Sig-noya

A Zã sẽn yã sẽn na n tɩ vɩɩmd-b saasẽ wã poore, a yãa “kʋʋn-kãsenga.” D pa mi b sõorã takɩ wa neb tus-koabg la tus pis-naas la a naasã sõorã ye. Bõe la b togs nin-kãensã zugu? B yeela a Zã yaa: “Nin-kãensã yaa neb nins sẽn põs to-kãsengã sasa wã, la b pegsa b kasaabsã Pe-bilã zɩɩmã pʋgẽ n kɩt tɩ b lebg peelse.” (Vẽn. 7:14) Kʋʋn-kãsengã neb na n põsa to-kãsengã sasa n vɩɩmd tẽngã zugu, la b paam bark ka tɛka. (Yɩɩn. 37:9-11, 27-29; Yel. 2:21, 22; Vẽn. 7:16, 17) B yãk-d lame tɩ d na n tɩ vɩɩmd saasẽ wall yaa tẽngã zug la d na n vɩɩmde, d getame tɩ d naaga neb nins yell b sẽn gom Vẽnegr sak a 7 wã pʋgẽ wã bɩ? D segd n getame tɩ d naagame. Na n yɩɩ wakat sul a yiibã fãa neb sẽn na n paam sũ-noog meng-menga. D sũur na n yɩɩ noog wʋsgo, d sẽn yãk yam n teel a Zeova naamã. w22.05 16 s. a 6-7

Yãmb zoe n yãka yam n na n maan bũmb sẽn tar yõod wʋsg bɩ? Sã n yaa rẽ, sãmbg kae tɩ y pʋʋsa a Zeova n kos yam, y sẽn mi tɩ rẽ yaa tɩlɛ ne-yã yĩnga. (Zak 1:5) Rĩm a Salomo yeelame: “Yam n yaa bũmb ning sẽn tar yõod n yɩɩdã.” (Yel. 4:7) Yaa vẽeneg t’a Salomo ra pa gomd yam buud fãa ninsaal sẽn tar yell ye. A ra gomda yam ning sẽn yit Wẽnnaam a Zeova nengẽ wã yelle. La rẽ yĩnga, yam ning sẽn yit a Zeova nengẽ wã tõe n sõnga tõnd tɩ d tõog n mao ne d zu-loeesã rũndã-rũndã bɩ? N-ye, tõeeme. Neb a yiib n zĩnd pĩnd wẽndẽ wã n da tar yam-kãsenga, hal tɩ b ra pẽgd-b rẽ yĩnga. Bũmb a ye me d sẽn tõe n maan n paam yam wʋsgo, yaa d sẽn na n tũud sagls nins b sẽn kõ wã. Pipi, a Salomo. Biiblã yeelame tɩ “Wẽnnaam kõo a Salomo yam ne bãngr hal wʋsgo, la minim wʋsgo.” (1 Rĩm. 4:29) Yiibu, a Zeezi. A yamã ra ka to ye. (Mat. 12:42) Biiblã pĩnd n goma a Zeezi yell n yeel yaa: “A Zeova vʋʋsmã na n siga a zugu, n kɩt t’a tall yam ne yam-vẽenem.”—Eza. 11:2. w22.05 20 s. a 1-2

Baa d yʋʋmã sã n vẽsgame, d tõe n yãka d sẽn dat n maan a Zeova tũudmã pʋgẽ, la d sɩd modg n wa maan rẽ. D gom saam-bi-poak a ye yʋʋr sẽn boond t’a Bevɛrli yelle. A tara yʋʋm 75. A bẽeda bã-kɛgeng sẽn kɩt tɩ kẽnã yaa toog ne-a. A ra ratame n kẽes a toog sõma n bool nebã tɩ b wa a Zeezi kũumã tẽegrã. Rẽ n so t’a yãk bũmb takɩ a sẽn dat n maan rẽ wɛɛngẽ. A sẽn tõog n kẽes a toog n bool nebã wa a sẽn datã, a sũur yɩɩ noog wʋsgo. A sẽn modg n maan bũmb ningã sõnga neb a taab tɩ b kẽes b mens sõma koɛɛgã mooneg pʋgẽ. A Zeova nanda bũmb nins saam-biis la saam-bi-pogs nins yʋʋm sẽn vẽsgã sẽn maandã, baa ne b yɛlã sẽn kɩt tɩ b pa tõe n maan bũmb wʋsgã. (Yɩɩn. 71:17) Y sã n wa yãk yam n na n maan bũmbu, bɩ y modg tɩ yɩ bũmb sẽn pa yɩɩd y nug ye. Bɩɩsd-y zʋg-sõma sẽn na n kɩt tɩ y ta a Zeova yam. Zãms-y bũmb sẽn na n kɩt tɩ y paam minim, t’a Zeova wa tũnug ne yãmb n tʋm tʋʋm a siglgã pʋgẽ. Baood-y y sẽn tõe n maan n sõng y tẽed-n-taasã sõma n paase. Wa a Tɩmote, a Zeova na n ning-y-la barka, tɩ “nebã fãa yã vẽeneg tɩ y bɩtame.”—1 Tɩm. 4:15. w22.04 27 s. 18-19

La yaa wãn to yẽ, y sã n maan y sẽn tõe fãa n na n sõng y kambã, tɩ y biig a ye wa yeel-y t’a pa rat n tũ a Zeova? Ra tags-y tɩ yaa yãmb n pa tʋm y tʋʋmdã sõma ye. A Zeova kɩtame tɩ d fãa tõe n yãk d toorẽ yam, y kambã me sẽn naage, rat n yeel tɩ b sã n na n tũ-a lame bɩ b pa na n tũ-a. Ra koms-y raood n tagsdẽ t’a pa na n le wa ye. Tẽeg-y biig sẽn menemã yel-bũndã yelle. (Luk 15:11-19, 22-24) Biigã tɩ tʋma tʋʋm-wẽns wʋsgo. La baasgo, a wa n lebg n waame. Roagdba, a Zeova kõo yãmb tʋʋmd sẽn tar yõod wʋsgo. A ratame tɩ y sõng y kambã tɩ b wa tũ-a. (Yɩɩn. 78:4-6) Pa tʋʋmd sẽn yaa nana ye. La d pẽgd-y-la wʋsgo, y sẽn maand y sẽn tõe fãa n na n sõng y kambã tɩ b wa nong a Zeova, la y wub-b a Zeova kiblgã la a saglsã pʋsẽ wã. Y tõe n basa y yam tɩ d saasẽ Ba wã sẽn nong-dã sũur na n yɩɩ noog ne-yã.—Efɛɛ. 6:4. w22.05 30-31 s. 16-18

Sẽn na yɩl tɩ laafɩ la zems-n-taar zĩnd tigingã pʋgẽ, ned kam fãa tog n maanda a sẽn tõe fãa. Yɩɩ woto ne pipi kiris-nebã. B ra tara minim la tʋʋm toor-toore. (1 Kor. 12:4, 7-11) La woto pa wa ne wags-taab la welgr b sʋk ye. A Poll pʋd n sagl-b lame tɩ b ned kam fãa modg n maan a sẽn segd n maanã, sẽn na yɩl tɩ “Kiristã yĩngã paam pãnga.” A Poll yeela Efɛɛz kiris-nebã yaa: “Yĩngã wil fãa sã n tʋmd sõma, sõngdame tɩ yĩngã bɩtẽ, a sẽn paamd pãng nonglem pʋgẽ wã yĩnga.” (Efɛɛ. 4:1-3, 11, 12) Neb nins sẽn sak n tũ a Poll sẽn yeelã sõngame tɩ laafɩ la zems-n-taar zĩnd tigimsã pʋsẽ, wa sẽn yaa to-to d tigimsã pʋsẽ rũndã-rũndã wã. Modg-y n da rɩkd y meng n makd ne y taabã ye. Rɩk-y yam a Zeezi mak-sõngã pʋgẽ, la y modg n tall a zʋg-sõma wã buudu. Kɩs-y sɩd t’a Zeova yaa “tɩrlem soaba, n pa na n yĩm yãmb tʋʋmdã” ye. (Ebre. 6:10) A sũur nooma ne-yã, y sẽn maand y sẽn tõe fãa n na n ta a yamã yĩnga. w22.04 14 s. 15-16

D sẽn mi tɩ pa tõnd n yãkd a Zeova sã n na n kõo ned sẽn maan yel-wẽnd sugrã noom-d-la wʋsgo. La bũmb la d tõe n yãk yam n maane. Yaa bõe? Wakat ninga, ned tõe n maana bũmb n beeg-d n wa maand a bãngẽ, n kos-d sugr wall n pa kos-d sugr ye. Baa ne rẽ, d tõe n yãka yam n kõ-a sugri, n da tall sũ-kẽk bɩ n yik d sũur ne-a ye. Togs sɩdã, yɩl n wa tõog n kõ a soabã sugr tõe n kaoosame, la baood modgr me, sẽn yɩɩd fãa a sẽn maan bũmb ningã sã n sãama d sũur wʋsgo. Yʋʋmd 1994 bõn-bɩʋʋng kiuug rasem 15 Gũusg Gasgã pʋgẽ, b yeelame yaa: “F sã n kõ ned sugri, pa rat n yeel tɩ f getame t’a sẽn maanã pa wẽng ye. D sẽn yaa kiris-nebã, kõ ned sugr rat n yeelame tɩ f rɩk yellã n bas ne a Zeova. Yẽ la bʋ-kaood sẽn yaa tɩrg ãndũniyã gill zugu. La wakat ning a sẽn yãkã sã n ta, a na n gesame tɩ yellã manege.” w22.06 9 s. a 6-7

A Zeova pʋlmame tɩ tõnd wakatã, a na n tigma neb sẽn yit tẽns toor-toore, n yaa buud toɛy-toɛya, la sẽn gomd buud-goam toor-toore, tɩ b naag taab tũudum hakɩɩkã pʋgẽ n tũud-a. Rũndã-rũndã, nin-kãensã sullã n yaa “kʋʋn-kãsengã.” (Vẽn. 7:9, 10) Baa ne b sẽn yaa rap la pagb la kamb sẽn yit tẽns toor-toorã, b naaga taab wa zak a ye neba, tɩ laafɩ la zems-n-taar be b sʋka. (Yɩɩn. 133:1; Zã 10:16) B tũnugda ne segb buud fãa n togsd nebã tɩ manegr n wate. (Mat. 28:19, 20; Vẽn. 14:6, 7; 22:17) Y sã n yaa kʋʋn-kãsengã neda, sãmbg kae tɩ y sẽn saagd tɩ manegr n watã yaa bũmb sẽn tar yõod wʋsg y nifẽ. A Sʋɩtãan pa rat tɩ d saag tɩ manegr n wat ye. A ratame tɩ d tẽ t’a Zeova pa na n pids a pʋlemsã ye. A Sʋɩtãan sã n tõog tɩ d pa le tẽed tɩ manegr n wate, d na n komsa raood hal n tõe n wa bas a Zeova tũubu. w22.06 20-21 s. a 2-3

D sẽn saagd n na n wa paam bũmb ningã sõngda tõnd tɩ d tall sũur pʋgẽ bãane. Tẽeg-y t’a Zeezi ra pĩnd n togsame tɩ b na n namsa tõnd d tẽebã yĩnga. (Zã 15:20) Dẽnd d sã n bʋgsd bũmb ning d sẽn saagd n na n wa paam beoog-daarã zugu, sõngd-d lame tɩ d ket n tũud a Zeova. D ges a Zeezi sẽn da saagd n na n wa paam bũmb ningã sẽn sõng-a to-to t’a kell n yals kãn-kãe, baa ne a sẽn da mi t’a na n wa kii kũ-toaagã. Yʋʋmd 33 Pãntekotã daare, tẽn-tʋmd a Pɩyɛɛr goma bãngr-gomd ning sẽn be Yɩɩn-sõamyã sebrã pʋgẽ wã yelle, sẽn wilgd a Zeezi manesmã la a tagsgã sẽn da yaa to-to wã. Be, b yetame yaa: “Mam na n vɩɩmda ne saagre, bala yãmb pa na n bas maam Yaoogã pʋgẽ, wall y bas y sɩd soabã t’a põog ye. . . . Y na n kõo maam sũ-no-kãseng y taoore.” (Tʋʋ. 2:25-28; Yɩɩn. 16:8-11) A Zeezi ra kɩsa sɩd tɩ Wẽnnaam na n vʋʋg-a lame, la t’a na n paam n le tɩ zĩnda ne a Ba wã saasẽ.—Ebre. 12:2, 3. w22.10 25 s. a 4-5

Daar a ye, a Zak ne a Zã sẽn yaa a Zeezi tẽn-tʋmdbã kɩtame tɩ b ma tɩ kos a Zeezi, t’a kõ-b zĩig sẽn tar ziir Wẽnnaam Rĩungã pʋgẽ. (Mat. 20:20, 21) A Zak ne a Zã manesmã wilgdame tɩ b ra yaa wuk-m-mens rãmba, la neb sẽn dat n lʋɩ b taabã taoore. (Yel. 16:18) Pa a Zak ne a Zã bal n tall manesem sẽn pa sõma wakat kãng ye. Gũus-y n ges-y tẽn-tʋmdb a taabã me manesem sẽn yɩ to-to. “Piigã sẽn kellã sẽn wa n wʋm dẽ wã, b sũyã yika ne ba-biis a yiibã.” (Mat. 20:24) D tõe n yeelame t’a Zak ne a Zã la tẽn-tʋmdb a taabã goma taab gom-kãse. Wãn to la a Zeezi welg yellã? A sũur pa yik ne a tẽn-tʋmdbã ye. A Zeezi pa yeel t’a na n tɩ baoo tẽn-tʋmdb a taab sẽn são-ba, rat n yeel tɩ neb sẽn tar sik-m-meng wʋsgo, la sẽn na n nong taab wakat fãa ye. A pʋd n maaga a yĩng n gom ne-ba, bala a miime tɩ b yaa pʋ-peelem dãmba. (Mat. 20:25-28) A Zeezi kell n wilg-b lame t’a nong-b lame. w23.03 28-29 s. 10-13

Y tõog n maana bũmb wʋsgo. Wala makre, y maaga y yĩng n zãms Biiblã. Tõe meng tɩ y maana rẽ yʋʋm wʋsgo. Woto sõng-y lame tɩ y kɩs sɩd tɩ Biiblã yaa Wẽnnaam Gomde. La pa rẽ bal ye. Y wa n bãnga soab ning sẽn kɩt tɩ b gʋls Biiblã, hal n nong-a. Yãmb nonglmã ne a Zeova wã talla paasgo, hal tɩ y wa rɩk y meng n kõ-a n deeg lisg n lebg a Kaset soaba. Woto yaa yam-yãkr sẽn yaa sõma wʋsgo. Yaa sɩd tɩ nand tɩ y wa reeg lisgu, zu-loees wʋsg n kɩt tɩ ra yaa toog ne-y tɩ y maan sɩd ne a Zeova. La y lisgã poor me, y na n paama zu-loees a taaba. A Sʋɩtãan na n makame sẽn na yɩl tɩ y sẽn nong a Zeova to-to wã pãng booge, la tɩ y wa bas a tũubu. (Efɛɛ. 4:14) La y pa segd n bas t’a tõog-y ye. Bõe n tõe n sõng-y tɩ y kell n maan sɩd ne a Zeova, la y kell n tũ-a wa y sẽn pʋlm-a wã? Yaa y sẽn na n “modg” n kell n yɩ kiris-ned tẽeb sẽn bɩ.—Ebre. 6:1. w22.08 2 s. a 1-2

Zakã pʋgẽ, ned fãa segd n gũusame n da yelgd zakã yɛl kẽer ye. Wala makre, pag tõe n tara a sẽn maande, t’a sɩdã mi n laadẽ. Rẽ yĩnga, a na n dɩka rẽ n togs neb a taaba, n ning a pagã yãnd sɩda? A bada! A sẽn nong a pagã, a pa na n maan bũmb sẽn na n sãam a sũur ye. (Efɛɛ. 5:33) Kom-bɩɩsã me ratame tɩ b nand-ba. Roagdbã pa segd n yĩm rẽ ye. Rẽ wã, b pa segd n dɩkd b kambã kongrã n togsd neb a taaba, n wa ning-b yãnd ye. (Kolo. 3:21) Kambã me segd n maanda gũusgu, n da togsd neb yɛl sẽn tõe n wa kɩt tɩ zakã neb kẽer paam yãnd ye. Zakã ned fãa sã n maand a sẽn tõe n da yelgd zakã yɛla, zakã rãmb zems-n-taarã paasdame. w22.09 10 s. a 9

A Zeova goma ne a Zoobe, n wilg-a tɩ yẽ yamã ka koaka, la t’a nonga a bõn-naandsã n get b yell neere. A goma rũms wʋsg a sẽn naan tɩ b tar pãng la yam yelle. (Zoob 38:1, 2; 39:9, 13, 19, 27; 40:15; 41:1, 2) A Zeova leb n tũnuga ne bi-bɩɩg a ye sẽn yaa wẽn-sakd t’a yʋʋr boond t’a Elihu, n keng a Zoob raood la a bels-a. A Elihu sõnga a Zoob t’a bãng tɩ wakat fãa a Zeova keooda neb nins sẽn tũud yẽ wã, b sẽn tõogd toogã yĩnga. La a Zeova leb n kɩtame t’a Elihu sagl a Zoob ne nonglem. A Elihu tẽega a Zoob tɩ ninsaal pa tõe n dɩk a meng n mak ne a Zeova sẽn yaa ãndũniyã fãa Naandã ye. Woto sõnga a Zoob t’a pa le tags a mengã yell tɩ loog noor ye. A Zeova leb n kõo a Zoob tʋʋmde. A yeel-a lame t’a pʋʋs a zo-rãmb a tãabã sẽn beegã yĩnga. (Zoob 42:8-10) Rũndã-rũndã, d sã n wa maood ne zu-loe-kɛgemse, bõe la a Zeova maand n sõngd tõndo? A Zeova pa gomd ne tõnd vẽeneg-vẽeneg wa sẽn yɩ to-to ne a Zoobã ye. Yaa ne Biiblã sẽn yaa a Gomdã maasem la a gomd ne tõndo.—Rom. 15:4. w22.08 11 s. 10-11

Kiris-neb sẽn yaa Zʋɩf-rãmb la bu-zẽms neb n da be Rom tigingã pʋgẽ. A Moyiiz Tõogã tũub sẽn wa n pa le yaa tɩlɛ wã, ra pa tɩlɛ me tɩ b bas rɩɩb kẽer Tõogã sẽn da gɩdgã rɩɩb ye. (Mark 7:19) Wakat kãng tɛka, Zʋɩf-rãmb kẽer sẽn da lebg kiris-neb ra basda b yam n dɩt rɩɩb buud toor-toore. La Zʋɩf-rãmb a taab sẽn da lebg kiris-neb ra pa sakd n maand woto ye. Woto waa ne welgr tigingã pʋgẽ. La tẽn-tʋmd a Poll wilgame tɩ b sẽn na n modg tɩ laafɩ kell n zĩnd b sʋkã n tar yõod n yɩɩda. A Poll sõnga a tẽed-n-taasã tɩ b bãng tɩ no-koɛɛmã pa manegd bãmb mengã, la tɩ tõe n wãa tigingã me. (Rom. 14:19, 20) Yẽ mengã sakame n na n bas bũmb kẽer a sẽn da maande, sẽn na yɩl n da wa yɩ sabab tɩ ned lak n lʋɩ ye. (1 Kor. 9:19-22) D sã n pa dem-dem ne yɛl nins sẽn yaa ned fãa ne a yam-yãkrã, tõe n sõngame tɩ laafɩ kell n zĩnd d sʋka, la paas d tẽed-n-taasã tẽeb pãnga. w22.08 22 s. a 7

D sã n baood n na n wa tʋm tʋʋmd takɩ a Zeova siglgã pʋgẽ, d na n ket n maanda modgre, hal n wa paam tʋʋm-kãnga. Yaa woto me, d sã n baood tɩrlem. La a Zeova na n sõng-d-la bilf-bilfu, tɩ d wa tõog n nong sẽn yaa tɩrga. (Yɩɩn. 84:5, 7) A Zeova tẽegda tõnd tɩ bao n maan sẽn yaa tɩrg pa bũmb sẽn yaa toog ye. (1 Zã 5:3) Pʋd n na n kogl-d lame. La d sɩd data koglg a woto daar fãa. Tẽeg-y zab-teed nins tẽn-tʋmd a Poll sẽn gomã yelle. (Efɛɛ. 6:14-18) Yaa sodaagã zab-teo-bʋg n kogend a sũurã? Yaa “tɩrlem kut fuugã” sẽn makd a Zeova noyã sẽn yaa tɩrsã. Wa kut fuugã sẽn tõe n kogl sodaag sũurã, a Zeova noyã sẽn yaa tɩrsã me tõe n kogla d sũurã, rat n yeel tɩ d tʋlsmã la d tagsa wã, tɩ d ra wa maan bũmb sẽn kɩɩsd a Zeova ye. Rẽ n so tɩ y segd n modg tɩ tɩrlem kut fuugã zĩnd zab-teed nins fãa kiris-ned sẽn segd n bobã sʋka.—Yel. 4:23. w22.08 29 s. 13-14

Yʋʋm tusa la woto, pagb la rap sẽn yaa wẽn-sakdb sẽn paamd sagls sẽn yaa sõma ne Wẽnnaam Gomdã maasem. Wãn to? Ne a Zeova sõngre, neb n da get seb-kãens n lebsd n gʋlsd n yɩlemdẽ. Baa nin-kãensã sẽn yaa neb sẽn pa zems zãngã, b ra maanda gũusg wʋsgo. Biibl-mit a ye goma Biiblã babg ning b sẽn da gʋls ne Ebre wã yell n yeel yaa: “D tõe n yeelame tɩ pĩnd wẽndẽ sɛbã b sẽn lebs n gʋls tɩ ket n be rũndã-rũndã wã sʋka, Biiblã bal goamã n kell n zems kɛpɩ ne a sẽn da yaa to-to pĩnd wẽndẽ wã.” Dẽnd d tõe n kɩsa sɩd tɩ goam nins d sẽn karemd Biiblã pʋgẽ rũndã-rũndã wã yaa a Zeova sẽn yaa soab ning sẽn kɩt tɩ b gʋls-a wã tagsa. “Kũun sẽn yaa sõma buud fãa, la kũun sẽn zems zãng buud fãa” yita a Zeova nengẽ. (Zak 1:17) Biiblã yaa kũun sẽn ka to a Zeova sẽn kõ-do. Ned sã n kõ-d kũuni, wilgdame t’a soabã mii tõndo, la a mi sẽn yaa sõma ne-do. Yaa woto me ne a Zeova, soab ning sẽn kõ-d Biiblã. D sã n bao n bãng a Zeova kũunã sõma, d bãngda bũmb wʋsg a zugu. Wala makre, d bãngdame t’a Zeova mii tõnd sõma, la a mi sẽn yaa sõma ne-dã. w23.02 2-3 s. a 3-4

Kũum vʋʋgrã sã n wa sɩng tẽngã zug Kirist yʋʋm tusr naamã sasa, na n yɩɩ sũ-noog tɛkẽ! D yãgdame n dat n le yã d nin-nongds nins sẽn maan kaalmã. Yaa woto me ne a Zeova. (Zoob 14:15) Tags-y n ges-y nebã sẽn na n kɩdem sũ-noog to-to tẽngã gill zugu, b sã n wa paam tɩ b nin-nongdsã vʋʋge. “Nin-tɩrsã” yʋy sẽn gʋls vɩɩm sebrã pʋgẽ wã na n “vʋʋga vɩɩm yĩnga.” (Tʋʋ. 24:15; Zã 5:29) Tõe tɩ d nin-nongds wʋsg na n vʋʋga Armagedõ poor bilfu. “Sẽn pa-b nin-tɩrsã,” rat n yeel tɩ neb nins sẽn pa paam weer sõma n bãng a Zeova, wall b pa paam segb n tũ-a ne b sũy fãa nand tɩ b maan kaalmã na n “vʋʋga bʋʋd yĩnga.” Na n yɩɩ tɩlɛ tɩ b zãms sẽn na n vʋʋg-bã fãa bũmb wʋsg a Zeova zugu. (Eza. 26:9; 61:11) Nebã fãa na n paama zãmsgo, hal t’a buud zɩ n zĩnd ye.—Eza 11:10. w22.09 20 s. a 1-2.

A Zeova wilgame t’a pãngã ne a naamã yɩɩda nanambs sẽn naag taaba. A sõnga Israyɛll nin-buiidã tɩ b zab n tõog n deeg Kãabg tẽngã zĩis wʋsgo. (Zoz. 11:4-6, 20; 12:1, 7, 24) Naoor wʋsgo, a Zeova wilgame t’a yaa Wẽnnaam sẽn ka to. Babilon rĩm a Nebukadnezaar sẽn wa n wuk a meng n gom ‘a pãngã, a tõogã la a naamã ziirã’ yellã, la a pa sak n deeg t’a Zeova n tog ne waoogrã, Wẽnnaam kɩtame t’a lebg gãeenga. A yamã sẽn wa n lebg n wa wã, a “pẽga Sẽn ka-a to wã,” la a sak n deeg t’a Zeova “naamã yaa naam sẽn paad wakat fãa.” A paasame tɩ “ned kae n tõe n gɩdg-a” ye. (Dãn. 4:30, 33-35) Yɩɩn-gʋlsdã yeelame: “Buud ning Wẽnnaam sẽn yaa a Zeova wã tara sũ-noogo, rat n yeel tɩ neb nins a sẽn yãk tɩ yaa yẽ rẽndã.” (Yɩɩn. 33:12) Dẽnd d tara bʋʋm n na n kell n maan sɩd ne a Zeova! w22.10 15-16 s. 13-15

Biiblã bãngr-goam wʋsg sẽn zoe n pidsã kɩtame tɩ d bas d yam tɩ bũmb nins Wẽnnaam sẽn pʋlem tɩ watame wã na n pidsame. D tagsg yaa wa yɩɩn-gʋlsdã. A pʋʋsa a Zeova n yeel yaa: “Mam data yãmb fãagrã ne m sũur fãa, bala mam teega yãmb gomdã.” (Yɩɩn. 119:81) Ne Biiblã maasem, a Zeova pʋlma tõnd tɩ d ‘bas d yam tɩ beoog na n yɩɩ neere.’ (Zer. 29:11) D pa teeg ninsaal n saagdẽ tɩ beoog na n yɩɩ neer ye. Yaa a Zeova pʋlemsã n kɩt tɩ d tẽed rẽ. Bɩ d kell n wɩng ne Biiblã bãngr-goamã zãmsgo, n maneg n kɩs sɩd ne Wẽnnaam Gomdã. Bũmb a to sẽn kɩt tɩ d tõe n kɩs sɩd ne Biiblã, yaa tɩ neb nins sẽn tũud a saglsã nafda wʋsgo. (Yɩɩn. 119:66, 138) Wala makre, pagb ne b sɩdb n da pa zemsd taaba, hal n da rat n kao b kãadmã. La masã, b zemsda taab n tar sũ-noogo, b sẽn tũud Biiblã saglsã yĩnga. B kambã me sũy noomame, b sẽn paam tɩ b roagdbã yaa kiris-neba, n get b yell sõma la b nong-bã.—Efɛɛ. 5:22-29. w23.01 5 s. 12-13

Tags-y pʋlems nins sẽn be Wẽnnaam Gomdã pʋgẽ wã pidsg sẽn zoe n naf yãmb mengã to-to. Wala makre, a Zeezi yeelame t’a Ba wã na n gesame tɩ d paamd bũmb nins sẽn yaa tɩlɛ ne-d vɩɩmã. (Mat. 6:32, 33) A Zeezi leb n yeelame tɩ d sã n kos a Zeova a vʋʋsem sõngã, a na n kõ-d lame. (Luk 11:13) A Zeova pidsa pʋlem-kãensã. Tõe tɩ y tagsda pʋlems a taab a Zeova sẽn pids tɩ naf yãmb yelle. Wala makre, a pʋlmame t’a na n kõ-y-la sugri, t’a na n belsa yãmba, la t’a na n kõ-y-la bũmb nins sẽn yaa tɩlɛ y tẽebã kengr yĩngã. (Mat. 6:14; 24:45; 2 Kor. 1:3) Y sã n tagsd bũmb nins Wẽnnaam sẽn zoe n maan n kõ yãmbã zugu, y na n maneg n kɩsa sɩd t’a na n pidsa bũmb nins a sẽn pʋlem t’a na n wa maan n kõo yãmbã. D kɩsa sɩd t’a Zeova na n pidsa a pʋlemsã. Yɩɩn-gʋlsdã yeelame: “Sũ-noog soab la ned ning . . . sẽn teeg a Wẽnnaam a Zeova wã. . . . Soab ning sẽn yaa sɩd soab wakat fãa wã.”—Yɩɩn. 146:5, 6. w22.10 27 s. 15; 28 s. 17

Bãngr-gomd ning sẽn wilgd tɩ b na n lebs n lugla tũudum hakɩɩkã pidsda rũndã-rũndã bɩ? N-ye. Wãn to? Yʋʋmd 1919 wã tɛka, neb milyõ-rãmb tõog n yii Babilon-kãsengã sẽn yaa ziri tũudmã fãa sẽn naag taabã yembd pʋgẽ. Nin-kãensã paamame tɩ b tall-b n kẽng zĩig sõmblem sẽn yɩɩd Israyɛll nebã kãabg tẽngã. B bee zĩig sẽn wõnd arzãn pʋgẽ. (Eza. 51:3; 66:8) Yʋʋmd 1919 wã tɛka, sẽn paam-b vʋʋsem sõng zaeebã sũur yaa noogo, b sẽn paam n be zĩig sẽn wõnd arzãn pʋgẽ wã. Neb nins sẽn saagd n na n wa vɩɩmd tẽngã zugã, rat n yeel tɩ “piis a taabã” me kẽe zĩ-kãnga, n paam t’a Zeova ningd-b bark wʋsgo. (Zã 10:16; Eza. 25:6; 65:13) Zĩig sẽn wõnd arzãnã bee zĩig fãa tẽngã zugu. Baa d sẽn vɩ zĩig ninga, d sã n modgd n tũud a Zeova ne d sũur fãa, d bee zĩig sẽn wõnd arzãnã pʋgẽ. w22.11 11-12 s. 12-15

Yaa toog ne-y tɩ y sak n deeg t’a Zeova sɩng n beeme, la t’a paada “wakat fãa” bɩ? (Eza. 40:28) Yaa toog ne neb wʋsg tɩ b sak n deeg rẽ. A Elihu goma Wẽnnaam yelle, n yeel yaa: “A yʋʋmã yaa kõn bãng n sõde.” (Zoob 36:26) La pa sã n yaa toog ne-d tɩ d sak n deeg bũmb la wilgd tɩ pa sɩd ye. Wala makre, tõe tɩ yaa toog ne-d tɩ d wʋm kʋʋrã wã sẽn tʋmd to-to wã võor sõma. La rẽ yĩnga, woto rat n yeelame tɩ kʋʋrã pa be bɩ? Ayo! Woto me, tõnd a ninsaalbã tõeeme n pa wʋmd a Zeova sẽn sɩng n beẽ, la a na n pa wakat fãa wã võor ye. La woto pa rat n yeel tɩ Wẽnnaam pa vɩ wakat fãa ye. Sɩdã d Naandã zugã pa be ne d sã n tõe n wʋma a võor ye. (Rom. 11:33-36) Nand tɩ Wẽnnaam naan ãndũniyã la wĩndgã sẽn kõt vẽenemã, a ra sɩng n beeme. A ra sɩng n beeme, nand meng t’a “yɛdg saasã.”—Zer. 51:15. w22.12 2-3 s. a 3-4

Wakat ninga, b tõe n kos-d lame tɩ d lʋɩ taoor n pʋʋse. Wala makre, saam-bi-poak tõe n kosa saam-bi-poak a to sẽn yãag-a t’a na n tɩ zãms ned Biiblã t’a lʋɩ taoor n pʋʋse. Saam-bi-poakã sẽn pa mi Biibl karen-biigã sõma wã yĩnga, a tõe n datame n pʋʋs zãmsgã baasgẽ. Woto wã, a na n bãnga a sẽn na n yeel bũmb ning a pʋʋsgã pʋgẽ, tɩ zems ne karen-biigã yɛl sẽn yaa to-to. Rĩungã roogẽ tigsg wall koe-moonegã yiib tigsg sasa, b tõe n kosa saam-biig t’a lʋɩ taoor n pʋʋse. Sã n wa yaa woto, saam-biigã pa segd n yĩm bũmb ning yĩng sẽn kɩt tɩ b tigim taabã ye. D pa segd n tũnug ne pʋʋsg n sagl tigingã nebã, wall n taas koees ye. Tigissã sasa, naoor wʋsgo, yɩɩllã ne pʋʋsgã zemsa minit a nu bala. Woto wã, saam-biig ning sẽn na n pʋʋsã pa segd n ‘gom wʋsgo,’ sẽn yɩɩd fãa a pʋʋsgã sã n na n yɩɩ tigsgã sɩngrẽ.—Mat. 6:7. w22.07 24 s. 17-18

A Zeezi pĩnd n togsame tɩ yaoolem wakatã, bã-longds na n zĩnda “zĩig-zĩiga.” (Luk 21:11) Wãn to la d sẽn mi rẽ wã tõe n sõng-d tɩ d kell n tall sũur pʋgẽ bãane? Bã-longds sẽn be rũndã-rũndã wã pa ling tõnd ye. D neeme t’a Zeezi sẽn yeel bũmb ningã sɩd pidsdame. Dẽnd d tara bʋʋm n na n tũ saglg ning a Zeezi sẽn kõ neb nins sẽn vɩ yaoolem wakatã. A yeelame yaa: “Ra bas-y tɩ rẽ yɛɛs-y ye.” Bã-longdg sasa, tõe n yɩɩ toog tɩ y tõog n ket n maand bũmb kẽer y sẽn da maand pĩndã. La y pa segd n bas tɩ rẽ kɩt tɩ y pa le zãmsd Biiblã la y kẽnd tigissã ye. Neb vɩɩm kibay sẽn be d sɛbã la d video-rãmbã pʋsẽ tẽegd-d lame, tɩ d saam-biisã la d saam-bi-pogsã ket n maanda sɩd ne a Zeova, baa ne zu-loe-kãensã buudã. w22.12 17 s. a 4, 6

A Zakoob wilga vẽeneg t’a ra nonga a biig a Zozɛf hal wʋsgo. (Sɩng. 37:3, 4) Rẽ kɩtame t’a kom-dibli a taabã ra maand sũ-kiir ne b yaoã. B sẽn wa n paam segbã, b yõka a Zozɛf n koos ne Madiyã neb sẽn da yaa lɛɛbdba. Lɛɛbdb-kãens talla a Zozɛf n maan kɩlo kobs n kẽng Ezɩpt n le tɩ koos-a. So-kãnga, yaa a Farawõ soda-naab a Potifaar n da a Zozɛfe. A Zozɛf vɩɩmã tiig n toeema zĩig pʋgẽ. A ra yaa a ba wã bi-nongr meng-menga, la masã a lebga yamb Ezɩpt tẽngẽ wã. (Sɩng. 39:1) Wakat kẽere, tõnd me maooda ne zu-loees sẽn “paamd ninsaalbã.” (1 Kor. 10:13) Bɩ tõeeme me tɩ d sẽn namsdã, yaa d sẽn yaa a Zeezi karen-biigã yĩnga. Wala makre, b tõe n yaanda tõndo, n kɩɩsd tõndo, wall n pʋd n namsd tõnd d tũudmã yĩnga. (2 Tɩm. 3:12) Sẽn wa n yaa zu-loɛɛg ning fãa la y maood ne, a Zeova tõe n sõng-y lame tɩ y paam tõogre. w23.01 14-15 s. a 3-4

Wakat ninga, d tõe n getame tɩ d segd n tɩ goma ne d saam-biig a sẽn maan bũmb n sãam d sũur yĩnga. Pipi, yɩta sõma tɩ d sok d meng yaa: ‘Mam wʋmda yɛlã vɩʋʋg sõma bɩ?’ (Yel. 18:13) ‘A sẽn maan bũmb ning n sãam m sũurã yɩɩ ne pʋ-toog bɩ?’ (Koɛ. 7:20) ‘Ma-me pa zoe n maan a buud sɩda?’ (Koɛ. 7:21, 22) ‘M sã n tɩ gom ne-a, pa na n maneg n keng yellã sɩda?’ D sã n maag d yĩng n bʋgs sogs-kãensã zugu, d sẽn nong d tẽed-n-taagã tõe n kɩtame tɩ d kell n bas yellã tɩ sa. D ned kam fãa tõe n wilgame t’a yaa kiris-ned hakɩɩka, a sã n kell n nong a tẽed-n-taasã baa ne b sẽn pa zems zãngã. D sã n maan woto, d na n sõnga neb a taabã tɩ b bãng tũudum hakɩɩkã, la b wa naag tõnd n waoog a Zeova. Bɩ d fãa modg n nong taaba, tɩ wilg tɩ d yaa kiris-neb hakɩɩka. w23.03 31 s. 18-19

Biiblã sõng-d lame tɩ d bãng tɩ Wẽnnaam zʋg-sõng ning sẽn yaa kãseng n tɩ yɩɩdã yaa a nonglmã. A Zeova sẽn nong-dã yĩnga, a pa kɩt tɩ b paas bũmb sẽn pa tɩlɛ ne-do, bũmb sẽn yɩɩd d nug ye. (Zã 21:25) A Zeova sẽn gomd ne tõnd ne waoogr Biiblã pʋgẽ wã wilgdame t’a nong-d lame. Biiblã pʋgẽ, a Zeova pa kõ noy ka tɛka, sẽn wilgd d sẽn segd n maan takɩ d vɩɩmã nens fãa pʋgẽ ye. A kɩtame tɩ b gʋls neb vɩɩm kibaya, bãngr-goama, la sagls sẽn tõe n sõng-d tɩ d bãng n maan sẽn yaa sõma d vɩɩmã pʋgẽ. Woto, Wẽnnaam Gomdã kɩtame tɩ d tõe n nong Wẽnnaam ne d sũur fãa, la d sakd a noyã. Biiblã wilgdame t’a Zeova nong-d-la wʋsgo. Wãn to? A Gomdã pida ne kibay sẽn wilgd ninsaalbã sẽn get yɛlã to-to wã. D tõe n wʋma neb nins yell b sẽn gomd Biiblã pʋgẽ wã yɛlã la b manesmã võore. Bala b ra ‘yaa ninsaalb wa tõndo.’ (Zak 5:17) Sẽn yɩɩd fãa, d sã n ges a Zeova manesem sẽn yɩ to-to ne nin-kãensã sẽn da yaa wa tõndã, d bãngdame t’a “tara nonglem wʋsgo, la t’a yaa nimbãan-zoɛta.”—Zak 5:11. w23.02 6 s. 13-15

Biiblã yaoolem sebrã sɩngr goamã yetame yaa: “Woto yaa a Zeezi Kirist vẽnegr Wẽnnaam sẽn kõ-a, t’a wilg a yembsã bũmb nins sẽn segd n maan ka la bilfã.” (Vẽn. 1:1) Rẽ n so tɩ d gũusd n get yɛl nins sẽn maand dũniyã gill zugã, la d baood n dat n bãng b sẽn pidsd Biiblã bãngr-goamã to-to wã. D ratame n gomd rẽ yell ne d taabã me. D sã n wa sõsd ne ned Biiblã bãngr-gomd zugu, d pa segd n gom goam sẽn tõe n wa ne no-koɛɛm ye. Bõe yĩnga? Bala d pa rat n gom goam sẽn tõe n wa ne welgr tigingã pʋgẽ ye. Wala makre, d tõe n wa wʋmda dũniyã nanambs sẽn wilgd b sẽn na n maan to-to tɩ zabr ning sa, tɩ laafɩ la bãan zĩndi. D sã n wa wʋm woto, d segd n gũusame n da wa yeel tɩ b sẽn togs bũmb ningã pidsda 1 Tesalonik rãmb 5:3 bãngr-gomdã ye. D segd n bao n bãnga bũmb ning a Zeova siglgã sẽn yeel rẽ wɛɛngẽ tɩ nan pa kaoosã. D sẽn yet bũmb ningã sã n tika a Zeova siglgã sẽn yeelã zugu, d sõngdame tɩ tigingã neb zemsd taab sõma, n tar “yam a ye la tagsg a ye.”—1 Kor. 1:10; 4:6. w23.02 16 s. a 4-5

Bõe yĩng tɩ y nong a Zeezi Kiristi? A Zeezi nonga sẽn yaa sɩda, sik-m-menga, la tɩrlem. Y sã n nonga sẽn yaa sɩd la tɩrga, sãmbg kae tɩ y nonga a Zeezi Kirist me. Tags-y n ges-y a Zeezi sẽn tall raood to-to n gom n teel sẽn yaa sɩd la sẽn yaa tɩrgã. (Zã 18:37) La wãn to la a Zeezi wilg t’a nonga sik-m-menga? A Zeezi mak-sõngã wilgdame t’a nonga sik-m-menga. Wala makre, a ra wilgda wakat fãa tɩ yaa a Ba wã n segd ne waoogr la pa yẽ ye. (Mark 10:17, 18; Zã 5:19) Y sã n tagsd a Zeezi sik-m-mengã yelle, pa kɩtd tɩ y rat n nong Wẽnnaam Biigã la y tũ-a sɩda? Yaa vẽeneg tɩ yaa woto. Bõe yĩng t’a Zeezi yaa sik-m-meng soaba? Bala, a nonga a Ba wã sẽn yaa sik-m-meng soabã la a rɩkd a togs-n-taare. (Yɩɩn. 18:35; Ebre. 1:3) A Zeezi sẽn dɩkd a Zeova togs-n-taar kɛpɩ wã pa kɩt tɩ y rat n pẽneg-a sɩda? w23.03 3-4 s. a 6-7

Biiblã gomda neb sull a yiib sẽn na n wa vʋʋg n vɩɩmd tẽngã zug yelle. Yaa “nin-tɩrsã ne sẽn pa-b nin-tɩrsã.” “Nin-tɩrsã” yaa neb nins sẽn tũ a Zeova ne b sũy fãa, b sẽn wa n ket n vɩ wã. La “sẽn pa-b nin-tɩrsã” pa maan woto ye. Sẽn mik tɩ sull a yiibã fãa neb na n vʋʋgame wã, rat n yeelame tɩ b yʋyã bee vɩɩm sebrã pʋgẽ bɩ? Nand tɩ “nin-tɩrsã” maan kaalem, b yʋyã ra zoe n bee vɩɩm sebrã pʋgẽ. La b yẽesa b yʋyã b kũumã poor bɩ? Ayo. Bala b ket n vɩɩ a Zeova pʋ-tẽerẽ wã. A Zeova “pa kũ-rãmb Wẽnnaam ye. A yaa nin-vɩɩs Wẽnnaam. Bala Wẽnnaam nifẽ b fãa vɩɩme.” (Luk 20:38) Woto rat n yeelame tɩ nin-tɩrsã sã n wa vʋʋg tẽngã zugu, b yʋyã na n ket n bee vɩɩm sebrã pʋgẽ. La na n ket n gʋlsa ne kerɛyõ, rat n yeel t’a Zeova tõe n yẽesame.—Luk 14:14. w22.09 16 s. a 9-10

A Zeova ra ratame tɩ pipi ninsaalã sũur yɩ noog ne bũmb nins a sẽn naanã. Wẽnnaam sẽn naan a Ãdmã poore, a ning-a-la arzãn pʋgẽ, n yeel-a t’a ko tẽngã la a ges a yelle, tɩ zĩigã fãa wa lebg arzãna. (Sɩng. 2:8, 9) Tags-y n ges-y a Ãdem sũur sẽn yɩ noog to-to, a sẽn wa n yã bõn-buudã sẽn bũnd n yitã, tɩ fɩlɛɛr-dãmbã me ningd puudã. A sũur da nooma wʋsgo, a sẽn paam n na n ges Edɛn zẽedã zĩig yellã. Sẽn paase, a Zeova yeela a Ãdem t’a pʋd rũms toor-toorã yʋyã. (Sɩng. 2:19, 20) A Zeova ra tõe n pʋda rũmsã yʋyã a toore. La a rɩka rẽ n bobl a Ãdem. Sãmbg kae tɩ nand t’a Ãdem pʋd rũng fãa yʋʋre, a maaga a yĩng n ges-a n bãng a sẽn yaa to-to, la a manesem sẽn yaa a soaba. A sũur tog n da nooma ne tʋʋm-kãnga. Sãmbg kae tɩ rẽ sõng-a lame t’a bãng t’a Zeova yamã ka to, la t’a sẽn naan bũmb ninsã fãa sɩd bee rasãnde. w23.03 15 s. a 3

Bõn-naand-kãsengã nao wã makda Garãnd Bertayn ne Etazĩni sẽn naag taab n yaa dũni gill yaoolem pãn-soaad Biiblã sẽn gomd a yellã. (Dãn. 2:31-33) Pãn-soaad a to pa na n wa ledg-a ye. Wẽnnaam Rĩungã na n wa sãama yẽ ne a goosneema-rãmbã fãa Armagedõ zabrã sasa. (Vẽn. 16:13, 14, 16; 19:19, 20) Wãn to la bãngr-gom-kãngã tõe n naf-do? A Dãniyɛll bãngr-gomdã leb n kõta kaset tɩ d vɩɩ dũniyã saab wakate. Sẽn yɩɩd yʋʋm 2 500, a Dãniyɛll pĩnd n togsame tɩ Babilon sẽn yaa dũni gill pãn-soaadã loogr poore, dũni gill pãn-soaadb a naas n na n zĩndi, n tall pãng wʋsg Wẽnnaam nin-buiidã zugu. Sẽn paase, a wilgame tɩ Garãnd Bertayn ne Etazĩni sẽn naag taab n yaa dũni gill pãn-soaadã n na n yɩ yaoolem soaba. Woto kɩtame tɩ d tõe n bas d yam tɩ ka la bilfu, Wẽnnaam Rĩungã na n sãama goosneema-rãmbã fãa la a soog dũniyã gilli. w22.07 4 s. a 9; 5 s. 11-12