Y sẽn tõe n maan tɩ y Biiblã kareng naf-y sõma

1. Bõe n wilgd tɩ Gʋls-sõamyã ra tara yõod wʋsg a Zeezi nifẽ?

TAGS-Y n ges-y a Zeezi sẽn da zãmsd nebã to-to wã. A ra nong n togsda Gʋls-sõamyã goamã ne zugu. Goam nins a sẽn togs a lisgã poorã, la goam kẽer a sẽn togs bilf nand t’a ki wã ra yita Gʋls-sõamyã pʋgẽ.b (Tõo. 8:3; Yɩɩn. 31:6; Luk 4:4; 23:46) Yʋʋm a tãab la pʋɩ-sʋkã a Zeezi sẽn zĩnd tẽngã zugã, naoor wʋsgo a karma Wẽnnaam Gomdã zãma sʋka, la a bilg a võore.—Mat. 5:17, 18, 21, 22, 27, 28; Luk 4:16-20.

2. A Zeezi sẽn wa n bɩtẽ wã, bõe n sõng-a t’a maneg n wʋm Gʋls-sõamyã võor sõma? (Ges-y sebrã pipi neng fotã.)

² Yʋʋm wʋsg nand t’a Zeezi sɩng koɛɛgã moonego, a karma Wẽnnaam Gomdã, la a kelg a kareng naoor wʋsgo. Sãmbg kae t’a Maari ne a Zozɛf sã n da wa be zakẽ n sõsd ne b kambã, b goam kẽer da yita Gʋls-sõamyã pʋgẽ.c (Tõo. 6:6, 7) D tõe n kɩsa sɩd tɩ Vʋʋsg daar fãa, a Zeezi ra tũuda a zakã rãmb n kẽnd Zʋɩf-rãmbã tigsg roogẽ wã. (Luk 4:16) Beenẽ, a tog n da maagda a yĩng n kelgd Gʋls-sõamyã karengã. A Zeezi wa n zãmsa karengo, n karemd Gʋls-sõamyã a toore. Rẽ kɩtame t’a bãng Gʋls-sõamyã sõma. La pa rẽ bal ye. A ra nonga Wẽnnaam Gomdã me, n tũud rẽ a vɩɩmã pʋgẽ. Wala makre, tẽeg-y bũmb ning sẽn maan wẽnd-doogẽ wã daar a ye, a Zeezi sẽn da zems yʋʋm 12. A Zeezi sẽn da “wʋmd yɛlã võor sõma wã, n paas a sẽn da leokd to-to wã ra lingda” karen-saam-dãmbã sẽn da mi a Moyiiz tõogã sõma wã.—Luk 2:46, 47, 52.

3. Bõe yell la d na n gom sõs-kãngã pʋgẽ?

³ Tõnd me sã n karemd Gʋls-sõamyã daar fãa, d na n bãnga Wẽnnaam Gomdã sõma la d nong-a. Bõe la d tõe n maan tɩ bũmb nins d sẽn karemdã naf-d sõma? D tõe n dɩka yam bũmb ning a Zeezi sẽn togs gʋlsdbã, Fariziyẽ-rãmbã la Sadisẽye-rãmbã sẽn da mi tõogã sõma wã pʋgẽ. Nin-kãensã sẽn da yaa tũudmã taoor dãmbã ra nong n karemda Gʋls-sõamyã, la b sẽn da karemd bũmb ningã ra pa nafd-b ye. A Zeezi wilga bũmb a tãab sẽn kɩt tɩ b karengã ra pa nafd-bã. A sẽn yeel-b bũmb ningã na n sõng-d lame 1) tɩ d wʋmd bũmb ning d sẽn karemdã võor sõma, 2) tɩ d yã bũmb sẽn tõe n keng d tẽebã, la 3) n bas tɩ Wẽnnaam Gomdã kɩt tɩ d toeeme.

BAO-Y N WƲM-Y Y SẼN KAREMDÃ VÕORE

4. Bõe la Luk 10:25-29 sõngd tõnd tɩ d bãng Wẽnnaam Gomdã kareng wɛɛngẽ?

⁴ D segd n modgame n wʋm bũmb nins d sẽn karemd Wẽnnaam Gomdã pʋgẽ wã võore. Sã n pa rẽ, d karengã pa na n naf-d sõma ye. Wala makre, d ges a Zeezi sẽn sok “Tõogã karen-saamb” a ye sogsg ninsã. (Karm-y Luk 10:25-29.) Raoã sẽn sok a Zeezi n na n bãng a sẽn segd n maan bũmb ning n paam vɩɩm sẽn kõn sa wã, a Zeezi sõng-a lame t’a paam a sokrã leoor Wẽnnaam Gomdã pʋgẽ. A Zeezi sok-a lame yaa: “Bõe la b gʋls Tõogã pʋgẽ? Fo wʋmda f sẽn karemdã võor wãn-wãnã?” Raoã leoorã zemsame, bala a wilgame tɩ Wẽnnaam Gomdã yetame tɩ f segd n nonga Wẽnnaam, la f nong f to. (Maan. 19:18; Tõo. 6:5) La rẽ poore, raoã sokame yaa: “La yaa ãnda soab la mam to?” Woto wilgdame t’a ra pa wʋmd a sẽn karemdã võor sõma ye. Rẽ kɩtame t’a ra pa mi a sẽn na n tũ gom-kãensã to-to a vɩɩmã pʋgẽ ye.

5. D sã n pʋʋs la d maag d yĩng n karem Biiblã, wãn to la rẽ na n sõng-d tɩ d wʋm d sẽn karmã võor sõma?

⁵ D sã n modgd n maand bũmb kẽer Biiblã kareng sasa, na n sõng-d lame tɩ d maneg n wʋmd Wẽnnaam Gomdã võor sõma. Ad bũmb a wãn y sẽn tõe n maan tɩ sõng-yã: Pʋʋs-y n yaool n sɩng karengã. Sẽn na yɩl n wʋm Wẽnnaam Gomdã võor sõma, yaa tɩlɛ tɩ d paam a Zeova sõngre. Rẽ wã, kos-y-yã-a a vʋʋsem sõngã, tɩ sõng-y tɩ y yamã ra yuus ye. Rẽ poor bɩ y maag y yĩng n karme. Woto na n sõng-y lame, tɩ y wʋmd bũmb ning y sẽn karemdã võore. Y tõeeme me n zẽk y koɛɛg n karme, wall y kelgd Biiblã odio wã, la y tũud karengã. Y sã n maand woto, na n kɩtame tɩ y yamã ne y sũurã fãa kẽ karengã, tɩ y sẽn karemd bũmb ningã pa y yamẽ wã. (Zoz. 1:8) Y sã n wa karem n sa, bɩ y le pʋʋs a Zeova. Pʋʋs-y-yã-a bark ne a Gomdã sẽn yaa kũun a sẽn kõ-dã, la y kos-a t’a sõng-y tɩ y tũ bũmb ning y sẽn karmã.

6. Y sã n wa karemd Biiblã, n sokd y meng sogsg la y gʋlsd bũmb kẽere, wãn to la rẽ tõe n naf-yã? (Ges-y fotã me.)

⁶ Ad bũmb a yiib me sẽn tõe n sõng-yã, tɩ y wʋm Biiblã goamã võor sõma. Sokd-y y meng sogsgo, bũmb ning y sẽn karemdã zugu. Y sã n wa karemdẽ bɩ y sok y meng yaa: ‘Yaa ãnd dãmb yell la b gomd ka n tɩ yɩɩda? Yaa ãnd la sẽn gomdã? Ãnd la a gomd ne, la bõe yĩnga? Yaa yɛɛnẽ, la yɩɩ wakat bʋgo?’ Sogsg a woto na n sõng-y lame, tɩ y tags bũmb ning sẽn tog n pa y yamẽ wã yelle. Sẽn paase, karengã sasa, bɩ y gʋlsd bũmb nins y sẽn bãngdã koɛɛg-koɛɛga. Y sã n gʋlsd woto, paada y yamẽ, la sõngd-y tɩ y wʋmd y sẽn karemdã võor sõma. Sõngd-y lame me tɩ y pa yĩmd bũmb ning y sẽn karemdã ye. Y tõe n gʋlsa sogsgo, bũmb nins y sẽn maan vaeesg n yã, y sẽn karem n bãng bũmb ninsi, y sẽn tõe n tũ y sẽn karem bũmb ningã to-to, la y gʋls y sũurã sã n yɩɩ noog ne karengã. Y sã n nong n gʋlsd bõn-kãensã, na n sõng-y lame tɩ y get Wẽnnaam Gomdã wa koɛɛg a sẽn taas yãmb mengã.

7. D sã n wa karemd Biiblã, yaa tɩlɛ tɩ d maand bõe, la bõe yĩnga? (Matiye 24:15)

⁷ A Zeezi wilga bũmb a to sẽn tõe n sõng-do, tɩ d sã n wa karemd Wẽnnaam Gomdã bɩ d wʋm a võore. Yaa d sẽn na n tagsd neere. (Karm-y Matiye 24:15.) D sã n tagsd neere, d na n bãnga bũmb toor-toorã d sẽn karemdã sẽn tũud taab to-to, zĩis nins sẽn yaa toor ne b taabã, la bũmb nins fãa b sẽn pa togs vẽeneg karengã pʋgẽ wã. Sẽn paase, a Zeezi wilgame tɩ d segd n tagsa neere, n bãng bũmb kẽer sẽn wilgd tɩ Biiblã bãngr-goamã pidsdame. Dẽnd d sã n dat tɩ bũmb nins fãa d sẽn karemd Biiblã pʋgẽ wã naf-d sõma, d segd n tagsda neere.

8. Bõe n tõe n sõng-do, tɩ d sã n wa karemdẽ bɩ d tagsd neere?

⁸ A Zeova kõta a nin-buiidã yam. Rẽ wã, pʋʋs-y-yã-a n kos-a t’a kõ-y yam tɩ y tõogd n tagsd neere. (Yel. 2:6) Bõe la y tõe n maane, tɩ zems ne y sẽn kosã? Bʋgs-y y sẽn karmã zug neere, la y gũus n ges rẽ ne bũmb ning y sẽn zoe n mi wã sẽn tũud taab to-to. Sẽn na yɩl n maan dẽ, bɩ y maand vaeesg d sɛbã pʋsẽ, wala makre, Vaeesg sebre, a Zeova Kaset rãmbã yĩnga pʋgẽ. Seb-kãens na n sõng-y lame tɩ y wʋm bũmb nins y sẽn karem Biiblã pʋgẽ wã võore, la y bãng y sẽn tõe n tũ rẽ to-to. (Ebre. 5:14) Y sã n karemdẽ la y tagsd neere, y na n maneg n wʋma Gʋls-sõamyã võor sõma.

KARENGÃ SASA, BAO-Y BŨMB SẼN TÕE N KENG Y TẼEBÃ

9. Zãms-bʋg sẽn tar yõod wʋsg la Sadiseyẽ-rãmbã ra pa tẽeda?

⁹ Sadiseyẽ-rãmbã ra mii Gʋls-sõamyã babg ning b sẽn da gʋls ne Ebre wã pipi sɛb a nu wã sõma, la b ra pa tẽed seb-kãens sẽn da yet bũmb ningã ye. Wala makre, d tẽeg a Zeezi sẽn leok Sadiseyẽ-rãmbã to-to, b sẽn wa n sok-a sogsg kũum vʋʋgrã wɛɛngẽ wã. A sok-b lame yaa: “Yãmb pa karem a Moyiiz sebrã pʋgẽ, kibar ning sẽn gomd gõos tuugã yellã pʋgẽ tɩ Wẽnnaam yeel-a lame: ‘Mam yaa a Abrahaam Wẽnnaam, n yaa a Izaak Wẽnnaam, n le yaa a Zakoob Wẽnnaam’ la?” (Mark 12:18, 26) Yaa vẽeneg tɩ Sadiseyẽ-rãmbã ra karma gom-kãng n yɩlme, la a Zeezi sokrã wilgame tɩ bũmb sẽn da tar yõod wʋsg võor la b pa wʋmde. Yaa kũum vʋʋgrã.—Mark 12:27; Luk 20:38.d

10. D sã n wa karemd Biiblã, bõe la d segd n bao n bãnge?

¹⁰ Bõe la woto fãa sõngd tõnd tɩ d bãnge? D sã n wa karemd Biiblã vɛrse wall kibar sẽn be Biiblã pʋgẽ, d segd n bao n bãnga bũmb ning fãa rẽ sẽn zãmsd tõndo. D pa rat n bãng bũmb ning a sẽn zãmsd tõnd t’a võorã wʋmb yaa nana wã bal ye. D ratame me n yã sagls la noy nins sẽn pa vẽenegã. Rẽ yaa wa arzɛk sẽn solge, tɩ d segd n vaees n yaool n yã.

11. Wa 2 Tɩmote 3:16, 17 sẽn wilgdã, bõe la d tõe n maan tɩ d Biiblã kareng sasa bɩ d paam bũmb sẽn na n keng d tẽebã?

¹¹ D sã n wa karemd Biiblã, bõe n tõe n sõng-d tɩ d yã bũmb sẽn tõe n keng d tẽebã? D ges 2 Tɩmote 3:16, 17 sẽn yet bũmb ninga. (Karm-y-yã.) Vɛrse-kãensã yetame tɩ “Gʋls-sõamyã tõr . . . yõodã yaa” 1) zãms neda, 2) wilg ned a kongre, 3) rems yɛla, la 4) kibl neda. Baa Biiblã sɛb nins d sẽn pa nong n karemdẽ wã tõe n nafa tõnd woto. Y sã n wa karemd Biiblã, bɩ y bao n bãng rẽ sẽn zãmsd yãmb bũmb ning a Zeova zugu, a raabã wɛɛngẽ, wall Wẽnnaam saglsã wɛɛngẽ. Bao-y n bãng-y Biiblã sẽn tõe n wilg ned a kongr to-to. Sẽn na yɩl n maan dẽ, ges-y vɛrse-rãmbã y sẽn karemdã sẽn tõe n sõng-y to-to tɩ y zãag y meng ne minim-wẽns la manesem-wẽnse, la y kell n maan sɩd ne a Zeova. Bao-y n bãng-y y sẽn tõe n tall bũmb nins y sẽn karemdã n rems yɛl to-to, wala makre, y sã n wa seg ned sẽn tar tags-kɛg koɛɛgã mooneg sasa. Ges-y vɛrse wã sẽn kibind yãmb to-to wã, la a sẽn tõe n sõng-y to-to tɩ y ges yɛlã wa a Zeova sẽn get-b to-to wã. Y sã n ning bõn-kãensã a naasã y yamẽ, na n sõng-y lame tɩ y sã n wa karemd Biiblã, bɩ y yã bũmb sẽn tõe n keng y tẽebã.

BAS-Y TƖ Y BIIBLÃ KARENG TOEEM-YÃ

12. Bõe yĩng t’a Zeezi sok Fariziyẽ-rãmbã tɩ “yãmb pa karem Tõogã pʋgẽ?”

¹² Sẽn na yɩl n wilg tɩ Fariziyẽ-rãmbã ra tara tags-kɛg Gʋls-sõamyã zugu, a Zeezi sok-b lame tɩ “yãmb pa karem Tõogã pʋgẽ?” (Mat. 12:1-7)e Daar-n-kãnga, Fariziyẽ-rãmbã rõda a Zeezi karen-biisã tɩ b kɩɩsa Vʋʋsg daarã noore. A Zeezi leok-b lame, n togs-b kibay a yiib sẽn be Gʋls-sõamyã pʋgẽ la vɛrse sẽn be Ooze sebrã pʋgẽ, n wilg tɩ b pa wʋmd Vʋʋsg daarã noorã võore, la tɩ b manesmã wilgdame tɩ b pa nimbãan-zoɛtb ye. Bõe yĩng tɩ nin-kãensã pa bas tɩ b sẽn karemd bũmb ning Wẽnnaam Gomdã pʋgẽ wã kɩt tɩ b toeeme? Bala b ra karemdame n ningd b taabã taale, la b ra yaa wuk-m-mens rãmba. B manesmã sẽn da pa sõma wã yĩnga, kɩtame tɩ b ra pa wʋmd b sẽn da karemd bũmb ningã võor ye.—Mat. 23:23; Zã 5:39, 40.

13. Ne yam-bʋg la d segd n karemd Biiblã, la bõe yĩnga?

¹³ A Zeezi sokrã wilgdame tɩ d segd n karemda Biiblã ne yam-sõngo. D pa rat n yɩ wa Fariziyẽ-rãmbã ye. D segd n yɩɩ pʋ-peelem dãmba, la d sakdẽ tɩ b zãmsd tõndo. Y segd n talla “sũ-bʋgsem n sak tɩ b ning Wẽnnaam gomdã sẽn tõe n fãag yãmbã y sũyã pʋsẽ.” (Zak 1:21) D sã n yaa sũ-bʋgsem soaba, d na n basame tɩ Wẽnnaam Gomdã sõng-d tɩ d toeeme. Yaa d sã n tar yam-sõngo, la d pa wuk-m-mens rãmb bal la Biiblã kibay nins sẽn gomd nimbãan-zoeer la nonglem yellã na n naf-do.

14. Bõe n wilgd tɩ d basdame tɩ Biiblã toeemd tõndo? (Ges-y fot-rãmbã me.)

¹⁴ D manesmã sẽn yaa to-to ne neb a taabã wilgda d sã n basdame tɩ Wẽnnaam Gomdã toeemd tõndo. Fariziyẽ-rãmbã pa bas tɩ Wẽnnaam Gomdã kẽ b sũyã ye. La woto kɩtame tɩ b ra ningd “bʋʋm dãmbã taale.” (Mat. 12:7) Woto me, d sẽn get d taabã to-to wã, la d manesmã sẽn yaa to-to ne-bã wilgda d sã n basdame tɩ Wẽnnaam Gomdã toeemd tõndo. Wala makre, d nong n gomda d taabã sẽn maand bũmb nins tɩ yaa sõma wã yell bɩ? Bɩ yaa b kong-bõonesã la d get n yɩɩda? D yaa nimbãan-zoɛta, n nong n kõt d taabã sugri, bɩ d nong n ningda d taabã taale, la d tar sũ-kẽk ne-ba? Sogsg a woto tõe n sõng-d lame, tɩ d bãng d sã n basdame tɩ d sẽn karemd bũmb ninsã toeemd d tagsa wã la d manesmã.—1 Tɩm. 4:12, 15; Ebre. 4:12.

WẼNNAAM GOMDÃ KARENG KÕTA SŨ-NOOGO

15. A Zeezi tagsg ra yaa wãn ne Gʋls-sõamyã?

¹⁵ A Zeezi ra nonga Gʋls-sõamyã. Yɩɩn-sõamyã 40:9 pĩnd n togsa a tagsg sẽn yaa to-to ne rẽ. Be b yetame yaa: “Mam Wẽnnaam, yãmb daabã maaneg n kõt maam sũ-noogo. Yãmb tõogã bee mam sũurã pʋgẽ.” Rẽ kɩtame t’a ra tar sũ-noogo, la a kell n tõog n maan a Zeova raabã. Tõnd me sã n modgdẽ tɩ Wẽnnaam Gomdã d sẽn karemdã kẽed d sũyã, d tõe n paama sũ-noogo, la d paam tõogr bũmb nins d sẽn maandã pʋgẽ.—Yɩɩn. 1:1-3.

16. Bõe la y rat n maane, tɩ Wẽnnaam Gomdã kareng naf-y sõma? (Ges-y zĩ-gũbrã: “A Zeezi sẽn yeel bũmb ningã tõe n sõng-y lame, y sã n wa karemd Biiblã.”)

¹⁶ D tũ a Zeezi sẽn yeel bũmb ningã, la d rɩk a togs-n-taar n modg tɩ d sẽn karemd Biiblã to-to wã sõmblem paase. D sã n dat tɩ d Biiblã kareng naf-d sõma, d segd n pʋʋsdame, n maagd d yĩng n karemdẽ, n sokd d mens sogsgo, la d gʋlsd bũmb kẽer d sẽn dat tɩ pa d yamẽ. D segd n tagsa d sẽn karemdã zug neere. Siglgã sɛbã sẽn tik Biiblã zugã tõe n sõng-d lame tɩ d maan woto. D sã n wa karemd Biiblã, d segd n modgame n bao bũmb sẽn tõe n keng d tẽebã. Woto na n sõng-d lame tɩ d sẽn tar Biiblã n tʋmd to-to wã sõmblem paase, baa vɛrse nins d sẽn pa nong n tʋmd ne wã. La d sã n wa karemd Wẽnnaam Gomdã bɩ d tall yam-sõngo, n bas t’a sõng-d tɩ d toeeme. D sã n modgd n maand woto, Biiblã kareng na n naf-d-la sõma, la sõng-d tɩ d kell n tall zood sõma ne a Zeova.—Yɩɩn. 119:17, 18; Zak 4:8.