Y sẽn tõe n wʋm Biiblã goam võor to-to

2. Karemd-y ne yam-sõngo

Yãmb zoa sã n wɩt ned y sẽn zɩ n yã tɩ y wa seg a soabã, rẽ yĩnga y zoa wã goamã pa na n kɩt tɩ yɩ toog ne-y tɩ y yã zʋg-sõma nin-kãngã nengẽ sɩda? Tõe n yɩɩ woto me ne Biiblã.

TƲM-TƲMD a Poll wilga bũmb ning sẽn tõe n maane, d sã n pa karem Biiblã ne yam-sõngo. A goma a wakatẽ zʋɩf rãmb kẽer yell n yeel woto: “Mam kɩta kaset tɩ bãmb wɩngda ne Wẽnnaam tʋʋmde, la bãmb ka tar vẽnegr ye.”—Rom dãmba 10:2.

Baa Biiblã babg ning b sẽn da gʋls ne hebre wã sẽn wilgd vẽeneg tɩ yaa a Zezi la Mesi wã, pipi kiris-nebã wakatẽ zʋɩf rãmb kẽer da pa rat n sak n deeg rẽ ye. Bãngr-goam nins sẽn be seb-kãens pʋsẽ wã yaool n pidsa Nazarɛt dao a Zezi zug kɛpɩ. Baasgo, neb wʋsg sẽn da tar tags-kɛg yĩnga, b pa tõog n wʋm Wẽnnaam Gomdã gom-kãensã võor ye.

Yam-bʋg la d tõe n dɩk yel-kãng pʋgẽ? Woto wilgdame tɩ d sã n dat n wʋm Biiblã võore, d pa segd n tall tags-kɛg a zug ye. Tags-kɛg tõe n luda ned yam t’a pa tõog n bãng sɩd ning sẽn be Biiblã pʋgẽ wã ye.

Wala makre, tũudum yɛl karen-saamb sẽn yit Karolindinoor sẽn be Etazĩni soolmẽ wã yeela woto: “Biiblã yaa ninsaalb bal n gʋlse. A pida ne ninsaalb tagsa. Rẽ me b tagsa wã kɩɩsda taaba. B baa a ye me pa tolg n tõe n sõng ned t’a bãng a sẽn segd n vɩɩmd to-to ye.” La ned sã n karemd Biiblã la a tagsdẽ tɩ yaa ninsaalb bal n gʋls-a la t’a pa yit Wẽnnaam nengẽ, rẽ yĩnga a soab na sak n tũ a saglsã la a noy nins sẽn pa noom-a wã sɩda?

Biiblã yẽ sagend-d lame tɩ d maag d yĩng n vaees-a sõma. Tʋm-tʋmd a Poll wakatẽ wã, a goma Beere soolmã neb yelle, n yeel woto: “Bãmb deega Wẽnnaam koɛɛga ne b sũyã fãa. La bãmb baoo Gʋlsg Sõamyã pʋgẽ daar fãa tɩ bãng bũmb nins b sẽn yet bãmbã sã n yaa tɩrga.” (Tʋʋma 17:11) Yãmb me segd n maana wala nin-kãensã. Y sã n dat n karem Biiblã n wʋm a goamã võore, rẽnda y reng n bas tags-kɛg buud fãa y sẽn tar a zugu. Y segd n karemda Wẽnnaam Gomdã ne yam-sõngo, n dat ne y sũurã fãa n bãng a soaadã koɛɛg sẽn sɩd yaa koe-noog tɛkã.