B boola nebã tɩ b wa kẽ n ges filiyalle
NEBÃ sã n loogd n get a Zeova Kaset rãmbã filiyall sẽn be Mogale City sẽn pẽ ne Johannesburg, Afirikdisiidã, wʋsg sokda b mens woto: “Bõe la b maand zĩ-kãngã?” Woto kɩtame tɩ kaset rãmbã bool nebã tɩ b wa kẽ n gilg n ges b filiyallã yʋʋmd 2007 zĩ-likr kiuugã rasem 12 ne 13. Yaa sẽn na yɩl n wilg tɩ nebã sẽn dõt a Zeova Kaset rãmbã yaa ziri, la b wilg nebã bũmb nins b sẽn maand filiyallã pʋgẽ n na n teel tʋʋmd ning a Zezi sẽn bobl a karen-biisã.—Matɩe 28:19, 20.
Neb nins sẽn tʋʋmd filiyallẽ wã ninga palak zakã noor n pʋʋsd nebã ne b waoongo. B leb n pʋɩya b yagsã booll sɛba. B boola b tʋmd-n-taasã me ne b zags rãmba. Yɩɩ sẽn yɩɩd neb 500 sẽn pa a Zeova Kaset rãmb n wa n gilg n ges filiyallã.
Masĩn ning b sẽn boond tɩ MAN Roland Lithoman sẽn tõe n yiis sɛb 90 000 lɛɛr fãa wã la nebã ges n yɩɩda. Sẽn paase, b sẽn dɩkdẽ zɩɩbã zĩig ningã sɩd talla yamleoog ne nebã, bala b rɩkda sẽn yɩɩd sɛb ton 14 daar fãa n ningd kartõ rãmb n toond tẽns a taaba. Yɩɩ woto sɛbã maaneg bɩ reliyiir dãmbã zĩigẽ me. Kaset rãmb sẽn tʋmd zĩis toor-toor filiyallã pʋgẽ segla bũmb toɛy-toɛy b sẽn tõe n tũnug ne n wilg nebã b tʋʋmdã sẽn yaa to-to vẽenega. Wala makre, b wilga b sẽn sɩng sɛbã yiisg ne masĩn dãmb nins hal a Gutenberg wakatã n tãag rũndã-rũndã b sẽn tũnugd ne offset n yiisdẽ wã. Sẽn paase, b wilga sãambã filiyallã sẽn manegd zĩigã to-to. Wala makre, masĩn n fõogd gaazã ne yũudã masĩn dãmb a taabã sẽn yiisdã, tɩ filtr dãmb me be be n kokd seb-gɩrsã sẽn yaa zom-zomã n tikdẽ.
Be zʋrnall a yembr yeelame tɩ neb 700 wã sẽn tʋmd filiyallã pʋgẽ ne yamleoogã yaa neb sẽn dɩk b mens n kõ a Zeova. A leb n pẽga zĩigã sẽn yaa yɩlemd wʋsgã, la b sẽn tʋmd tʋʋmã sɛbã yiisg zĩigẽ tɩ wakatã pa yõsgdẽ wã. Rao a ye sẽn da pa sakd n kelg a Zeova Kaset rãmbã n wa n gilg n gese. Rẽ loogr poore, a gʋlsa lɛtr n yeel woto: “M pẽgd-y lame. Yɩl n yã neb sẽn tʋm tʋʋmd t’a yaa sõma woto yaa toogo.”
Neb wʋsg sẽn wa n gilg n ges filiyallã sũur yɩɩ noog wʋsgo. La yɩɩ lingr ne-ba, b sẽn bãng tɩ filiyallã pida ne sɛb sẽn tik Biiblã zugu, b sẽn lebg ne buud goam 151, la tɩ b yiisda sɛb Afirik tẽns 18 yĩngã. Dũniyã gill zugu, a Zeova Kaset rãmbã tara b filiyall dãmba, la nebã tõe n tɩ kẽe b tʋʋma wakat n gill n gese. Yãmb me sã n data, y tõe n tɩ gesa filiyall ning sẽn pẽ ne yãmbã.
[Foto rãmba, seb-neng 10]
Afirikdisiid filiyallã
[Foto, seb-neng 10]
Masĩn ning b sẽn boond tɩ Man Roland Lithoman
[Foto, seb-neng 10]
Sɛbã maaneg zĩiga
[Foto, seb-neng 10]
Sɛbã wʋkr zĩiga
[Foto, seb-neng 11]
Neb sẽn wa n na n gilg n ges filiyallã
[Foto, seb-neng 11]
Boollã sebre