Tẽeg-y Y Naand Kãsengã Yelle!
“Tẽeg f naanda [Naand Kãsengã, NW] yell . . . tɩ f tooga wakat nan ka ta ye.”—KOƐƐG SOABA 12:1.
1. Kom-bɩɩs nins sẽn dɩk b mens n kõ Wẽnnaamã ra segdẽ lame n dat n dɩk b bi-bɩɩlmã la b pãngã n tʋm wãn-wãna?
A ZEOVA kõta a sõgen dãmbã pãng tɩ b maan a raabã. (Ezai 40:28-31) Sɩd yaa woto, baa ne b yʋʋma sẽn yaa to-to fãa. La sẽn yɩɩd fãa, kom-bɩɩs nins sẽn dɩk b mens n kõ Wẽnnaamã segd n datame n dɩk b bi-bɩɩlmã la b pãngã n tʋm ne yam. Woto yĩnga, b tũuda “koɛɛg soaba” sẽn yaa Rĩm a Salomo sẽn zĩnd pĩnd Israɛllẽ wã saglg ne b sũur fãa. A sagla woto: “Tẽeg f naanda [Naand Kãsengã, NW] yell f bi-bɩɩlem wakate tɩ f tooga wakat nan ka ta ye, la tɩ yʋʋm nins fo sẽn na n yeel tɩ f ka tar sũ-nooga wakat nan ka kolg ye.”—Koɛɛg Soaba 1:1; 12:1.
2. Bõe la kiris-neb nins sẽn dɩk b mens n kõ wã kamb segd n maane?
2 A Salomo sẽn sagl tɩ b tẽeg b Naand Kãsengã yell b bi-bɩɩlma wakatã reng n paka Israɛll kom-bɩɩsã la a kompugli wã. B roga buud sẽn dɩk a meng n kõ a Zeova pʋgẽ. Yaa wãn to yẽ ne kiris-neb nins sẽn dɩk b mens n kõ wã kamb rũndã-rũndã? Sɩd-sɩda, b segd n tagsa b Naand Kãsengã yelle. B sã n maan woto, b na n waoog-a lame tɩ naf bãmb mensã.—Ezai 48:17, 18.
Pĩnd mak-sõmse
3. Mak-sõma bʋs la a Zozɛf, a Sãmwɛll la a Davɩɩd kõ-yã?
3 Kom-bɩɩs wʋsg Biiblã sẽn gom b yell kõo mak-sõngo, n yɩ neb sẽn tẽeg b Naand Kãsengã yelle. Sẽn sɩng a yãadmẽ n dabda, a Zakoob biribl a Zozɛf tẽega a Naandã yelle. A Potifaar pagã sẽn wa n mak a Zozɛf n dat t’a yo ne-a wã, a Zozɛf zãgsa vẽeneg n yeele: “Mam na n yɩɩ wãn n maan yel-wẽn-kãseng woto n beeg m Wẽnnaam?” (Sɩngre 39:9) Levi buud ned a Sãmwɛll tẽega a Naandã yelle, pa a yãadem wakat bal ye, la yɩɩ a vɩɩmã tõr pʋgẽ. (1 Sãmwɛll 1:22-28; 2:18; 3:1-5) Sɩd-sɩda, bi-bɩɩg a Davɩɩd sẽn da be Betleɛmã tagsa a Naandã yell. A bas-yardã ne Wẽnnaamã ra yaa vẽenega, a sẽn wa n seg Filisti nin-wobg a Goliat n togs woto wã: “Yãmb zãada sʋʋg ne kãnd la munmun n wat mam nengẽ. La mam wata yãmb nengẽ ne Saasẽ-pãng-soaba yʋʋre. Bãmb yaa Israɛll tãb-biisa yãmb sẽn paoogda Wẽnnaam. Rũnda, Zusoaba na n kɩtame tɩ m tõog yãmba. Mam na n kʋʋ yãmb n fiuug y zugã . . . tɩ dũniyã fãa bãng tɩ Wẽnnaam bee Israɛll. La neb nins fãa sẽn be ka wã na n bãngame tɩ ka ne sʋʋs la kãn la Zusoaba fãagd ned ye. Tɩ bõe, Zusoabã n so zabrã. Bãmb na n kɩtame tɩ d tõog yãmba.” Tao-tao t’a Goliat kiime, tɩ Filisti nebã zoe.—1 Sãmwɛll 17:45-51.
4. a) Bõe n wilgd tɩ Israɛll bi-pugl b sẽn yõk n kẽng yembd Siiri wã, la Rĩm a Zozias sẽn yaa bi-bɩɩgã tẽega tõnd Naand Kãsengã yelle? b) Wãn-wãn la a Zezi sẽn da tar yʋʋm 12 wã wilg t’a tẽega a Naandã yelle?
4 Bi-bɩɩg a to sẽn tẽeg Naand Kãsengã yell da yaa Israɛll bi-pugl b sẽn yõk n kẽng yembdo. A kõo kaset sẽn yaa sõma Siiri tãb-biisã naab a Naaman pagã hal t’a Naaman kẽng Wẽnnaam no-rɛɛsã nengẽ, n paam a wãoodã sãoogre, n lebg a Zeova balemda. (2 Rĩm dãmba 5:1-19) Ne raoodo, Rĩm a Zozias sẽn yaa bi-bɩɩgã kɩtame t’a Zeova baleng yɩlemdã kẽng taoore. (2 Rĩm dãmba 22:1-23:25) La ned sẽn yɩ mak-sõng sẽn tɩ yɩɩd fãa ne ned sẽn tẽeg a Naand Kãsengã yell a sẽn da yaa bi-poll ra yaa a Zezi sẽn yit Nazarɛtã. Ges-y bũmb ning sẽn zĩnd a sẽn da wa n tar yʋʋm 12. A roagdbã tall-a lame n kẽng Zerizalɛm, Pakã yĩnga. B sẽn yi b so-toakã n kuusẽ, b mikame t’a Zezi ra ka be ye, tɩ b lebg n na n tɩ bao-a. Rasem a tãab-n-soabã zugẽ, b yã-a lame t’a sõsd Gʋlsg Sõamyã yɛl wɛɛngẽ ne wẽn-doogã karen-saam dãmba. A Zezi leoka a ma wã sẽn da sʋkd ne yɩɩrã woto: “Yaa bõe tɩ yãmb da baood maam? Yãmb ka mi tɩ mam tog n zĩnda m Ba roogẽ la?” (Luk 2:49, NW) Ra yaa bũmb sẽn nafd a Zezi t’a paam tẽebã zãmsg wẽn-doogẽ wã, sẽn ya a ‘Ba roogã.’ Rũndã-rũndã, a Zeova Kaset rãmbã Rĩung Rot yaa zĩis sẽn yaa sõma wʋsg sẽn na yɩl n paam tõnd Naand Kãsengã bãngr sẽn yaa takɩ.
Tẽeg-y a Zeova yell masã!
5. Ne y meng gom-biisi, wãn-wãn la y ra na n togs koɛɛg soabã sẽn yeel bũmb ning tɩ be Koɛɛg Soaba 12:1 pʋgẽ wã?
5 Ned sẽn balemd a Zeova ne a sũur fãa tʋllame n sɩng A tʋʋmdã tao-tao wa a sẽn tõe tɛka, la a sõgen Wẽnnaam a yõor tɛka. Baasg zãnga, yaa wãn to ne ned sẽn dɩk a bi-bɩɩlem n sãame, a sẽn pa tẽeg Naandã yellã yĩnga? Koɛɛg Soabã yeela vʋʋsem sõngã vẽnegr pʋgẽ: “Tẽeg f naanda [Naand Kãsengã, NW] yell f bi-bɩɩlem wakate tɩ f tooga wakat nan ka ta ye, la tɩ yʋʋm nins fo sẽn na n yeel tɩ f ka tar sũ-nooga wakat nan ka kolg ye.”—Koɛɛg Soaba 12:1.
6. Bõe n wilgd tɩ nin-kẽem a Simeõ la pʋg-yãang a Ana tẽega b Naand Kãsenga yelle?
6 Ned ba a yembr pa nong kʋʋlem wakat “tooga” ye. La nin-kẽemb nins sẽn tagsd Wẽnnaam yellã tara sũ-noogo. Wala makre, nin-kẽem a Simeõ rɩka biig a Zezi a nusẽ wẽn-doogẽ wã n togs woto ne sũ-noogo: “Masã, Zusoaba, yãmb basa y tʋm-tʋmda t’a loog ne laafɩ wa yãmb sẽn da yeelã. Tɩ bõe, mam nin yãa yãmb fãagre, yaa vẽenem sẽn vẽnegd bu-zẽmse la a yaa yãmb Israɛll neba ziiri.” (Luk 2:25-32) A Ana sẽn da tar yʋʋm pis-nii la a naasa me tẽega a Naandã yelle. Wakat fãa a ra bee wẽn-doogẽ wã, la b sẽn da rɩk biig a Zezi n kẽng be wã t’a ra bee be. “Yẽ me waa wakat kãng bala n pẽg Wẽnnaam, la a togsa neb nins fãa sẽn gũud Zerizalɛm fãagrã a Zezi yelle.”—Luk 2:36-38.
7. Yaa wãn-wãn ne neb nins sẽn kʋʋl Wẽnnaam sõgenegã pʋgẽ wã?
7 A Zeova rũndã-rũndã Kaset rãmb nins sẽn kʋʋl Wẽnnaam sõgenegã pʋgẽ wã tõe n namsda ne toodo, la ne tõog kaalem, b kʋʋlmã yĩnga. La sɩd-sɩda b tara sũ-noogo, la d sɩd nand-b-la wʋsg b kɩs-sɩd sõgenegã yĩnga! B tara “a Zeova sũ-noogã,” bala b miimi t’a rɩka a pãngã ned sẽn pa tõe n gɩdgã n tʋm tẽn-kãngã zugu, la a zĩnig a Zezi Kirist t’a yaa yĩngr Rĩm sẽn tar pãnga. (Nehemi 8:10, NW) Yaa masã la wakat ning kom-bɩɩsã la nin-kẽembã sẽn segd n tũ sagl-kãngã wã: “Kom-bɩɩs ne kom-pugli me la nin-kẽemba ne b kamba bɩ bãmb pẽg Zusoaba yʋʋre. Tɩ bõe, bãmb yʋʋra bal n zẽke. Bãmb naama yɩɩda dũniyã ne saasã.”—Yɩɩl Sõamyã 148:12, 13
8, 9. a) Ãnd dãmb la “tood wakat” pa kõt keoore, la bõe yĩng tɩ yaa woto? b) Wãn-wãn la y na n wilg Koɛɛg Soaba 12:2 võore?
8 ‘Toogã wakat’ kʋʋlmã sasa pa be yamleoog ye, a tõe n yɩɩ yɩɩr meng n kõ neb nins sẽn pa tagsd b Naand Kãsengã yell baa bilfã, la sẽn pa mi a raabã sẽn tar ziirã. B pa tar tẽebã yɛl võor wʋmb baa bilfu, sẽn tõe n kɩt tɩ b mao ne kʋʋlmã toog la yel-beed sẽn namsd ãdem-biisã, b sẽn dig a Sʋɩtãan t’a yi saasẽ wã tɛkã ye. (Wilgri 12:7-12) Woto yĩnga, koɛɛg soabã sagenda tõnd tɩ d tẽeg d Naandã yell “sẽn deng wĩndga ne vẽenema la kiuuga ne ãdsa sẽn na n sobge, la sawat sẽn na n pʋgl saag n wa.” (Koɛɛg Soaba 12:2) Gom-kãensã võor yaa bõe?
9 A Salomo rɩka bi-bɩɩlmã wakat n mak ne Palɛstin tʋʋlg wakatã. Sasa kãngã wĩntoogã, kiuugã la ãdsã kõta b vẽenem tɩ sawat pa lud-b ye. Wakat kãngã b nee bõn-yoodã fãa sõma. La kʋʋlmã wakate, ned rayã yaa wa waoodo, wa sa-niir wakate, tɩ f vɩɩmã yaa zu-loees woo zu-loeese. (Zoob 14:1) Ad sɩd ra na n yɩɩ kaeto tɩ d bãng Naandã n yaool n pa sõgen-a d bi-bɩɩlmã wakat ye! Vɩɩmã pʋgẽ, kʋʋlmã wakate, yɛlã lebgda libsgu, sẽn yɩɩd fãa ne neb nins sẽn pa tũnug ne soay nins b sẽn paam n na n sõgen a Zeova b bi-bɩɩlem wakate, b sẽn tall bõn-datɩ sẽn ka yõodã yĩnga. La baa tõnd yʋʋmã sẽn yaa to-to, bɩ d ‘sak a Zeova zãng’ wa kɩs-sɩd soab a Kalɛɛb sẽn da yaa no-rɛɛs a Moiiz tʋmd-n-taagã sẽn maana.—Zozue 14:6-9.
Kʋʋlmã biisi
10. a) “Roog gũudba” makda bõe? b) “Gãndaada” makda bõe?
10 Sẽn paase, a Salomo goma zu-loeesã yell “daar ninga roog gũudba sẽn na n digi la gãndaad sẽn na n kũ, la pagb sẽn da be neerẽ n werd sẽn na n bas werbo b sẽn ka le waooga yĩnga, la zĩig sẽn na n sobg tɩ neb [pagb, NW] sẽn da be ro-võorẽ n getẽ ka le tõe n yã ye.” (Koɛɛg Soaba 12:3) “Roog[ã]” yaa ninsaal yĩngã. (Matɩe 12:43-45; 2 Korẽnt dãmba 5:1-8) “Gũudba” yaa kamsã la nusã sẽn kogend yĩngã la a pidsd a ratmã. Kʋʋlem wẽnde, b nong n digdame, pãn-komslmã, yɩɩr sẽn lagem ne rabeem, la b sẽn ki wã yĩnga. “Gãndaad[ã]” sẽn yaa karsã, pa leb n yaa teends sẽn tar pãng ye, la b pãngã boogame tɩ b zõond hal tɩ nao wã vuud n pʋgd bala. La, y sũur pa noom y sẽn ne kiris-nin-taasã sẽn kʋʋl n be kiris-neb tigissẽ wã sɩda?
11. Sã n yaa ne makr wɛɛngẽ, ãnd dãmb la “pagb sẽn da be neerẽ n werd[ã],” la “pagb sẽn da be ro-võorẽ n getẽ” wã?
11 “Pagb sẽn da be neerẽ n werd sẽn na n bas werbo b sẽn ka le waooga yĩnga” yaa bõe yĩng tɩ yaa woto? Tõe tɩ yẽnã pãng boogame bɩ b feosame, n lebg kar-kare, bɩ n sa zãng menga. Rɩ-kɛgeng rɩɩb yaa toog bɩ pʋd n pa tõe meng ye. “Zĩig sẽn na n sobg tɩ neb [pagb, NW] sẽn da be ro-võorẽ n getẽ ka le tõe n yã” wã, sẽn yaa ninã ne kalkõtã pãn-tõod sẽn kɩtd tɩ d neẽ wã, libsdame, bɩ n pa leb n neẽ meng ye.
12. a) Yaa wãn-wãn la ‘kʋɩlens sẽn be sor kɩreng pag-yã’? b) Yãmb tagsg yaa bõe ne Rĩungã moondb sẽn kʋʋlã?
12 Koɛɛg soabã kẽngda taoor n yetẽ tɩ “La ki werb rãamd sẽn nan ka booge [rãamd sẽn boogã, NW] tɩ kʋɩlens sẽn be sor kɩreng page, la ned sẽn nan ka wʋm liuul kɛleng t’a pɛleng yɩke; la pʋg-sadb nins fãa sẽn yɩɩnda koees pãng sẽn na n booge.” (Koɛɛg Soaba 12:4) Noorã kʋlens a yiibã, no-bɩmsã, pa leb n yaagd wʋsg bɩ baa bilf meng sẽn na yɩl n wilg bũmb nins sẽn be neb nins sẽn kʋʋlã “roog[ẽ]” bɩ b yĩngã pʋgẽ, sẽn yaa b rãmb nins sẽn pa sõgend Wẽnnaamã. A pa tʋmd baa fɩ ‘sorã’ zugu, sẽn yaa zãma wã zĩigẽ ye. La yaa wãn to ne Rĩungã moondb sẽn kʋʋlã sẽn tar yẽesmã wɛɛngẽ? (Zoob 41:14, NW) Tõe tɩ b kẽnda maasg-maasg zak-zak moonegẽ wã la tõe tɩ yaa toog ne kẽer tɩ b gome, la sɩd-sɩda b pẽgda a Za!—Yɩɩl Sõamyã 113:1, NW.
13. Wãn-wãn la koɛɛg soabã bilgd sẽn kʋʋl-bã zu-loees a taaba, la bõe n yaa sɩd ne kiris-neb nins sẽn kʋʋlã?
13 Ki-werb rãamd na n boogame, rɩɩbã sẽn dɩt ne yẽn-feedã yĩnga. Nin-kẽem gõeem pa noom-a ye. Baa liuul kɛleng tiisd-a lame. A yɩɩl pa waooge, la yɩɩll buud fãa a sẽn yɩɩnde ned pa tõe n wʋm sõma ye. “Pʋg-sadb nins fãa sẽn yɩɩnda” yɩɩlã koɛɛg ‘pãng boogame.’ Sẽn kʋʋl-bã pa wʋmd mizik la yɩɩl nins neb a taabã sẽn maandã sõma ye. Baasg zãnga, kiris-neb nins sẽn zaeyã sẽn kʋʋlã la b tũud-n-taasã kẽer me sẽn ye pa kom-bɩɩs yasã ket n zẽkda b koees n yɩɩnd n pẽgd Wẽnnaam kiris-neb tigissẽ wã. Ad d sũy sɩd yaa noog tɩ d paam-b d sɛɛgẽ, n ningd a Zeova ziir tigingẽ wã!—Yɩɩl Sõamyã 149:1.
14. Rabeem bʋs n namsd sẽn kʋʋl-bã?
14 Ad sẽn kʋʋl-bã bee sũ-sãoong kãseng meng pʋgẽ, sẽn yɩɩd fãa neb nins toor sẽn da kae ne Wẽnnaamã! Koɛɛg soabã yeelame: “La ned sẽn zoet zĩ-zãonglgo la ned sẽn yɛɛsd sor zugu; la amand tɩɩg sẽn ningd a puudu, la sʋʋr sẽn vuud tẽnga tɩ kapr tɩɩg biis [weke, NW] . . . tɩ bõe, ninsaal dabda a roog sẽn ka sɛt zĩigẽ, la yãbdba zoet n pɩʋʋmda soaya.” (Koɛɛg Soaba 12:5) Neb wʋsg sẽn kʋʋl zoeta b na n wa rʋ ɛskalie rãmb sẽn zãnt n wa lʋɩ. B sã n get bũmb sẽn zãnt menga a tõe n kõ-b-la nen-yilenga. B sã n na n yi yɩng soayã sẽn pid ne nebã zutu, b yɛɛsda b na n wa pogle, bɩ wagda na n wa pig-ba.
15. Wãn-wãn la ‘amand tɩɩg ningd puudu,’ la yaa wãn-wãn la sʋʋr ‘vuud tẽnga’?
15 Sã n yaa ne nin-kẽemã, ‘amand tɩɩg ningda puudu,’ tɩ woto wilgdẽ t’a zoobdã lebgda pɛɛlg-pɛɛlga, rẽ poore, pɛɛlg faga. Zoob-peendã sʋʋgda wa amand tɩɩg puudã sẽn yaa peelsã. A sẽn ‘vuud tẽngã,’ tõe t’a sẽn zõr t’a kamsã luund zõo bɩ a nusã teeg a sɛɛgã t’a kãntɩɩgã gõdã, a wõnda sʋʋre. La tõnd ned a yembr sã n wõnd woto bilfu, bɩ neb a taabã bãng tɩ tõnd bee a Zeova sʋyã tãb-biisẽ sẽn tar pãng la sẽn zoet tʋʋll-tʋʋllã!—Ges-y yʋʋmd 1998, sig-noy kiuug pipi daar Gũusg Gasgã (farende), seb-vã-neng a 8-13.
16. a) ‘Kapr tɩɩg biigã wekrã’ rat n yeelame tɩ bõe? b) Ninsaal ‘roog sẽn ka sɛt zĩigã’ yaa bõe, la bõe bãn sẽn wilgd tɩ kũumã kolgame wã n lebgd vẽenega?
16 Rɩɩb yamleoog wʋsg pa leb n tar ned sẽn kʋʋl ye, baa rɩɩbã sẽn tẽg a taoorã sã n noom wa kapr tɩɩg biisi. Hal sẽn kaoose, b ra nong n tũnugda ne kapr tɩɩg biis n kõt nebã rɩɩb yamleoogo. ‘Kapr tɩɩg biisã wekr’ wilgdame tɩ rɩɩb yamleoog ne ned sẽn kʋʋl boogame, tɩ-kãngã biis meng pa tõe n kõ-a rɩɩb yamleoog ye. Yɛl a woto wilgdame t’a kolgda “a roog sẽn ka sɛt zĩigẽ,” sẽn yaa yaoogã. Na n yɩɩ a roog wakat fãa yĩnga, sã n mik t’a pa tags a Naandã yelle, n tall vɩɩm manesem wẽng tɩ Wẽnnaam pa tẽeg a yell vʋʋgrã wakat ye. Kũumã kolgr bãn yaa vẽenese, d sã n kelg sẽn kʋʋl-a wã sũ-sãoong koe-zom la a yẽgengã sẽn yit a noorẽ wã.
17. Wãn-wãn la “wanzũri wĩira” tõsgda, la bõe la “sãnem tʋka” tõe n make?
17 B sagenda tõnd tɩ d tẽeg d Naandã yell “tɩ wanzũri wĩira nan ka kaooge, la tɩ sãnem tʋka nan ka sãam, la tɩ yʋʋra nan ka wã ko-bundma zĩigẽ, la gʋlga sẽn nan ka lʋɩ n kaoog bulga pʋgẽ.” (Koɛɛg Soaba 12:6) “wanzũri wĩira” tõe n yɩɩ po-raoogã sɩɩlem. Kũumã yaa waaziba, yĩn-sidg so-kãseng kãngã sẽn tall n ta kalkõtẽ wã sã n sãam tɩ b ka tõe n sãooge. “Sãnem tʋka” tõe n yaa kalkõtã, sẽn be zu-wangã sẽn wõnd tʋkã pʋgẽ wã, po-raoogã sɩɩlem sẽn tɩ loe ne wã. Kalkõtã sẽn tar yõod wʋsg wa sãnemã, a sã n sãame yaa kũum.
18. “Yʋʋra . . . ko-bundma zĩigẽ” makda bõe, la bõe n maande, a sã n wãage?
18 “Yʋʋra . . . ko-bundma zĩigẽ” wã yaa sũurã, sẽn deegd zɩɩmã sẽn zoetã la a ye tʋmd-a t’a zoet yĩngã fãa pʋgẽ wã. Kũumẽ wã, sũurã lebgda wa yʋʋr sẽn wã, sẽn sãam ko-bundmã zĩigẽ, bala a pa leb n tõe n deeg zɩɩmã sẽn tar yõod wʋsgã, n tall-a, la a tãoos-a t’a tɩ rɩlg yĩngã la a yols-a ye. ‘Gʋlga sẽn kaoog bulga pʋgẽ wã’ basda yilingu, tɩ zɩɩmã zoees sẽn teend vɩɩmã sa. Woto wã, a Zeova puka a Salomo zɩɩmã zoees hal sẽn deng yʋʋm kob-gĩn 17 soabã logtor a William Harvey sẽn wilg tɩ zɩɩmã zoetame wã.
19. Wãn-wãn la goam nins sẽn be Koɛɛg Soaba 12:7 (NW) pʋgẽ wã pidsd kũum wakate?
19 Koɛɛg soabã paasame: “Rẽ poore toma lebda tẽn-gãongẽ wã wala a sẽn da beẽ wã tɩ vʋʋsmã leb sɩd Wẽnnaamã sẽn da kɩs-a wã nengẽ.” (Koɛɛg Soaba 12:7, NW) Ne ‘bulg gʋlga’ kaoogre, ninsaal yĩngã sẽn da maan ne tẽngã tomã lebda tomẽ wã. (Sɩngre 2:7; 3:19) Sɩɩgã kiidame, bala vʋʋsmã bɩ pãn-tʋmdgã Wẽnnaam sẽn kõ wã lebdame n tɩ be ne tõnd Naandã.—Ezekɩɛll 18:4, 20, NW; Zak 2:26.
Neb nins sẽn tẽegd Naandã yellã beoog-daar yaa bõe?
20. Bõe la a Moiiz ra pʋʋsd n kot Yɩɩl Sõama 90:12 pʋgẽ wã?
20 A Salomo wilga vẽeneg tɩ tara yõod wʋsg tɩ d tẽeg d Naand Kãsengã yelle. Sɩd-sɩda, pa yõ-koɛɛg la vɩɩm sẽn pid ne tood bal la neb nins sẽn tagsd a Zeova yell la sẽn maand a raabã ne b sũy fãa wã na n paam ye. B yaa kom-bɩɩs tɩ b kʋʋlame me, b manesmã ya a yembr ne a Moiiz sẽn pʋʋs woto wã: “Bɩ y wilg tõnd tɩ d sõd tõnd dasma neere tɩ d sũyã zãms yam.” Wẽnnaam no-rɛɛsã sẽn tar sik-m-mengã ra tʋlla ne a sũur fãa t’a Zeova wilgi, bɩ a zãms yẽ la Israɛll nebã tɩ b tall yam ‘b yʋʋmã’ sõdb pʋgẽ n dɩk yʋʋm kãens n tʋm tɩ ta Wẽnnaam yam.—Yɩɩl Sõamyã 90:10, 12.
21. D sã n dat n sõd d dayã tɩ ning a Zeova ziiri, bõe la d segd n maane?
21 Sẽn yɩɩd fãa kom-bɩɩs nins sẽn yaa kiris-nebã segd n dɩka sard kãn-kãe n kelg koɛɛg soabã sagls n tags Naandã yelle. Ad sɩd yaa zu-noog sẽn be rasãnd la b tar n na n sõgen Wẽnnaam ne sõgeneg sẽn yaa sõngo! Baasg zãnga baa ne d yʋʋmã sẽn yaa to-to fãa, d sã n zãmsd n sõt d yʋʋmã tɩ ningd a Zeova ziir ‘sɛɛbã wakat’ kãngã, d tõeeme n wa ket n sõt-b wakat fãa yĩnga. (Daniɛll 12:4; Zã 17:3) Yaa sɩda, sẽn na yɩl n maan woto, d segd n tẽega d Naand Kãsengã yelle. D segdame me n tʋk d zɩɩbã fãa Wẽnnaam sẽn baood tɩ d tʋkã.
Wãn to la y na n leokẽ?
◻ Bõe yĩng tɩ b sagend kom-bɩɩsã tɩ b tẽeg b Naandã yelle?
◻ Mak-sõma bʋs ne neb sẽn tẽeg b Naand Kãsengã yell n be Gʋlsg Sõamyã pʋgẽ?
◻ Kʋʋlmã biis kẽer a Salomo sẽn bilgã yaa bʋse?
◻ Beoog-daar bʋg n be neb nins sẽn tagsd a Zeova yellã yĩnga?
[Picture on page 11]
A Davɩɩde, Israɛll bipuglã b sẽn yõk n kẽng yembdã, a Ana la a Simeõ tẽega a Zeova yelle
[Picture on page 12]
A Zeova Kaset rãmb nins sẽn kʋʋlã sõgenda tõnd Naand Kãsengã ne sũ-noogo, ne sõgeneg sẽn yaa sõngo