A ZÃ PIPI SEBRE

1 Tõnd gʋlsda yãmb soab ning sẽn da be hal sɩngrẽ wã wɛɛngẽ, soab ning koɛɛg d sẽn wʋme, d nin sẽn yã la d sẽn gese, la d mens nus sẽn sɩɩsã wɛɛngẽ. Tõnd gʋlsda yãmb vɩɩm koɛɛgã+ wɛɛngẽ. 2 (B kɩtame tɩ vɩɩmã lebg vẽenega. Tõnd yã-a lame, n kõt a kaseto,+ la d gomd vɩɩm sẽn ka sɛtã+ sẽn da be Ba wã nengẽ la b sẽn kɩt tɩ yɩ vẽeneg ne tõndã yell ne yãmba.) 3 D togsda yãmb bũmb ning d sẽn yã la d wʋmã,+ sẽn na yɩl tɩ yãmb me paam lagem-n-taar* ne tõndo. Tõnd lagem-n-ta-kãng bee ne Ba wã, la ne a Bi-ribl a Zeezi Kirist.+ 4 Tõnd gʋlsda bõn-kãensã sẽn na yɩl tɩ d sũ-noogã pidi.

5 Ad koɛɛg ning tõnd sẽn wʋm a nengẽ n togsd yãmbã: Wẽnnaam yaa vẽenem,+ la lik baa bilf pa be a pʋgẽ ye. 6 Tõnd sã n yeel tɩ “tõnd tara lagem-n-taar ne-a,” la d yaool n ket n kẽnd lik pʋgẽ, d yagda ziri. D pa tũud sɩdã ye.+ 7 La tõnd sã n kẽnd vẽenemã pʋgẽ wa yẽ mengã sẽn be vẽenem pʋgẽ wã, tõnd tara lagem-n-taar ne taaba, la a Bi-ribl a Zeezi zɩɩmã pekda tõnd n yiisd yel-wẽnd buud fãa.+

8 Tõnd sã n yeel tɩ “tõnd pa tar yel-wẽnde,” d belgda d mense,+ la sɩdã pa be tõnd pʋsẽ ye. 9 Tõnd sã n vẽneg d yel-wẽnã n togse, a yaa sɩd soab la tɩrga, n na n kõ tõnd sugr d yel-wẽnã yĩnga, la a pek tõnd n yiis tʋʋm-wẽng buud fãa.+ 10 Tõnd sã n yeel tɩ “tõnd pa maan yel-wẽnde,” yaa wa tõnd yetame t’a yaa ziri yagda, la a gomdã pa be tõnd pʋsẽ ye.

2 Mam kom-bõonego, mam gʋlsda yãmb bõn-kãensã sẽn na yɩl tɩ y ra maan yel-wẽnd ye. La ned sã n baas n maan yel-wẽnde, tõnd tara sõangd* sẽn be Ba wã nengẽ: Yaa a Zeezi Kirist+ sẽn yaa tɩrgã.+ 2 Yẽ yaa maoong tõnd yel-wẽnã yĩnga,+ maoong sẽn kɩt tɩ d tõe n maneg d yell ne Wẽnnaam.*+ La pa tõnd yel-wẽnã yĩng bal ye. Yaa dũniyã neb fãa yel-wẽn yĩng me.+ 3 Ad bũmb ning sẽn kɩtd tɩ tõnd bãng tɩ d mii-a lame wã: Yaa tõnd sã n kell n sakd a noyã. 4 Ned ning sẽn yete: “Mam mii-a lame,” la a yaool n pa sakd a noyã, a soab yaa zirẽ-be-neda, la sɩdã pa be yẽ pʋgẽ ye. 5 La ned ning fãa sẽn sakd a goamã, Wẽnnaam nonglmã sɩd zemsa zãng+ a soabã pʋgẽ. Yaa ne rẽ la tõnd mi tɩ tõnd bee yẽ pʋgẽ.+ 6 Ned ning sẽn yet t’a bee a pʋgẽ, nin-kãng segd n kell n kẽna wa a sẽn kẽn to-to wã.+

7 M nin-nongdse, mam pa gʋlsd yãmb tõ-paalg ye. Mam gʋlsda yãmb tõ-kʋdg y sẽn paam hal sɩngrẽ wã.+ Tõ-kʋd-kãng yaa gomd ning yãmb sẽn wʋmã. 8 Baasgo, mam gʋlsda yãmb tõ-paalg sẽn yaa tõog a Zeezi sẽn tũ, la yãmb me sẽn tũudi. Bala likã loogdame, tɩ vẽenem meng-mengã zoe n yãgda.+

9 Ned ning sẽn yet t’a bee vẽenemã pʋgẽ la a yaool n kis+ a saam-biiga, a ket n bee likã pʋgẽ.+ 10 Ned ning sẽn nong a saam-biig bee vẽenemã pʋgẽ,+ la bũmb sẽn kɩtd tɩ ned tõe n lak n lʋɩ ka be a nengẽ ye. 11 La ned ning sẽn kis a saam-biig bee likã pʋgẽ,+ n kẽnd lik pʋgẽ. A pa mi a sẽn dabdẽ,+ bala likã kɩtame t’a ninã pa neẽ ye.

12 Kom-bõonego, mam gʋlsda yãmba, bala yãmb paamame tɩ b kõ yãmb y yel-wẽnã sugr a Zeezi yʋʋrã yĩnga.+ 13 Ba-rãmba, mam gʋlsda yãmba, bala yãmb bãnga soab ning sẽn be hal sɩngrẽ wã. Kom-bɩɩse, mam gʋlsda yãmba, bala yãmb tõoga wẽng soabã.+ Kom-bõonego, mam gʋlsda yãmba, bala yãmb bãnga Ba wã.+ 14 Ba-rãmba, mam gʋlsda yãmba, bala yãmb bãnga soab ning sẽn be hal sɩngrẽ wã. Kom-bɩɩse, mam gʋlsda yãmba, bala yãmb tara pãnga,+ la Wẽnnaam gomdã bee yãmb pʋsẽ,+ la yãmb tõoga wẽng soabã.+

15 Ra nong-y dũniyã wall bũmb nins sẽn be dũniyã pʋgẽ wã ye.+ Ned sã n nong dũniyã, Ba wã nonglem pa be a soab pʋgẽ ye.+ 16 Bala bũmb nins fãa sẽn be dũniyã pʋgẽ wã, rat n yeel tɩ yĩngã ratem,+ ninã ratem,+ la wilg f paoong ne wuk-m-mengã* pa yit Ba wã nengẽ ye. B yita dũniyã pʋgẽ. 17 Sẽn paase, dũniyã loogdame, la a ratmã me loogdame.+ La ned ning sẽn maand Wẽnnaam daabã paada wakat fãa.+

18 Kom-bõonego, masã yaa yaoolem wakate. Yãmb da wʋmame tɩ Kiristã kɩɩsdã watame,+ la baa masã, Kiristã kɩɩsdb wʋsg n wa.+ Yaa rẽ n kɩt tɩ d miẽ tɩ yaa yaoolem wakatã. 19 B yii tõnd nengẽ, la b ra pa tõnd neb ye.+ Bala b sã n da yaa tõnd neba, b ra na n paa ne tõndo. La b yii tõnd nengẽ sẽn na yɩl tɩ yɩ vẽeneg tɩ pa nebã fãa n yaa tõnd neb ye.+ 20 La yãmb paamame tɩ Sõng soabã zae yãmb ne vʋʋsem sõngã.+ Sẽn paase, yãmb fãa tara bãngre. 21 Mam pa gʋlsd yãmb y sẽn pa mi sɩdã yĩng ye.+ Mam gʋlsda yãmb y sẽn mi sɩdã yĩnga, la ziri baa bilf sẽn pa yit sɩdã pʋgẽ wã yĩnga.+

22 Ãnda n yaa zirẽ-be-nedã n zʋʋg ned ning sẽn kɩɩsd t’a Zeezi pa Kiristã?+ Ad Kiristã kɩɩsdã:+ Yaa ned ning sẽn pa tẽed Ba wã la Bi-riblã. 23 Ned ning fãa sẽn pa tẽed Bi-riblã pa tat Ba wã yam me ye.+ La ned ning sẽn yet t’a tẽeda Bi-riblã+ tata Ba wã yam me.+ 24 La sã n yaa ne yãmba, bũmb ning yãmb sẽn wʋm hal sɩngrẽ wã segd n paa yãmb pʋsẽ.+ Bũmb ning yãmb sẽn wʋm hal sɩngrẽ wã sã n pa yãmb pʋsẽ, yãmb me na n zĩnda Bi-riblã pʋgẽ, la y zĩnd Ba wã pʋgẽ. 25 Sẽn paase, ad bũmb ning yẽ mengã sẽn pʋlem tõndã: Yaa vɩɩm sẽn ka sɛtã.+

26 Yaa neb nins sẽn baood n kẽes yãmb moogã yĩng la mam gʋlsd yãmb bõn-kãensã. 27 Sã n yaa ne yãmba, Wẽnnaam+ zaee yãmb ne a vʋʋsem sõngã, la vʋʋsem sõng kãng bee yãmb pʋsẽ, la yãmb pa baood tɩ ned baa a ye zãms yãmb bũmb ye. Vʋʋsem sõngã zaeeb yãmb sẽn paam a nengẽ wã zãmsda yãmb bũmb fãa.+ Sẽn paase, a yaa sɩd n pa belgr ye. Kell-y n pa-y yẽ pʋgẽ wa vʋʋsem sõngã zaeebã sẽn zãms yãmbã.+ 28 Woto yĩnga, kom-bõonego, kell-y n pa-y yẽ pʋgẽ sẽn na yɩl t’a sã n wa vẽneg a meng bɩ d tõog n gom ne raoodo,+ la d ra zãag d mens ne-a a waoongã wakate, d sẽn zoet yãnd yĩng ye. 29 Yãmb sã n miẽ t’a Zeezi yaa tɩrga, y miime me tɩ ned ning fãa sẽn maand sẽn yaa tɩrga, yaa Wẽnnaam n dog yẽ soaba.+

3 Ges-y Ba wã sẽn nong tõnd ne nonglem ning buudu,+ n sak tɩ b na n boond tõnd tɩ Wẽnnaam kambã!+ Sɩd me, tõnd yaa Wẽnnaam kamba. Yaa rẽ yĩng la dũniyã sẽn pa mi tõndã,+ bala a pa bãng Wẽnnaam ye.+ 2 M nin-nongdse, tõnd yaa Wẽnnaam kamb masã,+ la b nan pa kɩt tɩ tõnd sẽn na n yɩ bũmb ningã lebg vẽeneg ye.+ La tõnd miime t’a sã n wa vẽneg a menga, tõnd na n yɩɩ wa yẽ, bala d na n yã-a-la wa a sẽn yaa to-to wã. 3 La ned ning sẽn kɩs sɩd ne-a yɩlgda a menga,+ wa a sẽn yaa yɩlemdã.

4 Ned ning fãa sẽn maand yel-wẽn kɩɩsda tõogã me. Bala yel-wẽnd yaa tõogã kɩɩsgo. 5 Yãmb miime me t’a Zeezi waame sẽn na yɩl n yiis tõnd yel-wẽnã,+ la yel-wẽnd baa a ye pa be a pʋgẽ ye. 6 Ned ning fãa sẽn be yẽ pʋgẽ pa maand yel-wẽn ye.+ Ned ning sẽn maand yel-wẽn pa yã-a, la a pa mi-a me ye. 7 Kom-bõonego, ra bas-y tɩ ned baa a ye kẽes-y moog ye. Ned ning sẽn tũud tɩrlem yaa tɩrga, wa yẽ sẽn yaa tɩrgã. 8 Ned ning sẽn maand yel-wẽn yita Sʋɩtãanã* nengẽ, bala Sʋɩtãanã maanda yel-wẽn hal sɩngrẽ wã.*+ Yaa rẽ yĩng la Wẽnnaam Bi-riblã sẽn wa n na n sãam* Sʋɩtãanã+ tʋʋmã.

9 Ned ning fãa Wẽnnaam sẽn dog pa maand yel-wẽna,+ Wẽnnaam vʋʋsem sõngã sẽn be yẽ pʋgẽ wã yĩnga. A pa tõe n ket n maand yel-wẽn ye. Bala yaa Wẽnnaam n dog-a.+ 10 Ad bũmb ning sẽn kɩt tɩ d mi Wẽnnaam kambã ne Sʋɩtãanã* kambã n bakã: Ned ning fãa sẽn pa maand sẽn yaa tɩrg pa yit Wẽnnaam nengẽ ye. Ned ning sẽn pa nong a saam-biig me pa yit Wẽnnaam nengẽ ye.+ 11 Ad koɛɛg ning yãmb sẽn wʋm hal sɩngrẽ wã: Yaa tɩ tõnd segd n nonga taaba.+ 12 D pa segd n yɩ wa a Kayẽ sẽn da yit wẽng soabã nengẽ, la sẽn kʋ a ba-biigã ye.+ Bõe yĩng t’a kʋ-a? Yaa tɩ yẽ meng tʋʋmã ra yaa wẽnse,+ t’a ba-biigã rẽnd ra yaa tɩrse.+

13 M saam-biisi, dũniyã sẽn kis yãmbã+ pa segd n ling yãmb ye. 14 Tõnd miime tɩ tõnd yii kũumẽ n kẽ vɩɩmẽ,+ bala d nonga saam-biisã.+ Ned ning sẽn pa nong saam-biisã ket n bee kũumẽ.+ 15 Ned ning fãa sẽn kis a saam-biig yaa nin-kʋʋda.+ La yãmb miime tɩ nin-kʋʋd baa a ye pa tar vɩɩm sẽn ka sɛtã tɩ be a meng pʋgẽ ye.+ 16 Ad bũmb ning sẽn kɩt tɩ tõnd bãng nonglmã: Yaa t’a Zeezi kõo a vɩɩmã* tõnd yĩnga,+ tɩ tõnd me segd n kõ d vɩɩmã* d saam-biisã yĩnga.+ 17 La ned ning sẽn tar dũni-kãngã paoongo, n yã t’a saam-biig rat sõngr t’a baas n zãgs t’a kõn zoe a nimbãanega, Wẽnnaam nonglmã na n yɩɩ wãn n zĩnd nin-kãng pʋgẽ?+ 18 Kom-bõonego, tõnd pa segd n nong taab ne no-goam wall ne noor ye.+ D segd n nonga taab ne tʋʋma,+ la ne sɩda.+

19 Woto, tõnd na n bãngame tɩ tõnd yita sɩdã pʋgẽ, la d na n kɩtame tɩ d sũyã kɩs sɩd ne a nonglmã, 20 baa sẽn wa n yaa bũmb ning poorẽ la tõnd sũyã ningd tõnd taale, bala Wẽnnaam yɩɩda tõnd sũyã, la a mii bũmb fãa.+ 21 M nin-nongdse, tõnd sũyã sã n pa ningd tõnd taale, tõnd tõe n goma ne raood Wẽnnaam taoore.+ 22 La sẽn wa n yaa bũmb ning fãa la tõnd kota, a kõta tõndo.+ Bala tõnd sakda a noyã, la d maand bũmb nins sẽn tat a yamã. 23 Sɩd me, ad a noorã: Yaa tɩ tõnd tẽ a Bi-ribl a Zeezi Kirist yʋʋrã,+ la d nong taab+ wa sẽn zems noor ning a sẽn kõ tõndã. 24 Sẽn paase, ned ning sẽn sakd a noyã bee a pʋgẽ, tɩ yẽ me be nin-kãng pʋgẽ.+ La ne vʋʋsem sõngã a sẽn kõ tõndã maasem, d miime t’a bee tõnd pʋsẽ.+

4 M nin-nongdse, ra tẽ-y koɛɛg ning fãa* sẽn wõnd yita Wẽnnaam nengẽ ye+. La bɩ y fees koeesã fãa* n ges b sã n sɩd yita Wẽnnaam nengẽ.+ Bala zirẽ-be-no-rɛɛsdb wʋsg n kẽ dũniyã pʋgẽ.+

2 Ad y sẽn tõe n bãng to-to tɩ koɛɛg yita Wẽnnaam nengẽ: Koɛɛg ning fãa sẽn yet t’a Zeezi Kirist waa tẽngã zug n yɩ ninsaal yita Wẽnnaam nengẽ.+ 3 La koɛɛg ning fãa sẽn pa yet t’a Zeezi waa tẽngã zug n yɩ ninsaal pa yit Wẽnnaam nengẽ ye.+ Koe-kãng n yaa Kiristã kɩɩsdã koɛɛg ning yãmb sẽn da wʋm tɩ watame wã.+ La masã, a zoe n bee dũniyã pʋgẽ.+

4 Kom-bõonego, yãmb yita Wẽnnaam nengẽ, la yãmb tõoga zirẽ-be-no-rɛɛsdbã.+ Bala soab ning sẽn be yãmb pʋsẽ wã+ yɩɩda soab ning sẽn be dũniyã pʋgẽ wã.+ 5 B yita dũniyã pʋgẽ.+ Yaa rẽ yĩng la b sẽn gomd bũmb nins sẽn yit dũniyã pʋgẽ yellã, tɩ dũniyã me kelgd-bã.+ 6 Tõnd yita Wẽnnaam nengẽ. Ned ning fãa sẽn bãng Wẽnnaam kelgda tõndo.+ Ned ning fãa sẽn pa yit Wẽnnaam nengẽ pa kelgd tõnd ye.+ Yaa woto la d bãngd koɛɛg ning sẽn yaa sɩd koɛɛgã, la koɛɛg ning sẽn yaa tudgr koɛɛgã n bake.+

7 M nin-nongdse, bɩ d ket n nong taaba,+ bala nonglem yita Wẽnnaam nengẽ. Ned ning fãa sẽn tar nonglem, yaa Wẽnnaam n dog-a, la a mii Wẽnnaam.+ 8 Ned ning sẽn pa tar nonglem pa mi Wẽnnaam ye. Bala Wẽnnaam yaa nonglem.+ 9 Ad Wẽnnaam sẽn wilg a nonglmã to-to ne tõndo: Wẽnnaam tʋma a Bi-ribl sẽn ka to wã+ dũniyã pʋgẽ sẽn na yɩl tɩ d tõog n paam vɩɩm a Bi-riblã maasem yĩnga.+ 10 Nonglem-kãng pa tõnd sẽn nong Wẽnnaam ye. La yaa a sẽn nong tõndo, n tʋm a Bi-riblã t’a wa yɩ maoong tõnd yel-wẽnã yĩnga,+ maoong sẽn kɩt tɩ d tõe n maneg d yell ne Wẽnnaam.*+

11 M nin-nongdse, sã n yaa woto la Wẽnnaam nong tõndo, dẽnd tõnd me segd n nonga taaba.+ 12 Ned baa a ye zɩ n yã Wẽnnaam ye.+ Tõnd sã n ket n nong taaba, Wẽnnaam bee tõnd pʋsẽ, la a kɩtame t’a nonglmã zems zãng tõnd pʋsẽ.+ 13 Ad bũmb ning sẽn kɩt tɩ d miẽ tɩ tõnd bee a pʋgẽ, tɩ yẽ me be tõnd pʋsẽ wã: Yaa a sẽn kõ tõnd a vʋʋsem sõngã. 14 Sẽn paase, tõnd mensã yãame tɩ Ba wã tʋma a Bi-riblã t’a wa yɩ dũniyã fãagda,+ la tõnd kõta rẽ kaseto. 15 Ned ning sẽn sak n deeg t’a Zeezi yaa Wẽnnaam Bi-ribla,+ Wẽnnaam bee nin-kãng pʋgẽ, tɩ yẽ me be Wẽnnaam pʋgẽ.+ 16 La tõnd bãngame tɩ Wẽnnaam nonga tõndo, n kɩs sɩd ne rẽ.+

Wẽnnaam yaa nonglem,+ la ned ning sẽn be nonglem pʋgẽ, a bee Wẽnnaam pʋgẽ, tɩ Wẽnnaam me be yẽ pʋgẽ.+ 17 Yaa woto la b kɩt tɩ nonglem zems zãng tõnd pʋsẽ, sẽn na yɩl tɩ d tõe n gom ne raood*+ bʋʋdã kaoob daare, bala yẽ sẽn yaa to-to wã, tõnd mensã yaa woto dũni-kãngã pʋgẽ. 18 Rabeem baa bilf pa be nonglem pʋgẽ ye.+ La nonglem sẽn zems zãng yiisda* rabeem, bala rabeem gɩdgda tõndo. Sɩd-sɩda, ned ning sẽn yaa rabɛɛm pa zems zãng nonglmã wɛɛngẽ ye.+ 19 Tõnd tara nonglem, yẽ sẽn yɩ pipi n nong tõndã yĩnga.+

20 Ned sã n yeele: “Mam nonga Wẽnnaam,” la a yaool n kis a saam-biiga, a yaa zirẽ-be-neda.+ Bala ned ning sẽn pa nong a saam-biig+ a sẽn ne wã pa tõe n nong Wẽnnaam a sẽn pa ne wã ye.+ 21 La ad noor ning tõnd sẽn deeg a nengẽ wã: Yaa tɩ ned ning sẽn nong Wẽnnaam segd n nonga a saam-biig me.+

5 Ned ning fãa sẽn tẽed t’a Zeezi yaa Kiristã, yaa Wẽnnaam n dog-a.+ La ned ning fãa sẽn nong soab ning sẽn kõt vɩɩmã, a nonga ned ning fãa a sẽn doge. 2 Ad bũmb ning sẽn kɩt tɩ d miẽ tɩ d nonga Wẽnnaam kambã:+ Yaa tõnd sã n nong Wẽnnaam, la d tũud a noyã. 3 Ad Wẽnnaam nonglmã sẽn dat n yɛɛlga: Yaa tɩ tõnd sak a noyã,+ la a noyã sakr yaool n pa toog ye.+ 4 Bala ned ning fãa* Wẽnnaam sẽn dog tõogda dũniyã.+ La ad bũmb ning sẽn kɩt tɩ tõnd tõog dũniyã: Yaa tõnd tẽebã.+

5 Yaa ãnda soab n tõe n tõog dũniyã?+ Pa ned ning sẽn tẽed t’a Zeezi yaa Wẽnnaam Bi-riblã sɩda?+ 6 Ad soab ning waoong sẽn tũ ne koom la zɩɩmã: Yaa a Zeezi Kirist. A waoongã pa tũ ne koom bal ye.+ Tũu ne koom la zɩɩm.+ Vʋʋsem sõngã kõta kaseto,+ bala vʋʋsem sõngã n yaa sɩdã. 7 Kaset-kõtb a tãab n be: 8 Yaa vʋʋsem sõngã,+ koomã,+ la zɩɩmã.+ La bãmb b tãabã kasetã pa kɩɩsd taab ye.

9 Tõnd sã n deegda ninsaalb kaseto, Wẽnnaam kasetã n yaa kãseng n yɩɩda. Ad kaset ning Wẽnnaam sẽn kõtã: Yaa kaset ning a sẽn kõ a Bi-riblã zugã. 10 Ned ning sẽn tẽed Wẽnnaam Bi-riblã tara kasetã a meng pʋgẽ. Ned ning sẽn pa tẽed Wẽnnaam, yaa wa a yetame tɩ Wẽnnaam yaa ziri yagda.+ Bala a pa tẽ kaset ning Wẽnnaam sẽn kõ a Bi-riblã zugã ye. 11 La ad kasetã: Yaa tɩ Wẽnnaam kõo tõnd vɩɩm sẽn ka sɛta,+ la vɩ-kãng bee a Bi-riblã+ pʋgẽ. 12 Ned ning sẽn sakd Bi-riblã tara vɩ-kãnga, la ned ning sẽn pa sakd Wẽnnaam Bi-riblã pa tar vɩ-kãng ye.+

13 Mam gʋlsda yãmb bõn-kãensã sẽn na yɩl tɩ y bãng tɩ yãmb a neb nins sẽn tẽed Wẽnnaam Bi-riblã yʋʋrã tara vɩɩm sẽn ka sɛta.+ 14 Ad bas-m-yam ning tõnd sẽn tar ne Wẽnnaamã:+ Yaa tɩ sẽn wa n yaa bũmb ning fãa la d kos tɩ zems ne a raabã, a kelgda tõndo.+ 15 La tõnd sã n miẽ t’a kelgda tõnd bũmb ning fãa tõnd sẽn kotã wɛɛngẽ, d miime me tɩ d na n paama bũmb nins d sẽn kotã, d sẽn kos bõn-kãensã yĩnga.+

16 Ned sã n yã a saam-biig t’a maand yel-wẽnd sẽn pa wat ne kũum, a segd n pʋʋsa a yĩnga, la Wẽnnaam na n kõo a soabã vɩɩm.+ Wẽnnaam na n kõo neb nins sẽn pa maand yel-wẽnd sẽn wat ne kũumã vɩɩm. La yel-wẽnd n be n wat ne kũum.+ Pa yel-wẽnd a woto yĩng la mam sẽn yeel t’a pʋʋsã ye. 17 Tʋʋm-wẽng buud fãa yaa yel-wẽnde,+ la yel-wẽnd n yaool n be n pa wat ne kũum ye.

18 Tõnd miime tɩ ned ning Wẽnnaam sẽn dog pa maand yel-wẽn ye. La soab ning Wẽnnaam sẽn dogã* kogenda nin-kãnga, la wẽng soabã pa tõe n maan-a bũmb ye.+ 19 Tõnd miime tɩ tõnd yita Wẽnnaam nengẽ, la dũniyã tõr bee wẽng soabã nugẽ.+ 20 Tõnd miime me tɩ Wẽnnaam Bi-riblã waame,+ la t’a kõo tõnd yam-vẽenem sẽn na yɩl tɩ d bãng Soab ning sẽn yaa sɩdã. La tõnd bee Soab ning sẽn yaa sɩdã pʋgẽ,+ a Bi-ribl a Zeezi Kirist maasem yĩnga. Yẽ n yaa Wẽnnaam sɩd-sɩdã la vɩɩm sẽn ka sɛtã.+ 21 Kom-bõonego, zãag-y y mens ne bõn-naands pʋʋsgo.+