Sa-sika

D sã n dat n yɩ karen-saamb sẽn mi neb zãmsgo, yaa tɩlɛ tɩ tõnd mengã zãmsd Biiblã sõma. (1 Tɩm. 4:15, 16) Woto me, neb nins a Zeova sẽn kõ sor tɩ b tõe n kibl b taabã segd n sikda b mens n sakdẽ t’a Zeova wilgd-b sore. Rẽ na n kɩtame tɩ b taabã waoogd-ba, tɩ b sã n sagl ned bɩ a sak nana-nana. Bɩ d gom a Zeezi mak-sõngã yelle. A Zeezi ra sakda a Ba wã wakat fãa, baa sã n wa yaa toog wʋsgo. A ra yeta nebã tɩ yẽ bãngrã, a yamã la a sẽn zãmsd-b bũmb ninsã fãa yita a Ba wã nengẽ. (Zã 5:19, 30) A Zeezi sik-m-mengã la a wẽn-sakrã kɩtame tɩ sũ-tɩrs rãmbã ra wat a nengẽ, la kɩt me t’a yaa karen-saamb sẽn gomd gom-nood la sẽn kʋmd nebã nimbãanega. (Luk 4:22) A gom-noodã ra kẽeda neb nins sẽn da yaa wa tãn-wĩ-kaoongo, pa rẽ bɩ fɩtl laong sẽn ket n nusdẽ wã, n kengd b raoodo. (Mat. 12:20) A kell n talla sũ-mar n yɩ sũ-bʋgsem soaba, baa sã n wa yaa toogo. Wala makre, a tʋm-tʋmdbã sẽn wa n wẽed no-koeemd n dat n bãng sẽn yaa-a kãseng n yɩɩd bãmb sʋkã, a pa yik a sũur ye. A kibl-b-la ne nonglem la bʋgsem.—Mark 9:33-37; Luk 22:24-27. w18.03 26 s. 15-16

Tʋm-tʋmd a Pɩyɛɛr maka lisgã reegr ne a Nowe sẽn ka koom-koglgã. Koglgã ra yaa bũmb sẽn wilgd vẽeneg t’a Nowe sakame n na n maan Wẽnnaam raabã ne a sũur fãa. A Nowe tʋma tʋʋmd ning a Zeova sẽn kõ-a wã hal tɩ wa sa. A sẽn tẽ a Zeova, n maan bũmb ninsã kɩtame tɩ yẽ ne a zakã rãmb paam n põs sa-kãsengã. Koglgã ra yaa bũmb sẽn yaa kaset t’a Nowe tẽeda Wẽnnaam. Lisgã me yaa bũmb sẽn yaa kaset tɩ ned rɩka a meng n kõ a Zeova n na n lebg kiris-neda. Wa a Nowe, sẽn deeg-b lisgã sakda Wẽnnaam ne b sũur fãa, n tʋmd tʋʋmd ning a sẽn kõ-bã. B sã n kell n maan sɩd ne a Zeova, b na n paam n põsa dũniyã sãoong sasa, wa a Nowe me sẽn paam n põs sã-kãsengã sasa wã. (Mark 13:10; Vẽn. 7:9, 10) Woto wilgdame tɩ rɩk f meng n kõ a Zeova n deeg lisgã tara yõod wʋsgo. Dẽnd ned sã n magd n na n deeg lisgu, n viigd wakat fãa, a tõe n wa konga vɩɩm sẽn kõn sa wã. w18.03 4 s. a 3-4

Roagdb kẽer tõe n tagsdame tɩ b biigã sẽn pa reeg lisgã, a sã n wa maan yel-wẽn-kãsenga, b pa na n yiis-a tigingã pʋgẽ ye. Bõe yĩng tɩ tagsg a woto pa zemse? (Zak 1:22) Yaa sɩd tɩ roagd pa na n dat t’a biig reeg lisgu, sã n pa a bɩɩme n sek a tõe n dɩk a meng n kõ a Zeova ye. La roagdb sã n tagsdẽ tɩ biig sã n pa reeg lisgu, a Zeova pa ningd-a taal a yel-wẽnã yĩnga, pa zems ye. Bõe yĩng tɩ d yet woto? Bala, pa ned sã n deeg lisg la Wẽnnaam ningd-a taal a yel-wẽnd yĩng ye. Biig sã n zoe n mi sẽn yaa tɩrg la wẽng a Zeova nifẽ, a sã n maan yel-wẽnde, a tara taale. (Zak 4:17) Roagd sẽn tar yam pa na n yeel a biig t’a ra yãg n deeg lisg ye. Yẽ mengã na n maoome n kõ a kambã mak-sõngo. A sɩngda b sõngr hal b yãadem wakate, sẽn na yɩl tɩ b wa nong a Zeova noyã sẽn yaa tɩrsã. (Luk 6:40) Y kambã sã n nong a Zeova sõma, na n kɩtame tɩ b rat ne b sũy fãa n tũ a noyã.—Eza. 35:8. w18.03 11 s. 12-13

Sa-kãsengã poore, a Nowe kell n tũu Wẽnnaam yʋʋm 350. (Sɩng. 9:28) Ad a sɩd kõo mak-sõng tẽebã la wẽn-sakrã wɛɛngẽ! Tõnd me tõe n dɩka a Nowe togs-n-taare, a tẽebã la a wẽn-sakrã wɛɛngẽ, d sã n sakd Wẽnnaam noyã sẽn yaa tɩrsã, la d lak d meng ne a Sʋɩtãan dũniyã, la d mao tɩ Wẽnnaam Rĩungã tʋʋmã pak-d n yɩɩda. (Mat. 6:33; Zã 15:19) D miime tɩ na n kɩtame tɩ dũniyã nebã pa nong-d ye. Wala makre, d sẽn modgd n tũud noy nins Wẽnnaam sẽn gãneg kãadmã wɛɛngẽ wã kɩtame tɩ tẽns kẽer kiba-kɩtb gomd d yell wẽnga. (Mal. 3:17, 18) La wa a Nowe, pa nebã la d zoet ye. A Zeova la d zoeta, n pa rat t’a sũur sãam ne-d ye. D miime tɩ yaa yẽ bal n tõe n kõ-d vɩɩm sẽn ka sɛtã. (Luk 12:4, 5) Ned fãa sok a meng yaa: ‘Baa nebã laad maam la b wɩt-ma, m na n ket n maanda sẽn yaa tɩrg Wẽnnaam nifẽ wã bɩ? M kɩsa sɩd t’a Zeova na n gesa maam ne m zakã rãmb yelle, baa yã n dɩ wã sã n wa yaa toog bɩ?’ Y sã n kɩs a Zeova sɩda, la y sakd-a wa a Nowe, y tõe n basa y yam t’a na n gesa y yelle.—Fili. 4:6, 7. w18.02 4 s. a 4, 8; 5 s. a 9-10

Ned sẽn vɩ a mengã yĩng rɩkda dũniyã nebã togs-n-taare, tɩ yaa a mengã ratem bal n pak-a n yɩɩda. A Poll wilgame tɩ ned a woto sakda “sɩɩg ning sẽn tʋmd wẽn-kɩɩsdbã pʋgẽ moasã wã.” (Efɛ. 2:2) Kɩtame tɩ yaa nebã sẽn wae n maandẽ wã la a maanda. Ned sẽn vɩ a mengã yĩng maanda a sẽn tagsd tɩ segdame, n pa baood n na n tũ Wẽnnaam noyã ye. Naoor wʋsgo, sẽn pak-a yaa arzɛkã la yʋʋrã baoobo. Sẽn paase, a sã n tagsd t’a tara sor n maan bũmbu, a gãta rẽ dem-deme. Sẽn vɩ-b b mens yĩngã nong n maanda bũmb nins Biiblã sẽn boond tɩ ‘yĩngã tʋʋmã.’ (Gal. 5:19-21) Wala makre, b wata ne welsg nebã sʋka, b nonga no-koɛɛma, b pirsda b taabã tɩ b yɩ kɩɩsdba, b boonda taab bʋʋdo, b pa sakd taoor dãmbã, yaa rɩ la yũ wã n pak-ba. Ned sẽn vɩ a mengã yĩng pa tõogd a meng makr wakat ye.—Yel. 7:21, 22. w18.02 19 s. a 3-5

Yõ-noogrã wɛɛngẽ, d sã n maand n zemsdẽ, pa wẽng ye. Neb kẽer tẽedame tɩ b pa segd n maan baa fʋɩ n noog b yõor ye. La pa woto la a Zeova yeel ye. A wilgame tɩ wẽn-sakdbã tõe n nooga b yõore. Ad Biiblã sẽn yete: “Bɩ f kẽng n tɩ rɩ f rɩɩbo, la f yũ f reezẽ rãam ne sũ-noogo.” (Koɛ. 9:7) Yaa sẽn nong-b sũ-noogã, hal n pa baood Wẽnnaamã yell la 2 Tɩmote 3:4 gomda. Yaa sɩd tɩ vɛrse wã yeelame tɩ b nonga b sũ-noogã “n yɩɩd b sẽn nong Wẽnnaamã,” la pa rat n yeel tɩ b nonga Wẽnnaam bilf ye. Bãngd a ye yeelame: “Vɛrse-kãngã pa rat n yeel tɩ b nonga Wẽnnaam me bilf ye. Rat n yeelame tɩ b pʋd n pa nong-a baa bilf ye.” Woto yaa keoogr meng-menga, sẽn nong-b yõ-noogrã tɩ loogã yĩnga! Biiblã wilgame tɩ b basame tɩ “dũni sũ-noogã” soog-ba.—Luk 8:14. w18.01 25 s. 14-15

A Zeova yaa Wẽnnaam sẽn yaa kõata. Tõnd sẽn tarã fãa yita yẽ nengẽ. Sãnemã, wanzuri wã, la tẽngã bõn-sõma a taabã fãa yaa a Zeova n so. A tũnugda ne rẽ tɩ bõn-vɩɩsã paamd sẽn yaa tɩlɛ wã. (Yɩɩn. 104:13-15; Aaze 2:8) Israyɛll buudã sẽn zĩnd we-raoogẽ wã yʋʋm pis-naasã, a Zeova gesame tɩ b paam mannã, la koom. (Yik. 16:35; Nee. 9:20, 21) A Zeova sõnga no-rɛɛs a Eliize t’a maan yel-solemde, tɩ kaam bilf pʋg-kõor a ye sẽn da tar lebg wʋsgo. Sõngame tɩ pagã paam ligd wʋsg n yao a samã fãa, hal tɩ sẽn kellã sek a na tõog n ges yẽ ne a kom-dibli wã yelle. (2 Rĩm. 4:1-7) A Zeova sõnga a Zeezi me t’a maan yel-solemde, n sõng tɩ neb paam rɩɩbo, la baa ligd menga. (Mat. 15:35-38; 17:27) Bũmb nins a Zeova sẽn so wã pa tol n tõe n bãng n sõd ye. A tõe n tũnuga ne bũmb fãa tɩ bõn-vɩɩsã sẽn be tẽng zugã paam sẽn yaa tɩlɛ wã. La a wilgame t’a ratame t’a nin-buiidã kõt b sẽn tare, n teend a siglgã tʋʋmã.—Yik. 36:3-7. w18.01 17 s. a 1-3

Biiblã wilgdame tɩ pĩnd wẽndẽ, wẽn-sakdb kẽer me ra mi n tagsame tɩ b pa na n le tõog n mao ye. (Zoob 7:7) Bõe n sõng-b tɩ b tõog toogo? B teega a Zeova n paam pãnga. Sɩd me, Biiblã yeelame t’a “kõta ned ning sẽn yɛ wã pãnga.” (Eza. 40:29) Bʋko, neb kẽer sẽn tũud a Zeova wa n tagsame tɩ b zu-loeesã tɩɩm yaa b sẽn na n bas a Zeova tũudmã tʋʋm wakat bilfu. B getame tɩ yaa zɩɩbo, la tɩ pa bũmb sẽn sõngd ned t’a vɩɩm tall bark ye. Rẽ n so tɩ b bas Biiblã karengo, tigissã kẽnde, la koɛɛgã moonego. Yaool n yaa woto bal la a Sʋɩtãan data. A miime tɩ tõnd sã n wɩngd ne tũudmã tʋʋmã, kõta tõnd pãng la raoodo. A yaool n pa rat woto ye. Sũ-sãamsã la yaamsã sã n wa yaa wʋsgo, ra n bas-y tɩ rẽ kɩt tɩ y zãag y meng ne a Zeova ye. Modg-y tɩ yãmb ne yẽ zoodã paase, bala Biiblã yeelame tɩ yẽ n na “n paas yãmb pãnga,” la a “kɩt tɩ yãmb yɩ neb sẽn ka vigsd ye.”—1 Pɩy. 5:10; Zak 4:8. w18.01 7-8 s. a 2-3

No-rɛɛs a Eliize sẽn ledg a Eli wã maana yel-solemd n vʋʋg neda. Rẽ la Biiblã kibar a yiib-n-soab sẽn gomd ned sẽn vʋʋg yelle. Israyɛll pag a ye sẽn da be tẽng yʋʋr sẽn boond tɩ Sunem n da mi n deegd a Eliize sãando, n get a yell hal sõma. Pagã ra yaa kiri, t’a sɩdã me kʋʋle. La Wẽnnaam ning-a-la bark a maan-neerã yĩnga, n kɩt t’a rog bi-ribla. Yʋʋm a wãn poore, biigã kiime. Mams-y n ges-y rẽ sẽn sãam a ma wã sũur to-to! A kosa a sɩdã sore, n kẽng Karmell tãngã sẽn be kilo 30 zĩigẽ wã, n tɩ yã no-rɛɛs a Eliize. No-rɛɛsã yeela a tʋm-tʋmd a Geyaazi t’a reng taoor n tɩ vʋʋg biigã. A Geyaazi kẽngame, la a pa tõog ye. Rẽ poore, pagã ne a Eliize tũu taab n wa. (2 Rĩm 4:8-31) A Eliize kẽe roog ning biigã sẽn da beẽ wã, n pʋʋs a Zeova. A Zeova kelga a pʋʋsgã, n maan yel-solemd tɩ biigã vʋʋge. Pagã sẽn yã a biigã, a sũ-noogã ra pa tõe n bãng n bilg ye! (2 Rĩm 4:32-37) Wẽnnaam vʋʋga Sunem pagã biigã, tɩ wilgdẽ t’a sɩd tõe n vʋʋga ned sẽn ki. w17.12 4 s. a 7-8

Ned sẽn tar yam yaa ned sẽn bɩ. Pa a yʋʋmã la b get n bãng a tẽebã sã n bɩɩme ye. Yaa a sã n tar wẽn-zoeere, n dat ne a sũur fãa n sak a Zeova. (Yɩɩn. 111:10) Kom-bɩɩs nins tẽeb sẽn bɩ wã pa basd tɩ bãmb mensã tʋlsem wall b taabã raab kɩt tɩ b lebg wa neb ko-pɛm sẽn tar n lengdẽ, n “rɩkd-b n loogdẽ” ye. (Efɛ. 4:14) B minim n tagsdame, tɩ sõngd-b tɩ b tõe n bãng ‘sõma ne wẽng n bake.’ (Ebre. 5:14) B sã n wa tõe n bãng n yãk yam, wilgdame tɩ b tẽebã bɩtame. Yaa sẽn tar-a yam woto wã n na n wa paam fãagrã. (Yel. 24:14) Bõe la y tõe n maan n sõng y kambã tɩ b paam yam a woto? Yaa tɩlɛ tɩ y reng n sõng-b tɩ b bãng tɩ yaa sẽn be Biiblã pʋgẽ wã la yãmb kɩs sɩd ne n yɩɩda. Ne y no-goamã la y tʋʋm-tʋmdɩ wã, maan-y tɩ b bãng tɩ yaa Biiblã sẽn yetã la yãmb maood n tũudẽ.—Rom. 2:21-23. w17.12 20-21 s. 12-13

B sã n yeel tɩ ãdem-biisã tõe n welga dũniyã zu-loeesã, nooma neb wʋsgo. Ãdem-biisã sã n sɩd da tõe n welg b zu-loeesã, rat n yeelame tɩ pa tɩlɛ tɩ b paam Wẽnnaam sõngre, la tɩ b tõe n maanda b yam. Tõe tɩ y zoe n wʋma neb sẽn yet tɩ zabã, bi-be-tʋʋmã, bãasã, farã la zu-loees a taab boogdame. Ad sebr a ye sẽn yeele: “Yaa ãdem-biisã sẽn yãk yam n na n maan b sẽn tõe tɩ vɩɩmã lebg noogã n kɩt tɩ dũni wã yɛl lebgd sõma wã.” Dũniyã ned sã n wa yeel bũmb tɩ pa zems ne yãmb sẽn tẽedã, bɩ y maan vaeesg Biiblã pʋgẽ la y gom rẽ yell ne y tẽed-n-taag tẽeb sẽn bɩ. Bao-y n bãng-y bũmb ning sẽn kɩt tɩ nebã yet woto wã, bõe yĩng tɩ pa sɩda, la y ges y sẽn tõe n maan to-to n wilg tɩ y pa sak b sẽn yetã ye. A Poll ra kõo Kolos kiris-nebã saglg ning sẽn yaa tõnd rũndã daar vɛrse wã. Tõnd me sã n tũ, na n sõng-d lame tɩ d ra wa tagsd wa dũniyã nebã ye. w17.11 24 s. 14, 17

Bõe yĩng tɩ fariziẽ-rãmbã ra pa rat n sak n kõ b taabã sugri? Biiblã yeelame tɩ yaa b sẽn da “paoogd b taabã” yĩnga. (Luk 18:9-14) Rɩk-y-yã a Zeova togs-n-taare, la y ra maan wa fariziẽ-rãmbã ye. Kʋmd-y y taabã nimbãanega. (Efɛ. 4:32) Tall-y manesem sẽn na n kɩt tɩ yaa nana ne nebã tɩ b kos-y sugri. (Luk 17:3, 4) Sok-y y meng yaa: ‘Ned sã n beeg-ma, baa yaa naoor ka tɛka, m sakd n kõo sugr nana, la tao-tao bɩ? Ned sã n beeg-m wall a maan bũmb tɩ sãam m sũuri, m tʋll n manega yellã tɩ laafɩ le zĩnd bɩ?’ Sugrã kũun tõe n wilga ned sã n yaa sik-m-meng soaba. Fariziẽ-rãmbã sẽn da tagsd tɩ b sãoo b taabã n kɩt tɩ b ra pa sug-kõatbã. La d sẽn yaa kiris-nebã, d sikda d mense, n getẽ tɩ d taabã yɩɩda tõndo, tɩ rẽ kɩt tɩ d sakd n kõt-b sugri. (Fili. 2:3) Bɩ d sok d meng yaa: ‘M dɩkda a Zeova togs-n-taare, n yaa sik-m-meng soab bɩ?’ Y manesmã sã n kɩt tɩ yaa nana ne y taabã tɩ b kos-y sugri, yaa wa y manegda y sugrã kũun “sor” tɩ b tõe n tũ n ta y nengẽ nana. Bɩ d kõt sugr tao-tao, la d mao tɩ d sũur da yikd tao-tao ye.—Koɛ. 7:8, 9. w17.11 14-15 s. a 6-8

Sãnda sã n mak b koeesã noom ne neb a taabã rẽndã, komsda b raood tɩ b pa rat n yɩɩl ye. La woto fãa pa segd n kɩt tɩ d pa yɩɩnd n pẽgd a Zeova ye. A ratame tɩ d pẽgd-a ne yɩɩlã maasem. Y sã n na n yɩɩl bɩ y zẽk y yɩɩlã sebr yĩngri, n nak tɩ y yublã yaa tɩrga, n paam n yɩɩl tɩ yi sõma! (Ɛsd. 3:11) Masã, Rĩung rot wʋsg pʋgẽ, tele n be taoorã, tɩ yɩɩllã goam pukd be tɩ ned fãa tõe n zẽk a neng n ges n yɩɩl tɩ yi sõma. Bãng-y me tɩ Rĩungã tʋʋmd lekoll kãsem-dãmbã yĩngã sasa, b yɩɩnda Rĩungã yɩɩl masã. Woto tẽegda kãsem-dãmbã tɩ yɩta sõma tɩ b modg n kõt mak-sõng yɩɩlã wɛɛngẽ. Nina yɛɛsdame n pa rat n yɩɩl tɩ yi, bala a tagsdame t’a pa koko-noog soaba, la t’a sã n zẽk a koɛɛg n yɩɩle, na n sãama yɩɩllã. La d tẽeg tɩ baa d fãa sẽn ‘tudgd ne d no-goamã,’ rẽ pa kɩt tɩ d bas n pa le gomd ye. (Zak 3:2) Woto wã, baa d tagsd tɩ d koɛɛgã pa noome, d ra bas tɩ rẽ kɩt tɩ d pa yɩɩnd n pẽgd a Zeova ye. w17.11 4-5 s. a 9-10

D tõe n yeelame t’a Zakari sẽn yã bõn-makr a yopoe-n-soabã poore, bũmb wʋsg n da be a yamẽ, t’a tõe n bʋgse. A Zeova sẽn pʋlem t’a na n sɩbga sẽn pa maand-b pʋ-peelmã tog n kenga a raoodo. La yɛlã ra ket n yaa wa pĩndã bala. Nebã ra ket n maanda pʋ-lik la b tʋmd tʋʋm-wẽns a taaba. A Zeova roogã meeb me ra nan pa sa ye. Bõe yĩng tɩ Israyɛll nebã wẽneg n bas tʋʋmd ning a Zeova sẽn kõ-bã? Rẽ yĩnga, b sẽn lebg n wa b tẽngẽ wã, yaa sẽn na n maan b mensã raab bɩ? A Zeova ra mii bũmb ning sẽn na n sõng a nin-buiidã. A kɩtame t’a Zakari yã a yaoolem bõn-makr sẽn na n sõng tɩ b bas b yam t’a Zeova nong-b lame, t’a nanda modgr ning fãa b sẽn zoe n maanã, la tɩ b sã n lebg n sɩng yẽ tʋʋmdã, a na n kogl-b lame. Wẽnd-doogã lebs n me wã wɛɛngẽ, a Zeova pʋlma goam nins sẽn yaa rũndã daar vɛrse wã. w17.10 26 s. a 1; 27 s. a 5

Yaa tɩlɛ ne rap nins sẽn deeg lisgã tɩ b tall raoodo, n tʋm Wẽnnaam tʋʋmdã. B sã n sak n na n yɩ kãsem-sõngdb wall kãsem-dãmba, nafda b tigingã. (1 Tɩm. 3:1) La tʋʋmdã tõe n yɛɛsda kẽere. Nina tõe n tagsdame tɩ pa segd t’a yɩ kãsem-sõngd wall kãsem-soaba, a sẽn da maan yel-wẽn pĩnd yĩnga. Nina me tõe n getame t’a pa tar minim sẽn sek ye. Yãmb sã n tagsda woto, bãng-y t’a Zeova tõe n sõng-y lame tɩ y paam raoodo. (Fili. 4:13) Tẽeg-y t’a Moyiiz me ra tagsdame t’a pa na n tõog n maan a Zeova sẽn da rat t’a maanã ye. (Yik. 3:11) La a Zeova sõng-a lame t’a paam raoodo, n tõog tʋʋmdã. Saam-biig sã n dat raood woto, a segd n pelgda a pʋg n pʋʋsd Wẽnnaam n kot a sõngre, la a karemd Biiblã daar fãa. Kibay n be Biiblã pʋgẽ n gomd neb sẽn tall raood yelle, t’a sã n bʋgs kiba-kãens zug me bɩ na n sõng-a. A tõe n kosa kãsem-dãmbã ne sik-m-meng tɩ b sõng-a t’a paam minim n paase, la a sak n tʋm tʋʋmd ning fãa b sẽn kos-a t’a tʋme. w17.09 32 s. 19

D miime tɩ yaa Wẽnnaam n vẽneg neb tɩ b gʋls Biiblã. La pa rat n yeel t’a vẽnega neb nins sẽn lebg Sɛptãntã, Bible du roi Jacques wall a Wycliffe Biiblã, pa rẽ bɩ Biibl-dãmb a taabã ye. La d sã n ges Biibl-kãensã fãa lebgrã sẽn yɩ to-to wã, d nee vẽeneg tɩ wa a Zeova sẽn yeelã, a Gomdã sɩd paada wakat fãa. Woto kengda tõnd tẽebã, tɩ d maneg n kɩs sɩd tɩ bũmb nins fãa a Zeova sẽn pʋlmã na n pidsame. (Zoz. 23:14) D sã n ges a Zeova sẽn maan to-to t’a Gomdã pa n tãag tõnd wakatã, kengda d tẽebã la kɩt tɩ d maneg n nong-a. Bõe yĩng t’a Zeova kõ tõnd a Gomdã, la a pʋlem t’a na n kɩtame t’a Gomdã pa wakat fãa? Bala, a nonga tõndo, n dat n zãms tõnd d meng nafr yĩnga. (Eza. 48:17, 18) Dẽnd togame tɩ tõnd me nong a Zeova, la d tũud a noyã.—1 Zã 4:19; 5:3. w17.09 21-22 s. 13-14

Yãmb pagã wall y sɩdã sã n pa tũud a Zeova, wakat ninga yaa toog tɩ y wub y kambã wa y sẽn datã. Y segd n ket n waoogd-a lame. Rẽ, y kõta y kambã mak-sõngo. Tagsd-y-yã a zʋg-sõma wã yelle, la y pʋʋsd-a barka, bõn-sõma nins a sẽn maand zakã rãmb neer yĩngã. Ra n tol-y n gom-y-yã a yell wẽng y kambã taoor ye. Yɩta sõma meng tɩ y wilg-b tɩ yaa ned kam fãa n yãkd a sã n na n tũu a Zeova. Y sã n wilg y kambã tɩ b waoogd b roagd ning sẽn pa tũud a Zeova wã, b mak-sõngã tõe n kɩtame t’a wa sak n tũ a Zeova. Sã n yaa raoã n pa tũud a Zeova, tõe t’a na n gɩdga pagã t’a ra zãms b kambã Biiblã, bɩ n tall-b n kẽng tigissã ye. Baa sã n wa yaa woto, pagã segd n maana a sẽn tõe fãa, n sõng kambã tɩ b bãng Biiblã sẽn yetã. (Tʋʋ. 16:1; 2 Tɩm. 3:14, 15) Baa a sẽn pa na n kɩɩs a sɩdã noorã, a na n tũnuga ne segb buud toor-toor n gom Biiblã yell ne a kambã. Woto, a na n sõng-b lame tɩ b bãng a Zeova, la b bãng sõma ne wẽng n bake.—Tʋʋ. 4:19, 20. w17.10 14 s. a 9-10

A Zeova yaa nimbãan-zoeta. A sẽn naan ninsaal a meng wẽnegã kɩtame tɩ baa sẽn pa mi-b Wẽnnaamã kʋmd b taabã, n dat b neere. (Sɩng. 1:27) Kibay wʋsg n be Biiblã pʋgẽ, n gomd neb sẽn kʋm b taab nimbãaneg yelle. Tẽeg-y pʋg-yoaadb a yiibã yellã a Salomo sẽn da segd n welgã. B ra zabda taab biig poorẽ, tɩ ned fãa yetẽ tɩ biigã yaa yẽ biiga. Sẽn na yɩl n bãng sẽn sɩd yaa-a biigã ma, a Salomo yeelame tɩ b rɩk sʋʋg n kɛ biigã n pasg a yiibu. Biigã nimbãaneg yõka a ma wã, hal t’a kos rĩmã t’a bas tɩ pag a to wã tall biigã. (1 Rĩm. 3:23-27) Tẽeg-y-yã a Farawõ bi-puglã me sẽn fãag a Moyiiz a peelmẽ wã. A sẽn yã biigã, a bãngame t’a roagdbã yaa ebre-rãmba, la tɩ yaa biig b sẽn da segd n kʋ. Ne rẽ fãa, biigã “nimbãaneg” yõk-a lame, t’a rɩk-a n na n wub wa a meng biiga.—Yik. 2:5, 6. w17.09 8-9 s. a 2-3

Neb nins sẽn tũud a Zeova wã fãa segd n yɩɩ sik-m-mens rãmba. Sik-m-mengã yõod waoogame. (Yel. 22:4) D sã n yaa sik-m-mens rãmba, laafɩ la zems-n-taar na n zĩnda d tigingã pʋgẽ. Na n kɩtame me tɩ d paam t’a Zeova ning-d barka. Tʋm-tʋmd a Pɩyɛɛr ra yeelame: “Bɩ yãmb fãa paam sik-m-menga, yãmb ne taab sʋka. Bala, Wẽnnaam kɩɩsda wuk-m-mens rãmbã, la b ningd sik-m-mens rãmbã zut barka.” (1 Pɩy. 5:5) Rũndã-rũndã, nebã getame tɩ f sã n tar sũ-bʋgsem la sũ-mare, f yaa rabɛɛm. La tagsg a woto pa zems ye. A Zeova yaa pãng sẽn ka to soaba, la a yaa sũ-bʋgsem soab la sũ-mar soaba. A sũ-bʋgsmã ne a sũ-marã buud kae ye. D tẽeg a sẽn maan sũ-mar ne a Abrahaam la ne a Lot to-to, n sak tɩ malɛgs nins a sẽn da tʋm b nengẽ wã kelg-bã. (Sɩng. 18:22-33; 19:18-21) D tẽeg me tɩ yaa sẽn yɩɩd yʋʋm 1 500 la a maan sũ-mar ne Israyɛll nebã sẽn da yaa kɩɩsdbã.—Eze. 33:11. w17.08 25 s. 13-14

Tõnd segd n wɩnga ne pʋʋsgo. Rẽ, d na n paama Wẽnnaam laafɩ wã. A Poll yeelame tɩ ‘Wẽnnaam laafɩ wã yɩɩda ninsaalbã bãngr fãa.’ Rat n yeelame tɩ bõe? Biibl-dãmb kẽer pʋgẽ, b yeelame tɩ Wẽnnaam laafɩ wã ‘zʋʋga tõnd sẽn tõe n mamsã,’ bɩ ‘zʋʋga ninsaal sẽn tõe n magã fãa.’ A Poll gomdã wilgdame tɩ “Wẽnnaam laafɩ wã” yɩɩda tõnd sẽn tõe n tagsã fãa. D sã n wa tar zu-loɛɛga, tɩ wõnd pa tar tɩɩm, d tẽeg t’a Zeova tara a tɩɩm. A tõe n maana bũmb d sẽn pa tẽede. (2 Pɩy. 2:9) Baa d sã n wa tar zu-loeese, bõe la d tõe n maan n ket n paamd “Wẽnnaam laafɩ wã”? D segd n modgame tɩ tõnd ne a Zeova zoodã kell n tall pãnga. Yaa a Zeezi sẽn ki tɩ yɩ maoongã yĩng bal la d tõe n paam a Zeova zoodo. Yaa bõn-kãseng a Zeova sẽn maan ãdem-biisã neer yĩnga. A Zeezi maoongã maasem yĩnga, a Zeova kõta tõnd d yel-wẽnã sugri, tɩ d tõe n paam sũur-kaset sẽn yaa sõma, la d paam n lebg a zo-rãmba.—Zã 14:6; Zak 4:8; 1 Pɩy. 3:21. w17.08 10 s. a 7; 12 s. 15

Wakat ninga, ned kaalem poore, nina pa tõe n bilg a sũ-sãangã bɩ a toogã ye. Baa a sã n mak n na n bilg me, pa wakat fãa la yaa nana ne neb a taabã tɩ b wʋm a sẽn yetã võor ye. Sũ-sãangã wilgr sẽn pa yembrã kɩtame tɩ wakat ninga, d pa mi d sẽn na n yeel n bels sũ-sãang soab ye. D sã n ‘yãb ne neb nins sẽn yãbdã,’ rẽ sõngd-b lame n yɩɩda. (Rom. 12:15) Y sã n getẽ tɩ yaa toog tɩ y tɩ bãng n gom n bels ned sẽn be sũ-sãang pʋgẽ, y tõe n baoo kart n gʋls n tool-a wall y gʋls mesaaz pa rẽ bɩ lɛtr n tool a soabã. Y tõe n baoo Biiblã gomd sẽn belsde, wall y tẽeg kiidã zʋg-sõng ninga, pa rẽ bɩ bũmb a sẽn da maan tɩ yɩ-y noogo, n gʋls n toole. D ra yĩm me tɩ ned sã n be sũ-sãang pʋgẽ tɩ d pʋʋs a yĩng wall d naag-a n pʋʋse, sõngda wʋsg ye. w17.07 14-16 s. 13-16

Tõe tɩ kẽer kãadem pa wa b sẽn da magã ye. Sãnda meng tara zu-loees b zĩid-n-taarã pʋgẽ. Bʋgs-y-yã a Zeova manesem sẽn yɩ to-to ne Israyɛll buudã, n dɩk yam. A Zeova ra yeelame tɩ Israyɛll buudã yaa wa yẽ paga. (Eza. 54:5; 62:4) La b pa yɩ wa pag sẽn sakd a sɩd ye. Naoor wʋsgo, b sãama a Zeova sũuri. Baa ne rẽ, a Zeova pa yɩ tao-tao n bas-b ye. A kõ-b-la sugr naoor ka tɛka, n pa sãam kaool ning a sẽn da maan ne-bã ye. (Yɩɩn. 106:43-45) A Zeova sẽn pa basd a sẽn nong-b rãmbã pa kɩt tɩ tõnd maneg n nong-a sɩda? Kiris-neb nins sẽn kẽ kãadem, n nong a Zeova wã modgdame n dɩkd a togs-n-taare. Baa b sã n tar zu-loees b zĩid-n-taarã pʋgẽ, b pa na n kɩɩs Biiblã noyã, n bao soay n paam n kao b kãadmã ye. B tẽegdame t’a Zeova nifẽ, yi-kãadmã daar pʋlengã pa reem yelle, la t’a ratame tɩ pag ne a sɩd zĩnd ne taab b yõor tɛka. Biiblã wilgame tɩ yaa pag wall rao sã n yo la a to wã tõe n kao b kãadmã. Wakat kãnga, a tara sor me n na n kẽ kãadem ne ned a to. (Mat. 19:5, 9) Sẽn tar-b zu-loees b kãadmã pʋgẽ wã sã n maand b sẽn tõe fãa sẽn na yɩl tɩ b zĩid-n-taarã yɩ noogo, wilgdame tɩ b teenda a Zeova naamã. w17.06 31 s. 17-18

A Sʋɩtãan waa ne no-koeemd a Zeova naamã wɛɛngẽ. A yeelame tɩ pa zems t’a Zeova yɩ yĩngr la tẽng naab ye. A ratame tɩ ninsaalbã tẽ t’a Zeova yaa na-wẽnga, la t’a pa rat b neer ye. A yeelame tɩ ninsaalbã sã n soog b mense, n dɩt naam b toore, rẽ la b vɩɩmã na n yɩ noog n yɩɩda. (Sɩng. 3:1-4) A Sʋɩtãan yeelame me tɩ namsg pʋgẽ, ned kae n na n kell n sak a Zeova naamã ye. (Zoob 2:4, 5) A Zeova basame tɩ ninsaalbã na n soog b mens wakat bilfu, tɩ wilg vẽeneg tɩ b sã n zãgs yẽ naamã, b vɩɩmã pa tõe n tall bark ye. A Zeova ra miime t’a Sʋɩtãan sẽn yetã yaa ziri. Bõe yĩng masã t’a bas weer sẽn na yɩl t’a Sʋɩtãan wilg a goamã sã n yaa sɩda? Bala, malɛgsã ne ninsaalbã me toog bee yellã welgr pʋgẽ. (Yɩɩn. 83:19) A Ãdem ne a Awa zãgsa a Zeova naamã. Rẽ tɛka, neb wʋsg me maana wa bãmba. Woto tõe n kɩtame tɩ malɛgs la neb kẽer sokd b mens a Sʋɩtãan sã n tara bʋʋm. w17.06 22-23 s. a 3-4

Fo sã n yaa bi-bɩɩga, koe-moonegã la nebã zãmsg na n sõng-f lame tɩ f paam minim n paase. Rẽ na n nafa foo tʋʋm buud fãa pʋgẽ, la sõng-f tɩ f tõogd n sõsd ne nebã nana-nana, n tar raood bũmb fãa pʋgẽ, la f gũusd f goamã la f yel-manesmã pʋgẽ n da wa sãam ned sũur ye. (Yel. 21:5; 2 Tɩm. 2:24) F na n wa tõogd n tallda Biiblã n wilgd nebã bũmb nins f sẽn tẽedã. Rẽ na n kõ-f-la sũ-noog wʋsgo. F na n neeme me tɩ f naaga a Zeova n tʋmdẽ. (1 Kor. 3:9) Baa pa neb wʋsg n sakd n zãmsd Biiblã yãmb moonegã zĩigẽ, f tõe n paama sũ-noog tʋʋmdã pʋgẽ. Pa nin-yend n tõe tɩ ned wa reeg lisg ye. Yaa tigingã neb fãa tʋʋmde. Yaa sɩd tɩ yaa nin-yend n na n sɩng Biiblã zãmsg ne a soabã. La yaa tigingã neb fãa n naagd taab n baood sẽn dat-b n bãng a Zeova wã. Rẽnd sũ-noogã yaa b fãa sũ-noogo. A Barãndonn yaa so-pakda. Yʋʋm a wɛ tõr la a moon koɛɛgã zĩig neb wʋsg sẽn pa sakd n kelgdẽ. A yeelame: “Yaa sɩd tɩ m nan pa paam n sõng d moonegã zĩigẽ ned t’a reeg lisg ye. La neb a taab n tõoge. M sũur nooma m sẽn kẽes m meng zãng koe-moonegã pʋgẽ wa m sẽn da magã.”—Koɛ. 11:6. w17.07 23 s. a 7; 24 s. a 9-10

A Ana ra rata rogem ne a sũur fãa n pa tõe n paame, t’a pʋg-to a Penina yaool n da tar kamb wʋsgo. Yel-kãngã ra namsda a Ana wʋsgo. (1 Sãm. 1:4-7) A Penina ra tar-a lame n yaand wakat fãa, tɩ rẽ maneg n paasd a toogã. Kɩtame t’a Ana vɩɩmã ra lebg sũ-sãams la yɩɩre. A maana wãn n paam belsgo? A pʋʋsa a Zeova, n togs-a yellã. (1 Sãm. 1:12) A ra miime t’a Zeova na n sõng-a lame t’a paam bi-ribla, la tɩ baa a wa n pa paam me, a Zeova tara a sẽn na n maaneg n bels-a. Tõnd sẽn yaa koangdbã, tɩ dũniyã leb n yaa a Sʋɩtãan n so wã, d mii vẽeneg tɩ zu-loeesã na n ket n namsda tõndo. (1 Zã 5:19) La d sũy keemame, d sẽn mi t’a Zeova yaa “Wẽnnaam sẽn belsd nebã wakat fãa” wã. (2 Kor. 1:3) Ne pʋʋsgã maasem, d tõe n kos-a lame t’a sõng-do, d yel-pakr fãa pʋgẽ. A Ana togsa a Zeova sẽn da be a sũurẽ wã fãa. Sẽn wa n yaa yell ning n namsd tõnd me, d ra pʋʋs a Zeova n togs yellã bal ye. D pelg d pʋg n togs-a sẽn be d sũurẽ wã, la d yõk a sɛɛga, n kos t’a sõng-do.—Fili. 4:6, 7. w17.06 6 s. 10-11

A Zeezi vʋʋgrã poore, a karen-biis n kẽng n na n tɩ yõg zĩm. Yʋngã tõre, b pa yõk zĩnf baa a ye. A Zeezi yeel-b lame yaa: “Lob-y zĩm-gãmbrã koglgã rɩtgo, la y na n paamame.” Karen-biisã “loba zĩm-gãmbrã, la b dag n ka leb n tõe n tak-a ye, zĩmã waooglem yĩnga.” (Zã 21:1-6) Rẽ poore, a Zeezi kõ-b-la zĩm la bur tɩ b wãbe. B sẽn dɩ n sa, a soka a Pɩyɛɛr goam nins sẽn yaa rũndã daar vɛrse wã. A Zeezi ra miime t’a Pɩyɛɛr nonga zĩmã yõgbo. Rẽnd wõnda a ra rat n bãnga a Pɩyɛɛr sã n nonga yẽ n yɩɩd zĩmã yõg n koosã. A Pɩyɛɛr leokame: “N-yẽe, Zu-soaba! Yãmb miime tɩ mam nonga yãmba.” (Zã 21:15) A Pɩyɛɛr sẽn maan bũmb nins rẽ tɛka wilgame t’a sɩd nonga a Zeezi. Sɩd me, a wɩnga ne koɛɛgã moonego, hal n tall tʋʋm wʋsg pipi kiris-nebã sʋka. w17.05 22 s. a 1-2

A Poll sẽn da kɩs sɩd t’a Zeova bee yẽ sõngr yĩngã, a paama pãng n tõog n mao ne a zu-loeesã. A pa bas t’a zu-loeesã koms a raood ye. Bõe n sõng-a? Yaa a sẽn kell n teeg a Zeova sẽn yaa “Wẽnnaam sẽn belsd nebã,” b “yel-pakrã fãa pʋgẽ” wã. (2 Kor. 1:3, 4) D sã n pʋʋsd Wẽnnaam wakat fãa, sõngdame tɩ tõnd ne yẽ zoodã tar pãnga. (Yɩɩn. 86:3; 1 Tes. 5:17; Rom. 12:12) D sã n pelgd d pʋg n gomd ne d saasẽ Ba wã, n togsd-a sẽn be d sũurẽ wã, kɩtdame tɩ d zoodã paasdẽ. (Yɩɩn. 65:3) Sẽn paase, d sã n neẽ t’a reegda d pʋʋsgã, kɩtdame tɩ d maneg n nong-a. D na n basa d yam, n miẽ t’a “pẽe ne neb nins sẽn boond bãmbã.” (Yɩɩn. 145:18) D sã n kɩs sɩd woto t’a Zeova nong-d lame la t’a bee d sõngr yĩnga, d tõogd n maoo ne zo-loɛɛg buud fãa. w17.05 19 s. a 9-10

Kãsem-dãmbã sã n wa rɩk sard tɩ y pa wʋmd a võore, wall pa noom yãmba, y manesem na n yɩɩ wãna? Yɛl a woto buud tõe n kɩtame tɩ lebg toog tɩ d kell n kɩs a Zeova sɩda, la d sak a sẽn sigl yɛlã to-to tigingã pʋgẽ wã. A buud sã n paam-do, bõe la sik-m-mengã na n sõng-d tɩ d maane? Bɩ ges bũmb a yiibu. Pipi, d sã n yaa sik-m-meng soaba, d na n sak n deegame tɩ d pa mi yellã vɩʋʋg fãa ye. Baa d tẽed tɩ d mii yellã vɩʋʋgo, d ra yĩm tɩ yaa a Zeova bal n tõe n bãng sẽn be ned sũurẽ ye. D sã n tẽeg rẽ, d na n sika d meng n sak n deeg tɩ d pa mi bũmb fãa, la d sak n toeem d tagsg sẽn yaa a soab yellã zugu. Yiib-n-soaba, sik-m-mengã na n sõng-d lame tɩ d ra yɩ kɩɩsda, la sõng-d tɩ d maan sũ-mar n gũ t’a Zeova wa welg yellã, sã n mikame tɩ sɩd yaa kɛgre. Biiblã yeelame tɩ “nin-wẽng ka na n tol n paam sũ-noog ye.” B paasame t’a “ka na n vɩɩmd n kaoos” ye. (Koɛ. 8:12, 13) Yell buud fãa pʋgẽ, d sã n kell n yɩ sik-m-meng soaba, na n nafa tõnd la neb nins fãa yellã sẽn pakã.—1 Pɩy. 5:5. w17.04 25-26 s. 10-11

Yaa vẽeneg tɩ b sẽn maan a Zozɛfã yaa kɛgre, bala yaa pãnga. A togsa vẽeneg me tɩ yaa b sẽn dõd yẽ la b sẽn kẽes-a bãens roogã. Rẽ n so t’a kos bõn-yũudl-kɩtã t’a sã n paam n yi, bɩ a tẽeg n gom yẽ yell ne a Faraõ. A yeelame t’a sẽn kot woto wã yaa sẽn na yɩl ‘tɩ b yiis-a roogã pʋga.’ (Sɩng. 40:14) A Zozɛf gom-kãensã wilgdame t’a pa sĩnd n get yellã, n pa bao n na n welg-a ye. A ra miime tɩ b sẽn maan-a wã fãa yaa kɛgre. Rẽ n so t’a rɩk yellã n togs bõn-yũudl-kɩtã, n da saagdẽ tɩ nin-kãnga na n tõog n sõng-a lame. La Biiblã zĩig baa a ye pa wilgd t’a Zozɛf yeela neda, baa a Faraõ mengã, tɩ yaa a kẽem-dãmb la sẽn yõk-a n koos tɩ b tall-a n wa Ezɩptã ye. Sɩd me, a Zozɛf kẽem-dãmbã sẽn wa n wa Ezɩpt t’a vẽneg a meng ne-bã poore, a Faraõ sakame tɩ b na n wa zĩnd Ezɩpti, hal n yeel tɩ ‘bõn-sõma nins fãa sẽn be Ezɩpt soolmẽ wã na n yɩɩ bãmb dẽnda.’—Sɩng. 45:16-20. w17.04 20-21 s. 12-13

Bũmb n kɩt tɩ yaa a Zeova bal n segd n yɩ yĩngr la tẽng naaba. A tara yam la bãngr n tõe n ges ãndũniyã bũmba fãa yell sõma. Bũmb sẽn wilgd rẽ yaa a sẽn kõ a Biigã tõog t’a maag bãas logtoɛɛmbã meng sẽn pa tõog n tɩpã. (Mat. 4:23, 24; Mark 5:25-29) A Zeezi sẽn maanã yaa yel-soalem ne tõndo, la pa yel-soalem ne a Zeova ye. Bala, a mii ninsaal yĩngã wilã sẽn tʋmd to-to wã, tɩ bũmb sã n sãam bɩ a tõe n manege. A tõeeme tɩ ned sẽn maan kaalem vʋʋge. A tõe n gɩdga sabab-wẽns wala sob-kãsems la tẽn-digimdgu. Dũniyã sẽn yaa a Sʋɩtãan n so wã, a nebã baooda b sẽn na n maaneg tɩ zaba sa, tɩ laafɩ la bãan zĩnd tẽng fãa pʋgẽ, la tẽnsã ne taab sʋk n kongdẽ. A Zeova yamã ka to ye. Yẽ bal n tõe tɩ laafɩ zĩnd dũniyã gill zugu. (Eza. 2:3, 4; 54:13) Tõnd me tagsda wa tʋm-tʋmd a Polle. A ra goma a Zeova yell n togs goam nins sẽn yaa tõnd rũndã daar vɛrse wã. w17.06 28 s. a 6-7

Rũndã-rũndã, neb wʋsg tara tagsg sẽn pa zems kãadmã wɛɛngẽ. B tagsdame tɩ b kãadem sã n wa pa noomẽ, b tõe n kaoome. La pa woto la kiris-nebã tagsd ye. B pa yĩmd tɩ yaa Wẽnnaam taoor la b pʋlem tɩ b na n zĩnda ne taab ye. (1 Kor. 7:27) B sã n kao b kãadem, yaa wa b sẽn yag ziri. Wẽnnaam yaool n kisa ziri. (Maan. 19:12; Yel. 6:16-19) Wẽnnaam kisa ned sẽn na n maan zãmb n kao a kãadem. (Mal. 2:13-16) A Zeezi wilgame tɩ sã n yaa ne Gʋlsg Sõamyã, ned pag bɩ a sɩd sã n yo, a tara sor n tõe n kao kãadmã, sã n mikame t’a pa rat n kõ sẽn yo-a wã sugri. (Mat. 19:9; Ebre. 13:4) La ned sã n dat n welg ne a pag wall a sɩda? Biiblã sẽn yet rẽ wɛɛngẽ wã me yaa vẽenega. (1 Kor. 7:10, 11) Biiblã pa wilg bũmb takɩ sẽn tõe n kɩt tɩ pag ne a sɩd welg taab ye. Baasgo, yɛl kẽer tõe n kɩtame tɩ kiris-ned getẽ t’a sẽn welgd ne a pag wall a sɩd n são. Wala makre, nina pag wall a sɩd sã n wa lebg sɩdã kɩɩsda, wall a namsd-a tɩ loog noore, a tõe n getame tɩ sẽn na yɩl tɩ ra sãam yẽ ne a Zeova zoodã, wall tũ ne a yõore, b sẽn welgd taab n são. w17.04 7 s. 14-16