Gũus-y y mens ne sɩmoni wã!
BRA geta a Sɩmo sẽn yit Samari wã wa nin-kãseng meng-meng a zãmaana neb sʋka. A vɩɩmda yʋʋm kob-yendẽ T.W., la a gĩnamoeemdã minund ra sooga nebã hal tɩ b ra yet a wɛɛngẽ: “Rao kãngã yaa Wẽnnaam pãng ninga sẽn boond tɩ kãsengã.”—Tʋʋma 8:9-11.
Baasg zãnga, a Sɩmo sẽn lebg kiris-ned sẽn deeg lisg poore, a yãa pãng sẽn yɩɩd pãng ning yẽ sẽn da wilgd pĩndã zĩig sẽn zãre. Ra yaa pãng ning b sẽn da kõ a Zezi tʋm-tʋmdbã, sẽn kɩt tɩ b tõe n kõ neb a taab vʋʋsem sõngã kũun sẽn yaa yel-soalmã. Woto yɩɩ bũmb sẽn ling a Sɩmo wʋsg hal t’a kãab tʋm-tʋmdbã ligd n kos woto: “Bɩ y kõ maam me pãng kãnga tɩ ned ninga fãa mam sẽn na n tik ne m nus bɩ a reeg Sɩɩg Sõngo.”—Tʋʋma 8:13-19.
Tʋm-tʋmd a Pɛɛr lenga a Sɩmo n yeele: “Sãam ne f ligda fãa, fo sẽn tẽed tɩ Wẽnnaam kũuna raada ne ligda yĩnga. Fo toor ka be ne yel-kãnga la fo ka tar pʋɩɩr ne-a ye, fo sũur sẽn ka tɩrg Wẽnnaam nifẽ wã yĩnga.”—Tʋʋma 8:20, 21.
Yaa Biiblã kɩba-kãngã pʋgẽ la gom-biig ning sẽn yaa “sɩmoni” wã yita. B wilga a võorã tɩ yaa “f sẽn na n maan yel-wẽnd n da bɩ n koos naam bɩ zu-nood egiliizã pʋgẽ.” Sẽn yɩɩd fãa, New Catholic Encyclopedia sak n deegame tɩ yʋʋm kob-gĩn a 9 soabã n digd yʋʋm kob-gĩn 11 soabã, “sɩmoni wã ra piuuga monastɛɛr dãmbẽ wã, egiliizã na-pʋgdsã, egiliizã taoor dãmba, la baa pap naamã baoob pʋgẽ.” The Encyclopædia Britannica (yʋʋmd 1878 rẽndã) yiisg a wɛ soabã wilgdame: “Kardino rãmbã tigsg pap yãkrã yĩngã kʋdemd vaeesg kɩtdame tɩ zãmsdã sɩd tags tɩ vot zɩ n maan tɩ sɩmoni pa kẽ sʋk ye, mik naoor wʋsgo, sẽn yɩɩd fãa, b maana sɩmoni wã kardino rãmbã tigissẽ sẽn solg tɩ yaa n sãage, n pa zoe yãnd lɛ-lɛ, la vẽeneg-vẽenega.”
Rũndã-rũndã kiris-neb hakɩkã segd n gũusa ne sɩmoni wã. Wala makre, kẽer tõeeme n kõ neb nins sẽn tõe n paas-b zu-noodã pẽgr sẽn loog noor bɩ kũun wʋsgo. Sẽn paas me, neb nins sẽn tõe n kõ zu-nood a woto wã tõe n wilga bak-n-sõng ne sẽn tar-b tõogã, la sẽn nong wʋsg n kõ-b kũunã. Zĩis a yiibã fãa tɩ loee ne sɩmoni, la Gʋlsgã kɩɩsda manesem a woto vẽenega. A Pɛɛr sagla a Sɩmo: “Dẽ yĩnga, bɩ f tek yam n kos sugri n bas f tags-wẽnsã n pʋʋs Zusoabã n paam sugri tagsg kãng sẽn be fo sũurẽ wã yĩnga [“fo mag-wẽng kãngã wã yĩnga,” New Jerusalem Bible], a sã n tõe n yɩ woto. Tɩ bõe, mam yãame tɩ sũ-toog n tar foom [“fo yaa zẽnem toaaga,” NW ], la fo bee yel-wẽna yembd pʋgẽ.”—Tʋʋma 8:22, 23.
Zu-noogo, a Sɩmo yãame t’a tʋlsem wẽngã pa reem yell ye. A bõosa tʋm-tʋmdbã woto: “Bɩ yãmb mens pʋʋs Zusoaba [“a Zeova,” NW ] mam yĩnga tɩ bõn-kãens fãa yãmb sẽn yeela kõn paam maam ye.” (Tʋʋma 8:24) B sẽn tũud zãmsg sẽn tar yõod wʋsg ning sẽn yit kɩba-kãngã pʋgẽ wã, kiris-neb hakɩkã modgdame n da rẽgem b mens ne sɩmoni wã ye.