Sak 114

A Zezi kũumã tẽegr dɩɩbo

A ZEZI sẽn waas a tʋm-tʋmdbã nao wã poore, a lebs n dɩka Yɩɩl Sõamyã 41:10 goamã n yeele: “Ned ninga sẽn dɩt ne maamã zẽka a nao-kãsenkãar n tab maam.” Rẽ, a Zezi sũur sãamame t’a yeele: “Yãmb ned a ye n na n zãmb maam.”

Tʋm-tʋmdba sũy sãamame tɩ ned kam fãa sɩng n yet a Zezi: “Yaa maam bɩ?” Ba a Zida Iskariot meng naagame n sokdẽ. A Zã sẽn da zĩ n kɛg a Zezi wã kɩlla poorẽ n dell a yãoogã n sok-a: “Zusoaba, yaa ãnda?”

T’a Zezi leoke: “Yaa yãmb piig la a yiiba ned a yembre sẽn tʋmd a nug ne maam laagẽ wã. Ninsaal Biiga loogda wa sẽn gʋls bãmb yĩngã. La rao ninga sẽn na n zãmb Ninsaal Biiga na n paama toogo. Dao kãng ma sã n da ka rog-a n são.” Rẽ poore a Sʋɩtãan tũnuga ne a Zida sẽn lebg wẽngã n kẽ a pʋgẽ. Wa sẽn zemse, kaoosg zugẽ yʋʋn-kãnga, a Zezi boola a Zida tɩ “sẽn tog n sãam-a” wã.

A Zezi yeela a Zida woto masã: “Fo sẽn na n maan bũmb ninga bɩ f maan masã.” Tʋm-tʋmdb a taabã sʋka, ned ba a yembr ka wʋm a Zezi goama võor ye. Kẽer ra tagsdame t’a Zida sẽn zãad ligdã koglgã yĩngã, a Zezi ra yet-a lame t’a tɩ “ra bũmb nins bãmb sẽn data kibsa yĩnga,” bɩ t’a segd n tɩ kõo naong rãmbã bũmbu.

A Zida loogrã poore, a Zezi lugla bõn-paalga, bɩ bũmb b sẽn segd n maandẽ tɩ yaa tẽegre, ne a tʋm-tʋmdb nins sẽn yaa sakdbã. A rɩka burã n pʋʋs n ning barka, n kaoog-a, n dɩk n kɩs-b n yeele: “Bɩ y reeg n dɩ.” A paasame: “Wã yaa m yĩng m sẽn kõ yãmba, maan-y woto n tẽegd mam yelle.”—Sebr Sõngo.

Ned kam fãa sẽn dɩ burã n sɛ, a Zezi rɩka divẽ ne vɛɛre, sẽn yaa vɛɛr a naas-n-soab b sẽn yũud Pakã rɩɩb wakatã. A leb n pʋʋsame n ning divẽ wã barka, n dɩk n kɩs-b n yeel tɩ b yũ, la a yeele: “Bõn-yũudl kãngã yaa mam zɩɩm sẽn yaa [kaool] paalg zɩɩm sẽn daag yãmb yĩnga.”

Sɩda, woto ya a Zezi kũumã tẽegre. Yʋʋmd fãa Nizã kiuug rasem 14 raare, b segd n leb n maana woto n tẽeg a Zezi yelle, wa a sẽn yeelã. Rẽ tẽegda neb nins sẽn na n maan-a wã bũmb ning a Zezi ne a saasẽ Ba wã sẽn maan sẽn na yɩl tɩ ãdem-biisã põs kũumã. Sã n yaa ne Zʋɩf rãmb nins sẽn da na n lebg a Zezi karen-biisã, a Zezi kũumã tẽegr n da na n ledg Pakã.

Kaool paalgã sẽn paamd pãng ne a Zezi zɩɩmã sẽn daagã n ledgd pĩnd Tõogã kaoole. A Zezi Kirist la Kaool Paalgã sɛ-yõkda. Kaoolã maana Wẽnnaam a Zeova la kiris-neb 144 000 sẽn zae ne vʋʋsem sõngã sʋka. Kaoolã kɩtame tɩ b tõe n paam yel-wẽna sugri, a leb n kɩtame tɩ b tõe n zĩnig saasẽ rĩm dãmb la maan-kʋʋdb buudu. Matɩe 26:21-29; Mark 14:18-25; Luk 22:19-23; Zã 13:18-30; 17:12; 1 Korẽnt dãmba 5:7.

▪ Biiblã bãngr-gom-bʋg tũud-n-taag wɛɛngẽ la a Zezi tẽeg-yã, la a wilga rẽ võor wãn-wãna?

▪ Bõe yĩng tɩ tʋm-tʋmdbã sũy ra sãame, la bõe la bãmb ned kam fãa sok-yã?

▪ Bõe la a Zezi yeel a Zida t’a tɩ maane, la wãn-wãn la tʋm-tʋmdb a taabã wʋm dẽ võore?

▪ A Zida loogrã poore, bõn-paalg bʋg la a Zezi lugl-yã, la a yõod yaa bõe?

▪ Kaool paalgã maana ãnda ne ãnda rãmb sʋka, la bõe la a pidsda?