A 5 soabã:
Baood-y n bãngd-y Wẽnnaam
BÕE LA BIIBLÃ YETA? “Sũ-noog rãmb la neb nins sẽn mi tɩ b segd n baoa Wẽnnaamã.”—Matɩe 5:3, NW.
BÕE N KƖT TƖ PA NANA? Tũudum toɛy-toɛy bãmb tusa n be rũndã-rũndã, tɩ b wʋsg sẽn wilgd d sẽn segd n bao Wẽnnaam to-to wã pa yembr ye. Woto wã, y maanda wãn n bãng tũudum bʋg n togsd sɩd la a tat Wẽnnaam yam? Seb-gʋlsdb kẽer yʋy sẽn yi tẽedame tɩ sak n deeg tɩ Wẽnnaam beeme la mao n sak-a pa tũud taaba, la tɩ sẽn paase, pʋd n wata ne zu-loeese. Sebr a yembr (Maclean’s magazine) kʋmsa seb-gʋlsd a ye goam n yeel woto: “Kiris-nebã sẽn dat tɩ nebã tẽ tɩ bũmb sẽn yɩɩd siãnsã beeme la tɩ d pʋd n pa tõe n wʋm a võor sõma wã, . . . boogda d vɩɩmã barka, la kɩtdẽ tɩ d nong nen-kɛglem.”
BÕE LA Y SEGD N MAANE? Bao-y n bãng-y bũmb nins sẽn wilgd vẽeneg tɩ Wẽnnaam sɩd beeme wã. (Rom dãmba 1:20; Hebre dãmba 3:4) Da bas-y tɩ bũmb baa a ye koms y raoodo, tɩ y pa bao sogsg nins sẽn pʋgdã leoor ye. Bãmb la woto: Wẽnnaam naana tõnd bõe yĩnga? Ned sã n ki, a tʋgd n vɩɩ zĩig a to bɩ? Bõe yĩng tɩ ãdem-biisã namsd wʋsgo? Bõe la Wẽnnaam dat tɩ mam maane? Y sã n tõog n paam sogs-kãensã leoore, y na n paama sũ-noog hakɩka.
Da sak-y n deeg-y nebã sẽn leokd sogs-kãensã to-to wã zond-yaar ye. Wẽnnaam Gomdã sagend-y lame tɩ y ‘tʋm ne y yamã’ n bãng sẽn noom Wẽnnaam. (Rom dãmba 12:1, 2) Y sã n maan woto, a na n ninga y modgrã barka. Y sã n bao sẽk n zãmsd Biiblã la y tũud a saglsã, na n sõng-y lame tɩ y gil yɛla. Sẽn paase, na n booga y yɩɩrã la kɩt tɩ y vɩɩmã maneg n yɩ-y noogo. Woto pa belgr baa bilf ye. Neb milyõ rãmb sẽn yit tẽns toɛy-toɛy sẽn bao n bãng Wẽnnaam la a raabã sɩd paama barka, b sẽn maan woto wã yĩnga.
Y sã n tũud Biiblã saglsã tɩ nafd-yã, y na n maneg n saka Wẽnnaam n paase. A Zeova Kaset rãmbã tʋll n sõng-y lame tɩ y zãms Biiblã. Modg-y n sak-y b sõngrã. Y sã n sake, y wilgdame tɩ y sak n deega bũmb ning tʋm-tʋmd a Poll sẽn yeelã. A ra yeela woto: “Ned sẽn sakd Wẽnnaam la a maand sũ-noog ne a sẽn yaa bũmb ningã, yãoã tara yõod wʋsgo.”—1 Tɩmote 6:6.
[Foto, seb-neng a 8]
Bao-y n bãng-y sẽn tat Wẽnnaam yam