Yʋʋm-vẽkre

A Moyiiz sẽn da wa n ket Ezipt na-yirã, a ra pa sik-m-meng soab ye. Sɩd me, vugri, a sũurã yika ne rao hal t’a kʋ-a, a sẽn da get tɩ raoã maana sẽn yaa kɛgrã yĩnga. A ra tagsdame t’a Zeova sũur na n yɩɩ noog ne a sẽn maanã. Yʋʋm 40 pʋgẽ la a Zeova sẽn sõng a Moyiiz t’a bãng tɩ yɩl n yɩ Israyɛll nebã taoor soaba, raood bal pa seke, la tɩ rẽnda a bɩɩs sik-m-meng me. Sẽn na yɩl n yɩ sik-m-meng soaba, yaa tɩlɛ me t’a yɩ sakda, la sũ-maasem soaba. A wa n bãnga rẽ neere, hal n tõog n ges nin-buiidã yell sõma.​ (Yik. 2:11, 12; Tʋʋ. 7:21-​30, 36) Segdame tɩ zak-soben-dãmbã la tigingã kãsem-dãmbã rɩk a Moyiiz togs-n-taare. B sã n paoog-y bɩ y ra yɩ tao-tao n yik y sũur ye. Y sã n tudg bɩ y sik y meng n sak tɩ y tudgame. (Koɛ. 7:​9, 20) Yell sã n wa beẽ, bɩ y sak n tũ noy nins a Zeova sẽn kõ yellã welgr wɛɛngẽ wã. Wakat fãa y sã n na n leok ned bɩ y leok ne bʋgsem. (Yel. 15:1) Zak soab bɩ kãsem-soab sã n maand woto, a Zeova sũur yaa noog ne-a, paasda nebã zems-n-taarã, leb n yaa mak-sõng sik-m-mengã wɛɛngẽ. w19.02 8 s. a 1; 10 s. a 9-10

Bõe yĩng la a Zeezi sẽn kʋm kʋʋngã nimbãanegã? A ra neeme tɩ b ra ‘wẽnda wa piis sẽn ka tar pe-kɩɩma.’ Tõe t’a Zeezi ra miime tɩ b kẽer yaa naong rãmba, tɩ yaa tɩlɛ tɩ b tʋm wʋsg n paam n ges b zakã rãmb yelle. Tõe tɩ sãnda me neb n da maan kaalem tɩ namsd-ba. Dẽnd a Zeezi ra tog n mii b zu-loeesã sẽn namsd-b to-to wã. Wõnda a yẽ me maoo ne zu-loe-kãens buudu. Nebã yell sẽn da pak-a wã yĩnga, a taasa kʋʋngã koɛɛgã, n na n bels-ba. (Eza. 61:1, 2) Yam-bʋg la d tõe n dɩk a Zeezi manesmã pʋgẽ? Wa a Zeezi, tõnd me bee ne neb sẽn yaa ‘wa piis sẽn ka tar pe-kɩɩma.’ B maooda ne zu-loees ka tɛka. Tõnd tara bũmb ning sẽn tõe n sõng-bã: Yaa Wẽnnaam Rĩungã koe-noogã. (Vẽn. 14:6) Rẽ n so tɩ d rɩkd d Zu-soab a Zeezi togs-n-taar n moond koe-noogã, bala tõnd me ‘zoeta pãn-komsem soab ne nimbãan-ned nimbãanega.’ (Yɩɩn. 72:13) D kʋmda nebã, n dat n maan bũmb n sõng-ba. w19.03 21-22 s. a 6-7

Bʋʋm waoog sẽn segd n kɩt tɩ d nong a Zeova. Pa a sẽn kõt-d bõn-sõma wʋsg daar ne a to fãa wã yĩng bal ye. A sõngda tõnd tɩ d bãngd sɩdã yẽ mengã zugu, la d bãngd bũmb nins a sẽn dat n maanã me sõma. (Zã 8:31, 32) Ne kiris-neb tigingã maasem, a wilgda tõnd sore, la a sõngd tõndo. A sõngda tõnd d zu-loeesã pʋgẽ rũndã-rũndã menga, la a pʋlmame me tɩ beoog sẽn wate, a na n kɩtame tɩ d vɩɩmd wakat sẽn kõn sa, ne sũ-noog hakɩɩka. (Vẽn. 21:3, 4) D sã n bʋgs bũmb nins fãa a Zeova sẽn zoe n maan tɩ wilgd t’a nonga tõndã, na n kɩtame tɩ tõnd me nong-a. D sã n nong a Zeova, d na n bɩɩsa wẽn-zoeere. Rẽ la rabeem ning sẽn yaa sõma wã. D na n zoetame n pa rat n sãam d sẽn nong a soab wʋsgã sũur ye. Wakat fãa, fo sã n tẽegd a Zeova noyã sẽn nafd foo to-to wã, na n kɩtame tɩ f maneg n nong a Zeova la a noyã. Rẽ, bũmb kae a Sʋɩtãan sẽn na n tũnug ne n kɩt tɩ f bas a Zeova tũub ye. Mams f yamẽ f sẽn na n vɩɩmd yʋʋm tusri, n lebg n tagsd f sẽn yãk yam n deeg lisgã yelle. Hakɩɩka, f na yeel tɩ yam-yãkr kae t’a yõod le ta rẽ ye! w19.03 6 s. 14; 7 s. 19

Zakã ned fãa sã n wilgdẽ t’a sũur nooma ne a taabã sẽn maandã, nafda b fãa. Rao sã n nong n wilgd a pag t’a sũur nooma ne a sẽn maand bũmb nins b zakã rãmb yĩngã, tɩ pagã me wilgd a sɩdã t’a sũur nooma ne yẽ me sẽn maandã, b yiibã zems-n-taarã na n tara paasgo. Sẽn paase, b na n mikame tɩ yaa nana tɩ b kõt taab sugri. Rao sã n nand a paga, a na n gũusd n geta bõn-sõma wã a pagã sẽn maande, la a sẽn yete. La pa rẽ bal ye. A na n mi n yaagda a noor me n “pẽgd-a.” (Yel. 31:28) Pag sẽn yaa pʋg-sõng me togsda a sɩdã bũmb nins a sẽn maand t’a pẽgdã. Roagdba, wãn to la y tõe n sõng y kambã tɩ b wilgd tɩ b sũur nooma ne bõn-sõma wã neb a taabã sẽn maandã? Tẽeg-y tɩ b geta yãmb sẽn maandã la y sẽn yetã, n dɩkd y togs-n-taare. Woto wã, y kambã sã n maan bũmb n kõ-yã, bɩ y pʋʋs-b barka, tɩ kõ-b mak-sõngo. Sẽn paase, sõng-y y kambã tɩ b bãng tɩ ned sã n maan bũmb n kõ-ba, b segd n pʋʋsa barka. Sõng-y-b tɩ b bãng tɩ bark pʋʋsg segd n yita sũurẽ, la t’a yõodã waoogame. w19.02 17 s. 14-15

Gom-kãensã wilgdame t’a Zoob ra yãka yam n pa na n tol n bas a burkĩndã, baa sẽn wa n yaa a soaba. Tõnd me tõe n maana wa yẽ. Wãn to la a Sʋɩtãan sẽn wa ne no-koeemd ning a Zoob zugã pak tõnd ned kam fãa? A yetame tɩ yãmb me pa nong a Zeova ne y sũur fãa, tɩ sã n wa yaa yõor yelle, y na n basa a Zeova tũubu, la tɩ y burkĩndã pa burkĩnd hakɩɩk ye. (Zoob 2:4, 5; Vẽn. 12:10) A goamã pa zabd sũur sɩda? La tags-y n ges-y! A Zeova kɩsa yãmb sɩda, n bas tɩ yãmb na n sõng n leoke. A basame t’a Sʋɩtãan na n mak yãmb n ges y sã n yaa burkĩna. A Zeova kɩsa sɩd tɩ yãmb tõe n kell n yɩɩ burkĩna, tɩ wilg t’a Sʋɩtãan yaa ziri-yagda. A Zeova pʋlmame meng t’a na n sõnga yãmb tɩ y tõoge. (Ebre. 13:6) Yĩngr la tẽng Naabã sẽn kɩs-y sɩd woto wã pa zu-zẽkr sɩda? Y wʋmda d sẽn segd n yɩ burkĩnã võor masã bɩ? D burkĩndã wilgdame t’a Sʋɩtãan yaa ziri-yagda, la kɩtdẽ tɩ d Ba wã yʋʋr paamd waoogre, la wilgdẽ me tɩ yaa yẽ naamã la d teenda. w19.02 5 s. a 9-10

A Zeezi togsa a tʋm-tʋmdbã zu-loees nins b sẽn na n wa paamã. Rẽ poore, a sagl-b lame tɩ b tũ yẽ mak-sõngã, n yeel-b yaa: “Bɩ y keng y sũyã.” (Zã 16:1-4a, 33) Yʋʋm ka tɛk poore, a Zeezi karen-biisã ra ket n rɩkda a togs-n-taar n sakd n mongd b mens la b wilgd raoodo. B ra teenda taab zu-loees sasa, baa sã n na n kɩtame tɩ b yã namsg wʋsgo. (Ebre. 10:33, 34) Rũndã-rũndã me, d rɩkda a Zeezi naoore, n tar raoodo. Wala makre, yaa tɩlɛ tɩ d tall raoodo, n tõog n sõng d tẽed-n-taas nins b sẽn namsd b tũudmã yĩngã. B mi n yõga d tẽed-n-taas n kẽes roog zaalem yĩng bala. Sã n wa yaa woto, d segd n maana d sẽn tõe fãa n sõng-ba. Wala makre, d tõe n pʋʋsa b yĩnga, la d gom n sõng-b bʋ-kaoodbã taoore. (Fili. 1:14; Ebre. 13:19) D sã n ket n moond koɛɛgã ne “pɛl-kɛgenga,” wilgdame me tɩ d tara raoodo. (Tʋʋ. 14:3) Wa a Zeezi, d rata ne d sũur fãa n moon Rĩungã koɛɛgã, baa nebã sã n baood n na n gɩdg tʋʋmdã, wall b namsd tõndo. w19.01 22-23 s. a 8-9

La bõe la d tõe n maan tɩ sõng-d tɩ d sẽn yet tigissã sasa wã kengd nebã raoodo? Bũmb sẽn tar yõod n yɩɩd yaa y sẽn na n deng n segl tigsg fãa. Y sã n ning y yamẽ tɩ y na n kõo leoore, n segl y meng sõma, na n sõngame tɩ y paam raood n gome. (Yel. 21:5) La d maanda wãn n segl tigissã sõma? Y sã n na n sɩng bɩ y reng n pʋʋs a Zeova n kos a vʋʋsem sõngã. (Luk 11:13; 1 Zã 5:14) Rẽ poor bɩ y ges gom-zugã, gom-zu-bi wã, fot-rãmbã ne sogsg nins sẽn kʋmsd zãmsgã la zĩ-gũbã. Karm-y sull fãa, la y karem vɛrse-rãmbã fãa, sã n mik tɩ y tõeeme. Bʋgs-y y sẽn karmã zugu, la y maag y yĩng n bʋgs bũmb nins y sẽn dat n yeel tigissã sasa wã. Y sã n segl tigsgã neere, na n nafa yãmb sõma, la na n yɩɩ nana me tɩ y tõog n zẽk y nug n gome.—2 Kor. 9:6. w19.01 9 s. a 6; 11-12 s.13-15

A Zeova meng sẽn yeel a Habakuk t’a gʋls b yẽsgã fãa wã wilgda tõnd bũmb sẽn tar yõod wʋsgo. Wilgdame t’a Zeova pa rat tɩ yell sã n namsd tõndo, wall d sã n tar sãmbs bɩ d yɛɛsd n pa rat n togs-a ye. A sẽn pʋd n dat yaa d pelgd d pʋg n togsd-a sẽn be d sũurẽ. (Yɩɩn. 50:15; 62:8) A Habakuk ra teega a Zeova sẽn yaa a Ba la a zoa wã, n yãk yam n na n togs-a sẽn namsd-a wã. A ra pa tagsd a zu-loeesã yell n maand yɩɩr bala, la a tẽbd n na n welg-b a toor ye. A pʋʋsa a Zeova n togs-a sẽn be a sũurẽ wã. Yaa mak-sõng tõnd sẽn segd n tũ. A Zeova sẽn yaa Wẽnnaam ning sẽn kelgd pʋʋsgã ratame tɩ d pʋʋsd-a n togsd d zu-loeesã, tɩ wilgdẽ tɩ d kɩs-a-la sɩda. (Yɩɩn. 65:3) D sã n maand woto, d na n yãame t’a Zeova sɩd leokda d pʋʋsgo, n belsd tõnd la a wilgd-d sor bũmb fãa pʋgẽ, tɩ yaa wa a mobga tõnd a nusẽ. (Yɩɩn. 73:23, 24) Sẽn wa n yaa yell ning fãa n namsd tõndo, a na n sõng-d lame tɩ d bãng yẽ tagsg sẽn yaa a soab d yellã zugu, tɩ sõng tõnd mengã tɩ d tall tagsg sẽn zems d zu-loɛɛgã zugu. Pʋʋsgã yaa bũmb a ye sẽn wilgd vẽeneg tɩ ned teega a Zeova. w18.11 13 s. a 2; 14 s. a 5-6

A Davɩɩd zo-rãmbã ra pa a rog-taas bal ye. Yãmb mii ned sẽn yɩ a Davɩɩd zoa bɩ? Tõe tɩ y na n tagsa a Zonatã yelle. B zoodã talla pãnga, wa neb a taab me zood sẽn tall pãnga, tɩ b gomd b yell Biiblã pʋgẽ wã. La rẽ yĩnga, y miime t’a Zonatã ra yɩɩda a Davɩɩd ne sẽn dat n ta yʋʋm 30 bɩ? Woto wã, bõe yĩng la b zoodã sẽn tall pãngã? B fãa ra tara tẽeb ne a Zeova hal sõma, b ra waoogda taaba, ned fãa me ra nee a to wã sẽn tar raood to-to n zabd ne Wẽnnaam bɛɛbã. (1 Sãm. 13:3; 14:13; 17:48-50; 18:1) Wa a Davɩɩd ne a Zonatã, tõnd me sã n yõg zood ne neb sẽn nong a Zeova la b tẽed-a, d sũur na n yɩɩ noog wʋsgo. A Kiyera tũuda a Zeova yʋʋm wʋsg masã. A yeelame: “Mam yõga zood ne neb sẽn be dũniyã zĩis toor-toore, neb sẽn yaa buud toor-toore, tɩ b minimdã me yaa toɛy-toɛya.” Yãmb me sã n yõg zood ne neb buud toor-toor wa a Kiyera, y na n yãa vẽeneg tɩ ne Biiblã la vʋʋsem sõngã maasem, Wẽnnaam nin-buiidã sɩd yaa wa zak a ye neba. w18.12 26 s. 11-13

Biiblã pʋgẽ, yoob võor yalmame. Neb sẽn pa kẽ kãadem ne taab sã n kẽ ne taaba, ned sẽn kẽ kãadem sã n zãmb a to wã, ned sã n koosd a menga, pag ne pag wall rao ne rao sã n kẽ ne taaba, ned sã n kẽ ne rũnga, fãa yaa yoobo. Rao sã n yo, bee ne a pagã t’a yãk a sã n na n kaoo kãadmã bɩ a pa na n kao. La d tẽeg t’a Zeezi pa yeel tɩ ned pag wall a sɩd sã n yo, yaa tɩlɛ t’a kao kãadmã ye. Wala makre, rao tõe n yoome, t’a pagã yãk yam n na n kell n zĩnd ne-a. Bõe yĩnga? Tõe t’a ket n nonga raoã, n sak n na n kõ-a sugri, la a rat tɩ b mao tɩ b kãadmã yɩ sõma. Sẽn paas me, a sã n kao kãadmã, n pa lebg n kẽ ne ned a to, yɛl kẽer n pa na n yɩ nana ne-a. Ãnd n na n get a yelle? Pag ne rao lagengã tʋlsem wɛɛngẽ, a na n maana wãna? A sã n na n zĩnd a ye, pa na n nams-a? La b sã n tara kamba? (1 Kor. 7:14) Sɩd-sɩdã, sẽn tar-a sor n kao kãadmã sã n yãk yam n kao, yɛl kẽer n tõe n yɩ toog wʋsg ne-a. w18.12 12 s. 10-11

Makr a tãab-n-soabã yaa a Zeova tagsg sẽn yaa a soab ne sẽn yaa kɛgre. A kisa wẽng buud fãa. (Eza. 61:8) Yaa sɩd t’a Zeova miime tɩ d sẽn pa zems zãngã, yɩl n maan sẽn yaa tɩrgã pa nana wakat ning ye. La a ratame tɩ d mao n dɩk a togs-n-taare, n kisg sẽn yaa wẽnga. D sã n bʋgsd bũmb ning sẽn kɩt t’a Zeova kis sẽn yaa wẽngã, tõnd me na n wa tagsda wa yẽ, hal n maneg n dat n kisg wẽng buud fãa. D sã n kis sẽn yaa wẽngã wa a Zeova, na n sõng-d lame tɩ d gũusd n bãngd baa tʋʋm-wẽns nins b sẽn pa sõdg Biiblã pʋgẽ n wilg vẽeneg tɩ yaa wẽngã. Wala makre, saoog kẽer n be tɩ nebã saood bɛɛl la bala. Lebga bũmb sẽn piuugdi. Kẽer tagsdame tɩ saoog a woto pa maneg n yaa wẽnga, bala pa wa ned la f kẽ ne ye. La a Zeova tagsg yaa woto sɩda? D tẽeg t’a kisa wẽng buud fãa. Bɩ d kisg a Zeova sẽn kisi, la d mao me n bɩɩs yõk-m-menga. Woto, d tõogd n zãaga d meng ne wẽng buud fãa.—Rom. 12:9. w18.11 25 s. 11-12

Tʋm-tʋmd a Poll lebg n togsa gom-kãens a lɛta a tãab pʋgẽ, tɩ wilgdẽ tɩ pa belgr ye. (Rom. 1:17; Gal. 3:11; Ebre. 10:38) D tõe n basa d yam tɩ baa sẽn yaa zu-loɛɛg ning n namsd tõndo, d sã n kell n maan sɩd ne a Zeova la d teeg-a, d na n yãa a pʋlemsã pidsgu. A Zeova ratame tɩ d zʋʋg d zu-loeesã, n tagsd d sẽn na n wa paam beoogã yelle. D sẽn be yaoolem wakatã, yam ning d sẽn tõe n dɩk Habakuk sebrã pʋgẽ wã tõe n sɩd nafa d ned kam fãa. A Zeova pʋlmame tɩ ned ning fãa sẽn maand tɩrga, la a teeg yẽ na n wa paama vɩɩm sẽn kõn sa. Bɩ d ket n maand tẽeb ne Wẽnnaam, la d mao n teegd-a n paasdẽ, baa sẽn wa n yaa yell ning n namsd tõndo, wall n kɩt tɩ d maand yɩɩre. A Zeova sẽn yeel a Habakuk bũmb ningã wilgdame t’a na n sõng-d lame la a fãag-do. A yeta tõnd tɩ d teeg yẽ, la d tall sũ-mar n gũ wakat ning a Rĩungã sẽn na n soog tẽngã. Wakat kãnga, tẽngã gill na n pida ne neb sẽn yaa sũ-maasem dãmba, n tũud a Zeova ne sũ-noogo.—Mat. 5:5; Ebre. 10:36-39. w18.11 16-17 s. 15-17

A Zeezi wakatẽ wã, neb kẽer sẽn da sak bũmb nins a sẽn zãmsd nebã wa n basame n pa le tũud sɩdã ye. Wala makre, daar a ye, a Zeezi maana yel-solemd n dɩlg neb kʋʋngo, tɩ b tũ-a rẽ poor n kẽng Galɩle mogrã rʋʋnd a to wã. Beenẽ wã, a Zeezi yeela bũmb sẽn ling-b wʋsgo. A yeel-b lame yaa: “Yãmb sã n ka wãb Ninsaal Bi-riblã nemdo, la yãmb sã n ka yũ a zɩɩmã, yãmb ka tar vɩɩm y pʋsẽ ye.” La b pa kos meng t’a Zeezi togs-b a gomdã võor ye. B pʋd n yeelame yaa: “Zãms-kãngã reegr yaa toogo. Ãnda n tõe n sak-a?” Woto kɩtame tɩ ‘karen-biis wʋsg leb poorẽ, n bas n ka leb n tũud a Zeezi ye.’ (Zã 6:53-66) Rũnda-rũndã, neb n wa n yãk b yam n bas sɩdã. Kẽer nengẽ, yaa d tẽed-n-taag yʋʋr sẽn yi n yeel bũmb bɩ a maan bũmb tɩ sãam b sũuri. Sãnda me yaa saglg sẽn yit Biiblã pʋgẽ la b kõ-b tɩ pa yɩ-b noogo. Kẽer me nengẽ, yaa bãmb ne b tẽed-n-taag n pa wʋmd taab baa-baa. w18.11 9 s. a 3-5

Siglgã sã n wa toeem bũmb tɩ d pa tolg n wʋmd a võore, yɩta sõma tɩ d tẽeg Kiristã sẽn ges Wẽnnaam nin-buiidã yell to-to pĩnd wẽndẽ wã. A Zozuwe wakatẽ wã la pipi kiris-nebã wakatẽ wã me, Kiristã kõo Wẽnnaam nin-buiidã noy la sagls sẽn yaa sõma, n na n kogl-ba, n sõng-b tɩ b tẽebã pãng paase, la b kell n yɩ yam a yembre. (Ebre. 13:8) Tʋm-tʋmd sẽn tũud sɩdã sẽn kõt tõnd sagls sẽn zems a wakatã wilgdame tɩ Kiristã geta tõnd tẽebã yelle. (Mat. 24:45) D sã n ne Kiristã sẽn wilgd-d sor to-to wã, sõngdame tɩ d maneg n kɩs sɩd t’a ratame tɩ d tẽebã pãng paasdẽ. Kiristã sẽn get tɩ d tẽebã pãng paasdẽ wã toog sẽn kae, a sõngda tõnd sẽn na yɩl tɩ d ket n wɩngd ne koɛɛgã mooneg sẽn yaa tʋʋmd ning sẽn tar yõod n yɩɩd rũndã-rũndã wã.—Mark 13:10. w18.10 25 s. 13-16

Bũmb me d sẽn tõe n maan tɩ wilg tɩ d yaa sik-m-meng soab yaa d sẽn na n tõog d sũuri, ned sã n bao d noore. Yell a woto buud la b togs tɩ be 2 Sãmwɛll 16:5-13, tɩ d tõe n dɩk yam a pʋgẽ. Rĩm a Sayull roogã ned a ye yʋʋr sẽn boond t’a Simeyi n bao a Davɩɩd ne a nebã noore, n da tʋʋd-b la a wʋkd kug n lobd-ba. Baa ne a Davɩɩd sẽn da tõe tɩ b maan a Simeyi yellã, a tõoga a menga. Bõe n sõng-a? Yaa a Davɩɩd biig a Absalom sẽn wa n baood n na n kʋ-a wã, la a sẽn gʋls yɩɩn-sõamyã a tãab-n-soabã. Yɩɩn-sõamyã 3:5 wã pʋgẽ, a Davɩɩd yeelame yaa: “Mam zẽkda m koɛɛg n kelemd n boond Sẽn-Ka-Saabo, bãmb . . . n leokd maam!” Ned sã n bao tõnd me noor wall a maan-d kɛgre, d segd n pʋʋsa a Zeova. Rẽ, a Zeova na n kõ-d-la a vʋʋsem sõngã, tɩ sõng-d tɩ d tõog d sũuri. Y getame tɩ yɛl kẽer pʋgẽ la y tog n maneg n bɩɩs sũ-tõog la sugr bɩ? Y kɩsa sɩd t’a Zeova nee y nimbãanegã, la t’a na n sõng-y lame, la a ning-y bark bɩ? w18.09 6-7 s. 16-17

D sã n wa moond koɛɛgã, d segd n wilgda wakat fãa tɩ d nanda koe-moonegã zĩigẽ nebã. Rẽ n so tɩ yaa tɩlɛ tɩ d bao n bãng b sẽn yaa to-to wã. D tẽegdẽ tɩ d sã n yi n moond zak-zaka, nebã pa mi d waoongã tiir ye. Woto wã, yɩta sõma tɩ zems wakat b sẽn tõe n sak nana-nana n sõs ne-do. (Mat. 7:12) Wala makre, sã n mik tɩ sibrã la hatã, yãmb moonegã zĩigẽ nebã pa wae n nekd pĩnda, y tõe n sɩnga koɛɛgã mooneg soayã noy, zãma wã zĩisẽ, wall y lebg n tɩ kaag neb y sẽn mi tɩ b na n sakame tɩ y sõse. Nebã tʋʋm waoogame. Rẽ n so tɩ d pa segd n sõs ne-b n kaoose, sẽn yɩɩd fãa sã n yaa pipi sõsgã. (1 Kor. 9:20-23) Nebã sã n neẽ tɩ d miime tɩ b sẽkã pa waooge, tõe tɩ b na n sakame tɩ d lebg n wa sõs ne-b nindaare. Tog n yɩɩ vẽeneg koe-moonegã sasa tɩ d bɩɩsda zʋg-sõma nins vʋʋsem sõngã sẽn sõngd ned t’a bɩɩsã. Woto la d na n sɩd yɩ “tʋmd-n-taas ne Wẽnnaam,” t’a tõe meng n tũnug ne tõnd n sõng ned t’a sak sɩdã.—1 Kor. 3:6, 7. w18.09 32 s. 15-17

Wãn to la sũ-maasem sõngd ned t’a paam sũ-noogo? Neb wʋsg ra yaa nin-toose, mo-be-neba, n nong zaba. La b sẽn wa n zãms Biiblã n bãng sɩdã, b toeemame, n yelg “yalẽ paalgã.” Masã, b tara ‘nimbãan-zoeer meng-menga, la sõmblem, la sik-m-menga, la sũ-bʋgsem, la sũ-mare.’ (Kol. 3:9-12) Woto kɩtame tɩ b tar sũur pʋgẽ bãane, tɩ zems-n-taar be bãmb ne b taabã sʋka, tɩ b lebg sũ-noog rãmba. Sẽn paase, Wẽnnaam Gomdã wilgame tɩ b na n wa “sooga tẽngã.” (Yɩɩn. 37:8-10, 29) A Zeezi sẽn yeel tɩ sũ-maasem dãmbã na n “sooga tẽngã” rat n yeelame tɩ bõe? Kiris-neb nins sẽn paam vʋʋsem sõng zaeebã sã n wa kẽng saasẽ, n tɩ lebg rĩm-dãmb la maan-kʋʋdba, n dɩt naam tẽngã zugu, wakat kãnga, b soo tẽngã. (Vẽn. 20:6) La kiris-neb milyõ-rãmbã yẽ sẽn pa na n kẽng saasẽ wã? Bãmb me sã n wa paam n lebg neb sẽn zems zãnga, n na n vɩɩmd tẽngã zug ne laafɩ la sũ-noog wakat sẽn kõn sa, d tõe n yeelame tɩ b soo tẽngã. w18.09 19 s. a 8-9

Kelgrã wɛɛngẽ, a Zeova n kõt mak-sõng sẽn ka to. (Sɩng. 18:32; Zoz. 10:14) D ges-y a sẽn da kelg a Moyiiz to-to, la y rɩk yam. Kibarã be Yikr 32:11-14. Baa ne a Zeova sẽn da pa baood t’a Moyiiz togs-a a tagsg tɩ sõng-a wã, a kõ-a-la weer t’a togs sẽn be a sũurẽ. Y sã n mi tɩ ned pa mi n tags tɩ bɩ, y na n sak n maaga y yĩng n kelg-a, la y tũ a saglg sɩda? A Zeova yaool n maanda sũ-mar n kelgd ned buud fãa sẽn pʋʋsd-a ne tẽebo. Bɩ d ned kam fãa sok a meng yaa: ‘A Zeova sã n sakd n sikd a meng n kelgd ninsaalba, wa a sẽn sik a meng n kelg a Abrahaam, a Rasɛlle, a Moyiizi, a Zozuwe, a Manoa, a Eli la a Ezekɩyaasã, rẽ yĩnga, ma-me pa segd n modg n waoogd m tẽed-n-taasã fãa, n sakd n kelgd b sẽn yetã, tɩ sã n zemsame bɩ m tũ meng sɩda? Rasmã noorã, m getame tɩ m zakã ned wall tigingã ned la m segd n maag m yĩng n kelg bɩ? Bõe la m na n maan rẽ wɛɛngẽ?’—Sɩng. 30:6; Bʋ. 13:9; 1 Rĩm. 17:22; 2 Kib. 30:20. w18.09 6 s. 14-15

Rũndã-rũndã, sẽn pak neb wʋsg yaa b mensã yell bala. Rẽ kɩtame tɩ tõe n yɩ toog tɩ d kell n yɩ kõatba. A Zeezi yaool n yeelame tɩ Wẽnnaam noor ning sẽn yaa kãseng n yɩɩdã yaa nong a Zeova ne d sũur fãa, ne d sɩɩgã fãa, ne d yamã fãa, la ne d pãngã fãa, la t’a yiib-n-soabã yaa nong d taabã wa d mense. (Mark 12:28-31) Neb nins sẽn nong a Zeova wã rɩkda a togs-n-taare. A Zeova ne a Zeezi fãa yaa kõatba, n sagend tõnd tɩ tõnd me yɩ kõatba, n paam sũ-noog hakɩɩka. D sã n modg n yaa kõatb d sẽn maand bũmb nins a Zeova tũudmã pʋgẽ wã, la d sẽn maand d taabã neer yĩngã pʋgẽ me, na n kɩtame t’a Zeova paam waoogre. La na n nafa tõnd mengã, la d taabã me. Yaa vẽeneg tɩ y zoe n maanda y sẽn tõe fãa n sõngd y taabã, sẽn yɩɩd fãa, y tẽed-n-taasã. (Gal. 6:10) Y sã n kell n wɩng ne rẽ, y taabã sũur na n yɩɩ noog ne-yã, tɩ b maneg n nong-yã, la yãmb me na n paama sũ-noogo. w18.08 22 s. 19-20

Pa ned yĩn-kõbgo, a buudu, wall a buud-gomdã la a Zeova get ye. Baa d sẽn yaa ned ning fãa, d sã n zoet Wẽnnaam la d maand sẽn yaa tɩrga, d tata a yam. (Gal. 3:26-28; Vẽn. 7:9, 10) Tõe tɩ y zoe n mii rẽ. La sã n mik tɩ y zakã rãmba, wall b sẽn wub yãmb zĩig ningã neb wae n sãbsda b taabã? Baa y sã n tagsdame tɩ y pa bakd neba, tõe tɩ y ket n sãbsda neb y sũurẽ wã n pa miẽ ye. A Pɩyɛɛr meng sẽn sõng a taabã tɩ b bãng tɩ Wẽnnaam pa bakd nebã wa n le sãbsa neba. (Gal. 2:11-14) Wãn to la d tõe n da le tik ninã sẽn ne wã n kaood d taabã bʋʋdo? D segd n maaga d yĩng n fees d meng ne Wẽnnaam Gomdã maasem, n ges d sã n pa sãbsd neb d sũurẽ wã. (Yɩɩn. 119:105) D tõeeme me n sok d zoa d sẽn kɩs sɩd ne, n ges a sã n tagsdame tɩ d sãbsda neba, bala wakat ninga d ka tõe n bãng d toor ye. (Gal. 2:11, 14) Tõeeme meng tɩ d minim n sãbsda d taabã, hal n pʋd n pa le ne tɩ yaa sãbsg ye. w18.08 9 s. a 5-6

Sok-y y meng yaa: ‘Nebã neeme tɩ m tũuda a Zeova ne m sũur fãa bɩ? M sã n paam segb n na maan tɩ b bãng tɩ m yaa a Zeova Kaset soaba, m zoeta yãnd bɩ?’ Tags-y n ges-y-yã! A Zeova n yãk yãmb tɩ y yaa a Kaset soaba. Y sã n zoet yãnd n pa rat tɩ nebã bãng tɩ y tũud-a lame, a sũur kõn sãam wʋsg sɩda? (Yɩɩn. 119:46; Mark 8:38) Bʋko, kiris-neb kẽer tʋʋm-tʋmdɩ la b manesem kɩtame tɩ b pa tolg n yaa toor ne neb nins sẽn pa tũud a Zeova wã ye. B basame tɩ dũniyã yamã kẽ-ba, tɩ b rɩkd a nebã togs-n-taare. (1 Kor. 2:12) Dũniyã yamã sã n yaool n kẽ neda, lebga a yĩngã ratem pidsg n pak-a. (Efɛ. 2:3) Woto kɩtame tɩ baa d sẽn paamd sagls ka tɛk futã la mengã manegr wɛɛngẽ wã, kiris-neb kẽer ket n nonga fut sẽn pa zemse, bɩ sẽn yaa hobragi, tɩ b sẽn manegd d mens to-to wã me yaa sẽn na n wilg b mense. Baa yaa tigsg la b rabda, b yelgda fut sẽn mobgd b yĩngã, la sẽn wilgd b yĩngã zĩis kẽer nebã sẽn pa segd n yã. B sẽn manegd b zugã to-to wã me pa ne sik-m-meng ye. (1 Tɩm. 2:9, 10) Kɩtame tɩ b sã n be neb sʋka, yɩl n bãng b sã n yaa ‘dũniyã zo-rãmb’ wall a Zeova Kaset rãmba, yaa toogo.—Zak 4:4. w18.07 24-25 s. 11-12

D fãa sẽn yaa a Ãdem yagensã, d sɩd yaa ba-biisi. (Tʋʋ. 17:26) La a Zeezi sẽn yeel t’a karen-biisã yaa ba-biisã pa rẽ yĩng bal ye. B fãa sak n deegame t’a Zeova yaa b Ba sẽn be saasẽ. (Mat. 12:50) Sẽn paase, b lebga Wẽnnaam zakã neba, n nong-a la b tẽed-a, tɩ rẽ kɩt tɩ b zemsd taab yam a yembre. Rẽ n so tɩ tʋm-tʋmdbã lɛta wã pʋgẽ bɩ b boond b tẽed-n-taasã tɩ b “ba-biisi.” (Rom. 1:13; 1 Pɩy. 2:17; 1 Zã 3:13) A Zeezi sẽn yeel a karen-biisã tɩ b yaa ba-biisã poore, a wilg-b lame me tɩ yaa tɩlɛ tɩ b yɩ sik-m-mens rãmba. (Mat. 23:11, 12) Wa d sẽn da zoe n togsã, tʋm-tʋmdbã ra mi n pa noor a ye, b sẽn da nand b mens tɩ loogã yĩnga. B wakatẽ wã me tɩ neb wʋsg ra nonga b mens buudã tɩ looge. Tõe tɩ rẽ me ra yaa b zu-loɛɛga. Sɩd me, zʋɩf-rãmbã wʋsg ra tagsdame tɩ b sẽn yaa a Abrahaam yagensã, b sãoo neb a taabã. La a Zãmbatiis yeel-b lame yaa: “Wẽnnaam tõe n dɩka kug-kãensã n kɩt tɩ b lebg a Abrahaam yagense.”—Luk 3:8. w18.06 9-10 s. a 8-9

Yell ning sã n sãamd d sũuri, wall yaa d to manesem n nong n sãamd tõnd sũuri, d gũusda ne d no-goamã bɩ? D modgd n tõogda d sũurã bɩ? (Yel. 10:19; Mat. 5:22) Ned sã n bao d noore, segdame tɩ d ‘bas tɩ sũ-yikrã maan a tʋʋmde,’ rat n yeel tɩ d gũ t’a Zeova wa wilg a sũ-yikri. (Rom. 12:17-21) Yellã pʋgẽ, d sã n kell n ges a Zeova, d na n basa sũ-yikri, n maag d yĩng n gũ t’a wa welg-a tɩ zems a wakate. Rẽ, d wilgdame tɩ d waoogd-a-la wa sẽn segdã. D sã n pa gũ, n bao n na n dok d sũur d toore, yaa a Zeova la d paoogda. Bũmb ning pʋgẽ, a Zeova sã n wa toeem d sẽn segd n maan to-to wã, d sakd n tũu ne d sũur fãa bɩ? D sã n sakd n tũudẽ, d pa na n dat n ket n maand wa d sẽn da minim n maandẽ wã ye. Tao-tao bala, d na n sak n tũu toeengã a Zeova sẽn wilg ne a siglgã maasmã. (Ebre. 13:17) La d na n gũusame me, “n da wa n maan tɩ yõsg bũmb ning sẽn gʋlsã ye.” (1 Kor. 4:6) D sã n tũud a Zeova sẽn wilg bũmb ninsã kɛpɩ, wilgdame tɩ yaa yẽ la d geta. w18.07 15-16 s. 17-18

D sã n modgd n bɩɩsd d tẽebã, d na n maneg n nee vẽeneg tɩ Biiblã saglsã sɩd sõngd-d-la wʋsgo. Bala, naoor wʋsgo, b sã n gãneg noore, wilgda d sẽn tog n maan yell takɩ pʋgẽ, tɩ saglg yaool n tõe n sõng-d tɩ d bãng d sẽn tog n maaneg yɛl ka tɛk pʋgẽ. Wala makre, bi-kɩdg sẽn nan pa mi tũud-n-ta-wẽns sẽn tõe n wa ne yɛl ninsã yĩnga, yaa tɩlɛ t’a roagdbã gãneg noy takɩ, a koglg yĩnga. (1 Kor. 15:33) La a sã n bɩtẽ, yẽ mengã wat n tõe n bʋgsa Biiblã saglsã zug tɩ sõng-a t’a bãng n yãk tũud-n-ta-sõma. (1 Kor. 13:11; 14:20) D sã n wɩngd ne Biiblã saglsã zug bʋgsgo, d sũur-kasetã me na n lebgda sõma n paasdẽ, tɩ d tõe n teeg-a. Rẽ, bũmb fãa pʋgẽ, Wẽnnaam daabã na n yɩɩ vẽeneg d yamẽ. D tara bũmb nins fãa sẽn tõe n sõng-d tɩ d yam-yãkr fãa pʋgẽ bɩ d bãng n yãk sẽn tat a Zeova raab bɩ? N-ye! D sã n bas tɩ Biiblã noyã la a saglsã sõngd tõnd wakat fãa, d na n yɩɩ neb sẽn “paam manegr la seglg tɩ maan tʋʋm-sõamy buud fãa.”—2 Tɩm. 3:16, 17. w18.06 19 s. 14; 20 s. 16-17

A Zeezi kibarã wilga zʋɩf-rãmbã tɩ Samari ned tõe n sõng-b lame tɩ b bãng nong f to sẽn dat n yɛɛlgã. (Luk 10:25-37) A Zeezi karen-biisã sã n dat n tʋm tʋʋmd ning a sẽn kõ-bã sõma, yaa tɩlɛ tɩ b bas zẽk-m-meng la sãbs-taaba. Nand t’a loog saasẽ, a yeel-b lame tɩ b kẽng n moon koe-noogã “Ziide soolmã fãa, la Samaari, hal tɩ ta dũniyã tɛk fãa.” (Tʋʋ. 1:8) Sẽn na yɩl n sõng a karen-biisã tɩ b moon koɛɛgã n da bak neba, a Zeezi pẽga bu-zẽms neb naoor wʋsg a karen-biisã taoore. Wala makre, a pẽga sodaas koabg naab sẽn yaa bu-zẽnga, n yeel t’a tẽebã yaa kãsenga. (Mat. 8:5-10) Daar a ye, a Zeezi sẽn wa n be Nazarɛte, a goma a Zeova sẽn sõng bu-zẽms neb yelle, wala makre, Fenisi pʋg-kõorã sẽn da be Sarepta wã, la Siiri rao a Naama sẽn da yaa wãoorã. (Luk 4:25-27) A Zeezi taasa Samari pag a ye koɛɛgã. La a pʋd n maan rasem a yiib Samari tẽng a ye pʋgẽ, n na n sõng sẽn sak-b n kelgã.—Zã 4:21-24, 40. w18.06 10 s. 10-11

Tʋm-tʋmd a Poll wilgame tɩ kiris-ned vɩɩm yaa wa sodaag vɩɩm. Sɩd me, tõnd tara bɛɛb sẽn zabd ne-do. La pa ninsaalb ye. Yaa a Sʋɩtãan ne zĩn-dãmbã. B yaa zab-zabdb na maan yʋʋm tusa, n tar minim hal sõma. Dẽnd tõe n wõnda d pa na n tõog zabrã ye. Sẽn yɩɩd fãa, d sã n yaa bi-bɩɩga. La rẽ yĩnga, kom-bɩɩsã tõe n zaba ne bɛ-kãensa n tõog bɩ? N-ye, b tõeeme. La b zoe n tõogdame menga! Bõe yĩnga? Bala, b paamda “raood Zu-soabã tũudum pʋgẽ.” La pa b sẽn paamd tɩ Wẽnnaam kõt-b pãngã bal ye. Wa sodaas sẽn paam zãmsg sõma, b ‘boba zab-teed nins fãa Wẽnnaam’ sẽn kõ wã. (Efɛ. 6:10-12) A Poll sẽn wa n gomdã, tõe t’a ra tagsda zab-teed nins Rom sodaasã sẽn wae n bobdẽ wã.—Tʋʋ. 28:16. w18.05 27 s. a 1-2

Bũmb ning sẽn kɩt tɩ d moond koɛɛgã n tɩ yɩɩd yaa tɩ ne rẽ maasem, d pẽgda a Zeova la d kɩtdẽ t’a yʋʋrã paamd waoogre. (Zã 15:1, 8.) Wẽnnaam yʋʋrã zoe n yaa sõng zãnga. D pa tõe t’a yɩ sõng n yɩɩg rẽ ye. La ad no-rɛɛs a Ezayi sẽn yeele: ‘Saasẽ-Pãng-Soabã bal la yãmb tog n ges tɩ b yaa pʋ-peelem soaba[ bɩ ‘sõngo,’ MN]’ (Eza. 8:13) D sã n get Wẽnnaam yʋʋrã wa yʋʋr sẽn welg n yaa toor ne yʋy a taabã fãa, la d sõng d taabã tɩ b bãng tɩ yaa yʋʋr sẽn yaa sõngo, d kɩtdame tɩ Wẽnnaam yʋʋrã paamd waoogre. Wala makre, d sã n moond koɛɛgã n wilgd nebã a Zeova sẽn yaa Wẽnnaam ning buudã, la t’a ket n datame tɩ ninsaalbã vɩɩmd arzãn pʋgẽ wakat sẽn kõn sa, d sõngd-b lame tɩ b bãng t’a Sʋɩtãan rõda a Zeova, n sãam a yʋʋrã zaalem. (Sɩng. 3:1-5) D sã n sõng nebã tɩ b bãng me t’a Zeova n “zems tɩ reeg ziiri, la waoogre, la pãnga,” kɩtdame t’a yʋʋrã paamd waoogre.—Rev. 4:11. w18.05 18 s. a 3-4

D sã n yãk d sẽn dat n maan a Zeova tũudmã pʋgẽ, sẽn yɩɩd fãa, wilgdame tɩ d sũur nooma a sẽn nong tõndã, la tɩ d pʋʋsda bark a sẽn maan bũmb nins fãa n kõ-dã yĩnga. Kom-bɩɩse, tags-y bũmb nins fãa a Zeova sẽn kõ yãmbã yelle. Yẽ n kõ-y vɩɩmã, n kõ-y Biiblã, n sõng-y tɩ y bãng-a la y tẽed-a, n kõ-y tẽed-n-taase, la a sõng-y tɩ y saagd tɩ y na n vɩɩmda arzãnã pʋgẽ wakat sẽn kõn sa. Y sã n yãk bũmb n dat n wa maan a Zeova tũudmã pʋgẽ, wilgdame tɩ y sũur nooma a sẽn kõ-y woto fãa wã. Rẽ me yaa bũmb sẽn na n paas yãmb ne yẽ zoodã. Y sã n wa modgd n na n pids y sẽn dat n maanã, y na n wɩngda ne tʋʋm-sõma, tɩ rẽ paasd yãmb ne a Zeova zoodã. Tʋm-tʋmd a Poll yeelame tɩ y bas y yam tɩ “Wẽnnaam ka ka-tɩrlem soaba, n na n yĩm yãmb tʋʋm sõamyã, wall nonglem ning yãmb sẽn wilg Wẽnnaam yʋʋrã yĩngã” ye. (Ebre. 6:10) Ra tags-y tɩ y ket n paooda ne y na yãk y sẽn dat n wa maanã ye. Yãmb tõe n yãka y sẽn dat n wa maanã, la y sɩng bũmb kẽer sẽn na n sõng-y tɩ y pids y magbã.—Fil. 1:10, 11. w18.04 26 s. a 5-6

Pipi kiris-nebã wakat tɩ Rom soolmã ra yaa pãn-soaada. Soolmã neb ra pẽgda b mense, n yetẽ tɩ bãmb tẽngã sẽn sigl yɛlã to-to laloa wã la bʋ-kaoorã wɛɛngẽ wã ka to, la tɩ nebã sẽn tar lohorem ningã ka mak-n-taar ye. La soolmã pãngã la a ziirã ra pa tẽng-n-biisã sabab yĩng ye. Tʋʋmã fãa la bal ra yaa yembs n tʋmde. Wakat n zĩnd meng tɩ neb a tãab zugu, nin-yendã yaa yamba. Dẽnd yaa vẽeneg tɩ nebã ra wae n gomda yembd yelle, la lohorem yelle, baa kiris-nebã. Tʋm-tʋmd a Poll lɛta wã pʋgẽ, a goma lohorem yell naoor wʋsgo. La ra pa sẽn na n sõng n welg dũniyã zu-loeesã ye. Yaa sɩd tɩ neb wʋsg ra maooda b sẽn tõe tɛk n dat n toeem nin-buiidã yɛlã. La sẽn da pak a Poll ne a tẽed-n-taasã yaa b mao tɩ nebã wʋm Wẽnnaam Rĩungã koe-noogã, la b bãng t’a Zeezi Kirist sẽn ki tɩ yɩ maoongã yaa bũmb yõod sẽn ka to. A Poll wilga a tẽed-n-taasã b sẽn tõe n paam lohorem hakɩɩkã a soab ning nengẽ. w18.04 8 s. a 1-2

A Zeezi kũumã ket tɩ beoog la a togs Pɩyɛɛr rũndã daar vɛrse wã goamã. A Pɩyɛɛr wa n sɩd yɩɩ wa ra-luk pipi kiris-nebã tigingã pʋgẽ. (Gal. 2: 9) Wala makre, a sẽn maan bũmb ning Pãntekotã daarã, la baa rẽ poorã kenga a tẽed-n-taasã raood wʋsgo. A kell n tũu a Zeova yʋʋm wʋsgo. A wa n gʋlsa a tẽed-n-taas n yeel-b yaa: ‘Mam gʋlsda seb-bi-kãngã n na n tʋm yãmba, la m sagl-yã, la m wilg-y tɩ yãmb sẽn be bark ning pʋgã n ya Wẽnnaam bark meng-menga.’ (1 Pɩy. 5:12) Lɛta nins a sẽn gʋls n tool kiris-nebã kenga b raood hal sõma. La ket n kengda tõnd raood baa rũndã-rũndã, sẽn yɩɩd fãa, d sẽn gũud Wẽnnaam pʋlemsã pidsgã.—2 Pɩy. 3:13. w18.04 17 s. 12-13

Neb kẽer sẽn dat yaa b bas tɩ ned fãa tõe n togs a sẽn tagsde, n yãk a toorẽ yam, la a vɩɩmd wa a sẽn date. Zĩig fãa, nebã baooda lohorem. Sẽn na yɩl n paam lohorem n maand b yam, neb kẽer mi n sũu taab n wilg b sũ-pa-noaanga, tɩ sãnda zabd n dat tɩ b toeem pãn-soaadbã. La woto pa sõngd-b tɩ b paam b sẽn datã ye. Naoor wʋsgo, pʋd n baasda ne yel-beedo, la neb kẽer kũum menga. Hakɩɩka, bũmb ning rĩm a Salomo sẽn yeelã sɩd yaa sɩda. A yeelame tɩ “ninsaal tõe a to n maand-a wẽnga.” (Koɛ. 8:9) Rũndã daar vɛrse wã pʋgẽ, a Zak wilgda d sẽn tog n maan n paam sũ-noog hakɩɩk la vɩɩm sẽn tar barka. Tõog sẽn zems zãngã yaa a Zeova n kõ ninsaalbã. Yẽ n mi bũmb nins sẽn yaa tɩlɛ ne ãdem-biisã, sẽn na yɩl tɩ b paam sũ-noog hakɩɩk la vɩɩm sẽn tar barka. A naana d yaab a Ãdem ne a Awa n kõ-b lohorem meng-menga, la bũmb nins fãa sẽn da na n kɩt tɩ b vɩɩmd ne sũ-noogã. w18.04 3 s. a 1-3