Wakat d sẽn segd n yãk d sẽn date
“Wẽnnaam naana ninsaal wa b meng wẽnego, Wẽnnaam naana yẽ wa bãmb wẽnego. Bãmb naana bãmb daoa la paga.”—Sɩngre 1:27.
NEB wʋsg mii gom-kãensã sẽn be Sɩngr sebrã pʋgẽ wã. B wilgda bõn-kãseng a ye Wẽnnaam sẽn sɩd ‘maan sõma n zems a wakate.’ Yaa a sẽn naan d yaab a Ãdem ne a Hawa tɩ b ra pa tar yel-wẽnd b sɩngrẽ wã. (Koɛɛg Soaba 3:11) B naanegã poore, Wẽnnaam a Zeova yeel-b lame “tɩ b rog kamb n pid dũniyã la b tõog-a. La b soog zĩma sẽn be kooma pʋsẽ wã la bõn-yɩgdɩ wã sẽn yɩgd yĩngrã la rũms nins fãa sẽn kẽnd dũniyã zugã.”—Sɩngre 1:28.
Wẽnnaam sẽn yeel d yaab a Ãdem ne a Hawa woto wã, a wilg-b-la a raabã. A ra ratame tɩ b rog kamb n pids dũniyã la b ges tẽngã yelle, n kɩt t’a lebg arzãn bãmb ne b yagensã fãa yĩnga. Wẽnnaam pa yãk wakat n wilg-b tɩ wakat kãng sã n ta, b na n kiime ye. Wẽnnaam da pʋd n wilgame t’a sẽn dat bũmb ning ne-bã yaa sõma hal wʋsgo. B sã n da yãk yam n kell n sak Wẽnnaam, b ra na n vɩɩmda sũ-noog la bãan pʋgẽ wakat sẽn pa sate.
La b yãka yam n kɩɩs Wẽnnaam, tɩ kɩt tɩ ninsaalbã fãa kʋʋndẽ la b kiidẽ. Sɩd me, wẽn-sakd a Zoob wa n yeelame tɩ “ninsaal pag sẽn dogã vɩɩm yaa koɛɛg la toogo.” (Zoob 14:1) La maana wãn tɩ wa lebg woto?
Biiblã leokda sok-kãng woto: “Rao a yembr n wa ne yel-wẽnã dũniyã, tɩ kũum wa yel-wẽnã yĩnga. Rẽ n kɩt tɩ kũum yõkd nebã fãa, fãa sẽn maand yel-wẽnã yĩnga.” (Rom dãmba 5:12) Rao ning sẽn wa ne yel-wẽndã yaa a Ãdem. A yãka yam n kɩɩs noor Wẽnnaam sẽn kõ-ba, t’a tũub yaool n da pa toe ye. (Sɩngre 2:17) A Ãdem yam-yãkrã kɩtame t’a ra pa na n paam n vɩɩmd wakat sẽn kõn sa tẽngã gill sẽn da na n wa lebg arzãnã pʋgẽ ye. Sẽn paase, a kɩtame t’a yagensã me kong vɩ-kãnga, la a kɩt tɩ b lebg yel-wẽn-maandb la b kiid wa Wẽnnaam sẽn yeelã. La rẽ yĩnga, a Ãdem yagensã bõna vɩɩm ning b sẽn da tog n paamã wakat fãa yĩng bɩ?
Wakat b sẽn yãk n na n lebs n maneg bũmb fãa
Yʋʋm tusa loogr poore, Wẽnnaam kɩtame tɩ yɩɩl-gʋlsdã yeel woto: “Nin-tɩrs na n sooga dũniyã la bãmb na n zĩnda a zug wakat sẽn ka sɛta.” (Yɩɩl Sõamyã 37:29) Wẽnnaam kɩtame tɩ b wilg bũmb ning a sẽn na n maan ka la bilfã a Gomdã pʋgẽ, tɩ wilgdẽ tɩ bũmb ning a sẽn da yeel Edɛnnã na n pidsame. Biiblã yeta woto: “[Wẽnnaam] na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbr wall toog kõn le zĩnd yɛs ye, tɩ bõe, dẽenem bũmb fãa loogame.” Rẽ poore, Wẽnnaam mengã yeela woto: “Gese, mam maanda bũmb fãa paalse.”—Wilgri 21:4, 5.
La sẽn mik tɩ bũmb fãa tara a wakatã yĩnga, dẽnd Wẽnnaam tara wakat a sẽn yãke, n na n lebs n maneg bũmb fãa n kɩt tɩ ãdem-biisã paam bõn-sõma nins a sẽn kãab-b hal sɩngrẽ wã. La na n yɩɩ wakat bʋgo? Sẽn yiisd-b seb-kãngã wã, rat n yeel t’a Zeova Kaset rãmbã sɩng n modgdame n dat tɩ ãdem-biisã bãng tɩ d vɩɩ wakat ning Biiblã sẽn boond tɩ ‘yaoolem wakatã’ pʋgẽ, la tɩ wakat ning Wẽnnaam sẽn yãk n na n lebs n ‘maan bũmb fãa paalsã’ ta n saame. (2 Tɩmote 3:1) D sagenda y ned kam fãa t’a modg n zãms Biiblã n bãng bõn-sõma nins a sẽn tõe n wa paamã. D sagend-y lame me tɩ y sak Biiblã no-kãngã. B yeela woto: “Bɩ y bao Zusoabã wakat ninga yãmb sẽn ket n tõe n yã bãmba. Bõos-y bãmb wakat ninga bãmb sẽn ket n pẽ ne yãmba.” (Ezai 55:6) Wẽnnaam pa pʋlem yãmb vɩɩmã sẽn na n yɩ to-to wã ye. Yaa ned kam fãa n segd n yãk a sẽn dat t’a vɩɩmã yɩ to-to wã, la a yãk a sã n dat n wa paama vɩɩm sẽn kõn sa wã!
[Foto, seb-neng a 8]
“Gese, mam maanda bũmb fãa paalse”