bee yĩngã pʋgẽ wall a sã n da pa be yĩngã pʋgẽ me, mam pa mi ye. La Wẽnnaam miime. 4 B tall-a lame n ta hal arzãnã pʋgẽ, la a wʋma goam ninsaal sẽn pa tõe n togse, la b sẽn pa kõ ninsaal sor t’a togse. 5 Mam na n pẽga m meng ned a woto buud yĩnga, la m pa na n pẽg m meng mam mengã yĩnga, tɩ sã n pa mam pãn-komsmã yĩng bala. 6 La baa mam sã n dat n pẽg m menga, pa na n yɩ yalemd ye. Bala mam na n togsda sɩda. La mam yõkda m meng n pa maand woto, tɩ ned ra wa tags tɩ mam maana bũmb sẽn yɩɩd a sẽn ne tɩ mam maandẽ, wall a sẽn wʋmd tɩ mam yetẽ, 7 mam sẽn paam vẽneg-kãensã sẽn yaa kãsemsã yĩngã bal ye.

Sẽn na yɩl tɩ mam da wa zẽk m meng tɩ looge, b kõo maam gõaag yĩngã pʋgẽ,+ sẽn yaa a Sʋɩtãan malɛk t’a pãbd maam pɛgse,* tɩ m da wa zẽk m meng tɩ loog ye. 8 Rẽ wɛɛngẽ, mam kosa Zu-soabã naoor a tãab t’a kɩt t’a loog n bas maam. 9 La a yeela maam yaa: “Mam barkã* seka foom, bala yaa pãn-komsem pʋgẽ la fo paamd mam pãngã tɩ pidi.”+ Dẽnd yaa ne sũ-noog wʋsg la m na n pẽg m meng m pãn-komsmã yĩnga, tɩ Kirist pãngã zĩnd mam zug wa fu-roogo. 10 Dẽnd Kiristã yĩnga, mam maanda sũ-noog pãn-komsem pʋgẽ, tʋy pʋsẽ, yel-pakr pʋgẽ, namsg la zu-loees pʋsẽ. Bala yaa mam sẽn wat n ka pãng sasa la m tar pãng wʋsgo.+

11 Mam lebga yalma. Yãmb n modg maam tɩ m lebg woto, sẽn yaa yãmb n da tog n pẽg maamã yĩnga. Bala bũmb pa be n wilgdẽ tɩ mam pa ta yãmb tẽn-tʋmd-kãsemsã, baa mam sã n pa zem baa fʋɩ.+ 12 Sɩd me, mam wilga yãmb bũmb nins sẽn wilgd tɩ mam yaa tẽn-tʋmdã ne sũ-mare,+ ne bãn maanego, ne yel-soalem la ne tʋʋm-kãsemse.+ 13 Zĩ-bʋg wɛɛngẽ la yãmb pa ta tigims a taabã, tɩ sã n pa mam mengã sẽn pa lebg zɩɩb ne yãmbã?+ Kõ-y maam sugr beeg-kãngã yĩnga.

14 Ade! Naoor a tãab-n-soab la woto mam sẽn segl n sa n na n wa yãmb nengẽ, la m pa na n lebg zɩɩb ye. Pa yãmb paoongã la m baood ye.+ Yaa yãmb mensã. Bala pa kambã+ n segd n bao n bĩng b roagdbã ye. Yaa roagdbã n segd n bao n bĩng b kambã. 15 Sã n yaa ne maam, mam na n kõo bũmb fãa ne sũ-noog wʋsgo, la m kõ m mengã zãng yãmb* yĩnga.+ Mam sã n nonga yãmb wʋsg woto, zemsame tɩ yãmb nong maam tɩ pa ta mam sẽn nong yãmbã sɩda? 16 La sẽn yaa a soab fãa, mam pa lebg zɩɩb ne yãmb ye.+ Baasgo, yãmb yetame tɩ mam yɩɩ “sɩlem soaba,” la tɩ mam “maana zãmb” n yõk yãmba. 17 Mam pa tũnug ne neb nins m sẽn tʋm yãmb nengẽ wã ned baa a ye n wẽg yãmb ye. Bɩ bõe? 18 Mam kosa a Tɩt t’a wa yãmb nengẽ, la m tʋm saam-biigã t’a yãag-a. A Tɩt wẽga yãmb baa bilf sɩda?+ Tõnd wilgame tɩ d tara yam a yembre. Bɩ bõe? Tõnd manesmã pa yɩ yembr sɩda?

19 Hal daar zãra, yãmb tagsdame tɩ tõnd gomda ne yãmb n na n wilg tɩ d tara bʋʋm la? Yaa Wẽnnaam taoor la tõnd gomd Kirist pʋgẽ. La m nin-nongdse, tõnd sẽn maandã fãa yaa sẽn na n keng yãmb raoodo. 20 Bala mam yɛɛsdame tɩ mam sã n wa wa, m na mik tɩ yãmb pa wa mam sẽn datã, tɩ yãmb me mik tɩ mam pa wa yãmb sẽn datã ye. Mam yɛɛsda m na wa n mik tɩ zaba, sũ-kiiri, sũ-puugri, no-koɛɛma, munaafɩglem, kãnegre,* wuk-m-meng la zũnd-zãnd beẽ. 21 Tõe tɩ mam sã n le wa wa, mam Wẽnnaamã na ning maam yãnd yãmb taoore, tɩ mam sũur sãam ne neb nins sẽn da maan yel-wẽn pĩndã, n pa tek yam n kos sugr b tʋʋm-dẽgdã, b yoobã,* la b nin-yoolem* tʋʋmã b sẽn da tʋmdã yĩnga.

13 Woto n yaa naoor a tãab-n-soab mam sẽn wat yãmb nengẽ. “Bũmb fãa segd n yɩɩ vẽeneg ne neb a yiib bɩ a tãab kaseto.”*+ 2 Baa mam sẽn pa be ne yãmb masã wã, yaa wa mam da bee ne yãmb naoor a yiib-n-soaba. Mam deng n keoogda neb nins sẽn da maan yel-wẽnã, la neb a taabã fãa tɩ m sã n le wa, m pa na n bas b baa a yembre, 3 yãmb sẽn baood kaset sẽn wilgd tɩ Kirist sẽn pa pãn-komsem soab ne yãmbã, la sẽn tar pãng yãmb sʋkã sɩd tũnugda ne maam n gomdã yĩnga. 4 La sɩd me, b kʋ-a-la ra-lukã zug pãn-komsem yĩnga, la a vɩɩ Wẽnnaam pãngã maasem yĩnga.+ Sɩda, tõnd me naaga yẽ n yaa pãn-komsem dãmba, la d na n naag-a lame n vɩɩmd+ Wẽnnaam pãngã sẽn be yãmb zutã maasem yĩnga.+

5 Bɩ y feesd y mens n get y sã n bee tẽebã pʋgẽ. Makd-y y mens n get y sẽn yaa neb nins buudu.+ Bɩ yãmb pa mi t’a Zeezi Kirist bee yãmb pʋsẽ? Sã n pa mikame tɩ yãmb pa taa Wẽnnaam yam. 6 Mam saagda ne m sũur fãa tɩ yãmb na n sak n deegame tɩ tõnd pa neb sẽn pa tat Wẽnnaam yam ye.

7 La tõnd pʋʋsda Wẽnnaam tɩ yãmb da maan bũmb sẽn yaa kɛgr ye. Pa sẽn na n wilg tɩ tõnd tata neb a taabã yam ye. La tõnd datame tɩ yãmb maan sẽn yaa sõma, baa sã n wõnd tõnd pa tat neb a taabã yam. 8 Bala tõnd pa tõe n maan sɩdã wẽnga, sã n pa d sõng sɩdã bala. 9 Sɩd-sɩda, tõnd sã n wa ka pãng tɩ yãmb tar pãng wʋsgo, d maanda sũ-noogo. La ad bũmb ning tõnd sẽn pʋʋsd n kotẽ wã: Yaa tɩ yãmb na paam remsgo. 10 Yaa rẽ yĩng la mam sẽn gʋls bõn-kãensã mam sẽn ka be ne yãmbã wakate, sẽn na yɩl tɩ mam sã n wa be ne yãmba, bɩ m da tall tõog ning Zu-soabã sẽn kõ maamã n tʋm ne toolem ye.+ Bala a pa kõ maam tõogã tɩ m koms y raood ye. Yaa sẽn na n keng y raoodo.

11 Sẽn na n baase, m saam-biisi, bɩ y kell n kɩdem sũ-noogo, la y bas tɩ b rems yãmba, la b bels yãmba.+ Kell-y n tall-y yam a yembre,+ la y zĩnd ne laafɩ.+ Woto, nonglem la laafɩ Wẽnnaamã+ na n zĩnda ne yãmba. 12 Pʋʋs-y taab ne pʋ-peelem mokre. 13 Nin-sõamyã wã fãa toonda yãmb b pʋʋsem.

14 Bɩ Zu-soab a Zeezi Kirist barkã,* la Wẽnnaam nonglmã n paas vʋʋsem sõngã y sẽn naag taab n dɩt a yõodã zĩnd ne yãmb fãa.