Tʋʋl-nifu

A Sʋɩtãan da yaa malɛg-sõngo, n da be ne a Zeova. La a wa n yik n datame tɩ ninsaalbã waoogd yẽ wa b sẽn waoogd Wẽnnaamã. A ra tõe n yiisa tʋls-kãng a sũurẽ wã tao-tao, la a pa maan woto ye. A basame tɩ tʋls-wẽngã paam pãnga, hal t’a wa maan yel-wẽnde. (Zak 1:14, 15) A ka ‘pa sɩdã pʋgẽ ye.’ A kɩɩsa a Zeova, n lebg “ziri ba.” (Zã 8:44) A Sʋɩtãan kɩɩsgã tɛka, a lebga a Zeova bɛ-kãsenga, la a kis ninsaalbã me. D sã n ges Biiblã sẽn gomd a yell to-to wã, d bãngdame t’a sɩd yaa wẽng wʋsgo. Gom-bil ning sẽn yaa Sʋɩtãanã rat n yeelame tɩ “kɩɩsda,” tɩ wilgdẽ t’a kɩɩsda a Zeova, n maand a sẽn tõe fãa sẽn na yɩl tɩ malɛgsã la ninsaalbã ra teel a naamã ye. A sẽn dat yaa b fãa sẽn na n bas a Zeova sakre. w15 1/5 1:1, 2

D sã n karemd Biiblã, d bãngda d sẽn tõe n maneg n tũ a Zeova sõma to-to. Sẽn paase, d bãngda bõn-sõma nins a sẽn maan tõnd yĩnga, la a sẽn yaa Wẽnnaam ning buudã me, tɩ rẽ na n kɩt tɩ d maneg n nong-a. La d sã n nong-a, yẽ me na n nonga tõndo, tɩ d zoodã pãng paasdẽ. La d sã n dat tɩ d Biiblã karengã paas tõnd ne a Zeova zoodã pãnga, d segd n karma ne yam-sõngo. Zã 17:3 yetame: ‘Vɩɩm sẽn ka sɛtã yaa woto, tɩ bãmb na bãng yãmb sẽn yaa sɩd Wẽnnaam sẽn ka to, la a Zezi Kirist yãmb sẽn tʋm a soabã.’ Rẽnd d sã n karemd Biiblã, pa sẽn na n pids d zug ne bãngr bal ye. Yaa sẽn na yɩl n “bãng” a Zeova sõma. (Yikr 33:13; Yɩɩl 25:4) Y tõe n wa karma Biiblã kibar sẽn gomd bũmb a Zeova sẽn maan yelle, n pa wʋmd a sẽn maanã võor sõma ye. La y sã n mi a Zeova sõma, y pa na n sãam y sũuri, n tagsdẽ t’a sẽn maanã pa zems ye. w15 1/4 3:6-8

Sẽn nan pa kaoose, b sõsa ne kãsem-dãmb sẽn tõogd n sõngd saam-biis tɩ b minimã paasdẽ. B kos-b lame tɩ b wilg b sẽn maand to-to. Baa sẽn yaa tẽns toor-toor nebã, b sẽn yeel bũmb ninsã wõnda taaba. Bõe la rẽ wilgda? Wilgdame tɩ “zĩigã fãa,” d sã n tik Biiblã goam n na n sõng ned t’a minimã paase, nafd-a lame. Y sã n dat n sõng ned t’a minimã paase, bũmb toor-toor la y segd n deng n maane, t’a sak tɩ y zãms-a. Bõe yĩng tɩ rẽ tar yõodo? Ka-koaad sã n dat t’a kood bɩ sõma, a segd n deng n manega pʋʋgã n yaool n bʋde. Yãmb me sã n dat n sõng ned t’a minim paase, y segd n deng n sõng-a lame t’a yamã kẽ zãmsgã. La wãn to la y tõe n maan dẽ? No-rɛɛs a Sãmwɛll sẽn wa n na n yãk a Sayull t’a lebg Israyɛll rĩmã, a maana bũmb tɩ yɩ sõma, tɩ y tõe n dɩk a togs-n-taare.—1 Sãm. 9:15-27; 10:1. w15 1/4 1:11, 12

Dũniyã rãmb sẽn dat tɩ d maan bũmb ninsã wʋsg pa zems ne Biiblã noy ye. Yaa sɩd tɩ bũmb nins fãa sẽn be dũniyã pʋgẽ wã pa wẽng ye. La d tõe n kɩsa sɩd t’a Sʋɩtãan tũnugda ne bõn-kãens n makd tõndo, n dat tɩ d sak d tʋlsem toor-toorã n maan sẽn pa segde. A tõe n maana sɩlem me n kɩt tɩ dũniyã yamleoog kẽ tõnd tɩ d pa le tũud a Zeova ne yẽesem ye. (1 Zã 2:15, 16) Pipi kiris-neb kẽer yam n wa n kẽ dũniyã. Wala makre, a Poll yeela woto: “A Demas basa maam . . . a sẽn nong dũniyã yĩnga.” (2 Tɩm. 4:10) Biiblã pa wilg sẽn yaa dũniyã bũmb ning yamleoog n kẽ a Demas t’a bas a Poll pʋgbã ye. La tõe t’a wa n nonga laogã n yɩɩd a Zeova tʋʋmdã. Baa sẽn yaa a soab fãa, a Demas konga tʋʋmd sẽn yaa zu-zẽkr bũmb zaalem bala. Sɩd me, a Demas sã n da kell n yɩ a Poll sõngda, a Zeova ra na n ning-a-la barka, tɩ yɩɩg bũmb nins fãa a sẽn da tõe n paam dũniyã pʋgẽ wã hal zĩig sẽn zãre.—Yel. 10:22. w15 1/5 2:10, 11

A Zezi sã n da yã ned sẽn tar zu-loɛɛga, a mii rẽ sẽn namsd-a to-to wã, baa yẽ mengã sẽn zɩ n paam zu-loe-kãng buudã. Wala makre, a ra miime tɩ neb wʋsg zoeta tũudmã taoor dãmbã, bala, b ra zãmsd-b-la bũmb kẽer sẽn pa sɩda, la b weoogd-b ne noy wʋsg sẽn pa yit Wẽnnaam Gomdã pʋgẽ ye. (Mat. 23:4; Mark 7:1-5; Zã 7:13) Baa a Zezi sẽn da pa zoet tũudmã taoor dãmbã, la a pa tẽed b ziri wã, a ra mii neb nins sẽn zoet-bã sẽn namsd to-to wã. Rẽ n so t’a ‘sẽn yã kʋʋngã, b nimbãaneg yõk-a lame,’ bala, “bãmb sũyã sãama wʋsgo, la bãmb pãngã fãa sɛɛme. Bãmb yaa wa piis sẽn ka tar kɩɩm ye.” (Mat. 9:36) A Zezi ra nonga nebã la a zoet b nimbãaneg wa a Ba wã. A Zezi sã n da yã ned sẽn namsde, a sõngd-a-la a sẽn nong-a wã yĩnga. Rẽnd a yaa wa a Ba wã bal kɛpɩ. Daar a ye, a Zezi tʋm-tʋmdbã gilga wʋsg n moon koɛɛgã n ya. B lebg n waame, tɩ bãmb ne a Zezi baood zĩig neb sẽn ka be n na n vʋʋse. La b sẽn ta be, b mikame tɩ neb n deng taoor n tɩ gũud-ba. A Zezi sẽn bãng tɩ b rata sõngrã, a “sɩngame n zãms bãmb bũmb wʋsgo.”—Mark 6:30, 31, 34. w15 1/5 4:3, 4

Wẽnnaam sẽn naan a pipi Bi-riblã to-to wã wilgdame t’a yamã ka koak ye. Sɩd me, a sẽn naan-a to-to wã n wilgd a yam-kãsengã n yɩɩd bõn-naandsã fãa. Wẽnnaam sẽn wa n naand tẽngã la bũmb a taabã t’a Bi-riblã ra be a “sɛɛgẽ wa tʋʋm-mita.” Mams-y-yã a Zezi sũur sẽn yɩ noog to-to, a sẽn wa n get a Ba wã sẽn naand saasã la tẽngã. La bũmb nins Wẽnnaam sẽn naanã sʋka, ninsaalbã n kõ a Zezi sũ-noog n yɩɩda. (Yel. 8:22-31) Rẽnd a Zezi sɩng n nonga ninsaalbã nand t’a wa tẽngã zugu. Kaoosg zugẽ, a Zezi sẽn nong a Ba wã n sakd-a wakat fãa wã, n paas a sẽn nong ninsaalbã kɩtame t’a sak n ‘bas a naamã’ saasẽ, n wa lebg ninsaala. A maana woto sẽn na yɩl n ‘kõ a vɩɩmã tɩ yao neb wʋsg yĩnga.’—Fil. 2:5-8; Mat. 20:28. w15 1/6 2:1, 2

Fo sũur nooma ne bũmb nins a Zeova sẽn maan f yĩngã bɩ? Sã n yaa woto, zemsame tɩ f rɩk f meng n kõ a Zeova n deeg lisgu. F sã n dɩk f meng n kõ a Zeova, f pʋlm-a lame tɩ baa sẽn wa n yaa a soaba, f na n maana a raabã. La rẽ pa segd n kɩt tɩ f yɛɛsdẽ n pa rat n maan woto ye. Tẽeg t’a Zeova rata f neere, la t’a ‘ronda neb nins sẽn baood-a’ wã. (Ebre. 11:6) Ra tags tɩ f sã n dɩk f meng kõ a Zeova n deeg lisgu, f weoogda f meng ye. F vɩɩmã pʋd n na n maneg n yɩɩ noogo. A Sʋɩtãan yẽ yaa toor fasɩ ne a Zeova. A yaa rat-m-ye soaba, n pa baood f neer ye. A pa na n kõ foo bũmb sẽn na n naf foo wakat fãa ye. A pa tõe n pʋlem foo bũmb yẽ mengã sẽn pa tar ye. w16.03 2:16, 18, 19

Y sã n dat tɩ yãmb ne a Zeova zoodã tall pãnga, y segd n kɩsa sɩd t’a kelgda pʋʋsgo. Nand t’a Zezi wa tẽngã zugu, a ra bee saasẽ. A yã a Zeova sẽn leokd neb nins sẽn tũud-a wã pʋʋsg to-to. A Zezi sẽn wa n be tẽngã zugã, a ra pʋʋsda a Ba wã n togsd-a bũmb ning sẽn pak-a. Vugri, a pʋʋsa yʋng tõre. (Luk 6:12; 22:40-46) Sẽn paase, a wilga a karen-biisã b sẽn tog n pʋʋs a Zeova to-to. A Zezi sã n da pa tagsdẽ t’a Zeova kelgda pʋʋsgo, a ra na maanẽ woto sɩda? Vẽenega, a ra kɩsa sɩd t’a Zeova kelgda pʋʋsgo. Tõnd me tõe n kɩsa sɩd t’a Zeova kelgda pʋʋsgo.—Yɩɩl 65:3. w15 1/4 3:11, 13

Y sã n wae n pʋʋsdẽ tɩ y kambã kelgdẽ, tõe n kɩtame tɩ b bãng teeg a Zeova sẽn dat n yɛɛlga. A Ana sẽn yaa Berzill pagã yeela woto: “Mam doagdbã sã n wa tar zu-loeese, wala makre, m yaab-raoog wall m yaab-poak sã n wa lʋɩ bãaga, b pʋʋsda a Zeova n kos t’a kõ-b raoodo, la a kõ-b yam tɩ b bãng b sẽn segd n maanega. Baa m doagdbã sã n wa tar zu-loe-kɛgemse, b basda yellã a Zeova nugẽ. Woto kɩtame tɩ mam bãng tɩ m segd n teega a Zeova.” Y sã n wa pʋʋsdẽ tɩ y kambã kelgdẽ, bɩ y ra pʋʋs b yĩng bal ye. Kos-y-yã a Zeova t’a sõng yãmb me. Tõe tɩ y na n kosame t’a sõng-y tɩ y tõog n bõos y tʋʋmdã taoor soab sor sẽn na yɩl n kẽng tigis-kãsenga, wall y kos t’a kõ-y raood tɩ y moon y yak ning koɛɛgã, pa rẽ bɩ y kos bũmb a to. Y sã n sik y meng n wilg tɩ y teega Wẽnnaam, y kambã me na n maana woto. w15 1/11 1:7, 8

Bũmb f sẽn tõe n maan tɩ kɩt tɩ f maneg n nong a Zeova yaa f sẽn na n bʋgs bõn-kãseng ning a sẽn maan n wilg t’a nonga tõndã zugu. Bõn-kãng yaa a sẽn tʋm a Zeezi t’a wa ki tɩ yɩ maoongã. (2 Kor. 5:14, 15; 1 Zã 4:9, 19) F sã n bʋgsd rẽ sẽn tõe n naf foo to-to wã, na n kɩtame tɩ f rat n wilg tɩ f sũur yaa noogo. D tõe n dɩka makr n wilg f sũur sẽn segd n yɩ noog ne a Zeezi sẽn ki tɩ yɩ maoongã võore. Mams wa fo sẽn na n lʋɩ koomẽ tɩ koomã rat n dɩ-fo, tɩ ned kẽ n yiis-fu. Fo na n kulame, n tɩ toeem f futã la f yĩm nedã sẽn maan bũmb ningã sɩda? Ayo! Yaa vẽeneg tɩ f sũur na n yɩɩ noog ne nin-kãng f yõor tɛka. Sɩd me, yaa yẽ maasem yĩng la f sẽn ket n vɩ wã. La a Zeova ne a Zeezi Kiris sẽn maan bũmb ningã yɩɩda rẽ hal zĩig sẽn zãre. B sẽn maan woto n wilg tɩ b nonga tõndã yĩnga, d saagdame n na n wa vɩɩmd arzãnã pʋgẽ tẽngã zug wakat sẽn kõn sa. w16.03 2:16, 17

A Zeezi zĩnda ne Wẽnnaam n kaoos saasẽ, n da sakd-a ne a sũur fãa. Woto kɩtame t’a Zeova ra kɩs sɩd t’a Bi-riblã sã n wa tẽngã zugu, a na n saka yẽ. Baa b sẽn nams a Zeezi wʋsgã, a kell n saka Wẽnnaam, la a teel a naamã. D sũur segd n yɩɩ noog a Zeezi sẽn ki tɩ yɩ maoongã. Bala, paka sor tɩ ninsaalbã tõe n wa vɩɩmd wakat sẽn kõn sa dũni-paalgã pʋgẽ. Tʋm-tʋmd a Zã yeela woto: “Ad Wẽnnaam sẽn puk b nonglmã to-to tõnd yĩnga: Bãmb tʋma b Bi-ribl yendã dũniyã pʋgẽ tɩ tõnd tõe n paam vɩɩm bãmb maasem yĩnga. Nonglem-kãng ka tõnd sẽn nong Wẽnnaam yĩng ye, yaa bãmb sẽn nong tõndo, n tʋm b Bi-riblã tɩ b yɩ maoong tõnd yel-wẽnã sugr kũun yĩnga.”—1 Zã 4:9, 10. w15 1/11 3:13, 14

D sẽn yaa a Ãdem yagensã, d roga ne yel-wẽndã, n yaa kiidba. Tõnd ned baa a ye pa tõe n yeel t’a Zeezi sẽn ki tɩ yɩ maoongã pa nafd-a ye. Baa ned sẽn sakd Wẽnnaam ne a sũur fãa segd n bãngame t’a ket n datame tɩ Wẽnnaam tik a Zeezi maoongã, n zoe a nimbãanega. Tõnd ned baa a ye pa segd n yĩm tɩ Wẽnnaam kõ-a-la sugr naoor wʋsg ye. A Zeova nonglmã la a nimbãan-zoeerã segd n kɩtame tɩ d maan bõe? Yɩta sõma tɩ d sok d meng woto: ‘M tẽed-n-taag n maan bũmb tɩ m sũur sãam bɩ? Yaa toog ne maam tɩ m kõ-a sugr bɩ?’ Sã n yaa woto, bɩ y rɩk a Zeova sẽn ‘yaa Wẽnnaam sẽn kõt sugrã’ togs-n-taare. (Nee. 9:17; Yɩɩn. 86:5) D sũur sã n noom ne a Zeova sẽn kõt-d sugr baa ne d sẽn beegd-a naoor wʋsgã, tõnd me na n zoeta d taabã nimbãanega, n kõt-b sugr ne d sũur fãa. D sã n dat t’a Zeova nong tõnd la a kõt-d sugri, tõnd me segd n nonga d tẽed-n-taasã la d kõt-b sugri. (Mat. 6:14, 15) Yaa sɩd tɩ d sã n kõ d to sugri, pa yẽesd bũmb ning a sẽn maanã ye. La yaa vẽeneg tɩ na n sõngame tɩ d beoog vɩɩmã yɩ noogo. w16.01 2:5, 15-17

A Zezi ra ratame t’a Pɩɛɛr ne karen-biis a taabã tagsd bõn-sõma nins b sẽn na n wa paamã yelle. Rẽ n so t’a togs-b rũndã vɛrse wã goamã. Rẽnd a Pɩɛɛr ne karen-biis a taabã ra tõe n tagsda wakat ning b sẽn na n dɩ naam ne a Zezi saasẽ wã yelle, n mamsd b sẽn na n sõng wẽn-sakdb nins sẽn na n vɩɩmd tẽngã zugã to-to. D bãnga bũmb ning sẽn sõng pĩnd wẽndẽ wẽn-sakdbã tɩ b tall tẽeb sẽn tar pãngã. A Abɛll ra tẽeda bũmb ning a Zeova sẽn pʋlmã, n da mamsd vɩɩmã sẽn na n yɩ noog to-to beoog-daarã. A Abrahaam ra mamsda a Zeova sẽn yeel bũmb ning “yagengã” zugã sẽn na n pids wakat ningã, tɩ sõng-a t’a kell n sak a Zeova baa sẽn da mi n pa nana wã. (Sɩng. 3:15) A Moiiz ra “geta keoor sẽn be taoore,” tɩ rẽ kɩt t’a ra tẽed a Zeova la a nong-a. (Heb. 11:26) Tõnd sẽn tẽed a Zeova la d nong-a wã, na n sõng-d lame tɩ d mams d yamẽ a sẽn pʋlem bũmb ninsã. w15 1/5 3:17, 18

Kiris-ned ning fãa sẽn dat n bɩ segd n dɩka a Zeezi naoore, n bao n wʋm Biiblã goam võor sõma. A na n vaeesda Biiblã sõma wakat fãa, bala, a miime tɩ “rɩ-taok yaa neb sẽn bɩ yĩnga.” (Ebre. 5:14) A sẽn dat yaa bãng “Wẽnnaam Bi-riblã” sõma. (Efɛ. 4:13) Bɩ y sok y meng woto: ‘Mam yãka wakat n karemd Biiblã daar fãa bɩ? Mam tara wakat n zãmsd Biiblã bɩ? Mam yãka daar n maand zak pʋgẽ Biibl zãmsgã semen fãa bɩ?’ Y sã n wa zãmsd Biiblã, bɩ y maag y yĩng n bʋgs y sẽn karemdã zugu, tɩ y na n yãa sagls sẽn na n sõng-y tɩ y bãng a Zeova n paase. Dẽ poore, y sã n wa rat n maan bũmb bɩ y tũ sagl-kãense. Woto, yãmb ne a Zeova zoodã pãng na n tara paasgo. w15 1/9 1:5, 9, 10

A Zezi mii tẽngã ne a bũmbã fãa sõma. A mi a sẽn na n maan to-to tɩ bõn-kãens naf ninsaalbã. A Zezi sẽn wa n be tẽng zugã, a wilgame tɩ Wẽnnaam kõ-a-la tõog t’a tõe n kɩt tɩ koomã, sobgã la tẽngã bũmb a taab tũ yẽ raabã. Mams-y yɛlã sẽn yɩ to-to wã. Ko-pɛmã ra wat n wẽeda koglgã, tɩ koomã kẽedẽ. Baa ne sobgã la sa-tãsã bʋrgã, n paas koglgã sẽn lengdã, a Zezi ket n gõeeme, bala, a yaa wʋsgo. La karen-biisã ra yɛɛsdame. Rẽ n so tɩ b nek a Zezi n yeel woto: “Tõnd dat n kiime!” (Mat. 8:25) Bõe la a Zezi maan-yã? A tik n yikame, n leng sobgã la a yeel mogrã woto: “Sĩndi, bas bʋʋre.” (Mark 4:39) Sobgã yõkame, la “zĩigã lebga sɩddd.” Woto pa wilgd t’a Zezi tõe n kɩtame tɩ koomã, sobgã la tẽngã bũmb a taabã tũ a raabã sɩda? w15 1/6 1:12-14

A Zezi sẽn wilg d sẽn segd n pʋʋs to-to wã poore, a yeelame tɩ d gũus tɩ ra wa lebg tõnd mengã yell n pak-d n yɩɩd ye. A yeela woto: “Yãmb tẽeb bilf rãmba! Wẽnnaam sã n maneg mood tɩ yɩ neer woto, . . . bãmb kõn ges yãmb yell hal wʋsg n yɩɩda? Rẽ poore, a paasame: “Bɩ y ra maan yɩɩr ne beoog yell ye.” (Mat. 6:30-34) Woto wilgdame tɩ d pa segd n yɩ neb sẽn nong ligd ye. D segd n kɩtame tɩ bũmb nins sẽn yaa tɩlae ne-dã sek-do. Wala makre, ro-gãaga, la tʋʋmd sẽn tõe n sõng tɩ d ges d zakã rãmb yelle. Bãag sã n wa kẽ sʋk me, d tõe n pʋʋs n kosa yam sẽn na yɩl n bãng d sẽn tõe n maan bũmb ninga. La bũmb a taab n be n tar yõod n yɩɩd bõn-kãense, tɩ d segd n pʋʋs rẽ yĩnga. A Zezi sẽn yeel tɩ d pʋʋs n kos tõnd noor dɩɩbã tẽegda tõnd bũmb a to a sẽn yeele. A ra yeela woto: “Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Mat. 4:4) Rẽnd d segd n ket n pʋʋsda a Zeova n kotẽ t’a sõngd-d tɩ d wʋmd a goamã võore. w15 1/6 5:4, 7, 8

D pʋʋsda Wẽnnaam wakat fãa t’a sõng-d tɩ d kell n sak-a, baa d sã n wa be makr taoor bɩ? Nand tɩ d bãng a Zeova, tõe tɩ d ra nong n maanda bũmb kẽer sẽn pa tat a yam. Tõe tɩ d yam mi n ket n bee bõn-kãens maanego. Baa sã n yaa woto, a Zeova tõe n sõng-d lame tɩ d toeeme, n tõog n tũ-a wa a sẽn datã. Rĩm a Davɩɩd ra mii rẽ. A sẽn yo ne a Batseba wã poore, a pʋʋsa a Zeova n kos woto: “Bɩ y maan sũur sẽn tar pʋ-peelem n kõ maam, la y leb n kõ maam yam sõma sẽn ka yuusd ye.” (Yɩɩl 51:12, 14) Rẽnd d sã n da yaa ned sẽn nong yoobo, tɩ d yamã mi n ket n be yoobã, d tõe n kosa a Zeova t’a sõng-d tɩ d maan sẽn yaa tɩrga. A tõe n kɩtame tɩ d rat n sak a noyã ne d sũur fãa. A tõe n sõng-d lame tɩ d ra bas tɩ wẽng soog-d ye.—Yɩɩl 119:133. w15 1/6 3:5, 6

Pĩndã, tiging fãa pʋgẽ, ra yaa kãsem-soab a ye la b yãkd t’a lʋɩt taoore, tɩ rũndã-rũndã yaa kãsem-dãmb sulli. Filiyall fãa ra tara a taoor lʋɩta. La rũndã-rũndã, yaa taoor lʋɩtb sull n get filiyall fãa yelle. Sosiete Wats Tawa ra tara perzidã, tɩ yaa yẽ n get koɛɛgã mooneg yell dũniyã gill zugu. La rũndã-rũndã, yaa Siglgã taoor lʋɩtb Sull n maand rẽ. Yaa sɩd tɩ b ra yãkda saam-biis tɩ b sõngd sẽn lʋɩt-b taoorã. La tiging fãa pʋgẽ, filiyall fãa pʋgẽ, la tõnd biru-kãsengã pʋgẽ, yaa nin-yɛng n da yãkd yam nebã fãa yĩnga. Yɩɩ yʋʋmd 1970 soabã loogr poor la b toeem tɩ lebg kãsem-dãmb sull n dɩkd sard tiging fãa pʋgẽ, filiyall fãa pʋgẽ, la tõnd biru-kãsengã pʋgẽ. Sẽn paase, sẽn lebg kãsem-dãmb sull n dɩkd sard nebã fãa yĩngã, kɩtame tɩ nin-kãensã fãa zʋg-sõma wã nafd a Zeova siglgã nebã. Sɩd me, kãsem-dãmbã yaa kũun Wẽnnaam sẽn kõ tõndo.—Efɛ. 4:8, MN. w15 1/7 1:14, 15

Kiris-neb hakɩɩkã miime tɩ b segd n saka Wẽnnaam wakat fãa, la b ra kẽes b toog dũniyã yɛl pʋsẽ ye. Bõe yĩnga? Bala, d sẽn dɩk d mens n kõ a Zeova wã, d pʋlm-a lame tɩ d na n nong-a lame la d sakd-a ne d sũur fãa. (1 Zã 5:3) D rat n tũu Wẽnnaam noyã wakat fãa. Rẽ pa be ne d sẽn vɩ zĩig ninga, d sẽn yit tẽng ninga, wall d minimdã ye. A Zeova la a Rĩungã sakr n tar yõod n yɩɩd bũmb fãa. (Mat. 6:33) Yaa rẽ n kɩt tɩ d pa kẽesd d toog dũniyã no-koɛɛmã la a zabã pʋgẽ wã. (Eza. 2:4; Zã 17:11, 15, 16) La dũniyã neb kẽer nengẽ, yaa b tẽngã, b buudã neb la b minimdã, wall bũmb a taab wala b tẽngã ball tãoodbã n tar yõod n yɩɩda. Rẽ mi n waa ne wags-taaba, kisg-taab la kʋ-taab menga. D sã n pa gũusi, d tõe n wa kẽe no-koɛɛm pʋgẽ nana-nana, n pa kell n zãag d mens ne dũniyã yɛl ye. w15 1/7 3:1, 2

Rĩung roog meeb poore, d segd n modgame t’a kell n yɩ yɩlemde, tɩ zũnd-zãnd me ra zĩnd a pʋgẽ ye. Bala, Wẽnnaam ning tõnd sẽn tũudã yaa yɩlemde, n pa nong zũnd-zãnd ye. (1 Kor. 14:33) Biiblã wilgame tɩ d sã n dat n dɩk a Zeova togs-n-taare, d segd n yɩɩ yɩlem bũmbã fãa pʋgẽ. Wala makre, tũudmã wɛɛngẽ, tagsa wã, la zã-m-mengã wɛɛngẽ, la d modg tɩ d yĩngã yɩ yɩlemde. (Vẽn. 19:8) Rẽnd neb nins sẽn dat n ta a Zeova yamã segd n modgame tɩ b yĩngã, b futã la b teed a taabã yaa yɩlma. D sã n maneg d Rĩungã roog tɩ yaa yɩlemd tɩ zũnd-zãnd me ka be, d pa na n zoe yãnd ne bool ned t’a wa d tigissã ye. Sẽn wat-b tigissã me na n yãame tɩ d manega d Rĩungã roogo, tɩ kell n zems d sẽn moond n yetẽ tɩ dũni-paalg n wate, tɩ rẽgd pa na n zĩnd be wã. B na n bãngame tɩ Wẽnnaam ning d sẽn tũudã nonga yɩlemde, la t’a sɩd na n kɩtame tɩ tẽngã tõr lebg arzãna. (Eza. 6:1-3; Vẽn. 11:18) Baa nebã tagsg sẽn yaa to-to yɩlemdã wɛɛngẽ, d segd n maoodame tɩ d Rĩungã roog yaa yɩlemde, tɩ zũnd-zãnd kae ye. Bala yaa be la d tigimd taab n waoogd a Zeova.—Tõo. 23:15. w15 1/7 4:13-15

Kiris-neb hakɩɩkã sẽn wa n bãng tɩ Kirisã lebga Rĩm yʋʋmd 1914, b bãngame tɩ rẽ tɛka, dũniyã tõe n saa wakat buud fãa. Woto kɩtame tɩ b maneg n wɩng ne Rĩungã koɛɛg moonego, n segend b mense. A Zeezi wilgame t’a waoongã tõe n kaoosame. A yeelame tɩ tõe n yɩɩ “no-kɛleng wakate, wall yibeoogo.” Sã n wa yaa woto, a karen-biisã manesem segd n yɩɩ wãna? A yeel-b lame tɩ b segd n kell n gũume. Rẽnd baa sã n wa wõnd kaoosdame, d pa segd n tẽ tɩ sɛɛbã ket n zãrame, wall d tolg n bas gũub ye. Mams-y wa yãmb sẽn zoe n be dũni-paalgã pʋgẽ, n neẽ tɩ bũmb nins a Zeova sẽn da yeel yaoolem wakatã wɛɛngẽ wã pidsa kɛpɩ. Rẽ na n kɩtame tɩ y maneg n kɩs sɩd ne bũmb a taabã a sẽn pʋlmã. (Zoz. 23:14) Y sũur na n yɩɩ noog ne a Zeova sẽn da zoe n yãk wakat takɩ dũniyã sɛɛb yĩnga, la a sagl a nin-buiidã tɩ b kell n gũ wã.—Tʋʋ. 1:7; 1 Pɩy. 4:7. w15 1/8 2:10, 11, 14

Rũndã-rũndã, neb wʋsg maanda bũmb toor-toor Biiblã sẽn wilg tɩ pa sõma ye. B wae n geta bõn-kãens n noogd b yõor me. Wala makre, nen-kɛglem tʋʋma, yoob yɛl la zĩn-dãmb yɛla. Ẽntɛrnetã pʋgẽ, televiziõ wã, filim-dãmbã la sɛbã pʋsẽ, b wae n maandame tɩ yaa wa yoobã, la nen-kɛglmã pa maneg n yaa wẽng ye. Pĩndã, bũmb kẽer maaneg la nebã ra get tɩ yaa wɩɩbdo. La masã, neb kẽer getame tɩ rẽ pa wẽng ye. Tẽns sãnda taoor dãmb pʋd n kõo sor tɩ sẽn dat-a fãa tõe n maan bõn-kãense. La baa ne rẽ, yel-kãens ket n yaa wẽns Wẽnnaam nifẽ. (Rom. 1:28-32) Pipi kiris-nebã wakatẽ, nebã ra nong n geta nen-kɛglem tʋʋm la yoob yɛl n noogd b yõore. La a Zeezi karen-biisã sẽn da sakd Wẽnnaamã, b pa maan woto ye. Rẽ kɩtame tɩ neb wʋsg ra yaand-b la b namsd-ba. Tʋm-tʋʋmd a Pɩyɛɛr yeela kiris-nebã woto: “Yãmb sẽn ka leb n naagd neb nins sẽn ka pʋʋsd Wẽnnaamã n maand tʋʋm-dẽgd kãensã, a linga bãmb tɩ b kãnegd yãmba.”—1 Pɩy. 4:4. w15 1/8 4:2, 3

Kiris-ned sẽn bɩ maoodame n dat tɩ zems-n-taar kell n zĩnd tigingã pʋgẽ. (Efɛ. 4:1-6, 15) Tõnd sẽn dat yaa Wẽnnaam nin-buiidã fãa sẽn na n zemsd taaba, wa ninsaal yĩngã wil sẽn sog taab tɩ bũmb fãa yaa sõma wã. Biiblã wilgame tɩ d sã n dat n zems taab a woto, d segd n yɩɩ sik-m-meng rãmba. D sã n yaa kiris-neb sẽn bɩ, baa d tẽed-n-taag sã n wa konge, d na n kell n sika d meng n bao tɩ zems-n-taar kell n zĩnd d sʋka. Bɩ d ned kam fãa sok a meng woto: ‘Mam tẽed-n-taag sã n wa konge, mam manesem yaa wãna? A sã n beega maam, m maanda wãna? Mam wae n mukdame n pa le gomd ne-a bɩ, bɩ m maanda m sẽn tõe fãa n dat tɩ yellã manege?’ D sã n yaa kiris-ned sẽn bɩ, d na n bao n welga yellã lakae, d pa na n gind d to wã ye. Yãmb maanda y sẽn tõe n dat tɩ zems-n-taar kell n zĩnd tigingã pʋgẽ bɩ? w15 1/9 1:12, 13

A Zeezi ra kɩsa sɩd tɩ Biiblã yaa Wẽnnaam Gomde, la t’a saglsã sõmblem ka to ye. D sã n dat n dɩk a Zeezi naoore, d segd n karemda Biiblã daar fãa, n zãmsd-a, la d bʋgsd a saglsã zugu. Yɩta sõma me tɩ y bao n wʋm yɛl kẽer võor sõma. Wala makre, y sã n maag y yĩng n vaees bãngr-goam nins sẽn wilgd tɩ dũni-kãngã na n looga ka la bilfã, y na n maneg n kɩsa sɩd tɩ tõnd wakatã la dũni-kãngã yaoolem wakate. Y sã n vaees Biiblã bãngr-goam sẽn zoe n pidsi, na n kɩtame tɩ y bas y yam t’a bãngr-goam nins sẽn ketã me na n pidsame. Sẽn paase, y tõe n karma d tẽed-n-taas kẽer kibay sẽn wilgd Biiblã sẽn sõng-b to-to tɩ b toeeme. Rẽ na n kɩtame tɩ y maneg n kɩs sɩd tɩ Biiblã sagls sõmblem ka to ye. (1 Tes. 2:13) Y tõe n bʋgsa bõn-sõma nins Wẽnnaam sẽn pʋlmã zugu. Mams-y y vɩɩmã sẽn na n yɩ to-to dũni-paalgã pʋgẽ wã. (Ebre. 12:2) Get-y bõn-kãens wa keoor Wẽnnaam sẽn pʋlem yãmb mengã. w15 1/9 3:16, 17

Wãn to la d tõe n wilg Wẽnnaam d nonglem? Wala makre, d tõe n yãka d paoong n teel tõnd tigingã, pa rẽ bɩ n teel koe-moonegã dũniyã gill zugu. D nug zãadame tɩ pa zãad me, d ned kam fãa tõe n kõ a sẽn tare, n wilg t’a nonga a Zeova. (2 Kor. 8:12) La bũmb a taab me la d tõe n maane. D tẽeg t’a Zeezi yeelame tɩ d reng n bao Wẽnnaam Rĩungã, la d ra maan yɩɩr ne d sẽn na n dɩ la d sẽn na n yeelg ye. A paasame tɩ tõnd ba wã mii tõnd sẽn dat bũmb ninsã. (Mat. 6:31-33) D sẽn tẽed pʋlen-kãng to-to wã n wilgd d sã n sɩd nonga a Zeova. Bala, kɩs-sɩd ne nonglem tũuda taaba. D sã n pa kɩs ned sɩda, d pa tõe n nong-a ne d sũur fãa ye. (Yɩɩn. 143:8) Rẽ n so tɩ d ned kam fãa segd n sok a meng woto: ‘Mam magb toor-toorã, la m sẽn vɩ to-to wã wilgdame tɩ m sɩd nonga a Zeova bɩ? Mam wilgda daar fãa tɩ m kɩsa sɩd t’a Zeova na n gesa m yell bɩ?’ w15 1/9 5:7, 8

Yãmb zoe n soka y meng a Zeova sã n na n fãag-y-la to-kãsengã sasa bɩ? Bũmb sẽn yaa tɩlɛ n yɩɩdã, yaa y sẽn na n modg n paam tẽeb sẽn tar pãnga. Tʋm-tʋmd a Pɩyɛɛr goma tẽebã yõod yelle. A yeelame tɩ b makda d tẽebã n getẽ, sẽn na yɩl “t’a Zeezi Kiris waoongã daare, bɩ [d] paam pẽgre la ziiri ne waoogre.” (1 Pɩy. 1:7) D miime tɩ to-kãsengã ta n saame. Rẽ n so tɩ d rat n modg tɩ d tẽebã tall pãnga, t’a Zeezi sẽn yaa Rĩmã sã n wa bɩ a pẽg-do. D rat n zĩnda ‘b rãmb nins sẽn tẽed n na n põsã sʋka.’ (Ebre. 10:39) Rẽ n so tɩ tõnd me tõe n maan wa rao ning sẽn da kos a Zeezi sõngre, n yeel woto wã: “Sõng-y-ma, tɩ m tẽebã paoodame.” (Mark 9:24) Pa rẽ bɩ d maan wa a Zeezi tʋm-tʋmdbã sẽn da kos-a tẽeb n yeel woto wã: “Paas-y d tẽebã.”—Luk 17:5. w15 1/10 2:1, 2

A Poll baoa “bũmb ning sẽn yaa sõama n yɩɩda.” A modga wʋsg koɛɛgã mooneg pʋgẽ, n tog soay n kẽng tẽns wʋsg n tɩ moone. Wala makre, a gilga Siiri, Aazimineere, Masedoan la Zide n moon koɛɛgã. A yeela woto: “Mam yĩmda bũmb nins sẽn be poorẽ wã n nangd pãng n na n paam bũmb nins sẽn be taoorã.” (Fili. 1:10; 3:8, 13, 14) A Poll da pa kẽ kãadem ye. Rẽ sõng-a lame t’a tõog n tũ a Zeova tɩ bũmb pa tiis-a ye. (1 Kor. 7:32-35) Rũndã-rũndã, a Zeova Kaset rãmb kẽer dɩka a Poll togs-n-taar n yak yam n pa kẽ kãadem, sẽn na n yɩl n tõog n tʋm a Zeova tʋʋmdã wʋsgo. (Mat. 19:11, 12) Neb nins sẽn pa kẽ kãadmã pa wae n tar zak rãmb n segd n ges b yell wa sẽn kẽ-b kãadmã ye. La d kẽe kãadem tɩ d pa kẽ me, d tõe n ‘tõdga zɩɩb fãa,’ rat n yeel tɩ d bas bũmb nins sẽn tõe n tiis-d a Zeova tũudmã pʋgẽ wã. Tõe tɩ d segd n basa bũmb kẽer d sẽn maand tɩ yaool n sãamd d sẽkã, n tõog n tʋm a Zeova tʋʋmdã wʋsgo. w15 1/10 3:15, 16

Hal pĩnd wẽndẽ n tãag rũndã, ninsaalbã yɛl sẽn yaa to-to wã wilgdame tɩ Biiblã gom-kãensã yaa sɩda: “Sẽn-Ka-Saab n wilgd ninsaal a sore. Ninsaal na n yɩ a wãn n bãng a sore?” (Yel. 20:24) A Zeova pa naan ninsaal t’a tõe n soog a meng ye. Ninsaal pʋd n pa tõe n soog a meng tɩ zems ye. Yaa sɩd tɩ Wẽnnaam sẽn bas tɩ wẽnemã beẽ wã wilgdame tɩ ninsaalbã pa tõe n soog b mens tɩ zems ye. La yaa bũmb sẽn na n naf wẽn-sakdbã wakat fãa yĩng me. Kɩtame tɩ Wẽnnaam paam kaset sẽn wilgd tɩ yaa yẽ bal n tõe n dɩ naam tɩ zemse. A sã n wa sãam sẽn kɩt-b tɩ wẽnemã beẽ wã tɩ vɩɩmã lebg noogo, ned wall malɛk sã n kɩɩs a naamã, a pa na n le bas weer t’a soabã wilg a sẽn yet bũmb ningã sã n yaa sɩd ye. A tõe n tika ninsaalbã kʋdemdã yɛl sẽn yɩ to-to wã, n wilg tɩ kɩɩsdã pa tar bʋʋm, la a sãam-a zĩig pʋgẽ. Rẽnd wẽnemã pa na n le tol n zĩnd ye. w15 1/11 3:5, 6

A Zeezi ra nonga Wẽnnaam Rĩungã yell goama. A sẽn wa n be tẽng zugã, a ra gomda Rĩungã yell n yɩɩda. A goma Rĩungã yell naoor koabg la zaka. Rẽnd yaa vẽeneg tɩ Rĩungã yell sɩd ra paka a Zeezi. (Mat. 12:34) A Zeezi vʋʋgrã poor bilfu, a vẽnega a meng ne neb 500 la zaka, n sõs ne-ba. (1 Kor. 15:6) Tõe tɩ yɩɩ wakat kãng la a sẽn bobl a karen-biisã tʋʋm-kãsenga, n yeel tɩ b segd n moona “nebã buud fãa” koɛɛgã. A yeel-b lame tɩ b na n moona koɛɛgã n kaoose, hal n tãag “wakat sɛɛbo.” Yãmb sã n moond koɛɛgã rũndã-rũndã, y sõngdame t’a Zeezi bãngr-gomdã pidsdẽ. (Mat. 28:19, 20) A Zeova kõo tõnd bõn-sõma buud fãa sẽn na yɩl n sõng-d tɩ d moon koɛɛgã. w15 1/11 5:1-3

Ebre wã pʋgẽ, b gʋlsda Wẽnnaam yʋʋrã ne gʋls-biis a naase. Gʋls-biis a naasã la b sẽn boond tɩ tetragrammã. Tetragrammã bee ebre wã Biibl-kʋd nins b sẽn gʋls ne nusã wʋsg pʋsẽ. Wala makre, a bee seb-pindem nins b sẽn boond tɩ mog-kɩɩngã seb-pindmã pʋgẽ. Tetragrammã bee Sɛptãntã b sẽn gʋls ne gɛrkã seb-kʋd kẽer pʋsẽ me. Seb-kʋd-kãens gʋlsa yʋʋm 200 sẽn deng a Zeezi rogmã, tɩ kẽer gʋlsg yɩ yʋʋm 100 a Zeezi rogmã poore. Bãngdb kẽer sẽn yã Wẽnnaam yʋʋrã sẽn be seb-kʋdã pʋsẽ wʋsg woto wã, ling-b lame. Baa kaset wʋsg sẽn wilgd tɩ Wẽnnaam yʋʋrã segd n zĩnda Biiblã pʋgẽ wã, Biiblã lɛbgdb wʋsg pa ning-a b Biibl-dãmbã pʋsẽ ye. Yʋʋmd 1952 soabã pʋgẽ, siglg a ye n yiis b Biibl b sẽn lebs n manege. B pipi Biiblã sẽn yi yʋʋmd 1901 wã pʋgẽ, Wẽnnaam yʋʋrã ra bee be. La b sẽn lebs n maneg a soab n yiis yʋʋmd 1952, b pa ning yʋʋrã ye. Bõe yĩnga? Biibl-kãng sɩngr goamã pʋgẽ, b yeela woto: “Pa zems tɩ kiris-nebã sẽn be dũniyã gill zugã pʋt Wẽnnaam yʋ-peellã ye.” B yãka Wẽnnaam yʋʋrã ãngilindã Biiblã-dãmb a taab pʋsẽ, la buud-goam a taab Biibl-dãmb pʋsẽ me. w15 1/12 2:3-5