Yãmb pʋʋsgã ‘segla wa wisd ’ bɩ?
“Bɩ mam pʋʋsgã segl wa wisd fo taoore.”—YƖƖL SÕAMYÃ 141:2, NW.
1, 2. Wisd b sẽn yõogdã ra makda bõe?
A ZEOVA WẼNNAAM kõo a no-rɛɛs a Moiiz noor t’a kɩt tɩ b segl wisd balengã yĩng n dɩk-a n tʋm Israɛll balengã sɛk-roogẽ. Wẽnnaam noorã ra baoodame tɩ b maan tɩdar sẽn tar bõn-kalem a naase. (Yikri 30:34-38) A sɩd talla yũ-noogo.
2 Tõogã kaool b sẽn kẽes Israɛll buudã a pʋgẽ wã ra tara wisd yõogr kãngã daar fãa. (Yikri 30:7, 8) Wisdã rɩk-n-tʋm ra tara võor zall bɩ? N-yẽe, bala yɩɩl-gʋlsdã yɩɩlame: “Bɩ mam pʋʋsgã segl wa wisd fo [a Zeova Wẽnnaam] taoore, tɩ mam nus-pʋsã zẽkr yɩ wa zaabr ka-bɛɛl kũuni.” (Yɩɩl Sõamyã 141:2, NW ) Wilgr sebrã
pʋgẽ, tʋm-tʋmd a Zã bilgda neb nins sẽn gũbg Wẽnnaam yĩngr geerã tɩ b tar sãnem laas sẽn pid ne wisdu. Kɩbarã vʋʋsem sõng sẽn vẽnegã yetame tɩ “wisdã yaa nin-sõmsã pʋʋsgo.” (Wilgri 5:8, NW ) Rẽnd woto, wisdã sẽn tar yũ-noogã yõogr makda pʋʋsg sẽn sakd reegr nins a Zeova sõgen dãmbã sẽn taasd wĩndg la yʋngo.—1 Tesalonik rãmba 3:10; Hebre dãmba 5:7.
3. Bõe n segd n sõng tõnd tɩ d ‘segl d pʋʋsgã wa wisd Wẽnnaam taoore’?
3 Tõnd sã n dat tɩ Wẽnnaam deeg d pʋʋsgã, d segd n pʋʋs-a-la ne a Zezi Kirist yʋʋre. (Zã 16:23, 24) La wãn-wãn la d tõe n paas d pʋʋsgã sõmblem? Be neere, Gʋlsgã makr a wãn gesg segd n sõnga tõnd tɩ d segl d pʋʋsgã wa wisd a Zeova taoore.—Yelbũna 15:8.
Taas-y pʋʋsgã ne tẽebo
4. Wãn-wãn la tẽeb tɩ loe ne pʋʋsg sẽn sakd reegre?
4 Tõnd sã n dat tɩ d pʋʋsgã rʋ n ta Wẽnnaam wala wisd sẽn tar yũ-noogo, d segd n pʋʋsa ne tẽebo. (Hebre dãmba 11:6) Kẽem dãmb sẽn yaa kiris-nebã sã n yã tẽebã bãad sẽn sakd b sõngrã sẽn tik Gʋlsgã zugã, b “tẽeb pʋʋsg na maag bãadã.” (Zak 5:15) Pʋʋsg b sẽn maan ne tẽeb tata tõnd yĩngr Ba wã yam, la yaa woto me ne Wẽnnaam Gomdã zãmsg sẽn naag ne pʋʋsgo. Yɩɩl gʋlsdã talla manesem sẽn be rasãnd a sẽn wa n gʋls tɩ: “Mam teesda m nus yãmb tõod nins mam sẽn nonga sẽnẽ la m tagsda yãmb datma yelle. Bɩ y zãms maam yẽesem ne bãngre, tɩ bõe, mam tẽeda yãmb tõodo.” (Yɩɩl Sõamyã 119:48, 66) Bɩ d ‘tees d nus-pʋs’ pʋʋsg d sẽn maan ne sik-m-meng pʋgẽ la d wilg tẽeb n sak Wẽnnaam noyã.
5. Bõe la d segd n maane, d yam sã n paoodẽ?
5 Wala makre, d sã n pa tar yam ning sẽn segdã sẽn na yɩl n mao ne makre. Tõe tɩ d pa kɩs sɩd zãng tɩ Biiblã bãngr-gomd takɩ n pidsd masã ye. Walla tɩ d bas tɩ rẽ vigs-d tẽebã wɛɛngẽ, bɩ d pʋʋs n bao yam. (Galat dãmba 5:7, 8; Zak 1:5-8) Sɩda, d pa segd n gũ tɩ Wẽnnaam leok-d ne yel-solemd ye. D segd n wilga d pʋʋsgã pʋ-peelem, n maand bũmb nins a sẽn baood t’a sõgen dãmba fãa maana. Yaa tɩlae tɩ d kẽes d mens Gʋlsgã zãmsg pʋgẽ sẽn kengd tẽebo. D tõe n maana woto ne sɛb nins “kɩs-sɩd la gũusd yambã” sẽn yiisã tũnugri. (Matɩe 24:45-47; Zozue 1:7, 8) D ratame me n kẽng taoor bãngrã pʋgẽ, n kẽes d mens Wẽnnaam nin-buiidã tigissẽ wakat fãa.—Hebre dãmba 10:24, 25.
6. a) Bõe la tõnd fãa segd n bãng tõnd wakatã la Biiblã bãngr-goam pidsg wɛɛngẽ? b) Pʋʋs a Zeova yʋʋrã sõmsg yĩnga toor sẽn ka be, bõe la d segd n maane?
6 Rũndã-rũndã, kiris-neb kẽer baooda b mens nafre, la nug-tʋʋm sẽn wilgd tɩ b ye pa tẽed tɩ masã d kẽnga taoor wʋsg ‘sɛɛba wakat’ ye. (Daniɛll 12:4) Wala sẽn zemse tẽed-n-taasã tõe n pʋʋsame tɩ nin-kãensã vʋʋg b tẽebã bɩ b paas b tẽebã pãng ne Gʋlsgã poeer ning sẽn wilgd tɩ Kirist belmã sɩnga yʋʋmd 1914, a Zeova sẽn wa n zĩnig-a wala yĩngr Rĩma, la t’a rɩta naam a bɛɛbã sʋkã. (Yɩɩl Sõamyã 110:1, 2; Matɩe 24:3, NW ) Tõnd fãa segd n bãngame tɩ yɛl b sẽn deng n togs wala ziri tũudmã sẽn yaa “Babilon kãsenga” sãoongã, Magog Googã sẽn na n maan sʋɩtãan zabr ne a Zeova nin-buiidã, la Wẽnnaam Sẽn-tõeyã fãa wã sẽn na n fãag-b Armagedõ zabrẽ wã tõe n waa ne tʋʋlem sẽn lingdi, la a tõe n waa wakat koɛɛg pʋgẽ. (Wilgri 16:14, 16; 18:1-5; Ezekɩɛll 38:18-23) Bɩ d pʋʋs tɩ Wẽnnaam sõng-d tɩ d pa tẽeb nekr pʋgẽ. Bɩ tõnd fãa pʋʋs ne d sũy fãa a Zeova yʋʋrã sõmsg yĩnga, a Rĩungã waoong yĩnga, la a raabã maaneg tẽng zug wa a sẽn maand saasẽ wã yĩnga. N-yẽe, bɩ d ket n wilgd tẽebo, la d kõt poeer tɩ d pʋʋsgã yaa pʋ-peelem pʋʋsgo. (Matɩe 6:9, 10) Sɩda, bɩ neb nins fãa sẽn nong a Zeova wã reng n bao Rĩungã la a tɩrlmã la b kẽes b mens wa b sẽn tõe tɛk koe-noogã mooneg tʋʋmdẽ tɩ saabã nan pa wa ye.—Matɩe 6:33; 24:14.
Pẽg-y la y pʋʋs a Zeova barka
7. Bõe n tar yamleoog ne yãmb a Davɩɩd pʋʋsg ning sẽn be 1 Kɩbaya 29:10-13 wã pʋgẽ?
7 Manesem kãseng d sẽn na n tũnug ne n ‘segl d pʋʋsgã wa wisd’ yaa d sẽn na n pẽg la d wilg mi-beoog ne Wẽnnaam ne d sũur fãa. Rĩm a Davɩɩd maana pʋʋsg a woto, yẽ ne Israɛll nin-buiidã sẽn wa n maan yamleoog kũun a Zeova wẽn-doogã meeb yĩngã. A Davɩɩd pʋʋsame: “Zusoaba, yãmb yaa tõnd yaab a Zakoob Wẽnnaam. Bɩ y paam pẽgr wakat fãa. Yãmb yaa kãseng n so pãng la ziiri la naam ne waoogre. Bũmb nins fãa sẽn be yĩngr la tẽnga yaa yãmb n so. Yaa yãmb n yaa rĩm n so fãa. Arzɛk ne waoogr fãa yita yãmb nengẽ. Yãmb yaa bũmb fãa soaala. Yaa yãmb n so noor ne pãnga. La yaa yãmb n tõe n kõ ned pãng t’a lebg kãsenga. La masã, tõnd Wẽnnaam, tõnd pʋʋsda yãmb bark n pẽgd yãmb yʋʋre. Y yʋʋra toga ne waoogre.”—1 Kɩbaya 29:10-13.
8. a) Pẽgr gom-bʋs sẽn be Yɩɩl Sõamyã 148 n tɩ ta 150 n kẽ yãmb sũurã n yɩɩge? b) Tõnd sã n tar yĩn-sids nins b sẽn wilg Yɩɩl Sõamyã 27:4 pʋgẽ wã, bõe la d na n maane?
8 Ad sɩd yaa pẽgr la bark pʋʋsg goam sẽn be rasãnd menga! Tõe tɩ d pʋʋsgã pa gom-minim pʋʋsg a woto ye, la b tõe n yɩɩ pʋʋsg sẽn yit sũurẽ. Yɩɩl Sõamyã sebrã pida ne bark la pẽgr pʋʋsgo. Pẽgr goam b sẽn yãk tɩ yaa sõma wʋsg bee Yɩɩl Sõamyã 148 n tɩ ta 150 pʋgẽ. Mi-beoog ne Wẽnnaam bee yɩɩl wʋsg pʋsẽ. A Davɩɩd yɩɩla woto: “Mam kota Zusoaba bũmb a yembre, yaa yõ wã la mam baooda. A yaa tɩ mam tõe n zĩnd Zusoaba yir hal tɩ ta m yõor tɛka, la m ges Zusoaba neerlmã, la m bao bãmb bãngra bãmb dooga pʋgẽ.” (Yɩɩl Sõamyã 27:4) Bɩ d tʋm tɩ zems ne pʋʋsg a woto n kẽes d mens ne yẽesem a Zeova kʋʋndã sẽn tigmã tʋʋm fãa pʋsẽ. (Yɩɩl Sõamyã 26:12) D sã n maand woto la d bʋgsd Wẽnnaam Gomdã zug daar fãa, d na n paama bʋʋm wʋsg n pẽneg a Zeova ne pẽgr la mi-beoog ne d sũur fãa.
Bao-y a Zeova sõngr ne sik-m-menga
9. Wãn-wãn la rĩm a Aza pʋʋs-yã, la a biisã yɩɩ bõe?
9 D sã n yaa a Zeova Kaset rãmb n sõgend-a ne d sũur fãa, d tõe n kɩsa sɩd t’a kelgda pʋʋsg nins d sẽn taasd-a n kot sõngrã. (Ezai 43:10-12) Ges-y Zida rĩm a Aza makrã. A yʋʋm 41 naam dɩɩb (977-937 S.D.T.W) pipi yʋʋm 10 talla laafɩ. Rẽ poore, tãb-biis sẽn tar doap milyõ n pig Zida, Etiopi ned a Zera sor-wilgr pʋgẽ. Baa ne b sõorã sẽn da yɩɩd-b wʋsgã, a Aza ne a roapã tɩ sega pigdbã. La sẽn deng zabrã, a Aza pʋʋsa ne a sũur fãa. A sak n deegame t’a Zeova tara pãng sẽn na yɩl n fãage. Rĩmã kosa sõngr woto: “Tõnd teega yãmba, la yaa ne yãmb yʋʋra la tõnd yi n na n tɩ zab ne zãma kãngã. Yãmb yaa tõnd Wẽnnaam. Bɩ y ra bas tɩ ninsaalb tõog yãmb ye.” Baasa ne tõogr zãnga, a Zeova sẽn fãag Zida a yʋ-kãsengã yĩngã yĩnga. (2 Kɩbaya 13:23–14:14:) Wẽnnaam fãagda tõnd makr pʋgẽ t’a kõt-d-la pãng tɩ d tõog toog a pʋgẽ me, sãmbg ka be t’a kelgda tõnd kosgã sẽn na yɩl n paam a sõngrã ye.
10. D sã n wa pa mi d sẽn na n maan to-to zu-loɛɛg ning taoore, wãn-wãn la rĩm a Zozafat pʋʋsgã tõe n sõng-do?
10 D sã n pa mi d sẽn na n mao to-to ne zu-loɛɛg takɩ, d tõe n kɩsa sɩd t’a Zeova na n kelga tõnd kosgã sẽn na yɩl n paam sõngrã. Makr sẽn wilgd rẽ n zĩnd Zida rĩm a Zozafat yʋʋm 25 naamã rɩɩb sẽn sɩng yʋʋmd 936 S.D.T.W. sasa. Moaab ne Amo n paas Seir tãens babgã tãp-biisã sẽn da wa n fãoog taab n dat n zab ne Zida wã, a Zozafat bõosa woto: “Tõnd Wẽnnaam, bɩ y sɩbg bãmba. Tɩ bõe, tõnd ka tar pãng sẽn na n tõog zãma kãseng kãnga sẽn wat n na n zab ne tõnda ye. Tõnd ka mi d sẽn na n maan bũmb ninga ye, d geta yãmb bala.” A Zeova reega pʋʋsg kãngã b sẽn maan ne sik-m-mengã, n zab n sõng Zida n wẽ bɛɛbã ne kalem-kalem tɩ b kʋ taaba. Rẽ kɩtame tɩ tẽns nins sẽn gũbg-bã yɛɛse, la laafɩ zĩnda Zida. (2 Kɩbaya 20:1-30) D sã n pa tar yam ning sẽn segdã sẽn na yɩl n mao ne zu-loɛɛga, d tõe n pʋʋsa wala a Zozafat woto: ‘Tõnd ka mi d sẽn na n maan bũmb ninga ye, d geta yãmb bala, Zeova.’ Vʋʋsem sõngã tõe n kɩtame tɩ d tẽeg Gʋlsgã tagsa nins d sẽn datã sẽn na yɩl n welg zu-loɛɛgã, bɩ Wẽnnaam tõe n sõnga tõnd ne manesem sẽn yɩɩd ninsaal tagsgo.—Rom dãmba 8:26, 27.
11. Bõe la d tõe n zãms pʋʋsgã wɛɛngẽ, d sã n ges a Nehemi sẽn maan bũmb ning sẽn tɩ loe ne Zerizalɛm lalgã meebã?
11 Tõe tɩ d segdame n pẽdg pʋʋsg pʋgẽ sẽn na yɩl n paam Wẽnnaam sõngre. A Nehemi maana sũ-sãanga, n yãbe, n loe noore, la a pʋʋs rasem wʋsg pʋgẽ Zerizalɛm lalgã sẽn lebg raboogã, la Zida nebã sẽn da be toog pʋgẽ tɩ saagr kayã pʋgẽ wã yĩnga. (Nehemi 1:1–2:1a) Vẽenega, a pʋʋsgã rʋʋ n taa Wẽnnaam nengẽ wala wisd sẽn tar yũ-noogo. Daar a yembre, Pɛrs rĩm a Artazɛgzɛs sʋka a Nehemi sũurã sẽn sãamã tɩ: “Yaa bõe la f rata?” A Nehemi yeelame: “La mam pʋʋsa Wẽnnaam sẽn so yĩngrã.” Pʋʋs-koɛɛg kãngã a sẽn maan a sũurẽ wã paama reegre, bala a Nehemi paama sor n na n pids a sũurã tʋlsem n kẽng Zerizalɛm n lebg n tɩ me a lalgã sẽn lebg raboogã.—Nehemi 2:1-8.
Bas-y t’a Zezi zãms-y pʋʋsg sẽn maand to-to
12. Ne y meng gom-biisi, wãn-wãn la y na n kʋms a Zezi makr pʋʋsgã tags-yẽga?
12 Pʋʋsg nins fãa b sẽn gʋls Biiblã pʋgẽ wã sʋka, sẽn yɩɩd fãa yaa pʋʋsg ning sẽn yaa mak-sõng a Zezi Kirist sẽn maan tɩ yaa wa wisd sẽn tar yũ-noogã n kõt zãmsg zalle. A Luk Evãnzillã yetame: “[A Zezi] karem-biig a yembr yeela bãmb yaa: ‘Zusoaba, bɩ y zãms tõnd pʋʋsgo wa a Zã sẽn da zãms a karem-biisã.’ A Zezi yeela bãmb yaa: ‘Yãmb sã n pʋʋsdẽ bɩ y yeele: Tõnd Ba, bɩ y yʋʋr paam waoogre, tɩ y naam wa. Bɩ y kõ tõnd dɩɩb daar fãa tɩ seke. Bɩ y kõ tõnd sugri d yel-wẽna yĩnga, tɩ tõnd me kõta neb nins sẽn beegd tõnda sugri. La bɩ y ra bas tõnd tɩ d kẽ makr pʋgẽ ye.’ ” (Luk 11:1-4; Matɩe 6:9-13) Bɩ d ges pʋʋs-kãngã wa bũmb sẽn segd n wilg tõnd sore, la pa wala bũmb d sẽn na n togsd n yɩlemdẽ ye.
13. Wãn-wãn la y na n wilg gom-kãensã võore: “Tõnd Ba, bɩ y yʋʋr paam waoogre”?
13 “Tõnd Ba, bɩ y yʋʋr paam waoogre.” Gom ne a Zeova wala Ba yaa zu-noog zall n kõ a sõgen dãmb nins sẽn dɩk b mens n kõ-a wã. Wala kamb sẽn kolgd b ba sẽn yaa ninbãan-zoɛt ne yamleoog yel-pakr buud fãa yĩngã, d segd n dɩka sẽk wakat fãa n pʋʋs Wẽnnaam ne burkĩnd la waoogr wʋsgo. (Yɩɩl Sõamyã 103:13, 14) Tõnd pʋʋsgã segdame n wilg t’a Zeova yʋʋrã sõmsg pak-d lame, bala d sɩd tʋlla sõma t’a paam sõmsg ne taal ningr fãa b sẽn wa ne a zugã. N-yẽe, d dat n yãa a Zeova yʋʋrã sẽn welg toore, tɩ b get-a wala bõn-sõngo, bɩ bũmb sẽn tɩ loe ne a balengã.—Yɩɩl Sõamyã 5:12; 63:4, 5; 148:12, 13, NW; Ezekɩɛll 38:23, NW.
14. Pʋʋs woto võor yaa bõe: “Tɩ y naam [“rĩungã,” NW ] wa”?
14 “Tɩ y naam [“rĩungã,” NW] wa.” Rĩungã yaa a Zeova naamã sẽn puk ne Mesi goosneema sẽn be a Biriblã la a Zezi lagem-n-taasã sẽn yaa “nin-sõmsã” nusẽ. (Daniɛll 7:13, 14, 18, 27, NW; Wilgri 20:6) Rĩung kãng na n ‘waa’ ka la bilf n zab ne Wẽnnaam naam sẽn-ka-to wã tẽng zug bɛɛbã fãa, n menes-ba. (Daniɛll 2:44) Rẽ poor la a Zeova raabã na n maan tẽng zug wa a sẽn maand saasẽ wã. (Matɩe 6:10, NW ) Ad sɩd yaa sũ-noog tɛkẽ la woto na n wa ne n kõ bõn-naands nins fãa sẽn sõgend Ãndũni Naab Sẽn-ka-to wã ne kɩs-sɩdã!
15. Kos a Zeova “tõnd dɩɩb daar fãa tɩ seke,” wilgda bõe?
15 “Bɩ y kõ tõnd dɩɩb daar fãa tɩ seke.” Kos a Zeova rɩɩb “daar fãa” yĩngã wilgdame tɩ d pa kot rɩɩb wʋsg wʋsg ye, la yaa tõnd raar fãa bõn-datmã bala. Baa ne d sẽn teeg Wẽnnaam t’a kõ-dã, tõnd me tʋmdame n tũnugd ne bõn-tũnugds nins fãa sẽn zems d sẽn tõe n tũnug ne, sẽn na yɩl n paam dɩɩb la bõn-yood a taabã sẽn yaa tɩlaeyã. (2 Tesalonik rãmba 3:7-10) Sɩda, d segd n pʋʋsa d Kõtã sẽn be saasẽ wã barka, bala ya a nonglmã, a yamã la a pãngã yĩng la d paamd kũun kãensã.—Tʋʋma 14:15-17.
16. Wãn-wãn la d tõe n paam Wẽnnaam sugri?
16 “Bɩ y kõ tõnd sugri d yel-wẽna yĩnga, tɩ tõnd me kõta neb nins sẽn beegd tõnda sugri.” Tõnd sẽn yaa pa zems-zãng rãmb la yel-wẽn-maandbã yĩnga, d pa tõe n tũ a Zeova noyã sẽn zems zãngã tɩ zems fasɩ ye. Woto yĩnga, d segd n pʋʋs n kosa a sugr a Zezi yao-n-dɛɛk maoongã yẽbgr zugu. La tõnd sã n dat tɩ ‘pʋʋsg Wʋmdã’ tʋm ne maoong kãngã barkã tɩ yẽes tõnd yel-wẽnã, d segd n yɩɩ tek-yam-n-kos-sugr dãmb la d sak n deeg kiblg buud fãa a sẽn kõt-do. (Yɩɩl Sõamyã 65:3; Rom dãmba 5:8; 6:23; Hebre dãmba 12:4-11) Sẽn paase, tõnd tõe n saag n paamame tɩ Wẽnnaam kõ-d sugri, sã n mikame bal tɩ tõnd ‘kõo d bɛɛgdba sugri,’ sẽn dat n yeel tɩ neb nins sẽn beegd tõndã.—Matɩe 6:12, 14, 15.
17. Gom-kãensã võor yaa bõe: “La bɩ y ra bas tõnd tɩ d kẽ makr pʋgẽ ye”?
17 “La bɩ y ra bas tõnd tɩ d kẽ makr pʋgẽ ye.” Wakat ninga Biiblã yetame t’a Zeova maanda yɛla, a sẽn basd-b tɩ b watẽ wã yĩng bala. (Rut 1:20, 21) Wẽnnaam pa makd tõnd tɩ d maan yel-wẽnd ye. (Zak 1:13) Wẽng maaneg makrã yita Munaafɩɩkã, tõnd nemsã sẽn maand yel-wẽnã la dũni kãngã nengẽ. Yaa a Sʋɩtãan la Makd ning sẽn modgd n na n tus tõnd tɩ d maan yel-wẽn n beeg Wẽnnaamã. (Matɩe 4:3; 1 Tesalonik rãmba 3:5) Tõnd sã n kotẽ tɩ: “La bɩ y ra bas tõnd tɩ d kẽ makr pʋgẽ ye,” d kota Wẽnnaam t’a ra bas tɩ d kɩɩse, d sã n wa be makr pʋgẽ sẽn dat tɩ d kɩɩs-a ye. A tõe n wilga tõnd sor tɩ d ra lʋɩ, la t’a Sʋɩtãan sẽn yaa “wẽng soaba” ra tõog-d ye.—Matɩe 6:13; 1 Korẽnt dãmba 10:13.
Tʋm-y tɩ zems ne y pʋʋsgã
18. Wãn-wãn la d tõe n tʋm tɩ zems ne pʋʋsg nins d sẽn maand n dat n paam kãadem la zak pʋgẽ vɩɩm sẽn tar sũ-noogã?
18 A Zezi makr pʋʋsgã tika tags-yẽg zutu, la d tõe n pʋʋsa yell buud fãa wɛɛngẽ. Wala makre, d tõe n maana pʋʋsg sẽn tɩ loe ne tʋlsem ning d sẽn tar n na n paam kãadem sẽn be sũ-noogã. Sẽn na yɩl n pa yɩlemd hal tɩ ta kãadmã, d segd n pʋʋsame n paam yõk-m-menga. La rẽ poor bɩ d tʋm tɩ zems ne d pʋʋsgã n lak d mens ne sɛb la reem sẽn wilgd raglem tʋʋma. Bɩ d rɩk sard kãn-kãe me n ‘kẽ kãadem Soaalã pʋgẽ bala.’ (1 Korẽnt dãmba 7:39, NW; Tõodo 7:3, 4) D sã n wa kẽ kãadem n sa, d segd n tʋmame tɩ zems ne d pʋʋsgã sẽn na yɩl n paam sũ-noogã, n tũ Wẽnnaam saglsã. La d sã n tar kamba, pa sek tɩ d pʋʋs tɩ b yɩ a Zeova kɩs-sɩd sõgen dãmb ye. D segd n maana d sẽn tõe fãa n zãms Wẽnnaam sɩdã tɩ kẽ b pʋ-tẽerẽ wã, n tũnug ne Biiblã zãmsgo, la kiris-neb tigissẽ wã kẽngr ne-b wakat fãa.—Tõodo 6:5-9; 31:12; Yelbũna 22:6.
19. Bõe la d segd n maane, d sã n pʋʋsd d ministɛɛrã wɛɛngẽ?
19 Tõnd pʋʋsdame n na n paam bark ministɛɛrã pʋgẽ bɩ? Rẽ, bɩ d tʋm tɩ zems ne pʋʋsg a woto n kẽes d meng sõma Rĩungã mooneg tʋʋmd pʋgẽ. D sã n pʋʋsd n na n paam segb n sõng neb a taabã tɩ b kẽn vɩɩm sẽn-kõn-sa wã sor zugu, d segdame n dɩk not rãmb sõma ne sẽn wilg-b ratmã, la d sak n paas yirẽ Biibl zãms rãmb maaneg d geelg-n-tʋmã pʋgẽ. Yaa wãn to yẽ, d sã n dat n maan moonegã tʋʋmd wakat fãa wala so-pakda? Rẽ, bɩ d maan tɩ zems ne d pʋʋsgã n paas d moonegã tʋʋmde, la d kẽes d mens ministɛɛrã pʋgẽ ne so-pakdbã. Yel-kãensã maaneg na n wilgame tɩ tõnd tʋmdame tɩ zems ne d pʋʋsgã.
20. Bõe la sõsg ning sẽn pʋgdã na n vaeese?
20 Tõnd sã n sõgend a Zeova ne kɩs-sɩda, d tõe n bãnga vẽeneg t’a na n deega d pʋʋsg nins sẽn zems ne a raabã. (1 Zã 5:14, 15) Sɩd-sɩda, yɛl sẽn be nafr la d yã pʋʋsg a wãnã sẽn be Biiblẽ wã vaeesg pʋgẽ. Tõnd nindaar sõsgã na n vaeesa Gʋlsgã sor-wilgr a taaba, neb nins sẽn tʋll n ‘segl b pʋʋsgã wa wisd a Zeova taoorã’ yĩnga.
Y na n leokẽ-la wãn to
◻ Bõe yĩng tɩ d segd n pʋʋs ne tẽebo?
◻ Tʋʋm bʋg la pẽgr la bark pʋʋsgã tar tõnd pʋʋsgã pʋsẽ?
◻ Bõe yĩng tɩ d tõe n bao a Zeova sõngr pʋʋsg pʋgẽ ne bas-yardo?
◻ Tags-yẽg kẽer bʋs n be makr pʋʋsgã pʋgẽ?
◻ Wãn-wãn la d tõe n tʋm tɩ zems ne d pʋʋsgã?
[Picture on page 10]
Wala rĩm a Zozafate, wakat ninga d segd n pʋʋsa woto: ‘D pa mi d sẽn na n maaneg ye, la tõnd geta foo, Zeova’
[Picture on page 11]
Yãmb pʋʋsdame tɩ zems ne a Zezi makr pʋʋsgã bɩ?