Rĩungã koe-moondb togsdame

Sɩd Wẽnnaamã baoob paamda keoobo

YƲƲM kob-gĩnd piig soab S.D.T.W., Zida buud a yiibã rĩung ra pida ne ziri balengo. Baasg zãnga, yaa bõn-naands pʋʋsg sẽn piuug woto pʋgẽ la rao sũur sẽn da yaa tɩrg ne Wẽnnaam vɩɩmd-yã. A yʋʋrã ra yaa a Zozafate. No-rɛɛs a Zehu yeela woto a wɛɛngẽ: “Bõn-sõma la b yã fo nengẽ, bala, fo . . . segla f sũur n bao sɩd Wẽnnaamã.” (2 Kɩbaya 19:3, NW ) Woto me rũndã-rũndã, “yaoolem dayã, wakat tood a vɩɩmdg sẽn pa nana” wã pʋgẽ, neb milyõ rãmb n ‘segl b sũy’ n bao sɩd Wẽnnaam a Zeova. (2 Tɩmotɩ 3:1-5, NW ) Yaa kɩbar ning sẽn pʋgdã sẽn yit Togo sẽn be Afirik nen-taoorã n wilgd rẽ.

A Kazimiir karma Katolik lekollẽ la a ra rɩka a pipi kominyõ a sẽn da waa n tar yʋʋm a wɛ. Baasg zãnga, a sẽn da waa n tar yʋʋm 14, a Kazimiir da basa egiliizẽ wã kẽnde. Rẽ kɩtame t’a zoe rabeem, bala a tagsame t’a sã n pa kẽng Meesã, a ra na n wa baasa bugum yiri, bɩ pirgatoaar pʋgẽ.

Lekollẽ wã, a Kazimiir lagma ne kom-bɩɩs sull sẽn da tigimd taab vugr semen fãa n zãmsd Biiblã. Yẽ me sɩngame n karemd Biiblã a toore. Vugri, a Kazimiir karma Wilgr sebrã n yã t’a gomd we-rũng sẽn kõt rabeem sẽn yi mogrẽ wã yelle. (Wilgri 13:1, 2) A sẽn sʋk Biiblã zãmsdb sull taoor soabã rũn-kãng wɛɛngẽ, b leok-a lame tɩ rũngã ra yaa rũng sɩd-sɩda, la t’a sɩd ra na n puka mogrẽ wã n yi. Võor-wilgr kãngã namsa a Kazimiiri, bala a ra pa zãr ne Atlãntik mogrã noor ye. A sɩd ra kɩsa sɩd t’a ra na n zĩnda pipi neb nins we-rũngã sẽn na n dɩ wã sʋka.

A Kazimiir sɩngame n kẽgsd ligd sẽn na yɩl n tõog n zoe rasempʋɩɩgẽ wã rɩtg babgẽ wã sẽn na yɩl n põs we-rũngã. A togsa a karen-bi-taag a sẽn da rat n maan bũmb ningã. A karen-bi-taagã sẽn yaa a Zeova Kaset soabã yĩnga, a kõ-a-la bas-m-yam tɩ we-rũng sɩd-sɩd a woto ra pa na n puk n yi mogrẽ wã ye. Rẽ poor bilf bala, b ra boola a Kazimiir tigissẽ wã Rĩungã Roogẽ. A sũur yɩɩ noog ne tigissã la a sɩngame n kẽngd-b wakat fãa. A saka yirẽ Biibl zãmsg me.

A Kazimiir sẽn da bɩt a zãmsgẽ wã yĩnga, zak pʋgẽ kɩɩsg n sɩnge. A zakã neb ra balemda yaab rãmbã, la b ra rɩt maand nemd zɩɩm b sẽn pa yiisi. A Kazimiir sẽn wilg ne waoogr t’a pa na n wõb nemdã, b baoome n na n yɛɛs-a la b kos-a t’a yi zakã. A Kazimiir kell n maaga a menga, la b sẽn da baood n na n yɛɛs-a wã pa kẽng taoor ye. Baasg zãnga, kiis a tãab pʋgẽ, yaa nemd a woto bal la b ra wa n tẽgend tɩ zakã rãmb rɩ. Ra yaa toog ne a Kazimiir t’a paam rɩɩb n dɩ tɩ sek-a, la a tõoga toog ne rẽ la ne yel-tood a taaba.

A Kazimiir kell n bɩɩ tẽebã wɛɛngẽ hal n wa rɩk a meng n kõ n deeg lisgu. Kaoosg zugẽ, b yãk-a lame t’a yɩ ministɛɛrã sõgena, la a kẽnga Ministɛɛrã Zãmsg Lekoll kalaas a naas soabẽ wã. Masã, a sũur noomame t’a tʋmd wa yamleoog tʋm-tʋmd tʋʋmdã willẽ.

N-yẽe, ad rĩm a Davɩɩd goamã sɩd yɩɩ sɩd zĩis wʋsg pʋsẽ: “Fo sã n bao [a Zeova], fo na n yã-b lame.”—1 Kɩbaya 28:9.

[Picture on page 31]

A Kazimiir (sẽn be nug-rɩtgã) sũur noomame t’a tʋm wa yamleoog tʋm-tʋmd tʋʋmd-willẽ wã