Sigri

A Zeova sẽn nong-dã yĩnga, a remsda tõndo, n zãmsd tõnd bũmb wʋsgo, la a sõngd tõnd tɩ d paamd minim n paasdẽ. Yaa sẽn na yɩl tɩ d kell n pa a nonglmã pʋgẽ, la d kell n pa vɩɩmã sor zugu. Wakat ninga, kiblgã pa tekd sagls bal ye. Sã n yaa yel-wẽn-kãseng la ned maan-yã, b tõe n deega tʋʋm a sẽn tar tigingã pʋgẽ n bas-a. Baa b sã n wa maan woto, wilgdame tɩ Wẽnnaam ket n nonga a soaba. B sã n deeg a tʋʋmã n bas-a, tõe n sõng-a lame t’a bãng t’a segd n maneg n wɩnga ne Biiblã zãmsgo, bʋgsgo, la pʋʋsgo. Woto tõe n sõngame t’a lebg n maneg yẽ ne a Zeova zoodã. (Yɩɩn. 19:8) Tarẽ-n-tarẽ, b tõe n wa lebs-a-la a tʋʋmã. Baa b sẽn mi n kong n yiis nina tigingã pʋgẽ wã yaa kaset t’a Zeova nonga tõndo, bala, sõngdame tɩ tigingã neb a taab ra wa rɩk a togs-n-taar ye. (1 Kor. 5:6, 7, 11) Sẽn mik tɩ Wẽnnaam pa kibind ned tɩ loog nugã, tõe n sõnga b sẽn yiis-a soabã t’a bãng a yel-wẽndã wẽnem sẽn ta zĩig ningã, n tek yam n kos sugri.—Tʋʋ. 3:19. w18.03 24 s. a 5-6

Gũudã ra pa mi Wẽnnaam Gomdã ye. Dẽnd sẽn na yɩl n lebg kiris-neda, a ra segd n deng n bãnga Biiblã zãms-naana wã, n bãng a Zeova sẽn dat tɩ sẽn tũud-b yẽ wã maanã, la a sak me n tũ a Zeezi sẽn zãms nebã bũmb ninsã. A sẽn bãng bũmb nins wakat bilf pʋgẽ wã kɩtame t’a tʋll n deeg lisgu. (Tʋʋ. 16:25-33) Sãmbg kae t’a lisgã poore, a kell n wɩnga ne Wẽnnaam Gomdã zãmsg ye. Tõe tɩ yãmb biigã me mii Biiblã zãms-naana wã, la a mi rɩk f meng n kõ a Zeova n deeg lisgã sẽn dat n yɛɛlgã, t’a sũur me noom ne bũmb nins a sẽn bãngã. Sã n yaa woto, y maanda a wãna? Y tõe n kɩtame t’a tɩ yã kãsem-dãmbã, tɩ b ges a sã n tõe n deega lisgu. Wa kiris-neb nins sẽn zoe n deeg lisgã, a na n kell n zãmsa Biiblã a vɩɩmã tõre, n bãngd a Zeova n paasdẽ.—Rom. 11:33, 34. w18.03 10 s. a 8-9

D sã n modgd n na n paasd tõnd ne a Zeova zoodã, vʋʋsem sõngã na n kõ-d-la pãng tɩ d toeem d tagsa wã. Tarẽ-n-tarẽ, d wat n tagsda wa Kiristã. Sẽn paase, vʋʋsem sõngã na n sõng-d lame tɩ d tõog n yiis tʋls-wẽns buud fãa d sũurẽ wã, la d bɩɩs zʋgd sẽn tat Wẽnnaam yam. D sã n tagsd wa Kiristã, na n sõngame tɩ d tʋʋmã zĩigẽ wall lekollẽ wã bɩ d no-goamã la d manesmã yɩ sõma. D yam-yãkr fãa me na n wilgame tɩ d maoodame n na n dɩk Kiristã togs-n-taare. D sã n yaa ned vʋʋsem sõngã sẽn wilgd sore, d pa na n bas tɩ baa fʋɩ sãam tõnd ne a Zeova zoodã ye. D sã n wa be makr pʋgẽ, d tẽebã na n sõng-d lame tɩ d tõog d menga, n da maan wẽng ye. D sã n wa rat n yãk yam, yɩta sõma tɩ d reng n sok d meng yaa: ‘Biiblã sagl-bʋs n na n sõng-ma? Sã n da yaa a Zeezi, bõe la a ra na n maane? Yam-yãk-bʋg n na n noog a Zeova sũuri?’ w18.02 25 s. 12; 26 s. 14

A Nowe yaab a Enok wakatã tɩ nebã wẽn-kɩɩsgã ra zoe n tara pãnga. B goma “gom-wẽns” meng n paoog a Zeova. (Zʋʋd 14, 15) Nen-kɛglmã ra tara paasg bala. A Nowe wakatã ne a na n ta tɩ “zĩiga fãa nebã rag n maanda taab pãnga.” Malɛg-wẽns n tek b mens n lebg ninsaalba, n dɩgs pagb n dog kamba. B kambã ra yaa nen-kɛglem dãmba. (Sɩng. 6:2-4, 11, 12) La a Nowe ra yaa toor fasɩ. Biiblã yeelame: “A Nowe zamaanã neb fãa sʋka, yẽnda rag n yaa nin-tɩrga, n yaa burkĩna. A Nowe rag n tũuda Wẽnnaam.” (Sɩng. 6:9) Bõe la gom-kãensã sõngd tõnd tɩ d bãng a Nowe zugu? Pipi, sẽn deng sa-kãsengã, a Nowe tũu a Zeova dũni-wẽng pʋgẽ, n kaoos yʋʋma. Pa yɩ yʋʋm 70 bɩ 80 ye. Yaa sẽn na maan yʋʋm 600! (Sɩng. 7:11) Yiib-n-soaba, a ra pa tar tẽed-n-taas wa tõnd sẽn tar rũndã-rũndã wã sẽn da kengd a raood ye. Wõnda a ba-biisã meng ra pa tũud a Zeova, n tõe n teel-a ye. w18.02 4 s. a 4-5

Sẽn nong-b ligdã rat n paasda b paoongã wakat fãa, n maand b sẽn tõe fãa rẽ yĩnga. La baasda ne “tood buud toay-toaya.” (1 Tɩm. 6:9, 10; Koɛ. 5:10) Yaa sɩd tɩ ligd yaa tɩlɛ ne d fãa. A sõngda tõnd bũmb wʋsg pʋgẽ. (Koɛ. 7:12) La rẽ yĩnga, ned sã n tar sẽn sek a na paam sẽn yaa tɩlɛ ne-a wã bala, a tõe n paama sũ-noog bɩ? N-ye! (Koɛ. 5:12) A Yake biig a Agʋʋr da pʋʋsa Wẽnnaam n yeele: “Da bas-y tɩ m yɩ naong soaba, la y ra bas tɩ m yɩ arzɛk soab me ye. Bɩ y kõ maam sẽn sekd m dɩɩbo.” D tõe n wʋma a sẽn pa rat n yɩ naong soabã võore. A wilgame t’a pa rat tɩ wa kɩt t’a zu, tɩ sãam Wẽnnaam yʋʋr ye. La bõe yĩng t’a pa rat n yɩ arzɛk soaba? A yeelame t’a pa rat tɩ ‘rɩ-n-tɩkã pʋgẽ, bɩ a wa yeel t’a ka mi’ a Zeova ye. (Yel. 30:8, 9) A Zeezi ra yeelame yaa: “Ned ba a yembr ka tõe n sak zu-soben-dãmb a yiib ye. Bala, a na n kisga a yembr la a nong a to wã, wala a loe a meng ne a yembr la a paoog a to wã. Yãmb ka tõe n sak Wẽnnaam la y sak arzegs me ye.”—Mat. 6:24. w18.01 24 s. a 9-11

D sã n kõt d taabã sugri, sõngdame tɩ zems-n-taar be d sʋka. D to sã n beeg-d tɩ d sak n kõ-a sugri, d wilgdame tɩ d sũur nooma ne a Zeova, a sẽn kɩt tɩ tõnd mengã tõe n paam d yel-wẽnã sugr Kiristã maoongã maasem yĩngã. Matye 18:23-34 pʋgẽ, a Zeezi wẽe yel-bũndi, n wilg d sẽn segd n kõt d taabã sugrã võore. Karm-y yel-bũndã la y sok y meng yaa: ‘Mam data ne m sũur fãa n tũ a Zeezi sẽn yeelã bɩ? M yaa wʋmda, la m maand sũ-mar ne m tẽed-n-taasã bɩ? Ned sã n beeg-ma, m sakd n kõ-a-la sugr bɩ?’ Yaa sɩd tɩ beegrã bee taab pʋsẽ. D sẽn pa zems zãngã, beegr ning tõe n zab-d lame, hal tɩ yɩl n kõ sugrã pa nana ye. La a Zeezi yel-bũndã wilgda a Zeova sẽn dat tɩ d maanã. A Zeezi wilga vẽeneg tɩ bʋʋm sã n be sẽn sek d na kõ d to sugri, tɩ d yaool n zãgse, a Zeova me pa na n kõ-d sugr ye. Yɩta sõma tɩ d bʋgs rẽ zug neere. Sẽn na yɩl tɩ d zems-n-taarã ra sãame, d segd n tũu a Zeezi sẽn yeelã, n sakd n kõt d taabã sugri. w18.01 15 s. 12

A Dãniyɛll pa sak n na n bas tɩ noor ninsaalb sẽn yiis kɩt t’a pa tũ Wẽnnaam wa sẽn segdã ye. A Dãniyɛll sẽn tall raood la a kell n maan sɩd ne a Zeova wã, a Zeova maana yel-solemd tɩ gɩgma wã pa maan-a bũmb ye. Kɩtame tɩ meed-rãmbã ne pɛrs-rãmbã soolmã neb wʋsg bãng t’a Zeova n yaa Wẽnnaam sɩd-sɩdã. (Dãn. 6:26-28) D maanda wãn n paam a Dãniyɛll tẽebã buudu. D sã n dat tɩ d tẽebã tall pãnga, Wẽnnaam Gomdã kareng bal pa sek ye. Yaa tɩlɛ tɩ d wʋmd a goamã võore. (Mat. 13:23) D sẽn dat yaa d wʋm a Zeova noyã la a saglsã võor sõma. Rẽ n so tɩ d tog n bʋgsd Biiblã goamã zugu. Yaa tɩlɛ me tɩ d nong n pʋʋsdẽ, sẽn yɩɩd fãa, d sã n wa tar zu-loeese. D sã n pelg d pʋg n kos yam la pãnga, d tõe n kɩsa sɩd t’a Zeova na n kõ-d-la hal tɩ seke.—Zak 1:5. w18.02 10-11 s. 13-15

F sã n wa taasd f taabã koɛɛgã, yaa moonegã zĩigẽ tɩ yaa lekollẽ wã, f na n maana kaset t’a Zeova yaa maan-neer soaba, bala f na n neeme t’a kõt-f-la raood tɩ f wilgd nebã f sẽn tẽed bũmb ninsã. Pa nana ne kẽer tɩ b taas b karen-bi-taasã koɛɛgã ye. Tõe tɩ fo wʋmda a võore. Sɩd me, f pa mi b manesem sẽn na n yɩ to-to ye. Sã n yaa karen-biis wʋsg taoor la f segd n gome, rẽ yaa toog n yɩɩd sẽn na n yaa b yembr-yembre. La bõe n na n sõng-fo? Reng n tags n ges bũmb ning sẽn kɩt tɩ fo kɩs sɩd tɩ f sẽn tẽed bũmb ninsã yaa sɩdã. “Qu’enseigne réellement la Bible ? (Fiches d’étude)” sẽn be jw.org pʋgẽ wã tõe n nafa foo sõma. Modg n dɩ a yõodo. Na n sõng-f lame tɩ f bʋgs f sẽn tẽed bũmb ninsã zug neere, tɩ f tags n ges f sẽn tẽed rẽ wã võore, la f sẽn tõe n maan n wilg f taabã f sẽn tẽed bũmb ninsã. Fo sã n kɩs sɩd zãng ne f sẽn tẽed bũmb ninsã, la f segl f meng sõma, na n kɩtame tɩ f rat ne f sũur fãa n gom a Zeova yell ne nebã.—Zer. 20:8, 9. w17.12 26 s. 12, 14-15

Y sã n sõng y biig fãa t’a bãng Biiblã kibayã, rẽ bal pa sek ye. Tẽeg-y t’a Poll yeelame t’a Tɩmote ra ‘tẽeda’ bũmb nins a sẽn zãmsã. Gɛrkã pʋgẽ, gom-bil ning a Poll sẽn pʋdã rat n yeelame tɩ “kɩs sɩd ne bũmbu,” bɩ “bas f yam tɩ bũmb yaa sɩda.” A Tɩmote ra mii Biiblã babg ning b sẽn da gʋls ne ebre wã hal a “yãadem wakate.” La a wa n bãnga bũmb wʋsg sẽn kɩt t’a kɩs sɩd t’a Zeezi n yaa Mesi wã. Bõe la y tõe n maan n sõng y kambã tɩ b tẽebã tall pãng wa a Tɩmote, tɩ bãmb me kɩs sɩd ne bũmb nins y sẽn zãmsd-bã? Yaa tɩlɛ tɩ y tall sũ-mare. Pa zĩig pʋgẽ la kambã na n tẽ y sẽn zãmsd-bã ye. Leb n pa yãmb sẽn kɩs sɩd ne bũmb la y kambã me na n kɩs sɩd ne rẽ ye. Sẽn na yɩl tɩ biig fãa kɩs sɩd ne Biiblã sẽn yetã, yaa tɩlɛ t’a tagsd a toore, n tõog n wa ‘mi sõma ne wẽng n bake.’ (Rom. 12:1) Roagdba, yãmb tõe n maana bũmb wʋsg n sõng y kambã tɩ b bɩɩs b tẽebã, sẽn yɩɩd fãa b sã n wa tar sogsgo. w17.12 19 s. a 3, 5-6

A Mart yaa a Zeezi zoa la a karen-biiga. A Lazaar sẽn yaa a tão wã maana kaalem, t’a be sũ-sãang pʋgẽ. Bũmb n be n tõe n bels-a bɩ? N-ye. A Zeezi kenga a pɛlg n yeel-a yaa: “Fo tão wã na n vʋʋgame.” (Zã 11:20-23) A Mart ra kɩsa sɩd tɩ wakat n wat tɩ sẽn ki-bã na n vʋʋge. La baraar bala, a Zeezi maana yel-solemd n vʋʋg a Lazaare. Bũmb ka be d sẽn tõe n tiki, n tags tɩ d ned sã n maan kaalem, a Zeezi wall a Ba wã na n maana yel-solemd n vʋʋg-a zĩig pʋgẽ ye. La baasgo, yãmb kɩsa sɩd wa a Mart tɩ wakat n wat tɩ sẽn ki-bã na n vʋʋg bɩ? Tõe tɩ yaa y pag wall y sɩda, y ma wall y ba, pa rẽ bɩ y biig wall y yaab n maan kaalem. Sãmbg kae tɩ y yãgdame n dat n wa paam n mobg a soaba, n sõs ne-a, la y naag taab n maan sũ-noogo. Bʋʋm waoog sẽn sek yãmb me na yeel wa a Mart yaa: ‘M miime tɩ m nedã sẽn maan kaalmã na n vʋʋgame.’ Bɩ d tẽeg bũmb nins sẽn kɩt tɩ d kɩs sɩd tɩ sẽn ki-bã na n wa vʋʋgame wã. Kiris-ned fãa sã n bʋgs rẽ zugu, na n naf-a lame. w17.12 3 s. a 1-2

A Zeezi ra nonga a Moyiiz tõogã. Rẽ pa lingr ye. Bala, yaa a Zeova sẽn yaa a soab ning a Zeezi sẽn nong n yɩɩdã n kõ tõogã. Yɩɩn-sõamyã 40:9 wã ra pĩnd n wilgame t’a Zeezi na n nonga Wẽnnaam toogã wʋsgo. Rũndã daar vɛrse wã wilgda rẽ. Ne a no-goamã la a tʋʋm-tʋmdɩ wã, a Zeezi wilgame tɩ Wẽnnaam tõogã zemsa zãnga, tɩ nafda neda, la t’a fãa na n paama pidsgu. (Mat. 5:17-19) Sãmbg kae t’a Zeezi sũur sãama a sẽn da ne gʋlsdbã la fariziẽ-rãmbã sẽn golemd a Ba wã tõogã, tɩ wõnd a tũub yaa toogã. B ra gũusda wʋsgo, n tũud baa tõogã yel-bõonegã. Sɩd me, a Zeezi yeel-b lame tɩ b yãkda ‘mant la anet ne kume’ piig-pʋɩɩre. La yellã ra yaa bõe? Ad a sẽn yeele: “Yãmb basda bũmb nins sẽn yaa neer n yɩɩd tõogã pʋgẽ sẽn yaa tɩrlem, la nimbãan-zoeere, la sɩda.” (Mat. 23:23, Wẽnnaam Sebre, 1983) Sẽn da pak-b yaa gãneg noy nin-buiidã yĩnga. B ra pa wʋmd tõogã võore, la b ra tagsdẽ me tɩ b sãoo b taabã. La a Zeezi yẽ ra wʋmda tõogã võore. A ra mii bũmb ning sẽn kɩt t’a Zeova kõ tõogã, la tõogã noor fãa sẽn sõngd tɩ d bãng bũmb ning a Zeova zugu. w17.11 13 s. a 1-2

Nina tõe n yeela tõnd yaa: “Nebã tog n vɩɩmda b yam. Bõe yĩng tɩ b yet tɩ pag ne rao pa tõe n kẽ ne taaba, sã n pa b kẽe kãadem?” Neb kẽer sẽn tagsd tɩ pa tog tɩ kiris-nebã gɩdg yoobã yaa bũmb sẽn pa zemse. Bõe yĩnga? Bala Wẽnnaam sebrã pʋgẽ, b gɩdga yoobo. (1 Tes. 4:4-8) Sẽn yaa a Zeova n naan tõndã, a tara sor n na n lugl noy tɩ tõnd tũ. Yẽ n lugl kãadmã, la a yeel tɩ yaa pag ne rao sẽn kẽ kãadem ne taab bal n tar sor n kẽ ne taaba. Yaa a sẽn nong tõndã yĩng la a sẽn kõ noy tɩ d segd n tũ wã. D sã n tũ, nafd-d lame. Zak pʋgẽ, nebã fãa sã n tũud Wẽnnaam noyã, sõngdame tɩ b maneg n nong taaba, n waoogd taaba, tɩ ned fãa yam gãe bãane. La neb nins sẽn mi Wẽnnaam noyã la b kɩɩsdẽ wã, a na n sɩbg-b lame. (Ebre. 13:4) Biiblã wilgda d sẽn tõe n maan to-to n zãag d meng ne yoobo. Yaa tɩlɛ tɩ d gũus ne bũmb nins d sẽn getã. (Mat. 5:28, 29) Rẽ n so tɩ d pa segd n ges pornogarfi, bɩ n kelg mizik sẽn wat ne yoob tʋlsem ye.—Efɛ. 5:3-5. w17.11 22 s. a 9-10

Hal pĩnd wẽndẽ n tãag rũndã, a Zeova nin-buiidã pẽgd-a-la ne yɩɩlã maasem. Israyɛll nebã sã n da wa tũud a Zeova ne b sũur fãa, mikdame tɩ yɩɩlã tara pãng b tũudmã pʋgẽ. Wala makre, rĩm a Davɩɩd sẽn wa n na n sigl wẽnd-doogã tʋʋmã, a yãka Levi buudã neb 4 000 sẽn na n waoogd a Zeova ne yʋʋm-teedo. Nin-kãens sʋkã, “yɩɩn-mitb” 288 n da “paam zãmsgo,” n na n yɩɩnd n waoogd a Zeova. (1 Kib. 23:5; 25:7) Wẽnd-doogã pakr daar me, b yɩɩla ne yʋʋm-teed n pẽg a Zeova. Ad Biiblã sẽn yete: “Tãn-tãn-pɛɛbdbã ne yɩɩn-yɩɩndbã naaga taab n na n pẽg Sẽn-Ka-Saabo, . . . La tãn-tãadã ne kɛmã, la yʋʋm teedã fãa rag n naagame n yɩɩndẽ. La . . . Sẽn-Ka-Saab ziirã ra pida roogã.” Tags-y n ges-y yel-kãngã sẽn keng Israyɛll nebã tẽeb to-to!—2 Kib. 5:13, 14; 7:6. w17.11 4 s. a 4-5

A Zeezi ra miime tɩ pa nebã fãa n na n sak n yɩ yẽ karen-biisi, la tɩ yaa tɩlɛ t’a karen-biisã tall raoodo, bala b na n nams-b-la tũudmã yĩnga. Yaa sɩd t’a Zeezi sẽn da rat yaa taas nebã Wẽnnaam koɛɛgã lakae, pa nebã welgr ye. (Zã 18:37) Baasgo, ned sã n dat n kell n yɩ a Zeezi karen-biiga, pa wakat fãa la na n yɩ nana, sẽn yɩɩd fãa, a zakã rãmb wall a zo-rãmb sã n pa sak n na n tũ a Zeova. Sẽn tũud-b a Zeezi wã zags rãmb yaal-b lame, wall b pʋd n rig-ba, pa rẽ bɩ n yiis-b buudu, la b tõoga toog sẽn na yɩl n ta a Zeezi yam. Bark nins b sẽn paamã yɩɩda b sẽn bõnã hal zĩig sẽn zãre. (Mark 10:29, 30) Baa d zakã rãmb sã n pa rat tɩ d tũ a Zeova, d ket n nong-b lame. La d pa segd n yĩm tɩ yaa a Zeova ne Kiristã la d segd n nong n yɩɩd ye. (Mat. 10:37) Yɩta sõma me tɩ d tẽeg t’a Sʋɩtãan sẽn mi tɩ d nonga d zakã rãmbã, a tõe n tũnuga ne rẽ n kɩt tɩ d pa kell n maan sɩd ne a Zeova ye. w17.10 13 s. a 3-6

Bõn-makrã wilgdame t’a Zeova pa tol n tõe n bas tɩ wẽng buud baa a ye zĩnd a nin-buiidã sʋk ye. A sã n yã sẽn yaa wẽnga, tao-tao bala, a maanda bũmb n dems yellã. (1 Kor. 5:13) Malɛkã sẽn lebs peoogã limd sẽn zɩsã n fõgen tao-tao wã wilgda rẽ. Rẽnd bõn-makrã kɩtame tɩ Israyɛll neb nins sẽn zĩnd a Zakari wakatẽ wã ra tõe n bas b yam t’a Zeova na n gesame t’a tũudmã kell n pa yɩlemde, n da naag ne rẽgd ye. La bõn-makrã tẽega Israyɛll nebã tɩ yaa tɩlɛ tɩ bãmb me mao tɩ b tũudmã kell n yɩ yɩlemde. Wẽng bɩ wẽnem pa segd n zĩnd Wẽnnaam nin-buiidã sʋk ye. Pʋd n pa tõe n zĩnd ye. Rũndã-rũndã, d paamame t’a Zeova sõng-d tɩ d be a siglgã sẽn yaa yɩlemdã pʋgẽ, la d paam t’a nong tond la a kogend tõndo. Bee ne tõnd ned kam fãa t’a mao sẽn na yɩl tɩ siglgã kell n pa yɩlemde. Zems-n-taar ning sẽn be Wẽnnaam nin-buiidã sʋkã kɩtame tɩ yaa wa d zoe n bee arzãn pʋgẽ. Woto wã, wẽnem buud baa a ye pa segd n zĩnd d sʋk ye. w17.10 24 s. 14-15; 25 s. 17-18

Yaa zʋɩf-rãmb n gʋls Biiblã pipi sɛb 39 wã. Sɩd me, yaa zʋɩf-rãmbã la ‘Wẽnnaam deng n dɩk a goamã n gũnugi.’ (Rom. 3:1, 2) B gʋlsa seb-kãens ne ebre, tɩ zĩis kẽer yaa ne arameẽ. La zʋɩf-rãmb wʋsg wa n pa le wʋmd ebre ye. Bõe yĩnga? Gɛrɛs naab a Alɛgsãndr le Gãrã wa n zab n deesa tẽns wʋsgo, t’a soolmã yalge. (Dãn. 8:5-7, 20, 21) Kɩtame tɩ tẽns nins a sẽn da so wã pʋgẽ, lebga gɛrkã la b ra gomd n yɩɩda. Zʋɩf-rãmbã wʋsg wa n gomda gɛrkã, n pa le tõe n karem Biiblã ne ebre wã n wʋm a võor ye. Yellã tɩɩm yaa bõe? Sẽn kolg yʋʋm 250 sẽn deng a Zeezi rogmã, b lebga Biiblã babg ning b sẽn da gʋls ne ebre wã. Yaa Biibl-kãng b sẽn lebg ne gɛrkã la b sẽn wa n boond kaoosg zugẽ tɩ Sɛptãntã. Rẽ n yɩ pipi b sẽn lebg Biiblã babg ning b sẽn da gʋls ne ebre wã tõre. w17.09 20 s. a 7-9

Yãmb tʋʋmdã taoor soab tõe n datame tɩ y tʋm n zʋʋg y sigbã lɛɛre, wall wɩkɛn-dãmbã, tɩ yaool n yaa wakat y sẽn yãk zak pʋgẽ Biiblã zãmsgã, koe-moonegã la tigissã kẽnd yĩnga. Sã n wa yaa woto, yaa tɩlɛ tɩ y tall raood n zãgse. Rẽ, y kõta y kambã mak-sõngo. D sã n sõng d kambã tɩ b yãk b sẽn dat n wa maaneg Wẽnnaam tʋʋmdã pʋgẽ, la d sõng-b tɩ b sɩd tõoge, rẽ me wilgdame tɩ d tara raoodo. Wala makre, roagdb kẽer tõe n yɛɛsdame n pa rat n sagl b kambã tɩ b lebg so-pakdba, Betɛllẽ tʋm-tʋmdba, wall b tɩ sõng zĩig koe-moondb sẽn pa waooge, pa rẽ bɩ b sõngd n met siglgã rot ye. Tõe tɩ yaa b sẽn yɛɛsd b na n wa kʋʋl tɩ b kambã pa tõog n ges b yellã. La b segd n talla raoodo, n kɩs sɩd t’a Zeova na n pidsa a sẽn pʋlmã, bala rẽ n wilgd tɩ b yaa yam dãmba. (Yɩɩn. 37:25) Roagdbã sã n tar raood la b teeg a Zeova, b sõngda b kambã tɩ bãmb me maan woto.—1 Sãm. 1:27, 28; 2 Tɩm. 3:14, 15. w17.09 30 s. 14-15

Bõe la y tõe n maan n sõng y kambã tɩ b bɩɩs yõk-m-menga? D miime tɩ ned baa a ye pa rogd n zoe n tar yõk-m-meng ye. Sẽn yaa zʋg-sõng ning fãa la roagdbã rat n sõng b kambã tɩ b bɩɩse, yaa tɩlɛ tɩ bãmb mensã kõt mak-sõngo. (Efɛ. 6:4) Y sã n wa mik tɩ bũmb ning pʋgẽ, y kambã pa tõe b mense, sok-y y meng n ges yãmb mengã sã n kõta mak-sõng zĩ-kãng wɛɛngẽ. Y sã n modgd n yit koe-moonegã wakat fãa, n kẽnd tigissã la y maand y zak pʋgẽ Biibl zãmsgã n pa vaandẽ, y kõta y kambã mak-sõngo. Y biig sã n kos bũmb tɩ y getẽ tɩ pa zems tɩ y kõ-a, bɩ y yeel-a vẽeneg t’a pa na n paam ye. Pa bũmb fãa la a Zeova ra kõ a Ãdem ne a Awa sor tɩ b tõe n maan ye. Yaa sẽn na yɩl tɩ b bãng tɩ yaa a Zeova zu-sobendã la b segd n sake. Roagdbã me sã n wilgd b kambã b sẽn pa tar sor n tõe n maane, la b kõt-b mak-sõngo, na n sõnga kambã tɩ b bɩɩs yõk-m-menga. Y sã n tõog n sõng y kambã tɩ b nong Wẽnnaam sẽn dɩt a naamã to-to wã, la b sakd a noyã, yaa bõn-sõng tɛkẽ!—Yel. 1:5, 7, 8. w17.09 7 s. 17

Sã n pa a Sʋɩtãan dũni-kãngã n wa n sa, d miime tɩ d na n ket n paamda zu-loeese. Tʋʋm kaalem, bãase, namsg d tũudmã yĩng la sabaab-wẽns tõe n paam-d lame. Nin-wẽns tõe n fã-d lame, wall yell a to. Sẽn na yɩl n tõog n sõngd taab zu-loeesã sasa, yaa tɩlɛ tɩ d tall nimbãan-zoeer meng-menga. D sã n kʋmd taaba, na n kɩtame tɩ d maand taab neere. (Efɛ. 4:32) D sã n tar zʋg-sõma kãensã, wilgdame tɩ d yelga yalẽ-paalgã. Na n kɩtame tɩ d rɩkd Wẽnnaam togs-n-taare, n belsd d taabã. (2 Kor. 1:3, 4) Sãamb bɩ neb tarem sẽn pa waoog sã n be d tigingã pʋgẽ, wãn to la d tõe n wilg tɩ d kʋmd-b lame? D segd n deegd-b-la sõma, n yõg zood ne-ba, n sõng-b tɩ b bãng tɩ b tara yõod tigingã pʋgẽ. (1 Kor. 12:22) A Zeova Kaset rãmb wʋsg modgdame n zãmsd buud-gom-zẽng sẽn na yɩl n paam n sõng sãamba. (1 Kor. 9:23) B modgrã womda biisi. w17.08 23-24 s. a 7-9

Yaa tɩlɛ tɩ ned fãa sakd n maand sũ-mare. La bõe n na n sõng-do? D pʋʋsd n kot Wẽnnaam vʋʋsem sõngã. D tẽeg tɩ sũ-marã yaa zʋg-sõng vʋʋsem sõngã sẽn sõngd ned t’a bɩɩse. (Efɛ. 3:16; 6:18; 1 Tes. 5:17-19) Woto wã, pẽdg-y ne kosgo, n bõos a Zeova t’a sõng-y tɩ y ket n maand sũ-mare! Ra n yĩm-y bũmb nins me sẽn sõng a Abrahaam ne a Zozɛf la a Davɩɩd tɩ b maan sũ-mar n gũ a Zeova pʋlemsã pidsgã ye. Yaa b sẽn da tẽed a Zeova, n kɩs sɩd ne-a wã. Pa bãmb mensã la b sẽn da ratã n da pak-b ye. D sã n tẽegd nin-kãensã sũ-marã sẽn baas to-to wã, na n kɩtame tɩ bũmb fãa pʋgẽ bɩ tõnd me paam raood n kell n yals n gũ Wẽnnaam. Baa d zu-loeesã sã n wa waoogẽ tɩ pa nana ne-do, d mao ne d sũur fãa n kell n maan sũ-mare, n ‘yals n gũ Wẽnnaam.’ Wakat ning menga, tõe tɩ d na n soka a Zeova yaa: “Na n yɩɩ a woto hal tɩ ta dabʋre?” (Eza. 6:11) La ne Wẽnnaam vʋʋsem sõngã sõngre, d fãa tõe n dɩka a no-rɛɛs a Zeremi togs-n-taare. w17.08 7 s. 18-20

A Zeezi sẽn wa n yaa bilfã, sãmbg kae t’a ra naagda a taabã tɩ b reemdẽ, n laadẽ. Sɩd me, Biiblã yeelame tɩ ‘laad wakat beeme,’ la tɩ “saoog wakat me beeme.” (Koɛ. 3:4) La a Zeezi ra zãmsda Gʋls-sõamyã me, tɩ ra paasd yẽ ne a Zeova zoodã pãnga. A sẽn wa n tar yʋʋm 12, a sõsa ne wẽnd-doogã karen-saam-dãmba, tɩ Biiblã yeel meng t’a ‘bãngrã ne a leokrã’ ling-b lame. (Luk 2:42, 46, 47) A Zeezi wa n lebga kãsma, n tar sũ-noogo. Yaa Wẽnnaam daabã maaneg n da kõt-a sũ-noogã. Wala makre, Wẽnnaam da ratame t’a “togs koe-noogã naong rãmb sʋka,” la a “moon n togs zoensã, tɩ b na n leb n paama b nini.” (Luk 4:18) A Zeezi ra sõngda nebã tɩ b bãngd a Ba wã n paasdẽ. Woto ra noom-a-la wʋsgo. (Luk 10:21) Vugri, a sõsa ne paga, n gom tũudum hakɩɩkã yelle. Sõsgã poore, a yeela a karen-biisã yaa: “Mam rɩɩbã, yaa tɩ maan sẽn tʋm-a maamã raabo, la m baas tʋʋmd ning b sẽn kõ maam tɩ m maanã.” (Zã 4:31-34) A Zeezi sũurã ra noomame, bala a sẽn da maandã ra wilgdame t’a nonga Wẽnnaam la a taabã. Fo-me sã n maan wa yẽ, f sũur na n yɩɩ noogo. w17.07 23 s. a 4-5

A Zeezi sẽn wa n be tẽngã zugã, a rɩka a Ba wã togs-n-taar a no-goamã la a tʋʋm-tʋmdɩ wã fãa pʋgẽ, n da kʋmd nebã nimbãanega. (Zã 5:19) A Zeova sẽn tʋm a Zeezi wã yaa sẽn na yɩl t’a wa “bels sũ-sãang rãmbã.” (Eza. 61:1, 2; Luk 4:17-21) A Zeezi sɩd ra kʋmda nebã nimbãanega. A ra mii b zu-loeesã sẽn namsd-b to-to wã, n da rat ne a sũur fãa n sõng-b tɩ b paam yolsgo. (Ebre. 2:17) Biiblã wilga vẽeneg t’a pa toeem ye. Ad b sẽn yeele: “A Zeezi Kirist yaa yembr zaamẽ la rũndã la wakat sẽn kõn sa.” (Ebre. 13:8) Biiblã pʋgẽ, b boonda a Zeezi tɩ “vɩɩm-naabã,” bala yaa a sẽn sak n ki wã n kɩt tɩ d tõe n wa paam n vɩɩmd wakat sẽn kõn sa. Sẽn mik me t’a mii ned kũum sẽn zabd to-to wã, a “tõe n sõnga neb nins sẽn paamd makrã.” (Tʋʋ. 3:15; Ebre. 2:10, 18) A Zeezi sã n ne d sẽn be sũ-sãang pʋgẽ, sãamda a sũuri. A mii yellã sẽn namsd tõnd to-to wã, la a tõe n sõngame tɩ d paam belsg “wakat ning d sẽn tog n paame.”—Ebre. 4:15, 16. w17.07 13 s. a 6-7; 14 s. 10

Bũmb kẽer sẽn be yõod wʋsg la a Zeova sõng-d tɩ d bãnge, tɩ lebg d paoongo, tɩ d segd n nong bõn-kãens ne d sũur fãa. La a Sʋɩtãan ne a dũniyã pa rat tɩ d ket n nong rẽ ye. D sã n pa gũusi, d tõe n wa maana a Sʋɩtãan ne a dũniyã raabã. Wala makre, sẽn pak tõnd n yɩɩdã sã n yaa tʋʋm sẽn yaood sõma, wall paam n vɩɩmd naar pʋgẽ, pa rẽ bɩ paam teed wʋsg n maan wilg-m-menga, tõe n wa kɩtame tɩ d pa le nand d sẽn bãng Biiblã pʋgẽ wã ye. Tʋm-tʋmd a Zã keooga tõnd tɩ dũniyã ne a ratmã loogdame. (1 Zã 2:15-17) Rẽ n so tɩ d segd n maan d sẽn tõe fãa n ket n nong bũmb nins sẽn yaa d paoongã. D ra bas tɩ d paoongã sãam ye. D sak n bas bũmb ning fãa sẽn tõe n wa kɩt tɩ d pa le nong Wẽnnaam Rĩungã ne d sũur fãa wã. D ket n nong koe-moonegã sẽn fãagd yõyã, n moond ne yẽesem. D ket n baood n bãngd bõn-paal Biiblã pʋgẽ. Woto, d na n paamda paoong n bĩngd saasẽ, ‘zĩig ning wagdr sẽn ka kolgdã, la mogd sẽn ka sãamdã.’—Luk 12:33, 34. w17.06 13 s. 19-20

A Zeova pa na-toaaga, a pa wẽgd nebã me ye. Neb nins sẽn sakd-a wã tara lohorem la sũ-noogo. (2 Kor. 3:17) Sɩd me, a Davɩɩd yeelame t’a Zeova “sẽn beẽ wã pida ne pãng la sũ-noogo.” (1 Kib. 16:7, 27) Yɩɩn-gʋlsd a Etan me yeelame: “Bark bee neb nins sẽn mi tɩ kaas n waoog yãmb a Sẽn-Ka-Saab zutu! Bãmb kẽnda yãmb a Sẽn-Ka-Saab vẽenemẽ wã. Bãmb tara sũ-noog daar fãa yãmb yʋʋrã yĩnga. Bãmb tõe n dooga b zug yãmb tɩrlmã yĩnga.” (Yɩɩn. 89:16, 17) D sã n wae n bʋgsd a Zeova sẽn maand ninsaalbã neer to-to wã zugu, d na n maneg n kɩsa sɩd t’a naamã sõmblem ka to ye. Woto pa lingd tõnd ye. Sẽn yaa a Zeova n naan tõndã, a mii sẽn yaa tɩlɛ ne-d sẽn na yɩl tɩ d paam sũ-noog hakɩɩka. A pa kõt tõnd sẽn yaa tɩlɛ wã bal ye. A kõtame tɩ zʋʋg rẽ. Bũmb nins fãa a sẽn yet tõnd tɩ d maanã yaa d neer yĩnga. Baa sã n wa yaa tɩlɛ tɩ d wõr d meng n tũ a sẽn yeele, d sã n tũ, d na n paama sũ-noogo.—Eza. 48:17. w17.06 29 s. 10-11

Ãngeletɛɛr saam-bi-poak a ye n da rat biig ne a sũur fãa. A yʋʋmã wa n yõsga rogem t’a bãng vẽeneg t’a pa tõe n le paam biig ye. A yeelame tɩ yel-kãnga sãama a sũur hal wʋsgo. Yẽ ne a sɩdã kong n tɩ reega biig n na n maan b biiga. Baa ne rẽ, saam-bi-poakã yeelame: “M mi n ket n yãbda rogmã kaalem poorẽ. M miime tɩ biig mam mengã sẽn dog pa a ye ne ned biig m sẽn deeg ye.” Biiblã pʋgẽ, b yeelame tɩ pag sã n tar kamba, a “na n paama fãagre, a sẽn lebg ma wã yĩnga.” (1 Tɩm. 2:15) La woto pa rat n yeel tɩ pag sã n tar kamba, rẽ bal seka a na paam vɩɩm sẽn kõn sa wã ye. Gomdã võor yaa bõe? Pag sã n tar kamba, a zakã yell gesg ne a kambã zãab rɩkda a sẽkã, t’a pa le tar vɩʋʋg n gilgd n wɩt neba, wall a kẽed yɛl sẽn pa pak-a ye.—1 Tɩm. 5:13. w17.06 5-6 s. a 6-8

Rẽ yĩnga, a Elihu ra rat n yeelame tɩ tõnd sẽn modgd n tũud Wẽnnaamã yaa zaalem bɩ? Ayo. A Zeova ra zaba rap a taabã, la a pa zab a Elihu ye. A Elihu ra rat n wilgame bal tɩ d sẽn tũud a Zeova wã pa bũmb sẽn yaa tɩlɛ ne-a ye. Bũmb pa paoog a Zeova ye. Tõnd pa tõe n kɩt t’a ziirã wall a pãngã paas ye. Bõn-sõma nins fãa d sẽn tarã, wala makre, d tõogo, d minim, d bãngre, fãa yita a Zeova nengẽ. A gũusd n geta tõnd sẽn tar dẽ n maand bũmb ninsã. D sã n nong neb nins sẽn tũud a Zeova wã, la d maand sɩd ne-ba, a Zeova getame tɩ yaa yẽ mengã la tõnd maanda. Yel-bũn 19:17 wã yetame: “Sẽn sõngd-a nimbãan-ned pengda Sẽn-Ka-Saabo, la bãmb na n dola yẽnda.” D sã n kʋmd d taabã nimbãaneg n maand-b neere, a Zeova neeme. A yaa ãndũniyã fãa Naanda, la a geta d sẽn maan d taabã neerã wa samd tõnd sẽn dogend yẽ. A yeelame t’a na n ning-d-la bark n lebse. A Bi-ribl a Zeezi me yeelame t’a Ba wã na n dola tõndo.—Luk 14:13, 14. w17.04 29 s. a 3-4

Bõe n na n sõng-d tɩ d maneg n nong Biiblã? Yaa d sẽn na n kẽnd tigissã n pa vaandẽ. Bala be la d paamd zãmsg sẽn yit a Zeova nengẽ. Semen fãa, ne Gũusg Gasgã maasem d zãmsda Biiblã d tigimsẽ wã. D sã n dat tɩ Gũusg Gasgã zãmsg naf-do, d segd n deng n segla zãmsgã sõma. Bũmb sẽn na n sõng-d yaa d sẽn na n karem vɛrse-rãmbã fãa. Gũusg Gasgã bee ne buud-goam wʋsg jw.org sẽn yaa tõnd sɩtã pʋgẽ, tɩ d tõe n paam n karem wall n telesaarze. D tõe n kẽe JW Library wã pʋgẽ me n paam Gũusg Gasgã. B maaname tɩ d tõe n paam vɛrse-rãmbã nana-nana n karme. Sẽn yaa to-to fãa la d maand n paamd Gũusg Gasgã, d sã n wa segend zãmsgã bɩ d karem vɛrse-rãmbã la d bʋgs sõma, tɩ na n kɩtame tɩ d maneg n nong Biiblã. w17.05 20 s. 14

D sẽn deeg lisgã, d segd n maana a Zeova raabã la d tũ a noyã wakat fãa. Ned sã n dɩk a meng n kõ a Zeova, n pʋlem t’a na n maana a raabã, a pa tõe n lebs a noorã poorẽ ye. A sã n pa le tar sũ-noog a Zeova tũudmã pʋgẽ, wall a pa le rat n vɩɩmd wa Kiristã sẽn datã, pa tog t’a yeel tɩ yẽ ra pa tolg n dɩk a meng n kõ a Zeova, la tɩ ra pa zems t’a reeg lisg ye. Ned sẽn dɩk a meng n kõ a Zeova sã n maan yel-wẽn-kãsenga, yaa tɩlɛ t’a togs a yellã a Zeova ne tigingã taoore. D pa tol n dat n yɩ wa neb nins a Zeezi sẽn yeel tɩ b ‘basa b pipi nonglmã’ ye. D ratame t’a wa yeel-d yaa: “Mam bãnga yãmb tʋʋmã la y nonglmã, la y tẽebã, la y tʋʋm-sõamyã, la y sũ-marã ne y yaoolem tʋʋmã sẽn yaa wʋsg n yɩɩd y pipi tʋʋmã.” (Vẽn. 2:4, 19) D modg n maan wa d sẽn pʋlem a Zeova bũmb ningã, tɩ noog a sũuri. w17.04 6-7 s. 12-13

Daar a ye, a Abrahaam soka a Zeova yaa: “Dũniyã fãa bʋ-kaoodã ka na n maan tɩrg sɩda?” (Sɩng. 18:25, Wẽnnaam Sebre, 1983) A Abrahaam sẽn sok woto wã wilgdame t’a kɩsa sɩd t’a Zeova na n kaoo Sodom ne Gomoor soolmã bʋʋd tɩrga. A ra kɩsa sɩd t’a Zeova pa na n “lagem nin-tɩrs ne nin-wẽns n kʋ” ye. A pʋd n pa tol n tõe n tags t’a Zeova na n maana bũmb a woto ye. Bala, a Zeova tɩrlmã ka to ye. A sã n na n bʋ yelle, wakat fãa a bʋʋdã yaa tɩrga. Biiblã meng yeelame t’a “nonga tɩrlem ne zemsgo.”—Yɩɩn. 33:5. w17.04 18 s. a 1-2

Roagdbã, y sã n dat tɩ y kambã yɩ a Zeova zo-rãmba, n wa paam vɩɩm sẽn kõn sa wã, yaa tɩlɛ tɩ yãmb mengã kõ mak-sõngo. B sã n neẽ tɩ yãmb ‘rengd n baooda Wẽnnaam soolmã,’ na n sõng-b lame tɩ b bãng tɩ b segd n teega a Zeova n paam sẽn yaa tɩlɛ ne-b daar fãa wã. (Mat. 6:33, 34) Ra yɩ-y neb sẽn baood bɛd ye. Modg-y t’a Zeova raabã maaneg pak yãmb n yɩɩd teedã la ligdã. Sã n tõe bɩ y ra kẽ sam ye. Bao-y paoong n bĩng saasẽ, rat n yeel tɩ y bao n ta a Zeova yam. Ra bao-y arzegs wall “ninsaalbã waoogr” ye. (Mark 10:21, 22; Zã 12:43) Ra bas-y tɩ y tʋʋmã kɩt tɩ y pa tar sẽk y kambã yĩng ye. B sã n yãk yam n na n lʋɩɩs a Zeova raabã taoore, n pa rat n bao yʋʋr bɩ arzegs b mens yĩng wall sẽn na yɩl n sõng yãmb bɩ n zẽk y yʋʋre, maan-y tɩ b bãng tɩ y sũur nooma ne-ba. Pa zems tɩ kiris-ned tags tɩ kambã n segd n modg tɩ b roagdbã paam naar ye. Tẽeg-y tɩ Biiblã yeelame tɩ “ka kamb n tog n tigs paoong b ba-rãmb yĩng ye, la yaa ba-rãmbã n tog n tigs paoong b kamb yĩnga.”—2 Kor. 12:14. w17.05 8-9 s. a 3-4