Yãmb Maanda Bũmb Nins Fãa Y Sẽn Tog N Maan Wẽnnaam Taoorã Bɩ?
“Wẽnnaam na n bʋʋ tʋʋma fãa bʋʋdo, la yɛl nins fãa sẽn da solgã, yel-sõama la yel-wẽnse.”—Koɛɛg Soaba 12:14.
1. Bõe la a Zeova kõ a nin-buiidã?
A ZEOVA teenda neb nins sẽn tẽr wakat fãa t’a yaa b Naand Kãsengã. A Gomdã vʋʋsmã sẽn vẽnegã kõt-b-la bãngr ning b sẽn baoodã sẽn na yɩl n ta a yam zãnga. Wẽnnaam vʋʋsem sõngã wilgd-b-la sor Wẽnnaam daabã maaneg pʋgẽ la ‘biis womb tʋʋm sõama buud fãa’ yĩngã pʋgẽ. (Kolos rãmba 1:9, 10) Sẽn paase, a Zeova tũnugda ne “kɩs-sɩd la gũusd yambã” n kõt tẽebã rɩɩb la teokaratik sor-wilgri. (Matɩe 24:45-47, NW) Rẽ, ne manesem wʋsgo, Wẽnnaam nin-buiidã tara saasẽ barka, b sẽn sõgend a Zeova la b pidsd tʋʋmd sẽn tar yõod kãseng ning sẽn yaa Rĩungã koe-noog moonegã.—Mark 13:10.
2. A Zeova sõgenegã wɛɛngẽ, sʋgs-bʋs n tõe n wa?
2 Kiris-neb hakɩkã sũur noomame tɩ b tall tʋʋm wʋsg a Zeova baleng tʋʋmdã pʋgẽ. La tõe tɩ kẽer koms raood n tags tɩ b modgda zaalem yĩnga. Wala makre, wakat-wakate, kiris-neb sẽn dɩk b mens n kõ tõe n sʋkda b mens n getẽ modgr nins b sẽn maand ne b sũyã fãa wã sã n sɩd tara yõodo. Zak soab sã n tagsd a zak pʋgẽ zãmsgã la tʋʋm a taabã yelle, sʋgs-kãensã buud sɩd tõe n wa a yamẽ: ‘A Zeova sũur sɩd nooma ne tõnd sẽn maand bũmb ningã bɩ? Tõnd maanda bũmb nins fãa d sẽn tog n maan Wẽnnaam taoorã bɩ?’ Koɛɛg soabã yam goam tõe n sõng-d lame tɩ d leok sʋgs-kãensã.
Bũmba fãa yaa zaalem bɩ?
3. Wa sẽn zems ne Koɛɛg Soaba 12:8, bõe n yaa zaalem meng-menga?
3 Kẽer tõe n tagsame tɩ yam soabã goam pa kengd kom-bɩɩsã la sẽn kʋʋl-bã pels wʋsg ye. “Koɛɛg Soaba yetame yaa: ‘Yaa zaalem. Bũmb fãa yaa zaalem bala.’ ” (Koɛɛg Soaba 12:8) Sɩda, yaa zaalem tɩ loog noore, f sã n bas f Naand Kãsengã f bi-bɩɩlem wakate, n kʋʋl n pa sõgen-a, tɩ bõn-sõng ning f sẽn tõog n paam bal yaa kʋʋlmã. Fãa yɩɩ zaalem bɩ faoor ne nin-kãng soaba, ba a sã n ki ne arzɛk la yʋʋr dũni kãngã sẽn be wẽng soab a Sʋɩtãan Munaafɩɩk nugẽ wã pʋgẽ.—1 Zã 5:19.
4. Bõe yĩng tɩ b tõe n yeel tɩ bũmb fãa pa zaalem?
4 Bũmba fãa pa zaalem ne neb nins sẽn zamd arzɛgs saasẽ, n yaa a Zeova sõgen dãmb sẽn yaa kɩs-sɩd dãmbã ye. (Matɩe 6:19, 20) B tara tʋʋm wʋsg Soaalã tʋʋmd sẽn be keoorã pʋgẽ, la tʋʋm a woto pa baasd n yɩ zaalem ye. (1 Korẽnt dãmba 15:58) La d sã n yaa kiris-neb sẽn dɩk b mens n kõ, d ket n tara tʋʋm wʋsg tʋʋmd ning Wẽnnaam sẽn kõ tɩ b maan yaoolem dayã pʋgẽ bɩ? (2 Tɩmote 3:1) Bɩ tõnd tara vɩɩm manesem sẽn pa toor wʋsg ne nebã wʋsg sẽn yɩɩdã? Tõe tɩ b lagma ne tũudum toɛ-toɛya, n yaa tũudb ne b sũy fãa, n kẽngd b balengã rotẽ wakat fãa la b modgd n na n maan bũmb ning b balengã buud sẽn baood tɩ b maana. Yaa vẽeneg tɩ b pa Rĩungã koɛɛg moondb ye. B pa tar bãngr sẽn yaa takɩ ning sẽn wilgd tɩ yaa “sɛɛba wakat” la woto wã, la b pa ne tɩ wakat ning pʋgẽ tõnd sẽn vɩyã yaa yãgdem wakat ye.—Daniɛll 12:4.
5. Vɩɩmã daar fãa yɛl baoob sã n lebg tõnd yel-pakr n yɩɩda, bõe la d segd n maane?
5 A Zezi Kirist yeela tõnd tood wakatã wɛɛngẽ: “Bũmb ninga sẽn zĩnd a Nowe wakata na n zĩnda Ninsaal Biiga waoong wakat me. Tɩ bõe, sẽn deng sãoong sa-kãsengã, neba ra dɩtame la b yũuda, la b peesd pagba, la b kõt b kamb sɩdba hal tɩ ta daar ning a Nowe sẽn kẽ koom-koglga pʋgẽ. La bãmb ka bãng hal tɩ sãoong sa-kãsenga wa n loog ne bãmb fãa. A na n yɩɩ woto me ne Ninsaal Biiga waoongo.” (Matɩe 24:37-39) F sã n dɩ la f yũ tɩ zemse, pa wẽng ye, sẽn paase kãadmã yaa bũmb sẽn yit Wẽnnaam mengã nengẽ. (Sɩngre 2:20-24) Tõnd sã n wa mik tɩ vɩɩmã daar fãa yɛl baoob lebga bũmb sẽn pak n yɩɩd tõnd vɩɩmã pʋgẽ, bõe yĩng tɩ d pa na n pʋʋs rẽ wɛɛngẽ? A Zeova tõe n sõnga tõnd tɩ d ning Rĩungã nafa pipi zĩigẽ, tɩ d maan sẽn yaa tɩrga, la d maan d sẽn tog n maan Wẽnnaam taoorã.—Matɩe 6:33; Rom dãmba 12:12; 2 Korẽnt dãmba 13:7.
Rɩk-f-meng-n-kõ wã la d sẽn tog n maan bũmb ning Wẽnnaam taoorã
6. Ne manesem kãseng bʋg la kẽer sẽn deeg lisg pa maand b sẽn tog n maan Wẽnnaam taoorã?
6 Kiris-neb kẽer sẽn deeg lisg segd n pʋʋsa ne b sũy fãa, bala b vɩɩmã pa zems ne sõgeneg sard nins b sẽn da rɩk n na n maanã, b sẽn wa n dɩk b mens n kõ Wẽnnaamã ye. Yʋʋmd fãa, sẽn yɩɩd neb 300 000 wʋsg n deegd lisg sẽn na maan yʋʋm masã, la a Zeova Kaset rãmb nins sẽn moond koɛɛgã sõor zãng pa tall paasg woto me ye. Kẽer sẽn lebg Rĩungã moondb basa koe-noogã moonego. La nebã yembr-yembr segd n zoe n kẽesda b mens kiris-neb ministɛɛrã pʋgẽ sõma tɩ b nan pa reeg lisg ye. Dẽ, b mii tʋʋmd ning a Zezi sẽn bobl a karen-biisã fãa wã: “Kẽng-y n maan buudã fãa neb tɩ b yɩ karen-biisi, n lis-b ne Ba wã, la Biriblã la vʋʋsem sõng yʋʋre, n zãmsd-b tɩ b tũ bũmb nins fãa mam sẽn kõ yãmb noor tɩ y maanã.” (Matɩe 28:19, 20, NW) Sã n pa gɩdgr sẽn yaa kãsengã, bãag bɩ yɛl a taab sẽn yɩɩd b nug yĩnga, neb nins sẽn deeg lisgã sẽn ye pa Wẽnnaam la Kirist Kaset rãmb sẽn moond koɛɛgã pa maand bũmb nins fãa b sẽn tog n maan tõnd Naand Kãsengã taoorã b vɩɩmã pʋgẽ ye.—Ezai 43:10-12.
7. Bõe yĩng tɩ d segd n tigim taab wakat fãa balengã yĩnga?
7 Pĩnd Israɛllã ra yaa buud sẽn dɩk a meng n kõ Wẽnnaam, la Tõogã kaool pʋgẽ, a nin-buiidã ra tara yɛl a sẽn segd n maan a Zeova taoore. Wala makre, roapã fãa ra segd n tigma yʋʋmd-yʋʋmd kibs rãmb a tãab yĩnga, la rao ning sẽn yãk ne yamleoog n pa maan Pakã b ra ‘yiisda a soab’ n kʋ. (Sõdbo 9:13; Maankʋʋre 23:1-43; Tõodo 16:16) Sẽn na yɩl tɩ bãmb sẽn yaa nin-buiid sẽn dɩk b mens n kõ wã maan bũmb nins b sẽn tog n maan Wẽnnaam taoorã, Israɛll nebã ra segd n tigma balengã yĩnga. (Tõodo 31:10-13) Tõogã pʋgẽ b pa yeel tɩ ‘Maan-y woto, sã n mikame tɩ zemsa ne y vɩɩmã’ ye. Masã, ne neb nins sẽn dɩk b mens n kõ a Zeova wã, sɩd-sɩda, noor ning b sẽn kõ tɩ d tigim taabã paasda a Poll gom-kãensã pãnga: “Bɩ tõnd tẽeg taab yelle la d yik taab ratem tɩ maan nonglem la tʋʋm sõama. Bɩ d da bas taab tiging wa neb kẽer sẽn maanda ye. La bɩ d sagl taaba, la bɩ d sagl n yɩɩda tõnd sẽn yã tɩ daar kolgdame wã yĩnga.” (Hebre dãmba 10:24, 25) N-yẽe, tigim ne tẽed-n-taas wakat fãa me yaa bũmb kiris-neb nins sẽn dɩk b mens n kõ wã sẽn tog n maan Wẽnnaam taoore.
Maag-y y yĩng n tags y sard dɩkrã zugu!
8. Bõe yĩng tɩ bi-bɩɩg sẽn dɩk a meng n kõ segd n vaees a balengã tʋʋmd n ges pʋʋsg pʋgẽ?
8 Tõe tɩ yãmb yaa bi-bɩɩg sẽn dɩk y meng n kõ a Zeova. Y na n paama bark wʋsgo, y sã n ning Rĩungã nafa pipi zĩigẽ y vɩɩmã pʋgẽ. (Yelbũna 10:22) Ne pʋʋsg la geelg y sẽn maag y yĩng n maane, tõe tɩ y tõog n dɩk baa yaa y bi-bɩɩlmã wẽndẽ yʋʋmã n kẽes y meng wakat fãa sõgenegã buud a yembrẽ. Woto yaa manesem sẽn be rasãnd y sẽn na n tũnug ne n wilg tɩ y tẽra y Naand Kãsengã yelle. Sã n pa rẽ, laogã yɛl tõe n sɩngame n yãmbd y sẽkã la y tʋlsmã bab-kãsenga. Wala nebã wʋsg sẽn nong n maandẽ wã, tõe tɩ y kẽ kãadem tao-tao y vɩɩmã pʋgẽ n kẽ sam sẽn na yɩl n paam teedo. Ligd nug-tʋʋmd tõe n dɩka y sẽkã la y pãngã wʋsgo. Y sã n tar kamba, na n yɩɩ tɩlae tɩ y tʋk zak pʋgẽ zɩɩb sẽn na maan yʋʋm pi-gĩna. (1 Tɩmote 5:8) Tõe tɩ y pa yĩm y Naand Kãsengã ye, la yaa yam bũmb tɩ y bãng tɩ pĩnd n geelã, bɩ kong rẽ maanegã, yaa bũmb sẽn tõe n wilg yãmb vɩɩmã sẽn na n yɩ to-to, y sã n wa lebg kãsma. Kaoosg zugẽ, y tõeeme n wẽneg n ges poorẽ n tʋlgẽ n da rɩkẽ baa yaa y bi-bɩɩlem wẽndẽ yʋʋmã n kẽes tõnd Naand Kãsengã baleng tʋʋmd pʋgẽ sõma-sõma n yɩɩda. Bõe yĩng tɩ y pa na n tags pʋʋsg pʋgẽ masã tɛk n ges y sẽn dat n maanegã, sẽn na yɩl n paam sũ-noog y balengã tʋʋmd y sẽn maand n kõt a Zeova wã pʋgẽ y bi-bɩɩlmã wakatã?
9. Bõe n tõe n yɩ ne ned sẽn kʋʋle, la sẽn da tʋk zɩɩb kãsems tigingã pʋgẽ?
9 Ges-y yɛl buud a taaba. Yaa yɛl sẽn tɩ loe ne rao sẽn da sõgen wala “Wẽnnaam piisa” pe-kɩɩma. (1 Pɩɛɛr 5:2, 3) Bũmb n kɩt t’a yãk a toorẽ yam n bas zu-no-kãensã. Yaa sɩd t’a kʋʋlame masã, la tõe n yaa toog n yɩɩd ne-a t’a kẽng taoor ne Wẽnnaam sõgenegã. La a ye tõe n bao n paama teokaratik zu-nood bɩ? Ad sɩd yaa bark meng la rao a woto tõe n tall ne neb a taabã, a sã n tõe n tʋk zɩɩb n paas tigingã pʋgẽ! La sẽn mik tɩ ned ba a yembr pa vɩ a meng yĩng balã, zo-rãmbã la neb nins sẽn nong-a wã na n kɩdmame, a sã n tõe n paas a sõgenegã tɩ kõ Wẽnnaam ziiri. (Rom dãmba 14:7, 8) Sẽn yɩɩd fãa, a Zeova pa na n yĩm bũmb ning ned fãa sẽn maand a sõgenegã pʋgẽ wã ye. (Hebre dãmba 6:10-12) Woto, bõe n tõe n sõng tõnd tɩ d tẽeg d Naand Kãsengã yelle?
Sõngr sẽn na yɩl n tẽeg d Naand Kãsengã yelle
10. Bõe yĩng tɩ koɛɛg soabã ra be zĩig sẽn zems wʋsg pʋgẽ ne kõ sagls tõnd Naand Kãsengã yell tẽegr zugu?
10 Koɛɛg Soabã sẽn da be zĩig ningã zemsa sõma wʋsg ne kõ tõnd sor-wilgr tɩ d tẽeg d Naand Kãsengã yelle. A Zeova ra kelga a pʋʋsg nins a sẽn maan ne a sũur fãa wã n kõ-a yam sẽn pa wõnd a taabã. (1 Rĩm dãmba 3:6-12) A Salomo vaeesa ninsaal yɛlã nens gill neere. Sẽn paase, Wẽnnaam vẽneg-a-la ne a vʋʋsmã t’a gʋls a sẽn yã bũmb ninsã sẽn na yɩl tɩ naf neb a taabã. A gʋlsame: “La sẽn paase, yẽ zãmsa neba bãngre. Yẽ tagsa yel-bũn wʋsg yɛla n fees n bãng b võyã, la yẽ manega bãmba. Koɛɛg Soaba maoome n paam gom-noodo n gʋls sɩd goama tɩrga.”—Koɛɛg Soaba 12:9, 10.
11. Bõe yĩng tɩ d segd n sak a Salomo sagl-sõmsã?
11 Gerɛk Sɛptãntã lebga gom-kãensã woto: “La sẽn paase, moondã sẽn da tar yamã yĩnga, a sẽn zãms ãdem-biisã yamã yĩnga; tɩ tʋbr tõe n bãng sẽn be neer sẽn yit yel-bũnẽ wã, moondã maana vaeesg neer n na n yã goam sẽn be yamleoog la gom-tɩrs b sẽn gʋlse, sɩd goama.” (The Septuagint Bible, a Charles Thomson sẽn lebge) A Salomo modgame n gom tɩ kẽ a karemdbã sũy ne goam sẽn sɩd be yamleoog wʋsg la gom-zut sẽn sɩd sek vaeesgo. Sẽn mik t’a goam nins sẽn be Gʋlsg Sõamyã pʋgẽ wã yaa vʋʋsem sõngã n vẽnegã yĩngã, d tõe n saka bũmb nins a sẽn yã wã la a sagl-sõmsã tɩ sãmb-sãmb kaẽ ye.—2 Tɩmote 3:16, 17.
12. Ne yãmb meng goamã, wãn-wãn la y na n wilg a Salomo sẽn togs tɩ be Koɛɛg Soaba 12:11, 12 pʋgẽ wã?
12 Baa ne rũndã-rũndã sɛb yiisg masĩn dãmbã sẽn da kae a Salomo wakatã, sɛb wʋsg n da be. Wãn-wãn la b ra segd n ges sɛb a woto? A yeelame: “Yam dãmb goam wẽnda fu-pĩim, la yel-bũn neb sẽn tigs [sẽn yaa wa kull dãmb b sẽn ka, NW] wẽnda pe-kɩɩm dasaare. La m biiga, gũus f meng ne bõn-kãense. Sɛb gʋlsg yaa wʋsgo, la a ka tar tɛk ye. La [b] zãmsg wʋsg yɛɛda neba.”—Koɛɛg Soaba 12:11, 12.
13. Wãn-wãn la neb nins sẽn tar Wẽnnaam yamã goam tõe n wõneg fũ-pĩim dãmb la “kul dãmb b sẽn ka”?
13 Neb nins sẽn tar yam sẽn yit Wẽnnaam nengẽ wã goam yaa wa fũ-pĩim dãmba. Wãn-wãna? B tusda karemdbã bɩ kɛlgdbã tɩ b kẽng taoor tɩ zems ne yam goam nins b sẽn karem bɩ b sẽn wʋmã. Sẽn paase, neb nins sẽn dɩkd b sẽk wʋsg “yel-bũn neb sẽn tigis[ã],” bɩ goam sẽn sɩd tar yam la sẽn zemsã vaeesg yĩngã wẽnda “kul dãmb b sẽn ka,” bɩ sẽn kɩ sõma. Tõe n yɩɩ woto, bala neb a woto gom-sõma wã tara yam ning sẽn yit a Zeova nengẽ, la woto yĩnga, a tõe n kɩtame tɩ karemdbã la kɛlgdbã paam kɩls-tɩ-zems la teelgo. Yãmb sã n yaa roagd sẽn yaa wẽn-zoɛta, y pa na n modg y pãng tɛk n zãms y biigã yam a woto tɩ kẽ a yamã la a sũurã sɩda?—Tõodo 6:4-9.
14. a) Seb-bʋs buud “zãmsg wʋsg” n pa nafde? b) Seb-bʋs la d segd n zãms n yɩɩda, la bõe yĩnga?
14 La bõe yĩng t’a Salomo gom n wilg a manesem ne sɛbã? Be neere, b sã n mak-b ne a Zeova Gomdã, dũni kãngã sɛb ka tɛkã tara ninsaalb tagsg bala. Tags-kãens wʋsg yaa a Sʋɩtãan Munaafɩɩkã tagsgo. (2 Korẽnt dãmba 4:4) Woto yĩnga, dũniyã sɛb a woto “zãmsg wʋsg” yõod pa kaoosd ye. Sɩda, a zãmsg wʋsg tõe n sãama ned tẽebo. Wala a Salomo, bɩ d bʋgs Wẽnnaam Gomdã sẽn yet bũmb ning vɩɩmã wɛɛngẽ wã. Woto na n kenga tõnd tẽebã la pẽnegd ne a Zeova n paase. D sã n zãms sɛb a taab wall d bao zãmsg zĩ-zẽms tɩ loog noore, tõe n yɩɩ yaams ne-do. Sẽn yɩɩd fãa, seb-kãens b sẽn gʋlsã sã n yaa dũniyã tagsg sẽn kɩɩsd yam ning sẽn yit Wẽnnaam nengẽ wã, b pa sõma, la b sãamda ned tẽeb ne Wẽnnaam la ne a raabã. Rẽnd woto yĩng bɩ d tẽeg tɩ sɛb nins sẽn da be nafr n yɩɩd a Salomo wakatã la tõnd wakatã yaa b rãmb nins sẽn tar a Zeova Wẽnnaam sẽn yaa ‘pe-kɩɩma’ yamã. A kõo Gʋlsg Sõamyã sɛb 66, la d segd n bao n bãng-b lame n yɩɩd sɛb a taaba fãa. Biiblã la ‘kɩs-sɩd yambã’ sɛb sẽn kõt sõngrã kɩtdame tɩ d paam ‘Wẽnnaam bãngrã.’—Yelbũna 2:1-6.
Bũmb nins fãa tõnd sẽn tog n maan Wẽnnaam taoorã
15. a) Wãn-wãn la y na n wilgẽ a Salomo goam nins sẽn tɩ loe ne ‘ninsaal fãa sẽn tog n maana’? b) Bõe la d segd n maane, d sã n dat n maan bũmb nins d sẽn segd n maan Wẽnnaam taoorã?
15 A sẽn kʋmsd a vaeesgã fãa, koɛɛg soab a Salomo yeelame: “Kelg koɛɛg baasgo. D wʋma fãa. Zoe Wẽnnaam la f sak bãmb tõodo. Tɩ bõe, ninsaal fãa tog n maana woto. Tɩ bõe, Wẽnnaam na n bʋʋ tʋʋma fãa bʋʋdo, la yɛl nins fãa sẽn da solgã, yel-sõama la yel-wẽnse.” (Koɛɛg Soaba 12:13, 14) Tõnd Naand Kãsengã zoees sẽn yaa sõma, bɩ waoogr sẽn yaa kãseng ne-a na n kogla tõndo, la d saagdẽ t’a na n kogla d zagsã me, ne vɩɩm manesem sẽn yaa yalemdo, sẽn tõe n wa ne namsg la sũ-sãang sẽn pa tõe n bãng n bilg tõnd mengã la d sẽn nong b rãmbã zutu. Wẽnnaam zoees sẽn yaa sõma yaa yɩlemde, la a yaa yam la bãngr sɩngre. (Yɩɩl Sõamyã 19:10; Yelbũna 1:7) D sã n tar yam sẽn yẽbg Wẽnnaam Gomdã vʋʋsmã sẽn vẽnegã zug la d tũ a saglsã yɛlã fãa pʋsẽ, d na n maana ‘bũmb nins fãa d sẽn tog n maan’ Wẽnnaam taoorã. Woto pa rat n yeel tɩ d sõdg bũmb nins d sẽn tog n maana ye, ayo. La bũmb ning b sẽn baood tɩ d maana yaa d bao Gʋlsg Sõamyã saglse, d sã n wa welgd vɩɩmã zu-loeese, la d maan yɛlã wa Wẽnnaam sẽn datã wakat fãa.
16. Yaa bõe la a Zeova na n maan bʋʋdã wɛɛngẽ?
16 D segd n bãngame tɩ baa fʋɩ pa lingd tõnd Naand Kãsengã ye. (Yelbũna 15:3) A “na n bʋʋ tʋʋma fãa bʋʋdo.” N-yẽe, Zãntlem Sẽn Yɩɩd fãa Soabã na n bʋʋ yɛlã fãa bʋʋdo, bũmb nins ninsaal nin sẽn ka tõe n yã wã sẽn paase. D sẽn mi bõn-kãensã wã segd n tusa tõnd tɩ d tũ Wẽnnaam noyã. La bõn-kãseng sẽn yɩɩd sẽn segd n tus tõndã yaa nonglem ne d yĩngr Ba wã, bala tʋm-tʋmd a Zã gʋlsame: “Wẽnnaam nonglem yaa tɩ tõnd sak bãmb tõogo. La bãmb tõog ka toog ye.” (1 Zã 5:3) La sẽn mik tɩ Wẽnnaam noyã sẽn be wã yaa sẽn na yɩl tɩ d paam bark sẽn kaoosdã yĩngã, sɩd-sɩda, pa bũmb sẽn zems bal ye, la sɩd yaa yam tʋʋmd me tɩ d tũ-ba. Woto pa zɩɩb sẽn yaa toog n kõ neb nins sẽn nong tõnd Naand Kãsengã ye. B rat n maana bũmb ning b sẽn tog n maan a taoorã.
Maan-y bũmb nins fãa y sẽn tog n maana
17. Bõe la d na n maane, d sã n sɩd rat n maan bũmb nins fãa d sẽn tog n maan Wẽnnaam taoorã?
17 Tõnd sã n tar yam la d sɩd tʋll n maan bũmb nins fãa d sẽn tog n maan Wẽnnaam taoorã, a noyã tũub toor sẽn ka be, d na n talla waoogr wʋsg sẽn naag ne zoees n da maan bũmb sẽn pa tat a yam ye. Sɩda, “Zusoaba zoees yaa yam sɩngre,” la neb nins sẽn tũud a noyã “tara yam sõama.” (Yɩɩl Sõamyã 111:10; Yelbũna 1:7) Woto yĩnga, bɩ d tʋm ne yam la d sak a Zeova bũmb fãa pʋgẽ. Sẽn yɩɩd fãa, woto tara yõod wʋsg masã, bala Rĩm a Zezi Kirist beeme, la bʋ-kaoor ning a sẽn na n bʋ wala Bʋkaood Wẽnnaam sẽn yãkã daar kolgame.—Matɩe 24:3; 25:31, 32.
18. Yɛlã tõe n wa baasa wãn-wãn ne tõndo, d sã n maan bũmb nins fãa d sẽn segd n maan a Zeova Wẽnnaam taoorã?
18 Wẽnnaam feesda tõnd ned kam fãa masã. Tõnd yaa neb sẽn nong tẽebã yɛl bɩ, bɩ tõnd basame tɩ dũniyã pãn-tusdi koms tõnd zems-n-taarã ne Wẽnnaamã pãnga? (1 Korẽnt dãmba 2:10-16; 1 Zã 2:15-17) D yaa kom-bɩɩs bɩ nin-kẽemba, bɩ d fãa maan d sẽn tõe fãa n ta d Naand Kãsengã yam. D sã n sak a Zeova la d tũ a noyã, d na n zãgsa dũni kʋdrã sẽn loogdã bõn-faado. Rẽ, d tõe n saagame n vɩɩmd wakat sẽn-kõn-sa Wẽnnaam yɛl siglg paalgã a sẽn kãabã pʋgẽ. (2 Pɩɛɛr 3:13) Ad sɩd yaa saagr kãseng tɛkẽ n kõ neb nins fãa sẽn maand bũmb nins fãa b sẽn tog n maan Wẽnnaam taoorã!
Y na n leokẽ-la wãn to?
◻ Bõe yĩng tɩ y tõe n yeel tɩ pa bũmba fãa n yaa zaalem?
◻ Bõe yĩng tɩ kiris-ned sẽn yaa bi-bɩɩg segd n vaees a balengã tʋʋmd pʋʋsg pʋgẽ?
◻ Seb-bʋs buud “zãmsg wʋsg” n pa nafde?
◻ ‘Ninsaal fãa sẽn tog n maana’ yaa bõe?
[Picture on page 16]
Bũmba fãa pa zaalem ne neb nins sẽn sõgend a Zeova wã ye
[Picture on page 19]
Sẽn yaa lebend ne dũni kãngã sɛb wʋsgã, Wẽnnaam Gomdã kõta yolsg la a bee nafre