3 Biiblã sõngda ned t’a mao ne zu-loeese

BÃAG SẼN PA SATE

Bi-pugl yʋʋr sẽn boond t’a Rooz yeelame: “Mam doga ne bãag sẽn namsd-m wʋsgo, tɩ wakat fãa bɩ zabdmã pa tõe n bãng n bilg ye. Bũmb wʋsg la m pa tõe n maane.” Bũmb ning sẽn namsd-a n tɩ yɩɩdã yaa a sẽn mi n dat meng n maag a yĩng n karem la a bʋgs Biiblã goamã zugu, la a maan tũudmã tʋʋm a taaba, n pa tõe wã. La bũmb ning a Zeezi sẽn togs tɩ be Matye 19:26 sõngd-a-la wʋsgo. A yeela be tɩ “Wẽnnaam tõee bũmb fãa.” A Rooz wa n bãngame t’a tõe n baoo yam n paam n zãmsd Biiblã. Zabdmã sẽn kɩt t’a mi n pa tõe meng n karmã, a yãka yam n kelgd Biiblã la sɛb sẽn wɛgsd Biiblã goamã, tɩ b rɩk tɩ d tõe n ning n kelgã.a Ad a sẽn yeele: “Sã n da pa woto, m pa mi m sẽn da na n maaneg tɩ m tẽebã kell n tall pãng ye.”

A Rooz sũurã sã n mi n sãam wʋsg a sẽn pa tõe n maan bũmb a sẽn da maand pĩndã yĩnga, 2 Korẽnt-rãmb 8:12 goamã belsd-a lame. Be, b yeelame tɩ “ned sã n tar datem tɩ kõ wa sẽn zems yẽ sẽn tar bũmb ningã, a tata Wẽnnaam yam n yɩɩd yẽnda sẽn na n dat n kõ bũmb ning yẽnda sẽn ka tarã.” Tẽegda a Rooz tɩ Wẽnnaam sũur nooma ne a sẽn maand bũmb ninsã, bala a maanda a sẽn tõe wã fãa.

Y NED KAALEM

A Dɛlfin, pag ning yell d sẽn da gomã yeelame: “M yʋʋm 18 bi-puglã sẽn wa n maan kaalmã, toogã ra sãag-m lame, hal tɩ m da tagsdẽ tɩ m pa na n le tõog n vɩɩmd ye. Bũmba fãa toeema fasɩ.” La Yɩɩn-sõamyã 94:19 wã goam yɩɩ belsg meng-meng n kõ-a. Be, yɩɩn-gʋlsdã yeela Wẽnnaam yaa: “Yɛl wʋsg sã n wa n be m pʋgẽ n namsd-ma, yãmb sẽn belsd maamã kõt-m-la sũ-noogo.” Ad a Dɛlfin sẽn paase: “M da pʋʋsda a Zeova t’a sõng-m tɩ m bãng bũmb nins m sẽn tõe n maan tɩ m toogã booge.”

A naagd n sõngda neba, n tʋmd ne a sũur fãa. A wa n yeelame t’a yaa wa lakrɛ. Bala, baa lakrɛ-kaoong tõe n tall n gʋlsame. A ra getame tɩ baa sẽn wõnd a pa le ta a taabã, a ket n tõe n sõnga neba. A yeelame: “Rẽ tɛka, m da neeme tɩ m sã n tall Biiblã n bels m Biibl karen-biiga, a Zeova tũnugda ne rẽ me n kell n bels-ma, n kõ-m sũ-noogo.” A baoo sebre, t’a sã n karem Biiblã, n yã kibar sẽn gomd ned sẽn nams wʋsg a ned kaalem yĩnga, bɩ a gʋls a soab yʋʋr be. A mikame tɩ b fãa ra yaa “neb sẽn nong pʋʋsgo.” Bũmb a to me la a bãng-yã. A yeelame: “F sã n pa karemd Biiblã, f pa tõe n mao ne zu-loeesã ye.”

Ad bũmb a to yɛs Biiblã zãmsg sẽn sõng a Dɛlfin t’a bãnge: D tog n tagsda sẽn wat beoogã yelle, pa sẽn loogã ye. Tʋʋm 24:15 wã bels-a-la wʋsgo. B yeela be tɩ “nin-sõamyã la nin-wẽns na n vʋʋgame n bas kũum.” Rẽ yĩnga, a kɩsa sɩd t’a Zeova na n vʋʋga a bi-puglã bɩ? Ad a sẽn leoke: “M zoe n nee kũum vʋʋgrã daar sẽn ta, tɩ m bi-puglã vʋʋge. D saasẽ Ba wã zoe n yãka daarã. M nee d sẽn be ne taab d zardẽ wã pʋgẽ, yaa vẽeneg m yamẽ wã. M ne-a lame, la m nong-a wa a rogmã daare.”