Sak 26

A Zezi lebg n kula Kapɛrnawom

MASÃ a Zezi yʋʋrã ra yii zĩig fãa, tɩ neb wʋsg ra bʋʋgd-a tẽn-kɩrems nins a sẽn da beẽ wã. La rasem a wãn poore, a leba Kapɛrnawom, sẽn pẽ Galile Mogrã. Zĩig pʋgẽ bala a waoongã kɩbar saaga tẽngã fãa gilli, tɩ neb wʋsg waa zak ning a sẽn da beẽ wã. Fariziẽ rãmb la Tõogã karen-saam dãmb yii hal Zerizalɛm n wa.

Nebã ra yaa wʋsg n yãmb roogã noor hal tɩ weer da ka le be ned sẽn tõe n tũ n paam doogã pʋgẽ ye. Yaa woto fãa sʋk la bũmb sẽn yaa kãseng na n maane. Bũmb ning sẽn na n maan so-kãngã wã tara yõod wʋsgo. Bala a sõngda tõnd tɩ d bãng t’a Zezi tõeeme n kɩt tɩ bũmb ning sẽn wat ne ninsaal namsgã sa, la a lebs n kõ b rãmb nins a sẽn datã laafɩ.

A Zezi sẽn da wa n zãmsd nebã wakate, rap a naas n tall ki-bogr soab gãag zug n wa zakẽ wã. B ra ratame t’a Zezi sãoog b zoa wã, la kʋʋngã yĩnga b ra pa tõe n kẽ pʋgẽ ye. Ad yaa kaeto! La b pa koms raood n bas ye. B rʋʋ roogã zugu, n kɩbg võore, n tũnug be n sik ki-bogr soabã ne gãagã a Zezi taoore.

A Zezi sũur puuga b sẽn tiis a woto wã bɩ? Ayo. A sũurã meng yɩɩ noog wʋsg ne nin-kãensã tẽebã. A yeela ki-bogr soabã: “Fo paama f yel-wẽna sugri.” La a Zezi sɩd tõe n kõo yel-wẽn sugr bɩ? Gʋlsdbã la Fariziẽ rãmbã yẽ ra ka tagsd woto ye. B ra tagsda b sũyẽ wã woto: ‘Yaa wãn tɩ rao kãngã gomd woto? Bãmb tʋʋsda Wẽnnaam. Ãnda n tõe n kõ yel-wẽna sugri sã n ka Wẽnnaam bala?’

A Zezi bãnga b tagsgã n yeel-ba: “Yaa bõe tɩ yãmb tagsd woto y sũyã pʋsẽ? Bʋg n yaa naana n yɩɩda tɩ mam togs ki-bogr soabã: Fo paama f yel-wẽna sugri, wala tɩ yeele: Yik n dɩk f gãagã n kẽne?”

Rẽ poore, a Zezi kɩtame tɩ kʋʋngã ne a sãbsdbã yã bõn-kãseng sẽn na n wilg vẽeneg t’a tõeeme n kõ yel-wẽn sugr tẽng zugu, la tɩ sɩd yaa yẽ la zãmaan fãa nin-kãseng sẽn ka to wã. A wẽnemdame n yeel ki-bogr soabã woto: “Mam yeta foo tɩ f yik n dɩk f gãagã n kuili.” La zĩig pʋgẽ balã raoa yikame n dɩk a gãag n kẽnd n yit bãmb fãa taoore! Woto yɛɛsa nebã tɩ b pẽg Wẽnnaam n yeele: “Tõnd nan ka yã woto nand ye”!

Yãmb yãame t’a Zezi rɩka yel-wẽnã yell n tɩ mag ne bãasã bɩ? Y leb n yãame tɩ yel-wẽnã sugr yell me tɩ maga ne yĩns laafɩ yell bɩ? Biiblã wilgdame tɩ yaa tõnd yaab a Ãdem yel-wẽndã yĩng la ninsaal sẽn yikd bãas la a kiidẽ wã. La Wẽnnaam Rĩungã naam wakate, a Zezi na n kõo neb nins sẽn nong Wẽnnaam la b ya a sõgen dãmbã yel-wẽn sugri. La wakat kãng la bãasã fãa na n sa. Ad woto sɩd na yɩ sõma wʋsgo! Mark 2:1-12; Luk 5:17-26; Matɩe 9:1-8; Rom dãmb 5:12, 17-19.

▪ Sẽn deng ki-bogr soabã sãoogrã, yɛla ra yaa wãn-wãn zĩigẽ wã?

▪ Wãn to la ki-bogr soabã tõog n ta a Zezi nengẽ?

▪ Bõe yĩng tɩ tõnd fãa yaa yel-wẽn-maandba, la wãn to la a Zezi kõ saagr tɩ yel-wẽnã sugr la laafɩ zãng-zãngã tõe n paamame?