Yʋʋm-sare

Wẽnnaam Sebre, 1983. Biiblã pʋgẽ, b boola a Abrahaam naoor a tãab tɩ Wẽnnaam zoa. (2 Kib. 20:7; Eza. 41:8; Zak 2:23) Yaa yẽ a ye bal la b bool woto. La rat n yeelame tɩ yaa a Abrahaam bal n yɩ ninsaal sẽn tõog n lebg a Zeova zoa bɩ? Ayo. Biiblã wilgame tɩ tõnd ned kam fãa tõe n lebga Wẽnnaam zoa. Kibay wʋsg n be Biiblã pʋgẽ n gomd neb sẽn yɩ wẽn-zoɛtb yelle. B tẽe Wẽnnaam n tõog n lebg a zo-rãmba. Tʋm-tʋmd a Poll goma “kaset dãmb wʋsg” yelle, tɩ d miẽ tɩ nin-kãens fãa yɩɩ Wẽnnaam zo-rãmba. (Ebre. 12:1) B yɩɩ neb buud toor-toore. B sẽn yɩ Wẽnnaam zo-rãmbã yaa zu-zẽkr tɛkẽ. Bɩ d kell n modg n tall nin-kãensã tẽebã buudu. (Ebre. 6:11, 12) D sã n maan woto, d tõe n kell n yɩ a Zeova zo-rãmb wakat sẽn kõn sa yĩnga. w16.02 2:1, 2, 19

Mams f zoa sẽn na n da mobill n kõ-fo, n kõ-f mobillã sɛba, la a yeele: “M na n talla kʋɩlen-biisã. Bala, pa foom n na n tar mobillã n kẽnd ye. Yaa maam.” F tagsg na n yɩɩ wãna? Ned sã n dɩk a meng n kõ Wẽnnaam a Zeova, yaa wa a sẽn yeel-a woto: “Mam dɩka m vɩɩmã n kõ foo. Mam yaa fo rẽnda.” A Zeova tara sor n na n yeel-a t’a pids a sẽn pʋlmã. La a soabã sã n wa yik n maand bũmb sẽn pa noom a Zeova yẽ? Wala makre, a tõe n wa soos n dooda ned sẽn pa tũud a Zeova, pa rẽ bɩ a tɩ bao tʋʋmd sẽn kɩt t’a pa le tar sẽk n moond koɛɛgã sõma, wall sẽn kɩt t’a vaand tigissã. Woto pa pidsd bũmb ning a sẽn pʋlem a Zeova wã ye. Yaa wa a sẽn da mobill n kõ neda, n yaool n pa kõ-a mobillã kʋɩlen-biis ye. D sã n dɩk d meng n kõ a Zeova, yaa wa d sẽn yeel-a woto: “Mam pa le so m vɩɩmã ye, yaa fo n so-a.” Rẽnd d na n maanda a Zeova sẽn datã wakat buud fãa, baa pa noom tõndo. Yaa woto la a Zeezi maan-yã, wa rũndã daar vɛrse wã sẽn wilgdã. w16.03 1:16, 17

Sẽn na maan yʋʋm 3000, no-rɛɛs a Eli yãka a Eliize sẽn da yaa bi-bɩɩg wakat kãngã t’a yɩ a sõngda. A Eliize saka zĩig pʋgẽ, n lebg a Eli sẽn da kʋʋlã tʋm-tʋmda. (2 Rĩm 3:11) A zĩnda ne-a n maan yʋʋm a yoobe, t’a sõng-a t’a bãng bũmb wʋsgo. Rẽ poore, a Eli sẽn wa n bãng t’a pa na n le yɩ no-rɛɛs Israyɛll soolmẽ wã, a yeela a Eliize t’a tõe n basa yẽ pʋgbo. La a Eliize ra rat n kell n paa ne a karen-saambã n kaoos wa a sẽn tõe tɛka. Wãn to la kom-bɩɩsã tõe n dɩk a Eliize togs-n-taare? Kãsem-soab sã n wa kõ-y tʋʋmde, baa yaa tʋʋmd neb kẽer sẽn pa nand bɩ y yɩ tao-tao n sake. Kɩt-y t’a bãng tɩ rẽ noom-y lame, la tɩ y ratame t’a ket n sõngd-y-yã. Sẽn yɩɩd fãa, b sã n kõ y tʋʋmd bɩ y tʋm ne y sũur fãa. Bõe yĩng tɩ rẽ tar yõodo? Bala, y sã n wilgdẽ tɩ y yaa sɩd soab la ned b sẽn tõe n teege, kãsem-dãmbã na n kɩsa sɩd t’a Zeova ratame tɩ b kõ-y tʋʋm n paas tigingã pʋgẽ.—Yɩɩl 101:6; 2 Tɩm. 2:2. w15 1/4 2:13, 14

A Sayull da ratame t’a Zonatã wa led yẽ n yɩ rĩma, tɩ ra yɩ a Davɩɩd ye. (1 Sãm. 20:31) La a Zonatã ra nonga a Zeova, n da be a poorẽ. Woto kɩtame t’a pa bao a meng nafr ye. A yõga zood ne a Davɩɩde, n pids bũmb ning a sẽn da pʋlm-a wã. D sẽn be Wẽnnaam poorẽ wã yĩnga, d pidsda d pʋlemsã. Wala makre, d sã n sar ne ned n na n tʋm a tʋʋmde, baa tʋʋmdã sã n wa pa nana wa d sẽn da tagsdã, d sẽn be a Zeova poorẽ la d nong-a wã segd n kɩtame tɩ d tũ d sẽn yeelã. Sẽn paase, y sã n kẽe kãadem n wa tar zu-loees y kãadmã pʋgẽ me, y sẽn nong a Zeova wã na n kɩtame tɩ y kell n pa ne y pagã bɩ y sɩdã. (Mal. 2:13-16) Bɩ d kell n zĩnd d tẽed-n-taasã poorẽ, baa b sẽn tõe n mi n maan bũmb n sãam d sũurã. D kell n zĩnd a Zeova poorẽ me, baa zu-loees sasa. Woto, d noogda a Zeova sũuri. (Yel. 27:11) D sã n kell n zĩnd a Zeova poorẽ, d na n bãngame t’a sẽn maand bũmb ninsã fãa yaa sẽn nong-b yẽ wã nafr yĩnga. w16.02 3:16, 17

A Zeova miime tɩ tõnd ned kam fãa pãngã tara koaka. (Yɩɩl 103:14) Rẽ n so t’a sõngd tõndo, n pa basdẽ tɩ d mao ne d zu-loeesã d yembr ye. Baa ne rẽ, tõe n mi n wõnda yɛlã yɩɩda tõnd pãnga. La a Zeova pʋlmame tɩ zu-loɛɛg sã n wa rat n loog d nugu, a na n sõng-d lame tɩ d yi. (1 Kor. 10:13) Rẽnd d tõe n kɩsa sɩd t’a Zeova pa na n bas tɩ d paam makr sẽn yɩɩd d pãng ye. D sã n pʋʋs a Zeova n kos sõngr t’a pa leok zĩig pʋgẽ bɩ d maan sũ-mare. D tẽeg t’a Zeova rat n sõnga tõnd ne a sũur fãa, la t’a gũuda wakat sẽn zems n na n maan dẽ. Biiblã yeelame: “Zu-soabã gũuda wakat n na n ning yãmb barka. Yaa rẽ n kɩt tɩ b yikd n na n zoe yãmb nimbãanega. Bala, Zu-soabã yaa Wẽnnaam sẽn yaa tɩrga.” w15 1/4 4:8, 9

Zak pʋgẽ Biibl zãmsgã sasa, d sẽn gomd Wẽnnaam la a raabã yellã sõngdame tɩ d zakã rãmb zems-n-taarã paasdẽ. B sã n segend koe-moonegã me, n mi n maan mak-n-wilgi, tõe n sõnga zakã rãmb tɩ b moond koɛɛgã sõma. Sẽn paase, b sã n kelgd b ned kam fãa sẽn gomd Biiblã yell to-to wã, b na n neeme tɩ b fãa nonga a Zeova, n dat n maan a raabã ne b sũur fãa. Rẽ na n kɩtame tɩ b maneg n nong taaba. Bõe la pag ne a sɩd tõe n maan n naag taab n tũ a Zeova? B sã n sakd a Zeova ne b sũur fãa, b na n zemsda taaba, tɩ b zĩid-n-taarã noomẽ. B ned kam fãa segd n wilga a to wã t’a nong-a lame, wa a Abrahaam ne a Saara, a Izaak ne a Rebeka, a Ɛlkana ne a Ana sẽn da maandã. (Sɩng. 26:8; 1 Sãm. 1:5, 8) Pag ne a sɩd sã n maand woto, b na n zemsda taaba, tɩ bãmb ne a Zeova zoodã me pãng paasdẽ.—Koɛ. 4:12. w16.03 3:12, 13

A Sʋɩtãan zabda ne kiris-neb nins sẽn paam vʋʋsem sõng zaeeb n ket tẽngã zugã, la ne a Zezi ‘piis a taabã’ me. (Zã 10:16) A miime t’a wakatã keta bilfu, n maood a sẽn tõe tɛk sẽn na yɩl n sãam neb nins sẽn tũud a Zeova wã. (Wil. 12:9, 12) La d tõe n zaba ne a Sʋɩtãan n tõog bɩ? N-ye. Biiblã yetame: “Kɩɩs-y Sʋɩtãana, la yẽ na zoe n bas yãmba.” (Zak 4:7) F sã n yeel t’a Sʋɩtãan beeme, neb kẽer laadame. Ne bãmba, yaa sɛb pʋsẽ, filim-dãmb la ze-video-rãmb pʋsẽ bal la b gomd a Sʋɩtãan yelle. Nin-kãens yetame tɩ ned sẽn tar yam pa segd n tẽ t’a Sʋɩtãan ne zĩn-dãmbã beeme ye. La yãmb tagsdame tɩ neb kẽer sẽn tẽed t’a Sʋɩtãan ne a zĩn-dãmbã ka be wã, sãamda a sũur bɩ? Ayo. Yaa nana ne a Sʋɩtãan t’a lud neb nins sẽn pa tẽed t’a beeme wã yam. (2 Kor. 4:4) Rẽnd a Sʋɩtãan maanda sɩlem n dat tɩ nebã tẽ t’a ka be, t’a tõog n belg-b nana-nana. w15 1/5 2:1, 2

A Moiiz roagdbã sẽn da yaa hebre-rãmbã wilg-a lame t’a Zeova pʋlmame t’a na n wa yiisa hebre-rãmbã yembdẽ wã, n tall-b n tɩ zĩnig kãabg tẽngã pʋgẽ. (Sɩng. 13:14, 15; Yik. 2:5-10) A Moiiz sẽn da tagsd bũmb nins a Zeova sẽn pʋlem Israyɛll nebã yellã, kɩtame t’a maneg n nong a Zeova, t’a tẽebã pãng me paase. Yẽ me ra mii wa wẽn-sakdb a taabã t’a Zeova na n wa kɩtame tɩ ninsaalbã paam b mens ne kũumã. (Zoob 14:14, 15; Heb. 11:17-19) Rẽnd a Moiiz sẽn da nong Wẽnnaam ning sẽn zoet ninsaalbã fãa nimbãanegã pa lingr ye. A nonglmã la a tẽebã kɩtame t’a kell n tũ a Zeova a vɩɩmã tõre. (Tõo. 6:4, 5) Baa a Faraõ sẽn wa n yeel tɩ yẽ na n kʋ-a lame wã, a pa yɛɛs ye. Tõe tɩ yaa a sẽn da tagsd bõn-sõma nins sẽn watã yellã n sõng-a t’a paam raoodo.—Yik. 10:28, 29. w15 1/5 3:11-13

A Zezi maana a pipi yel-solemdã Kana, yi-kãadem kibs sasa. Yi-kãadmã sasa, rãamã wa n paoogame. D pa mi bũmb ning sẽn kɩt tɩ rãamã paoogã ye. La d miime tɩ ra tõe n yɩɩ yãnd wʋsg ne sẽn nan kẽ-b kãadmã. Bala, wakat kãnga, sãan sã n da wa f yiri, f segd n deeg-a-la sõma. A Zezi ma a Maari ra bee sẽn wa-b yi-kãadmã sʋka. A kosa a Zezi t’a maan bũmb n sõng sẽn nan kẽ-b kãadmã. Tõe tɩ yaa a sẽn da tagsd t’a Zezi tõe n maana yel-solemd n sõng-b yĩnga. Sɩd me, sãmbg kae t’a Maari ra bʋgsa bãngr-goam nins sẽn da gomd a biigã yellã zugu. Sẽn paase, a ra miime tɩ b na n bool-a lame tɩ “Sẽn-ka-to Biiga.” (Luk 1:30-32; 2:52) A Maari ne a Zezi fãa ra rat n sõnga sẽn nan kẽ-b kãadmã. Rẽ n so t’a Zezi maan yel-solemde, n kɩt tɩ koom na maan litr kobs lebg rãam. (Zã 2:6-11) Ra yaa tɩlae t’a Zezi maan yel-solemdã bɩ? Ayo. Yaa nebã yell sẽn pak-a wã, n paas a sẽn dɩk a Ba wã togs-n-taar n yaa kõtã yĩng n kɩt t’a maan dẽ. w15 1/6 1:3

Nand t’a Zezi rʋ saasẽ, a tʋm-tʋmdbã sok-a-la sokr ning sẽn be rũndã vɛrse wã pʋgẽ wã. A Zezi sẽn leok a tʋm-tʋmdbã to-to wã wilgame tɩ wakat ra nan pa ta tɩ b tõe n bãng Wẽnnaam Rĩungã Rĩm sẽn na n sɩng a naamã rɩɩb wakat ningã ye. A yeel-b lame tɩ b kell n wɩng ne koɛɛgã moonego. (Tʋʋ. 1:7, 8) La a paasame tɩ b gũ Wẽnnaam Rĩungã waoongo. Rẽ n so tɩ tʋm-tʋmdbã wakat tɛk n tãag rũndã, kiris-nebã pʋʋsdame tɩ Wẽnnaam Rĩungã wa. Wakat ning a Zezi sẽn na n sɩng naam rɩɩb saasẽ wã sẽn wa n kolgdẽ wã, a Zeova sõnga a nin-buiidã tɩ b bãng sẽn na n yɩ yʋʋmd ninga. Yʋʋmd 1876, a Charles Russell gʋlsa sõsg gom-zug sẽn yaa: “Wakat bʋg la bu-zẽmsã wakat sata?” A wilga sõsgã pʋgẽ tɩ “wakat a yopoe” wã yell no-rɛɛs a Daniɛll sẽn gomã, ne “bu-zẽmsã wakat” yell a Zezi sẽn gomã fãa yaa bõn-yɛnga. Sõsgã wilgame tɩ “wakat a yopoe” wã sẽn yaa ‘bu-zẽmsã wakatã’ ra na n saa yʋʋmd 1914.—Dan. 4:13; Luk 21:24. w15 1/6 4:11, 12

A Zezi sã n da yã ned sũur sẽn sãame, yẽ me sũur sãamdame. Wala makre, a zoa a Lazaar kũumã poore, a sẽn yã a Lazaar zakã rãmb la a zo-rãmbã sũy sẽn sãamã, a “wẽe sir-kãsenga.” A “sũur sãamame.” (Zã 11:33-36) Baa a Zezi sẽn da mi tɩ pa na n kaoos la a vʋʋg a Lazaarã, a yãbame. A pa zoe yãnd ne rẽ ye. Neb nins sẽn zĩnd be wã yãa vẽeneg t’a Zezi nonga a Lazaar ne a tãopã wʋsgo. A zoee b nimbãanega, n vʋʋg a Lazaare. (Zã 11:43, 44) Biiblã yeelame t’a Zezi “wẽnda Wẽnnaam zãng fasɩ.” (Heb. 1:3) Rẽnd yel-soalem nins a Zezi sẽn maanã wilgdame tɩ yẽ ne a Ba wã fãa ratame tɩ bãasã la kũumã sẽn wat ne tood ninsã sa. Ka la bilfu, a Zeova ne a Zezi na n vʋʋga neb wʋsg sẽn da ki. A Zezi yeelame tɩ “wakat watame tɩ fãa sẽn be yaad pʋsẽ” na n vʋʋge.—Zã 5:28, 29. w15 1/6 2:13, 14

Tũudum kẽer neb tudgame n tagsdẽ tɩ yaa b sã n wa ki la b na n kẽng saasẽ, n tɩ waoogd Wẽnnaam. La tõnd a Zeova Kaset rãmbã miime tɩ d segd n waooga Wẽnnaam tẽngã zug ka. D sã n waoogd a Zeova, d rɩkda pĩnd wẽndẽ wẽn-sakdbã togs-n-taare. Yɩɩn-sõamyã 99:1-3, 5-7 goma nin-kãens yelle. Vɛrse-rãmbã wilgame t’a Moyiisi, a Aarõ, la a Sãmwɛll sũy ra nooma ne bũmb nins Wẽnnaam sẽn maan bãmb wakatẽ wã tɩ nebã tõe n tũ-a wã. Rũndã-rũndã, nand tɩ sẽn paam-b vʋʋsem sõng zaeebã kẽng saasẽ n tɩ lebg maan-kʋʋdb ne a Zeezi, b bee wẽnd-doog ning sẽn pa ninsaalb nus n me wã samandã pʋgẽ, n tũud Wẽnnaam. A Zeezi “piis a taab” sẽn yaa neb milyõ-rãmb n teend-b ne b sũy fãa. (Zã 10:16) Sul a yiibã fãa neb naaga taab n tũud a Zeova. La sokr n ket tõnd ned kam fãa sẽn segd n sok a menga. Ad sokrã: ‘Mam wilgdame tɩ m sũur nooma ne bũmb nins a Zeova sẽn maan sẽn na yɩl tɩ d tõog n tũ-a wã bɩ?’ w15 1/7 1:4, 5

Wakat buud fãa, wẽn-tũudb n gũ bãngr-goam pidsgu. A Ezayi da reng n wilgame tɩ zʋɩf-rãmbã ra na n yii yembdã n lebg n wa Zida. A paasa woto: “Bark bee neb nins fãa sẽn tẽed bãmbã zugu!” (Eza. 30:18) A Miise me ra kɩsa sɩd t’a Zeova sẽn pʋlem bũmb ninsã na n pidsame. A yeelame: “Mam na n gũu Sẽn-Ka-Saabo.” (Mii. 7:7) Sẽn paase, yʋʋm wʋsg pʋgẽ, Wẽnnaam nin-buiidã ra gũuda bãngr-goam nins sẽn gomd Mesi wã bɩ Kirisã yellã pidsgu. (Luk 3:15; 1 Pɩy. 1:10-12) Rũndã-rũndã, tõnd me gũuda bãngr-goam kẽer sẽn gomd a Zeova Rĩungã yell pidsgu. Ka la bilfu, a Zeezi sẽn yaa Wẽnnaam Rĩungã Rĩmã na n sãama nin-wẽnsã la a kɩt tɩ namsg buud fãa sa, tɩ wẽn-sakdbã paam b mens ne dũni-kãngã sẽn be a Sʋɩtãan nugẽ wã. (1 Zã 5:19) Bɩ d kell n gũ, d sẽn mi tɩ dũniyã sãoong ta n saame wã yĩnga. w15 1/8 2:1, 2

A Zeova yeela Israyɛll nebã tɩ b ti sɛk-roogã, n wilg b sẽn segd n maan dẽ to-to. (Yik. 25:8) Kaoosg zugẽ, b mee wẽnd-doog a Zeova waoogr yĩnga. (1 Rĩm. 8:27, 29) Israyɛll nebã sẽn wa n yi yembd Babilond n lebg n wa b tẽngẽ wã, b ra wae n tigimda taab karen-dotẽ. (Mark 6:2; Zã 18:20; Tʋʋ. 15:21) Pipi kiris-nebã ra mi n yãka b tẽed-n-taag zaka, n tigimd taab be. (Tʋʋ. 12:12; 1 Kor. 16:19) A Zeova Kaset rãmbã tara Rĩung rot tusa dũniyã gill zug rũndã-rũndã, n kẽnd be n zãmsd Biiblã, la b waoogd a Zeova. A Zeezi ra nonga Wẽnnaam doogã sẽn da be Zeruzalɛmã hal wʋsgo. A karen-biisã sẽn yã a manesmã, tẽeg-b-la gomd ning yɩɩn-gʋlsdã sẽn togs tɩ be rũndã vɛrse wã pʋgẽ wã. (Yɩɩn. 69:10) Rĩung roog ka be d sẽn tõe n boondẽ t’a Zeova roog wa sẽn da yaa to-to ne Zeruzalɛm wẽnd-doogã ye. (2 Kib. 5:13; 33:4) La d segd n wilgame tɩ d nanda zĩis nins d sẽn segd taab n waoogd Wẽnnaamã. w15 1/7 4:1, 2

D na n tõog n wilgame tɩ d nonga taaba, la d kõt taab sugr Kirisã naamã sẽn na n kaoos yʋʋm tusrã sasa bɩ? D sã n zoe n kõt taab sugri, n modgdẽ tɩ d zems-n-taarã pãng paasdẽ, dũni-paalgã pʋgẽ, d na n kell n maana woto nana-nana. (Efɛ. 4:2, 32) Dũni-paalgã pʋgẽ, tõe tɩ pa na n yɩ wakat fãa la d na n paam bũmb d sẽn dat ye. Tõe me tɩ d na n wa rata bũmb ninga, tɩ yɩ tɩlɛ tɩ d maag d yĩng tɩ yɩ rasem a yi. Bũmb d sẽn na n maan yaa teel a Zeova naamã, la d wilgdẽ tɩ d sũur nooma ne bũmb nins a sẽn zoe n kõ-dã, n pʋʋsd-a barka. Rẽnd zʋg-sõma nins a Zeova sẽn dat tɩ d bɩɩs rũndã-rũndã wã na n naf-d-la wakat kãnga. D sã n bɩɩsd zʋg-kãense, d wilgdame tɩ d kɩsa sɩd tɩ dũni-paalg n wate, n segend d mens vɩɩm sẽn kõn sa wã yĩnga. (Ebre. 2:5; 11:1) Sẽn paase, d wilgdame tɩ d sɩd rat n wa vɩɩmda tẽngã zug wakat ning nebã fãa sẽn na n sakd a Zeova wã. w15 1/8 3:11, 12

Yãmb sã n yã tɩɩg biis sẽn bɩ, y sã n maag y yĩng n gese y mikdame tɩ b pa wõnd taab zãng ye. La bũmb kẽer n be tɩ y sã n yã rẽ bɩ y miẽ tɩ b bɩɩme. Yaa woto me ne kiris-neb nins sẽn bɩ wã. B pa wõnd taab zãng ye. B tẽnsã, b wubrã, b yʋʋmã, la b sẽn nong bũmb ninsã yaa toor-toore. La baasgo, kiris-neb nins sẽn bɩ wã fãa tara zʋg-sõma kẽere, tɩ wilgdẽ tɩ b bɩɩme. Bɩ d gom zʋg-kãens kẽer yelle. Kiris-ned sẽn bɩ rɩkda a Zeezi togs-n-taare, n ‘tũud a naoã.’ (1 Pɩy. 2:21) A Zeezi yeelame tɩ sẽn tar yõod n yɩɩd yaa f sẽn na n nong a Zeova ne f sũur fãa, f sɩɩg fãa, la ne f tagsg fãa, la f nong f to wa f menga. (Mat. 22:37-39) Kiris-ned sẽn bɩ modgd n tũuda sagl-kãngã. A sẽn vɩ to-to wã wilgdame tɩ yaa yẽ ne a Zeova zoodã n pak-a n yɩɩda. Sẽn paase, a sakd n mongda a meng bũmb kẽer a taabã yĩnga, tɩ wilgdẽ t’a nong-b lame. w15 1/9 1:3-5

Sũur-kaset sẽn yaa sõma pa sõngd tõnd tɩ d zãag d mens ne wẽng bal ye. A sõngd-d lame tɩ d maan sẽn yaa sõma me. Wala makre, a kɩtame tɩ d moond koɛɛgã zak-zaka, tɩ d sã n paam segb buud fãa me bɩ d moone. A Poll sũur-kasetã ra kɩtame t’a moond koɛɛgã. Ad a sẽn yeele: “Yãoã bee mam zugu, la mam sã n ka moon Koe-noogã, a na n yɩɩ toog ne maam.” (1 Kor. 9:16, Wẽnnaam Sebre, 1983) D sã n dɩkd a Poll togs-n-taar n moond koɛɛgã, d sũur-kasetã na n yet-d lame tɩ d sẽn maandã yaa sõma. Sẽn paase, d sã n moond koɛɛgã, d sõngda neb nins sẽn kelgd tõndã tɩ b kibind b sũur-kasetã. D sũur-kasetã tõe n sõnga tõndo. D sã n zãmsd Biiblã wakat fãa, n bʋgsd a goamã zug la d modgd n tũud a saglsã, d kibinda d sũur-kasetã. Woto la d tõogd n teeg d sũur-kasetã, n dɩkd a Zeezi togs-n-taar bũmbã fãa pʋgẽ. w15 1/9 2:16, 18

D sã n karemd a Zozɛfe, a Moyiizi, la a Davɩɩde kibayã, d yãtame t’a Zeova kell n zĩnda ne-ba. Sẽn paase, d yãtame tɩ b rɩka yam b zu-loeesã pʋgẽ, tɩ sõng-b tɩ b tõog n tʋm tʋʋm-kãsems a Zeova sẽn wa n bobl-ba. Woto fãa wilgdame t’a Zeova nonga a nin-buiidã, n get b yelle. Bũmb a to me n kɩt tɩ d neẽ t’a Zeova sẽn kibind tõndã yaa a sẽn nong-dã yĩnga. Ned sẽn tũud a Zeova sã n wa maan yel-wẽnde, a kibinda a soabã, t’a sã n tek yam n kos sugri, bɩ a zoe a nimbãanega, n kõ-a sugri. (Eza. 55:7) A Davɩɩd sẽn gom a Zeova sẽn kõt sugr to-to wã yellã wilgdame t’a yaa ba sẽn zoet d nimbãanega. A yeela woto: “Bãmb n kõt maam sugr m beegrã fãa yĩnga, bãmb n maagd mam bãasã fãa. Bãmb n fãagd maam ne yaoogo, la b wilgd maam b nonglem ne b nimbãan-zoeere. (Yɩɩn. 103:3, 4) Bɩ d fãa kelgd a Zeova saglsã, tɩ baa a sã n wa kibl-d bɩ d sak n deege, n wilg tɩ d miime tɩ rẽ yaa kaset t’a nonga tõnd wʋsgo.—Yɩɩn. 30:6. w15 1/9 4:13, 14

A Mart ra modgdame n dat n segl rɩ-nood buud toor-toor n kõ a Zeezi. A sẽn yã t’a Maari pa sõngd-a wã, a sũurã yikame t’a tɩ togs a Zeezi bũmb ning sẽn namsd-a wã. A Zeezi ra miime tɩ yellã yaa a Mart sẽn dat n maan bũmb wʋsgã. Rẽ n so t’a yeel-a woto: “Marte! Marte! Fo maanda yɩɩre, n sidgd ne bũmb wʋsgo.” A paasame tɩ rɩɩb buk a ye bal sekame. Rẽ poore, a pẽga a Maari, n wilg t’a sẽn wa n zĩnd n maag a yĩng n kelgdẽ wã, a maana neere. Ad a sẽn yeelã: “A Maari yãka pʋɩ-sõng b sẽn kõn deeg n bas-a ye.”(Luk 10:38-42) A Maari ra tõe n yĩma bũmb ning a sẽn dɩ baraarã tao-tao, la a ra pa na n tol n yĩm bũmb nins a Zeezi sẽn wilg-a wã, la a sẽn pẽg-a to-to wã ye. Yʋʋm 60 la zak poore, tʋm-tʋmd a Zã yeela woto: “A Zeezi yaool n dag n nonga a Mart ne a ma-bi-poakã.” (Zã 11:5) Wẽnnaam sẽn vẽneg a Zã t’a yeel woto wã wilgdame t’a Mart kelga a Zeezi saglgã, n tũ Wẽnnaam n pa le bas tɩ bũmb tiis-a ye. w15 1/10 3:3, 4

Bũmb toor-toor n wilgd t’a Zeova sõngda neb rũndã-rũndã. D mi n wʋma neb sẽn yeel tɩ b pʋʋsa Wẽnnaam n kos sõngre, t’a sõng-ba. (Yɩɩn. 53:3) Wala makre, Filipin soolmẽ wã, saam-biig yʋʋr sẽn boond t’a Allan ra moonda koɛɛgã zak-zak koom sʋk tẽn-bil a ye pʋgẽ, n wa seg paga. A sẽn yeel t’a yaa a Zeova Kaset soabã, pagã sɩnga yãbre. Pagã yeela a Allan tɩ daar-n-kãng yibeoog bala, a pʋʋsa a Zeova n kos t’a tʋm a Kaset rãmbã tɩ b wa sõng-a. Yaa Wẽnnaam sẽn leok a pʋʋsgã tao-tao wã la sẽn yɩ-a noog hal t’a raag nintãmã. Pa yã n maan yʋʋmd la pagã rɩk a meng n kõ a Zeova n deeg lisg ye. A Zeova Kaset rãmb wʋsg kɩsa sɩd t’a sõng-b lame tɩ b bas minim-wẽns wala sɩgaar yũubu, dorg yũub wall yoob yɛl gesgo. B kẽer yeelame tɩ nand tɩ b bãng a Zeova, b maoo b pãng tɛk n na n bas minim-wẽng n pa tõog ye. La b sẽn wa n pʋʋs a Zeova n kos sõngrã, a kõ-b-la pãn-kãsenga, tɩ b tõog n base.—Yɩɩn. 37:23, 24. w15 1/10 1:10, 11

Neb kẽer yikda yibeoog pĩnd n karme, n bʋgse, la b pʋʋse. Sãnda maanda rẽ wĩndgã vʋʋsem sasa. Tõe tɩ yãmb nengẽ, yaa zaabr la y tõe n maan dẽ, wall y sẽn wat n dat n gãande. Kẽer karemda yibeoogo, la b le karem b gãandg wakate. (Zoz. 1:8) Sẽn tar yõod n yɩɩd yaa d sẽn na n modg n ‘da bas tɩ weerã sãam zaalem,’ rat n yeel tɩ d segd n basa bũmb nins yõod sẽn pa waoogã pʋgbo, n paamd sẽk n bʋgsd Biiblã sẽn yetã zugu. Biiblã wilgame tɩ neb nins sẽn bʋgsd a sẽn yetã zugu, la b modgd n tũud a saglsã paamda a Zeova barka. (Yɩɩn. 1:1-3) A Zeezi me yeelame “tɩ yaa neb nins sẽn kelgd Wẽnnaam goamã n sakdẽ wã n tar barkã.” (Luk 11:28) La sẽn tar yõod n yɩɩda, d sã n bʋgsd Biiblã sẽn yetã zug daar fãa, na n sõng-d lame tɩ d tõog tɩ d no-goamã la d tʋm-tʋmdɩ wã waoog d Naandã. D sã n maan woto, a Zeova na ning-d-la bark tɩ d paam sũ-noog masã tɛka, la vɩɩm sẽn kõn sa dũni-paalgã pʋgẽ.—Zak 1:25; Vẽn. 1:3. w15 1/10 4:17, 18

A Zeezi sẽn wa n yeel-b t’a bɛɛbã na n yõka yẽ n kʋ wã, a Pɩyɛɛr yeel-a lame tɩ Wẽnnaam pa na n sak t’a buud paam-a ye. A Zeezi ra miime t’a Pɩyɛɛr nonga yẽ, la a ra miime me t’a tagsgã pa zems ye. Bõe la a maan n sõng a Pɩyɛɛr ne karen-biis a taabã? Pipi, a wilg-a lame t’a tagsgã pa zems ye. Rẽ poore, a wilga bũmb ning sẽn na n paam neb nins sẽn pa rat n nams a Zeova raabã yĩngã. A yeelame me t’a Zeova na n keoa neb nins sẽn sakd n mongd b mens bũmb wʋsg yẽ yĩngã. (Mat. 16:21-27) A Pɩyɛɛr pa yĩm sagl-kãens ye. (1 Pɩy. 2:20, 21) Pʋʋs-y-yã a Zeova n kos t’a sõng-y tɩ y bãng sõngr ning y biigã sẽn datã. (Yɩɩn. 32:8) Wala makre, bõe la y tõe n yã n bãng tɩ y biigã tẽebã pãng boogame? Tõe tɩ y neeme t’a sũurã pa noome, wall a wɩta a tẽed-n-taasã, pa rẽ bɩ yaa wa a tara zu-loɛɛga, n yaool n pa rat n togs yãmb ye. Ra yɩ-y tao-tao n tags t’a soosd n maanda yel-wẽn ye. La y pa segd n maan wa y pa ne rẽ, wall y tags tɩ yaa bũmb sẽn na n wa loog n bas-a ye. w15 1/11 2:12, 13

Nonglem hakɩɩkã sẽn be a Zeova Kaset rãmbã sʋkã, n paas b sẽn zemsd taabã wilgdame tɩ yaa bãmb n be tũudum hakɩɩkã pʋgẽ. A Zeezi yeela woto: “Yãmb sã n nong taaba, nebã fãa na bãng tɩ yãmb yaa mam karen-biisi.” (Zã 13:34, 35) Tʋm-tʋmd a Zã me yeelame: “Yaa woto la b bãngd sẽn ya-b Wẽnnaam kambã la sẽn ya-b sʋtãanã kamb n bake. Ned ning fãa sẽn ka maand tɩrga la sẽn ka nong a ba-biig ka Wẽnnaam biig ye. Ad koɛɛg ning yãmb sẽn wʋm hal sɩngrẽ wã: Bɩ d nong taaba.” (1 Zã 3:10, 11) A Zeova Kaset rãmbã sẽn nong taab la b zemsd taabã wilgdame tɩ bãmb n sɩd yaa Kirisã karen-biisi, n yaa neb nins Wẽnnaam sẽn yeel tɩ b moon a Rĩungã koe-noogã dũniyã gillã.—Mat. 24:14. w15 1/11 4:10, 11

Tõnd segd n gesa d moonegã zĩigẽ nebã minimdã la b sẽn tẽed bũmb ninsã, n tõog n bãng wakat ning sẽn zems tɩ d gom ne-ba. Bũmb wʋsg n tõe n sõng-d tɩ bãng wakat ning sẽn zemsã. Wala makre, ned tõe n maana bũmb tɩ sãam d sũuri. D pa na n leok-a zĩig pʋgẽ, n wilg a soabã t’a sẽn maanã zabd-d lame ye. Yɩta sõma tɩ d maag d yĩng n tags bilfu. D tõe n soka d meng woto: ‘A sẽn maanã yɩɩ pʋ-toog bɩ? Seka m na gom ne-a n wilg-a tɩ zabd-m lame bɩ?’ D sã n maan woto, d tõe n mikame tɩ pa sek goam ye. La baa d sã n mik t’a sẽn maan bũmb ningã seka d na gom ne-a, d segd n maaga d yĩng tɩ d sũurã sigi, n da wa gom ne sũ-toog ye. (Yel. 15:28) D sã n wa rat n gom Biiblã yell ne d roagdb nins sẽn pa a Zeova Kaset rãmbã, d segd n talla yam. D ratame tɩ b bãng a Zeova, la d segd n tẽegame tɩ pa na n yɩ zĩig pʋgẽ ye. D sã n bao wakat sẽn zems n gom ne-ba, la d gũus ne d sẽn na n yeel-b bũmb ningã, d goamã tõe n kẽ-b-la sõma. w15 1/12 3:6, 8, 9

Yaa d sẽn wat n lʋɩ bãag la d segd n maan gũusg n yɩɩda. Bala, tɩbsg kẽer tũuda ne yɛl d sẽn pa tõe n wʋmb b võor ye. Tɩp-rãmb sãnda me sẽn maand to-to n bãngd bãas nins nebã sẽn bẽedã naaga ne yɛl võor wʋmb sẽn yaa toogo. Rẽnd d sã n wa rat tɩɩm, yɩta sõma tɩ d sok d meng woto: Sẽn tɩpd-a nebã, wall sẽn koosd-a tɩɩmã tõe n wilga tɩɩmã sẽn tʋmd to-to ninsaal yĩngẽ wã bɩ? A sẽn yet bũmb ningã zemsa ne logtoeemdã bãngr bɩ? Logtoɛɛmb sẽn mi b tʋʋmd n sak n deeg tɩ tɩɩmã yaa sõma bɩ? (Yel. 22:29) Sẽn koosd-a tɩɩmã tõe n yeelame tɩ yaa tɩɩm sẽn yɩt tẽn-zãrgẽ, la tɩ logtoɛɛmbã meng pa mi tɩɩmã ye. La bũmb beeme n wilgdẽ tɩ tɩɩmã yaa sõma bɩ? Sãnda tõe n yeelame meng tɩ b tũnugda ne yel-soalem n bãngd nebã bãasã, la b sẽn tõe n tɩp-b to-to. D segd n maana gũusg ne nin-bãmba. Bala, Wẽnnaam yeelame tɩ d pa segd n deem ne zĩn-dãmbã yɛl ye. Wala makre, d pa segd n deem ne bagr ye.—Maan. 19:26; Tõo. 18:10-12. w15 1/12 4:16

Biiblã pʋgẽ, kibay n be be n gomd wẽn-tũudb sẽn paam t’a Zeova kõ-b a vʋʋsem sõngã yelle. La nin-kãens pa kẽng saasẽ ye. Wala makre, a Zãmbatiisi. A Zeezi yeelame tɩ ninsaalbã sʋka, ned ka be sẽn yɩɩd a Zãmbatiis ye. La a wilgame me t’a Zãmbatiis pa na n tɩ rɩ naam saasẽ ye. Vʋʋsem sõngã ra sõngda a Davɩɩd me. (1 Sãm. 16:13) Vʋʋsem sõnga sõng-a lame t’a bãng a Zeova sõma, la sõng-a t’a gʋls Biiblã babs kẽere. (Mark 12:36) Baa ne rẽ, tʋm-tʋmd a Pɩyɛɛr yeelame t’a Davɩɩd pa rʋ saasẽ ye. (Tʋʋ. 2:34) A Zeova tũnuga ne a vʋʋsem sõngã n sõng nin-kãensã tɩ b tʋm tʋʋm-kãsemse, la a pa yãk-b tɩ b na n tɩ vɩɩmd saasẽ ye. Woto pa rat n yeel tɩ b sẽn sak Wẽnnaam to-to wã pa sek b na kẽng saasẽ, wall tɩ yaa b minimã n pa sek ye. Wilgdame bal t’a Zeova na n wa vʋʋg-b lame, tɩ b vɩɩmd arzãnã pʋgẽ tẽngã zugu.—Zã 5:28, 29; Tʋʋ. 24:15. w16.01 3:16

D sã n tʋmd ne ned d sẽn nonge, d bãngd-a lame n paasdẽ, tɩ d zoodã me pãng paasdẽ. D bãngda a zʋg-sõma wã, a sẽn dat n wa maan bũmb nins a Zeova tũudmã pʋgẽ, la a sẽn maood to-to sẽn na yɩl n tõog n maan dẽ wã. A Zeezi tʋma ne a Zeova n kaoos wʋsgo. Tõe tɩ b tʋma ne taab n maan yʋʋm milyaar-dãmba. Rẽ kɩtame tɩ b nong taab hal sõma, tɩ bũmb pa tõe n sãam b zems-n-taarã ye. B sɩd zemsda taab sõma, n naagd taab n tʋmdẽ. Daar a yembre, a Zeezi pʋʋsa a Zeova n kos t’a kogl a karen-biisã. A ra ratame tɩ b ‘lebg yembre,’ wa yẽ ne a Ba wã sẽn yaa yembrã. (Zã 17:11) D sã n tũud Wẽnnaam noyã, la d moond koɛɛgã, sõngd-d lame tɩ d bãngd a sẽn yaa Wẽnnaam ning buudã n paasdẽ. D bãngda d sẽn segd n teeg-a wã võore, la d sẽn segd n sak t’a wilg-d sorã me võore. D sã n modgd n dat n paas tõnd ne Wẽnnaam zoodã pãnga, a sõngd-d lame. (Zak 4:8) Sẽn paase, tõnd ne d tẽed-n-taasã na n maneg n noomame, bala d zu-loeesã wõnda taaba, bũmb nins sẽn kõt-d sũ-noogã yaa yembre, tɩ d sẽn dat n maan bũmb ninsã me yaa yembre. w16.01 5:9, 10

A Naomi sẽn dat yaa a paam n ta a ba-yirã Israyɛlle. A Rut yẽ na n maana a wãna? A ra tõe n yãka yam n leb a nebẽ wã Moaabe, wall a kell n pa ne a sɩd-ma a Naomi, n tũ-a n kẽng Betlehɛm. La yaa vẽeneg tɩ pa yɩ nana ne-a t’a yãk a sẽn na n maanegã ye. (Rut 1:1-8, 14) A Rut sẽn da yaa pʋg-kõorã, a ra tõe n getame tɩ yẽ sẽn lebd Moaab n são. A ma wã, n paas a roagdb a taab n da be be, n tõe n ges a yell sõma. Moaab pʋd n yaa a ba-yiri. A ra mii tẽngã nebã, b buud-gomdã la b minimdã. A Naomi ra pa tõe n sõng-a Betlehɛm wa a roagdbã ye. Rẽ n so t’a yeel a Rut t’a pa Moaabe. A ra miime t’a pa na n tõog n paam sɩda, wall roog n kõ a bi-pagã ye. A Rut maana wãna? A pa maan wa a Orpa sẽn ‘lebg n leb a nebẽ wã la a wẽnnaam-dãmbẽ’ wã ye. (Rut 1:9-15) A Rut ra pa rat n leb a nebẽ wã, n tɩ tũud b wẽn-faadã ye. w16.02 2:4, 5

A Sayull ne a sodaas tus a tã n da gẽesd a Davɩɩd Zʋʋda weoogẽ wã n dat n kʋ. La daar a ye yʋngo, a Davɩɩd ne a poorẽ dãmbã bãnga a Sayull ne a sodaasã sẽn gãe zĩig ningã. A Davɩɩd ne a Abisayi basame tɩ b gũsi, tɩ b soos n gãens sodaasã n ta a Sayull sẽn gõẽ wã. A Abisayi walma a Davɩɩd n yeel woto: “M kotame tɩ y bas tɩ m dɩdg-a ne tẽngã n kõs-a ne m kãndã vugr bala, ka na n yɩ tɩlɛ tɩ m leb n kõs-a ye!” La a Davɩɩd pa bas-a t’a kʋ a Sayull ye. A yeela a Abisayi yaa: “Da kʋ-b ye. Bala, ned sã n sɩɩs Sẽn-Ka-Saab sẽn yãk-a soabã, a na n konga bʋʋm.” Rẽ poore, a paasame: “Bɩ Sẽn-Ka-Saab sõng-m tɩ [m] nug ra sɩɩs soab ning bãmb sẽn yãkã ye.” (1 Sãm. 26:8-12) A Davɩɩd ra mii zĩnd Wẽnnaam poorẽ wã sẽn dat n yɛɛlga. A ra pa tol n dat n maan a Sayull wẽng ye. Bõe yĩnga? Bala, yaa Wẽnnaam n yãk a Sayull t’a yaa Israyɛll rĩma. Rũndã-rũndã me, a Zeova ratame tɩ neb nins sẽn tũud yẽ wã zĩnd a poorẽ, la b waoog neb nins a sẽn yãk tɩ b lʋɩt taoorã. w16.02 4:1, 2

Fo yaa bi-bɩɩg n magd n na n wa reeg lisg bɩ? Sã n yaa rẽ, bãng tɩ bũmb ka be ninsaal sẽn tõe n maan tɩ yɩ zu-zẽkr n ta a sẽn na n deeg lisg ye. Ned sã n deeg lisgu, a wilga neb a taabã t’a rɩka a meng n kõ a Zeova. Rat n yeel t’a pʋlma a Zeova t’a na n maana a raabã wakat fãa, la tɩ yaa a raabã maaneg n pak-a n yɩɩd bũmb fãa. Rẽnd yaa f sẽn wat n tõe n yãk f toorẽ yam, f sẽn wat n dat n deeg lisg ne f sũur fãa, la f sẽn wat n wʋm rɩk f meng n kõ a Zeova wã sẽn dat n yɛɛlg bal la f segd n deeg lisgu. La tõe tɩ f tagsdame tɩ f nan pa segl n sa n tõe n deeg lisg ye. Wall f rat n deega lisgu, tɩ f roagdbã tagsdẽ tɩ f nan pa segl n sa ye. Tõe tɩ b tagsdame tɩ zĩis kẽer wɛɛngẽ, f segd n modgame n paase, n tõog n wilg tɩ f sɩd rat n yɩɩ Kiris karen-biiga. Sã n yaa woto, bõe la f segd n maane? Ra koms raood ye. Kell n modg tɩ f tẽebã bɩtẽ, sẽn na yɩl tɩ ra kaoos tɩ f yaool n tõog n deeg lisg ye. w16.03 2:1, 2

D tẽed-n-taas kẽer sẽn wa n na n sɩng Biiblã zãmsgã tɩ b zoe n kẽe kãadem, tɩ b to wã pa sak n na n naag n lebg a Zeova Kaset soab ye. Kẽer kẽe kãadem ne a Zeova Kaset soaba, tɩ b pagã wall b sɩdã wa bas a Zeova. Kiris-neb nins sẽn be yel-kãens pʋgẽ wã maanda b sẽn tõe fãa n tũud Biiblã saglsã sẽn na yɩl tɩ b kãadmã yɩ sõma. La pa wakat fãa la Biiblã noyã tũub yaa nana ye. Rũndã-rũndã, a Sʋɩtãan maoodame n dat n sãam zagsã. Rẽ n so tɩ pag ne a sɩd sẽn tũud a Zeova segd n modg n teel taaba. Baa yãmb sẽn kẽ kãadmã sẽn kaoos to-to bɩ y tags n ges y sẽn tõe n maanega, wall y sẽn tõe n gom goam nins buud tɩ y kãadmã maneg n yɩ sõma. Y sã n kẽe kãadem sẽn kaoose, y tõe n kõo sẽn nan kẽ-b paalmã mak-sõngo. Y tõe n mi n bool-b lame tɩ b wa naag-y n maan zak pʋgẽ Biibl zãmsgã. B sã n wa be ne yãmba, b na n yãame tɩ baa neb sẽn kẽ kãadem tɩ kaoos to-to, b segd n ket n zemsda taaba, la b wilgdẽ tɩ b nonga taaba.—Tit 2:3-7. w16.03 3:14, 15