Sak 118

A Zezi zãmbgã la a yõkrã

A ZIDA sẽn da wa n talld sodaas kʋʋngã, maan-kʋʋdbã kãsem dãmbã, Fariziẽ rãmbã, la neb a taabã n kẽed Gɛtsemane zẽedẽ wã tɩ yʋʋn-sʋk ra paam n looga wʋsgo. Maan-kʋʋdbã sakame n na n yao a Zida wanzũri ligd bõoneg 30 t’a zãmb a Zezi n kõ-ba.

Sẽn deng wakat kãnga, a Zezi sẽn dag n yiis a Zida Pakã rɩɩbẽ wã, yaa vẽeneg t’a ra kell n yaka maan-kʋʋdbã kãsem dãmb nengẽ. Zĩig pʋgẽ bala, bãmb me tigma b gard dãmba, n paas sodaas sulli. Tõeeme t’a Zida rengame n tall-b n kẽng zĩig ning a Zezi ne a tʋm-tʋmdbã sẽn maan Pakã. Kʋʋngã taa be n mik tɩ b loogame. Dẽ b yii be ne b zab-teedã la b fɩtl dãmbã ne bug-vɩlensã n pʋg a Zida n yi Zerizalɛm n dʋʋg Sedrõ Longã.

A Zida sẽn da wa n dʋʋd oliiv tɩɩs tãngã ne kʋʋngã, a ra mii a sẽn na n yã a Zezi zĩig ninga. Rasem a yopoe wã sẽn loogã pʋgẽ, a Zezi ne a tʋm-tʋmdbã sẽn wa n yit Betani n debd Zerizalɛm la b lebdẽ wã, b ra mii n tek n yalsa Gɛtsemane zẽedẽ wã n vʋʋse, la b sõs ne taaba. La masã tõeeme t’a Zezi sẽn da be oliiv tɩɩsã tẽngr likã pʋgẽ wã, b ra ka ne-a vẽeneg ye. Wãn to la sodaasã ra na n bãng-a n bake? Tõe tɩ b ra zɩ n yã-a pĩnd ye. Rẽ n so t’a Zida kõ-b bãnde, n yeele: “Ned ninga mam sẽn na n mokã, yaa bãmba. Bɩ y yõk bãmba n tall n looge.”

A Zida talla kʋʋngã n kẽ zẽedã pʋgẽ, n yã a Zezi ne a tʋm-tʋmdbã, n kell n tees a Zezi nengẽ. “Karen-saamba, mam pʋʋsda yãmba,” woto la a yeel-yã, la a mok-a sõmb-sõmbo.

Dẽ a Zezi soka a Zida: “M zoa, bõe yĩng tɩ fo be ka?” (NW ) Rẽ poore, yẽ mengã lebg n leoka sokrã, n yeele: “Zida, fo zãmbda Ninsaal Biiga ne mokr la?” La a yama ra yaa n yii ne a zãmbdã! A Zezi kolg n puka bug-vɩlensã la fɩtl dãmbã vẽenem pʋgẽ, n soke: “Yãmb baooda ãnda?”

Tɩ b leok tɩ yaa “Nazarɛt dao a Zezi.”

T’a Zezi yaas b taoor ne raood n leok tɩ “yaa maam.” A Zezi raoodã sẽn ling-bã, la b sẽn da ka mi bũmb ning sẽn na n yɩ wã, neba tarame n lʋɩ tẽnga.

A Zezi kell n maaga a yĩng n yeele: “Mam togsa yãmb tɩ yaa maam. Woto yĩnga, yãmb sã n baood maam, bɩ y bas neb kãens tɩ b looge.” Bilf sẽn deng rẽ, zugẽ doogẽ wã a Zezi ra yeela a Ba wã pʋʋsg pʋgẽ t’a gũu a tʋm-tʋmdbã sẽn yaa sakdbã, la bãmb sʋka ned ba a ye ka menem ye, “sã n ka sẽn tog n sãam-a” wã. Dẽ, sẽn na yɩl t’a sẽn yeelã paam pidsgu, a kosame tɩ b bas karen-biisã tɩ b looge.

Sodaasã sẽn leb n paam daood n yik n sɩng a Zezi sẽbrã, tʋm-tʋmdbã bãnga sẽn watã masã. Dẽ la a Pɩɛɛr sok-yã: “Zusoaba, d kɛ bãmb ne sʋʋs bɩ?” A Zezi ka yã n leok t’a Pɩɛɛr yiis sʋʋg a yembr sʋʋs a yiibã b sẽn tall n wa wã sʋk n na n zab ne a Malkus, sẽn yaa maan-kʋʋd kãsmã yambã. A Pɩɛɛr kɛɛga yambã zug n yõsg n fiuug a rɩtg tʋbrã.

T’a Zezi kẽ sʋk n yeele: “Base, da maan woto ye!” A sɩɩsa a Malkus tʋbrã n maag sãmpogrã. Rẽ poore a kõo zãmsg sẽn tar yõod wʋsgo, n kõ a Pɩɛɛr noor woto: “Sui f sʋʋga a wʋʋgẽ, tɩ bõe, neb nins fãa sẽn zãad sʋʋsã, yaa sʋʋg n na n kʋ-ba. Fo ka mi tɩ mam tõe n pʋʋsa m Ba tɩ b kõ maam malɛk rãmb tus pis-yopoe la a yiib la?”

A Zezi ra saka a yõkrã, bala a wilgame: “Gʋlsg Sõamyã nins sẽn wilg tɩ yaa tɩlae tɩ yɩ woto wã na n yɩɩ wãn n paam pidsgu?” La a paase: “Bõe n maan tɩ m na n bas bõn-yũudl ninga m Ba sẽn kõ maama n ka yũ?” A ra saka Wẽnnaam sẽn dat bũmb ning fãa yẽ wɛɛngẽ wã zãng fasɩ!

Rẽ poore a Zezi goma ne kʋʋngã, n soke: “Yãmb waa ne sʋʋse la roɛya n na n yõk maam wa yãmb sẽn dat n zab ne fãada?” La a yeele: “Mam da bee ne yãmb daar fãa n zãmsd neba Wẽnnaam doogẽ la yãmb ka yõk maam ye. La bõn-kãens fãa maaname tɩ bũmb nins Wẽnnaam no-rɛɛsdba sẽn gʋlsa paam pidsgu.”

A sẽn yeel dẽ, sodaasã ne b naaba, n paas Zʋɩf rãmbã gard dãmb yõka a Zezi n sẽbe. Tʋm-tʋmdbã sẽn yã rẽ wã, b zoeeme n bas-a. La bi-bɩɩg n pa ne kʋʋngã, la tõeeme tɩ ra yaa karen-biig a Mark. Tõe t’a ra bee zak ning a Zezi sẽn maanẽ Pakã pʋgẽ, n yi be n tũ kʋʋngã. Masã, neba bãng-a lame, n da baood-a n na n yõke. La a basa a fuugã bãmb nugẽ la a zoe. Matɩe 26:47-56; Mark 14:43-52; Luk 22:47-53; Zã 17:12; 18:3-12.

▪ Bõe yĩng t’a Zida ra mi vẽeneg t’a na n yãa a Zezi Gɛtsemane zẽedẽ wã?

▪ Wãn to la a Zezi wilg t’a karen-biisã yell pak-a lame?

▪ Bõe la a Pɩɛɛr maan n na n sõng a Zezi, la bõe la a Zezi yeel a Pɩɛɛre?

▪ Wãn-wãn la a Zezi wilg t’a saka a Ba wã sẽn dat bũmb ning yẽ wɛɛngẽ wã zãng fasɩ?

▪ Tʋm-tʋmdbã sẽn zoe n bas a Zezi wã, ãnda n pa, la bõe n maan-a?