Rĩungã Koe-moondb Togsdame
Teokarasi wã taoor kẽngr Namibi
YAA yʋʋmd 1920 pi-gĩndã saab babgẽ la Rĩungã koe-noog ta Namibi pipi. Wakat kãng tɛka, pʋ-peelem dãmb kobs n sak fãagr koɛɛg ning sẽn yit Wẽnnaam nengẽ wã. Yɛl nins b sẽn vɩɩmd sẽn pʋgdã wilgda a Zeova sẽn tigimd bõn-neeb kãensã a bãgrã pʋgẽ to-to.—Azze 2:7.
◻ A Paulus sẽn yaa koaad n be Namibi rɩtg la a yaang sʋkã sɛga a Zeova Kaset rãmbã a pipi a sẽn da wa n kẽng Windhoek sẽn yaa na-tẽngã. Tao-tao t’a Paulus ra kɩsa sɩd t’a yãa sɩdã. A lebg n kula ne Y Tõe n Vɩɩnda Wakat Sẽn-kõn-sa Tẽng zug Arzãnẽ wã sebre. Rẽ poore, a sẽn da wa n togd sor n debd Rundu, sẽn yaa galʋ-tẽng ning sẽn da tar Rĩung Roog sẽn pẽ n yɩɩdã, a Paulus yãa Kaset rãmbã n bõos-b tɩ b wa ges-a.
Baasg zãnga a zĩigã ra zãra wʋsg hal tɩ Kaset rãmbã ra pa tõe n kẽng be semen fãa n zãms Biiblã ne a Paulus ye. A Paulus kẽnga taoor n pa koms raood ye. A sɩngame n zãmsd Biiblã a toore. Sẽn paase, a moona neb a taabã ne yẽesem, yɛl nins a sẽn da zãmsdã wɛɛngẽ. Tarẽ-n-tarẽ, waa n lebga neb sull n zãmsd Biiblã. Sul-kɩdgã sẽn wʋm radio n wã t’a Zeova Kaset rãmbã tigis-kãseng n da na n maan Rundu wã, b rɩka b paoongã sẽn da paoodã fãa n maan tãrspoor n kẽng tigis-kãsengã.
Ad b sẽn lagem ne a Zeova Kaset rãmbã b pipi wã sɩd yɩɩ bũmb sẽn kõ-b sũ-noog wʋsgo! Pa kaoos la b rɩk segls tɩ saam-biis sẽn tar tõog wa ges sul-kãngã wakat fãa ye. Rũndã-rũndã, koe-moondb a yoob n be tẽn-bil ning a Paulus sẽn beẽ wã.
◻ A Johanna ratmã ne Wẽnnaam yʋʋrã yãng n paasame, a sẽn wʋm ned sẽn gom a Zeova Kaset rãmbã wẽngã. A tẽra woto: “Pipi wã meng mam sẽn wʋm a Zeova yʋʋrã, a kẽe mam yamẽ wã wakat fãa yĩnga, tɩ m sɩng n sʋkd m meng n getẽ a Zeova yaa ãnda. M da vɩɩ ne m sɩdã Walvis Bay sẽn be Namibi mogrã wogellã noore. Vugri, tõnd kẽnga galʋ-tẽngẽ wã, la mam yãa a Zeova Kaset rãmb sẽn pʋɩt Gũusg Gasgã sorã zugu. Mam deega a yembre, la m kosa Biibl zãmsgo, bala m da tara sʋgsg wʋsgo. Mam kaasame, b sẽn yeel maam tɩ b ra pa tõe n wa, b mobilla sẽn da sãama yĩnga. Rẽ poor bilfu, mam sɩdã kiime, tɩ m kẽng n tɩ zĩnd Kɩɩtmanshup. Zall so-pakd (wakat fãa koe-moond) la b ra yãk t’a tʋm beenẽ, tɩ mam paam La vérité qui conduit à la vie éternelle sebrã a nengẽ. Hal sɩngrẽ wã menga, mam yãame tɩ goamã yaa sɩda.
“Sẽn na n baase, b boola maam tɩ m kẽes m toog moonegã tʋʋmdẽ, la m da tara ninsaal zoeesã hal tɩ looge. M sẽn da kẽnd zak-zakã, m pʋʋsa a Zeova t’a sẽn bas-m tɩ m ki n são a sẽn na n kɩt tɩ m moone. Mam sẽn kẽes m toog sor zug kasetã pʋgẽ pipi wã, mam solga so-bãanegẽ, n tẽed tɩ ned ba a ye kõn yã-m ye. M baas n kenga m sũur n yiis periodik n tees so-loaada, la yaa wakat kãng bal la m semb n togs bũmbu. Baraarã, ne a Zeova sõngre, mam taasa neb wʋsg m saagrã sẽn tik Biiblã zugã.
“Rũndã-rũndã, yʋʋm 12 loogr poore, baa ne m sẽn yaa naong soab laogã wɛɛngẽ wã, m ket n geta so-pakrã tʋʋmd zu-noog wa bũmb sẽn tar yõod wʋsgo, la m ket n paamda sũ-noog sẽn pa tõe n bãng n bilgi, ne Rĩungã sɩd taasg neb a taabã.”