Sigri

A Zɛfte bi-puglã sẽn na n tɩ tʋmd sɛk-roogẽ wã yĩnga, a pa na n tol n paam biig ye. Rẽnd a Zɛfte ra pa na n paam yageng sẽn na n deeg a rogem-pʋɩɩrã, wall sẽn na n kɩt t’a yʋʋr da menem ye. (Bʋ. 11:34) Baa ne rẽ, a Zɛfte yeela Bʋ-kaoodb 11:35 wã pʋgẽ yaa: “Mam goma wʋsg Sẽn-Ka-Saab taoore, la mam ka tõe n lebs m noorã poorẽ ye.” A Zɛfte sẽn sak n mong a meng woto wã yɩɩ a Zeova noogo, t’a ning-a barka. A Zɛfte zu-loɛɛgã buud sã n paam yãmba, y na n dɩka a togs-n-taar bɩ? D sẽn wa n na n dɩk d meng n kõ a Zeova wã, d pʋlm-a lame tɩ baa sẽn wa n yaa a soaba, d na n maana a raabã. D ra miime tɩ yɩl n pids d pʋlengã, tõe n wa yɩɩ tɩlɛ tɩ d mong d meng bũmb kẽere. Baasgo, b sã n wa rat tɩ d maan bũmb d sẽn pa nonge, wall d sẽn pa minim n maandẽ, tõe n yɩɩ toogo. Sã n wa yaa woto, bɩ d modg n bas rabeem la d sak Wẽnnaam daabã, tɩ wilg tɩ d sɩd rat n pidsa d pʋlengã. D tõe n kɩsa sɩd t’a Zeova na n ning-d-la barka, hal tɩ d yĩm d toogã.—Mal. 3:10. w16.04 1:11, 14, 15

A Zeezi wilgda tigimsã sor ne vʋʋsem sõngã maasem. Vʋʋsem sõngã tõe n sõnga tõnd tɩ d yals kãn-kãe makr pʋgẽ, la d moon koɛɛgã ne raoodo. A leb n tõe n sõnga tõnd tɩ d bãng n yãk yam tɩ zemse. Yaa rẽ yĩng la d sẽn segd n maan d sẽn tõe fãa n kẽnd tigissã, n paam vʋʋsem sõngã sõngrã. Naoor wʋsgo, tigissã sasa, d gomda Biiblã bãngr-goam sẽn pids yelle. Rẽ kɩtdame tɩ d maneg n kɩs sɩd t’a Zeova pʋlems a taabã me na n pidsame. Pa d tẽed-n-taasã sã n wa be taoor n sõsd ne-d bal la b kengd d raood ye. B sẽn mi n paam weer n gome, la b sẽn yɩɩnd ne b sũur fãa wã me kengda d raoodo. (1 Kor. 14:26) D sẽn sõsd ne d tẽed-n-taasã nand tɩ tigissã sɩnge, la tigissã poorã me noom-d lame. Bala, d neeme tɩ d tara zo-rãmb sẽn nong-d wʋsgo.—1 Kor. 16:17, 18. w16.04 3:6, 7

A Zeezi yeelame tɩ yẽ karen-biisã na n moona koɛɛgã ‘dũni gill fãa.’ (Mat. 24:14) A yeel-b lame tɩ b sõng ‘nebã buud fãa’ tɩ b yɩ yẽ karen-biisi. Woto wilgdame tɩ koe-noogã na n moona dũniyã gill zugu. Yaa a Zeova Kaset rãmbã bal n pidsd gomd ning a Zeezi sẽn da yeelã, bala, bãmb n moond koe-noogã dũniyã gill zugu. Bõe n wilgd rẽ? Etazĩni soolmẽ wã, kiris-neb ne yʋʋrã taoor dãmb sõor zemsa tus kobs-yoobe, t’a Zeova Kaset rãmbã sõor yaool n dat n ta milyõ la tus kobs-yi. Dũniyã gill zugu, katolik tũudmã prɛtr-dãmb kolga tus kobs-naase, la a Zeova Kaset rãmbã yaa milyõ a nii la zaka, n moond koe-noogã tẽns 240 pʋgẽ. Dẽnd vẽenega, yaa a Zeova Kaset rãmbã n moond koe-noogã dũniyã gill zug tɩ waoogd a Zeova la pẽgd-a.—Yɩɩn. 34:2; 51:17. w16.05 2:13, 14

D sã n ges ãdem-biisã yɛl sẽn yaa to-to rũndã-rũndã wã, d nee vẽeneg tɩ soog-m-meng a woto wata ne zu-loees bala. Rũndã-rũndã, neb wʋsg soo b mens n maand b yam, tɩ rẽ kɩt tɩ b yaa wuk-m-mens rãmba, rat-m-ye rãmba, la b wagsd taaba, n pa bʋʋd b manesmã sẽn tõe n maan b taabã bũmb ning ye. (Sɩng. 3:1-5) La rẽ wata ne zaba. A Zeezi sẽn wa n sõsd ne nebã tãngã zugã, a sagl-b lame tɩ b yɩ neb sẽn modgd n gind mo-yõs wall sẽn welgd-ba, sẽn na yɩl tɩ laafɩ zĩnd bãmb ne b taabã sʋka, baa rẽ sẽn na n yɩ toog to-to, bɩ n nams-b to-to. Wala makre, a yeel-b lame tɩ b yɩ maan-neer dãmba, neb sẽn nong laafɩ, sẽn tõogd b mens n pa yikd b sũyã, sẽn welgd b mo-yõsã tao-tao, la sẽn nong hal baa b bɛɛbã.—Mat. 5:5, 9, 22, 25, 44. w16.05 1:4, 5

Nand tɩ neb wʋsg sẽn be tõnd sʋkã reeg lisgu, yɩɩ tɩlɛ tɩ b toeem hal wʋsgo, tɩ b sẽn vɩ to-to wã zems ne Biiblã noyã. La tõe tɩ hal ne masã, d neeme tɩ yɩl n wõneg Wẽnnaam ne Kiristã n paase, yel-bõoneg n be d sẽn segd n toeeme. (Efɛ. 5:1, 2; 1 Pɩy. 2:21) Wala makre, tõe tɩ d neeme tɩ d nong n yẽgemda d tẽed-n-taasã manesem kẽer poorẽ, wall d wɩt-ba. Tõe me tɩ wakat ninga, d bʋʋda nebã tagsg sẽn na n yɩ a soab d zugu, wall d zoet b sẽn na n wa yeele, tɩ yɩl n maan sẽn segd yaa toogo. Tõe meng tɩ d sẽn maood n dat n toeemã kaoosa yʋʋma, la d nan pa tõog ye. D tẽeg tɩ d ket n yaa neb sẽn pa zems zãnga. (Kol. 3:9, 10) Baa d sẽn deeg lisgã sã n kaoosame, d ket n kongdame. Wakat ninga, d tara tʋls-wẽnse, wall manesem sẽn pa segde, pa rẽ bɩ d getẽ tɩ yaa toog tɩ d tõog d pãn-komsem kẽere. Sɩd me, yɩl n tõog pãn-komsem ning tõe n kaoosa yʋʋma.—Zak 3:2. w16.05 4:3-5

Tõe tɩ y zoe n wʋma ned sẽn yeel tɩ sã n pa a sẽn wa n dog kambã, a ra pa wʋmd a roagdbã sẽn kibind-a wã võor ye. D sã n bɩtẽ, d wat n bãnga kiblgã yõodo, n miẽ masã tɩ wilgdame tɩ b nonga tõndo. (Ebre. 12:5, 11) A Zeova nonga tõnd wa a kamba. Rẽ n so t’a kibind tõnd ne bʋgsem. A ratame tɩ d yɩ neb sẽn tar yam la sũ-noogo, n nong yẽ. (Yel. 23:15) A pa rat tɩ d namse, pa rẽ bɩ n yɩ neb sẽn na n paam sɩbgre, b sẽn pa rat n tek yam yĩng ye. (Efɛ. 2:2, 3) Tõnd sẽn wa n yaa neb sẽn segd ne sɩbgrã, d ra tara zʋgd toor-toor sẽn pa noom Wẽnnaam, n wõnd we-rũmsi. La ne a Zeova remsgã maasem, d ned kam fãa toeemame n lebg nin-bʋgsg wa pe-bila.—Eza. 11:6-8; Kol. 3:9, 10. w16.06 1:7, 8

Kom-bõonegã wʋsg yaa sik-m-mens rãmba, n sakd ne yamleoog tɩ b zãmsd-ba. (Mat. 18:1-3) Woto yĩnga, yɩta sõma tɩ roagdbã zãms b kambã Wẽnnaam daabã la b sõng-b tɩ b nong rẽ tɩ b nan ket n paoodẽ. (2 Tɩm. 3:14, 15) Yɩl n tõog n maan woto, roagdbã segdame n deng n mao tɩ sɩdã kẽ bãmb mensã sũy sõma, tɩ b wilgd bũmb fãa pʋgẽ tɩ b tũuda Biiblã saglsã. Woto, b kambã pa na n sakd n kelgd b zãmsgã bal ye. B na n tũudame me. Sẽn paase, na n kɩtame tɩ b neẽ tɩ b roagdbã sẽn demsd-bã wilgdame tɩ b nong-b lame, la wilgdẽ t’a Zeova me nong-b lame.D sã n sikd d meng n sakd a Zeova wakat fãa, d na n yɩ a nin-nongr wa a Dãniyɛlle. (Dãn. 10:11, 19) A Zeova na n ket n tũnugda ne a Gomdã, a vʋʋsem sõngã la a siglgã n sõngd tõnd tɩ d toeemdẽ. w16.06 2:14, 17

A Zeova ra nonga a Davɩɩde, n yeel meng t’a yaa rao ‘sẽn ta yẽ yam.’ (1 Sãm. 13:13, 14) La a Davɩɩd wa n yoo ne a Batseba t’a rɩk pʋga. Rẽ t’a Batseba sɩd a Uuri kẽnga zabre. A Uuri wa n lebg n waa yiri, t’a Davɩɩd maan sɩlem, n dat t’a kul n tɩ kẽ ne a Batseba, tɩ biigã sã n wa rog bɩ b tags tɩ yaa yẽ la a ba. La a Uuri pa sak n kul ye. Rẽ poore, a Davɩɩd maana yam t’a Uuri ki zabrẽ wã. La a Davɩɩd ne a zakã rãmb paama toog yel-kãngã poorẽ. (2 Sãm. 12:9-12) Baasgo, a Zeova zoeya a Davɩɩd nimbãanega, n kõ-a sugri. A ra miime t’a Davɩɩd rata ne a sũur fãa n maan sẽn yaa tɩrga. (1 Rĩm 9:4) Yãmb sã n da beẽ wakat kãnga, y manesem da na n yɩɩ wãna? Y ra na n basa a Zeova tũub a Davɩɩd yel-wẽndã yĩng bɩ? w16.06 4:7

Tõnd a Zeova Kaset rãmbã pa reemd ne keoogr ning a Zeezi sẽn keoog a karen-biisã ye. D miime tɩ d vɩɩ ‘yaoolem wakatã,’ la tɩ ‘to-kãsengã’ na n sɩnga ka la bilfu. (Dãn. 12:4; Mat. 24:21) Sɩd me, zaba, nen-kɛglem la bi-be-tʋʋm a taaba, bãase, tẽn-digimds la kom bee zĩis wʋsgo. D neeme t’a Zeova nin-buiidã moonda Rĩungã koe-noogã zĩig zãng me. (Mat. 24:7, 11, 12, 14; Luk 21:11) Masã, d gũuda ne yãgb tɩ wakat ning a Zeezi sẽn na n wa pids a Ba wã raabã ta. (Mark 13:26, 27) La baa d sẽn maand fãa, d pa tõe n bãng to-kãsengã sẽn na n sɩng wakat ning takɩ ye. w16.07 2: 2-4

A Zeova barkã sẽn ka to wã yĩnga, a sakame tɩ d tõe n pʋʋs-a. D tõe n pʋʋsa a Zeova wakat buud fãa, a Zeezi yʋʋr yĩnga. Woto yaa zu-zẽkr tɛkẽ! A Poll yeelame tɩ tõnd sẽn tẽed Kiristã yĩnga, “tõnd tara lohorem tɩ kolg Wẽnnaam ne pɛl-kɛgenga.” (Efɛ. 3:12) A Poll sagla tõnd tɩ d sã n wa rat sõngr fãa, bɩ d pʋʋs a Zeova, “n paam tɩ b zoe d nimbãanega, la d zĩnd bark bãmb nifẽ, tɩ d tõe n paam sõngr wakat ning d sẽn tog n paame.” (Ebre. 4:16b) Rẽnd sẽn wa n yaa zu-loɛɛg ning fãa la d tara, d tõe n kosa a Zeova sõngre. La baa tõnd sẽn pa segd ne a sõngrã, a na n sak n deega d kosgã, n sõng-do. Naoor wʋsgo, a tũnugda ne d tẽed-n-taasã. A Zeova sẽn leokd tõnd pʋʋsgã kɩtame tɩ d “tõe n yeel ne raood tɩ: ‘Zu-soabã yaa mam sõangda, mam kõn zoe rabeem ye. Bõe la ninsaal tõe n maan maam?’ ”—Ebre. 13:6. w16.07 3:12, 13

Sa-kãsengã poore, a Nowe ne a kamb a tãabã kell n talla pʋg-yend-yende. La rap wʋsg wa n dɩgsa pagb a yiib bɩ sẽn yɩɩd rẽ. Buud kẽer pʋgẽ, yoobã wa n lebga bũmb sẽn sakde, n pʋd n da naag tũudmã yɛlẽ. Kanaã nebã nengẽ ra yaa woto. A Abrahaam ne a Saara sẽn wa n sak a Zeova noor n yik n kẽng be wã, b tɩ mikame tɩ nebã wʋsg ra yaa yoaadba, n pa tũud noy nins Wẽnnaam sẽn gãneg kãadmã wɛɛngẽ wã ye. A Zeova wa n sãama Sodom la Gomoore, tẽn-kãensã nebã sẽn da yaa yoaadba, la b tʋmd raglmã yĩnga. La a Abrahaam ra yaa toor fasɩ ne nin-kãensã. A ra geta a zakã yell sõma. A Saara me yɩɩ pag sẽn da sakd a sɩdã zu-sobendo. (1 Pɩy. 3:3-5) A Abrahaam wa n gesame t’a biig a Izaak kẽ kãadem ne pag sẽn tũud a Zeova. A Izaak me maana woto, t’a biig a Zakoob paam pag sẽn tũud a Zeova. Yaa a Zakoob kom-dibli 12 wã n wa n lebg Israyɛll buud 12 wã yaab-rãmba. w16.08 1:10

Gom-kãngã pidsda rũndã-rũndã sẽn yaa yaoolem wakatã. Sɩd me, yʋʋmd 2015 soabã, koe-moondb milyõ a nii la tus-kobs-yi la pisi, la bãmb koabg la a nu n moon Rĩungã koe-noogã dũniyã gill zugu. Bãngr-gomdã pʋgẽ, Wẽnnaam paasa woto: “Maam a Sẽn-Ka-Saab na n kɩtame t’a wakatã sã n ta bɩ yɩ tao-tao.” Neb sã n be mobill pʋgẽ tɩ mobillã wa kẽnd tao-tao n yɩɩd pĩndã, b miime. Tõnd me neeme t’a Zeova kɩtame tɩ koe-moonegã la karen-biisã maaneg paamd pãng n paasdẽ. Woto wã, tõnd ned kam fãa manesem yaa wãna? D maneg n moonda koɛɛgã ne yẽesem bɩ? D tẽed-n-taas wʋsg lebga wakat fãa so-pakdb wall sõngr so-pakdba. Kẽer tɩ sõngd n moonda koɛɛgã zĩis koe-moondbã sõor sẽn pa waooge. Sãnda me sõngdame n met Rĩungã roto. D d yaa saam-biig tɩ d yaa saam-bi-poak me, d tara tʋʋm wʋsg “Zu-soabã tʋʋmd pʋgẽ.”—1 Kor. 15:58. w16.08 3:1, 2

Israyɛll nebã sẽn yi yembd Ezɩptã poor bilfu, Amalɛk nebã yika zabr ne-ba. A Moyiiz yeela a Zozue sẽn da yaa raood soabã t’a lʋɩ Israyɛll tãb-biisã taoor tɩ b tɩ zabe, la yẽ mengã peega a Aarõ ne a Ʋʋr tɩ b tɩ rʋ tãn-bil sẽn pẽ zabrã zĩigẽ. Be, b ra nee zabrã. Wẽnnaam sẽn kɩt t’a Moyiiz maan woto wã, sõngame tɩ Israyɛll nebã tõog Amalɛk rãmbã. Tãngã zugã, a Moyiiz zẽka Wẽnnaam dasaarã ne a nus a yiibã, n tees saasã. A sã n zẽk a nusã, Israyɛll nebã tõogda zabrã. La a nusã sã n wa ki t’a siki, Amalɛk rãmbã tõogdame. A Aarõ ne a Ʋʋr maana bũmb tao-tao n na n sõng a Moyiiz. B rɩka kugr n kõ-a t’a zombe, tɩ bãmb b yiibã be a goabg la a rɩtg n teend a nusã, sẽn na yɩl tɩ ra ki t’a sik ye. Woto, a Moyiiz nusã kengame, hal tɩ ta wĩndgã kõom. Wẽnnaam nugã sẽn tar pãngã yĩnga, Israyɛll nebã tõoga zabrã!—Yik. 17:8-13. w16.09 1:5-7

A Poll a kɩsa sɩd t’a sã n pʋʋsd a Zeova n kot sõngre, la a tẽ a Zeezi kũumã sẽn yɩ maoongã, a tõe n maoa ne a pãn-komsmã n tõoge. La tõnd yẽ? D sã n maooda ne pãn-komsem ninga, d tõe n basa d yam tɩ d na n tõogame. La yaa d sẽn na n dɩk a Poll naoore. Tõnd me teeg a Zeova ne d sũur fãa n da teeg d meng pãnga, la d tẽ a Zeezi kũumã sẽn yɩ maoongã. Wẽnnaam mi n basame tɩ d wilg tɩ d yellã sɩd pak-d lame, t’a yaool n sõng-do. Wala makre, tõnd mengã wall d zakã ned sã n bẽeda bã-kɛgenga, pa rẽ bɩ b wẽga tõnd wall d neda, d maanda wãna? D sã n sɩd teega a Zeova, d na n kos-a-la ne d sũur fãa t’a kõ-d pãng la raood tɩ d kell n tũ-a, n tall d sũ-noogã, la d ket n paasd tõnd ne yẽ zoodã pãnga. (Eza. 40:29) Pĩnd wẽndẽ la rũndã-rũndã kiris-neb kibay n wilgd tɩ pʋʋsgã tõe n kõ-d-la pãng la keng d raood tɩ d kell n mao n tõog toogo. w16.09 2:14, 15

Pipi kiris-neb tigingã neb sẽn tall fɩɩgrã, zu-loɛɛg n wa n zĩndi. Wõnda yɩɩ bak-n-sõng n wa ne yellã. Zʋɩf-rãmb nins sẽn da gomd gɛrkã wa n yẽgemdame tɩ b pa get bãmb pʋg-kõapã yell wa sẽn segdã ye. Yɩl n welg zu-loɛɛgã, tʋm-tʋmdbã yãka rap a yopoe, tɩ b na n ges tɩ wẽgb ra zĩnd ye. Rap a yopoe wã fãa yʋyã ra yaa gɛrk yʋya. Tõe tɩ yaa sẽn na yɩl tɩ pʋg-kõapã bas b yam tɩ b yellã na n manegame. (Tʋʋ. 6:2-6) D mi tɩ d pa mi me, d wae n dɩkda d buudã neb tagsa la b minimdu. (Rom. 12:2) Sẽn paase, d tõe n mi n wʋmda d yagse, d tʋmd-n-taas wall d karen-bi-taas sẽn gomd n paoogd bu-zẽms neba, bɩ neb yĩng kõbg sẽn yaa toore. Tõnd me sakd n maanda wa bãmb bɩ? Ned sã n sãbsd tõnd tẽngã wall d minimd kẽere, d manesem yaa wãna? w16.10 1:7, 8

D sã n ges ãndũniyã bũmb toor-toorã, n bʋgs rẽ zug sõma, d nee vẽeneg tɩ pa yaar ye. “Yaa ne tẽeb” la tõnd bãng tɩ Naand n be, baa d ninã pa ne-a. D bãngame t’a yaa yam-kãseng soaba, la t’a nonglmã ne a tɩrlmã la a pãngã ka to ye. (Ebre. 11:3, 27) D sã n karem bũmb nins siãnsã bãngdb sẽn vaees n yã wã, sõngd-d lame tɩ d maneg n pẽg bũmb nins Wẽnnaam sẽn naanã. Siglgã yiisa video-rãmb la sɛb sẽn sõngd tõnd rẽ wɛɛngẽ. Wala makre, Les merveilles de la création révèlent la gloire de Dieu video wã, La vie a-t-elle été créée ? ne Cinq questions à se poser sur l’origine de la vie borsiir-dãmbã, la Y a-t-il un Créateur qui se soucie de vous ? sebrã. Réveillez-vous ! wã pʋgẽ, b mi n sõsa ne siãnsã bãngdb la neb a taaba, tɩ b togs bũmb ning sẽn kɩt tɩ b tẽed masã tɩ Wẽnnaam beeme wã. Réveillez-vous ! wã sõsg ning gom-zug sẽn yaa Hasard ou conception ? wã pʋgẽ me, b mi n goma rũms la bũmb a taab yelle, la b wilg meng tɩ bãngdbã geta rẽ n maand teed toor-toore. w16.09 4:4, 5

Rap la pagb sẽn tall tẽeb tɩ b sõdg b yʋy Ebre-rãmb sak 11 wã pʋgẽ wã kiime, t’a Zeezi Kirist sẽn yaa “yageng” ning b sẽn da gũudã ra nan pa wa pak sor tɩ wẽn-sakdb tõe n kẽng saasẽ ye. (Gal. 3:16) La Wẽnnaam na n vʋʋg-b lame tɩ b vɩɩmd tẽngã zug wakat sẽn kõn sa. (Yɩɩn. 37:11; Eza. 26:19; Ooze 13:14) Ebre-rãmb 11:13 yeelame tɩ pĩnd wẽn-sakdbã “fãa kii ne b tẽebã, n ka paam bũmb nins b sẽn da kãab bãmbã,” la tɩ “b tool n gesa bõn-kãens yɩɩg n beel-ba, n wilg tɩ bãmb mensã yaa sãamb la kaoos-wet tẽng zug ka.” B ra gũuda dũni-paalgã, n da mamsd wa b zoe n bee be. A Abrahaam ra maanda woto. A Zeezi goma a yelle, n yeele: “Yãmb ba a Abrahaam dag n kɩdma ne sũ-noogo, a sẽn dag n tagsd t’a na n yãnda mam daarã yĩnga. A yãnd-a lame, n maan sũ-noogo.” (Zã 8:56) A Saara ne a Izaak la a Zakoob ne wẽn-sakdb a taab me ra gũuda wakat ning Wẽnnaam Rĩungã b sẽn mak ne tẽng sẽn na n soog dũniyã gillã. Wẽnnaam mengã n yaa tẽng-kãng “meebã magda la a meta.”—Ebre. 11:8-11. w16.10 3:4, 5

A Zeova sẽn sõng tõnd ne a vʋʋsem sõngã maasem tɩ d bãng sɩdã, la d tõe n wilg d tẽebã yaa bõn-sõng tɛkẽ. (Luk 10:21) A sõnga tõnd ne a bi-riblã sẽn yaa “tõnd tẽebã sɩngd la a taasdã” maasem tɩ d paam a zoodo. D segd n pʋʋsd-a-la bark wakat fãa rẽ yĩnga. (Ebre. 12:2) Yaa a bark sẽn ka to wã yĩng la a sẽn maan-d neer woto wã. Sẽn na yɩl n wilg tɩ d sũur nooma ne rẽ, d segd n wɩngda ne pʋʋsgo, la ne a Gomdã zãmsgo, tɩ kengd d tẽebã. (1 Pɩy. 2:2) Segdame tɩ d ket n wilgd ne d tʋʋm-tʋmdɩ wã tɩ d tẽeda a Zeova pʋlemsã ne d sũur fãa. Wala makre, d ket n moond Wẽnnaam Rĩungã koɛɛgã, la d sõngd nebã tɩ b lebgd a Zeezi karen-biisi. D ket n modgd n maand “nebã fãa neere,” sẽn yɩɩd fãa d “tẽeb pʋgẽ ba-biisã.” (Gal. 6:10) D ket n maand d sẽn tõe fãa me n tõog n ‘yeeg d yalẽ-kʋdgã ne a tʋʋmã.’—Kol. 3:5, 8-10. w16. 10 4:11, 12

Hakɩɩka, a Zeova sigla ãndũniyã bũmba fãa tɩ zũnd-zãnd baa bilf ka be ye. Woto kɩtame tɩ d tõe n yeel t’a ratame t’a nin-buiidã sigl sõma, n tũud-a tɩ zũnd-zãnd ka be ye. Sɩd me, a Zeova kõo tõnd Biiblã sẽn na yɩl tɩ d bãng a sẽn dat tɩ d tũ-a to-to. D sã n dat tɩ d vɩɩmã tall bark tɩ d sũur noomẽ, yaa tɩlɛ tɩ d sak noy la sagls nins a Zeova sẽn kõt tõnd ne a Gomdã la a siglgã maasmã. Israyɛll nebã ra tũuda noy nins Wẽnnaam sẽn kõ-bã, n da sigl b yɛlã fãa tɩ yaa sõma. Wala makre, b ra yãka pagb tɩ b tʋmd sɛk-roogã noore. (Yik. 38:8) Rĩm a Davɩɩd wa n maneg n sigla Levi nebã la maan-kʋʋdbã tʋʋmã, tɩ b ned fãa ra mi a sẽn maande. (1 Kib. 23:1-6; 24:1-3) Pipi kiris-nebã me ra sigla bũmba fãa sõma, n da tar taoor lʋɩtb sull sẽn kõt tigimsã fãa noy la saglse. Sɩngrẽ wã, sullã neb ra yaa tʋm-tʋmdbã. (Tʋʋ. 6:1-6) A Zeova kɩtame me tɩ nin-kãensã kẽere, la neb a taab sẽn da sõngd-b gʋls lɛta n kõ tigimsã noy la saglse.—1 Tɩm. 3:1-13; Tit 1:5-9. w16.11 2:3, 6, 8, 9

Yʋʋmd 607 sẽn deng a Zeezi rogmã, rĩm a Nebukadnezaar a yiib-n-soabã talla a sodaasã n wa zab ne Zerizalɛm. Biiblã bilga zabrã wẽnem, n yeele: ‘Kalde naabã wa n zaba ne bãmba, n kʋ b kom-bɩɩsã ne zabr sʋʋs b Wẽnd doogẽ wã, bãmb ka bas bi-ribl bɩ bi-pugla, wall nin-kẽem bɩ ned sẽn tar zoob peend ye. . . . La a yõoga Wẽnnaam doogã bugum n wã Zeruzalɛm lalgã, la b yõog na-yiyã fãa, la b sãam te-sõamy wã fãa.’ (2 Kib. 36:17, 19) Zerizalɛm sãoongã ra pa segd n ling zʋɩf-rãmbã ye. Bala, yʋʋm wʋsg sẽn deng rẽ, Wẽnnaam tʋma no-rɛɛsdb tɩ b keoog-b tɩ b sã n kell n kɩɩs a tõodã, a na n basame tɩ Babilon nebã wa sãam-ba. A yeelame tɩ b na n kʋʋ zʋɩf-rãmbã wʋsg ne sʋʋse, la tɩ sẽn na n põs-bã na n tɩ lebga yembs Babilon. w16.11 4:1, 2

A Ãdem n kɩt tɩ yel-wẽnã kẽ dũniyã, tɩ kũum wa yel-wẽnã yĩngã. Rẽ n so tɩ Biiblã yeel tɩ “nin-yend yel-wẽnd waa ne kũum dũni pʋgẽ, la kũum lebga naaba.” (Rom. 5:17, Sebr Sõngo) A Zeova barkã sẽn ka to wã yĩnga, a maana bũmb sẽn kɩt tɩ ninsaalbã tõe n paam b mense, a Zeezi Kirist maasem yĩnga. (Rom. 5:12, 15) Biiblã paasame tɩ “ned a yembr tãa sakr yĩnga, b na n kɩtame tɩ neb wʋsg lebg tɩrse,” n “tõe n paam vɩɩm sẽn kõn sa, tõnd Zu-soab a Zeezi Kiris maasem yĩnga.” (Rom. 5:19, 21) D tẽeg tɩ ra pa tɩlɛ t’a Zeova tʋm a Biigã t’a wa ki tɩ yɩ maoong tõnd yĩng ye. Sẽn paase, ninsaalbã sẽn pa zems zãngã, b ra pa tar b sẽn tõe n maan tɩ sek na kɩt t’a Zeova ne a Zeezi maan bũmb tɩ b tõe n paam b yel-wẽnã sugr ye. Rẽnd d sẽn paamd tɩ Wẽnnaam kõt tõnd d yel-wẽnã sugri, tɩ d saagd n na n wa n vɩɩmd wakat sẽn kõn sa wã sɩd yaa bark d sẽn pa segd ne. Togame tɩ d wilg bũmba fãa pʋgẽ tɩ d sũur nooma ne Wẽnnaam, a sẽn maan-d neer woto fãa wã. w16.12 1:1, 6, 7

Segdame tɩ ned kam fãa fees a menga. Bõe yĩnga? A Poll yeelame tɩ ‘yĩngã ratem sakr wata ne kũum.’ (Rom. 8:6) Sɩd me, kiris-ned sã n “vɩ wa yĩngã sẽn datã,” na n sãama zood ning a sẽn tar ne a Zeova wã, a leb n pa na n wa paam vɩɩm sẽn kõn sa wã ye. La pa rat n yeel t’a pa tõe n toeem ye. Tẽeg-y Korẽnt kiris-ned ning sẽn da ‘tar a ba pag’ tɩ b yiis-a tigingã pʋgẽ wã yelle. A teka yam n kos sugri, la a maneg yellã, n le lebg kiris-ned sẽn tũud a Zeova sõma. (2 Kor. 2:6-8) Ned sẽn tʋm tʋʋm-wẽng a woto sã n tõog n tekame, wilgdame tɩ kiris-ned sẽn maan sẽn pa ta nin-kãngã tõeeme n teke. Dẽnd kiris-ned sã n fees a meng n mik tɩ bũmb ning pʋgẽ, a tũuda a yĩngã sẽn datã la pa a Zeova raabã, kiba-kãngã tõe n kõ-a-la raood t’a toeem bũmb nins fãa sẽn segd ne toeengã. w16.12 2:5, 12, 13

D sẽn mi tɩ d tõe n basa d yell fãa ne a Zeova, n kɩs sɩd t’a na n sõng-d lame wã sigsda d sũyã. D tõe n kɩsa sɩd tɩ Wẽnnaam na n ‘maana hal wʋsg n yɩɩg tõnd sẽn kot fãa, wall d sẽn tagsd fãa.’ (Efɛ. 3:20) Yãmb we n gese! B pa yeel bal t’a na n sõnga tõnd ye. B yeelame t’a na n sõnga tõnd hal wʋsgo, ‘n yɩɩd tõnd sẽn tagsdã.’ D sã n dat n wa paam keoorã, yaa tɩlɛ tɩ d kɩs a Zeova sɩd zãng-zãnga, la d tũud a noyã la a saglsã. A Moyiiz ra yeela Israyɛll nebã yaa: “Sẽn-Ka-Saab na n ninga tẽngã barka, tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã. Yãmb sã n sak n kelg Sẽn-Ka-Saab sẽn yaa yãmb Wẽnnaamã koɛɛgã n gũus n maan bũmb nins fãa mam sẽn kõ yãmb dũndã wã, Sẽn-Ka-Saab sẽn yaa yãmb Wẽnnaamã na n ninga yãmb bark wa b sẽn yeel yãmbã.” (Tõo. 15:4-6) Rẽ yĩnga, y kɩsa sɩd tɩ y sã n kell n tũ a Zeova, a na n ning-y-la bark bɩ? Y sã n kɩsa sɩd ne rẽ, yaa yam-sõngo. w16.12 4:8, 9

A Zeova sẽn yãk yam n maan woto wã tara võore. Yaa sẽn na yɩl n pids bũmb a sẽn pʋlem a zoa a Abrahaam. (Sɩng. 22:15-18) Sẽn paas me, baa a Zeova sẽn tõe n maan a yam bũmb fãa pʋgẽ wã, a wilgda a nonglmã la a tɩrlmã a sẽn maand fãa pʋgẽ. D sã n tags n ges a sẽn da kibind Israyɛll nebã to-to b sã n kɩɩs a raabã, d bãngda rẽ vẽenega. B sã n wilg tɩ b sũy sɩd sãama ne b sẽn da maanã, a Zeova zoeta b nimbãanega, n kõ-b sugri, tɩ wilg t’a nong-b lame. A yeelame: “Mam na n yiisa bãmb ka-tẽebã, mam na n nong-b-la ne yamleoogo.” (Ooze 14:4) A Zeova tõe n maana a yam, la a tagsda ãdem-biisã neer yelle. Ad woto yaa mak-sõng tɛkẽ! A Zeova sẽn wa n na n naan malɛgsã la ninsaalbã, a yãka yam n naan-b tɩ b tõe n yãk b toorẽ yam. Malɛk ning a sẽn naan pipi wã yaa a Zeezi. Yẽ la ‘soab ning ned sẽn ka tõe n yãndã wẽnego.’ (Kol. 1:15) Baa a Zeezi sẽn wa n nan pa wa tẽngã zugã, a ra yãka yam n na n sak a Ba wã wakat fãa, n da yɩ tõat wa a Sʋɩtãan ye. w17.01 2:3, 4

Yɛl sãnda tõe n kɩtame tɩ d wa pa le tõe n maan wa pĩndã ye. Tõe n yɩɩ bãaga, kʋʋlem bɩ bũmb a to. La d yaa biiga, bi-bɩɩg wall kãsma, d tara keelem tɩ d pa tar keelem, d bãng t’a Zeova mii ned kam fãa sẽn tõe, la t’a nanda d modgrã. A pa rat tɩ d maan sẽn yɩɩd d pãng ye. D sã n maan d sẽn tõe, a sũur yaa noog wʋsgo. A Zeezi tʋma tʋʋm nins fãa a Zeova sẽn kõ-a wã ne a sũur fãa tɩ kõ-a sũ-noogo. (Yel. 8:30, 31) Tõnd me tõeeme tɩ d tʋʋmã kõ-d sũ-noogo. Kiris-ned sẽn yaa sik-m-meng soab pa get t’a yɩɩda a na tʋm tʋʋmd b sẽn kõ-a tigingã pʋgẽ, wall a tagsdẽ tɩ b segd n paas-a-la tʋʋm a taab ye. Leb n pa tʋʋm nins neb a taabã sẽn tʋmdã la a get ye. A tʋmda tʋʋmd ning b sẽn kõ-a wã ne a sũur fãa la a pãng fãa, n maand sũ-noog ne rẽ, bala a kɩsa sɩd tɩ yaa a Zeova meng n kõ-a tʋʋmdã. Sik-m-meng soab sakd n deegame t’a tẽed-n-taasã sẽn tʋmd tʋʋm ninsã me yaa a Zeova n kõ-ba. A maanda sũ-noog ne rẽ, la a teend-ba.—Rom. 12:10. w17.01 3:13, 14

Wakat ninga, saam-biis yʋʋm sẽn vẽsg tõe n naag n tʋmda tʋʋmd ninga, tɩ b wa yãk saam-biig sẽn pa ta bãmb t’a get tʋʋmdã yelle. La yɩta sõma tɩ sẽn lebg-a yel-gɛtã sã n wa rat n maan bũmb bɩ a sok sẽn kʋʋl-bã b tagsgo, sẽn na yɩl tɩ b yamã la b minimã naf-a. Tʋm-tʋmd a Poll yʋʋmã ra yɩɩda a Tɩmote hal zĩig sẽn zãre, la b tʋma ne taab yʋʋm wʋsgo. A Poll wa n gʋlsa Korẽnt tigingã neb n yeele: “Mam tʋma m bi-nongr a Tɩmote sẽn maand sɩd Zu-soabã pʋgẽ wã yãmb nengẽ. Yẽnda na n tẽega yãmb so-tũuds nins sẽn be Kiris pʋgẽ tɩ mam zãmsd nebã.” (1 Kor. 4:17) A Poll gom-kãensã wilgdame tɩ yẽ ne a Tɩmote ra teenda taaba, tɩ b tʋmd-n-taarã noome. A Poll maaga a yĩng n sõng a Tɩmote. A Tɩmote modgame n zãms rẽ sõma hal t’a Poll sũur da noom ne-a, n kɩs sɩd t’a na n tõog n gesa Korẽnt tigingã neb yell sõma. Kãsem-dãmbã sẽn sõngd saam-biisã sẽn na yɩl tɩ b wa tõog n ges b tẽed-n-taasã yell sõma wã tog n tũu tʋm-tʋmd a Poll mak-sõngã. w17.01 5:13, 14

A Zeova sẽn dat tɩ nebã vɩ n pa kiidẽ wã, a na n vʋʋga sẽn ki-bã. Sẽn yaa yẽ n na n kɩt tɩ sẽn ki-bã vʋʋgã, yẽ n na n lebg b ba. (Yɩɩn. 36:10) Dẽnd a Zeezi sẽn bool a Zeova a pʋʋsgã pʋgẽ tɩ “tõnd ba” wã, a bee bʋʋm. (Mat. 6:9) Sẽn ki-bã vʋʋgrã yaa tʋʋm-kãseng a Zeova sẽn kõ a Zeezi. (Zã 6:40, 44) Sɩd me, a Zeezi ra yeelame tɩ yẽ “la vʋʋgre, la vɩɩm.” (Zã 11:25) A Zeova ratame tɩ nebã buud fãa wa lebg yẽ neba. A pa tũus neb a wãn bal ye. A Zeezi ra yeelame: ‘Ned ning fãa sẽn maand-a Wẽnnaam daabo, ada soab n yaa mam ma-bi-raoogo, la m ma-bi-poaka, la m ma.’ (Mark 3:35) Wẽnnaam datame tɩ “neb kʋʋng” sẽn ka tõe n sõde, sẽn yi soolem fãa pʋsẽ, buud toɛy-toɛyã fãa pʋsẽ, la sẽn gomd goam buud toɛy-toɛy lebg a nin-buiidu. B tẽeda a Zeezi maoongã la b rat ne b sũy faa n sak Wẽnnaam. Nin-kãensã pẽgda Wẽnnaam n yetẽ: “Fãagrã bee ne tõnd Wẽnnaam sẽn zao geerã zugã, la ne pe-bilã.”—Vẽn. 7:9, 10. w17.02 2:10, 11

A Charles Russell ne a tũud-n-taasã kẽer sẽn da rat n sõng nebã tɩ b bãng Biiblã buud-goam toor-toor pʋgẽ wã, b paka tʋʋmd noor sẽn boond tɩ Zion’s Watch Tower Tract Society yʋʋmd 1884 soabã, tɩ saam-biig a Russell ra yaa taoor soaba. Yɩɩ ned sẽn da maagd a yĩng n zãmsd Biiblã. A talla raoodo, n wilg nebã tɩ egiliizã rãmb sẽn yet tɩ Wẽnnaam yaa mens a tãabo, la tɩ ninsaal tara sɩɩg sẽn pa kiidã pa yit Biiblã pʋgẽ ye. Biiblã zãmsgã sõng-a lame t’a bãng tɩ Kiristã sẽn yeel t’a na n lebg n waame wã, a sã n wa, ned pa na n yã-a ne nif ye. A bãngame me tɩ ‘bu-zẽmsã wakatã’ na n teka yʋʋmd 1914 soabã. (Luk 21:24) A Russell sak n dɩka a sẽka, a keelem la a ligdi, n sõng nebã tɩ b wʋm bũmb nins a sẽn bãng Biiblã pʋgẽ wã. Yaa vẽeneg t’a Zeova ne a Zeezi tũnuga ne a Russell n ges tigingã yell wakat kãnga. A Russell ra pa baood pẽgr ye. Yʋʋmd 1896 soabã, a yeelame: “Tõnd pa baood tɩ nebã pẽg-do, wall b waoog-do, pa rẽ bɩ b pẽg d sɛbã ye. Tõnd ned baa a ye pa baood me tɩ b bool-a tɩ Reveerã bɩ karen-saamb ye. D pa rat me tɩ neb lugl sulli, n bool b mens tɩ tõnd poorẽ dãmb ye.” A Russell wa n pʋd n yeelame tɩ tʋʋmdã pa ninsaal tʋʋmde, la tɩ yaa Wẽnnaam tʋʋmde. w17.02 4:8, 9

Tõnd yãkda d sẽn na n maaneg bũmb toor-toor pʋgẽ. Yaa sɩd tɩ pa yam-yãkr fãa n yaa yõor yell ye. La ned yam-yãkr tõe n naf-a lame, pa rẽ bɩ n wã-a. Bũmb fãa pʋgẽ, d sã n bãng n yãk yam, d zu-loeesã pa na n yɩ wʋsgo, d yamã me na n gãee bãane. La d sã n yãk yam tɩ pa zemse, d zu-loeesã na n yɩɩ wʋsgo, tɩ d vɩɩmã pa noomẽ ye. La bõe n na n sõng-d tɩ bũmb fãa pʋgẽ bɩ d bãng n yãk yam? Yaa tɩlɛ tɩ d tall tẽeb ne Wẽnnaam, n kɩs sɩd t’a rat n sõnga tõndo, la t’a tõe n sɩd sõnga tõnd tɩ bũmb fãa pʋgẽ bɩ d bãng n yãk yam. Yaa tɩlɛ me tɩ d tẽ Wẽnnaam Gomdã, n kɩs sɩd t’a sẽn wilgd tõnd bũmb ninsã la sõma, la d tũ a saglsã. (Zak 1:5-8) Tõnd sẽn nong a Zeova ne a Gomdã to-to wã sã n paasdẽ, d na n maneg n kɩsa sɩd tɩ yẽ n mi sẽn yaa sõma ne tõnd n yɩɩda. Na n kɩtame me tɩ d sã n wa rat n maan bũmb bɩ d bao n bãng a Gomdã sẽn yet rẽ wɛɛngẽ. w17.03 2:2, 3

Tãb-biis kʋʋng sẽn da wa n na n zab ne Zida soolmã, a Zozafat teega a Zeova wa a ba a Aaza. (2 Kib. 20:2-4) Rabeem wʋsg yõka a Zozafate, t’a “yãk yam n na n bao” a Zeova. A pʋʋsa a Zeova, n sik a meng n yeel tɩ bãmb “ka pãng” ne zãma ning sẽn wa n na n zab ne bãmbã ye. A kɩsa sɩd t’a Zeova na n sõng-b lame. Rẽ n so t’a yeel goam nins sẽn yaa rũndã daar vɛrse wã. Tõe tɩ zu-loɛɛg ning taoore, tõnd me yaa wa a Zozafate, n pa mi d sẽn maandga, wall d pʋd n maand rabeem. (2 Kor. 4:8, 9) La tẽeg-y bũmb ning a Zozafat sẽn maanã. A pʋʋsa a Zeova zãma sʋka, n yeel-a tɩ bãmb ka pãng b bɛɛbã taoor ye. (2 Kib. 20:5) Zak soben-dãmbã tõe n dɩka a Zozafat naoore. Yãmb ne y zakã rãmb sã n wa maood ne zu-loɛɛga, bɩ y kos a Zeova t’a kõ-y pãnga, la a sõng-y tɩ y bãng y sẽn na n maanega. Ra zoe-y yãnd n pa rat tɩ y zakã rãmb wʋm ye. B sã n wʋm y sẽn kot a Zeova woto wã, b na n bãngame tɩ y teeg-a-la ne y sũur fãa. A Zeova sõnga a Zozafate. A na n sõnga yãmb me. w17.03 3:12, 13