SEBR B SẼN TOOL EBRE-RÃMBÃ

1 Hal daar zãra, Wẽnnaam tũnuga ne no-rɛɛsdbã n gom ne tõnd yaab-rãmbã naoor wʋsgo, la ne manesem wʋsgo.+ 2 La tõnd wakatã,* a goma ne tõnd ne a Bi-riblã maasem.+ Yaa soab ning a sẽn yãk t’a na n wa soog bũmb fãa,+ la a sẽn tũnug ne a soab n maan zãmaan toɛy-toɛyã.*+ 3 A yaa Wẽnnaam ziirã wõnego,+ la a yaa wa Wẽnnaam kɛpɩ. Yẽ zãada bũmb fãa ne a goamã sẽn tar pãng wʋsgã maasem. A sẽn yɩlg tõnd n yiis d yel-wẽnã poore,+ a tɩ zĩnda Wẽnnaam sẽn yaa kãsengã nug-rɩtg saasẽ.+ 4 Woto, yẽ yɩɩda malɛgsã,+ bala a paama yʋʋr sẽn yɩɩd malɛgsã yʋyã hal zĩig sẽn zãre.+

5 Wala makre, malɛg-bʋg la Wẽnnaam zoe n yeele: “Fo yaa mam bi-ribla. Rũndã, mam lebga fo ba”?+ La a le yeele: “Mam na n lebga a ba, la yẽ na n lebga mam biiga”?+ 6 La Wẽnnaam sẽn wa n kɩt t’a Bi-kãsengã+ le wa tẽngã zugã, a yeelame: “La bɩ Wẽnnaam malɛgsã fãa wõgemd a taoore.”

7 Sẽn paase, a goma malɛgsã yell n yeele: “A maana a malɛgsã tɩ b yaa vʋʋsem, la a maan a tʋm-tʋmdbã+ tɩ b yaa wa bug-witim.”+ 8 La a goma Bi-riblã yell n yeele: “Wẽnnaam yaa fo geer+ wakat sẽn kõn sa yĩnga, la fo Rĩungã rasaarã yaa tɩrlem dasaare. 9 Fo nonga tɩrlem, la f kis tʋʋm-wẽnse. Yaa rẽ yĩng la Wẽnnaam sẽn yaa fo Wẽnnaamã sẽn zae foo+ ne sũ-noog kaam n yɩɩd f tũud-n-taasã.”+ 10 Wẽnnaam gomdã le yeelame: “M Zu-soaba, hal sɩngrẽ wã yãmb yẽbga tẽngã, la saasã yaa yãmb nus tʋʋma. 11 B na n sãamame, la yãmb na n kell n paame. Bãmb fãa na n kʋdga wa fuugu. 12 Yãmb na n põda bãmb wa kobre, la b na n toeem-b-la wa fuugu. La yãmb pa tol n toeemdẽ ye. Yãmb yʋʋmã pa na n tall tɛk a bada.”+

13 La malɛg-bʋg la Wẽnnaam zoe n yeele: “Zĩnd mam nug-rɩtgo, n tãag m sẽn na n dɩgl f bɛɛbã wa nao-roagendg fo naoã yĩnga”?+ 14 Malɛgsã fãa pa vʋʋsem sẽn tʋmd Wẽnnaam tʋʋm la?+ Pa bãmb la Wẽnnaam yeel tɩ b sõng sẽn na n wa paam-b fãagrã la?

2 Rẽ n so tɩ yaa tɩlɛ ne-d tɩ d tags bũmb nins d sẽn wʋmã yell neer n yɩɩg raasenkamã,+ n da wa bʋdg n bas tẽebã a bada.+ 2 Bala goam nins malɛgs+ sẽn togsã sã n pa toeeme, tɩ tõdgr bɩ kɩɩsg buud fãa paam sɩbgr wa sẽn zems tɩrlmã,+ 3 tõnd sã n paooga fãagr sẽn yaa kãseng woto fãa, d na n yɩɩ wãn n põse?+ Bala yaa tõnd Zu-soabã n sɩng fãag-kãng yell goama,+ tɩ neb nins sẽn wʋm a goamã wilg tõnd tɩ yaa sɩda, 4 tɩ Wẽnnaam mengã naag n kõ kaset ne bãn toɛy-toɛya, ne yel-soalem la ne tʋʋm-kãsems+ maasem, n paas ne vʋʋsem sõngã a sẽn pʋɩ wa sẽn zems a raabã+ maasem.

5 Bala pa malɛgs la Wẽnnaam kɩt tɩ b na n soog dũni ning sẽn watã,+ rat n yeel tɩ dũni ning yell tõnd sẽn gomdã ye. 6 La ned a ye n kõ kaset zĩig a yembr n yeele: “Ninsaal yaa bõe tɩ y tẽr a yelle, wall ãdem-biig yaa bõe tɩ yãmb get a yelle?+ 7 Yãmb naan-a lame tɩ kellẽ bilf t’a zem malɛgsã. Yãmb kõ-a-la ziir la waoogre, la y kɩt t’a soog yãmb nug tʋʋmã. 8 Yãmb ninga bũmb fãa a naoã tẽngre.”+ Wẽnnaam sẽn ning bũmb fãa a naoã tẽngrã,+ a pa bas baa fʋɩ n pa ning a naoã tẽngr ye.+ Baasgo, tõnd nan pa ne tɩ Wẽnnaam ninga bũmb fãa a naoã tẽngr ye.+ 9 La d nee a Zeezi sẽn yaa soab ning Wẽnnaam sẽn da maan t’a pa ta malɛgsã sõma+ wã sẽn paam ziir la waoogre, bala a namsa hal n ki+ sẽn na yɩl tɩ Wẽnnaam barkã* maasem yĩnga, a lemb kũum ned buud fãa yĩnga.+

10 Bala ra zemsame tɩ bũmb fãa sẽn be a soab yĩngã, rat n yeel tɩ bũmb fãa sẽn be a soab maasem yĩngã kɩt tɩ kom-kãens fãagrã Naab+ zems zãng namsg toɛy-toɛy maasem yĩnga,+ a sẽn dat tɩ kamb wʋsg paam ziirã+ yĩnga. 11 Bala soab ning sẽn kɩtd tɩ neb lebgd sõamyã ne sẽn lebg-b sõamyã+ fãa yita ba-yɛng pʋgẽ,+ la yaa rẽ n so t’a pa zoet yãnd ne a bool-b t’a ba-biisi,+ 12 n yeele: “Mam na n moona m saam-biisã yãmb yʋʋrã. Mam na n pẽga yãmb tigingã pʋgẽ ne yɩɩla.”+ 13 La a le yeele: “Mam na n teeg-a lame.”+ La a paase: “Ade! Maam ne kom-bõoneg nins a Zeova* sẽn kõ maamã.”+

14 Woto wã, sẽn mik tɩ “kom-bõonegã” yaa zɩɩm la yĩn-nemsã, a me lebga zɩɩm la yĩn-nemse,+ sẽn na yɩl t’a kũumã maasem yĩnga, bɩ a kɩt tɩ soab ning sẽn tar tõog n wat ne kũumã,+ rat n yeel tɩ Sʋɩtãanã*+ lebg zaalem, 15 la a kɩt me tɩ neb nins fãa sẽn da be yembd pʋgẽ b vɩɩmã tõr b sẽn zoet kũum yĩngã paam b mense.+ 16 Bala sɩd-sɩda, pa malɛgs la a sõngd ye. Yaa a Abrahaam yagensã.+ 17 Woto wã, ra yaa tɩlɛ t’a lebg wa a “ba-biisã” bũmb fãa pʋgẽ,+ n tõog n lebg maan-kʋʋdb kãsem sẽn tʋmd Wẽnnaam tʋʋmã ne nimbãan-zoeer la ne sakre, sẽn na yɩl n kõ a vɩɩmã tɩ yɩ maoong+ ninsaalbã yel-wẽnã yĩnga,+ la a kɩt tɩ b tõe n maneg b yell ne Wẽnnaam.* 18 Yẽ mengã sẽn paam namsg a sẽn wa n be makr pʋgẽ wã+ yĩngã, a tõe n sõnga neb nins sẽn be makr pʋgẽ wã.+

3 Woto yĩnga, m saam-biis sẽn yaa nin-sõamyã sẽn paam saasẽ boollã,+ ges-y soab ning sẽn yaa tẽn-tʋmd la maan-kʋʋdb kãsem tõnd sẽn wilg tɩ d tẽedame wã, rat n yeel t’a Zeezi.+ 2 A maana sɩd ne Wẽnnaam sẽn yaa soab ning sẽn yãk-a wã,+ wa a Moyiiz me sẽn maan sɩd Wẽnnaam doogã fãa pʋgẽ wã.+ 3 A* toga ne ziir n yɩɩd+ a Moyiizi, bala sẽn met-a roog tara ziir n yɩɩd roogã mengã. 4 Sɩd me, roog fãa yaa ned n me, la sẽn naan-a bũmb fãa wã yaa Wẽnnaam. 5 A Moyiiz yɩɩ tʋm-tʋmd sẽn maan sɩd Wẽnnaam doogã fãa pʋgẽ, tɩ rẽ yaa bũmb nins b sẽn da na n wa gom b yellã kaseto. 6 La Kiristã sẽn yaa Wẽnnaam biigã maana sɩd+ a Ba wã roogã yell gesg pʋgẽ. Sɩd-sɩda, tõnd sã n kell n gom ne raoodo, la d gãd bũmb nins d sẽn saagd n na n wa paam tɩ kõt-d sũ-noogã kãn-kãe hal n tãag saabã, d yaa Wẽnnaam doogo.+

7 Yaa wa vʋʋsem sõngã sẽn yeelã:+ “Rũndã, yãmb sã n wʋm a koɛɛgã, 8 bɩ y ra riglem y sũyã wa y yaab-rãmbã sẽn maan n yik a sũur wʋsgo, wa b sẽn mak-a we-raoogẽ wã ye.+ 9 Baa yãmb yaab-rãmbã sẽn yã mam tʋʋmã yʋʋm pis-naas pʋgẽ wã, b baas n maka maam.+ 10 Yaa rẽ n so tɩ mam yamã yi zãmaan-kãng nebã, tɩ m yeele: ‘B sũy lakd n basda maam wakat fãa. B pa bãng mam soayã ye.’ 11 Woto wã, mam wẽena m sũ-puugrã pʋgẽ n yeel yaa: ‘B pa na n kẽ mam vʋʋsgã pʋgẽ ye.’”+

12 M saam-biisi, bɩ y gũus y mens tɩ yãmb sʋkã ned baa a ye sũur ra lebg wẽng n wa kɩt t’a pa tall tẽebo, n zãag a meng ne Wẽnnaam ning sẽn vɩ wã ye.+ 13 La bɩ y kell n keng taab raood daar fãa, wakat ning fãa b sẽn ket n tõe n bool tɩ “Rũndã,”+ sẽn na yɩl tɩ yel-wẽndã pãng sẽn yaa belgrã ra wa kɩt tɩ yãmb ned baa a ye sũur riglem ye. 14 Bala tõnd sɩd yaa Kirist pʋɩt-n-taase, la yaa d sẽn na n kell n gãd bũmb nins d sẽn kɩs sɩd sɩngrẽ wã kãn-kãe n tãag saabã.+ 15 Yaa wa b sẽn yeelã: “Rũndã, yãmb sã n wʋm a koɛɛgã, bɩ y ra riglem y sũyã wa y yaab-rãmbã sẽn maan n yik a sũur wʋsgã ye.”+

16 Bala yaa ãnd dãmb la sẽn wʋme, n baas n mak-a n yik a sũur wʋsgã? Sɩd-sɩda, pa neb nins fãa a Moyiiz sẽn tall n yi Ezɩptã sɩda?+ 17 Sẽn paase, yaa ãnd dãmb la Wẽnnaam yamã sẽn yi yʋʋm pis-naas pʋgẽ wã?+ Pa neb nins sẽn maan yel-wẽna, b rãmb nins kũ-rãmb sẽn pa we-raoogẽ wã sɩda?+ 18 La yaa ãnd dãmb la Wẽnnaam sẽn wẽen n yeel tɩ b pa na n kẽ a vʋʋsgã pʋgẽ wã? Pa neb nins sẽn yɩ kɩɩsdbã sɩda? 19 Woto wã, tõnd yãame tɩ b pa tõog n kẽ Wẽnnaam vʋʋsgã pʋgẽ, b sẽn pa tall tẽebã yĩnga.+

4 Woto wã, Wẽnnaam sẽn pʋlem n yeel tɩ d ket n tõe n kẽe a vʋʋsgã pʋgẽ wã yĩnga, bɩ d gũus d mens n da wa kong a sẽn pʋlmã ye.+ 2 Bala tõnd me paamame tɩ b moon tõnd koe-noogã+ wa d yaab-rãmbã. La goam nins b sẽn wʋmã pa naf-b ye. Bala b ra pa tar neb nins sẽn kelgã tẽebã buud ye. 3 La tõnd a neb nins sẽn tall tẽebã kẽe vʋʋsgã pʋgẽ wa a sẽn yeelã: “Woto wã, mam wẽena m sũ-puugrã pʋgẽ n yeel yaa: ‘B pa na n kẽ mam vʋʋsgã pʋgẽ ye.’”+ A yeela woto baa a tʋʋmã sẽn sa hal dũniyã yẽbgr wakatã.+ 4 Bala a goma rasem a yopoe-n-soabã yell zĩig a yembre, n yeele: “La Wẽnnaam vʋʋsa ne a tʋʋmã fãa rasem a yopoe-n-soabã daare.”+ 5 Ka me a yeelame: “B pa na n kẽ mam vʋʋsgã pʋgẽ ye.”+

6 Woto yĩnga, sẽn mik tɩ neb kẽer n ket n tõe n kẽ vʋʋsgã pʋgẽ, la sẽn mik tɩ b sẽn deng n moon b rãmb koe-noogã pa kẽ vʋʋsgã pʋgẽ b kɩɩsgã yĩngã,+ 7 Wẽnnaam le yãka daare, a sẽn yeel a Davɩɩd yɩɩll a ye pʋgẽ kaoosg zugẽ tɩ “rũndã” wa m sẽn zoe n yeel yĩngrã: “Rũndã, yãmb sã n wʋm a koɛɛgã, bɩ y ra riglim y sũyã ye.”+ 8 Bala a Zozuwe+ sã n da tall-b n kẽ vʋʋsg zĩigẽ, Wẽnnaam ra pa na n le gom daar a to yell ye. 9 Dẽnd vʋʋsg daar n ket n be Wẽnnaam nebã yĩnga.+ 10 Bala ned ning sẽn kẽ Wẽnnaam vʋʋsgã pʋgẽ vʋʋsa ne a tʋʋmã, wa Wẽnnaam me sẽn vʋʋs ne a tʋʋmã.+

11 Woto wã, bɩ y modg y pãng tɛk n kẽ vʋʋs-kãng pʋgẽ, tɩ ned baa a ye ra wa lʋɩ kɩɩs-kãng buudã pʋgẽ ye.+ 12 Bala Wẽnnaam gomdã vɩɩme, la a tara pãnga.+ A rɩtame n yɩɩd sʋʋg buud fãa sẽn tar noy a yiibu,+ n kẽed hal n welgd sɩɩg* ne vʋʋsem* la kõb-sugds ne sɩɩlem, la a tõe n bãng sũurã tagsa la a tʋlsem toor-toorã n welge. 13 Bõn-naandg pa be sẽn solg Wẽnnaam nifẽ ye.+ Bũmb fãa yaa bɛɛl la vẽenese, soab ning sẽn na n bʋ tõnd wa sẽn zems d tʋʋmã nifẽ.+

14 Dẽnd, sẽn mik tɩ tõnd tara maan-kʋʋdb kãsem sẽn ka to sẽn dʋ saasẽ wã, rat n yeel t’a Zeezi sẽn yaa Wẽnnaam Bi-riblã,+ bɩ d ket n wilgd nebã taoor tɩ d tẽed-a lame.+ 15 Bala pa maan-kʋʋdb kãsem sẽn pa tõe n kʋm tõnd d pãn-komsmã+ pʋgẽ la tõnd tar ye. D tara maan-kʋʋdb kãsem sẽn paam makr bũmb fãa pʋgẽ wa tõndo, n yaool n pa tar yel-wẽnd ye.+ 16 Rẽ wã yĩnga, bɩ d kolg Wẽnnaam bark* geerã n pʋʋs-a ne bas-m-yam,+ n paam nimbãan-zoeer la bark* sẽn na n sõng-d d sẽn wat n dat sõngr wakate.

5 Bala b sã n yãk maan-kʋʋdb kãsem ninsaalbã sʋka, b yãk-a lame t’a na n tʋm Wẽnnaam tʋʋmdã ninsaalbã sõngr yĩnga,+ sẽn na yɩl t’a kõt Wẽnnaam kũun la maand yel-wẽnã yĩnga.+ 2 A tõe n kʋma* neb nins sẽn maand yel-wẽn zɩɩlem pʋgẽ wã,* bala yẽ me yaa pãn-komsem soaba. 3 Yaa rẽ yĩng la a sẽn segd n kõt maand yẽ meng yel-wẽnã yĩnga, wa a sẽn kõt maand nebã yel-wẽnã yĩng me wã.+

4 Ned pa tõe n lebg maan-kʋʋdb kãsem a toor ye. Yaa Wẽnnaam bal n tõe n yãk-a t’a lebg maan-kʋʋdb kãsma, wa a sẽn da yãk a Aarõ wã.+ 5 Woto me, pa Kiristã n waoog a meng a toor+ n lebg maan-kʋʋdb kãsem ye. Yaa soab ning sẽn yeel-a tɩ “Fo yaa mam bi-ribla. Rũndã, mam lebga fo ba”+ wã n waoog-a. 6 Yaa wa a sẽn yeel zĩig a to me wã: “Fo yaa maan-kʋʋd wakat fãa yĩng wa a Melkisedɛke.”+

7 Kirist sẽn wa n be tẽngã zugã, a yõka soab ning sẽn da tõe n fãag-a ne kũumã sɛɛga, la a kos sõngr ne kelems la nintãm,+ la Wẽnnaam reega a kosgã a wẽn-zoeerã yĩnga. 8 Baa a sẽn da yaa Wẽnnaam bi-riblã, a zãmsa sakr namsg ning a sẽn paamã maasem yĩnga.+ 9 La a sẽn zems zãngã poore,+ a lebga soab ning sẽn wat ne fãagr sẽn ka sɛt neb nins fãa sẽn sakd-a wã yĩnga,+ 10 bala Wẽnnaam yãk-a lame t’a yaa maan-kʋʋdb kãsem wa a Melkisedɛke.+

11 Tõnd tara bũmb wʋsg n na n yeel a zugu, la b bilgrã yaa toogo, bala yãmb lebga neb sẽn pa wʋmd bũmb võor tao-tao. 12 Baa yãmb sẽn da segd n yɩ karen-saam-dãmb masã wã,* yãmb le ratame tɩ ned sɩng sɩngrẽ wã n zãms yãmb Wẽnnaam koeesã pipi yɛlã.+ Yãmb le lebga neb sẽn dat bĩisim, la pa rɩɩb sẽn yaa taok ye. 13 Bala ned ning fãa sẽn ket n yũud bĩisim pa mi tɩrlem goamã, a sẽn yaa bi-bilfã yĩnga.+ 14 La rɩɩb sẽn yaa taokã yaa neb nins sẽn bɩ wã yĩnga, rat n yeel tɩ neb nins sẽn minim n tagsdẽ tɩ kɩt tɩ b mi sõma ne wẽng n bakã.

6 Woto wã, tõnd sẽn loog bũmb nins d sẽn zãms pipi+ Kirist zug masã wã, bɩ d modg n bɩ,+ la d ra le yẽbg yẽbgr yɛsa, rat n yeel tɩ n le baood n na n wʋm tek yam n bas tʋʋm nins sẽn ka barkã sẽn dat n yɛɛlga, tẽeb ne Wẽnnaam, 2 lisg toɛy-toɛyã zãmsgo, nus tikri,+ kũum vʋʋgr+ la bʋ-kaoor sẽn pa toeemdã* sẽn dat n yɛɛlg ye. 3 Wẽnnaam sã n sɩd sake, d na n modg n lebga neb sẽn bɩ.

4 La neb nins sẽn zoe n paam vẽnegre,+ sẽn lemb saasẽ kũunã b sẽn kõt zaalmã, sẽn naag n paam vʋʋsem sõngã, 5 la sẽn lemb Wẽnnaam gomdã sẽn yaa sõma wã ne dũni* ning sẽn watã pãensã 6 n baas n lʋɩ wã,+ ned pa tõe n kɩt tɩ b le tek yam n kos sugr ye. Bala nin-kãens le kaada Wẽnnaam Bi-riblã ra-lukã zug yɛsa, n ningd-a yãnd nebã taoore.+ 7 Bala tẽn-gãongã sã n yũud saagã sẽn niid naoor wʋsgã koom, a paamda bark sẽn yit Wẽnnaam nengẽ, tɩ kood yit a zug n womd tɩ nafd neb nins yĩng b sẽn kood-a wã. 8 La sã n yaa gõos la mood bal n yit a zugu, b raagd-a lame n base. Pa na n kaoos la b kãab-a wẽng ye. B wat n baas n yõog-a-la bugum.

9 La yãmb nengẽ wã, m nin-nongdse, baa tõnd sẽn gomd woto wã, tõnd kɩsa sɩd tɩ yãmb sãoo neb nins sẽn lʋɩ wã, la tɩ yãmb maanda bũmb toor-toor sẽn kɩt tɩ Wẽnnaam tõe n fãag yãmba. 10 Bala Wẽnnaam yaa tɩrlem soaba, n pa na n yĩm yãmb tʋʋmdã ne y sẽn wilg tɩ y nonga a yʋʋrã,+ y sẽn sõng nin-sõamyã wã la y ket n sõngd-bã ye. 11 La tõnd datame tɩ yãmb ned kam fãa kell n tall yẽesem ning a sẽn da tar hal sɩngrẽ wã, n tõog n kɩs sɩd ne bũmb nins a sẽn saagd n na n wa paamã+ n tãag saabã.+ 12 Rẽ la y pa na n lebg kʋɩɩmb ye.+ Y na n dɩka neb nins sẽn tall tẽeb la b maan sũ-mar n paam pʋlemsã togs-n-taare.

13 Bala Wẽnnaam sẽn wa n na n pʋlem a Abrahaam a pʋlengã, sẽn yɩɩd yẽ sẽn kae wã yĩnga, a wẽena ne a meng+ 14 n yeele: “Hakɩɩka, mam na n ninga foo barka, la m kɩt tɩ f yagensã lebg wʋsgo.”+ 15 Woto, a Abrahaam sẽn maan sũ-marã poore, a paama pʋlen-kãnga. 16 Ninsaalbã wẽenda ne sẽn yaa kãseng n yɩɩd bãmba. La b wẽenegã kɩtdame tɩ no-koeemd buud fãa sa, bala wilgdame tɩ bũmb ning b sẽn yeelã yaa sɩda.+ 17 Woto me, Wẽnnaam sẽn wa n yãk yam n na n wilg neb nins sẽn paam pʋlengã+ vẽeneg t’a raabã* pa toeemdã, a wẽename n wilg tɩ pʋlengã yaa sɩda. 18 Yaa sẽn na yɩl tɩ ne bũmb a yiib sẽn pa toeemd maasem, tõnd a neb nins sẽn zoe n tɩ soond Wẽnnaam nengẽ wã tõe n paam raood kengr sõma, n gãd bũmb ning d sẽn saagd n na n wa paamã kãn-kãe. Wẽnnaam pa tõe n yag ziri+ bõn-kãens a yiibã wɛɛngẽ ye. 19 Tõnd sẽn saagd n na n wa paam bũmb ningã+ yaa wa baar* tõnd sɩɩsã* yĩnga, sẽn vigl kãn-kãe la sẽn pa vigsdi, la sẽn kẽed hal n tãag fu-lilldgã poore,+ 20 zĩig ning a Zeezi+ sẽn deng taoor n tɩ kẽ tõnd yĩngã. A lebga maan-kʋʋdb kãsem wa a Melkisedɛk wakat fãa yĩnga.+

7 Bala Melkisedɛk-kãng sẽn da yaa Salɛm rĩm la Wẽnnaam sẽn ka to wã maan-kʋʋdã sega a Abrahaam, a sẽn wa n tɩ kʋ rĩm-dãmbã n lebgdẽ wã n ning-a barka,+ 2 t’a Abrahaam yãk piig-pʋɩɩr bũmb fãa zug n kõ-a. Pipi, a yʋʋrã rat n yeelame tɩ “Tɩrlem rĩma,” la sẽn paase, a yaa Salɛm rĩma, rat n yeel tɩ “Laafɩ rĩma.” 3 A sẽn pa tar ba la a pa tar ma wã, n paas a sẽn pa tar yaab-rãmb roog me wã, tɩ ned pa mi a rogem daar wall a kũum daarã, la Wẽnnaam sẽn maan t’a lebg wa a Bi-riblã, a yaa maan-kʋʋd wakat fãa yĩnga.+

4 Ges-y ra-kãngã d yaab a Abrahaam sẽn yãk bõn-sõma nins a sẽn zab n deegã piig-pʋɩɩrã n kõ wã+ sẽn yaa kãseng to-to. 5 Sɩd-sɩda, Tõogã kõo a Levi yagens+ nins sẽn lebgd maan-kʋʋdbã noor tɩ b reegd piig-pʋɩɩr nin-buiidã nengẽ,+ rat n yeel tɩ b ba-biisã nengẽ, baa nin-kãens sẽn yaa a Abrahaam yagensã. 6 La ra-kãngã sẽn pa Levi buudã nedã reega piig-pʋɩɩr a Abrahaam nengẽ, la a ning sẽn da paam-a pʋlemsã barka.+ 7 Sãmbg sẽn kae, yaa sẽn yɩɩd-a wã n ningd sẽn pa ta-a yẽ wã barka. 8 Pipi wã, yaa neb sẽn yaa kiidb n deegd piig-pʋɩɩrã, la yiib-n-soabã, yaa ned b sẽn kõ kaset t’a vɩɩme n deegd piig-pʋɩɩrã.+ 9 La d tõe n yeelame t’a Levi meng sẽn deegd piig-pʋɩɩrã kõo piig-pʋɩɩr a Abrahaam maasem yĩnga, 10 bala a ra ket n bee a yaabã pendẽ* wakat ning a Melkisedɛk sẽn seg-a wã.+

11 La Levi buudã maan-kʋʋrã+ sã n da tõe n kɩt tɩ ned zems zãnga, (maan-kʋʋr-kãng ra naaga Tõog ning b sẽn da kõ nin-buiidã) bõe yĩng tɩ b ra na n le rat tɩ maan-kʋʋd a to wa, maan-kʋʋd b sẽn yet t’a yaa wa a Melkisedɛk+ la pa wa a Aarõ? 12 Maan-kʋʋrã sẽn toeemdã yĩnga, lebga tɩlɛ tɩ b toeem Tõogã me.+ 13 Bala rao ning yell b sẽn gom n togs bõn-kãensa wã yita buud a to pʋgẽ. Bu-kãng ned baa a ye pa tʋm tẽn-kugrẽ wã ye.+ 14 Yaa vẽeneg tɩ tõnd Zu-soabã yita Zida buudã pʋgẽ,+ la a Moyiiz pa wilg tɩ maan-kʋʋdb n na n yi bu-kãng pʋgẽ ye.

15 Rẽ maneg n lebga vẽeneg wakat ning maan-kʋʋd a to+ sẽn yaa wa a Melkisedɛkã+ sẽn wa wã. 16 A lebga maan-kʋʋda, la pa tũ ne a sẽn yit buud ning pʋgẽ wa Tõogã sẽn datã ye. Tũu ne vɩɩm sẽn ka sãamd pãnga.+ 17 Bala b kõo yẽ kaset n yeele: “Fo yaa maan-kʋʋd wakat fãa yĩng wa a Melkisedɛke.”+

18 Rẽnd b lebsa pipi noorã kɛɛnga, a sẽn ka pãng la a sẽn pa tar yõodã yĩnga.+ 19 Bala Tõogã pa kɩtd tɩ baa fʋɩ zems zãng ye.+ La bũmb ning Wẽnnaam sẽn wat ne wã yaa sõma n yɩɩda,+ la yaa rẽ la tõnd saagd n na n wa paame. Bõn-kãng kɩtdame tɩ bũmb fãa zems zãnga, la bõn-kãng maasem yĩnga, tõnd pẽnegda Wẽnnaam.+ 20 Sẽn paase, maan-kʋʋd-kãng pa wa tɩ pa tũ ne wẽeneg ye. 21 (Sɩd me, neb n lebg maan-kʋʋdb tɩ pa tũ ne wẽeneg ye. La yãoã soabã lebga maan-kʋʋd wẽeneg maasem yĩnga, wẽeneg Wẽnnaam sẽn wẽen n yeel-a yaa: “A Zeova* wẽename, la a pa na n toeem yam* ye: ‘Fo yaa maan-kʋʋd wakat fãa yĩnga.’”)+ 22 Rẽnd a Zeezi lebga kaset sẽn wilgd tɩ kaool sẽn yaa sõma n yɩɩd n na n pidsi.+ 23 Sẽn paase, ra yaa tɩlɛ tɩ neb wʋsg lebgd maan-kʋʋdb n pʋgend taaba,+ kũumã sẽn da kɩt tɩ b pa tõe n kell n yɩ maan-kʋʋdbã yĩnga. 24 La a Zeezi sẽn vɩ wakat fãa wã yĩnga,+ ned pa na n ledg-a n yɩ maan-kʋʋd ye. 25 Rẽnd a tõeeme me n fãag neb nins sẽn kolgd Wẽnnaam a maasem yĩngã zãng-zãnga. Bala a vɩɩ wakat fãa n na n yõk Wẽnnaam sɛɛg b yĩnga.+

26 Yaa maan-kʋʋdb kãsem a woto buud n tog ne tõndo. Maan-kʋʋdb kãsem sẽn maand sɩda, sẽn pa tar yelle, sẽn pa tar rẽoko,+ sẽn welg toor ne yel-wẽn-maandbã, la b sẽn zẽk n zʋʋg saasã.+ 27 A pa wa maan-kʋʋdb kãsem-dãmb a taabã sẽn segd n kõt maand daar fãa,+ pipi b mens yel-wẽn yĩnga, tɩ rẽ poor bɩ b kõ maoong nin-buiidã yel-wẽn yĩngã ye.+ Bala a maana rẽ vugr wakat fãa yĩnga, a sẽn wa n kõ a meng tɩ yɩ maoongã.+ 28 Tõogã yãkda rap sẽn yaa pãn-komsem dãmb tɩ b lebgd maan-kʋʋdb kãsem-dãmba.+ La gomd ning b sẽn wẽen n togs+ Tõogã loogr poorã yãka Bi-ribla, b sẽn kɩt t’a zems zãng+ wakat fãa yĩnga.

8 La bũmb nins yell tõnd sẽn gomdã sʋka, ad bũmb ning sẽn tar pãng n yɩɩdã: Tõnd tara maan-kʋʋdb kãsem a woto buudu,+ la a zĩnda Wẽnnaam sẽn yaa kãsengã geerã nug-rɩtg saasẽ,+ 2 n yaa zĩ-sõng sẽn yɩɩdã+ la fu-roog sɩd-sɩdã tʋm-tʋmda, fu-roog ning a Zeova* sẽn tilgi, la sẽn pa ninsaal n tilgã. 3 B sã n yãk maan-kʋʋdb kãsem fãa, yaa sẽn na yɩl t’a kõt kũun la maando. Rẽnd ra yaa tɩlɛ tɩ yẽ me paam bũmb a sẽn na n kõ.+ 4 A sã n da be tẽngã zugu, a ra pa na n yɩ maan-kʋʋda,+ sẽn mik tɩ rap sẽn kõt kũun wa sẽn zems Tõogã zoe n beeme wã yĩnga. 5 Wẽnnaam tʋʋmd ning nin-kãens sẽn tʋmdã yaa saasẽ bũmb toor-toor+ wõnego, la b maasem.+ Bala a Moyiiz sẽn wa n na n tilg fu-roogã, Wẽnnaam yeel-a lame: “Gũus neer n maan bũmb fãa wa sẽn zems b sẽn wilg foom tãngã zugã.”+ 6 La masã, a Zeezi paama tʋʋmd sẽn yaa sõma wʋsg n yɩɩda, a sẽn yaa kaool sẽn yaa sõma n yɩɩdã+ se-yõkd+ me wã yĩnga. Kaool-kãng zemsa ne tõogã, n le vigl pʋlems nins sẽn yaa sõma n yɩɩdã zut kãn-kãe.+

7 Pipi kaoolã sã n da zemsa zãnga, b ra pa na n dat kaool a yiib-n-soab ye.+ 8 Bala Wẽnnaam yãame tɩ nin-buiidã tara taale. Rẽ n so tɩ Gʋls-sõamyã yeele: “A Zeova* yeelame: ‘Ade! Wakat n wat tɩ mam na n maan kaool-paalg ne Israyɛll buudã la ne Zida buudã.’ 9 A Zeova* le yeelame: ‘Pa na n yɩ wa kaool ning mam sẽn da maan ne b yaab-rãmbã, daar ning mam sẽn gãd b nug n tall-b n yi Ezɩpt soolmẽ wã+ ye. B sẽn pa kell n pa mam kaoolã pʋgẽ wã yĩnga, mam basa b yell gesgo.’

10 “A Zeova* yeelame yaa: ‘Ad kaool ning mam sẽn na n maan ne Israyɛll buudã wakat kãng loogr poorã: Mam na n ninga m noyã b yamẽ wã, la m gʋls-b b sũyã pʋsẽ.+ Mam na n lebga b Wẽnnaam, tɩ bãmb lebg mam nin-buiidu.+

11 “La b ned baa a ye pa na n le zãms a tẽng-n-bi-taag la a ba-biig n yeel t’a ‘bao n bãng a Zeova’* ye! Bala b fãa na n bãnga maam, sẽn sɩng ne sẽn yaa-a bilf n yɩɩd bãmb sʋkã, n tãag sẽn yaa-a kãseng n yɩɩdã. 12 Bala mam na n basa b tʋʋm-wẽnsã taale, la m pa na n le tẽeg b yel-wẽnã yell yɛs ye.”+

13 A sẽn gom “kaool-paalg” yellã, a kɩtame tɩ pĩnd soabã lebg kʋdre.+ La bũmb ning sẽn yaa kʋdr la sẽn kʋʋndã kolga menengo.

9 La sã n yaa ne pĩnd kaoolã, a ra tara noy Wẽnnaam tũubã wɛɛngẽ, la a tar a zĩ-sõng+ tẽngã zugu. 2 Bala b ra tilga fu-roogã t’a tar pʋs a yiibu. Pipi ro-pʋgẽ wã, fɩtl-doagendg+ la taabl ne bur b sẽn dɩk n kõ Wẽnnaam*+ n da be be. B boonda ro-pʋ-kãng tɩ Zĩ-sõngã.+ 3 La fu-lilldg+ a yiib-n-soabã poore, ro-pʋg n da be be tɩ b boond-a tɩ Zĩ-sõng sẽn yɩɩdã.+ 4 Ro-pʋ-kãng pʋgẽ, wisd yõogr laag sẽn maan ne sãnem+ n da be be, n paas kaoolã koglg+ b sẽn bolg a tõrã ne sãnemã.+ Yʋʋr sẽn maan ne sãnem tɩ mann+ be a pʋgẽ, ne a Aarõ rasaarã sẽn da tob n ning puudã,+ n paas kaoolã kug-walsã+ n da be kaoolã koglg pʋgẽ. 5 Seribẽ-rãmb sẽn tar ziir n da be kaoolã koglg zugu, tɩ b maasmã buiid sugr kũun zĩigã.*+ La masã pa wakat d sẽn na n gom bõn-kãens yell ball-ball ye.

6 B sẽn maan bõn-kãensã woto wã poore, maan-kʋʋdbã kẽeda fu-roogã pipi ro-pʋgẽ wã wakat fãa n tʋmd Wẽnnaam tʋʋmã.+ 7 La maan-kʋʋdb kãsmã a ye tãa n kẽed vugr yʋʋmd fãa ro-pʋg a yiib-n-soabã pʋgẽ.+ La a pa kẽed t’a pa zã zɩɩm ye.+ Yaa zɩɩm a sẽn kõt yẽ mengã yĩnga,+ la yel-wẽn nins nin-buiidã+ sẽn maan zɩɩlem pʋgẽ wã yĩng me. 8 Woto, vʋʋsem sõngã wilgda vẽeneg tɩ pipi fu-roogã sã n ket n yasẽ fãa, zĩ-sõng sẽn yɩɩdã sor nan pa pak ye.+ 9 Fu-ro-kãng yaa bũmb nins sẽn be masã wã mamsgo,+ la wa sẽn zems yɛlã sẽn sigl to-to wã, b kõta kũun la maando.+ La bõn-kãensã pa tõe n kɩt tɩ ned ning sẽn tʋmd Wẽnnaam tʋʋmdã sũur-kaset* zems zãng ye.+ 10 B tara loees bal ne rɩbdo, ne bõn-yũudi la ne lisg toɛy-toɛya.+ B ra yaa noy b sẽn kõ yĩngã yɛl wɛɛngẽ,+ tɩ nebã ra segd n tũ n tãag yɛlã manegr wakate.

11 La Kirist sẽn wa n wa n yaa bõn-sõma nins sẽn zoe n maanã maan-kʋʋdb kãsmã, a kẽe fu-roog ning sẽn yaa kãseng n yɩɩd la sẽn zems zãng n yɩɩdã pʋgẽ. Fu-ro-kãng pa ninsaalb nus n tilgi, rat n yeel t’a pa be tẽngã zug ka ye. 12 A kẽe zĩ-sõng sẽn yɩɩdã pʋgẽ, la pa ne boees la nag-poal zɩɩm ye. A kẽe ne a mengã zɩɩm+ vugr wakat fãa yĩnga, la a fãaga tõnd wakat sẽn kõn sa yĩnga.+ 13 Bala boeesã ne lolsã zɩɩm+ la nag-sadgã* tompɛglem b sẽn mesd neb nins sẽn dẽgmã zut sã n yɩlgd-b tɩ b yĩnsã lebgd yɩlma,+ 14 Kiristã+ sẽn pa tar rẽokã sẽn dɩk a meng n kõ Wẽnnaam ne vʋʋsem sõng sẽn ka sɛtã maasem yĩngã, a zɩɩmã kõn yɩlg tõnd sũur-kasetã ne tʋʋm nins sẽn ka barkã n yɩɩda,+ sẽn na yɩl tɩ d tõog n sak Wẽnnaam ning sẽn vɩ wã ne d sũur fãa sɩda?+

15 Yaa rẽ yĩng la a sẽn yaa kaool-paalg se-yõkda,+ bala a kiime n yao yaoodo,+ sẽn na yɩl tɩ sẽn paam-b boollã tõog n paam b mens ne yel-wẽn nins b sẽn maan pĩnd kaoolã pʋgẽ wã, la b paam pʋɩɩr sẽn ka sɛtã pʋlengã.+ 16 Zĩig ning kaool sẽn be, yaa tɩlɛ tɩ ned ning sẽn maan kaoolã ki, 17 sẽn yaa kũum n kɩtd tɩ kaool viglã yĩnga. Bala ned ning sẽn maan kaoolã sã n ket n vɩ, kaoolã pa tar pãng ye. 18 Woto me, pĩnd kaoolã pa sɩng tɩ pa tũ ne zɩɩm ye. 19 Bala a Moyiiz sẽn wa n togs nin-buiidã fãa Tõogã noy fãa n sa wã, a rɩka nag-poalã ne boeesã zɩɩm, n paas koom ne peen-miuug b sẽn maan ne rũms kõbdo, la izop raoogo, n mes sebrã* la a mes nin-buiidã fãa, 20 la a yetẽ: “Woto yaa kaool ning Wẽnnaam sẽn kõ yãmb noor tɩ y tũ wã zɩɩm.”+ 21 A yãka zɩɩmã n mes fu-roogã ne teed nins fãa b sẽn tar n tʋmd Wẽnnaam tʋʋmdã me.+ 22 Sɩd-sɩda, sã n yaa ne sẽn zems Tõogã, b yɩlgda bũmb fãa la bal ne zɩɩm,+ la zɩɩm sã n pa raage, sugr kae ye.+

23 Rẽnd ra yaa tɩlɛ tɩ bũmb nins sẽn yaa saasẽ bũmb toor-toor wõnegã+ paam yɩlgr ne rũmsã maand maasem,+ la saasẽ bũmb toor-toorã yɩlgr rata maand sẽn yaa sõma n yɩɩd rũmsã maand hal zĩig sẽn zãre. 24 Bala Kiristã pa kẽ zĩ-sõng sẽn yɩɩd sẽn yaa ninsaalb nus n me,+ sẽn yaa zĩ-sõng meng-mengã mamsgã pʋgẽ ye. A kẽe saasẽ meng+ sẽn na yɩl n yals Wẽnnaam taoor* masã tõnd yĩnga.+ 25 A pa maan dẽ n na n dɩkd a meng n kõt n yɩlemdẽ, wa maan-kʋʋdb kãsmã sẽn kẽed zĩ-sõng sẽn yɩɩdã pʋgẽ yʋʋmd-yʋʋmde,+ ne zɩɩm sẽn pa yẽ meng rẽndã ye. 26 Sã n da yaa woto, a ra na n namsa naoor wʋsg sẽn sɩng dũniyã yẽbgr wakate. La masã, a vẽnega a meng vugr wakat fãa yĩng dũniyã* saabã wakate, n na n yiis yel-wẽnã ne a meng maoongã maasem.+ 27 Ned buud fãa kiida vugr wakat fãa yĩnga, tɩ rẽ poor bɩ b kao a bʋʋdo. 28 Woto me, Kiristã kõo a meng vugr wakat fãa yĩng sẽn na yɩl n tʋk neb wʋsg yel-wẽna.+ La a sã n wa na n vẽneg a meng naoor a yiib-n-soaba, pa na n yɩ yel-wẽnd yiisg yĩng ye. A na n vẽnega a meng ne neb nins sẽn gũud-a ne b sũy fãa t’a wa fãag-bã.+

10 Bala Tõogã sẽn tar bõn-sõma nins sẽn watã maasem+ tɩ pa bõn-kãens meng-mengã yĩnga, a* pa tol n tõe n tũnug ne maand nins b sẽn kõt yʋʋmd-yʋʋmd fãa n pa vaandẽ wã n kɩt tɩ neb nins sẽn kolgd Wẽnnaamã zems zãng ye.+ 2 Sã n da pa rẽ, woto tɩ b ra pa bas maandã kũun sɩda? Bala neb nins sẽn sakd Wẽnnaam ne b sũy fãa wã sã n da paam yɩlgr vugri, b ra pa na n le ningd b mens taal yel-wẽnã poorẽ ye. 3 La maan-kãens ra tẽegda nebã yel-wẽnã yell yʋʋmd-yʋʋmde,+ 4 bala lolsã ne boeesã zɩɩm pa tõe n yiis yel-wẽnã ye.

5 Dẽ, Kiristã sẽn wa n wa dũniyã pʋgẽ wã a yeelame: “‘Yãmb da pa rat maand la kũuni, la yãmb segla yĩng n kõ maam. 6 Yãmb pa reeg maand sẽn yõogd bugum la yel-wẽnd maand ye.’+ 7 Rẽ poore, mam yeelame: ‘Ade! Mam Wẽnnaam, mam waame n na n maan yãmb daabo. (Seb-pindmã pʋgẽ, b gʋlsame n gom mam yelle.)’”+ 8 Pipi, a yeelame: “Yãmb ra pa rat la y pa reeg maand la kũuni, n paas maand sẽn yõogd bugum la yel-wẽnd maand ye.” Yaa maan-kãensã la nebã sẽn da kõt wa sẽn zems Tõogã. 9 Rẽ poore, a yeelame: “Ade! Mam waame n na n maan yãmb daabo.”+ A menesa pipi soabã, sẽn na yɩl n vigl yiib-n-soabã. 10 Yaa ne ‘raab-kãng’+ la b kɩt tɩ tõnd lebg sõamyã, a Zeezi Kirist sẽn kõ a yĩngã vugr wakat fãa yĩngã maasem yĩnga.+

11 Sẽn paase, maan-kʋʋd fãa bee a tʋʋmd zĩigẽ daar ne a to fãa sẽn na yɩl n tʋm Wẽnnaam tʋʋmdã.+ A kõta maand nins a sẽn kõtã n yɩlemdẽ,+ la maan-kãens pa tol n tõe n yiis yel-wẽnã zãng-zãng ye.+ 12 La Kiristã kõo maoong a yembr yel-wẽnã yĩng wakat fãa yĩnga, la a tɩ zĩnd Wẽnnaam nug-rɩtgo.+ 13 Rẽ tɛka, a gũuda wakat ning Wẽnnaam sẽn na n dɩgl a bɛɛbã wa nao-roagendg a naoã yĩngã.+ 14 Bala yaa ne maoong a ye a sẽn kõ maasem yĩng la a kɩt tɩ neb nins sẽn lebgd sõamyã zems zãng+ wakat fãa yĩnga. 15 Sẽn paase, vʋʋsem sõngã wilga tõnd tɩ rẽ yaa sɩda, bala a reng n yeelame: 16 “A Zeova* yeelame yaa: ‘Ad kaool ning mam sẽn na n maan ne bãmb wakat kãng loogr poorã: Mam na n ninga m noyã b yamẽ wã, la m gʋls-b b sũyã pʋsẽ.’”+ 17 Rẽ poore, vʋʋsem sõngã le yeelame: “Mam pa na n le tẽeg b yel-wẽnã ne b tʋʋm-wẽnsã yell yɛs ye.”+ 18 La zĩig ning b sẽn bas bõn-kãensã taalã, pa le yaa tɩlɛ tɩ b maan maoong yel-wẽnã yĩng ye.

19 Woto wã, m saam-biisi, sẽn mik tɩ tõnd tara raood* n na n tũ sor ning sẽn dabd zĩ-sõng sẽn yɩɩdã+ pʋgẽ a Zeezi zɩɩmã maasem yĩngã, 20 sor a sẽn pak tõnd yĩnga, tɩ yaa so-paalg la sor sẽn tar n dabd vɩɩm zĩigẽ la sẽn pasgd fu-lilldgã,+ rat n yeel t’a yĩn-nemsã, 21 la sẽn mik tɩ tõnd tara maan-kʋʋd-kãseng sẽn get Wẽnnaam zakã rãmb yellã,+ 22 bɩ d kolg Wẽnnaam ne sũur sẽn pid ne pʋ-peelem la ne tẽeb zãnga, b sẽn mes tõnd sũyã ne zɩɩm tɩ d paam d mens ne sũur-kaset* sẽn yaa wẽngã,+ la b sẽn pek d yĩnsã ne koom sẽn yaa yɩlemdã yĩnga.+ 23 Bɩ d wɩng ne tõnd saagrã mooneg n da yɛɛs ye.+ Bala soab ning sẽn pʋlmã yaa sɩd soaba. 24 La bɩ d tẽegd taab yelle,* sẽn na yɩl n sõng taab* tɩ d bɩɩs nonglem la d tʋm tʋʋm-sõma.+ 25 Bɩ d ra bas taab tiging+ wa neb kẽer sẽn minim n maandẽ wã ye. La bɩ d kengd taab raoodo,+ sẽn yɩɩd fãa, d sẽn ne tɩ daarã* kolgdame wã yĩnga.+

26 Bala tõnd sã n paam bãngr hakɩɩk sɩdã zugu,+ la d maand yel-wẽn ne yamleoog rẽ poore, maoong baa a ye pa le be yel-wẽnã yĩng ye.+ 27 Sẽn ket yaa sɩbgr gũub ne rabeem, la sũ-puugr sẽn dɩt wa bugum, n na n dɩ neb nins sẽn kɩɩsdã.+ 28 Ned sã n da kɩɩs a Moyiiz Tõogã tɩ neb a yiib bɩ a tãab kõ kaseto, b kʋʋda a soabã n pa zoe a nimbãaneg ye.+ 29 Yãmb pa tagsd tɩ ned sẽn tab Wẽnnaam Bi-riblã, la sẽn ges tɩ kaoolã zɩɩmã+ b sẽn tall n kɩt t’a lebg sõngã yõod pa waooge, la sẽn paoog Wẽnnaam barkã* vʋʋsem sõngã sɩbgr na yɩ kãseng n yɩɩg sɩda?+ 30 Bala tõnd mii Soab ning sẽn yeele: “Sũ-dokr yaa maam n so. Maam n na n keo.” La a le yeele: “A Zeova* na n kaoo a nin-buiidã bʋʋdo.”+ 31 Wẽnnaam ning sẽn vɩ wã nugẽ lʋɩɩs yaa bũmb sẽn sek rabeem.

32 La bɩ y ket n tẽegd wakat ning sẽn loogã yelle. Yãmb sẽn paam vẽnegrã poore,+ yãmb tõoga toog n zab zabr sẽn yaa kãseng namsg wʋsg pʋgẽ. 33 Wakat kẽere, b paooga yãmb la b nams yãmb nebã taoore, la wakat sãnda, yãmb naaga neb nins b sẽn da namsd woto wã n namse. 34 Bala yãmb zoee neb nins sẽn be bãens roogẽ wã nimbãanega, la y sak ne sũ-noog tɩ b zɛ yãmb paoongo,+ n miẽ tɩ yãmb tara paoong sẽn yaa sõma n yɩɩd la sẽn kaoosde.+

35 Woto wã, bɩ y kell n gom ne raoodo, rẽ keoorã sẽn na n yɩ kãsengã yĩnga.+ 36 Bala yãmb segd n tõoga toogo,+ sẽn na yɩl tɩ y sã n maan Wẽnnaam daabã n sa, bɩ y paam pʋlengã pidsgu. 37 Bala “keta bilf bala,”+ la “soab ning sẽn watã na n waame. A waoongã pa na n kaoos ye.”+ 38 “La mam nin-tɩrg na n vɩɩmda tẽeb yĩnga,”+ la “a sã n targ n leb poorẽ, mam* sũur pa noom ne-a ye.”+ 39 La tõnd pa neb nins sẽn na n tar n leb poorẽ n paam sãoongã ye.+ Tõnd yaa neb sẽn tar tẽebo, d vɩɩmã* koglg yĩnga.

11 Tẽeb yaa f sẽn na n kɩs sɩd tɩ f sẽn saagd n na n wa paam bũmb ningã na n pidsame.+ A yaa kaset sẽn yaa vẽeneg f sẽn tare, tɩ wilgdẽ tɩ bũmb f sẽn pa ne sɩd beeme. 2 Bala yaa tẽeb maasem yĩng la pĩnd wẽndẽ neb* paam kaset tɩ b ra tata Wẽnnaam yam.

3 Ne tẽebo, tõnd miime tɩ yaa ne Wẽnnaam gomdã maasem la bũmb nins sẽn be saasẽ la dũniyã* zugã sigl sõma. Woto, bũmb nins nin sẽn ne wã yii bũmb nins nin sẽn pa ne wã pʋsẽ.

4 Ne tẽebo, a Abɛll kõo Wẽnnaam maoong sẽn yaa sõma n yɩɩd a Kayẽ+ rẽndã, la ne tẽeb-kãng maasem, a paama kaset t’a yaa nin-tɩrga, bala Wẽnnaam deega a kũunã.+ La baa a sẽn ki wã, a tẽebã maasem yĩnga, a ket n gomdame.+

5 Ne tẽebo, a Enok+ paamame tɩ b rɩk-a n loog sẽn na yɩl t’a ra nams a kũumã sasa ye. La a ra pa be zĩig baa a ye nebã sẽn tõe n yã-a, Wẽnnaam sẽn dɩk-a n loogã+ yĩnga. Nand tɩ b rɩk-a n looge, a paama kaset t’a ra tata Wẽnnaam yam. 6 La tẽeb sã n kae, ned pa tõe n ta Wẽnnaam yam ye. Bala ned ning fãa sẽn kolgd Wẽnnaam tog n tẽeme t’a beeme, la t’a lebgda neb nins sẽn baood-a ne b sũy fãa wã roanda.+

7 Ne tẽebo, Wẽnnaam sẽn keoog a Nowe+ n gom bũmb nins nif sẽn da nan zɩ n yã yellã,+ a wilgame t’a yaa wẽn-zoɛta, n ka koom-koglg+ sẽn na yɩl n fãag a zakã rãmba. La tẽeb-kãng maasem yĩnga, a ninga dũniyã taale,+ la a paam tɩ Wẽnnaam yeel t’a yaa nin-tɩrg a tẽebã yĩnga.

8 Ne tẽebo, Wẽnnaam sẽn wa n bool a Abrahaamã,+ a sak n yiime n na n kẽng zĩig ning a sẽn da na n wa reeg tɩ yɩ a pʋɩɩrã. A yiime, baa a sẽn da pa mi a sẽn dabdẽ wã.+ 9 Ne tẽebo, a ra vɩɩ wa sãan kãabg tẽngã pʋgẽ wa a sẽn vɩ tẽn-zẽnga,+ n da gãe fu-rot+ pʋsẽ ne a Izaak la a Zakoob sẽn yaa neb nins sẽn paam pʋlen-yɛng+ ne yẽ wã. 10 Bala a ra gũuda galʋ-tẽng sẽn tar yẽbgr meng-menga, t’a metã la a naandã yaa Wẽnnaam.+

11 Ne tẽebo, a Saara me paama tõog n dɩk pʋga, baa a yʋʋmã sẽn da loog rogem+ wakat kãngã, a sẽn tags t’a Soab ning sẽn pʋlmã yaa sɩd soabã* yĩnga. 12 Rẽ n kɩt tɩ kamb+ yi rao a yembr sẽn da ki la bal+ pendẽ, tɩ b sõorã yaa wʋsg wa ãdsã sẽn be saasẽ wã, la sẽn pa tõe n sõd n sa wa bĩisrã sẽn be mogrã noorã.+

13 Nin-kãensã fãa kii ne tẽebo, baa b sẽn pa paam pʋlemsã pidsgã.+ La b yãa bõn-kãens yɩɩg+ n tool n beel-ba, la b ra yet nebã tɩ bãmb yaa sãamba, la neb sẽn pa na n pa tẽngã pʋgẽ n kaoos ye. 14 Neb nins sẽn gomd woto wã wilgda vẽeneg tɩ b baooda zĩig sẽn yaa bãmb meng rẽnd ne b sũur fãa. 15 Baasgo, b sã n da ket n tẽegd zĩig ning b sẽn yi n basã yelle,+ b ra na n paama weer n lebg n leb be. 16 La b baooda zĩig sẽn yaa sõma n yɩɩda, rat n yeel tɩ zĩig sẽn yaa saasẽ dẽnda. Woto yĩnga, Wẽnnaam pa zoet yãnd b sẽn boond-a tɩ nin-kãens Wẽnnaamã+ yĩng ye. Bala Wẽnnaam segla galʋ-tẽng b yĩnga.+

17 Ne tẽebo, Wẽnnaam sẽn wa n mak a Abrahaamã,+ a rɩka a Izaak n kõ la bala. Rao ning sẽn deeg pʋlemsã ne sũ-noogã makame n na n dɩk a bi-ribl-yendã n kõ tɩ yɩ maoongo,+ 18 baa Wẽnnaam sẽn da yeel-a: “Neb nins b sẽn na n bool tɩ fo yagensã na n yii a Izaak pendẽ wã.”+ 19 La a tagsame tɩ Wẽnnaam ra tõe n vʋʋga a biigã n yiis kũ-rãmb sʋk menga. A lebs n deeg-a-la kũum nugẽ tɩ yaa mamsgo.+

20 Ne tẽebo, a Izaak me ninga a Zakoob+ ne a Ezayu+ barka, n wilg-b bũmb nins sẽn da na n wa zĩndã.

21 Ne tẽebo, a Zakoob sẽn wa n kolg kũumã,+ a ninga a Zozɛf+ bi-ribl fãa barka, la a tik a dasaarã zug n waoog Wẽnnaam.+

22 Ne tẽebo, a Zozɛf sẽn wa n kolg kũumã, a goma Israyɛll nebã yikrã yelle, la a wilg b sẽn da tog n maan a kõabã bũmb ninga.*+

23 Ne tẽebo, a Moyiiz ba wã ne a ma wã solg-a-la kiis a tãab a rogmã poore,+ bala b yãame tɩ bi-pɛɛlgã yaa neere,+ la b pa zoe rĩmã noorã ye.+ 24 Ne tẽebo, a Moyiiz sẽn wa n bɩ wã,+ a zãgsame tɩ b kõn bool-a t’a Farawõ bi-pugl biig ye.+ 25 A yãka yam n na n naag Wẽnnaam nin-buiidã tɩ b nams-a, n zãgs sũ-noog ning yel-wẽndã sẽn kõt tɩ pa kaoosdẽ wã. 26 Bala a tagsame tɩ paam Kiristã paoogr yaa arzɛgs sẽn yaa kãsems n yɩɩd Ezɩpt arzɛgsã, a sẽn da get keoorã sẽn be taoorã yĩnga. 27 Ne tẽebo, a yii Ezɩpt+ n pa zoe rĩmã sũ-puugrã ye.+ Bala a kell n yalsa kãn-kãe tẽeb-kãng pʋgẽ wa a nee Soab ning ninsaal nif sẽn pa tõe n yã wã.+ 28 Ne tẽebo, a maana Pakã la a bol zɩɩmã, sẽn na yɩl tɩ sãamdã ra wa maan b kom-dẽemsã+ wẽng ye.

29 Ne tẽebo, b pasga Mog-miuugã wa tẽn-koɛɛnga.+ La Ezɩpt nebã sẽn mak n na n maan dẽ wã, koomã rɩ-b lame.+

30 Ne tẽebo, Zeriko lalgã lʋɩɩme, nebã sẽn kẽn n gilg-a rasem a yopoe wã poore.+ 31 Ne tẽebo, pʋg-yoodr a Rahaab pa naag kɩɩsdbã n sãame, a sẽn deeg neb nins sẽn wa na n soos n ges tẽngã ne laafɩ wã yĩnga.+

32 La bõe la m na n yeel n paase? Bala m sã n na n gom a Zedeõ+ yelle, a Barake,+ a Sãmsõ,+ a Zɛfte,+ a Davɩɩd+ n paas a Sãmwɛll+ ne no-rɛɛsdb a taabã yelle, sẽkã pa na n sek-m ye. 33 Tẽebã maasem yĩnga, b tõoga rĩung toɛy-toɛya,+ b waa ne tɩrlem, b paama pʋlemse,+ b muma gɩgma noya,+ 34 b sãama bugum pãnga,+ b põsame tɩ b pa kʋ-b ne sʋʋse,+ b sẽn da ka pãngã b lebga pãens rãmba,+ b lebga neb sẽn yaa gãndaad zabr sasa,+ b riga sodaas sẽn wa n pig b tẽngã.+ 35 Pagb paamame tɩ b vʋʋg b kũ-rãmb n kõ-ba.+ B namsa neb a taaba, bala b pa sak n kɩɩs b tẽebã sẽn na yɩl n paam b mense, b sẽn dat kũum vʋʋgr sẽn yaa sõma n yɩɩdã yĩnga. 36 Neb a taab namsg yɩɩ yaalgo, la kalwaas pãbre. Sẽn yɩɩd rẽ menga, b sẽb-b-la ne bãens+ la b kẽes-b bãens roto.+ 37 B lob-b-la kuga,+ b maka b tẽebã, b wã-b lame n pas zĩis a yiibu, la b kood-b-la ne sʋʋse.+ B ra yera piis gãnd la bʋʋs gãnd+ n gilgdẽ. Bũmb toor-toor paoog-b lame, b ra bee toog pʋgẽ,+ la neb nams-b lame.+ 38 La dũniyã ra pa tog ne-b ye. B ra yeebda we-rasempʋɩɩsẽ, tãens zutu, n da soonded tãens bogdẽ,+ la bogd a taab pʋsẽ.

39 Baa nin-kãensã fãa sẽn paam kaset tɩ b ra tata Wẽnnaam yam b tẽebã yĩngã, b pa paam pʋlengã pidsg ye. 40 Bala Wẽnnaam da rat n maana bũmb sẽn yaa sõma n yɩɩd n kõ tõndo,+ sẽn na yɩl tɩ nin-kãens ra zems zãng tɩ tõnd pa naag ye.

12 Woto wã, tõnd sẽn tar kaset rãmb ka tɛk sẽn gũbg tõndã, bɩ d lob zɩɩb buud fãa la yel-wẽndã sẽn gĩt tõnd nana-nana wã,+ la bɩ d tõog toog n zoe zoees ning sẽn be tõnd taoorã,+ 2 d sẽn get a Zeezi+ sẽn yaa tõnd tẽebã Naab la a Taasdã yĩnga. Sũ-noog ning sẽn da be a taoorã yĩnga, a tõoga toog namsg ra-lukã* zug n pa zoe yãnde, la a zaoonda Wẽnnaam geerã nug-rɩtgo.+ 3 Sɩd me, ges-y soab ning sẽn tõog toog woto yel-wẽn-maandbã kɩɩsg goam taoore,+ b sẽn gom n ning b mens taalã, sẽn na yɩl tɩ yãmb da yɛ la y koms raood n bas ye.+

4 Yãmb sẽn maood ne yel-wẽn-kãnga wã, y nan zɩ n zab hal tɩ y zɩɩm daag ye. 5 La yãmb yĩma saglg ning b sẽn kõt yãmb wa ba sẽn kõt a kambã fasɩ. B yeelame: “M biiga, ra paoog a Zeova* kiblgã ye. A sã n wa remsd-f me bɩ f ra koms raood n bas ye. 6 Bala a Zeova* kibinda neb nins fãa a sẽn nonge. Sɩd-sɩda, a sɩbgda ned ning fãa a sẽn deeg t’a lebg a biiga.”*+

7 Yãmb segd n tõoga toogo, bala rẽ naaga y kiblgã.* Wẽnnaam maanda yãmb wa ba sẽn maand a kamba.+ Bala bi-bʋg la a ba pa kibinda?+ 8 La yãmb fãa sã n pa naag n paam kiblgu, sɩd-sɩda, yãmb yaa tãmpĩiba,* la y pa halaal kamb ye. 9 Sẽn paase, tõnd ba-rãmb nins sẽn yaa ninsaalbã ra minim n kibinda tõndo, la tõnd da waoogd-b lame. Woto wã, d pa segd n sulg d mens n sak Ba ning sẽn dog tõnd ne vʋʋsem sõngã maasmã nana n yɩɩda, n paam n vɩɩmd sɩda?+ 10 Bala tõnd ba-rãmbã kibla tõnd wakat bilf pʋgẽ, wa sẽn zems b sẽn da tagsd tɩ yaa sõma wã. La Wẽnnaam maanda rẽ tõnd nafr yĩnga, sẽn na yɩl tɩ tõnd me lebg sõamyã wa yẽnda.+ 11 Sɩda, kiblg ka be sẽn wõnd a kõta sũ-noog a wakat ye. A sãamda sũuri.* La kaoosg zugẽ, a womda biis sẽn yaa laafɩ la tɩrlem, neb nins a sẽn zãmsã yĩnga.

12 Woto wã, bɩ y keng nus nins sẽn ka pãngã ne rũm nins sẽn komsã,+ 13 la y kell n kɩt tɩ y naoã kẽn so-tɩrs zutu,+ sẽn na yɩl tɩ will ning sẽn ka pãngã ra soke, la a sãooge. 14 Bao-y laafɩ ne nebã fãa,+ la y bao sõmblem.*+ Ned baa a ye pa na n yã Zu-soabã tɩ pa tũ ne sõmblem ye. 15 Gũus-y neer tɩ ned ra wa kong Wẽnnaam barkã,* tɩ yẽgr sẽn tar zẽnem ra wa tob n wa ne yɛla, la a rẽgem neb wʋsg ye.+ 16 Gũus-y me tɩ ned ra zĩnd yãmb sʋkã n yaa yoaada,* wall ned sẽn pa nand bũmb nins sẽn yaa Wẽnnaam dẽndã wa a Ezayu sẽn tek a kãsengã ne rɩɩbã ye.+ 17 Yãmb miime tɩ rẽ poore, a sẽn wa n dat n paam barkã, b zãgs-a lame. Bala baa a sẽn mao ne a sũur fãa ne nintãm+ n dat t’a ba wã toeem yamã, a pa tõog ye.

18 Yãmb pa kolg bũmb sẽn tõe n sɩɩse,+ la sẽn dɩt bugum,+ la sawad-sablga, la lik bida, la sob-kãsenga,+ 19 la tãntãoog rãamde,+ la koɛɛg sẽn gomd goam ye.+ Nin-buiidã sẽn wʋm koe-kãngã, b kosame tɩ b ra le yeel-b bũmb ye.+ 20 Bala b ra yɛɛsda noor ning sẽn yeel tɩ “baa rũng sã n sɩɩs tãngã, b segd n lob-a-la kug n kʋ”+ wã wʋsgo. 21 Sẽn paase, bũmb ning sẽn maanã ra kẽesda rabeem wʋsgo, hal t’a Moyiiz yeele: “Mam pɛlengã yɩkame tɩ m digda.”+ 22 La yãmb kolga Siyõ tãnga,+ la Wẽnnaam ning sẽn vɩ wã galʋ-tẽnga, rat n yeel tɩ saasẽ Zerizalɛmmã,+ la malɛgs ka tɛk 23 sẽn tigim taaba,+ la kom-dẽems nins yʋy sẽn gʋls saasẽ wã tigingã, la Wẽnnaam sẽn yaa fãa bʋ-kaoodã,+ la vɩɩm ning Wẽnnaam sẽn kõ+ nin-tɩrs nins b sẽn kɩt tɩ b zems zãngã,+ 24 la a Zeezi sẽn yaa kaool-paalgã+ se-yõkdã,+ la zɩɩm ning b sẽn mesã, sẽn yaa zɩɩm sẽn gomd sõma n yɩɩd a Abɛll zɩɩmã.+

25 Gũus-y n da wa zãgs sẽn gomd-a wã kelgr ye.* Bala neb nins sẽn zãgs n pa kelg soab ning sẽn da be tẽngã zug n keoogd-b ne keoogr sẽn yit Wẽnnaam nengẽ wã sã n pa põs sɩbgre, sẽn yɩɩd fãa, tõnd sã n pa kelg soab ning sẽn be saasẽ n gomdã, d pa na n põs sɩbgr ye.+ 26 Wakat kãnga, Wẽnnaam koɛɛgã kɩtame tɩ tẽngã rigimdi.+ La masã a pʋlmame yaa: “Mam na n le kɩtame tɩ tẽngã rigimd yɛsa. La pa tẽngã bal ye. Na n yɩɩ saasã me.”+ 27 La gomd ning sẽn yeel tɩ “yɛsã” wilgdame tɩ b na n menesa bũmb nins b sẽn kɩt tɩ rigimdã, rat n yeel tɩ bũmb nins sẽn pa Wẽnnaam n maanã, sẽn na yɩl tɩ bũmb nins b sẽn pa kɩt tɩ rigimdã kell n pa. 28 Woto wã, tõnd sẽn tog n paam Rĩung bũmb sẽn pa tõe n kɩt t’a rigimdã yĩnga, bɩ d ket n paamd Wẽnnaam barkã.* Yaa ne bark-kãng maasem la d tõe n tʋm Wẽnnaam tʋʋmdã ne wẽn-zoeer la ne rabeem tɩ ta a yam. 29 Bala tõnd Wẽnnaamã yaa wa bugum sẽn dɩte.+

13 Bɩ y kell n nong taab ne saam-biir nonglem.+ 2 Ra yĩm-y tɩ maan sãambã sãand ye.*+ Bala rẽ maasem yĩnga, neb kẽer deega malɛgs sãand n pa bãng ye.+ 3 Tagsd-y sẽn be-b bãens roogẽ wã* yelle, wa yãmb naag-b lame n be bãensã roogẽ,+ la y tagsd neb nins b sẽn namsdã yelle, yãmb me sẽn be yĩngã pʋgẽ wã yĩnga.* 4 Bɩ kãadem zĩnd waoogr nebã fãa sʋka, la bɩ kãadem gãag* ra rẽgem ye.+ Bala Wẽnnaam na n kaoo sẽn tʋmd-b raglem tʋʋmã* ne yoaadbã bʋʋdo.+ 5 Bɩ y yel-manesmã wilg tɩ y pa neb sẽn nong ligdi,+ la y kɩtdẽ tɩ bũmb nins y sẽn tarã sekd-yã.+ Bala Wẽnnaam yeelame yaa: “Mam pa na n loog n bas foom a bada, la m pa na n tol n daag-f n bas ye.”+ 6 Woto wã, d tõe n paama raood wʋsg n yeele: “A Zeova* yaa mam sõangda. Mam pa na n zoe rabeem ye. Ninsaal tõe n maana maam bõe?”+

7 Tẽegd-y sẽn lʋɩt-b taoor yãmb sʋkã yelle,+ rat n yeel tɩ neb nins sẽn togs yãmb Wẽnnaam goamã. Get-y b yel-manesmã sẽn womd bi-sõma ninsã neere, la y tall b tẽebã buudu.+

8 A Zeezi Kirist yaa yembr zaamẽ, rũndã, la wakat fãa yĩnga.

9 Ra bas-y tɩ zãmsg toɛy-toɛy la zãms-sãams menes-y ye. Bala sũurã sã n paam kengr ne Wẽnnaam barkã* n são a sẽn na n paam kengr ne rɩɩbo,* sẽn yaa bũmb sẽn pa nafd neb nins sẽn vɩ rɩɩb yĩngã.+

10 Tõnd tara tẽn-kugri, tɩ neb nins sẽn tʋmd Wẽnnaam tʋʋmdã fu-roogẽ wã pa tar sor n na n dɩ bũmb nins sẽn be a zugã ye.+ 11 Bala maan-kʋʋdb kãsmã tallda rũmsã zɩɩmã n tɩ kõ zĩ-sõng sẽn yɩɩdã pʋgẽ tɩ yɩ yel-wẽnd maoongo, la b rɩkda rũm-kãens nemdã n yi sik-zĩigã kɛɛng n tɩ yõoge.+ 12 Rẽ n so t’a Zeezi me yi galʋ-tẽngã*+ n tɩ namse, sẽn na yɩl n kɩt tɩ nebã lebg sõamyã a zɩɩmã maasem yĩnga.+ 13 Woto wã, bɩ d yi sik-zĩigã kɛɛng n bʋʋg-a, la d sak paoogr ning a sẽn sakã,+ 14 bala tõnd pa tar galʋ-tẽng ka sẽn na n kell n pa ye. Tõnd baooda galʋ-tẽng ning sẽn watã ne d sũur fãa.+ 15 A Zeezi maasem yĩnga, bɩ d kõt Wẽnnaam pẽgr maoong wakat fãa,+ rat n yeel tɩ kaset d sẽn kõt a yʋʋrã+ yĩng ne d no-bɩmsã.+ 16 Sẽn paase, bɩ y ra yĩm tɩ maan sẽn yaa neere, la y ra yĩm tɩ pʋɩ y sẽn tarã ne neb a taab ye.+ Bala Wẽnnaam sũur nooma ne maan-kãensã buudu.+

17 Bɩ y kelg sẽn lʋɩt-b taoor yãmb sʋkã,+ la y sulg y mens n sak-ba,+ bala b geta yãmb* yell wakat fãa, n miẽ tɩ Wẽnnaam na n kaoo b bʋʋd tɩ zems b tʋʋma.+ Bɩ y maan woto sẽn na yɩl tɩ b tʋm ne sũ-noog la ra yɩ ne siri, bala rẽ pa na n naf yãmb ye.

18 Bɩ y ket n pʋʋsd tõnd yĩnga, bala d kɩsa sɩd tɩ d tara sũur-kaset* sẽn yaa yɩlemde,* d sẽn dat n zã d mens ne pʋ-peelem bũmb fãa pʋgẽ wã yĩnga.+ 19 La sẽn yɩɩd fãa, mam kota yãmb tɩ y pʋʋs tɩ m tõog n wa yãmb nengẽ tao-tao.

20 Bɩ laafɩ Wẽnnaamã sẽn yaa soab ning sẽn vʋʋg tõnd Zu-soab a Zeezi sẽn da tar kaool sẽn ka sɛtã zɩɩmã, la sẽn yaa piisã pe-kɩɩm-kãsengã+ 21 kõ yãmb bõn-sõma buud fãa tɩ y maan a raabã. A Zeezi Kirist maasem yĩnga, Wẽnnaam kɩtdame tɩ tõnd maand bũmb nins sẽn noom-a wã. Bɩ a paam ziir wakat sẽn kõn sa yĩnga. Ãmiina.

22 La m saam-biisi, mam kota yãmb tɩ y maag y yĩns n kelg gom-kãensã sẽn kengd raoodã, bala mam gʋlsa yãmb seb-koɛɛga. 23 Mam datame tɩ y bãng tɩ b yiisa d saam-biig a Tɩmote bãensã roogẽ. A sã n wa ka la bilfu, tõnd na n tũu taab n wa ges yãmba.

24 Pʋʋs-y sẽn lʋɩt-b taoor yãmb sʋkã ne nin-sõamyã wã fãa n kõ-ma. Sẽn be-b Itali+ wã toonda yãmb b pʋʋsem.

25 Bɩ Wẽnnaam barkã* zĩnd ne yãmb fãa.