Yaa Wẽnnaam n wat ne tõnd zu-loeesã bɩ?

A MARION bi-pugl kãsengã zug sẽn da wa n pogl wʋsgã, a maana bũmb tõnd sʋkã neb wʋsg me sẽn da na n maane. A pʋʋsa Wẽnnaam n kos a sõngre.a A yeelame: “Mam da zɩ n paam yell n pa mi m sẽn na n maaneg wala woto ye.” Kaoosg zugẽ, a Marion bi-puglã bãag wɩngame tɩ kɩt t’a sãmbd Wẽnnaam sã n sɩd wʋma a kosgã. A soka a meng woto: “Bõe yĩng tɩ yãoã paam maam?” A ra pa wʋmd nonglem la nimbãan-zoeer Wẽnnaamã sẽn pa kelg-a wã võor ye.

A Marion zu-loɛɛga buud zoe n paama neb wʋsgo. Dũniyã gill zugu, neb wʋsg n tags tɩ Wẽnnaam bas-b lame, b sẽn da wa n dat sõngr wakate. B sẽn kʋ a Lisa yagengã poore, a yeelame: “Bũmb ning sẽn ket n namsd maam yaa m sẽn pa mi Wẽnnaam sẽn bas tɩ yel-beed woto beẽ wã võorã. Baa m sã n ket n tẽeda Wẽnnaam, sɩd-sɩda m tẽebã pãng boogame.” Pag a ye me bi-pɛɛlg sẽn da ki t’a pa tol n wʋm a biigã kũum võore, a yeelame: “Wẽnnaam pa bels maam yel-kãngã pʋgẽ ye. A pa tol n kõ bãnd sẽn wilgd tɩ mam nimbãaneg tar-a lame ye.” A paasame: “Mam pa na n tol n bas Wẽnnaam taal yãoã pʋgẽ ye.”

Neb kẽer sã n get yɛl nins sẽn karg n gũbg-bã, b sũy yikda wʋsg ne Wẽnnaam. B nee talemdã la komã sẽn namsd nebã tẽns wʋsg pʋsẽ, la zabã sẽn kɩt tɩ neb zoe n yi b tẽnsẽ n pa mi b sẽn maandga, kɩɩbs sõor ka tɛk SƖDA wã sẽn wa ne, la neb milyõ rãmb bãas a taab sẽn namsde. Yel-be-kãensã buud taoore, neb kẽer ningda Wẽnnaam taale, sẽn wõnd a pa maand bũmb n sõngdẽ wã yĩnga.

La sɩd-sɩdã Wẽnnaam yaool n pa tar taal yɛl nins sẽn namsd ninsaalbã pʋgẽ ye. D pʋd n tara bʋʋm n na n tẽ tɩ ka la bilfu, a na n kɩtame tɩ tood nins sẽn namsd ãdem-biisã fãa sa. D kot-y lame tɩ y karem sõsg ning sẽn pʋgdã tɩ y na yã tɩ tõnd yell sɩd paka Wẽnnaam.

[Tẽngr note]