Tʋʋl-nifu

A Aristark ra yaa kiris-ned sẽn yit Masedoan sẽn yaa Tesalonik tẽngã. A yɩɩ tʋm-tʋmd a Poll zoa hakɩɩka. Yɩɩ a Poll sẽn wa n kaagd Efɛɛz tigingã, a so-taok a tãab-n-soabã sasa wã la b gom a Aristark yell Biiblã pʋgẽ. A wa n yãagda a Polle, tɩ neb sũ taab n wa yõk-a. (Tʋʋ. 19:29) B sẽn wa n bas-a wã, a pa bao a meng ye. A kell n paa ne a Polle. Kiis a wãn poore, a Aristark ra ket n bee ne a Poll Gɛrɛse, baa ne bɛɛbã sẽn da baood a Poll n na n kʋ wã. (Tʋʋ. 20:2-4) Yʋʋmd 58 wã sẽnese, b sẽn wa n tall a Poll n dabd Rom n na n tɩ kẽes bãens roogã, a Aristark yãag-a-la baa ne sorã sẽn yaa wokã, hal tɩ b batayo wã tek n bõr menga. (Tʋʋ. 27:1, 2, 41) B sẽn wa n ta Rommã, wõnda a zĩnda bãensã roogẽ bilf ne a Polle. (Kol. 4:10) Dẽnd d tõe n yeelame t’a Poll sɩd paamame t’a zoa hakɩɩk sẽn kell n maan sɩd ne-a keng a raood la a bels-a. Wa a Aristarke, tõnd me sã n be ne d tẽed-n-taasã noog wakat la baa “yel-pakr wakate,” wilgdame tɩ d yaa b zo-rãmb hakɩɩka. w20.01 9 s. a 4-5

A Zeova tõe n zaee kiris-ned ne a vʋʋsem sõngã, t’a soab tagsdẽ t’a pa segd ne bark-kãngã ye. La a pa maand sãmbs baa bilf t’a Zeova yãk-a lame ye. A sã n tagsd keoor ning a sẽn na n wa paamã yelle, a sũur nooma wʋsg t’a pẽgda. (1 Pɩyɛɛr 1:3, 4) La woto rat n yeelame tɩ ned sã n paam vʋʋsem sõngã zaeebo, a raab yaa a ki tao-tao bɩ? Tʋm-tʋmd a Poll leoka sokrã. A maka b yĩngã ne fu-roogo, n yeel yaa: “Sɩd-sɩda, tõnd sẽn be fu-ro-kãngã pʋgẽ wã, d wõosdame hal tɩ d sũy sãamd wʋsgo. Pa d sẽn dat n yeeg ro-kãnga wã yĩng ye. D rat n yeelga a to wã, tɩ vɩɩmã vel bõn-kiidgã.” (2 Kor. 5:4) A soabã yam pa yi tẽngã zug vɩɩmã, t’a yãgd n na n ki ye. A pʋd n nonga vɩɩmã, n dat tɩ daar ne a to fãa bɩ a naagd a zakã rãmb la a zo-rãmb n maand a Zeova raabã. La baasgo, sẽn yaa bũmb ning fãa la a maanda, a tẽegda keoor ning a sẽn gũudã yelle.—1 Kor. 15:53; 2 Pɩy. 1:4; 1 Zã 3:2. w20.01 23 s. 12-13

Rẽ n so tɩ wakat ninga, zãmsgã d sẽn paamd d Ba sẽn nong-dã nengẽ wã mi n naag ne kiblgu. A Zeova tũnugda ne bũmb toor-toor n kibind tõndo. Wala makre, tõe n yɩɩ bũmb d sẽn karem Biiblã pʋgẽ, wall d sẽn wʋm tigissã sasa. Wakat ninga, a Zeova tõe n tũnuga ne kãsem-dãmbã me. A Zeova kiblg sẽn wa n yaa to-to fãa, yaa nonglem yĩnga. (Zer. 30:11) A Zeova teenda tõnd zu-loees sasa. Ba sẽn nong a biig sõngd-a-lame la a teend-a zu-loɛɛg sasa. Woto me, d sã n wa tar zu-loeese, d saasẽ Ba wã teenda tõndo. Ne a vʋʋsem sõngã maasem, a kogenda tõnd sẽn na yɩl tɩ bũmb ra sãam d tẽebã ye. (Luk 11:13) Bũmb sã n wa rat n koms d raoodo, a sõngd-d lame. Wala makre, a wilg-d lame tɩ manegr n wate. Woto sõngda tõnd tɩ d tõogd toogo. Baa sẽn wa n yaa yell ning fãa n namsd tõndo, d tẽegdame tɩ d Ba sẽn nong-dã na n wa kɩtame tɩ namsg buud fãa sa. Sẽn yaa yell ning fãa la d tara, na n talla tɛka. La bark nins d sẽn paamd a Zeova nengẽ wã paada wakat sẽn kõn sa.—2 Kor. 4:16-18. w20.02 5-6 s. 14-15

Yɩl n tõog tɩ sũ-kiir da zĩnd d sʋk pa nana ye. La d tõeeme! D le gom a Zozɛf ba-biisã yelle. B sẽn kisg a Zozɛf hal n wa koos-a yembdã, yʋʋm wʋsg poore, bãmb ne a Zozɛf sega taab Ezɩpt tẽngẽ wã. Nand t’a vẽneg a meng ne-ba, a baoome n na n ges b sã n sɩd toeemame. A zĩndg-b lame n kõ-b rɩɩbo, la a paasa b yao-zʋʋg a Bẽnzame pʋɩɩrã n yɩɩg a ba-biisã fãa rẽndã. (Sɩng. 43:33, 34) Biiblã pa wilg tɩ rẽ kɩtame tɩ b maan sũ-kiir ne a Bẽnzame ye. B pʋd n wilgame tɩ b yao-zʋʋgã ne b ba a Zakoob yell sɩd pak-b lame. (Sɩng. 44:30-34) A Zozɛf ba-biisã sẽn bas sũ-kiirã, kɩtame tɩ b tõog n sõng tɩ laafɩ le zĩnd b zakã pʋgẽ. (Sɩng. 45:4, 15) Woto me, d sã n mao n yiis sũ-kiir buudã fãa d sũurẽ, d na n naag n sõngame tɩ laafɩ zĩnd d zakã pʋgẽ, la tigingã pʋgẽ. A Zeova ratame tɩ d gũus ne sũ-kiiri, n tõog n bao laafɩ. La d sã n bɩɩsd sik-m-menga, la d maand sũ-noog ne d sẽn zoe n tarẽ wã, la d nand d taabã, d pa na n yɩ sũ-ki-neb ye. w20.02 19 s. 17-18

Bũmb y sẽn tõe n maan n wilg a Zeova t’a sẽn nong yãmbã yãmb me nong-a lame, yaa y sẽn na n gomd ne-a ne pʋʋsgã maasem. Y sã n togsd Wẽnnaam y yɛlã, la y pʋʋsd-a bark bũmb nins fãa a sẽn maan n kõ-yã yĩnga, y na n maneg n nong-a lame. Y sã n ne a sẽn leokd y pʋʋsgã to-to wã me, yãmb ne yẽ zoodã pãng paasdame. Na n kɩtame tɩ y kɩs sɩd t’a wʋmda yãmb yɛlã võore. La y sã n dat tɩ y zoodã tall pãng sõmã, yaa tɩlɛ tɩ y bãng a sẽn nong bũmb kẽerã võore, a sẽn kis yɛl kẽer me wã võore, la y bao n wʋm bũmb nins a sẽn maandã võore. Segdame me tɩ y bãng a sẽn dat tɩ y maanã. Yaa Biiblã zãmsg n tõe n kɩt tɩ y bãng woto fãa. Woto wã, mao-y n nand-y Biiblã. Yaa Biiblã bal n wilgd sɩdã a Zeova mengã zugu, la a raabã ne ãdem-biisã. Bõe n na n wilg tɩ y nanda Biiblã? Yaa y sẽn na n karemd-a daar fãa, n segend y Biiblã zãmsgã, la y tũud y sẽn zãmsdã. (Yɩɩn. 119:97, 99; Zã 17:17) Daar fãa yãmb tara wakat n karemd Biiblã bɩ? Yãmb maanda y sẽn tõe fãa tɩ ka vaandẽ bɩ? w20.03 5 s. a 8-9

Kẽnã sã n yaa toog ne-yã, y tõe n tɩ zĩnda zĩig nebã sẽn pɩʋʋgd wʋsg-wʋsgo, n paam n taas so-loaadbã koɛɛgã. Y tõeeme me n tũnugd ne segb buud fãa n taasd koɛɛgã, wall d gʋlsd lɛta, pa rẽ bɩ d moond ne telefõnnã maasem. D tẽed-n-taas sẽn kʋʋl bɩ sẽn bẽed bã-kɛgems maanda woto, n paamd n moond koɛɛgã, hal tɩ kõt-b sũ-noogo. Baa y sã n bẽedame, n pa le tõe n maan wa pĩndã, y tõe n tʋma Wẽnnaam tʋʋmdã sõma. D le gom tʋm-tʋmd a Poll yelle. A yeelame yaa: “Bũmb fãa pʋgẽ, mam tara pãnga, sẽn kõt-a maam pãngã maasem yĩnga.” (Fili. 4:13) Sɩd me, a Poll sẽn wa n gilgd tẽnsã n moond koɛɛgã, a wa n lʋɩ bãaga, tɩ yɩ tɩlɛ t’a paam tɩ Wẽnnaam kõ-a pãnga. Ad a sẽn yeel Galat kiris-nebã: “Yãmb miime tɩ mam sẽn na n paam weer n moon yãmb koe-noogã pipi wã, tũu ne bãag sababo.” (Gal. 4:13) Woto me, baa bãag sã n kɩt tɩ y pa le tõe n maan wa pĩndã, tõe n tũu ne bãagã sabab tɩ y paam segb n taas neb koɛɛgã. Wala makre, logtoɛɛmbã la sẽn sõngd-b n get bãad-rãmbã yellã. Sasa ning koe-moondbã sẽn moond zak-zakã, b wʋsgã bee b tʋʋmã zĩigẽ. w19.04 4-5 s. 10-11

Yʋʋmd 2018 wã, yaa sẽn yɩɩd a Zeova Kaset rãmb tus 223 n da be tẽns b sẽn gɩdg d tũudmã, wall tẽns d sẽn pa tar sor n tʋmd d tũudmã tʋʋm kẽere. La pa lingd tõnd ye. Wa d sẽn yeel sõsg ning sẽn loogã pʋgẽ wã, kiris-neb hakɩɩkã miime tɩ b na n paama namsg b tũudmã yĩnga. Sẽn yaa zĩig ning fãa la d be, tẽngã taoor dãmb tõe n wa tiig n yiisa noor n gɩdg d tũudmã, n yeel tɩ d pa segd n le tũ a Zeova ye. D tẽngã goosneemã sã n wa gɩdg d tũudmã, d tõe n wa tagsdame tɩ yaa Wẽnnaam sũur n pa le noom ne-do. La d tẽeg tɩ b sã n wa namsd tõnd d tũudmã yĩnga, pa rat n yeel t’a Zeova sũurã sãama ne-d ye. Tʋm-tʋmd a Poll kibarã wilgda rẽ. Sãmbg kae tɩ Wẽnnaam sũur da nooma ne-a. A paamame tɩ Wẽnnaam kɩt t’a gʋls Biiblã sɛb 14. A leb n yɩɩ tʋm-tʋmd b sẽn tʋm bu-zẽmsã nengẽ. Baasgo, a paama namsg wʋsgo. (2 Kor. 11:23-27.) A Poll kibarã wilgdame t’a Zeova mi n basame tɩ b nams neb sẽn tũud yẽ. w19.07 8 s. a 1, 3

Bũmb a ye a Zeova sẽn maand n wilgd tõnd sẽn yaa a nin-buiidã tɩ d yell pak-a lame, hal tɩ kengd d raoodo, yaa a sẽn sõngd tõnd tɩ d tõogd n zabd ne d bɛɛbã. A Sʋɩtãan ne zĩn-dãmbã la tõnd bɛɛb meng-mengã. A Zeova keoogda tõnd tɩ d gũus ne-ba, la a kõt-d zab-teed sẽn na yɩl tɩ d tõog n zab ne-ba. (Efɛɛz rãmb 6:10-13) D sã n sak a Zeova sõngrã, la d teeg-a zãng-zãnga, d na n tõog n zaba ne Sʋɩtãanã. Tõnd me tõe n basa d yam wa a Polle. Ad a sẽn yeele: “Wẽnnaam sã n be ne tõndo, ãnda n tõe n zab ne tõnd n tõoge?” (Rom. 8:31) D sẽn yaa kiris-neb hakɩɩkã, d pa rat n bas t’a Sʋɩtãan ne zĩn-dãmbã yel-maandɩ wã yell pak-d ye. Sẽn pak tõnd n yɩɩdã yaa d mao wakat fãa n bao n bãng a Zeova n paase, la d tũ-a. (Yɩɩn. 25:5) La d segd n bãnga bũmb kẽer a Sʋɩtãan sẽn maande. Bõe yĩnga? Sẽn na yɩl t’a ra wa tõog-d ye.—2 Kor. 2:11; notã. w19.04 20 s. a 1-2

Y sã n wa baood n sõng ned sũur sẽn sãam wʋsgo, y kelgd-a-la neer bɩ? Bãng ned kelgrã pa rat n yeel bal tɩ ned sã n gomd ne-f bɩ f get a soabã, n sĩnd sɩɩ hal t’a wa gom n sa. D tõe n wilgame tɩ d kʋmda a nimbãanega. Sasa ninga, goam a wãn bal sẽn kengd raood seka na wilg rẽ. Y tõe n yeelame yaa: “Yel-kãngã sẽn paam foo wã sãamda m sũur wʋsgo! Pa segd tɩ b maan biig woto ye!” Y tõe n sok-a-la sogsgo, n bãng y sã n sɩd wʋma a goamã võor sõma. Y tõe n sok-a lame yaa: “Fo tõe n maneg n bilga f sẽn yetã tɩ m wʋm a võor sõma bɩ?” Pa rẽ bɩ y sok-a yaa: “Fo gomdã rat n yeelame tɩ . . . Yaa woto bɩ?” Rẽ, a bãngdame tɩ y kelgd-a-la neere, n dat ne y sũur fãa n bãng yellã sẽn namsd-a to-to. (1 Kor. 13:4, 7) La gũus-y-yã, n da wa yĩm tɩ y segd n ‘maaga ne goam ye.’ Ra kʋʋg-y-yã a soabã goam, n na n wilg y sẽn tagsd t’a tog n maaname, wall n na n dems a tagsg ye. Tall-y sũ-mare! D ra baood n na n wilg b yellã tɩɩm ye. D sẽn dat yaa d wilg tɩ d kʋmda b nimbãanega.—1 Pɩy. 3:8. w19.05 17-18 s. 15-17

Zakã pʋgẽ, rao segd n nonga a pag “wa Kiristã me sẽn nong tigingã.” (Efɛ. 5:28, 29) A segd n wilgda nonglem sẽn pa baood a meng nafre, wa Kiristã. Wãn to? A segd n lʋɩɩsda a pagã raabã taoore, n baood a neer n yɩɩd sẽn noom yẽ mengã. Pʋg-sɩdb kẽer tõe n getame tɩ woto maaneg yaa toog ne bãmba. Tõe tɩ b sẽn wub-b zĩig ningã, nebã ra pa get tɩ wilg f to nonglem la f ra maan-a kɛgrã yaa bũmb sẽn tar yõod wʋsg ye. Tõe n yɩɩ toog ne-b tɩ b bas b minim-wẽnsã. La yaa tɩlɛ tɩ b mao n toeem sẽn na yɩl n tũ Kiristã tõogã. Rao sã n wilgd nonglem sẽn pa baood a meng nafre, a paamdame t’a pagã waoogd-a. Rao sã n sɩd nong a kamba, a pa na n tol n yeel bɩ n maan bũmb sẽn paoogd-b ye. (Efɛ. 4:31) A na n pʋd n wilgda a kambã t’a nong-b lame la t’a sũur nooma ne-ba, tɩ sõngdẽ tɩ b yam gãe bãane. Woto kɩtdame tɩ kambã nong-a la b kɩs-a sɩda. w19.05 6 s. 21

A Maari tagsame t’a Gabriyɛll gomdã rat n yeelame tɩ bõe? Rẽ yĩnga, a tagsame tɩ rat n yeelame t’a Zeezi na n deega rĩm a Erood zĩiga, wall yaa ned sẽn na n wa ledg a Erood la a na n siki, n deeg naamã, n soog Israyɛll nebã bɩ? A Zeezi sã n lebg naaba, a Maari me paamda naam. Bala, yẽ la rĩmã ma. Sẽn paase, b zakã rãmb na n tɩ zĩnda na-yirã. La b pa wilg zĩig baa a ye t’a Maari goma bũmb a woto yell ne a Gabriyɛll ye. A Maari ra yaa sik-m-meng soab meng-menga! D tẽeg tɩ d sã n zãmsd Biiblã la bũmb nins siglgã sẽn yiisdã, d sẽn dat n yɩɩd yaa rẽ na paas tõnd ne a Zeova zoodã. D ratame me tɩ Biiblã zãmsgã sõng-d tɩ d fees d menga, n bãng d “sẽn yaa to-to wã” sõma, la d zʋg nins d sẽn segd n teke, n paam n ta Wẽnnaam yam. (Zak 1:22-25; 4:8.) Rẽ wã, d sã n dat n sɩng Biiblã zãmsg fãa, d segd n pʋʋsa a Zeova n kos a vʋʋsem sõngã sõngre. Segdame tɩ d bõos-a t’a sõng-do, tɩ d rɩ zãmsgã yõod sõma la d tõog n bãng d manesem nins d sẽn segd n basã. w19.05 31 s. 18-19

Wakat ninga, zu-loeesã yaa ka tɛk n yek taaba, tɩ yaa yɩɩr wʋsgo. Ad neb a wãn kibar sẽn wilgd rẽ. D tẽed-n-taag a ye yʋʋr sẽn boond t’a Zã ra bẽeda bã-toaag b sẽn boond tɩ ɛskelerooz hal tɩ pa nana ye. La sẽn maneg n sãam a sũurã, yaa a pagã sẽn wa n loog n bas-a wã. B zĩnda ne taab yʋʋm 19. Rẽ poore, yaa a kom-pugli a yiibã n bas a Zeova tũubu. A Boob ne a Linda yaa rao ne a paga. Bãmb zu-loeesã yɩɩ toor ne a Zã nengẽ wã. B yiibã fãa tʋʋm tiig n sãamame, tɩ yɩ tɩlɛ tɩ b yi n bas b roogã. Rẽ sẽn yãk a toogo, logtor n bãng t’a Linda bẽeda sũur bãaga. Logtorã yeelame meng tɩ tõe n tũu ne a yõore. Bãag a to me n da sɩng a yĩngã komsgo, hal t’a yĩngã pa le tõe n zab ne bãag ye. D tõe n kɩsa sɩd tɩ yell sã n wa namsd tõndo, a Zeova sẽn yaa d Naand la d Ba sẽn nong-dã mii d toogã sẽn ta zĩig ningã. A ratame n sõng-d tɩ d mao ne yellã. (Fili. 4:6, 7) Pĩnd wẽn-sakdb wʋsg kibay n be Biiblã pʋgẽ, n wilgd zu-loees b sẽn paam hal tɩ ra yaa yɩɩr wʋsg ne-ba. Yaa kibay sẽn wilgd a Zeova sẽn kell n sõng-b to-to me tɩ b mao. Bɩ d lebg n tẽeg kibay a wãna. w19.06 14 s. a 2-3

Ned pag wall a sɩd sã n loog n bas-a, baa yaa bõn-kɩds la d maand n sõngd-a, a manegd n basa a yam tɩ d sɩd nong-a lame. A sẽn yaa a ye masã wã, a sẽn dat yaa zo-sõma sẽn na n sõng-a. Wãn to la y tõe n wilg-a tɩ y yaa a zoa? Y tõe n bool-a-la y zakẽ, tɩ y naag taab n dɩ. Y tõe n baoo weer tɩ y naag taab n kok pemsem wall y moon koɛɛgã. Y tõeeme me n mi n bool-a t’a wa naag n maan y zak pʋgẽ Biibl zãmsgã. Y sã n maand woto, y na n nooga a Zeova sũuri, bala a “pẽe sũ-sãang rãmbã,” la a leb n yaa “pʋg-kõap sõangda.” (Yɩɩn. 34:19; 68:6) Ka la bilfu, Wẽnnaam Rĩungã sã n wa so tẽngã, d na n “yĩma yel-pakr” buud fãa. D yãgdame tɩ wakat kãng ta, bala d “kõn tol n leb n tẽeg sẽn zĩnd pĩndã” yelle, d “kõn leb n tags a yell” me. (Eza. 65:16, 17) La nananda, bɩ d sõngd taaba, la d wilgd ne d no-goamã la d tʋʋm-tʋmdɩ wã tɩ d nonga d tẽed-n-taasã fãa.—1 Pɩy. 3:8. w19.06 25 s. 18-19

Hal sẽn kaoose, Gũusg Gasgã pʋgẽ b yeelame yaa: “Ned sẽn mi Wẽnnaam sõma sã n wa paam namsg a tũudmã yĩnga, a manegd n teega Wẽnnaam.” Hakɩɩka, yaa sɩda! B sã n wa namsd tõnd d tũudmã yĩnga, yɩl n tõog toogo, yaa tɩlɛ tɩ d nong a Zeova, n teeg-a zãng-zãnga. (Mat. 22:36-38; Zak 5:11) Karemd-y Biiblã daar fãa, n maoodẽ tɩ rẽ paasd yãmb ne a Zeova zoodã. (Zak 4:8) Karengã sasa bɩ y gũusd n get a Zeova zʋgdã sẽn yaa sõma zãngã, n bʋgs rẽ zugu. Tags-y-yã a Zeova sẽn yeel bũmb ninsã, la a sẽn maan bũmb ninsã, n ges rẽ sẽn wilgd to-to t’a nonga yãmba. (Yik. 34:6) Tõe n yɩɩ toog ne nina t’a tẽ tɩ Wẽnnaam nong-a lame, bala a zɩ n paam tɩ nebã wilg-a nonglem ye. Sã n yaa woto yãmb nengẽ, yɩta sõma tɩ daar fãa bɩ y bao sebr n gʋls bũmb toor-toor a Zeova sẽn maane, tɩ wilgd a nimbãan-zoeerã la a nonglmã ne yãmba. (Yɩɩn. 78:38, 39; Rom. 8:32) Y sã n tagsd bũmb nins sẽn maan yãmb mengã vɩɩmã pʋgẽ wã, la y sẽn karemd Biiblã pʋgẽ wã yelle, y na n tõog n sõdga bũmb ka tɛk a Zeova sẽn maan n sõng yãmba. Y sũur sã n maneg n noom ne a Zeova sẽn maandã, y na n nong-a lame n yɩɩd pĩndã, tɩ yãmb ne yẽ zoodã tar paasgo.—Yɩɩn. 116:1, 2. w19.07 2-3 s. a 4-5

A Zeova pa kõ tõnd sor tɩ d reeg d taabã zĩig n yãk b sẽn tog n maaneg ye. Ned sã n lugund noy sẽn pa tɩlɛ, a pa kogend a tẽed-n-taasã ye. A baood n na n sooga b tẽebã. A Sʋɩtãan pa na n tol n bas a Zeova Kaset rãmbã namsg ye. (1 Pɩy. 5:8; Vẽn. 2:10) Wakat fãa, yẽ ne a poorẽ dãmbã maanda b sẽn tõe fãa n na n gɩdg d tũudmã. La d pa tar bʋʋm n na n bas tɩ rabeemã tõog-d ye. (Tõo. 7:21) A Zeova bee ne tõndo. A na n ket n sõngda tõndo, baa b sã n wa gɩdg d tũudmã. (2 Kib. 32:7, 8) D fãa kell n gãd yam ning pipi kiris-nebã sẽn da yãkã. B ra yeela b wakatẽ nanambsã yaa: “Bɩ yãmb mens tags n ges sã n yaa tɩrg Wẽnnaam nifẽ tɩ tõnd kelg yãmb n bas Wẽnnaam. La sã n yaa ne tõndo, tõnd pa tõe n bas n pa gom bũmb nins tõnd sẽn yã la d wʋmã yell ye.”—Tʋʋ. 4:19, 20. w19.07 13 s. 18-20

D sã n moond koɛɛgã, segdame tɩ d mao n wʋm d sẽn taasd-b rãmb koɛɛgã tagsa wã la b manesmã võore. B wuba tʋm-tʋmd a Poll zʋɩf-rãmb sʋka. Dẽnd yaa vẽeneg t’a ra segd n maoome tɩ sã n wa yaa bu-zẽmsã la a taasd koɛɛgã, bɩ a toeem a goamã, bala, bãmb da pa mi baa fʋɩ a Zeova la Gʋls-sõamyã zugu, wall b sã n miẽ me, pa wʋsg ye. Wakat ninga, d tog n maana vaeesgo, n tõog n bãng koɛɛgã mooneg zĩigẽ nebã manesmã võore, tɩ sõng-d tɩ d yɩ wʋmda. (1 Kor. 9:20-23) D raabã yaa d bao neb nins sũy ‘sẽn zemsã.’ (Mat. 10:11) Yɩl n tõog n maan woto, yaa tɩlɛ tɩ d sokd nebã b tagsgo, la d kelgd-b neere. Wala makre, saam-biig a ye sẽn be Ãngeletɛɛr yeelame tɩ yẽ nong n sokda nebã, n na n bãng pag ne a sɩd sẽn tõe n maan to-to tɩ b zĩid-n-taarã yɩ noogo, roagdbã sẽn tõe n bãng n wub b kambã to-to, la d sẽn na n maan to-to n tõog toog baa ne yel-kɛgã la wõr-taabã. Nebã sã n togs b tagsgo, a yet-b lame yaa: “M dat n bãnga yãmb tagsg sẽn yaa a soab ne saglg a ye b sẽn gʋls na maan yʋʋm tus a yiibu.” A pa yet-b tɩ bee Biiblã pʋgẽ ye. A rɩkda a portaablã, n wilg-b vɛrse sẽn zems ne b sõsgã. w19.07 21-22 s. a 7-8

Hal sẽn ta zĩ-bʋg la d segd n nong Wẽnnaam? Bũmb la a Zeezi yeel Fariziẽ a ye, tɩ leokd sokrã. A yeel-a lame yaa: “Fo tog n nonga a Zeova sẽn yaa fo Wẽnnaamã ne f sũurã fãa, ne f sɩɩgã fãa, la ne f yamã fãa.” (Mat. 22:36, 37) D pa rat n nong a Zeova wɛdg-wɛdg ye. D pʋd n datame tɩ daar ne a to fãa bɩ d nonglmã tar paasgo. A Poll yeela Filip tigingã neb tɩ segdame tɩ b nonglmã “paas la a ket n tar paasgo.” Bõe la d tõe n maan tɩ d sẽn nong Wẽnnaam to-to wã tar paasgo? Sẽn na yɩl n nong Wẽnnaam, yaa tɩlɛ tɩ d bãng-a. Ad Biiblã sẽn yete: “Ned ning sẽn pa tar nonglem pa bãng Wẽnnaam ye. Bala Wẽnnaam yaa nonglem.” (1 Zã 4:8) A Poll goamã pʋgẽ, a wilgame tɩ sẽn na yɩl tɩ d sẽn nong Wẽnnaam to-to wã paam pãnga, d segd n paama “bãngr hakɩɩk la yam-vẽenem wʋsg” Wẽnnaam zugu. (Fili. 1:9) D sẽn wa n sɩng Biiblã zãmsgã, d ra pa mi a sẽn yaa Wẽnnaam ning buudã sõma ye. Ne rẽ fãa, ra seka d na nong-a. La d sẽn wɩngd ne Biiblã zãmsgo, n bãngd a Zeova n paasdẽ wã, d sẽn nong-a to-to wã me tara paasg bala. Sɩd pa zaalem la d sẽn get tɩ Biiblã zãmsg la a goamã zug bʋgsgã naaga bũmb nins sẽn tar yõod n yɩɩdã ye.—Fili. 2:16. w19.08 9 s. a 4-5

B sã n kɩtame tɩ y toeem tʋʋmde, segdame tɩ y bao zo-rãmb zĩig ning y sẽn be masã wã. Tẽeg-y tɩ y sã n dat zoa, yaa tɩlɛ tɩ yãmb mengã yɩ ned b sẽn tõe n yõg zood ne. Togsd-y bũmb nins sẽn yɩ yãmb noog a Zeova tʋʋmdã pʋgẽ wã, tɩ b ne vẽeneg tɩ y sũur noomame. Sã n yaa y pagã wall y sɩdã bãas yĩng la y bas tʋʋmd y sẽn da tʋmd a Zeova tũudmã pʋgẽ, bɩ y ra ning-a taal ye. Sã n yaa yãmb mengã bãas yĩng me, bɩ y ra ning y meng taale, n tagsdẽ tɩ y sãama y pagã wall y sɩdã vɩɩm ye. Tẽeg-y tɩ y lebga “yĩng a yembre,” la tɩ y pʋlmame tɩ sẽn wa n yaa bũmb ning fãa, y na n gesa taab yelle. (Mat. 19:5, 6) Sã n yaa y pagã n wa n tʋtẽ tɩ y yaool n da pa rat biiga, bɩ y modg n sõng biigã t’a bãng tɩ y nong-a yẽ n yɩɩd tʋʋmdã y sẽn basã. Da ning-y-yã-a taale, n yet-a tɩ yaa yẽ n kɩt tɩ y bas y tʋʋmdã ye. Yɩta sõma tɩ y nong n wilgd-a tɩ yãmb nifẽ, a yaa Wẽnnaam “kũuni.” (Yɩɩn. 127:3-5) Yaa sõma me tɩ y togsd-a bũmb nins sẽn yɩ yãmb noog y sẽn wa n tʋmd a Zeova tʋʋmdã. Woto tõe n kɩtame tɩ biigã me yãk yam n na n kẽes a meng zãng a Zeova tʋʋmdã pʋgẽ, wa yãmb sẽn da maanã. w19.08 22 s. 10-11

Babilon-kãsengã, ziri tũudmã sẽn naag taab sãama a Zeova yʋʋre. Wala makre, a zãmsa nebã bũmb wʋsg sẽn pa sɩda, Wẽnnaam zugu. A yaa pʋg-yoodre, bala a basa a Zeova n maan kaool ne dũniyã goosneema-rãmbã. A belga a nebã n wẽg-ba, la a fã-ba. A leb n daaga neb wʋsg zɩɩm, hal baa wẽn-sakdb zɩɩm menga. (Vẽn. 18:24; 19:2) A Zeova na n kɩtame tɩ “we-rũng sẽn yaa miuugu,” n tar “yɩɩl piigã” sãam “pʋg-yood-kãsengã.” We-rũngã makda Nasiõzĩni wã. A yɩɩl piigã makda goosneema-rãmb nins fãa sẽn teend Nasiõzĩni wã. Wakat ning Wẽnnaam sẽn yãkã sã n ta, goosneema-kãensã fãa ne Nasiõzĩni wã na n sãama Babilon-kãsengã. B na n ‘deesa a sẽn tarã fãa n bas-a zaala,’ bala b na n zaee a arzɛkã la b puk a wẽnemã. (Vẽn. 17:3, 16) A sãoongã sẽn na n yɩ wa daar-n-yɛnga, rat n yeel tɩ zĩig pʋgẽ wã, na n sãama neb nins sẽn da teend-a wã sũy wʋsgo. Sɩd me, a sɩng n wukda a meng n yetẽ: “Mam zĩi wa na-poaka, la m pa pʋg-kõor me ye. Mam pa na n paam sũ-sãang a bada.”—Vẽn. 18:7, 8. w19.09 10 s. 10-11

Ned sã n dɩk a meng n kõ a Zeova n deeg lisgu, rẽ me wilgdame t’a soab sak n waa a Zeezi nengẽ. A Zeezi ratame tɩ ned buud fãa wa a nengẽ. A kõn tol n zãgs t’a kõn deeg ned sẽn dat ne a sũur fãa n tũ Wẽnnaam ye. (Zã 6:37, 38) A Zeezi poorẽ dãmbã fãa paamame n tõe n naag-a n tʋm tʋʋmd a Zeova sẽn kõ-a. Yaa koe-noogã moonego. D tõe n basa d yam t’a Zeezi na n zĩnda ne-d wakat fãa, n sõng-d tɩ d tʋm tʋʋmdã.(Matiye 28:18-20) Sik-m-mens rãmbã b sẽn da pa nandã ra nonga a Zeezi zĩigẽ. (Mat. 19:13, 14; Luk 7:37, 38) Bõe yĩnga? Bala a yel-manesmã ra yaa toor fasɩ ne Fariziẽ-rãmbã. Nin-kãensã sẽn yaa tũudmã taoor dãmbã ra yaa zẽk-m-mens rãmba, n pa nand neb a taabã ye. (Mat. 12:9-14) A Zeezi yẽ ra yaa sik-m-meng soaba, n da nong nebã. Fariziẽ-rãmbã ra nonga yʋʋr la naam. A Zeezi wilgame tɩ woto pa sõma ye. A sagla a karen-biisã tɩ b segd n sika b mens n tʋm n kõ b taabã. (Mat. 23:2, 6-11) Fariziẽ-rãmbã ra modgda nebã tɩ b maand bãmb daabo, tɩ nebã zoet-ba, n yɛɛsd b sẽn tõe n maan-b bũmb ningã. (Zã 9:13, 22) La a Zeezi goamã ne a manesmã ra wilgdame t’a nonga nebã, tɩ ra belsd-ba. Yãmb rɩkda a Zeezi togs-n-taar bɩ? w19.09 20 s. a 1; 21 s. a 7-8; 23 s. a 9

Kẽnd-y tigissã n pa vaandẽ ye. Tigissã sõngda tõnd tɩ d paasd d zoodã ne a Zeova. Ned manesem sẽn yaa a soab tigissã kẽnd wɛɛngẽ wã wilgda a sã n na n tõog n kell n yalsa kãn-kãe, b sã n wa namsd-a tũudmã yĩnga. (Ebre. 10:24, 25) Bõe tɩ d yet woto? Sã n mik tɩ d zoe n vaanda tigissã yel-bõones yĩnga, d manesem na n yɩɩ wãna, sã n wa yaa tɩlɛ tɩ d gẽneg d yõor n kẽng tigissã? La d sã n yãk yam n pa na n bas tɩ bũmb gɩdg-d tɩ d pa kẽng tigissã, baa bɛɛbã sã n wa rat n na n gɩdg tõnd tɩ d ra le tigim taaba, d pa na n zoe rabeem n bas ye. Yaa masã meng la d segd n modg n nong tigissã kẽnde. D sã n nong tigissã, baa b sẽn namsd tõnd to-to, la hal baa yaa goosneemã n gɩdg d tũudmã, d na n kell n saka Wẽnnaam, pa ninsaalbã ye. (Tʋʋ. 5:29) Zãms-y Biiblã vɛrse nins sẽn noom yãmb n yɩɩdã ne zugu. (Mat. 13:52) Tõe tɩ y pʋ-tẽerã pa vɩ ye. La ne vʋʋsem sõngã maasem, a Zeova tõe n kɩtame tɩ y tẽeg vɛrse-kãens goamã. (Zã 14:26) Biiblã vɛrse-kãensã na n sõnga yãmb tɩ y kell n tall zood sõma ne a Zeova, la y tõog n kell n maan sɩd ne-a. w19.07 3 s. a 5; 4 s. a 8-9

Yãmb doga yʋʋm bʋgo? Rẽ tɩ yʋʋmd 1914 loogame bɩ? Sã n yaa rẽ, wakat kãng n tãag masã, y vɩɩ dũniyã “yaoolem wakatã.” Tõnd ned kam fãa wʋmame tɩ b gomd yɛl nins a Zeezi sẽn yeel tɩ na n pidsa yaoolem wakatã yelle. Wala makre, zabã, komã, tẽn-digimdsã, bã-longdsã, tʋʋm-wẽnsã, n paas b sẽn namsd a Zeova nin-buiidã. (Mat. 24:3, 7-9, 12; Luk 21:10-12) D leb n neeme tɩ nebã manesmã yaa wa tʋm-tʋmd a Poll sẽn da pĩnd n togsã. Tõnd sẽn yaa a Zeova nin-buiidã, d kɩsa sɩd tɩ d vɩɩ “yaoolem wakatã.” (Mii. 4:1) Sẽn mik tɩ yʋʋmd 1914 looga hal daar zãrã, yaa vẽeneg tɩ d tog n bee “yaoolem wakatã” baasgẽ. Dũniyã saab sẽn ta n sa wã, yaa tɩlɛ tɩ d bãng sogsg kẽer leoore, sogsg sẽn tar yõod wʋsgo. Wala makre, bõe n na n maan “yaoolem wakatã” baasgẽ? La d sẽn nan gũud yel-kãensã, bõe la a Zeova rat tɩ d maane? w19.10 8 s. a 1-2

D bãngame tɩ d segd n tõoga toogo, la tɩ pa be ne yɛlã sẽn keng n ta zĩig ningã ye. Yaa d sã n teeg a Zeova la d na n paam pãng n tõogd toogo. (Rom. 12:12) A Zeezi gomd ning sẽn be rũndã daarã vɛrse wã pʋgẽ wã rat n yeelame tɩ sẽn wa n yaa zu-loɛɛg ning fãa, d pa segd n bas a Zeova ye. D sã n zoe n tõogd toog masã menga, to-kãsengã ne a na n sɩng tɩ d tẽebã tara pãng sõma. Wa d sẽn segd n teeg a Zeova n tõog toogã, d segd n teeg-a lame me n paam raoodo. Bõe n na n sõng-d tɩ d maneg n teeg a Zeova? Yaa d sã n karemd a Gomdã daar fãa, la d bʋgsd a sẽn fãag a nin-buiidã to-to pĩnd wẽndẽ wã. (Yɩɩn. 68:21; 2 Pɩy. 2:9) Tẽn-tẽnsã sã n wa na n zab ne-d to-kãsengã sasa, wakat kãng la d segd n tall raood la d maneg n teeg a Zeova. (Yɩɩn. 112:7, 8; Ebre. 13:6) D sã n teeg a Zeova masã menga, a Goog sã n wa na n zab ne-do, d na n talla raood hal sõma. D kɩsa sɩd tɩ d tõe n paamame t’a Zeova kell n nong-do, la a kogl-d wakat sẽn kõn sa.—1 Kor. 13:8. w19.10 18 s. 15-16

A Sʋɩtãan n yaa dũniyã naaba. A tũnugda ne dũniyã n na n kɩt tɩ lebg ninsaal fãa sẽn dat bũmb ninsã baoobo, la d tʋls-wẽnsã pidsg n pak-do. (Efɛ. 2:1-3) A raabã yaa a tõog tɩ d ra le nong a Zeova ne d sũurã fãa ye. Tʋm-tʋmd a Pɩyɛɛr lɛtrã pʋgẽ, a sẽn gom a Sʋɩtãan dũniyã sãoong la dũni-paalgã waoong yell n sa wã, a yeelame: “M nin-nongdse, yãmb sẽn gũud bõn-kãensa wã, bɩ y modg ne y pãng tɛk sẽn na yɩl tɩ Wẽnnaam wa mik tɩ y yaa neb sẽn pa tar rẽok wall zanga, la sẽn tar zood sõma ne bãmba.” (2 Pɩy. 3:14) D sã n tũ a saglgã, n maand d sẽn tõe fãa tɩ d sẽn vɩ to-to wã, la d sẽn tũud a Zeova to-to wã tat a yam, wilgdame tɩ yaa yẽ a ye tãa la d sakd ne d sũur fãa. A Sʋɩtãan ne a dũniyã na n ket n maooda sẽn na yɩl tɩ d ra kell n lʋɩɩs a Zeova tũubã taoor ye. (Luk 4:13) La baa sẽn yaa zu-loɛɛg ning fãa la d maood ne, d kõn bas tɩ ned bɩ bũmb reeg a Zeova zĩig ye. A Zeova bal n yaa Wẽnnaam d sẽn segd n tũ, tɩ d rat ne d sũur fãa n sɩd tũ-a! w19.10 27 s. a 4; 31 s. 18-19

Yɩɩr buud n be n pa wẽng ye. Wala makre, d sã n maand yɩɩre, n dat n ta Zeova ne a Zeezi yam. (1 Kor. 7:32) D sã n maan yel-wẽn-kãsenga, n maand yɩɩr d sẽn dat n le paam zood sõma ne Wẽnnaamã yĩnga, zemsame. D leb n tõe n maanda yɩɩre, n baood d sẽn na n maan n ta d pagã bɩ d sɩdã yam, d sẽn na n maan to-to n ges d zakã rãmb yelle, la d maand yɩɩr d tẽed-n-taasã yĩnga. (1 Kor. 7:33; 2 Kor. 11:28) Wala makre, d tõe n maanda yɩɩr wakat fãa, d sẽn na n dɩ bɩ n yeelgã wɛɛngẽ. (Mat. 6:31, 32) Woto tõe n kɩtame tɩ d lʋɩɩs laogã baoob taoore, hal meng n wa nong ligdã. D sã n bas tɩ yɩ woto, d tẽebã na n komsame, tɩ rẽ sãam zood ning d sẽn tar ne a Zeova wã. (Mark 4:19; 1 Tɩm. 6:10) Sã n yaa d sẽn na n paam tɩ neb a taabã sũur noom ne-dã n pak tõnd n yɩɩda, rẽ me tõe n kɩtame tɩ d wa maand yɩɩr tɩ loog noore. Tõe n wa kɩtame tɩ d zoet nebã sẽn na n yaal tõnd bɩ n nams-dã, n yɩɩd d sẽn na n ta a Zeova yamã. Sẽn na yɩl n gil bẽd-kãnga, d segd n kosa a Zeova tẽeb la raoodo, n da zoe ninsaal ye.—Yel. 29:25; Luk 17:5. w19.11 15 s. a 6-7

Yam-yãkr kẽer la d pa tol n dat n toeeme. Wala makre, d sẽn yãk yam n na n tũ a Zeova wã, d rata ne d sũur fãa n kell n tall yam-kãnga. D sã n kẽe kãadem me, d maoodame n na n kell n maan sɩd ne d pagã wall d sɩdã. (Mat. 16:24; 19:6) La yam-yãkr kẽer yẽ la d mi n segd n toeeme. Bõe yĩnga? Bala yɛlã toeemdame. Sã n wa lebg tɩlɛ tɩ d toeem d yam-yãkre, bõe n na n sõng-d tɩ d tõog n yãk yam-sõngo? Pʋʋs-y n kos-y yam. D tõe n yeelame tɩ ned kae tɩ yam pa mi n paoog-a yell ning pʋgẽ ye. Rẽ n so tɩ d teegd a Zeova d sã n wa rat n yãk yam, la d sã n wa segd n toeem d yam-yãkr me. A na n sõng-d lame tɩ d bãng n yãk d sẽn na n maanega. Maan-y vaeesg sõma. Bao-y sagls Biiblã pʋgẽ, karem-y bũmb nins a Zeova siglgã sẽn yiis tɩ tõe n sõng-yã, la y gom ne ned y sẽn kɩs sɩda. (Yel. 20:18) Yaa tɩlɛ tɩ y maan woto, yam-yãkrã sã n yaa wa tʋʋmd toeeng wɛɛngẽ, zĩig toeengo, pa rẽ bɩ kareng y sẽn na n yãk n wa tõog n get y meng yell la y tʋmd Wẽnnaam tʋʋmdã. w19.11 27 s. a 6-8

Zu-noogã, Wẽnnaam maana bũmb n na n fãag tõnd tɩ d paam d mens ne yel-wẽnã. La rẽ na n tũu ne a Zeezi. Yʋʋmd kobs-nii soabã sẽn deng a Zeezi rogmã, no-rɛɛs a Ezayi togsame tɩ ãdem-biisã na n wa paama lohorem meng-menga, hal tɩ rẽ na n yɩɩg lohorem ning Israyɛll nebã sẽn da paamd kɩdeng yʋʋmdã sasa wã. A yeelame: ‘Sẽn-Ka-Saab Sɩɩgã bee mam zugu, bala, Sẽn-Ka-Saab yãka maam. Bãmb tʋma maam tɩ m togs koe-noogã naong-rãmba, la m bels sũ-sãang-rãmbã, tɩ m togs b sẽn balg b rãmbã fãagr koɛɛga, la m togs sẽn be-b bi-bees roogã tɩ b na n paama yolsgo.’ (Eza. 61:1) Yaa ãnd yell la a Ezayi sẽn da gomdã? A Ezayi sẽn gom lohorem ning yellã sɩnga wakat ning a Zeezi sẽn wa n sɩng a koe-moonegã. A Zeezi sẽn wa n be a ba-yirã Nazarɛte, daar a ye a kẽnga zʋɩf-rãmbã karen-doogẽ. Baraarã, a karma a Ezayi gomdã tɩ zʋɩf-rãmb nins sẽn da be be wã kelge. A Zeezi wilgame tɩ yẽ waame n na n pids a Ezayi gomdã. A yeelame: “A Zeova vʋʋsem sõngã bee mam zugu. Bala, b yãka maam tɩ m moon koe-noog naong rãmbã. B tʋma maam tɩ m togs yembsã tɩ b na n paama b mense, la zoensã tɩ b nin na n pugsame, la tɩ m kɩt tɩ sẽn namsd-bã paam lohorem n looge, la m moon a Zeova bark yʋʋmdã.” (Luk 4:16-19) Bõe la a Zeezi maan n pids gom-kãngã? w19.12 9-10 s. a 6-8

B sã n wa namsd tõnd d tũudmã yĩnga, yɩl n yals kãn-kãe, yaa tɩlɛ tɩ d tall raoodo. Yãmb sã n neẽ tɩ y pa tar raood woto, bõe la y tõe n maane? Tẽeg-y tɩ raood hakɩɩkã pa be ne y woglem wall y bedrem, y yãoog pãng wall y tõog ye. D tẽeg a Davɩɩd sẽn wa n na n zab ne a Golyatã. Nin-kãngã taoore, a Davɩɩd ra paooda wʋsgo, a ra pa baa fʋɩ, n leb n da pa tar zab-teed woto ye. A Davɩɩd ra pa zãad sʋʋg meng ye. Baa ne rẽ, a ra tara raood wʋsgo. A talla raoodo, n wudg tao-tao n na n tɩ zab ne nin-wobgã sẽn da wukd a mengã. Bõe yĩng t’a Davɩɩd tall raood woto? A ra kɩsa sɩd ne a sũur fãa t’a Zeova bee ne-a. (1 Sãm. 17:37, 45-47.) A Davɩɩd pa ges a Golyat bedrmã la a woglmã, n mak a meng ne-a ye. A sẽn da pʋd n tagsd n yɩɩdã yaa a Golyat sẽn pa baa fʋɩ a Zeova taoorã. Kiba-kãngã wilgda tõnd bõe? Tõnd me sã n kɩs sɩd t’a Zeova sẽn yaa pãng sẽn ka to soabã bee ne-do, la tɩ d bɛɛbã pa baa fʋɩ a taoore, d na n talla raoodo.—2 Kib. 20:15; Yɩɩn. 16:8. w19.07 5 s. 11-13

A Tisik ra yaa kiris-ned sẽn yit Aazi soolmã sẽn da yaa Rom n so wã. A yɩɩ a Poll tʋmd-n-taag a sẽn da tõe n teege. (Tʋʋ. 20:4) Yʋʋmd 55 wã sẽnese, a Poll kɩtame tɩ b na n lob ligd n tɩ sõng kiris-neb nins sẽn da be Zide wã. Tõe t’a yãka a Tisik t’a na n sõng ne ligdã reesgo. (2 Kor. 8:18-20) B sẽn wa n kẽes a Poll bãens roog Rom pipi wã, yaa a Tisik n da lebg a koe-taasda. A taasa tigims nins sẽn da be Aazi soolmẽ wã a Poll koeese, la a lɛta-rãmb a sẽn gʋls n na n keng b raoodo. (Kol. 4:7-9) A Tisik kell n yɩɩ a Poll zoa, a sẽn da tõe n teege. (Tɩt 3:12) Pa pipi kiris-nebã fãa n da ya neb b sẽn tõe n teeg wa a Tisik ye. Bala a Poll so-toak a yiib-n-soabã sasa, rat n yeel tɩ yʋʋmd 65 wã sẽnese, a wilgame tɩ Aazi soolmã kiris-neb wʋsg raaga yẽ n base. Tog n yaa b sẽn da zoet bɛɛbã na n wa nams-bã yĩnga. (2 Tɩm. 1:15) La a Poll kell n teega a Tisike, hal n le kõ-a tʋʋmd a to. (2 Tɩm. 4:12) Sãmbg kae t’a Poll sũur da nooma wʋsgo, a sẽn paam t’a Tisik da yaa a zoa hakɩɩkã. w20.01 10 s. a 7-8

Yãmb mi n sokda y meng y sã n paama vʋʋsem sõngã zaeeb bɩ? Sã n yaa rẽ bɩ y bʋgs neere, n leok sogsg nins sẽn pʋgdã: M data ne m sũur fãa n maan a Zeova raabã bɩ? M getame tɩ m tolg n tara yẽesem sõma koe-moonegã pʋgẽ bɩ? M nonga Biiblã zãmsg wʋsgo, n zãmsd baa “Wẽnnaam yel-zulumsã” bɩ? (1 Kor. 2:10) M getame t’a Zeova ningda m koe-moonegã bark tɩ womd biis sõma bɩ? M tʋlla ne m sũur fãa n sõng nebã tɩ b bãng n tũ Wẽnnaam sõma bɩ? M neeme tɩ m vɩɩmã tõre, a Zeova sõng-m-la yɛl wʋsg pʋgẽ bɩ? Yãmb sã n leoka sokr fãa tɩ “n-ye,” rat n yeelame tɩ y paama vʋʋsem sõngã zaeeb bɩ? Ayo! Pa rẽ n wilgd t’a Zeova yãka ned ye. Bõe yĩnga? Bala, ned paam vʋʋsem sõngã zaeeb t’a pa paam me, a tõe n soka a meng sogs-kãensã, n mik t’a tõe n leokame tɩ “n-ye.” Sẽn paase, a Zeova tõe n kɩtame tɩ ned buud fãa sẽn tũud yẽ paam pãng n maan woto fãa, a soab na n wa tɩ vɩɩmda saasẽ tɩ yaa tẽngã zug me. Togs sɩdã, yãmb sã n sokda y meng y sã n paama vʋʋsem sõngã zaeebo, zoe n yaa kaset tɩ y pa paam ye. A Zeova sẽn yãk b rãmbã pa sokd b meng woto ye. Yaa vẽeneg b yamẽ! w20.01 23 s. 14