Yʋʋm-sare

Tʋm-tʋmd a Pɩyɛɛr gʋlsa gom-kãensã n na n keng kiris-nebã raoodo, sẽn na yɩl tɩ b tõog toog zu-loees nins a Sʋɩtãan sẽn wat ne wã pʋgẽ. ‘Sẽn sak-b namsg ne sũ-marã’ kibay wilgda d sẽn tõe n kell n sak Wẽnnaam to-to. D sã n karm-ba, d bãngdame tɩ d tõe n kell n saka Wẽnnaam, la tɩ d sã n sak-a, d na n paama keoore. (Zak 5:11, Wẽnnaam Sebre, 1983) Tõeeme tɩ neb n namsd yãmb y tẽebã yĩnga, pa rẽ bɩ y yaa kãsem-soab y tigingã pʋgẽ, wall y yaa tigims sull yel-gɛta, n getẽ tɩ y tʋʋmdã rat n yɩɩga y pãnga. Sã n yaa woto, a Poll mak-sõngã tõe n naf-y lame. B nams-a-la wʋsg a tẽebã yĩnga. Sẽn paase, a ra maanda yɩɩr a tẽed-n-taasã yĩnga. (2 Kor. 11:23-29) La a Poll pa bas tɩ rẽ koms a raood ye. A mak-sõngã nafa neb a taaba. (2 Kor. 1:6) Yãmb me sã n maan sũ-mar zu-loeesã sasa, tõe n nafa y taabã. w16.04 2:11, 14

A Zeezi pĩnd n togsame tɩ yaoolem wakatã, b na n moona Wẽnnaam Rĩungã koe-noogã tɩ ta neb buud fãa. (Mat. 24:14) Dũniyã gill zugu, nebã miime tɩ yaa tõnd a Zeova Kaset rãmbã n moond koɛɛgã. La pa b fãa la koɛɛgã d sẽn moondã noom ye. Baasgo, baa koɛɛgã sẽn pa noom-b rãmbã kẽer pẽgda tõnd d tʋʋmdã yĩnga. Sɩd me, yaa tõnd n tʋmd tʋʋmd ning a Zeezi sẽn yeel t’a karen-biisã na n tʋmame wã. Tũudum wʋsg yetame tɩ bãmb moonda a Zeezi koe-noogã. La naoor wʋsgo, b koe-moonegã teka b wẽnd-dotẽ wã, televiziõ wã pʋgẽ, wall ne ẽnternetã maasem, tɩ kẽer me kõt kaset n wilgd sẽn sɩng to-to tɩ bãmb wa bãng a Zeezi. Sãnda tagsdame tɩ b sã n sõngd naong rãmbã, wall b tɩpd nebã bɩ n zãmsd-b karengo, yaa koe-moonego. La a Zeezi sẽn da yetã yaa tʋm-kãensã bɩ? w16.05 2:1, 2

Yʋʋmd 1914, Wẽnnaam a Zeova lugla a Rĩungã saasẽ. Rẽ tɛka, goosneema-rãmbã lebga Rĩungã bɛɛba. Ka la bilfu, Wẽnnaam Rĩungã na n sãama b fãa. (Yɩɩn. 2:2, 7-9) Wẽnnaam basame tɩ goosneema-rãmbã beẽ, bala, b sõngdame tɩ bãan bilf beẽ, tɩ zũnd-zãndã pa waoogẽ ye. Woto kɩtame tɩ d tõe n moon Rĩungã koe-noogã. (Rom. 13:3, 4) Wẽnnaam pʋd n sagenda tõnd tɩ d pʋʋs pãn-soaadbã yĩnga, sẽn na yɩl tɩ laafɩ zĩnd tɩ d tõog n tũ yẽ. (1 Tɩm. 2:1, 2) Neb sã n wa rat n maan-d pãnga, d kota pãn-soaadbã sõngr wa tʋm-tʋmd a Polle. Baa Biiblã sẽn yeel tɩ yaa a Sʋɩtãan n so goosneema-rãmbã, a pa yeel t’a Sʋɩtãan kɩtdame tɩ naab fãa maand yẽ raab ye. (Luk 4:5, 6) Woto yĩnga, segdame tɩ d gũus ne d goamã tɩ ned ra wa tags tɩ d yetame tɩ yaa a Sʋɩtãan n so naab ning ye. Sɩd me, Biiblã yeelame tɩ d “ra gom ned wẽng ye.”—Tit 3:1, 2. w16.04 4:5, 6

Tõe tɩ y sok y meng woto: ‘Biiblã sẽn pa kõ noor takɩ bũmb wɛɛngẽ, m yɩta wãn n bãng sẽn noom a Zeova?’ Noor takɩ sã n ka be, ned kam fãa n tog n bʋgs a toore, n bãng a Zeova sẽn date. Bõe n na n sõng-do? Yaa d sẽn na n pʋʋs a Zeova, la d sak t’a wilg-d sor ne a vʋʋsem sõngã maasem. Wakat fãa, a Zeezi ra bʋgsdame n bãngd a Zeova sẽn dat t’a maane. Wala makre, a pʋʋsa a Zeova hal naoor a yiibu, n tõog n maan yel-solemd n dɩlg neb kʋʋng kom sẽn da tare. (Mat. 14:17-20; 15:34-37) La yẽ mengã sẽn da wa n be rasempʋɩɩgẽ wã tɩ kom tar-a, t’a Sʋɩtãan yeel-a t’a kɩt tɩ kugã lebg rɩɩbã, a tõdgame. (Mat. 4:2-4) A Zeezi sẽn da mi a Ba wã sõma wã, a ra miime t’a pa rat t’a tũnug ne tõog ning a sẽn kõ-a wã n bao a meng nafr ye. A sẽn tõdgã wilgdame t’a ra teega a Zeova t’a wilg-a sore, la a sõng-a t’a paam dɩɩbo. w16.05 3:7, 8

Yaa sɩd tɩ b gʋlsa Biiblã sɛb kẽer neb takɩ yĩnga. Nand tɩ d karem Wẽnnaam Gomdã, segdame tɩ d pʋʋs a Zeova n kos t’a sõng-d tɩ d bãng bõn-paala, la a kõ-d yam tɩ d yã sagls nins a sẽn dat tɩ d paamã. (Ɛsd. 7:10; Zak 1:5) Y sã n wa karemd Biiblã bɩ y mi n yals n sok y meng woto: ‘Bõe la bũmb ning m sẽn karmã wilgd maam a Zeova zugu? Wãn-wãn la m tõe n tũ m sẽn bãngã? Wãn to la m tõe n dɩk-a n sõng neda?’ Y sã n sokd y meng sogs-kãensã buudu, y karengã na n sɩd naf-y lame. D rɩk makr wa y sẽn na n karemd vɛrse nins sẽn wilgd zʋgd saam-biisã sẽn segd n bɩɩs n tõog n lebg kãsem-dãmba. (1 Tɩm. 3:2-7) Sẽn pa tigingã neb fãa n tõe n lebg kãsem-dãmbã, y tõe n wa tagsdame tɩ vɛrse-kãens pa tar yõod wʋsg ne-y ye. La yaool n tõe n nafa d fãa. w16.05 5:7, 8

B sẽn da wa n yõg zʋɩf-rãmbã n kẽng yembd Babilondã, b tɩ mikame tɩ soolmã pida ne neb sẽn pʋʋsd bõn-naandse, la b maand bũmb a taab n kõt zĩn-dãmba. La a Dãniyɛll ne a zo-rãmb a tãabã, n paas zʋɩf-rãmb a taab sẽn da nong a Zeova ne b sũur fãa pa sak n dɩk Babilond nebã zʋgd la b minimdã ye. (Dãn. 1:6, 8, 12; 3:16-18) A Dãniyɛll ne a zo-rãmbã ra yãka yam n na n kell n tũ a Zeova, la b yɩ wa yagd a nugẽ. La b sɩd tõogame! Wala makre, baa a Dãniyɛll sẽn zĩnd Babilond a yõor tɛk la balã, Wẽnnaam malɛkã bool-a lame tɩ “Wẽnnaam nin-nongre.” (Dãn. 10:11, 19) Yagd sã n dat n maan bũmbu, a nomda tãndã, n tʋm-a hal t’a wa yɩ bũmb ning a sẽn datã. Neb nins sẽn tũud a Zeova wã miime tɩ yẽ la yĩngr la tẽng Naaba, la t’a tara sor n tõe n maan a yam ne dũniyã soolem toɛy-toɛyã. (Zer. 18:6) A tara sor me n tõe n kɩt tɩ tõnd ned kam fãa yɩ wa yẽ sẽn date. Baa ne rẽ, a Zeova pa modgd ned t’a toeem ye. A ratame tɩ d sak ne yamleoog t’a sõng-d tɩ d toeeme, n yɩ wa yẽ sẽn datã. w16.06 2:1, 2

A Sʋɩtãan tũnugda ne bũmb nins fãa sẽn be dũniyã pʋgẽ wã, n dat tɩ d tẽ tɩ yaa d sã n tar teed wʋsg bal la d vɩɩmã yɩt noogo. Rẽ n so t’a tũnugd ne d “ninã sẽn get bũmb nins n datã,” n na n kɩt tɩ d bao teed wʋsgo. (1 Zã 2:15-17; Sɩng. 3:6; Yel. 27:20) Koaasdbã wae n pẽdgda ne piblisite-rãmbã, n dat tɩ nebã ra b teedã. Yãmb zoe n daa bũmb a neermã yĩng bala, wall y sẽn yã-a piblisite pʋgẽ, n yaool n wa mik t’a pa tɩlɛ ne-y bɩ? D sã n daad teed sẽn pa tɩlɛ ne-do, d gĩta d vɩɩmã. Tõe n tiis-d lame tɩ d pa tõog n tũ a Zeova wa sẽn segdã ye. Wala makre, tõe n wa kɩtame tɩ d pa le tar sẽk n karemd Biiblã, n segend tigissã, n kẽnd tigissã, pa rẽ bɩ n moond koɛɛgã n pa vaandẽ ye. D tẽeg tɩ tʋm-tʋmd a Zã keoog-d lame tɩ “dũni loogdame la a ratem wẽngã me loogdame.” w16.07 1:3, 4

Pipi kiris-nebã ra yaa zʋɩf-rãmba, gɛrk-rãmba, Rom neba, la buud a taab neba. Ra yaa neb sẽn yi tũudum toɛy-toɛy pʋgẽ, tɩ b minimdã la bũmb nins b sẽn da nongã me pa yembr ye. Woto kɩtame tɩ ra yaa toog ne sãnda tɩ b bas minimd kẽere, wall b sak toeeng ning a Zeova sẽn wa ne tũudmã wɛɛngẽ wã. Rẽ n so tɩ wa yɩ tɩlɛ tɩ tʋm-tʋmd a Poll tẽeg-b tɩ kiris-neb hakɩɩkã fãa Wẽnnaam yaa a ye tãa, a Zeova. La rũndã-rũndã yẽ, yaa wãn to d tigimsã pʋsẽ? No-rɛɛs a Ezayi ra pĩnd n togsame tɩ “wakat n wate,” tɩ dũniyã buud toɛy-toɛyã neb na n naag taab n tũ a Zeova. A Ezayi paasame tɩ b na n yeela woto: “Bãmb [a Zeova] na n wilga tõnd b soayã, la tõnd na n tũu bãmb so-bugsã.” (Eza. 2:2, 3) D sẽn ne bãngr-gom-kãngã sẽn pidsdã noom-d-la wʋsgo! Kɩtame tɩ tigims wʋsg pʋgẽ, d tẽed-n-taasã yaa buud toɛy-toɛy neba, tɩ b minimdã me yaa toor-toore. Baa ne rẽ, d naaga taab n tũud a Zeova ne yam a yembre. w16.06 3:15, 16

Tõnd nan pa tõe n bãng n bilg bõn-sõma nins Wẽnnaam sẽn na n maan n kõ sẽn paam-b vʋʋsem sõng zaeebã, b sã n wa rɩt naam saasẽ ne a Zeezi ye. (Luk 22:28-30; Fili. 3:20, 21; 1 Zã 3:2) Bãmb n na n yɩ Kiristã pʋg-paalã b sẽn boond tɩ “Zeruzalɛm paalgã.” (Vẽn. 3:12; 17:14; 21:2, 9, 10) B na n naaga a Zeezi n tʋme, sẽn na yɩl n ‘maag soolem toay-toayã neb bãase.’ Bala, b na n sõnga nebã tɩ b paam b mens ne yel-wẽndã la kũumã, n lebg neb sẽn zems-zãnga. (Vẽn. 22:1, 2, 17) Bõn-kãsems la Wẽnnaam na n maane, n “wilg tõnd bãmb bark kãsengã.” Wala makre, sẽn ki-bã vʋʋgrã. (Zoob 14:13-15; Zã 5:28, 29) Ãnd dãmb la a na n vʋʋge? A na n vʋʋga neb nins sẽn tũ yẽ nand t’a Zeezi wa ki tɩ yɩ maoongã, ne ‘piis a taabã’ sʋk neb nins sẽn maan kaalem yaoolem wakatã. La pa bãmb bal ye.—Zã 10:16. w16.07 4:13-15

Bõe n tõe n sõng-d tɩ d segl d mens n gũ a Zeova daarã? Rẽndame tɩ d yɩ neb sẽn dat ne b sũy fãa n maan sẽn yaa tɩrga. La rẽ bal pa sek ye. A Zeezi kũumã ket tɩ rasem a wãna, a yeela a karen-biisã tɩ segdame tɩ b wɩng ne pʋʋsgo, n kos a Zeova t’a sõng-ba. (Luk 21:36) Tõnd me sẽn vɩ dũniyã yaoolem wakatã, d sã n dat n kell n wɩng ne gũub la gũusgu, d tog n pʋʋsda a Zeova wakat fãa. (1 Pɩy. 4:7) A Zeezi yeelame tɩ dũniyã sɛɛb na n yɩɩ wakat ning d sẽn ka tagsde. (Mat. 24:44) Rẽ n so tɩ d segd n segl d mens n gũ. Pa masã la d segd n bao vɩɩm ning dũniyã nebã sẽn tẽed tɩ kõta sũ-noogã ye. Bala, yaa belgre. Ne Biiblã maasem, a Zeova ne a Zeezi wilgda tõnd d sẽn tog n maan to-to n kell n wɩng ne gũubu. Bɩ d ket n gũusd n get Biiblã bãngr-goamã sẽn pidsd to-to. D modgd n paasd tõnd ne a Zeova zoodã pãnga, la d wilgdẽ tɩ Wẽnnaam Rĩungã yell n pak-d n yɩɩda. Rẽ, dũniyã sɛɛb sã n ta, na n mikame tɩ d segl n saame. (Vẽn. 22:20) Yaa yõor yelle! w16.07 2:15-17

Sẽn kẽ-b kãadmã sã n dat tɩ b nonglmã tall pãnga, b segd n ‘tʋkda taab zɩɩbo,’ la b ‘maand taab sugri.’ Bala, b yiibã fãa sẽn pa zems zãngã, b mi n kongdame. La b segd n dɩka yam b kongr fãa pʋgẽ, n kõt taab sugri, la b wilg nonglem, bala, “nonglem yaa loɛtg sɩd-sɩda.” (Kol. 3:14) Sẽn paase, “nonglem tara sũ-mare, nonglem sõngda neb a taaba, . . . a ka bĩngd wẽng ning b sẽn maan-a wã a sũurẽ ye.” (1 Kor. 13:4, 5) Pag ne a sɩd moor sã n yõsge, sã n tõe, b segd n welg-a lame tɩ wĩndgã nan pa kẽ ye. (Efɛ. 4:26, 27) Yaa sɩd tɩ sak n deeg tɩ f kongame, n kos sugr baooda sik-m-meng la raoodo, la sõngdame tɩ pag ne a sɩd tõog n welg b zu-loeese, tɩ b nonglmã ne taabã me paase. w16.08 2:6

A Zeezi ra moonda Rĩungã koɛɛgã wʋsgo. La a ra baooda sẽk n sõngd a karen-biisã sẽn na yɩl tɩ b paam minim nebã zãmsg wɛɛngẽ, la b tõog n ges Wẽnnaam nebã yell wa pe-kɩɩm sẽn get a piis yelle. (Mat. 10:5-7) A Filip ra moonda koɛɛgã wʋsgo. Baa ne rẽ, a baoo sẽk n sõng a kom-pugli a naasã tɩ bãmb me lebg koe-moondb sẽn tar minim. (Tʋʋ. 21:8, 9) Segdame tɩ tõnd me sõng d taabã tɩ b tʋm Wẽnnaam tʋʋmã sõma. Bõe yĩnga? Dũniyã gill zugu, a Zeova nin-buiidã sõor tara paasgo. Segdame tɩ d sõng sẽn nan pa reeg-b lisgã tɩ b bãng tɩ b sã n zãmsd Biiblã b toore, na n naf-b-la wʋsgo. Yɩta sõma me tɩ d sõng-b tɩ b paam koe-moonegã minim, la nebã zãmsgã minim. D tigimsã pʋsẽ, togame tɩ d sõng rapã tɩ b wa tõog n lebg kãsemb-sõngdba, la kãsem-dãmba. Neb nins tẽeb sẽn bɩ wã sã n sõng sẽn nan sɩng-b a Zeova tũubã tɩ b paam “zãms-sõngo,” bãmb me wat n tõog n tʋma a Zeova tʋʋmã sõma. w16.08 4:1, 2

D sã n naagd d tẽed-n-taasã n tʋmdẽ, paasda d zems-n-taarã pãnga. Sõngdame me tɩ d paam zo-rãmb hakɩɩka, la kɩtdẽ tɩ d fãa maneg n tẽed bark nins Wẽnnaam Rĩungã sẽn na n wa ne wã. D sã n kengd d taabã raoodo, sõngd-b lame tɩ b tõog n mao ne b zu-loeesã, la b bas b yam tɩ beoog na n yɩɩ neere. (Eza. 35:4) Leb n kengda tõnd mengã raoodo, tɩ d tagsd manegrã sẽn watã yell n yɩɩda. D sã n tẽegd kibay sẽn wilgd a Zeova sẽn sõng neb sẽn tũ-a pĩnd wẽndẽ, kengda d tẽebã, tɩ d maneg n kɩs sɩd ne-a. Woto yĩnga, y sã n wa tar zu-loɛɛga, n maand yɩɩre, bɩ y ‘ra bas tɩ y nus pãng sɛ ye.’ (Sof. 3:16) Kɩs-y sɩd tɩ y sã n pʋʋs a Zeova n kos sõngre, yẽ nugã pãng sẽn ka to wã yĩnga, a na n kõ-y la pãng la raoodo, tɩ y tõog toog n tãag wakat ning Rĩungã sẽn na n wa ne bark buud toor-toorã.—Yɩɩn. 73:23, 24. w16.09 1:16-18

Ned sẽn tũud Wẽnnaam sã n na n maneg a menga, a tẽegda rũndã daar vɛrse wã goamã. Fut nins d sẽn ningdã bee ne yɛlã sẽn yaa to-to wã. Sɩd me, waood wakate, d futã pa yembr ne tʋʋlg wakat ye. Leb n bee ne yɛl a taab me. La sẽn yaa a soab fãa, a Zeova noyã pa toeemd ye. (Mal. 3:6) Tʋʋlg sasa, yɩl n bãng n yãk fut sẽn sakd gesg la sẽn pa paoogd ned tõe n maneg n yɩɩ toogo. Baasgo, d sã n mao n pa yelgd fut sẽn mobgd yĩng wall sẽn wilgd d yĩngã zĩis kẽere, d tẽed-n-taasã na n pẽgame. (Zoob 31:1) D sã n wa rigd n na n tɩ kok pemsem kʋlg noore, wall n na n tɩ reem koom, wakat kãng me, d futã segd n zemsame. (Yel. 11:2, 20) Fut nins dũniyã neb sẽn wae n ningd n deemd koomã pa sõma ye. La kiris-ned sã n na n tɩ reem koom, a segd n ninga fuug sẽn pa paoogd tõnd Wẽnnaamã sẽn yaa sõngã. w16.09 3:11, 12

A Zeezi ra nong n sokda a karen-biisã b tagsgo. Y tõe n dɩka a togs-n-taare. Y sã n wa sõsd ne y kambã, wall y maand bũmb ning ne-ba, bɩ y sok-b b tagsgo, la y bas tɩ b togs sẽn be b sũurẽ. Y biig sã n pa sak n deeg bũmb Biiblã sẽn yete, bɩ y maan sũ-mare. Sõng-y-yã-a t’a paam a sogsgã leoore. Sogsgã pa wẽng ye. Wilgdame t’a rat n bãnga bũmb kẽere. Baa a Zeezi meng sẽn wa n tar yʋʋm 12 wã, a soka sogsg sẽn tar yõod wʋsgo. (Luk 2:46) Modg-y n bãng-y y biig fãa sõma. Ra n tags-y tɩ b sẽn tũud yãmb n yit koe-moonegã la b kẽnd tigissã, wilgdame tɩ b nonga a Zeova ye. Rẽ yĩnga, b sɩd tẽeda a Zeova, la b tẽed tɩ Biiblã yaa a Gomde? Maan-y y sẽn tõe tɛk n bãng bũmb ning sã n pa kɩt tɩ yaa toog ne-b tɩ b kell n tũ a Zeova. Daar ne a to fãa, y sã n wa naag-b n maand bũmb bɩ y gom a Zeova yell ne-ba. Y sã n wa pʋʋsd y yembre, wall y pʋʋsd ne y kambã, bɩ y kos a Zeova t’a sõng-ba. w16.09 5:3-5

Rũndã-rũndã, a Zeova Kaset rãmb tusa n yãk yam n na n maan modgr n paas tɩ koe-noogã ta “soolem fãa, buud fãa, goam buud fãa nebã, la tẽng fãa nebã,” tɩ pidsd Wẽnnaam Gomdã sẽn da pĩnd n togsã. (Vẽn. 14:6) Wala makre, kẽer zãmsda buud-gomd a to sẽn na yɩl n moon koɛɛgã n paase. Yãmb me zãmsda buud-gomd rẽ yĩng bɩ? Sãnda yaa misioneer-dãmba, wall b tɩ sõngda koe-moondb sẽn pa waooge. Kẽer be b tẽngẽ, la b teenda tiging sẽn gomd buud-gom-zẽnga. La d sẽn yaa a Zeova nin-buiidã, yaa tõnd ne d zakã rãmb tẽeb na tall pãngã n segd n pak-d n yɩɩda. Wakat ninga, d tʋʋmã sẽn waoogã kɩtame tɩ yaa toog tɩ ned fãa paam weer n zãms Biiblã sõma, tɩ sɩd sõng-a. Rẽ toor sẽn ka be, d tẽed-n-taas nins sẽn tɩ teend tigims sẽn gomd buud-gomd a to wã maooda ne zu-loees a taaba. Koe-moond sã n tɩ sõngd tiging sẽn gomd buud-gom-zẽnga, buudã gomd zãmsg sẽn yãk a toogo, rẽnda a modg me n wʋmd Wẽnnaam Gomdã yel-zulumsã sõma tɩ kẽed-a.—1 Kor. 2:10. w16.10 2:1-3

Rũndã-rũndã, tõnd tẽed-n-taas wʋsg ket n tũuda a Zeova ne sũ-noogo, baa b sẽn namsd-b tɩ loog nugã. Wʋsg la b pag bãens roog Eritre, Sẽngapʋʋr la Kooredisiid soolmẽ wã. La b fãa la bal yaa b sẽn dat n tũ a Zeezi noore, n tõdg tɩ b kõn kẽng zabrã. Pa a Zeova Kaset rãmbã fãa la b kẽes roog wall b nams tɩ loog nug wa b rãmb nins yell d sẽn gomã ye. La b wʋsg namsa naong yĩnga, wall sabab-wẽns pa rẽ bɩ zab yĩnga. B taab me n bas yʋʋr wall arzɛk baoobo, n lʋɩɩs a Zeova raabã taoor wa a Abrahaam, a Izaak, a Zakoob la a Moyiiz. Bõe n sõng-ba? Yaa b sẽn nong a Zeova ne b sũur fãa, la b kɩs sɩd t’a na n pidsa a pʋlemsã. B miime t’a na n wa keoa neb nins sẽn tũud-a ne b sũur fãa wã, n kɩt tɩ b vɩɩmd wakat sẽn kõn sa dũni-paalgã pʋgẽ, zĩig ning kɛgr buud fãa sẽn pa na n zĩndã.—Yɩɩn. 37:5, 7, 9, 29. w16.10 3:15, 16

Rabeem n wa n yõk no-rɛɛs a Zeremi t’a koms raoodo, la a Zeova kenga a pɛlga. (Zer. 1:6-10) A Zeova tʋma malɛk t’a tɩ keng no-rɛɛs a Dãniyɛll raoodo. Malɛkã bool-a lame tɩ ‘Wẽnnaam nin-nongre.’ (Dãn. 10:8, 11, 18, 19) Bɩ d rɩk a Zeova togs-n-taare. D kengd so-pakdbã, sẽn kʋʋl-bã pãng sẽn boogã, la koe-moondb a taabã fãa raoodo. A Zeova ne a Zeezi zĩnda ne taab n kaoose. Baa ne rẽ, a Zeezi sẽn wa n wa tẽng zugã, a Zeova pa tags tɩ pa le yaa tɩlɛ t’a pẽg-a wall a keng a raood ye. Naoor a yiib fãa, a Zeezi wʋma a Ba wã sẽn pa saasẽ n gom n pẽg-a. Yɩɩ a koe-moonegã sɩngrẽ, la sẽn wa n ket bilf tɩ b yõk-a wã. A Zeova yeela woto: “Ada yaa mam Bi-ribl-nongr sẽn ta mam yam zãnga.” (Mat. 3:17; 17:5) A Zeezi sẽn wʋm a Ba wã sẽn yeel t’a nong-a lame, la t’a sũur nooma ne-a wã, sɩd kenga a raoodo. Nand tɩ b wa yõk a Zeezi wã, a sũurã ra sãama wʋsgo, t’a Zeova tʋm malɛk t’a wa keng a pɛlga.—Luk 22:43. w16.11 1:7, 8

Yɩl tɩ bũmb fãa pʋgẽ bɩ f tõogd f sũurã pa nana ye. Ned sã n paoog-do, wall a maan-d-la bũmb sẽn pa segde, d buudã bɩ d yĩnga kõbg pa rẽ bɩ bũmb a to yĩnga, tõe n yika sũur wʋsgo. La sã n yaa d tẽed-n-taag n maan-d woto, zabda sũur n yɩɩda. Yɩta sõma tɩ d tũ Biiblã saglgã, n tõog d sũurã. (Yel. 16:32) Dẽnd d fãa segd n maoodame n tõogd d sũurã. Biiblã leb n yeta tõnd tɩ d kõt taab sugri. Sɩd me, a Zeezi yeelame tɩ ned sã n pa kõt a taabã sugri, a Zeova pa na n kõ yẽ me sugr ye. (Mat. 6:14, 15) Bɩ ned fãa sok a meng woto: ‘Sũ-marã, la sugrã kũun wɛɛngẽ, m getame tɩ m segd n modg n paasame bɩ?’ Naoor wʋsgo, ned sã n pa tõe a sũuri, a lebgda sũ-to-neda. Rẽ tõe n kɩtame tɩ nebã pa nong a zĩigẽ ye. Sũ-to-ned tõe n kɩtame tɩ tigingã neb tẽ a goamã, tɩ wa ne yɛla.—Maan. 19:17, 18. w16.11 3:4-6

Neb wʋsg ra rata ne b sũy fãa n karem Biiblã, n zãms-a n bãng sɩdã. Woto kɩtame tɩ saam-biig a Russell ne a tũud-n-taas a wãn sɩng Biiblã goamã feesg sõma-sõma yʋʋmd 1870 wã. Sɩngrẽ wã, a Russell raabã ra yaa bãng tũudum ning sẽn togsd sɩdã. A maaga a yĩng n fees tũudum toor-toorã sẽn yetã, la baa sẽn pa-b Kirist tũudmã, n na n ges b goamã ne Biiblã sẽn yetã sã n tũuda taaba. Pa yã n kaoos la a mik tɩ b baa a ye pa tũud Wẽnnaam Gomdã sẽn yetã zãng ye. Daar a yembre, saam-biig a Russell goma ne tẽngã wẽnd-dot taoor dãmba, n da tẽed tɩ b na n sak n deega bũmb nins yẽ ne a tũud-n-taasã sẽn fees Biiblã n bãngã, la b rɩk n taas b wẽnd-dotã neba. La sẽn pa nebã na bãng sɩdã n da pak-bã, b tõdgame. Pa yã n zãag la a Russell ne a tũud-n-taasã bãng vẽeneg tɩ b pʋd n pa tõe n naag tũudum sẽn pa tat Wẽnnaam yam n tũ-a ye. w16.11 4:14

Yaa vẽeneg tɩ d pa na n sak n zãmb d pag bɩ d sɩda, d pa na n yũ rãam n su wall d maan yel-wẽn-kãsems a taab ye. (1 Kor. 6:9-11) La d tolg n dat n laka d meng ne bũmb ning fãa sẽn tõe n sãam a Zeova sũuri. Wala makre, d pa rat n yo, la d pʋd n lakda d mens ne filim bɩ sɛb sẽn wilgd yoob yɛla. D pa na n yũ rãam n su, la d pʋd n pa rat n yũ n kolg suub ye. Yɩl n tõog n lak d mens ne bõn-kãensã fãa, ned kam fãa tog n maoo wʋsgo, la tõeeme. Yaa sɩd tɩ d pa tõe n pa wa kong wakat ning ye. La d rata ne d sũur fãa n tũ saglg ning a Poll sẽn kõ wã. A ra yeelame: ‘Da sak-y tɩ yel-wẽnd le rɩ naam y yĩn-kiidgã zug ye; da le sak-y-yã a tʋls-wẽnsã ye.’—Rom. 6:12; 7:18-20. w16.12 1:16, 19-21

A Zeezi yeelame tɩ d sã n kos d saasẽ Ba wã a vʋʋsem sõngã, a na n sak n kõ-d lame. (Luk 11:10-13) Wẽnnaam vʋʋsem sõngã kɩtdame tɩ d bɩɩsd zʋg-sõma toor-toor sẽn tat Wẽnnaam yam. (Kol. 3:10) Yaa zʋg-sõma sẽn sõngd tɩ zems-n-taar be tõnd ne d taabã sʋka, la sõngdẽ tɩ d gind yɛl wʋsg sẽn tõe n wa ne yɩɩre. Bɩ d ges vʋʋsem sõngã sẽn tõe n sõng-d to-to yɛl kẽer pʋgẽ. Yaa vẽeneg tɩ yɩl n sak n ‘sik y yɩɩrã fãa n bas’ ne a Zeova sẽn yaa “Wẽnnaam sẽn yaa pãng soabã,” rẽnda y tall sik-m-menga. (1 Pɩy. 5:6, 7) Y sã n yaa sik-meng soaba, y na n mi y sẽn tõe, la y sẽn pa tõe. Woto na n kɩtame tɩ y ra teeg y meng ye. Y sã n teeg a Zeova n neẽ t’a sõngd-y lame, na n booga y yɩɩrã.—Mii. 6:8. w16.12 3:7, 12

A Nowe moona koɛɛg ning a sẽn da segd n moonã, n keoog nebã ne a sũur fãa, hal tɩ Biiblã yeel t’a yɩɩ ‘tɩrlem koe-moaanda.’ Yaa vẽeneg tɩ koɛɛgã mooneg sõngame t’a Nowe tẽebã kell n tall pãnga. Wẽnnaam da yeelame me t’a ka koom koglgo. A tʋma tʋʋm-kãng ne yam, ne a pãng fãa, la ne pãn-tõod a taabã Wẽnnaam sẽn kõ ninsaal fãa wã. (Ebre. 11:7) Tõnd me tʋmda a Zeova tʋʋmdã wʋsg wa a Nowe. (1 Kor. 15:58) Wala makre, d tẽed-n-taas wʋsg sõngd n meta Rĩungã roto, tigis-kãsems roto, la siglgã rot a taaba, la b get b yelle. Kẽer tʋmda filiyall-dãmbẽ, wall siglgã sɛb lebgr zĩigẽ. Tigis-kãsemsã sasa me, d sõngd n tʋmda tʋʋm toor-toore. La sẽn tɩ yɩɩd fãa, d wɩngda ne koɛɛgã moonego, n miẽ tɩ kengda d tẽebã, n sõngdẽ tɩ d kɩs sɩd tɩ manegr n wate. Hakɩɩka, koɛɛgã mooneg kɩtdame tɩ d maneg n kɩs sɩd tɩ beoog na n yɩɩ neere, n ket n zoet vɩɩm sẽn pa satã zoeesã.—1 Kor. 9:24. w17.01 1:8, 9

D segd n tẽegdame tɩ d taabã me tara sor n na n yãk b toorẽ yam. Bõe yĩnga? Bala, ninsaal fãa tara tõog-kãnga. Rẽ kɩtame tɩ pa wakat fãa la kiris-ned yam-yãkr wõnd a to ye. Tõnd ned kam fãa yel-manesem, wall a sẽn maand bũmb ning a Zeova tũudmã pʋgẽ wã pa yembr ye. D sã n sak n deeg tɩ kiris-ned fãa na n “tʋka a meng zɩɩbo,” d na n wilga d manesmã pʋgẽ tɩ d miime tɩ d taabã me tara sor n na n yãkd b toorẽ yam, baa yel-bõonesã pʋgẽ. (1 Kor. 10:32, 33) A Zeova naana tõnd ned kam fãa t’a tõe n yãk a toorẽ yam, tɩ sɩd yaa lohorem. (2 Kor. 3:17) D sũur nooma ne rẽ, bala, kɩtame tɩ d yam-yãkr fãa pʋgẽ bɩ d tõe n wilg tɩ d nonga a Zeova. Woto yĩnga, bɩ d fãa ket n maoodẽ tɩ d yam-yãkr fãa waoogd Wẽnnaam, la d wilgd d manesmã pʋgẽ tɩ d miime tɩ d taabã me tara sor n na n yãk b toorẽ yam. w17.01 2:15, 17, 18

Pa d sẽn na n gomd n wukd d meng la nebã na n waoog-d ye. Yaa b sã n neẽ tɩ d yaa sũ-bʋgsem la sũ-maasem soaba. (1 Pɩy. 3:3, 4; Zer. 9:22, 23) Baa ned yaa wuk-m-meng soab a sũurẽ, na n wa puka a no-goamã la a tʋʋm-tʋmdɩ wã pʋgẽ. Wala makre, nina tõe n wa ratame t’a taabã bãng tɩ siglgã tʋʋmd ning la a tʋmda, tɩ bũmb kẽer la a mi, wall tɩ yẽ ne saam-biis sẽn lʋɩt taoor tigingã bɩ siglgã pʋgẽ n yaa rogem wall zoodo. Ned tõeeme me n naag a taab n maan bũmbu, n yaool n wa gomd tɩ yaa wa yaa yẽ minim wall a bãngr yĩng la sẽn yãk nengã. A Zeezi yẽ kõo mak-sõngo. A sẽn togs nebã bũmb ninsã fãa la bal ra yita Gʋlsg sõamyã pʋgẽ. A maana woto ne sik-m-menga, sẽn na yɩl tɩ nebã bãng tɩ pa yẽ mengã yam la a bãngr la a sẽn wilgd-bã, la t’a sẽn yetã yita a Zeova nengẽ. w17.01 4:12

Noorã ra yaa vẽenega, t’a tũub me pa toog ye. Sɩd me, tɩɩs sẽn da be zẽedã zĩigẽ tɩ b tõe n dɩ b bɩɩsã waooga. A Sʋɩtãan tũnuga ne waaf n belg a Awa t’a kɩɩs a Zeova sẽn yaa a Ba wã. (Sɩng. 3:1-5; Vẽn. 12:9) A yeelame tɩ sẽn pa “tɩɩsã fãa sẽn be zẽedã zĩigẽ wã biis” la b tõe n dɩ wã pa segd ye. Yaa wa a sẽn sok bal tɩ: ‘Dẽnd yãmb pa tõe n maan y yam wɛ?’ Rẽ poore, a yeela bũmb sẽn yaa ziri fasɩ! A yeela a Awa yaa: “Yãmb ka na n tol n ki ye.” La a mak masã n na n kɩt t’a tẽ tɩ Wẽnnaam noorã tũub pa na n naf-a ye. Ad a sẽn yeele: “Wẽnnaam miime, tɩ yãmb sã n dɩ tɩɩgã bil daare, yãmb yamã na n wekame.” A Sʋɩtãan gomdã rat n yeelame t’a Zeova sẽn gɩdg tɩ b ra rɩ tɩɩgã bilã, a pa rat tɩ b yamã wek ye. A Sʋɩtãan pʋd n belga a Awa tɩ b sã n dɩ, b na n lebga “wa Wẽnnaam n mi sõama ne wẽng n bake.” w17.02 1:8, 9

A Ezayi ra yeelame tɩ nin-kãng na n yɩɩ “naab n soog buud a taabã.” (Eza. 55:4) A Dãniyɛll me ra wilgame tɩ “Wẽnnaam nin-tũusdgã sẽn yaa naabã” ra na n waame. (Dãn. 9:25, Wẽnnaam Sebre, 1983) A Zeezi Kirist sɩd wa n waame, n yeel vẽeneg tɩ yaa yẽ la Wẽnnaam nin-buiidã “taoor soaba.” (Mat. 23:10) A Zeezi karen-biisã sak n tũ-a lame, n da kɩs sɩd tɩ yaa a Zeova meng n yãk-a. (Zã 6:68, 69) Bõe n kɩt tɩ b ra kɩs sɩd ne rẽ? A Zeezi lisgã sasa, a sẽn wa n yit koomẽ wã, a Zãmbatiis “yãnda yĩngr sẽn pake, la Sɩɩg-sõng sẽn wẽnd wall sẽn sigd bãmb zugu.” (Mark 1:10-12) A Zeezi sẽn zĩnd tẽng zugã, Wẽnnaam kõ-a-la a vʋʋsem sõngã t’a maan yel-soalma, la a togs goam tɩ nebã yã vẽeneg tɩ yaa ne Wẽnnaam tõogo. (Tʋʋ. 10:38) Sẽn paase, a Zeezi sẽn da tar Wẽnnaam vʋʋsem sõngã, kɩtame t’a ra nong nebã, n tar sũ-noog la tẽeb sẽn tar pãnga, n paas zʋg-sõma a taaba. (Zã 15:9; Ebre. 12:2) A Zeezi sẽn yãk a toogo, taoor lʋɩt a to kae sẽn maan bõn-kãsems wʋsg woto tɩ wilgd vẽeneg tɩ Wẽnnaam kõ-a-la a vʋʋsem sõngã ye. Hakɩɩka, a Zeezi la taoor soab ning a Zeova sẽn yãkã. w17.02 3:15, 16

Yʋʋmd 33 Pãntekotã tɛka, ra lebga tʋm-tʋmdbã n yaa kiris-neb tigingã taoor lʋɩtba. Biiblã yeelame tɩ Pãntekotã raare, “a Pɩyɛɛr yika yĩngr ne neb piig la a yembrã,” n zẽk a koɛɛg n togs kʋʋngã goam sẽn fãagd yõyã. Ra yaa zʋɩf-rãmb la neb sẽn tuub n sak zʋɩf-rãmbã tũudmã. (Tʋʋ. 2:14, 15) B wʋsg sak n lebga kiris-neb baraare. Rẽ tɛka, b ra “sakda tẽn-tʋmdbã zãmsg neere.” (Tʋʋ. 2:42) Tʋm-tʋmdbã n da get tigingã ligd yelle. (Tʋʋ. 4:34, 35) Leb n yaa bãmb n da zãmsd Wẽnnaam nin-buiidã a raabã. B pʋd n yeelame: “Tõnd na n kell n kẽnga taoor ne pʋʋsgo, la Wẽnnaam koɛɛgã moonego.” (Tʋʋ. 6:4) B tʋma kiris-neb sẽn tar minim sõma tɩ b tɩ moon koɛɛgã zĩis nebã sẽn da nan pa wʋm koe-noogã. (Tʋʋ. 8:14, 15) Tʋm-tʋmdbã wa n yãka kãsem-dãmb kẽer sẽn paam vʋʋsem sõngã zaeebo, tɩ b naag-b n get tigimsã yelle. Bãmb n da naag taab n yaa pipi kiris-nebã taoor lʋɩtb sulli, n wilgd tigimsã b sẽn segd n maanega.—Tʋʋ. 15:2. w17.02 4:4

Dũniyã yamã kẽe neb wʋsgo, hal tɩ b waoogd rap bɩ pagb wa b wẽnnaam-dãmba. Wall tɩ b waoog-b wa a Zeova sẽn dat to-to wã, b waoogd-b lame hal tɩ loog noore. B geta politikã taoor dãmba, tũudmã taoor dãmba, ɛspoorã rãmba, sẽn maand-b filim-dãmbã, la neb a taab yʋy sẽn yi wa mak-sõngo, n dɩkd b togs-n-taar fu-yerdɩ wã la yel-manesmã wɛɛngẽ. Kiris-neb hakɩɩkã miime tɩ pa segd tɩ b waoog ninsaal tɩ loog noor ye. Ninsaalbã fãa sʋka, yaa a Zeezi bal n kõ mak-sõng sẽn ka to tɩ d segd n dɩk a togs-n-taare. (1 Pɩy. 2:21) D sã n waoogd nebã tɩ loog noore, Wẽnnaam sũur pa na n yɩ noog ye. D segd n tẽegdame tɩ “nebã fãa maana yel-wẽna, n kong Wẽnnaam ziirã.” (Rom. 3:23) Dẽnd d pa segd n waoog ninsaal baa a ye wa Wẽnnaam ye. w17.03 1:6-8

Bõe n tõe n sõng-d tɩ d bãng d sã n tũuda a Zeova ne d sũur fãa? D tõe n soka d meng yaa: ‘Mam na n kell n saka a Zeova hal baa toog pʋgẽ bɩ? M data ne m sũur fãa n sõng tɩ tʋʋm-dẽgd baa bilf ra maan tigingã pʋgẽ bɩ?’ Wala makre, y roagd bɩ y zoa sã n maan yel-wẽnd n pa tek yam n kos sugri, tɩ b yiis-a tigingã pʋgẽ, y manesem na n yɩɩ wãna? Y na n yãka yam n da le bao a tũud-n-taar bɩ? Bɩ y sũurã pʋgẽ, bõe la y na n tʋlge? B sã n wa namsd-y y tẽebã yĩnga, y tõe n dɩka a Aaza togs-n-taare, n teeg a Zeova ne y sũur fãa. Tõe tɩ y karen-bi-taas bɩ y karen-saam-dãmb n yaand yãmba, y sẽn yaa a Zeova Kaset rãmbã yĩnga. Y sã n yaa tʋm-tʋmda, tõe tɩ y tʋmd-n-taas n yaand yãmba, y sẽn mi n dɩk vʋʋsg ray sẽn na yɩl n tʋm Wẽnnaam tʋʋmã wall y sẽn pa sakd n tʋm tɩ zʋʋg y tʋʋmã lɛɛrã. Sã n wa yaa woto, bɩ y maan wa a Aaza. Pʋʋs-y Wẽnnaam n kos a sõngre. (2 Kib. 14:11) Tall-y raood n n wɩng ne neer maanego. Tẽeg-y tɩ Wẽnnaam kenga a Aaza pɛlga, la a sõng-a. A na n sõnga yãmb me. w17.03 3:6-8

Biiblã sagenda tõnd tɩ d sã n dat n yãk yam n maan bũmb bɩ d ra yɩ yãg-yãge, sẽn yɩɩd fãa sã n yaa bũmb sẽn tar yõod wʋsgo. Segdame tɩ d reng n tags neere, n yaool n tõog n yãk yam sẽn yaa sõma. (1 Tes. 5:21) Zak-soben-dãmbã sã n dat n maan bũmb sẽn pak zakã neb fãa, b segd n deng n maana vaeesg Biiblã pʋgẽ la siglgã sɛb pʋgẽ. Yɩta sõma me tɩ b sok b zakã neb n bãng b tagsgo. D tẽeg tɩ Wẽnnaam da yeela a Abrahaam t’a sak bũmb a pagã sẽn yeele. (Sɩng. 21:9-12) Nand tɩ kãsem-dãmbã me maan bũmb tigingã yell gesg wɛɛngẽ, b segd n maana vaeesgo. B sã n bãng bũmb sẽn wilgd tɩ segdame tɩ b toeem b yam-yãkr ninga, b pa yɛɛsd tɩ b sã n toeeme, na n kɩtame tɩ nebã pa le waoog-b ye. B sã n yaa sik-m-mens rãmba, n pa dem-deme, b na n sak n toeemame. Yaa sõma tɩ kiris-nebã fãa maand woto. Rẽ kɩtdame tɩ tigingã neb zemsd taaba, n yaa noor a ye.—Tʋʋ. 6:1-4. w17.03 2:16