Sɩpaolgo

Rũndã-rũndã, nebã sẽn get-b rãmb wa yam dãmbã wʋsg yetame tɩ Biiblã sẽn sagend nebã tɩ b ra tags tɩ b yõod yɩɩda b taabã yaa yalemdo. B yetame tɩ ned sã n tagsdẽ t’a taabã yɩɩda yẽ, b na n tar-a lame n lengdẽ, n maand b yam ne-a. La tags-y n ges-y! A Sʋɩtãan sẽn kɩt tɩ dũni-kãngã neb wʋsg lʋɩɩsd b mensã raab bal taoorã, waa ne zu-loe-bʋse? Yãmb getame tɩ b vɩɩmã yaa wãn-wãna? B tara sũ-noog bɩ? B zagsã pʋgẽ vɩɩm yaa noog bɩ? B tara zo-rãmb hakɩɩk bɩ? B tara zood sõma ne Wẽnnaam bɩ? Ne yãmb tagsgo, d sẽn na n sak n tũ dũniyã yamã n são bɩ, bɩ yaa d sẽn na n tũ Wẽnnaam Gomdã sẽn yetã? (1 Kor. 3:19) Ned sã n sak n tũ dũniyã neb sẽn get-b rãmb wa yam dãmbã sẽn yete, wõnda wa sãan sẽn meneme, n yã sãan a to n sok-a sore, mik yẽ me menemame. A Zeezi ra goma a wakatẽ neb nins b sẽn da get wa yam dãmbã yelle, n yeel yaa: “B yaa taoor lʋɩtb sẽn yaa zoense. Zoang sã n tɛt zoanga, b yiibã fãa na n lʋɩɩ bokẽ.” (Mat. 15:14) Sɩd-sɩdã, dũni-kãngã yamã yaa yalemd Wẽnnaam nifẽ! w19.05 24-25 s. 14-16

Yʋʋma noorã sẽn wãbd-b burã la b yũud divẽ wã sõorã tara paasgo. Woto segd n sãama d sũur bɩ? Ayo. “A Zeova mii sẽn yaa-b bãmb dẽndã.” (2 Tɩm. 2:19) La saam-biis nins sẽn sõt sẽn wãbd-b burã la b yũud divẽ wã Kiristã kũumã tẽegr sasa wã pa tõe n bãng b sã n sɩd paama vʋʋsem sõngã zaeeb ye. Dẽnd b sõta baa neb nins sẽn tagsd tɩ b paama vʋʋsem sõngã zaeeb tɩ yaool n pa sɩdã. Wala makre, kẽer sẽn da wãbd burã la b yũud divẽ wã wa n baasame. Tõe tɩ sãnda me bẽeda deprɛsɩyõ bɩ bãag a to, tɩ kɩt tɩ b tagsdẽ tɩ b na n tɩ naaga Kiristã n dɩ naam saasẽ. Togs sɩdã, d pa mi sẽn paam-b zaeeb n ket tẽngã zugã sõor takɩ ye. A Zeezi sã n wa na n tall sẽn paam-b zaeebã n kẽng saasẽ, a na n mikame tɩ b bee dũniyã ween-vɩɩs a naasã fãa. Biiblã wilgdame tɩ yaoolem wakatã, neb bilf bal sẽn paam vʋʋsem sõngã zaeeb n na n ket tẽngã zugu. (Vẽn. 12:17) La a pa togs b sõorã sẽn na n zem to-to, to-kãsengã sã n wa na n sɩng ye. w20.01 29-30 s. 11-13

Yel-bũnd a ye la a Zeezi wẽ, tɩ wilgd d Ba a Zeova sẽn nong-d to-to wã. A goma biig sẽn yi n bas a ba zak n kẽng tẽn-zãrgẽ yelle. (Luk 15:11-32) A wilgame tɩ biigã ba wã ra ket n saagdame t’a na n lebg n waame. Sɩd me, biigã sẽn wa n lebg n wa wã, a ba wã reeg-a-la ne sũ-noogo. D sã n da basa a Zeova tũubu, n wa tek yam n kot sugri, d tõe n basa d yam t’a sẽn yaa tõnd Ba sẽn nong-dã, a na n sak n deega tõnd ne sũ-noogo. D Ba wã na n manega yɛl nins fãa a Ãdem yel-wẽndã sẽn wa ne wã. A Ãdem kɩɩsgã poore, a Zeova yãka yam n na n kɩt tɩ neb 144 000 tɩ naag a Biigã saasẽ, n yɩ nanambs la maan-kʋʋdba. Dũni-paalgã pʋgẽ, a Zeezi ne a na-rɩt-n-taasã na n sõnga nebã tɩ b lebg neb sẽn zems zãnga. Yaoolem makrã poore, sẽn na n kell n sak-b Wẽnnaamã na n paama vɩɩm sẽn kõn sa. D Ba wã na yaa n paam tɩ tẽngã pid ne a kom-dibli la a kom-pugli sẽn zems zãnga. Ad vɩɩmã sɩd na n talla bark wakat kãnga! w20.02 6-7 s. 17-19

Tõnd ned kam fãa segd n sok a meng yaa: ‘Mam toeengã yaa zugẽ-zugẽ bɩ, bɩ m sɩd toeemda m sẽn yaa ned ning m sũurã pʋgẽ wã?’ A Zeezi goam nins sẽn be Matiye 12:43-45 wã wilgda d sẽn segd n maanã. Wilgda tõnd bũmb sẽn tar yõod wʋsgo: D sã n bas tags-kɛgã bala, pa sek ye. D segd n ledg-b-la ne tagsa sẽn zems ne Wẽnnaam raabã. D tõe n toeema d sẽn yaa ned ning d sũurã pʋgẽ wã bɩ? N-ye! Ad Wẽnnaam Gomdã sẽn yete: “Y segd n yeelga nin-paalgã sẽn naan tɩ zems Wẽnnaam daabã, tɩrlem la kɩs-sɩd meng-meng pʋgẽ.” (Efɛ. 4: 24) Vẽenega, d tõe n sɩd toeema d sẽn yaa ned ning d sũurã pʋgẽ wã! La pa nana ye. Bala, d segd n basa tags-kɛgã la tʋʋm-wẽnsã, la d modg me n manegd d “tagsa wã tɩ lebgd paalse,” rat n yeel tɩ n toeem d tagsa wã, d tʋlsmã, la d yel-manesmã. La woto pa vugr yell ye. w19.06 9-10 s. a 6-7

Baa ne sẽn yaa a Lot n yãk yam n na n tɩ zĩnd Sodommã, a Zeova zoee yẽ ne a zakã rãmb nimbãanega, n tʋm malɛgs tɩ b na n tɩ sõng-b tɩ b põse. Malɛgsã ra pẽdgd-b lame tɩ b zoe n yi Sodom tao-tao, la ne rẽ fãa, a Lot “dag n ka maand tao-tao ye.” Yɩɩ tɩlɛ tɩ malɛgsã gãd yẽ ne a zakã rãmb nusi, n tɛ-b tɩ b yi tẽngã. (Sɩng. 19:15, 16) Rẽ poore, b yeel-b lame tɩ b zoe n kẽng tãmsã sʋka. La a Lot pa sak a Zeova sẽn yeelã ye. A pʋd n kosame n na n zoe n kẽng tẽng sẽn pẽ. (Sɩng. 19:17-20) A Zeova talla sũ-mare, n kelg-a, la a sak t’a na n kẽng a sẽn yetẽ wã. La a Lot wa n zoeta rabeem n pa rat n zĩnd tẽn-kãng pʋgẽ ye. A yikame n kẽng tãmsã sʋka, zĩig ning a Zeova sẽn da pĩnd n yeel-a t’a kẽngã. (Sɩng. 19:30) Ad a Zeova sɩd maana sũ-mar wʋsg ne-a! Wa a Lote, d tẽed-n-taag me tõe n yãka yam tɩ pa yɩ sõma, n paam zu-loeese. Sã n wa yaa woto, d manesem na n yɩɩ wãna? Tõe tɩ d na n dat n yeel-a lame t’a kẽebda a sẽn bʋdã. (Gal. 6:7) Baa yaa sɩda, sẽn yaa sõma n yɩɩda, yaa d sẽn na n sõng-a, wa a Zeova sẽn sõng a Lotã. w19.06 20 s. a 3; 21 s. a 4-5

Bɛɛbã sã n gɩdg d tũudmã, b raabã yaa b na kẽes-d rabeem tɩ d bas a Zeova tũubu. Gɩdgrã sẽn yãk a toogo, tõe tɩ b na n yelgda goam sẽn pa sɩda, wall b kɩt tɩ sodaasã wat n vaeesd d rotã, pa rẽ bɩ b yõg-d n kẽng bʋʋdo, wall b pʋd n kẽes kẽer bãens roogo. B tagsdame tɩ b sã n yõg d neb kẽer n page, na n kẽes-d-la rabeem. Tõnd sã n bas tɩ rabeem yõk-do, tõe n yɩɩ wa tõnd mengã n wẽneg n “gɩdgd” d tũudmã. D pa rat n yɩ wa neb nins yell b sẽn gomd Maan-kʋʋr 26:36, 37 wã ye. D pa na n bas tɩ rabeemã kɩt tɩ d pa le tʋmd tũudmã tʋʋm wʋsgo, wall d pʋd n bas zãng ye. D na n teega a Zeova ne d sũur fãa, d pa na n bas me tɩ yellã kɩt tɩ d yirb ye. (Eza. 28:16) D na n pʋʋs-a lame, n kos-a t’a wilg-d sore. D miime tɩ ne a Zeova sõngre, baa ninsaalbã goosneema ning sẽn tar pãng n yɩɩdã pa tõe tɩ d bas tũudum hakɩɩkã ye. Gɩdgrã tõeeme meng n pa kẽes-d rabeem ye. Tõe n pʋd n kɩtame tɩ d maneg n wɩng ne a Zeova tũubu. w19.07 9-10 s. a 6-7

Baa y nan pa paam ned sẽn dat n zãms Biiblã, bɩ y ra koms raood ye. Kell-y n wɩng-y ne gẽesgo. Tẽeg-y t’a Zeezi wilgame tɩ sõng nebã tɩ b lebg yẽ karen-biisã yaa wa zĩm-yõgbo. Zĩm-yõgd tõe n maana lɛɛr ka tɛka, n yaool n paam zĩm. Naoor wʋsgo, b yikda yibeoog pĩnd n sɩnge, wall b tʋm n tãag yʋn-sʋka, pa rẽ bɩ b kẽng hal zĩ-zãrsẽ. (Luk 5:5) Woto me, koe-moondb kẽer maanda sũ-mar n moond koɛɛgã n kaoosd lɛɛr-dãmba, sẽn na yɩl n paam neb sẽn dat n zãms Biiblã. B moonda zĩis toɛy-toɛya, la b mi n toeemd moonegã wakat me. Bõe yĩnga? Bala, yaa woto la b na n paam neb wʋsg n taas koɛɛgã. Sẽn modgd-b woto wã yãta b modgrã biisi, bala b wae n paamda neb sẽn dat n bãng Biiblã sẽn yetã. Yãmb me pa tõe n yãk wakat y sẽn mi tɩ y sã n yi, y na n paama neb wʋsg sẽn na n kelg-yã, wall y bao zĩig y sẽn mi tɩ neb wʋsg na n sak n kelgame wã, n tɩ moon sɩda? Bõe yĩng tɩ d sã n zãmsd ned Biiblã bɩ d segd n maan sũ-mar ne a soabã? Bala, d pa rat bal n sõng-a t’a bãng Biiblã sẽn yetã, la a nong rẽ ye. D ratame me n sõng-a t’a bãng a Zeova sẽn yaa Biiblã soabã sõma, la a nong-a ne a sũur fãa. w19.07 18-19 s. 14-15

Neb kẽer maana yel-wẽn n ket n ningd b meng taale, tɩ namsd-b wʋsgo. Sã n yaa rẽ, Biiblã zãmsg y yembrã sasa, yɩta sõma tɩ y bao zĩis b sẽn gomd Kiristã maoongã sẽn dol d yel-wẽnã yellã, n zãms rẽ n zulg sõma. D sã n zãms rẽ neere, n bʋgs la d pʋʋse, tõe n sõng-d-la wʋsg tɩ d ra le ningd d meng taal zaalem ye. Tõe n kɩtame meng tɩ d ra le tar d mengã n namsd yel-wẽnd poorẽ, t’a Zeova yaool n zoe n kõ-d sugr ye. Ad yam a to d sẽn tõe n dɩke: Kẽer basa tʋʋmd sẽn da na n kẽes-b ligdi, n na n tʋm a Zeova tʋʋmdã wʋsgo. Y sã n maana woto, yɩta sõma tɩ y yĩm sẽn be poorẽ wã, n da le tagsd y sẽn da na n paamẽ laog ningã ye. (Sõd. 11:4-6; Koɛ. 7:10) La “bũmb nins sẽn be poorẽ wã” tõe n yɩɩ bũmb kẽer me d sẽn tõog n maane, wall yɛl d sẽn mao ne. Yaa sɩd tɩ d sã n mi n lebg n tẽeg d Ba a Zeova sẽn ning-d bark to-to wã, la a sẽn teel-d to-to yʋʋm ka tɛkã, paasda d zoodã. La d pa rat n wa tagsdẽ tɩ d sẽn zoe n maan a Zeova tʋʋmdã pʋgẽ wã sekame ye.—1 Kor. 15:58. w19.08 3 s. a 5-6

Sẽn yaa wakat ning fãa, la sẽn yaa zĩig ning fãa, d tõe n maaga d yĩng n pʋʋs a Zeova. Wakat kae a sẽn pa tar sẽk n kelgd tõnd ye. A pʋd n kelgda d pʋʋsg wakat fãa. D sã n neẽ t’a kelgda d pʋʋsgã, d manegd n nong-a lame. Yɩɩn-gʋlsdã ra yeelame: “Mam nonga Sẽn-Ka-Saabo, bala, bãmb wʋmda mam koɛɛgã.”( Yɩɩn. 116:1) D sã n pʋʋs d Ba wã, a pa kelgd bal ye. A leokdame. Tʋm-tʋmd a Zã yeelame tɩ d tõe n basa d yam tɩ “sẽn wa n yaa bũmb ning fãa la d kos [Wẽnnaam] tɩ zems b raabã, b kelgda tõndo.” (1 Zã 5:14, 15) La a Zeova sẽn na n leok d pʋʋsgã to-to wã tõeeme n pa yɩ wa d sẽn da tẽedã ye. A mii sẽn yaa sõma ne tõnd n tɩ yɩɩdã. Rẽ n so tɩ wakat ninga, a pa kõt tõnd d sẽn kosã ye. A mi n datame me tɩ d maag d yĩng nanda. (2 Kor. 12:7-9) A Zeova geta d yell sõma. A maanda wa a sẽn dat tɩ ba-rãmbã maanã. (1 Tɩm. 5:8) A kõta tõnd sẽn yaa a kambã bũmb nins sẽn yaa tɩlɛ ne d vɩɩmã. A pa rat tɩ d maand yɩɩr rɩɩb bɩ futu, wall gãag zĩig yĩng ye. (Mat. 6:32, 33; 7:11) D Ba sẽn nong-dã zoe n maana bũmb wʋsg menga, d beoog vɩɩmã na yɩ neer yĩnga. w20.02 5 s. 10-12.

Pa sẽn saagd-b n na n kẽng saasẽ wã fãa n naag taab n yaa tʋm-tʋmd sẽn tũud sɩd la sẽn tar yamã ye. (Mat. 24:45-47) Pipi kiris-nebã wakatẽ, a Zeova ne a Zeezi ra tũnugda ne neb a wãn bal n sõngd neb wʋsg tɩ b tẽebã pãng paasdẽ. Wala makre, yaa kiris-neb sẽn paam vʋʋsem sõngã zaeebã bãmb b wãn bal la a Zeova kɩt tɩ b gʋls Biiblã babg ning sẽn da yaa ne gɛrkã. Rũndã-rũndã me, yaa sẽn paam-b zaeebã bãmb b wãn bal la b yãk tɩ b kõt Wẽnnaam nin-buiidã “rɩɩb wakat sẽn zemse.” A Zeova yãka yam n na n kɩt tɩ sẽn tũud-b yẽ wã fãa la bal wa paam n vɩɩmd wakat sẽn kõn sa dũniyã zugu, la a yãk neb a wãn bal tɩ b na n tɩ vɩɩmd saasẽ, n dɩ naam ne a Zeezi. A Zeova na n keoo sẽn tũudb yẽ wã fãa, rat n yeel tɩ sẽn makd-b ‘zʋɩfã,’ la sẽn makd-b ‘neb piigã.’ (Zaka. 8:23) La yaa tɩlɛ tɩ b fãa tũ noy nins a sẽn gãnegã, la b kell n maan sɩd ne-a. B fãa segd n kell n yɩɩ sik-m-mens rãmba. B fãa segd n naaga taab n tũ-a yam a yembre. B fãa segdame me n modg tɩ laafɩ kell n zĩnd tigingã pʋgẽ. Sẽn mik tɩ dũniyã saab ta n saame wã, bɩ d fãa kell n tũ a Zeova ne Kiristã sẽn yaa d pe-kɩɩmã, ‘n yɩ yãgr a yembre.’ w20.01 31 s. 15-16

Tõnd pa tõe n modg d nebã tɩ b sak koe-noogã ye. La d tara d sẽn tõe n maan n sõng-ba, tɩ b tags Biiblã sẽn yetã zug neer la b sak n tũ. (2 Tɩm. 3:14, 15) D tẽegdẽ tɩ b geta d yel-manesmã n yɩɩd d no-goamã. Naoor wʋsgo, d yel-manesmã sẽn tõe tɩ nebã toeem yɩɩda d no-goamã. D ra koms raood n bas ye. A Zeova kõta tõnd mak-sõngo. Sẽn na yɩl tɩ nebã wʋm koe-noogã la b sake, n wa paam vɩɩm sẽn ka satã, a maanda bũmb ka tɛk n ‘ka basdẽ’ ye. (Zer. 44:4) Tʋm-tʋmd a Poll me sagla a Tɩmote, n yeel-a t’a wɩng ne nebã sõngre. Bõe yĩnga? Bala a sã n maan woto, a na n fãaga a meng la a fãag neb nins sẽn kelgd-a wã. (1 Tɩm. 4:16) D nonga d zakã nebã, n dat tɩ b bãng Biiblã sẽn yetã, bala rẽ n yaa sɩda. w19.08 14 s. a 2; 16-17 s. a 8-9

Daar fãa, d tõe n wilga bũmb wʋsg pʋgẽ tɩ d yaa sik-m-mens rãmba. D gom bũmb a wãn yelle. Ned sã n wa sagl-do. Yɩta sõma tɩ d tẽegdẽ tɩ ned sã n wa yã-d n na n sõng-d tɩ d rems bũmb d sẽn maane, tog n sɩd yaa wẽng n sek remsgo, tɩ d pa miẽ ye. Wakat kãnga, tõe tɩ sẽn wat d yamẽ pipi yaa d zãgs saglgã. Tõe tɩ d na n goma a soabã wall d tags wẽng a zugu, pa rẽ bɩ d yeel t’a sẽn sagl-d to-to wã pa zems ye. La d sã n yaa sik-m-meng soaba, d na n modg n yõka d menga, n maan sẽn segde. Sik-m-meng soab sakda remsgo. D rɩk makr wa yãmb sẽn na n be d tigsg zĩigẽ. Y gilg n sõsa ne y tẽed-n-taas a wãna, la a yembr n bool yãmb kɛɛng n togs-y tɩ zẽ-vãad n tab y yẽnã. Yaa vẽeneg tɩ y sũur na n sãamame. La rẽ yĩnga, y sũur kõn yɩ noog y sẽn paam t’a togs-yã? Tõe meng tɩ y na n yeelame tɩ ned sã n da togs-y pĩnd n são. Woto me, bũmb sã n pa zemse, tɩ d tẽed-n-taag tall raood n wa yã-d n na n sõng-d tɩ d remse, d segd n sika d meng n sak la d maan sũ-noog ne rẽ. D pa get tɩ nin-kãng yaa d bɛ ye. A yaa d zoa. — Yel 27:6; Gal. 4:16. w19.09 5 s. 11-12

A Zeova kõo ma-rãmbã fãa tʋʋmd sẽn tar yõod wʋsg zakã pʋgẽ. A leb n kõ-b-la taoor-sobend bilfu, kambã yell gesgã wɛɛngẽ. Sɩd me, ma-rãmbã sẽn maand la b sẽn yetã fãa tõe n talla pãng b kambã zutu, b vɩɩmã tõre. (Yel. 22:6) D ges yam ning ma-rãmbã sẽn tõe n dɩk a Zeezi ma a Maari kibarã pʋgẽ. A Maari ra mii Gʋls-sõamyã neere. A ra waoogda a Zeova sõma, la a leb n da tar zood sõma ne-a. A sakame n na n maan bũmb ning a Zeova sẽn da rat t’a maanã, baa ne sẽn da na n toeem a vɩɩmã. (Luk 1:35-38, 46-55) Y sã n yaa kamb ma, bɩ y bãng tɩ bũmb wʋsg pʋgẽ la y tõe n dɩk a Maari togs-n-taare. Wãn-wãna? Pipi, wɩng-y ne Biiblã zãmsg y toorã, la pʋʋsgã, n kell n tall zood sõma ne a Zeova. Yiib-n-soaba, sakd-y n toeemdẽ, sẽn na yɩl n ta a Zeova yam. w19.09 18 s. 17-19

Wẽnnaam vẽnega tʋm-tʋmd a Zã t’a yã bũmb kẽer sẽn da na n wa pids kaoosg zugẽ. Vẽnegrã pʋgẽ, b yeela malɛgs tɩ b gãd to-kãsengã sebdã kãn-kae, hal tɩ b ning Wẽnnaam yembsã b yaoolem bãndã. (Vẽn. 7:1-3) Wẽnnaam yembsã yaa sẽn na n tɩ rɩ-b naam ne a Zeezi saasẽ wã. B yaa neb 144000. (Luk 12:32; Vẽn. 7:4) La a Zã goma neb sull a to me yelle. Bãmb sõorã ra waoogame, hal t’a yeel yaa: “Rẽ poore, mam yãa kʋʋn-kãseng ned baa a ye sẽn pa tõe n sõde, sẽn yit tẽnsã fãa pʋsẽ, buud fãa pʋsẽ, la sẽn gomd buud-goamã fãa tɩ b yas geerã taoor la Pe-bilã taoore.” (Vẽn. 7:9-14.) Tags-y n ges-y-yã a Zã sũurã sẽn yɩ noog to-to, a sẽn bãng tɩ tarẽ-n-tarẽ, neb milyõ ka tɛk n na n wa lebg tũudum hakɩɩkã nebã! Yaa vẽeneg t’a Zã sẽn yã bũmb ningã kenga a tẽebã. Dẽnd tõnd tẽebã la segd n keng n yɩɩda, bala yaa rũndã-rũndã la a sẽn yã wã pidsda. D neeme tɩ b tigimda neb milyõ-rãmb tũudum hakɩɩkã pʋgẽ. Yaa neb sẽn saagd tɩ b na n wa põsa to-kãsengã sasa, n vɩɩmd tẽngã zug wakat sẽn kõn sa. w19.09 26 s. a 2-3

Mams-y y yamẽ tɩ yaa tẽn-tẽnsã sẽn nan moon bal tɩ “laafɩ la bãanã” b sẽn da sɩng n gũudẽ wã waame. Tõe tɩ b na n wukda b mense, n yetẽ tɩ laafɩ la bãan a woto buud zɩ n zĩnd ye. Tẽn-tẽnsã na n datame tɩ d tags tɩ b tõogame tɩ zu-loeesã fãa sa. Mik yell b sẽn pa na n tõog n gɩdg n wate. B na n sãama “Babilon-kãsengã”! (Vẽn. 17:5, 15-18) Wẽnnaam na n “ninga b sũyẽ wã tɩ b pids Wẽnnaam daabã.” Daab-kãng yaa bõe? Yaa kiris-neb ne yʋʋrã la tũudum nins fãa sẽn yaa ziri wã sãoongo. Wẽnnaam na n ninga a raabã “we-rũng sẽn yaa miuugu,” n tar “yɩɩl piigã” sũurẽ. A yɩɩl piigã makda goosneema-rãmb nins fãa sẽn teend “we-rũngã.” We-rũngã makda Nasiõzĩni wã. (Vẽn. 17:3, 11-13; 18:8) Goosneema-kãens sã n wa na n zab ne tũudum nins fãa sẽn yaa ziri wã, rẽ n na n yɩ to-kãsengã sɩngre. Na n yɩɩ yell sẽn pak dũniyã nebã fãa, n sɩd sek yɛɛsgo. w19.10 14 s. a 1, 3

Pipi kiris-nebã wakatẽ wã, a Dioterfɛs ra maanda sũ-kiir ne tigingã taoor lʋɩtbã. A sẽn da “nong n yɩ taoor soab” tigingã neb sʋkã yĩnga, a yelga goam sẽn pa sɩda, n na n sãam tʋm-tʋmd a Zã la yel-gɛtb a taab yʋʋre. (3 Zã 10) Baa tõnd pa na n saag n maan wa a Dioterfɛse, d tõe n wa maanda sũ-kiir ne d tẽed-n-taaga, bala b kõ-a-la tigingã tʋʋmd tõnd me sẽn tʋll n paame. Sẽn yɩɩd fãa, d sã n tagsdẽ tɩ tõnd me tara minim, n tõe n tʋm tʋʋmdã sõma wa yẽ. Sũ-kiir yaa wa mo-yook sẽn yãmbd zĩiga. A sã n sɩng ned sũurẽ, tõe n paama pãnga, hal tɩ lebg toog t’a tõog tɩ sa. Sũ-kiir wata ne zʋg-wẽns la tags-kɛga. Wala makre, tõe n kɩtame tɩ ned nand a meng tɩ looge, wall a baood a mengã nafr bala. Wa mo-yook sẽn tõe n yãmb zĩig tɩ fɩlɛɛr pa tõe n yi sõma wã, sũ-kiir kɩtdame tɩ ned pa tõe n bɩɩs zʋg-sõma wa nonglem, nimbãan-zoeer la maan-neer ye. Sũ-kiir sã n wa sɩngd d sũurẽ wã, d segd n võog-a-la wa mo-yooko. w20.02 15 s. a 6-7

Tʋm-tʋmd a Poll gomdã rat n yeelame t’a tara zu-loɛɛg sẽn namsd-a wʋsgo. Zu-loe-kãng la a sẽn bool t’a “Sʋɩtãan malɛk” sẽn tar yẽ n ‘pãbd pɛgsã.’ Tõeeme tɩ pa a Sʋɩtãan bɩ a zĩn-dãmbã n wa ne a Poll zu-loɛɛgã, tɩ d tõe n yeel tɩ yaa wa bãmb n dɩk gõaagã n kõs-a ye. La b sẽn yaa malɛg-wẽnsã, b sẽn yã a Poll zu-loɛɛgã, tõe tɩ b yɩɩ tao-tao n na n maan tɩ yellã kenge, tɩ yaa wa b sẽn tusd gõaagã tɩ kẽ pʋgẽ n paase. Bõe la a Poll na n maane? Pipi, a ra ratame tɩ “gõaagã” yi t’a paam a menga. A meng yeelame t’a kosa a Zeova “naoor a tãab” t’a kɩt tɩ gõaagã yi la bas-a. Baa ne a Poll sẽn pʋʋs naoor wʋsgã, gõaagã pa yi ye. La rat n yeelame t’a Zeova pa leok a Poll pʋʋsgã bɩ? Pa woto ye. A leokame. A Zeova pa kɩt tɩ yellã sa, la a kõo a Poll pãng t’a tõog toogo. A Zeova yeel-a lame yaa: “Yaa pãn-komsem pʋgẽ la fo paamd mam pãngã tɩ pidi.” (2 Kor. 12:8, 9) Sɩd me, ne Wẽnnaam sõngre, a Poll kell n talla sũ-noogo, la sũur pʋgẽ bãane!—Fili. 4:4-7. w19.11 9 s. a 4-5

A Zeova a ye bal n yaa Wẽnnaam d sẽn segd n tũ, bala yẽ n naan tõndo, la a kõ-d vɩɩmã. (Vẽn. 4:11) La pa nana ye. Baa d sẽn nong a Zeova la d waoogd-a wã, bũmb kẽer n tõe n tiis tõndo, tɩ wa pa le yaa yẽ a ye bal la d tũud wa sẽn segdã ye. Biiblã pʋgẽ, b sã n yeel tɩ d tũ a Zeova a ye tãa, rat n yeelame tɩ d nong-a ne d sũur fãa. D sã n nong a Zeova ne d sũur fãa, yẽ a ye bal la d na n tũ. D pa na n bas tɩ ned wall bũmb reeg a Zeova zĩig ye. ( Yikr 34:14) D sẽn tũud a Zeova ne d sũur fãa wã pa tik vɩʋʋgẽ ye. Bõe yĩnga? Bala yaa d sẽn bãng bũmb nins a Zeova zugã n kɩt tɩ d tũud-a. D bãnga a zʋgã sẽn yaa sõma zãngã, tɩ zʋg-kãens noom tõndo. D mii a sẽn nong la a sẽn kisi, n neẽ t’a bee bʋʋm. D miime t’a Zeova sẽn dat yaa d maan a raabã ne sũ-noog wakat sẽn kõn sa. D getame t’a sẽn sak tɩ d tõe n paam a zoodã yaa zu-zẽkre. (Yel. 3:32) D sã n bãng bũmb a Zeova zug fãa, kɩtdame tɩ d maneg n pẽneg-a n paase.—Zak 4:8. w19.10 26 s. a 1-3

Rũndã-rũndã, d tẽed-n-taasã maooda ne zu-loees toor-toore. Wala makre, sabab-wẽnsã namsda d tẽed-n-taas wʋsgo. Kẽer me nengẽ, yaa zab n yik b tẽngẽ wã. Yɛl a woto sasa, d tõe n deega b kẽer d zakẽ. Nina me tõe n kõo ligd bɩ bũmb ning n sõng-ba. La d fãa tõe n pʋʋsa a Zeova, n kos-a t’a sõng-ba. D sã n bãng tɩ d tẽed-n-taag n koms raoodo, wakat ninga, d pa mi d sẽn na n yeel-a bɩ n tall manesem ning ne-a ye. D fãa yaool n tara d sẽn tõe n maan n sõng-a sõma! D tõe n baoo sẽk n tɩ zĩnd n sõs ne-a. A sã n wa togsd tõnd a yelle, d tõe n kelga neere, tɩ wilg tɩ d kʋmd-a lame. D tõeeme me n gom Biiblã vɛrse ning sẽn belsd tõnd n tɩ yɩɩdã yell ne-a. (Eza. 50:4) Pa bũmb ning d sẽn na n maanã la sard ye. D zoa wã we n bãng t’a yel-pakr fãa wakate, d na n sõng-a lame. Hakɩɩka, tõnd ne d tẽed-n-taasã zoodã pa na n tek dũni-kãngã saabã ye. Na n yɩɩ wakat sẽn kõn sa. w19.11 7 s. 18-19

A soabã n yãkd a yam n na n maan maoongã, a sẽn nong a Zeova sẽn yaa a Wẽnnaamã yĩnga. Maoongã sã n maane, sẽn wa-a ne rũngã, a zakã rãmba, n paas maan-kʋʋdbã n wãbd nemdã. La rũngã zĩis kẽer ra yaa a Zeova a ye tãa la b kõta. Yaa a zĩ-bʋse? Rũng maoong pʋgẽ, a Zeova ra getame tɩ sẽn yaa sõma n tɩ yɩɩd rũngã pʋgẽ yaa a kaamã. A ra yeelame me tɩ rũngã yiimã ne a sãoorã yaa sõma wʋsgo. (Maan. 3:6, 12, 14-16) Rẽ n so tɩ Israyɛll ned sã n da maan maoong ne yamleoogo, n kõ a Zeova yiimã ne sãoorã la kaamã, tolg n nooma a Zeova wʋsgo. Israyɛll ned sã n da maan maoong a woto buudã, wilgdame t’a kõo a Zeova a sẽn tar tɩ yaa sõma n yɩɩdã. A Zeezi me sẽn tũ a Zeova ne a sũur fãa nonglem yĩngã, yaa wa a sẽn kõ-a a sẽn da tar tɩ yaa sõma n yɩɩdã ne yamleoogo. (Zã 14:31) Wẽnnaam raabã maaneg ra kõta a Zeezi sũ-noogo. (Yɩɩn. 40:9) Hakɩɩka, a Zeova sũur da nooma wʋsgo, a sẽn da ne t’a Zeezi tũud-a-la ne yamleoog woto wã. w19.11 22-23 s. a 9-10

Biiblã yeelame tɩ Wẽnnaam naana tẽngã la bũmb fãa n sɛ “rasem” a yoobe, la tɩ rasem a yopoe daarã, Wẽnnaam vʋʋsa ne tʋʋm-kãngã. (Sɩng. 2:2) La a Zeova sẽn nong tʋʋmã, hal n tãag masã, a ‘ket n tʋmda’ tʋʋm a taaba. (Zã 5:17) A Zeova yeela Israyɛll nebã tɩ bãmb me tʋm rasem a yoob la b vʋʋs rasem a yopoe daarã. A yeelame tɩ vʋʋsg daarã yaa sẽn na n tẽegd Israyɛll nebã tɩ yẽnda n yiis-b yembd tɩ b lebg a neba. Ra yaa ‘vʋʋsg daar sẽn welg toor a Zeova waoogr yĩnga.’ (Yikr 31:12-14.) Nebã fãa, hal baa kambã, yembsã, la rũmsã meng ra pa segd n tʋm ye. (Yik. 20:10) Woto, nebã paamd n wɩnga ne tũudmã yɛlã sõma n yɩɩd ray a taabã. La a Zeezi wakatẽ wã, tũudmã taoor dãmb wʋsg ra tolg n maandame tɩ loog noore. B ra yetame tɩ ned sã n fãr ka-zut n wãb vʋʋsg daare, wall a maag bãada, a kɩɩsa tõogã. (Mark 2:23-27; 3:2-5) La ra pa Wẽnnaam tagsg la woto ye. A Zeezi sõnga sẽn dat-a soab fãa t’a bãng tɩ pa Wẽnnaam tagsg la woto ye. w19.12 3-4 s. a 8-9

Yaa a sẽn dɩk a Zeova togs-n-taare, n da zoet a taabã nimbãanegã yĩnga. A Davɩɩd sẽn da tar zood sõma ne a Zeova wã, a yɩɩ rĩm Israyɛll nebã sẽn da nonge, t’a Zeova me ra pẽgd-a, hal n da get rĩm-dãmb a taabã sã n maana wa yẽ. (1 Rĩm. 15:11; 2 Rĩm. 14:1-3) Yam-bʋg la d tõe n dɩk a Davɩɩd mak-sõngã pʋgẽ? Tõnd me segd n yɩɩ ‘Wẽnnaam togs-n-taase.’ D sã n modgd n dɩkd a Zeova togs-n-taare, d wilgdame me tɩ d yaa a kamba. (Efɛ. 4:24) D pa tol n tõe n bãng a Zeova n sa ye. (Koɛ. 3:11) La pa d sã n mi bũmb wʋsg a Zeova zug la sard ye. Yaa d sẽn maand bũmb nins ne d minimã. D sã n tũud bũmb nins d sẽn bãngd d saasẽ Ba wã zugã, la d rɩkd a togs-n-taare, tõnd ne yẽ zoodã na n ket n paamda pãnga. (Zak 4:8) Ne a Gomdã maasem, a yeta tõnd tɩ d bas d yam t’a pa na n tol n bas neb nins sẽn baood yẽ wã ye. w19.12 20 s. 20; 21 s. 21, 23

A Zakoob ra nonga a kambã fãa, la a ra nonga a Zozɛf n yɩɩda. A Zozɛf ba-biisã manesem yɩɩ wãn ne rẽ? B sẽn wa n neẽ tɩ b ba wã nong-a lame n yɩɩd bãmbã, b sɩngame n maand sũ-kiir ne-a, hal tɩ wa kɩt tɩ b kisg-a. Rẽ t’a tara yʋʋm 17. Baa ne a Zozɛf sẽn pa maan bũmb sẽn sek b na kisg-a wã, b wa n baas n koos-a-la yembdo, la b tɩ yag ziri ne b ba wã, n yeel tɩ we-rũng n kʋ a bi-nongrã. B sũ-kiirã kɩtame tɩ laafɩ ra kae b zakã pʋgẽ ye. Kɩtame me tɩ b maan tɩ b ba wã sũur sãam hal wʋsgo. (Sɩng. 37:3, 4, 27-34) B sõdga sũ-kiirã n naag “yĩngã tʋʋm” nins sẽn tõe n kɩt tɩ ned pa paam Wẽnnaam Rĩungã. (Gal. 5:19-21.) Naoor wʋsgo, yaa sũ-kiir n wat ne beem, zaba, la sũ-yikri. A Zozɛf ba-biisã sẽn maan bũmb ningã wilgdame tɩ sũ-kiir sãamda zems-n-taare, la kɩtdẽ tɩ laafɩ pa le be zak neb ne taab suk ye. Yaa sɩd tɩ d pa na n saag n maan wa a Zozɛf ba-biisã ye. La d sẽn pa zems zãngã, d sũurã pida ne zãmbo. Rẽ n kɩt tɩ wakat ning bɩ d mi n maand sũ-kiir ne d taabã. w20.02 14 s. a 1-3

Daar a ye, a Zeova yãka vʋʋsem sõngã sẽn da be a Moyiiz zugã n ning Israyɛll kãsem-dãmb sẽn da yas sɛk-roogã sɛɛgẽ. Sẽn yɩ bilfu, a Moyiiz wʋmame tɩ kãsem-dãmb a yiib sẽn da pa yi n kẽng sɛk-roogẽ wã paama vʋʋsem sõngã me, n maand wa no-rɛɛsdba. A Zozuwe yeela a Moyiiz t’a gɩdg-b tɩ b ra maan woto ye. A Moyiiz manesem yɩɩ wãna? A pa maan sũ-kiiri, a Zeova sẽn kɩt tɩ kãsem-dãmb a yiibã me maand wa no-rɛɛsdbã ye. A sẽn yaa sik-m-meng soabã, a pʋd n maana sũ-noog b yĩnga. (Sõd. 11:24-29) Yam-bʋg la d tõe n dɩk a Moyiiz mak-sõngã pʋgẽ? Yãmb sã n yaa kãsem-soaba, rẽ yĩnga y ra tʋmda tigingã tʋʋmd y sẽn nong wʋsgo, tɩ b wa kos-y tɩ y zãms ned tʋʋm-kãng bɩ? B sã n kos-y tɩ y zãms saam-biig a to tʋʋm-kãng sẽn na yɩl tɩ yẽ me wa tõog n maand sõma, y sã n yaa sik-m-meng soab wa a Moyiizi, y pa na n tags tɩ na n wa kɩtame tɩ b pa le nand-y wa pĩndã ye. Y na n pʋd n dat n sõng-a-la ne sũ-noogo. w20.02 15 s. a 9; 17 s. 10-11

Bãag ning tõe n kɩtame tɩ d sũur sãam wʋsgo, hal tɩ d wa tagsdẽ meng tɩ d pa le tar yõod ne ned baa a yembr ye. D sẽn mi tɩ nebã neeme tɩ bũmb kẽer la d pa le tõe n maanã, wall sẽn lebg tɩlɛ tɩ nebã sõng-dã tõe n wa yaa yãnd ne-do. Baa nebã pa mi tɩ d bẽedame, tõnd mengã sẽn ne tɩ bũmb kẽer la d pa le tõe n maanã tõe n kɩtame tɩ yãnd tar-do. Sã n wa yaa woto, a Zeova kengda d raoodo. Wãn to? A Zeova kɩtame tɩ b gʋls gom-nood wʋsg Biiblã pʋgẽ, goam sẽn tẽegd tõnd tɩ baa d sã n bẽedame, d tara yõod wʋsg a Zeova nifẽ. (Yɩɩn. 31:20; 41:4) D sã n karemd Biiblã, la d karemd-a n yɩlemdẽ, a Zeova tõe n sõng-d lame tɩ d mao tɩ tagsa sẽn komsd raood ra tõog-d ye. Bãag sã n tar-y n namsdẽ, bɩ y bas y yam t’a Zeova mii yãmb toogã fãa. Yõk-y-yã a sɛɛg n kos a sõngr sẽn na yɩl n tall tagsg sẽn zems y yellã zugu. Gẽes-y Biiblã pʋgẽ, tɩ y na n yãa a Zeova goam sẽn belsde. Bʋgsd-y vɛrse kẽer zugu, vɛrse-rãmb sẽn wilgd t’a Zeova sɩd nanda sẽn tũud-b yẽ wã. Woto, y na n yãame t’a Zeova sõngda neb nins fãa sẽn maand sɩd ne-a wã.—Yɩɩn. 84:12. w20.01 15-16 s. a 9-10; 17 s. 12

A Izaak ra yaa arzɛk soaba, tɩ Filisti nebã yik n maand sũ-kiir ne-a. (Sɩng. 26:12-14) B tol n yẽda buls nins koom a sẽn da yãkd n yũnugd a rũmsã. (Sɩng. 26:15, 16, 27) Wa Filisti nebã, neb me n be rũndã-rũndã, n maand sũ-kiir ne neb nins sẽn tar n yɩɩd bãmbã. B tʋlgda bũmb nins b taabã sẽn tarã, la pa rẽ bal ye. B raab yaa b pʋd n tõog tɩ b taabã bõn b sẽn tarã. Zʋɩf-rãmbã tũudmã taoor dãmb ra maanda sũ-kiir ne a Zeezi, nebã wʋsg sẽn da pẽgd-a wã yĩnga. (Mat. 7:28, 29) A Zeezi ra yaa Wẽnnaam tʋm-tʋmda, n da zãmsd nebã sẽn yaa sɩdã. Baa ne rẽ, tũudmã taoor dãmb ra yelgda ziri toor-toor n na n sãam a Zeezi yʋʋrã. (Mark 15:10; Zã 11:47, 48; 12:12, 13, 19) Yam-bʋg la d tõe n dɩk kiba-kãnga pʋgẽ? D segd n gũusda sẽn na yɩl n da wa maand sũ-kiir ne d tẽed-n-taag sẽn tar zʋg-sõma, tɩ tigingã neb pẽgd-a ye. D pʋd n tog n modgdame n na n dɩk nin-kãng togs-n-taar n nong nebã.—1 Kor. 11:1. w20.02 15 s. a 4-5

Mams-y wa yãmb sẽn da na n zĩndẽ Pɛrs soolmẽ wã, na maan yʋʋm 2500 ne rũndã. Yãmb tara y zu-loɛɛga, n dat n tɩ togs tẽngã rĩmã. Rẽ n so tɩ yɩ tɩlɛ tɩ y tog sore, n kẽng Suuz na-tẽngẽ wã. La y mii vẽeneg tɩ y pa tõe n paam n ta rĩmã nengẽ, t’a pa reng n kõ-y sor ye. Y sã n kɩɩs noorã, b tõe n kʋ-y lame. Tõnd sẽn paam t’a Zeova pa wa Pɛrs rĩmã noom-d-la wʋsgo. Rĩm ka be t’a naamã la a pãngã kolg a Zeova ye. La baa ne rẽ, a sakdame tɩ d tõe n pẽneg-a sẽn yaa wakat ning fãa. A pʋd n datame tɩ d bas d yam n gom ne-a. Baa ne a Zeova sẽn tar waoogr yʋy wʋsgã, wala Naanda, Sẽn-tõe-a-fãa la Saasẽ pãng soabã, a sẽn nong-dã yĩnga, a ratame tɩ d boond-a tɩ d “Ba.” (Mat. 6:9) D sũur yaa noogo, d sẽn mi t’a Zeova ratame tɩ d ning d yamẽ t’a yaa d Ba sẽn nong-d wʋsgã. Zemsame tɩ d bool a Zeova tɩ d Ba, bala yaa yẽ maasem yĩng la d sẽn vɩ wã. (Yɩɩn. 36:10) A sẽn yaa d Ba wã, yaa tɩlɛ tɩ d sakd-a. D sã n maand a raabã, d na n paama bark wʋsgo. (Ebre. 12:9) Wala makre, d na n wa paam n vɩɩmda wakat sẽn kõn sa. Wʋsg na n yɩɩ tẽngã zugu, tɩ kẽer yɩ saasẽ. w20.02 2 s. a 1-3

D raabã yaa d sõng neb nins d sẽn zãmsd Biiblã tɩ b tẽebã bɩ. (Efɛ. 4:13) Ned sã n sak tɩ d na n zãms-a Biiblã, yaa zãmsgã sẽn na n naf yẽ mengã to-to wã yell la a wae n tagsd n yɩɩda. La a sẽn nong a Zeova to-to wã sã n paasdẽ, a na n wa tagsda a sẽn tõe n maan n sõng neb a taabã me, baa tigingã nebã. (Mat. 22:37-39) Sã n mikame tɩ zemsame, bɩ y wilg-a tɩ yẽ me tõe n kõta ligd n teend Rĩungã tʋʋmde, la tɩ yaa zu-zẽkr bũmbu. Wilg-y karen-biigã a sẽn tõe n maane, a sã n wa tar zu-loɛɛga. Wala makre, y karen-biig sẽn yaa koe-moond sẽn nan pa reeg lisg sã n wa togs yãmb tɩ tigingã ned n sãam a sũuri, y na n maana wãna? Y pa segd n bao n wilg ãnd n tar bʋʋm ye. Sẽn são yaa y wilg-a Biiblã sẽn yet bũmb ning mo-yõsã welgr wɛɛngẽ wã. Rẽ, a bãngdame t’a tõe n yãka yam n kõ a soabã sugri, la t’a sã n pa tõe rẽ, a segd n tɩ maaga a yĩng n gom ne-a, a sẽn dat tɩ laafɩ le zĩnd b sʋkã yĩnga. (Ges-y Matiye 18:15.) Sõng-y-yã-a t’a bãng a sẽn na n tɩ yeel a soabã bũmb ningã. w20.01 5-6 s. 14-15

Tõnd sã n pʋʋsd n kot a Zeova sugri, n sakd kiblgu, la d maood ne d sũur fãa n da yɩlemd d yel-wẽnã, wilgdame t’a Zeova sẽn yaa sugr soabã nooma tõndo. Sẽn maan-a yel-wẽnd sã n maan woto fãa, a le paamda sũur pʋgẽ bãane. D sẽn paam n miẽ t’a Zeova “pẽe sũ-sãang rãmbã,” la t’a “fãagda sũ-pa-noaang rãmbã,” kengda d raood wʋsgo! (Yɩɩn. 34:19) Dũniyã saab sẽn tar kolgrã, bũmb nins sẽn wat ne yɩɩrã me tara paasgo. Yell sã n wa kɩt tɩ y maand yɩɩre, pʋʋs-y-yã a Zeova, n bao a sõngr tao-tao. Zãms-y Biiblã n zulgi. Tẽeg-y-yã a Ana ne a Poll la a Davɩɩd yelle, n dɩk yam b ned kam fãa kibar pʋgẽ. Kos-y y saasẽ Ba wã t’a sõng-yã, tɩ y bãng bũmb ning sẽn kɩt tɩ y maand yɩɩrã. (Yɩɩn. 139:23) Bas-y t’a sõng-y ne y zu-loeesã, n tʋk y zɩɩbã. Sẽn yɩɩd fãa, sã n yaa zu-loɛɛg y sẽn mi tɩ y sẽn tõe n maanã pa waooge, wall y pʋd n pa tar a tɩɩm. Rẽ, y na n tõog n yeela wa yɩɩn-gʋlsdã. A yeela a Zeova a yɩɩll pʋgẽ yaa: ‘Yɛl wʋsg sã n wa be m pʋgẽ n namsd-ma, yãmb sẽn belsd maamã kõt-m-la sũ-noogo.’—Yɩɩn. 94:19. w20.02 24 s. 17; 25 s. 20-21

Gɛrkã gom-bil ning b sẽn lebg tɩ “Wẽnnaam n vẽnegã” võor meng-mengã yaa “Wẽnnaam n fʋʋse.” Sɩd me, tũu ne Wẽnnaam vʋʋsmã t’a goamã wa Biiblã gʋlsdbã yamẽ tɩ b gʋlse. D sã n karemd Biiblã la d bʋgsdẽ, Wẽnnaam raabã kẽeda d yamẽ wã la d sũurẽ wã. Gom-kãens n wat n kɩt tɩ d rat n mao tɩ d sẽn vɩ to-to wã zems ne Wẽnnaam raabã. (Ebre. 4:12) La d sã n dat tɩ vʋʋsem sõngã sõngd-d sõma, yaa tɩlɛ tɩ d bao sẽk n karemd Biiblã n pa vaandẽ, la d bʋgsd d sẽn karemdã zug neere. Rẽ, d na n maoodame tɩ d sẽn yet la d sẽn maand fãa zemsd ne Biiblã. Sẽn paase, d segd n tigimda taab n waoogd Wẽnnaam. (Yɩɩn. 22:23) D tigissã sasa, d paamda vʋʋsem sõngã sõma! (Vẽn. 2:29) D sã n tigim taaba, d pʋʋsd n kota vʋʋsem sõngã, n yɩɩnd Rĩungã yɩɩl sẽn tik Biiblã zugã, la d kelgd sagls sẽn be Biiblã pʋgẽ. Leb n yaa ne vʋʋsem sõngã maasem me la b yãkd saam-biis nins sẽn wɛgsd saglsã tɩ d kelgdẽ wã. Vʋʋsem sõngã me n sõngd saam-bi-pogsã tɩ b segend b sõssã, n wat n sõsd tɩ d kelgdẽ. D sã n dat tɩ vʋʋsem sõngã sõngd tõnd sõma, yaa tɩlɛ tɩ d reng n segl d sẽn dat n yeel tigissã sasa wã. w19.11 11 s. 13-14