Yãmb tẽeda y sẽn ne bal bɩ?
“Neb kẽer tẽedame tɩ yɩl n bãng sɩdã Wẽnnaam zugu, la beoog daarã sẽn na n yɩ a soab wala kiris-nebã la tũudum a taabã neb sẽn tẽedã yaa bũmb sẽn pa tõe. La baa sã n tõe me, rẽ pa rũndã yell ye.”—FILOZOF A BERTRAND RUSSELL, YƲƲMD 1953.
A THOMAS HUXLEY yaa bãngd a ye me sẽn tẽed tɩ yɩl n bãng sɩdã Wẽnnaam zug yaa bũmb sẽn pa tõe. A Thomas Huxley roga yʋʋmd 1825 wã pʋgẽ. A vɩɩmda a Charles Darwin wakatẽ wã. Yẽ me ra tẽeda wa a Darwin tɩ bũmb fãa waa yaar n pa tũ ne naanda, n da pʋd n teend zãms-kãngã. Yʋʋmd 1863 soabã pʋgẽ, a gʋlsa sebr n wilg tɩ yẽ pa ne bũmb sẽn wilgd tɩ Wẽnnaam sẽn “nong tõnd la a get d yell beeme wa kiris-nebã sẽn tẽedã ye.”
Rũndã-rũndã, neb wʋsg tagsdame tɩ nin-kãensã sẽn yeelã yaa sɩda, n pʋd n yetẽ tɩ bãmb tẽeda b nin sẽn ne bala. B tõe n yetame tɩ tẽ bũmb tɩ kaset ka be n wilgdẽ tɩ bõn-kãng sɩd beeme yaa yalemdo.
La rẽ yĩnga Biiblã yetame tɩ d tẽ tɩ Wẽnnaam beeme n yaool n pa ne kaset sẽn wilgd rẽ bɩ? A pa yet woto ye. Biiblã wilgdame tɩ pʋd n yaa yalemdo, d sã n sak n tẽ nebã sẽn yet bũmb nins tɩ kaset kae n wilgdẽ tɩ b sẽn yetã yaa sɩdã. Biiblã yetame tɩ “zɩt deegda a sẽn wʋmd bũmb ninga fãa. La nin-yẽeseng [bɩ yam soab, NW ] gũusda ne a sẽn maand bũmb ningã.”—Yelbũna 14:15.
Rẽ yĩnga d tara kaset sẽn wilgd tɩ Wẽnnaam sẽn nong tõnd la a rat d neer sɩd beeme bɩ?
D bãnga Wẽnnaam sẽn sɩd yaa a soaba
A Poll sẽn yaa Biiblã gʋlsd a ye wã sẽn wa n gomd ne Atɛn neb nins sẽn da karem n zãagã, a wilgame tɩ yaa Wẽnnaam n “naan dũniyã ne bũmb nins fãa sẽn be a pʋgẽ” wã. A yeela neb nins sẽn da maand sãmb-sãmbã tɩ Wẽnnaam nonga ninsaalbã, la t’a “ka zãr ne tõnd fãa ye.”—Tʋʋma 17:24-27.
Bõe yĩng t’a Poll kɩs sɩd tɩ Wẽnnaam beeme la t’a nonga ninsaalbã a sẽn naanã? A wilga bʋʋm a yembre, a sẽn wa n gʋlsd a tẽed-n-taasã sẽn be Romã. A yeela woto: “Bũmb nins sẽn naan hal dũniyã naanegã wakatã pukda Wẽnnaam zemsgo.”—Rom dãmba 1:20.
Sõss nins sẽn pʋgdã wilgda yɛl a tãab sẽn kɩtd tɩ d bãng Wẽnnaam sẽn yaa a soaba: Yaa a yamã, a pãngã, la a nonglmã. D tõe n yãa bõn-kãensã bũmb nins a sẽn naanã pʋgẽ. Yãmb sã n wa karemd sõs-kãense, bɩ y sok y meng woto: ‘Mam sẽn zãmsd bũmb ninsã kɩtame tɩ mam tagsd wãn to Wẽnnaam zugu?’
[Goam sẽn tar pãngã, seb-neng a 3]
Biiblã pa yet tɩ d tẽ bũmbã fãa zond-yaar ye