Wẽnnaam datame tɩ d vɩɩmã yɩ wãn-wãna?

YÃMB sã n karem zʋrnalle, bɩ n ges televiziõ wã wall y kelg radio wã, y mikdame tɩ b gomda bi-be-tʋʋma, zab la yel-beed a taab yell n yɩɩda. Tõe tɩ yãmb mengã bẽedame, pa rẽ bɩ ned y sẽn nong n maan kaalem tɩ namsd-yã.

Sok-y y meng yaa:

• Wẽnnaam datame tɩ maam ne m zakã rãmb vɩɩm yɩ woto bɩ?

• Yɛ la m tõe n paam sõngr n tõog n mao ne m zu-loeesã?

• Laafɩ na n wa zĩnda tẽngã zug bɩ?

Biiblã leokda sogs-kãensã.

BIIBLÃ WILGDAME TƖ WẼNNAAM NA N MAANA BÕN-KÃSEMS TẼNGÃ ZUGU.

• Ned pa na n le namse, n kʋʋl bɩ n ki ye.—Vẽnegre 21:4

• “Woabg na n yɩk n tiimsa wa yĩisri.”—Ezayi 35:6

• “Zoens nin na n pugsame.”—Ezayi 35:5

• Sẽn ki-bã na n vʋʋgame.—Zã 5:28, 29

• Ned kõn yeel t’a ka keem ye!—Ezayi 33:24

• Nebã fãa na n paama rɩɩb tɩ seke.—Yɩɩn-sõamyã 72:16

  

BIIBLÃ SẼN YETÃ TÕE N NAFA YÃMBA

Tõeeme tɩ y tagsdame tɩ y sẽn karem bũmb ning sebrã sɩngrẽ wã yaa soalem bala. La Wẽnnaam pʋlmame tɩ ka la bilfu, a na n maana woto tẽngã zugu. Biiblã wilgda a sẽn na n maan rẽ to-to.

Pa rẽ bal la Biiblã togsd ye. A wilgda d sẽn segd n bãnge, n tõog n paam sũ-noog hakɩɩk rũndã-rũndã. Tags-y bũmb nins sẽn namsd yãmbã yelle. Tõe tɩ yaa ligd zu-loɛɛga, zak pʋgẽ zu-loeese, bãaga, wall ned y sẽn nong n maan kaalem. Biiblã tõe n sõnga yãmb tɩ y mao ne y zu-loeesã. Sẽn paase, a na n sõng-y lame tɩ y paam sogsg kẽer leoore, tɩ keng y raoodo. Wala makre:

• Bõe yĩng tɩ d namsdẽ?

• Wãn to la d tõe n mao ne zu-loeesã?

• D zakã pʋgẽ vɩɩm tõe n yɩɩ noog bɩ?

• Ned sã n ki, a tɩ vɩɩ zĩig a to bɩ?

• D na n wa yãa d neb nins sẽn ki wã bɩ?

• Bõe yĩng tɩ d tõe n kɩs sɩd tɩ Wẽnnaam na n pidsa a sẽn pʋlmã fãa?

Yãmb sẽn karemd seb-kãngã wã wilgdame tɩ y rat n bãnga Biiblã sẽn yetã. Sebrã na n sõng-y lame. Sull fãa tara sokr sẽn na n sõng-y tɩ y wʋm Biiblã goamã võor sõma. Neb milyõ rãmb n zãmsd Biiblã ne a Zeova Kaset rãmbã. D saagdame tɩ yãmb me na n zãmsame. Y sã n wa bãng Biiblã sẽn yetã, Wẽnnaam na n ning-y-la barka.